ନନ୍ଦିଘୋଷ ବ୍ୟୁରୋ: ରଣଜୀରେ ବିରାଟ କୋହଲି ଫ୍ଲପ୍ । ରେଲଓ୍ବ ବିପକ୍ଷ ପ୍ରଥମ ପାଳିରେ କୋହଲି ମାତ୍ର ୬ ରନ କରି ଆଉଟ୍ ହୋଇଥିଲେ । ତେବେ ସେ ଦ୍ବିତୀୟ ପାଳିରେ ଭଲ ପ୍ରଦର୍ଶନ କରିବେ ବୋଲି ଆଶା ରଖିଥିଲେ ଫ୍ୟାନ୍ସ । କିନ୍ତୁ ଦ୍ବିତୀୟ ପାଳିରେ ବିରାଟଙ୍କୁ ବ୍ୟାଟିଂ ପାଇଁ ମିଳିଲାନି ସୁଯୋଗ । ଗୋଟିଏ ପାଳିରେ ଦିଲ୍ଲୀ ୧୯ ରନରେ ବିଜୟୀ ହୋଇଛି । ୧୩ ବର୍ଷ ପରେ କୋହଲି ରଣଜୀ ଟ୍ରଫି ଖେଳିବା ପାଇଁ ମଇଦାନକୁ ଓହ୍ଲାଇଥିଲେ । ବର୍ଡର ଗାଭାସ୍କର ଟ୍ରଫିରେ ନୈରାଶ୍ୟଜନକ ପ୍ରଦର୍ଶନ କରିଥିଲେ । ମାତ୍ର ଆଶା ରଖା ଯାଇଥିଲା କି ରଣଜୀରେ ଫର୍ମକୁ ଫେରିବେ । ମାତ୍ର ଏକ ସୁନ୍ଦର ଚୌକା ମାରିବା ପରେ କ୍ଲିନ୍ ବୋଲ୍ଡ ହୋଇ ପାଭିଲିୟନ ଫେରିଥିଲେ । ଯାହାକୁ ନେଇ ସୋସିଆଲ ମିଡିଆରେ କୋହଲିଙ୍କ କିଛି ୟୁଜର୍ସ ଟ୍ରୋଲ ମଧ୍ୟ କରିଥିଲେ । କେବଳ କୋହଲିଙ୍କ ଖେଳ ଦେଖିବାକୁ ଷ୍ଟାଡିୟମରେ ଖଚାଖଚ ଭିଡ଼ ହୋଇଥିଲା । ମାତ୍ର ପ୍ରଦର୍ଶନ ନୈରାଶ୍ୟଜନକ ରହିଥିଲା । ତେବେ ଦିଲ୍ଲୀ ଦ୍ବିତୀୟ ପାଳି ବୋଲିଂ ଉଚ୍ଚ କୋଟିର ଖେଳ ପ୍ରଦର୍ଶନ କରିଥିଲା । ଯାହାଦ୍ବାରା ଦଳକୁ ଗୋଟିଏ ପାଳିରେ ୧୯ରେ ବିଜୟୀ ହୋଇ ପାରିଛି ।
୨୦୨୫-୨୬ରେ ମୋଟ ବ୍ୟୟ ୫୦.୬୫ ଲକ୍ଷ କୋଟି
ନିର୍ମଳାଙ୍କ ବଜେଟ ଟପିଲା ୫୦ ଲକ୍ଷ କୋଟି । ୨୦୨୫-୨୬ ଆର୍ଥିକ ବର୍ଷ ପାଇଁ କେନ୍ଦ୍ର ଅର୍ଥମନ୍ତ୍ରୀ ଆଜି ସଂସଦରେ ଉପସ୍ଥାପନ କରିଥିବା ବଜେଟର ମୋଟ ବ୍ୟୟବରାଦ ୫୦.୬୫ ଲକ୍ଷ କୋଟି । ଅର୍ଥାତ ନିର୍ମଳା ୫୦.୬୫ ଲକ୍ଷ କୋଟିର ବଜେଟ ଉପସ୍ଥାପନ କରିଛନ୍ତି । କରଜ ବିନା ମୋଟ ଆୟ ୩୪.୯୬ ଲକ୍ଷ କୋଟି ଲକ୍ଷ୍ୟ ରଖାଯାଇଥିବା ବେଳେ ମୋଟ କର ଆୟ ପରିମାଣ ୨୮.୩୭ ଲକ୍ଷ କୋଟି ଲକ୍ଷ୍ୟ ରଖାଯାଇଛି । କ୍ୟାପିଟାଲ ଏକ୍ସପେଣ୍ଡିଚର ପରିମାଣ ୧୦.୧୮ ଲକ୍ଷ କୋଟି । ରାଜସ୍ବ ନିଅଣ୍ଟ ପରିମାଣ ଜିଡିପିର ୪.୪ ପ୍ରତିଶତ ରହିଛି । କ୍ୟାପେକ୍ସ ଏକ୍ସପେଣ୍ଡିଚେର ୧୧.୨୧ ଲକ୍ଷ କୋଟି ଟଙ୍କା ରହିଛି । ଗତଥର ବଜେଟ ପରିମାଣ ଥିଲା ୪୮.୨୧ ଲକ୍ଷ କୋଟି ।
ବିହାର ଲାଗି ଅର୍ଥମନ୍ତ୍ରୀ ନିର୍ମଳା ଖୋଲିଦେଲେ ବଜେଟ୍ ପେଡ଼ି
ନୂଆଦିଲ୍ଲୀ: ବିହାର ଲାଗି ଅର୍ଥମନ୍ତ୍ରୀ ନିର୍ମଳା ସୀତାରମଣ ଖୋଲିଦେଲେ ବଜେଟ୍ ପେଡ଼ି। ଗତ ଲୋକସଭା ନିର୍ବାଚନ ପୂର୍ବରୁ ଆନ୍ଧ୍ରପ୍ରଦେଶକୁ ତୁଷ୍ଟ କରିବା ପରି ଏଥର ବିହାରକୁ ତୁଷ୍ଟ କରିଛନ୍ତି ସରକାର। ବିହାରରେ ପ୍ରତିଷ୍ଠା ହେବ ମଖାନା ବୋର୍ଡ। ଏହା ସହ ପ୍ରତିଷ୍ଠା ହେବ ଏକ ଜାତୀୟ ଖାଦ୍ୟ ପ୍ରଯୁକ୍ତି, ଔଦ୍ୟୋଗିକତା ଓ ପରିଚାଳନା ପ୍ରତିଷ୍ଠାନ। ଆସନ୍ତା ନଭେମ୍ବରରେ ରାଜ୍ୟରେ ବିଧାନସଭା ନିର୍ବାଚନ ହେବାକୁ ଯାଉଥିବା ବେଳେ ତା ପୂର୍ବରୁ ବଜେଟରେ ବିହାରକୁ ଫୋକସ କରିଛନ୍ତି ସୀତାରମଣ। ଏପରିକି ପୋଷାକରେ ବି ରାଜନୀତି କରିଛନ୍ତି ଅର୍ଥମନ୍ତ୍ରୀ।
ବିହାର ମିଥିଳା ଅଞ୍ଚଳରୁ ଉତ୍ପାଦିତ ହେଉଥିବା ମଧୁବନି ଶାଢି ପିନ୍ଧି ବଜେଟ ଉପସ୍ଥାପନା କରିଥିଲେ ନିର୍ମଳା। ଏହି ଶାଢିକୁ ବି ନିର୍ମଳାଙ୍କୁ ଉପହାର ଦେଇଥିଲେ ପଦ୍ମଶ୍ରୀ ବିଜେତା ଦୁଲାରୀ ଦେବୀ। ବିହାରର ଭିତ୍ତିଭୂମିକୁ ସୁଦୃଢ କରିବା ଲାଗି ପାଟନା ବିମାନବନ୍ଦରକୁ ସମ୍ପ୍ରସାରଣ କରାଯିବ। ଏହା ସହ ରାଜ୍ୟରେ ପ୍ରତିଷ୍ଠା ହେବ ୪ଟି ନୂଆ ଗ୍ରୀନଫିଲ୍ଡ ବିମାନ ବନ୍ଦର ଏବଂ ବିହତାରେ ଏକ ବ୍ରାଉନଫିଲ୍ଡ ବିମାନ ବନ୍ଦର। ସେହିପରି ମିଥିଳାଞ୍ଚଳରେ ଥିବା ପଶ୍ଚିମାଞ୍ଚଳ କୋସି କେନାଲ ଇଆରଏମ ପ୍ରକଳ୍ପ ଲାଗି ଆର୍ଥିକ ସହାୟତା ଘୋଷଣା ହୋଇଛି। ଗତ ୨୦୨୪ ବଜେଟରେ ବି ବିହାର ଲାଗି ୨୬ ହଜାର କୋଟି ଟଙ୍କା ପ୍ରଦାନ କରିଥିଲେ ନିର୍ମଳା।
୧୨ ଲକ୍ଷ ଆୟ ଉପରେ ଦେବାକୁ ପଡ଼ିବ ନାହିଁ କୌଣସି ଆୟକର
ନୂଆଦିଲ୍ଲୀ: ମଧ୍ୟବିତ୍ତଙ୍କ ପାଇଁ ସରକାରଙ୍କ ବଡ଼ ଘୋଷଣ । ଇନକମ୍ ଟ୍ୟାକ୍ସକୁ ନେଇ ବଡ଼ ଘୋଷଣା କଲେ ଅର୍ଥମନ୍ତ୍ରୀ ନିର୍ମଳା ସୀତାରମଣ। ଯେଉଁଥିରେ ୧୨ ଲକ୍ଷ ଆୟ ପର୍ୟ୍ୟନ୍ତ ଟ୍ୟାକ୍ସ ଛାଡ କରିଛନ୍ତି କେନ୍ଦ୍ର ସରକାର । ଏହାସହ ୧୨ରୁ ୧୬ ଲକ୍ଷ ଆୟ ପର୍ଯ୍ୟନ୍ତ ୧୫ ପ୍ରତିଶତ ଟ୍ୟାକ୍ସ, ୨୦ରୁ ୨୪ ଲକ୍ଷ ଆୟ ପର୍ୟ୍ୟନ୍ତ ୨୫ ପ୍ରତିଶତ ଟ୍ୟାକ୍ସ ଘୋଷଣା କରିଛନ୍ତି ଅର୍ଥମନ୍ତ୍ରୀ।
*୧୨ ଲକ୍ଷ ପର୍ଯ୍ୟନ୍ତ ଆୟକର ଛାଡ଼ ଘୋଷଣା
*୦-୪ଲକ୍ଷ ପର୍ଯ୍ୟନ୍ତ ଆୟକର ନାହିଁ
*୪-୮ଲକ୍ଷ ପର୍ଯ୍ୟନ୍ତ ୫ ପ୍ରତିଶତ
*୮-୧୨ଲକ୍ଷ ପର୍ଯ୍ୟନ୍ତ ୧୦ପ୍ରତିଶତ ଟିକସ
*୧୨-୧୬ ଲକ୍ଷ ପର୍ଯ୍ୟନ୍ତ ୧୫ ପ୍ରତିଶତ ଟିକସ
*୧୬-୨୦ଲକ୍ଷ ପର୍ଯ୍ୟନ୍ତ ୨୦ ପ୍ରତିଶତ ଟିକସ
*୨୦-୨୪ଲକ୍ଷ ପର୍ଯ୍ୟନ୍ତ ୨୫ ପ୍ରତିଶତ ଟିକସ
*୨୪ରୁ ଅଧିକ ହେଲେ ୩୦ପ୍ରତିଶତ ଟିକସ
ଅର୍ଥମନ୍ତ୍ରୀଙ୍କ ସୂଚନା ମୁତାବକ, ବାର୍ଷିକ ୧୨ ଲକ୍ଷ ଆୟ ପର୍ୟ୍ୟନ୍ତ ଲୋକଙ୍କୁ କୌଣସି ଇନକମ୍ ଟ୍ୟାକ୍ସ ଦେବାକୁ ପଡିବନି। ନୂଆ ଟ୍ୟାକ୍ସ ସ୍ଲାବ୍ ବ୍ୟବସ୍ଥା ଅନୁସାରେ ଏହି ଘୋଷଣା କରାଯାଇଛି । ଅର୍ଥନୈତିକ ଅଭିବୃଦ୍ଧି ଏବଂ ଜନସଂଖ୍ୟାର ଆବଶ୍ୟକତା ଉପରେ ନିର୍ଭର କରି ଭାରତରେ ଆୟକର ହାର ସମୟ ସହିତ ବଦଳିଛ। ଏହି ହାରଗୁଡିକର ବୃଦ୍ଧି କିମ୍ବା ହ୍ରାସ ସାଧାରଣ ଜନତାଙ୍କ ଉପରେ ସିଧାସଳଖ ପ୍ରଭାବ ପକାଇଥାଏ, ଯାହା ନିଶ୍ଚିତ କରେ ଯେ ସମସ୍ତ ବିଭାଗ ପାଇଁ ଟିକସ ବ୍ୟବସ୍ଥା ସମାନ।
ତେବେ ଏହା ପୂର୍ବରୁ ୭ ଲକ୍ଷ ଆୟ ପର୍ୟ୍ୟନ୍ତ କୌଣସି ଟ୍ୟାକ୍ସ ଦେବାକୁ ପଡୁନଥିଲା, ଯାହାକୁ ଏବେ ବୃଦ୍ଧି କରି ୧୨ ଲକ୍ଷ କରିଛନ୍ତି ସରକାର । ତେବେ ୨୪ ଲକ୍ଷରୁ ଅଧିକ ଆୟ ଉପରେ ଏବେ ୩୦ ପ୍ରତିଶତ ଟ୍ୟାକ୍ସ ଦେବାକୁ ପଡିବ । ଏହାସହ ୧୫ରୁ ୨୦ ଲକ୍ଷ ଆୟ ଉପରେ ୨୦ ପ୍ରତିଶତ ଦେବାକୁ ପଡିବ ।
୨୦୨୫-୨୬ ବଜେଟରେ ଶସ୍ତା ହେଲା ଏହି ସବୁ ଜିନିଷ
ନୂଆଦିଲ୍ଲୀ: ଲୋକସଭାରେ ଉପସ୍ଥାପିତ ହୋଇଛି ୨୦୨୫-୨୬ ବଜେଟ୍ । ବଜେଟ୍ ଉପସ୍ଥାପନ କରିଛନ୍ତି ଅର୍ଥ ମନ୍ତ୍ରୀ ନିର୍ମଳା ସୀତାରମଣ । ଯେଉଁଥିରେ ବିଭିନ୍ନ କ୍ଷେତ୍ର ପାଇଁ ଆର୍ଥିକ ପ୍ୟାକେଜ୍ ଘୋଷଣା କରାଯାଇଛି । ବଜେଟ୍ରେ ମୋଟ ଲକ୍ଷ କୋଟି ଟଙ୍କାର ବ୍ୟୟ ବରାଦ କରାଯାଇଛି । ଅନେକ ଜିନିଷ ଶସ୍ତା ହୋଇଥିବା ବେଳେ କିଛି ସାମଗ୍ରୀ ମହଙ୍ଗା ମଧ୍ୟ ହୋଇଛି । ତେବେ ଜାଣିରଖନ୍ତୁ କେଉଁ କେଉଁ ଜିନିଷ ଶସ୍ତା ହୋଇଛି।
ବଜେଟରେ କ’ଣ ଶସ୍ତା ?
ମୋବାଇଲ ଫୋନ ଶସ୍ତା ହେବ
ଜୀବନ ରକ୍ଷାକାରୀ ୩୬ ଔଷଧ ଶସ୍ତା ହେବ
LED ଟିଭି ଶସ୍ତା ହେବ
କପଡ଼ା ସାମଗ୍ରୀ ଶସ୍ତା ହେବ
ଇଭିକାର୍ ଶସ୍ତା ହେବ
ସାମୁଦ୍ରିକ ଖାଦ୍ୟ ଶସ୍ତା ହେବ
ବୈଦ୍ୟୁତିକ ସାମଗ୍ରୀ ଶସ୍ତା ହେବ
ଶସ୍ତା ହେବ ଚମଡ଼ାଜାତ ଦ୍ରବ୍ୟ, ହ୍ରାସ ହେଲା କର
ଲିଥିୟମ ବ୍ୟାଟେରୀ ମଧ୍ୟ ଶସ୍ତା
ଆସିଲା ୨୦୨୫-୨୬ ବଜେଟ୍, କୃଷକଙ୍କ ବିକାଶକୁ ଗୁରୁତ୍ୱ
ନୂଆଦିଲ୍ଲୀ: ଆସିଲା ୨୦୨୫-୨୬ ବଜେଟ୍ । ଲୋକସଭାରେ ବଜେଟ୍ ଉପସ୍ଥାପନା କଲେ ଅର୍ଥମନ୍ତ୍ରୀ ନିର୍ମଳା ସୀତାରମଣ । ବିଶ୍ବର ଅର୍ଥନୀତିକୁ ଦୃଷ୍ଟିରେ ରଖି ବଜେଟ ଉପସ୍ଥାପନା। ଆସନ୍ତା ୫ ବର୍ଷରେ ସମସ୍ତଙ୍କ ବିକାଶକୁ ଅଗ୍ରାଧିକାର । ଚଳିତ ବଜେଟରେ ୧୦ଟି କ୍ଷେତ୍ରକୁ ଫୋକସ ଦିଆଯାଇଛି । ଯୁବବର୍ଗ, ମହିଳା, କୃଷକଙ୍କ ବିକାଶକୁ ଗୁରୁତ୍ୱ । କୃଷି ଉତ୍ପାଦନ ବୃଦ୍ଧି ଉପରେ ଫୋକସ୍ । ଗରିବୀ ଦୂରୀକରଣ ଉପରେ ସରକାରଙ୍କ ଗୁରୁତ୍ୱ । ଖାଦ୍ୟ ଉତ୍ପାଦନରେ ଆତ୍ମ ନିର୍ଭରଶୀଳ ହେବ ଦେଶ। କୃଷକଙ୍କ ପାଇଁ ‘ଧନଧାନ୍ୟ ଯୋଜନା’ର ଘୋଷଣା । କିଷାନ କ୍ରେଡିଟ୍ କାର୍ଡ୍ ଲିମିଟ୍ ୫ ଲକ୍ଷକୁ ବୃଦ୍ଧି । ଏହାକୁ ୩ ଲକ୍ଷରୁ ୫ ଲକ୍ଷ ଟଙ୍କାକୁ ବୃଦ୍ଧି କରାଯାଇଛି। ଅର୍ଥାତ୍ କୃଷକମାନେ ବର୍ତ୍ତମାନ ୫ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ନେଇପାରିବେ। କିଷାନ କ୍ରେଡିଟ କାର୍ଡ ଜରିଆ ୭.୭ କୋଟି ଚାଷୀ ଉପକୃତ ।
ବିହାର ପାଇଁ ବଜେଟରେ ବିଶେଷ ଘୋଷଣା। ବିହାରରେ ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ଫୁଡ୍ ଟେକ୍ନୋଲୋଜି ନିର୍ମାଣ ହେବ। ବିହାରର ମଖାନା ଚାଷୀଙ୍କ ପାଇଁ ବଜେଟରେ ବିଶେଷ ବ୍ୟବସ୍ଥା। ବିହାରରେ ମଖାନା ବୋର୍ଡ ଗଠନ କରାଯିବ ବୋଲି ଅର୍ଥମନ୍ତ୍ରୀ ଘୋଷଣା କରିଛନ୍ତି। ବୋର୍ଡ ମାକାନା ଚାଷୀମାନଙ୍କୁ ତାଲିମ ସହାୟତା ଯୋଗାଇବ ଏବଂ ସମସ୍ତ ସରକାରୀ ଯୋଜନାରେ ସାମିଲ୍ କରିବା ପାଇଁ ମଧ୍ୟ କାର୍ଯ୍ୟ କରିବ।। ଏହା ସେମାନଙ୍କର ଆୟ ବୃଦ୍ଧି କରିପାରିବ ଏବଂ ନୂତନ ନିଯୁକ୍ତି ସୁଯୋଗ ସୃଷ୍ଟି କରିପାରିବ ବୋଲି ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି।
ସେପଟେ ମତ୍ସ୍ୟ ଉତ୍ପାଦନରେ ଭାରତ ସାରା ବିଶ୍ବରେ ଦ୍ବିତୀୟ ବୋଲି ଗୃହରେ ଅବଗତ କଲେ କେନ୍ଦ୍ର ଅର୍ଥମନ୍ତ୍ରୀ । ବଜେଟରେ ଗ୍ରାମୀଣ ମହିଳା ଓ ଯୁବବର୍ଗଙ୍କୁ ଅତିରିକ୍ତ ସହାୟତା ମିଳିବ । ଭାରତର ଅର୍ଥନୀତି ଗତିଶୀଳ ରହିଛି । ଆସନ୍ତା ୫ ବର୍ଷରେ ସମସ୍ତଙ୍କ ବିକାଶକୁ ଅଗ୍ରାଧିକାର ଦିଆଯିବ । ଜ୍ଞାନ ଉପରେ ଆମର ଫୋକସ ,ବିକଶିତ ଭାରତ ପାଇଁ ବଜେଟ୍ ପ୍ରସ୍ତୁତ ହୋଇଛି । କପା ଚାଷୀଙ୍କୁ ସର୍ବୋତ୍ତମ ବୈଷୟିକ ସୁବିଧା ଯୋଗାଇ ଦିଆଯିବ ବୋଲି କହିଛନ୍ତି ଅର୍ଥମନ୍ତ୍ରୀ ।
ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ବିହାର ପାଇଁ ଅନେକ ଘୋଷଣା । ପାଟନା ବିମାନ ବନ୍ଦରର ବିସ୍ତାର ବ୍ୟତୀତ ଗ୍ରୀନଫିଲ୍ଡ୍ ବିମାନ ବନ୍ଦର ପ୍ରତିଷ୍ଠା। ଘୋଷଣା ମିଥିଳାଞ୍ଚଳରେ ପଶ୍ଚିମ ଲାଗତ କେନାଲ ପରିଯୋଜନା ବାବଦରେ ଘୋଷଣା ।
ଏମଏସଏମଇ ବିକାଶର ଦ୍ବିତୀୟ ଇଞ୍ଜିନ । ୭.୫ କୋଟି ଏମଏସଏମଇ କର୍ମଚାରୀଙ୍କ ଉପରେ ଫୋକସ କରାଯାଇଛି । ଏହାପାଇଁ ଅଧିକ ଋଣ ମଂଜୁରୀ ଦିଆଯିବ । ଯାହାଦ୍ବାରା ଯୁବବର୍ଗ ଅଧିକ ନିଯୁକ୍ତି ପାଇବେ । ଅଣଚମଡ଼ା ଶିଳ୍ପ ଉପରେ ଏଥର ଫୋକସ ରହିବ । ୨୫-୨୬ ଆର୍ଥିକ ବଜେଟରେ ୧୦ଟି ଦିଗ ପ୍ରତି ବିଶେଷ ଧ୍ୟାନ ଦିଆଯାଇଛି । ଗରିବ, ଯୁବକ, ଅନ୍ନଦାତା, ମହିଳାଇନ୍ ଇଣ୍ଡିଆକୁ ଆହୁରି ଆଗକୁ ବଢ଼ାଇବା ଓ MSME ଆଦି ଉପରେ କେନ୍ଦ୍ର ସରକାରଙ୍କ ଫୋକସ ।
ବଜେଟରେ ଗ୍ରାମୀଣ ମହିଳା ଓ ଯୁବବର୍ଗଙ୍କୁ ଅତିରିକ୍ତ ସହାୟତା । ଷ୍ଟାର୍ଟ ଅପ କ୍ଷେତ୍ର ଲାଗି ୨୭ଟି କ୍ଷେତ୍ରକୁ ଫୋକସ । ପ୍ରଥମ ପିଢିର ଉଦ୍ୟୋଗୀଙ୍କୁ ୨ କୋଟି ଟଙ୍କାର ଷ୍ଟାର୍ଟଅପ୍ କ୍ୟାପିଟାଲ । ଏମଏସଏମଇରେ ମିଳିବ ୧୦ କୋଟି ପର୍ଯ୍ୟନ୍ତ ଋଣ । ଆମ ସରକାର ନ୍ୟାସନାଲ ମ୍ୟାନୁଫ୍ୟାକ୍ଚରିଂ ମିଶନ ପ୍ରତିଷ୍ଠା କରିବେ । ଖେଳନା ଉଦ୍ୟୋଗ ପାଇଁ ବିଶେଷ ଘୋଷଣା ।
ଦେଶରେ ସ୍ବାସ୍ଥ୍ୟସେବାର ଅଗ୍ରଗତି ପାଇଁ ୧୦ ବର୍ଷରେ ମେଡିକାଲ ସିଟ୍ ୧.୧ ଲକ୍ଷ ବୃଦ୍ଧି କରାଯିବ। ସବୁ ଜିଲ୍ଲାରେ କ୍ୟାନ୍ସର ହସ୍ପିଟାଲ୍ ପ୍ରତିଷ୍ଠା କରାଯିବ। ଆବଶ୍ୟକ ଡାକ୍ତର ରହିବେ । ଆସନ୍ତା ୩ ବର୍ଷରେ ଲକ୍ଷ୍ୟ ପୂରଣ କରାଯିବ ବୋଲି କହିଛନ୍ତି ସୀତାରମଣ। ।
ଆଜି ଶ୍ରୀମନ୍ଦିରରେ ଅନୁଷ୍ଠିତ ହେବ ମହାପ୍ରଭୁଙ୍କ ଦୁର୍ଲଭ ପଦ୍ମବେଶ
ପୁରୀ: ଆଜି ଶ୍ରୀମନ୍ଦିରରେ ଅନୁଷ୍ଠିତ ହେବ ମହାପ୍ରଭୁଙ୍କ ଦୁର୍ଲଭ ପଦ୍ମବେଶ । ମୁଣ୍ଡ ଠାରୁ ପାଦ ପର୍ଯ୍ୟନ୍ତ ପଦ୍ମ ଫୁଲରେ ବିଭୂଷିତ ହେବେ ଚତୁର୍ଦ୍ଧାବିଗ୍ରହ। ମାଘମାସ ଶୁକ୍ଳପକ୍ଷ ପ୍ରତିପଦା ଠାରୁ ଶ୍ରୀପଞ୍ଚମୀ ମଧ୍ୟରେ ଯେଉଁ ଦିନ ବୁଧବାର କିମ୍ବା ଶନିବାର ପଡିଥାଏ ସେହିଦିନ ମହାପ୍ରଭୁଙ୍କ ଏହି ବେଶ ଅନୁଷ୍ଠିତ ହେବାର ପରମ୍ପରା ରହିଛି । ଏହି ପରମ୍ପରା ଅନୁଯାଇ ଗତକାଲି ରାତି ବଡସିଂହାର ନୀତିରେ ମହାପ୍ରଭୂ ପଦ୍ମବେଶରେ ସଜ୍ଜିତ ହୋଇ ପହୁଡ ହୋଇଛନ୍ତି ।
ଆଜି ଅବକାଶ ନୀତି ପର୍ଯ୍ୟନ୍ତ ମହାପ୍ରଭୁଙ୍କ ଏହି ଦୁର୍ଲଭ ପଦ୍ମବେଶକୁ ଭକ୍ତମାନେ ନିଜ ଚର୍ମଚକ୍ଷୁରେ ଦେଖିବାର ସୁଯୋଗ ପାଇପାରିବେ । ବଡଛତା ମଠ ପକ୍ଷରୁ ଯୋଗାଇଥିବା ପଦ୍ମ ବେଶରେ ବଡ଼ସିଂହାର ବେଶ ଅନୁଷ୍ଟିତ ହେବ ଓ ମଠ ତରଫରୁ ଖିରୀ, ଅମାଲୁ ଭୋଗ କରାଯାଇ ଶ୍ରୀଜୀଉଙ୍କର ରାତ୍ର ପହୁଡ଼ ହେବ । ଏହି ବେଶ ପାଇଁ କାରିଗର ମାନେ ପୂର୍ବରୁ ପ୍ରସ୍ତୁତ କରି ରଖିଥିବା ବେଶ ସାମଗ୍ରୀ ଯୋଗାଇ ଦେଇଛନ୍ତି ।
ଉପକୂଳ ଓଡ଼ିଶାରେ ବଢିଲା ତାତି, ସ୍ବାଭାବିକ ଠାରୁ ୩ ରୁ ୪ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବୃଦ୍ଧି
ଭୁବନେଶ୍ୱର: ମାଘ ମାସରେ ବାଘ ଖରା। ଉପକୂଳ ଓଡ଼ିଶାରେ ବଢିଲା ତାତି। ସ୍ବାଭାବିକ ଠାରୁ ୩ ରୁ ୪ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବୃଦ୍ଧି ହୋଇଥିବା ସୂଚନା ଦେଇଛି ଆଞ୍ଚଳିକ ପାଣିପାଗ କେନ୍ଦ୍ର। ୭ ଦିନ ପର୍ଯ୍ୟନ୍ତ ରାଜ୍ୟରେ ପାଗ ମୁଖ୍ୟତଃ ଶୁଖିଲା ରହିବା ସହ ତାପମାତ୍ରା ବଢିବ। ଉପକୂଳ ଓଡ଼ିଶା ସମେତ ଆଭ୍ୟନ୍ତରୀଣ ଓଡ଼ିଶାରେ ତାତି ବୃଦ୍ଧି ନେଇ ପୂର୍ବାନୁମାନ କରିଛି ପାଣିପାଗ କେନ୍ଦ୍ର । କିଛି ସ୍ଥାନରେ ୪ ରୁ ୬ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବୃଦ୍ଧି ହେବାର ସମ୍ଭାବନା ରହିଛି । ବିଶେଷ କରି ପଶ୍ଚିମ ଓଡ଼ିଶାରେ ତାପମାତ୍ରା ଅଧିକ ବଢିବ । ଝାରସୁଗୁଡା, ସମ୍ବଲପୁର, ସୁନ୍ଦରଗଡ, ବରଗଡ, ବଲାଙ୍ଗିର, ସୋନପୁର, ନୂଆପଡା ଭଳି ଜିଲ୍ଲାରେ ମେଘମୁକ୍ତ ଆକାଶ ରହିବା ସହ ୩୦ ରୁ ୩୪ ଡିଗ୍ରୀ ମଧ୍ୟରେ ତାପମାତ୍ରା ରେକର୍ଡ ହେବ ।
ସେହିଭଳି ଦକ୍ଷିଣ ଆଭ୍ୟନ୍ତରୀଣ ଓଡ଼ିଶାରେ ମଧ୍ୟ ତାପମାତ୍ରା ବୃଦ୍ଧି ପାଇବ । ତାତି ବୃଦ୍ଧି ସହ ଦୁଇ ଦିନ ପର୍ଯ୍ୟନ୍ତ ଘନ କୁହୁଡି ଅସ୍ତବ୍ୟସ୍ତ କରିବ। ଆଜି ଘନ କୁହୁଡି ପାଇଁ ୧୦ଟି ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ବିଶେଷ କରି ବାଲେଶ୍ବର, ଭଦ୍ରକ, ଯାଜପୁର, କେନ୍ଦ୍ରାପଡା, କଟକ, ଗଜତସିଂହପୁର, କେନ୍ଦୁଝର, ଅନୁଗୁଳ, ଢେଙ୍କାନାଳ ଏବଂ ଗଞ୍ଜାମ ଜିଲ୍ଲାକୁ ସତର୍କତା ଜାରି କରାଯାଇଛି । ସେହିଭଳି ୨ ତାରିଖରେ ଘନ କୁହୁଡି ନେଇ ବାଲେଶ୍ବର, ଭଦ୍ରକ, ଯାଜପୁର, କେନ୍ଦ୍ରାପଡା, କଟକ, ଜଗତସିଂହପୁରକୁ ମଧ୍ୟ ୟେଲୋ ଆଲର୍ଟ ଜାରି କରାଯାଇଛି । ଏହି ସବୁ ଜିଲ୍ଲାରେ ୫୦ ମିଟର ତଳକୁ ଖସିବ ଦୃଶ୍ୟମାନ ଦୂରତା । କିଛି ସ୍ଥାନରେ ଜିରୋ ଭିଜିବିଲିଟି ନେଇ ଆଲର୍ଟ ଜାରି ହୋଇଛି । ଘାଟି ରାସ୍ତା ଏବଂ ଦୁର୍ଘଟଣା ପ୍ରବଣ ଅଞ୍ଚଳରେ ସତର୍କତାର ସହ ଗାଡି ଚାଳନା ପାଇଁ ପରାମର୍ଶ ଦେଇଛି ପାଣିପାଗ କେନ୍ଦ୍ର ।
ସହେପଟେ ଗତ ୧୦ ଦିନ ହେବ ଲଗାତର ଉପକୂଳ ଓଡ଼ିଶାରେ ଘନ କୁହୁଡି ଅନୁଭୁତ ହେଉଛି । ବଙ୍ଗୋପସାଗରରେ ଗୁରୁଚାପ ବଳୟ ପାଇଁ ଘନ କୁହୁଡି ଲାଗିରହିଛି । ୨୦୧୯ ରୁ ୨୦୨୫ ମଧ୍ୟରେ ପ୍ରଥମ ଥର ପାଇଁ ଲଗାଣ ୧୦ ଦିନ କୁହୁଡି ଅନୁଭୁତ ହେଉଛି ।
ଆଜିଠୁ ବଦଳିବ ଏହି ସବୁ ନିୟମ !
ନୂଆଦିଲ୍ଲୀ: ଆଜିଠୁ ଦେଶରେ ଅନେକ ପରିବର୍ତ୍ତନ । ଆଜିଠୁ ଅର୍ଥାତ୍ ଫେବୃଆରୀ ୧ ବଦଳିବ ନିୟମ। ଆଜି ୨୦୨୫-୨୬ କେନ୍ଦ୍ର ବଜେଟ ଆଗତ କରିବେ ଅର୍ଥମନ୍ତ୍ରୀ ନିର୍ମଳା ସୀତାରମଣ। ଏହି ବଜେଟ୍ ଉପରେ ସମସ୍ତଙ୍କର ନଜର ରହିଥିବା ବେଳେ ଆଜିଠୁ ବଦଳିବ ୫ ଟି ନିୟମ । ଯାହାର ପ୍ରଭାବ ଲୋକଙ୍କର ଦୈନନ୍ଦିନ ଜୀବନ ଉପରେ ପଡିପାରେ।
LPG ମୂଲ୍ୟରେ ପରିବର୍ତ୍ତନ
ସାଧାରଣଃ ପ୍ରତ୍ୟେକ ମାସର ୧ ତାରିଖରେ ସରକାର ଏଲପିଜି ମୂଲ୍ୟ ବଦଳାନ୍ତି। ଏହା ଘର ରୋଷେଇଠାରୁ ଆରମ୍ଭ କରି ରେଷ୍ଟୁରାଣ୍ଟ ଏବଂ ଅନ୍ୟାନ୍ୟ କ୍ଷେତ୍ର ପର୍ଯ୍ୟନ୍ତ ସବୁକିଛି ଉପରେ ପ୍ରଭାବ ପକାଇଥାଏ | ଆଜି LPG ର ନୂତନ ମୂଲ୍ୟ ଜାରି କରାଯାଇପାରେ । କିଛି ଦିନ ଧରି ୧୯ କେଜି କମର୍ଶିଆଲ LPG ସିଲିଣ୍ଡରର ମୂଲ୍ୟରେ ଅନେକ ପରିବର୍ତ୍ତନ ହୋଇଛି। ଅନ୍ୟପଟେ ଅନେକ ଦିନ ଧରି ୧୪ କେଜି ସିଲିଣ୍ଡରର ଦାମ ସ୍ଥିର ରହିଛି । ଏଥିପାଇଁ ଫେବୃଆରୀ ୧ରେ LPG ସିଲିଣ୍ଡରର ଦରରେ ପରିବର୍ତ୍ତନ ହେବାର ଆଶଙ୍କା ରହିଛି ।
ବୃଦ୍ଧି ପାଇପାରେ ATF ଇନ୍ଧନ ଦର
ଏୟାର ଟର୍ବାଇନ ଇନ୍ଧନ(ATF)ର ଦରରେ ପରିବର୍ତ୍ତନ ଦେଖାଯାଇପାରେ। ଯଦି ଦର ବୃଦ୍ଧି ପାଏ, ତେବେ ବିମାନ ଯାତ୍ରା ପାଇଁ ଅଧିକ ଟଙ୍କା ଗଣିବାକୁ ପଡ଼ିବ ।
ଏଟିଏମ ଉଠାଣ ଫିସରେ ପରିବର୍ତ୍ତନ
ନୂଆ ନିୟମ ଅନୁସାରେ, ଏଟିଏମରୁ ଫ୍ରି ଟ୍ରାଞ୍ଜାକ୍ସନ ସଂଖ୍ୟାକୁ କମ କରିଦିଆଯାଇଛି । ଏବେ କେବଳ ପ୍ରତି ମାସରେ ୩ ଫ୍ରି ଟ୍ରାଞ୍ଜାକ୍ସନର ଅନୁମତି ରହିବ । ଏହାପରେ ପ୍ରତି ଅତିରିକ୍ତ ଟ୍ରାଞ୍ଜାକ୍ସନରେ ୨୫ ଟଙ୍କା ଶୁଳ୍କ ପଡିବ । ଯାହା ପୂର୍ବରୁ ୨୦ ଟଙ୍କା ଥିଲା । ଅନ୍ୟ ବ୍ୟାଙ୍କ ଏଟିଏମରୁ ଉଠାଣ କଲେ ଏହି ଶୁଳ୍କ ୩୦ ଟଙ୍କା ଦେବାକୁ ହେବ । ଆଉ ଗୋଟିଏ ଦିନରେ ଆପଣ କେବଳ ୫୦ ହଜାର ଟଙ୍କା ଉଠାଇ ପାରିବେ। ଏହି ପରିବର୍ତ୍ତନ ଡିଜିଟାଲ ଟ୍ରାଞ୍ଜାକ୍ସନକୁ ପ୍ରୋତ୍ସାହନ ଦେବାକୁ କରାଯାଇଛି।
ମାରୁମହଙ୍ଗାତି ସୁଜିକ କାର କିଣିବା ପଡିବ
ବଢୁଥିବା ମୂଲ୍ୟକୁ ଦୃଷ୍ଟିରେ ରଖି ଦେଶର ଅଗ୍ରଣୀ କାର ନିର୍ମାତା ମାରୁତି ସୁଜୁକି ଫେବୃଆରୀ ୧ ରୁ ଏହାର ବିଭିନ୍ନ ମଡେଲର ମୂଲ୍ୟ 32,500 ଟଙ୍କା ବୃଦ୍ଧି କରିବାକୁ ଘୋଷଣା କରିଛି ଯେଉଁ ମଡେଲଗୁଡିକର ମୂଲ୍ୟ ପରିବର୍ତ୍ତନ ହେବ । ଏଥିମଧ୍ୟରେ ଅଲ୍ଟୋ K10, S-Presso, Celerio, Wagon R, Swift, Dezire, Brezza, Ertiga, Ignis, Baleno, Ciaz, XL6, FrontX, Invicto, Jimny ଏବଂ Grand Vitara ଅନ୍ତର୍ଭୁକ୍ତ ରହିଛି ।
ଡିଜିଟାଲ ବ୍ୟାଙ୍କିଙ୍ଗ ସେବାରେ ବିସ୍ତାର
ବ୍ୟାଙ୍କିଙ୍ଗ ସେବାକୁ ଅଧିକ ଡିଜିଟାଲ ଓ ଗ୍ରାହକ କୈନ୍ଦ୍ରିକ କରିବା ପାଇଁ ଅନଲାଇନ ଓ ମୋବାଇଲ ବ୍ୟାଙ୍କିଙ୍ଗରେ ନୂଆ ଫିଚର୍ସ ଯୋଡା ଯାଇଛି । ଗ୍ରାହକ ଏବେ ଅଧିକ ସୁରକ୍ଷିତ ଓ ଦ୍ରୁତ ନେଣଦେଣ କରିପାରିବେ । ଡିଜିଟାଲ ମାଧ୍ୟମରେ ପୈଠ କଲେ ଅତିରିକ୍ତ ଲାଭ ଓ କ୍ୟାସବ୍ୟାକ ଲାଭ ବି ମିଳିପାରିବ ।
୧ ଫେବୃଆରୀ ୨୦୨୫ରୁ ଲାଗୁ ହେଉଥିବା ବ୍ୟାଙ୍କ ନୂଆ ନିୟମ ବ୍ୟାଙ୍କ ସେବାକୁ ଅଧିକ ପ୍ରଭାବୀ ଓ ଗ୍ରାହକ ଅନୁକୂଳ କରିବା ଦିଗରେ ପାଦ ପକାଇବ। ଖାତାଧାରକଙ୍କୁ ନିଜ ବ୍ୟାଙ୍କର ଅଫଲାଇନ ଅଭ୍ୟାସକୁ ବଦଳାଇବାକୁ ପଡିବ। ଏହା ଡିଜିଟାଲ ବ୍ୟାଙ୍କିଙ୍ଗ ଉପଯୋଗୀତାକୁ ପ୍ରୋତ୍ସାହନ ଓ ନଗଦ ନେଣଦେଣକୁ କମ କରିବା ଦିଗରେ କାମ କରିବ।
and-bank-tutc-
ଏଥରର ବଜେଟକୁ ନେଇ ଦେଶବାସୀଙ୍କର ରହିଛି ଅନେକ ଆଶା
ନୂଆଦିଲ୍ଲୀ: ଏଥରର କେନ୍ଦ୍ରୀୟ ବଜେଟକୁ ନେଇ ଅନେକ ଆଶା କରାଯାଉଛି। ଆୟକର ସୀମା ନେଇ ବଡ଼ ଘୋଷଣା କରିପାରନ୍ତି ଅର୍ଥମନ୍ତ୍ରୀ ନିର୍ମଳା ସୀତାରମଣ। ଭିତ୍ତିଭୂମି, ମୁଦ୍ରାସ୍ଫୀତି, ଦରବୃଦ୍ଧି ଉପରେ ରହିପାରେ ଫୋକସ। ବିଶ୍ବରେ ଭାରତର ଅର୍ଥନୀତିକୁ ଶକ୍ତିଶାଳୀ କରିବାକୁ ଭିଜନ ପ୍ରସ୍ତୁତ କରିପାରନ୍ତି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ। ଇଭି, ଶିକ୍ଷା, ସ୍ବାସ୍ଥ୍ୟ ଆଦି କ୍ଷେତ୍ରକୁ ମିଳିପାରେ ପ୍ରାଧାନ୍ୟ। କୃଷି ଏବଂ କୃଷକଙ୍କୁ ନେଇ କେନ୍ଦ୍ରୀୟ ବଜେଟରେ ବଡ଼ ଘୋଷଣା କରିପାରନ୍ତି ସରକାର। କିଷାନ ସମ୍ମାନ ନିଧି ପାଣ୍ଠି ବୃଦ୍ଧି କରିପାରନ୍ତି ସରକାର। ଏହାଦ୍ୱାରା ଚାଷୀଙ୍କୁ ସିଧାସଳଖ ପହଞ୍ଚିବ ସହାୟତା ଅର୍ଥ। ଏହାସହ ଚାଷୀଙ୍କୁ କ୍ରେଡିଟ କାର୍ଡ ଉପରେ ମିଳୁଥିବା ଋଣ ପରିମାଣ ମଧ୍ୟ ବୃଦ୍ଧି ହୋଇପାରେ। ୩ ଲକ୍ଷରୁ ବଢି ୫ ଲକ୍ଷ ପର୍ଯ୍ୟନ୍ତ ହୋଇପାରେ ଚାଷୀଙ୍କୁ ମିଳୁଥିବା ଋଣ ପରିମାଣ।
ସେହିପରି ମହିଳାଙ୍କୁ ସରକାର ଫୋକସ କରିପାରନ୍ତି। ମହିଳା ସଶକ୍ତୀକରଣ ଲାଗି ୩ ଲକ୍ଷ କୋଟି ଅର୍ଥ ଆବଣ୍ଟିତ କରିପାରନ୍ତି। ସମାନ କାମକୁ ସମାନ ବେତନ ନିୟମ ଲାଗୁ କରିପାରନ୍ତି ସରକାର। ସେହିପରି ମଧ୍ୟମ ବର୍ଗୀୟଙ୍କ ଲାଗି କିଛି ଖୁସି ଖବର ମିଳିପାରେ। ଆୟକର ସ୍ଲାବରେ ବୃଦ୍ଧି ହୋଇପାରେ।
ସେହିପରି କ୍ରିପ୍ଟୋ କରେନ୍ସି ଉପରେ ସରକାର କିଛି ନୂଆ ଘୋଷଣା କରିପାରନ୍ତି। କ୍ରିପ୍ଟୋ କରେନ୍ସିକୁ ନେଇ କେନ୍ଦ୍ରୀୟ ବଜେଟରେ ,ସକାରାତ୍ମକ ଏବଂ ପ୍ରଗତିଶୀଳ ପରିବର୍ତ୍ତନ ଆଶା କରାଯାଉଛି। ସେହିପରି ଏମଏସଏମଇକୁ ମଧ୍ୟ ଗୁରୁତ୍ଵ ଦେଇପାରନ୍ତି ସରକାର। ଇଜ ଅଫ ଡୁଇଁକୁ ନେଇ କିଛି ନୂଆ ଘୋଷଣା ଆସିପାରେ। ପର୍ଯ୍ୟଟନ, ପ୍ରତିରକ୍ଷା କ୍ଷେତ୍ରର ବଜେଟ ପରିମାଣ ବୃଦ୍ଧି ପାଇପାରେ ।