ଭୁବନେଶ୍ୱର : ଜିନତକୁ ନେଇ ଚିନ୍ତାରେ ବନ ବିଭାଗ । ବାଘୁଣୀ ଜିନତ୍ ଏବେ ପଶ୍ଚିମବଙ୍ଗ ପୁରୁଳିଆରେ । ଘଞ୍ଚ ଜଙ୍ଗଲ ଭିତରେ ରହୁଥିବାରୁ ସମ୍ଭବ ହେଉନି ଟ୍ରାଙ୍କୁଲାଇଜେସନ୍ । ୩-୪ ଥର ଟ୍ରାଙ୍କୁଲାଇଜ କରିବାକୁ ଚେଷ୍ଟା କରାଯାଇଛି । ତେବେ ସ୍ପଷ୍ଟ ଚିତ୍ର ମିଳିପାରୁ ନଥିବାରୁ ଇଞ୍ଜେକସନ୍ ଠିକ୍ ଜାଗାରେ ଲାଗିନି । ଜିନତ ଶିକାର କରୁଛି । ସୁସ୍ଥ ଅଛି । ସାଟେଲାଇଟ ରେଡିଓ କଲାର ଜରିଆରେ ତା ଉପରେ ତୀକ୍ଷଣ ନଜର ରଖାଯାଇଛି । ଜିନତକୁ ଟ୍ରାକ କରିବା ପାଇଁ ଲାଗିଛନ୍ତି ଦୁଇ ରାଜ୍ୟର ୩ଟି ଟିମ୍ । ଓଡ଼ିଶାର ଗୋଟିଏ ଟିମ୍, ସୁନ୍ଦରବନ ଟିମ୍ ସମେତ ପଶ୍ଚିମବଙ୍ଗର ଦୁଇଟି ଟିମ୍ ଜିନତ ପାଇଁ ଲାଗିଛନ୍ତି । ଯଦିଓ ଏବେ ଟ୍ରାଙ୍କୁଲାଇଜ ପାଇଁ ହାତୀର ସହାୟତା ନିଆଯାଇନି, ଆବଶ୍ୟକ ପଡ଼ିଲେ ସେ ବିକଳ୍ପ ବି ଆପଣାଯିବ । ଖୁବଶୀଘ୍ର ଶିମିଳିପାଳ ଅଭୟାରଣ୍ୟ ଫେରାଇ ଆଣିବାକୁ ସବୁ ପ୍ରକାର ଚେଷ୍ଟା କରାଯିବ ।
‘ଘର ନାମ ରାମୟଣ ହୋଇଥିବ,ଶ୍ରୀଲକ୍ଷ୍ମୀକୁ ଆଉ କିଏ ନେଇଯିବ…’କୁମାର ବିଶ୍ୱାସଙ୍କ ବୟାନକୁ ସୁପ୍ରିୟା ଶ୍ରୀନେତଙ୍କ ସମାଲୋଚନା
ନନ୍ଦିଘୋଷ ବ୍ୟୁରୋ: ସୋସିଆଲ ମିଡିଆରେ କବି କୁମାର ବିଶ୍ବାସଙ୍କ ଏକ ଭିଡିଓ ଭାଇରାଲ ହେବାରେ ଲାଗିଛି । ଯେଉଁ ଭିଡିଓରେ ସେ କହିଛନ୍ତି ନିଜ ପିଲାଙ୍କୁ ରାମାୟଣ ଶୁଣାନ୍ତୁ, ଗୀତା ପଢିବାକୁ ଦିଅନ୍ତୁ ନହେଲେ ଆପଣଙ୍କ ଘରର ନାମ ସିନା ରାମାୟଣ ହେଇଥିବ କିନ୍ତୁ ଶ୍ରୀଲକ୍ଷ୍ମୀକୁ ଆଉ କିଏ ଉଠାଇନେବ । ତାଙ୍କର ଏହି ବୟାନକୁ ନେଇ କଡା ସମାଲୋଚନା କରିଛନ୍ତି କଂଗ୍ରେସ ନେତ୍ରୀ ସୁପ୍ରିୟା ଶ୍ରୀନେତ । କଂଗ୍ରେସ ନେତ୍ରୀ ସୁପ୍ରିୟା ଶ୍ରୀନେତ କୁମାରଙ୍କ ଏହି ବୟାନକୁ ସୋନାକ୍ଷୀଙ୍କ ବିବାହ ସହିତ ତୁଳନା କରିଛନ୍ତି । ସେ କହିଛନ୍ତି ସୋନାକ୍ଷୀକୁ କୁମାର ବିଶ୍ବାସ କଟାକ୍ଷ କରିଛନ୍ତି । ସୁପ୍ରିୟା କହିଛନ୍ତି ଯଦି ଆପଣଙ୍କ ଘରେ ଗୋଟେ ଝିଅ ଥିବ ତାହେଲେ ଆପଣ କଣ ଅନ୍ୟ ଘରର ଝିଅ ବିଷୟରେ ଏମିତି ଟିପ୍ପଣୀ ଦେଇ ପ୍ରଶଂସା ସାଉଁଟିବ । ଏମିତି କରି ଆପଣ କେତେ ତଳ ସ୍ତରର ଲୋକ ପ୍ରମାଣିତ କରି ସାରିଛନ୍ତି ।
କଂଗ୍ରେସ ନେତ୍ରୀ ଆହୁରି କହିଛନ୍ତି କୁମାର ବିଶ୍ବାସଜୀ ସୋନାକ୍ଷୀ ସିହ୍ନାଙ୍କ ଅଲଗା ଧର୍ମକୁ ବିବାହକୁ ନେଇ ଦେଇଥିବା ଟିପ୍ପଣୀ ଅତ୍ୟନ୍ତ ଦୁର୍ଭାଗ୍ୟଜନକ । ତାଙ୍କର ଏହି ଟିପ୍ପଣୀକୁ ଶୁଣିଲେ ଲାଗୁଛି ଯେ ତାଙ୍କ ମନରେ ମହିଳାଙ୍କ ପ୍ରତି କେତେ ସମ୍ମାନ ଅଛି । ଆପଣଙ୍କର ଶ୍ରୀଲକ୍ଷ୍ମୀକୁ କିଏ ଉଠାଇନେବ ଭଳି ଯୋଉ ଶବ୍ଦ ବ୍ୟବହାର କରିଛନ୍ତି ତାହା ନାରୀ ଜାତିକୁ ଅପମାନ । ମହିଳା କ’ଣ ଜଣେ ବସ୍ତୁ ଯେ କିଏ ତାକୁ ଉଠାଇନେବ । କେତେଦିନ ପର୍ଯ୍ୟନ୍ତ ଆପଣଙ୍କ ଭଳି ଲୋକ ମହିଳାଙ୍କୁ ପିତା ଏବଂ ସ୍ବାମୀଙ୍କ ସମ୍ପତ୍ତି ଭାବିବେ ।
କଣ ଝିଅଟି ନିଜ ଇଚ୍ଛାରେ ବିବାହ କରିପାରିବନି ?
ସୁପ୍ରିୟା ଶ୍ରୀନେତ ଆହୁରି କହିଛନ୍ତି ବିବାହ ଏକ ପବିତ୍ର ବନ୍ଧନ । କିଏ କାହାକୁ ଉଠାଇ ନିଅନ୍ତିନି । ୨୦୨୪ରେ ଭାରତରେ ଆପଣ ନିଜ ଇଚ୍ଛାରେ ବିବାହ କରିପାରିବେ । ଏହାକୁ ନେଇ ଆପଣ ପ୍ରଶ୍ନ କରିପାରିବେ ନାହିଁ । କଣ ଗୋଟେ ଝିଅର ଏତିକି ଅଧିକାର ନାହିଁ ଯ, ସେ ତା ମନପସନ୍ଦର ପୁଅକୁ ବିବାହ କରିପାରିବ । ବା କୋଉ ଝିଅ କ’ଣ ଖାଇବ, କ’ଣ ପିନ୍ଧିବ, କାହାକୁ ଭଲପାଇବ ତାର ନିର୍ଣ୍ଣୟ କ’ଣ ଆପଣ କରିବେ ?
କଂଗ୍ରେସ ନେତା ଆହୁରି କହିଛନ୍ତି ଯଦି ଆପଣ ସଂସ୍କାରର ଭାଷା କହୁଛନ୍ତି ତାହେଲେ ଏହା କେମିତି ସମ୍ଭବ ହେଲା ଆପଣଙ୍କ ବାଉନ୍ସର ଏକ ଡାକ୍ତର ପରିବାର ସହିତ ମାରପିଟ କଲା । ସିଏ ଆପଣଙ୍କ ଷ୍ଟାଫ ହେଇ ମଧ୍ୟ ଏହା କେମତି କଲା ? ଆପଣ ଦେଇଥିବା ସାର୍ଟିଫିକେଟ ନା ଶତ୍ରୁଘ୍ନ ସିହ୍ନାଙ୍କୁ ଦରକାର ନା ତାଙ୍କ ଝିଅ ସୋନାକ୍ଷୀ ସିହ୍ନାଙ୍କୁ । ଆପଣଙ୍କଠାରୁ ୧୭ବର୍ଷ ସାନ ଝିଅକୁ ଦେଇଥିବା ଟିପ୍ପଣୀ ଆପଣଙ୍କ ହୀନ ଚିନ୍ତାଧାରାକୁ ଦର୍ଶାଉଛି ।
ରାମଙ୍କ ଭଳି ମର୍ଯ୍ୟାଦା ବା ଶାଳୀନତା ନାହିଁ :
ପର ଛୁଆଙ୍କୁ ଆକ୍ଷେପ କରିବା ଚକ୍କରରେ ଆପଣ ରାମାୟଣରରେ ଥିବା ଭଲପାଇବା, ସମ୍ମାନ ଏବଂ ସଂସ୍କାରକୁ ଭୁଲିଯାଇଛନ୍ତି । ଆପଣ ରାମାୟଣର ଅଧ୍ୟୟନ କରିଛନ୍ତି କିନ୍ତୁ ତାହାର ମହତ୍ତ୍ବ ବୁଝିପାରିନାହାନ୍ତି । ଆପଣଙ୍କ ଭିତରେ ରାମଙ୍କ ଭଳି ମର୍ଯ୍ୟାଦା ବା ଶାଳୀନତା ନାହିଁ । ଦୁଇ ମିନିଟର ଶସ୍ତା ତାଳି ପାଇଁ ହୀନ ମାନସିକତା ଦେଖାଇଛନ୍ତି ।
ରାଜ୍ୟରେ ବସିବ ୩ ନୂଆ ଡପଲାର ରାଡାର୍
ଭୁବନେଶ୍ୱର : ରାଜ୍ୟରେ ବସିବ ୩ ନୂଆ ଡପଲାର ରାଡାର୍। ସମ୍ବଲପୁର, ବାଲେଶ୍ଵର ଓ ଭୁବନେଶ୍ୱରରେ ବସିବ ରାଡାର । ଭୁବନେଶ୍ୱର ପାଇଁ ସ୍ଵତନ୍ତ୍ର ରାଡାର ଯାହା କୃତ୍ରିମ ବନ୍ୟା ବା ସହରୀ ବନ୍ୟା ପାଇଁ ସଠିକ୍ ତଥ୍ୟ ଯୋଗାଇବ। ଏହାସହ ଏୟାର କ୍ୱାଲିଟି ନେଇ ସଠିକ୍ ତଥ୍ୟ ଯୋଗାଇଦେବ। ସାରା ଦେଶରେ ୨୦୨୬ ପହିଲା ସୁଦ୍ଧା ୧୨୬ ଟି ରାଡାର ଲାଗିବ। ବର୍ତ୍ତମାନ ୭୩ ଟି ରାଡାର କାମ କରୁଥିବାବେଳେ ନୂଆ ୫୩ଟି ରାଡାର ଲାଗିବ । ସେପଟେ ଅଦିନିଆ ବର୍ଷାକୁ ନେଇ ସତର୍କ କଲେ ଆଇଏମଡି ଡିଜି ମୃତ୍ୟୁଞ୍ଜୟ ମହାପାତ୍ର । ଆସନ୍ତାକାଲିଠୁ ରାଜ୍ୟରେ ପୁଣି ହେବ ବର୍ଷା । ବଙ୍ଗୋପସାଗରରେ ଲଘୁଚାପ ଯୋଗୁଁ ୨୪ ଓ ୨୫ରେ ବର୍ଷା ହେବ । ଆବଶ୍ୟକୀୟ ପଦକ୍ଷେପ ନେବା ଲାଗି ଚାଷୀଙ୍କୁ ସତର୍କ କରାଇଛି ପାଣିପାଗ ବିଭାଗ।
କାଲିଠୁ ପୁଣି ଆରମ୍ଭ ହେବ ବର୍ଷା, ବଙ୍ଗୋପସାଗରରେ ଲଘୁଚାପ ସକ୍ରିୟ
ଭୁବନେଶ୍ୱର : କାଲିଠୁ ପୁଣି ଓଡିଶାରେ ଆରମ୍ଭ ହେବ ବର୍ଷା । ବଙ୍ଗୋପସାଗରରେ ସକ୍ରିୟ ଲଘୁଚାପ ପ୍ରଭାବରେ ବର୍ଷା ନେଇ ପୂର୍ବାନୁମାନ କରିଛି ଭାରତୀୟ ପାଣିପାଗ ବିଭାଗ। ଉପକୂଳ ଓଡ଼ିଶା ସମେତ ଦକ୍ଷିଣ ଆଭ୍ୟନ୍ତରୀଣ ଓଡିଶାରେ ବର୍ଷା ନେଇ ସତର୍କତା ଜାରି କରାଯାଇଛି। ଆସନ୍ତା ୨୪ ଘଣ୍ଟା ମଧ୍ୟରେ ହାଲୁକା ମଧ୍ୟମ ଧରଣର ବର୍ଷା ସମ୍ଭାବନା ରହିଛି। ଗଂଜାମ, ଗଜପତି,ରାୟଗଡ଼ା,ପୁରୀ, ମାଲକାନାଗିରି , କୋରାପୁଟ, ଖୋର୍ଦ୍ଧା, ନୟାଗଡ଼, କଟକରେ ହାଲୁକା ବର୍ଷା ସମ୍ଭାବନା ରହିଛି ।
ଆସନ୍ତାକାଲି ମଧ୍ୟ ଉପକୂଳ ଓଡ଼ିଶାର ପୁରୀ, ଖୋର୍ଦ୍ଧା, କଟକ, ଜଗତସିଂହପୁର, ଯାଜପୁର, କେନ୍ଦ୍ରାପଡା, ବାଲେଶ୍ବର, ଭଦ୍ରକ, ଗଞ୍ଜାମ, ଗଜପତି, ରାୟଗଡ଼ା, ମାଲକାନାଗିରି,କୋରାପୁଟ ଜିଲ୍ଲାରେ ହାଲୁକା ବର୍ଷା ସମ୍ଭାବନା ରହିଛି । ୨୩, ୨୪ ତାରିଖରେ ବର୍ଷା ରହିଥିବା ବେଳେ ୨୫ ତାରିଖରେ କମିବ ବର୍ଷାର ପରିମାଣ। ପୁଣି ୨୭ ତାରିଖରେ ଆଉ ଏକ ପଶ୍ଚିମାଝଡ ସକ୍ରିୟ ହେବ। ପ୍ରଭାବରେ ରାଜ୍ୟ ଅଧିକାଂଶ ଅଞ୍ଚଳରେ କୋହଲା ପାଗ ସହ ହାଲୁକା ବର୍ଷା ହେବାର ସମ୍ଭାବନା ରହିଛି ।
ବର୍ତ୍ତମାନ ରାଜ୍ୟରେ ବର୍ଷା ସହ ଶୀତର ପ୍ରକୋପ ଜାରି ରହିଛି। ଆସନ୍ତା ଦୁଇ ଦିନ ପରେ ତାପମାତ୍ରା ୨ ରୁ ୩ ଡିଗ୍ରୀ କମିବା ସହ ଶୀତ ବଢିବ । ବର୍ଷା, ଶୀତ ସହ ଘନ କୁହୁଡି ଅସ୍ତବ୍ୟସ୍ତ କରିବ। ଘନ କୁହୁଡି ନେଇ ସୁନ୍ଦରଗଡ, ଝାରସୁଗୁଡା, କେନ୍ଦୁଝର, ଅନୁଗୁଳ ଏବଂ କଳାହାଣ୍ଡି ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି। ବର୍ଷାର ପ୍ରଭାବ ଅଧିକ ରହିଥିବାରୁ ଚାଷୀମାନଙ୍କୁ ସତର୍କ ରହିବା ପାଇଁ ପରାମର୍ଶ ଦିଆଯାଇଛି । ବିଶେଷ କରି ଅମଳ ଫସଲ ଯଥାସମ୍ଭବ ଘୋଡେଇ ରଖିବା ପାଇଁ ପରାମର୍ଶ ଦିଆଯାଇଛି।
ବଢ଼ିଲା ପୂର୍ବତନ ଆଇଏଏସ ଟ୍ରେନି ଅଫିସର ପୂଜା ଖେଡକରଙ୍କ ଅଡୁଆ
ନୂଆଦିଲ୍ଲୀ : ବଢ଼ିଲା ପୂର୍ବତନ ଆଇଏଏସ ଟ୍ରେନି ଅଫିସର ପୂଜା ଖେଡକରଙ୍କ ଅଡୁଆ। ୟୁପିଏସସି ଠକେଇ ମାମଲାରେ ଆଗୁଆ ଜାମିନ ଆବେଦନ ଖାରଜ। ୟୁପିଏସସି ଠକେଇ ମାମଲାରେ ଆଗୁଆ ଜାମିନ ଆବେଦନକୁ ଖାରଜ କରିଛନ୍ତି ଦିଲ୍ଲୀ ହାଇକୋର୍ଟ। ଜାଲିଆତି ମାମଲାରେ ଗତ କିଛି ମାସ ତଳେ ସାରା ଦେଶରେ ଚର୍ଚ୍ଚାର କାରଣ ପାଲଟିଥିଲେ ପୂଜା। ସେ ନିଜକୁ ଶାରୀରିକ ଓ ମାନସିକ ଅକ୍ଷମତା ଦର୍ଶାଇ ବିଭିନ୍ନ ସୁବିଧା ହାସଲ କରିଥିଲେ।
ସେ ନିଜର ନାମ, ଓବିସି ପ୍ରମାଣପତ୍ର ଆଦିର ଜାଲିଆତି କରିଥିବା ଅଭିଯୋଗ ହୋଇଥିଲା। କୋର୍ଟ କହିଛନ୍ତି-ପୂଜାଙ୍କ ବିଭିନ୍ନ କାର୍ଯ୍ୟକଳାପ ଏକ ବିରାଟ ଷଡ଼ଯନ୍ତ୍ରର ଅଂଶବିଶେଷ ଥିଲା। ଏହା ସହ ସେ ନିଯୁକ୍ତି ଲାଗି ଅନୁପଯୁକ୍ତ ବୋଲି କହିଛନ୍ତି କୋର୍ଟ। ପୂଜାଙ୍କ ବିରୋଧରେ ରହିଥିବା ଅଭିଯୋଗ ଜାଲିଆତିର ଏକ ବିରଳ ଉଦାହରଣ ଏବଂ ଦେଶ ଲାଗି କ୍ଷତିକାରକ ବୋଲି କହିଛନ୍ତି କୋର୍ଟ। ଏହା ସହ ଆସନ୍ତା ମାସ ଯାଏଁ ଆଦେଶନାମାକୁ ସ୍ଥଗିତ ରଖିଛନ୍ତି କୋର୍ଟ । ଗତ ଅଗଷ୍ଟରେ ପୂଜାଙ୍କୁ ଅନ୍ତରୀଣ ସୁରକ୍ଷା ମିଳିଥିଲା। ମାତ୍ର ବିଶେଷ ସମୀକ୍ଷା ପରେ ପୂଜାଙ୍କ ଆବେଦନ ଗ୍ରହଣୀୟ ନୁହେଁ ବୋଲି ଅନୁଭବ କରିଥିଲେ କୋର୍ଟ। ଅଦାଲତ ଆହୁରି କହିଛନ୍ତି ଯେ, ସମାଜର ଅବହେଳିତ ବର୍ଗ ଲାଗି ରହିଥିବା ସୁବିଧାକୁ ଅନ୍ୟାୟ ଭାବେ ହାସଲ କରିବାକୁ ପୂଜା ଉଦ୍ୟମ କରିଥିଲେ।
ବିବାହ ବନ୍ଧନରେ ବାନ୍ଧିହେଲେ ବ୍ୟାଡମିଣ୍ଟନ ଷ୍ଟାର ପିଭି ସିନ୍ଧୁ
ନନ୍ଦିଘୋଷ ବ୍ୟୁରୋ: ବିବାହ ବନ୍ଧନରେ ବାନ୍ଧି ହେଲେ ବ୍ୟାଡମିଣ୍ଟନ ଖେଳାଳି ପି.ଭି ସିନ୍ଧୁ । ରାଜସ୍ଥାନ ଜୟପୁରରେ ଆଇଟି ପ୍ରଫେସନାଲ ଭେଙ୍କେଟେଶ ସାଇଙ୍କ ହାତ ଧରିଲେ ଖେଳାଳି ପି.ଭି ସିନ୍ଧୁ । ଦୁହେଁ ରାଜସ୍ଥାନର ଉଦୟପୁରରେ ବିବାହ କରିଛନ୍ତି । ପିଭି ସିନ୍ଧୁଙ୍କ ସ୍ବାମୀ ଭେଙ୍କେଟେଶ ସାଇ ଜଣ ବିଜନେସ ମ୍ୟାନ୍ । ଦୁହିଁଙ୍କର ବିବାହ ହିନ୍ଦୁ ରୀତିନୀତି ଅନୁସାରେ ସମ୍ପନ୍ନ ହୋଇଛି । ଖେଳାଳିଙ୍କର ବିବାହରେ ବହୁ ନେତା ଏବଂ ମନ୍ତ୍ରୀ ଯୋଗଦେଇ ନବଦମ୍ପତ୍ତିଙ୍କୁ ଆଶୀର୍ବାଦ କରିଛନ୍ତି ।
ପି.ଭି ସିନ୍ଧୁଙ୍କ ବିବାହରେ ନିକଟ ସମ୍ପର୍କୀୟଙ୍କ ସମେତ କିଛି ବଡ ବଡ ହସ୍ତୀଙ୍କୁ ନିମନ୍ତ୍ରଣ କରାଯାଇଥିଲା । ସୀମିତ ଲୋକଙ୍କ ଭିତରେ ଦୁହିଁଙ୍କର ବିବାହ ହୋଇଥିଲା । ମଙ୍ଗଳବାର ଦିନ ନବଦମ୍ପତ୍ତିଙ୍କର ରିସେପସନ ରଖାଯାଇଛି । ପିଭି ସିନ୍ଧୁ ନିଜ ବିବାହରେ ମହାନ କ୍ରିକେଟର ସଚିନ ତେନ୍ଦୁଲକରଙ୍କୁ ମଧ୍ୟ ନିମନ୍ତ୍ରଣ କରିଥିଲେ । ନବଦମ୍ପତ୍ତି ଦୁହେଁ ମିଶି ତାଙ୍କ ଘରକୁ ଯାଇ ନିମନ୍ତ୍ରଣ ପତ୍ର ଦେଇଥିଲେ ।
ବିବାହ ପାଇଁ ପି.ଭି ସିନ୍ଧୁ ଏକ ଖାସ୍ ଶାଢୀ ପିନ୍ଧିଥିଲେ । ସେ ଗୋଲ୍ଡେନ କ୍ରୀମ ରଙ୍ଗର ଏକ ଶାଢୀ ପିନ୍ଧିଥିଲେ । ବିବାହ ଯୋଡାରେ ପି.ଭି ସିନ୍ଧୁ ଖୁବ ସୁନ୍ଦର ଦେଖାଯାଉଥିଲେ । ବିବାହ ପରେ ନବଦମ୍ପତ୍ତିଙ୍କ ପାିଁ ଶୁଭେଚ୍ଛାର ସୁଅ ଛୁଟୁଛି ।
ପପକର୍ଣ୍ଣ ଉପରେ ଜିଏସଟି, ଟ୍ରେଣ୍ଡ୍ କରୁଛି ‘ଅବ୍ ହମକୋ ଚାହିଏ ଇଜ୍ଜତ୍’
ନନ୍ଦିଘୋଷ ବ୍ୟୁରୋ: ପପ୍କର୍ଣ୍ଣର ଲୋକପ୍ରିୟତା ଖୁବ ଅଧିକ । ଘରେ ଘରେ ପପ୍କଣ୍ଣ ଖାଇବା ବି ସଉକ ପାଲଟିଲାଣି । ପପ୍କର୍ଣ୍ଣର ଚାହିଦା ବଢ଼ୁଥିବା ବେଳେ ଏହାକୁ ନେଇ ଆସିଥିବା ଖବର ଏବେ ପପକର୍ଣ୍ଣ ଲଭରଙ୍କୁ ଚିନ୍ତାରେ ପକାଇଦେଇଛି । ରାଜସ୍ଥାନ ଜୈସଲମେରରେ ଅନୁଷ୍ଠିତ ୫୫ତମ ଜିଏସଟି ପରିଷଦ ବୈଠକରେ ବହୁ ନିଷ୍ପତ୍ତି ଗ୍ରହଣ କରାଯାଇଛି । କିନ୍ତୁ ସବୁଠୁ ଚର୍ଚ୍ଚାରେ ଅଛି ପପକର୍ଣ୍ଣ ଉପରେ ଲାଗିଥିବା ଟିକସ ଉପରେ । ପପକର୍ଣ୍ଣ ଉପରେ ଟିକସ ସମ୍ବନ୍ଧୀୟ ଏକ ବଡ ନିଷ୍ପତ୍ତି ନିଆଯାଇଛି । ଯାହାକୁ ନେଇ ସୋସିଆଲ ମିଡିଆରେ ହଙ୍ଗାମା ଚାଲିଛି । ୟୁଜରର୍ସ ମାନେ ସୋସିଆଲ ମିଡିଆରେ ମିମ୍ସର ବର୍ଷା କରିଥିବା ବେଳେ ସରକାରଙ୍କୁ ଏନେଇ ସମାଲୋଚନା କରିଛନ୍ତି ।
ପପକର୍ଣ୍ଣ ଉପରେ ୩ଟି GST ସ୍ଲାବ :
ବୈଠକରେ ନିଷ୍ପତ୍ତି ଅନୁଯାୟୀ ବିଭିନ୍ନ ସ୍ଲାବରେ ପପକର୍ଣ୍ଣକୁ ଅନ୍ତର୍ଭୁକ୍ତ କରାଯାଇଛି। ଫଳରେ ବର୍ତ୍ତମାନ ଏହାକୁ କିଣିବା ପାଇଁ ଆପଣଙ୍କୁ ଅଧିକ ଟଙ୍କା ଖର୍ଚ୍ଚ କରିବାକୁ ପଡିବ। ପପକର୍ଣ୍ଣ ଉପରେ ଗୋଟିଏ ନୁହେଁ ବରଂ ତିନି ପ୍ରକାରର ଜିଏସଟି ହାର ଲାଗୁ କରାଯିବ । ଯଦି ପପକର୍ଣ୍ଣଟି ଲୁଣ ଏବଂ ମସଲାର ମିଶ୍ରଣରେ ପ୍ରସ୍ତୁତ ହୋଇଥିବା ପ୍ୟାକେଜରେ ୫ ପ୍ରତିଶତ ହାରରେ ଜିଏସ୍ଟି ଲାଗୁ ହେବ। ଅନ୍ୟପଟେ ଯଦି ଲୁଣ ଏବଂ ମସଲା ସହିତ ସମାନ ପପକର୍ଣ୍ଣ ପ୍ୟାକେଜ୍ ଏବଂ ଲେବଲ୍ ସହ ବିକ୍ରି ହୁଏ ତେବେ ଏଥିରେ ଟିକସ ହାର ୫% ପରିବର୍ତ୍ତେ ୧୨% ଲାଗୁ ହେବ। ସେହିପରି ଚିନିରୁ ପ୍ରସ୍ତୁତ ପପକର୍ଣ୍ଣ ଉପରେ ୧୮ ପ୍ରତିଶତ ହାରରେ ଜିଏସଟି ଲାଗୁ ହେବ। ତେବେ ପପକର୍ଣ୍ଣ ଉପରେ ଏହି ଟିକସ ଲାଗୁ ନେଇ ଜିଏସଟି ପରିଷଦ ସ୍ପଷ୍ଟ କରିଛି।
ପପକର୍ଣ୍ଣ ଖାଇବା ପୁର୍ବରୁ ସାବଧାନ୍ :
ଜିଏସ୍ଟି ପରିଷଦର ଏହି ଘୋଷଣା ପରେ ସୋସିଆଲ ମିଡିଆରେ ମିମ୍ସ ଭାଇରାଲ ହେବାରେ ଲାଗିଛି। ମିମ୍ସ ମାଧ୍ୟମରେ ସରକାରଙ୍କ ଏହି ନିଷ୍ପତ୍ତି ଉପରେ ୟୁଜର୍ସ ପ୍ରଶ୍ନ ଉଠାଇଛନ୍ତି। ଲୋକମାନେ ମିମ୍ସ ମାଧ୍ୟମରେ ନିଜର ରାଗ ଏବଂ ଆଶ୍ଚର୍ଯ୍ୟ ଜଣାଉଛନ୍ତି । ଜଣେ ୟୁଜର ଲେଖିଛନ୍ତି କି ‘ଏବେ ପପକର୍ଣ୍ଣ ଖାଇବା ପୂର୍ବରୁ ଟ୍ୟାକ୍ସ ସ୍ଲାବ ପଢିବାକୁ ପଡିବ’ । ତାଙ୍କୁ ସମର୍ଥନ କରି ଆଉ ଜଣେ ୟୁଜର ଲେଖିଛନ୍ତି ‘୧୮% ଜିଏସଟି ମାନେ କେରେମଲାଇଜ୍ ପପକର୍ଣ୍ଣ ଏବେ ସବୁଠୁ ଦାମିକିଆ’ ।
ଏବେ ଆମକୁ ଦରକାର ଫୁଲ ଇଜ୍ଜତ :
ଅନ୍ୟ ଏକ ୟୁଜର ଲେଖିଛନ୍ତି ‘ପପକର୍ଣ୍ଣ ଦାମ ଶୁଣି ମୁଭି ଟିକେଟ ମଧ୍ୟ ଶସ୍ତା ଲାଗିଲାଣି ’। ଅନ୍ୟ ଏକ ୟୁଜର ଲେଖିଛନ୍ତି GST ପରିଷଦ ବୈଠକ ପରେ ‘ଏବେ ପପକର୍ଣ୍ଣ ବଦଳରେ ଗୋଲ୍ଡକର୍ଣ୍ଣ ଲେଖାଯିବ’ । ଏବେ ଥିଏଟରରେ ପପକର୍ଣ୍ଣ ଖାଇବା ମହଙ୍ଗା ପଡିବ । ଅନ୍ୟ ଜଣେ ୟୁଜର ମିର୍ଜାପୁର ସିଜନ ୧ର ଗୁଡୁ ପଣ୍ଡିତର ଡାଏଲଗ ମନେପକାଇ ଲେଖିଛନ୍ତି ‘ଏବେ ଆମକୁ ଫୁଲ ଇଜ୍ଜତ ଦରକାର’ । ଏବେ ଏହି ଡାଏଲଗ ପପକର୍ଣ୍ଣ ପାଇଁ ବ୍ୟବହାର ହେବ । ତେବେ ୟୁଜରସ୍ ମାନେ ଅର୍ଥମନ୍ତ୍ରୀଙ୍କୁ ଟ୍ୟାଗ କରି ବିଭିନ୍ନ ମିମ୍ସ ସେୟାର କରୁଛନ୍ତି ।
ସଚିନଙ୍କ ପିଲାର ମା’ ହେବେ ସୀମା ! ନୂଆବର୍ଷ ପୂର୍ବରୁ ଦେଲେ ଖୁସି ଖବର …
ନନ୍ଦିଘୋଷ ବ୍ୟୁରୋ: ପ୍ରେମ ପାଇଁ ସୀମା ପାର କରିଥିବା ସୀମା ଏବେ ମା’ ହେବାକୁ ଯାଉଛନ୍ତି । ସୀମା ହାଇଦର ଏବଂ ସଚିନ ମୀଣାଙ୍କ ଘରେ କୁଆଁ କୁଆଁ ଶବ୍ଦ ଶୁଭିବ । ନିକଟରେ ସୋସିଆଲ ମିଡିଆରେ ଏକ ଭିଡିଓ ସେୟାର କରି ସୀମା ଗର୍ଭବତୀ ଥିବା ସୂଚନା ଦେଇଛନ୍ତି । ସୀମାଙ୍କ ଠାରୁ ବାପା ହେବାର ଖବର ଶୁଣିବା ପରେ ବର୍ତ୍ତମାନ ଆକାଶରେ ଉଡୁଛନ୍ତି ସଚିନ୍ ମୀଣା ।
ଏକ ଭିଡିଓ କରି ସୀମା ପ୍ରେଗନେନ୍ସି କିଟ ଦେଖାଇ ଗର୍ଭବତୀ ଥିବା କହିଛନ୍ତି । ସୋସିଆଲ ମିଡିଆରେ ଏହି ଭିଡିଓ ଖୁବ ଭାଇରାଲ ହେବାରେ ଲାଗିଛି । ପୁର୍ବରୁ ପାକିସ୍ତାନରେ ସୀମାଙ୍କର ୪ଟି ସନ୍ତାନ ଥିବା ବେଳେ ଭାରତରେ ଏହା ପାଞ୍ଚଟି ସନ୍ତାନ ହେବ । ତାଙ୍କର ସମସ୍ତ ସନ୍ତାନ ସହିତ ସେ ଭାରତକୁ ପଳାଇ ଆସିଥିଲେ । ସେ କହିଛନ୍ତି ଯେ, ସେ ଖୁବ ଶୀଘ୍ର ମା’ ହେବାକୁ ଯାଉଛନ୍ତି ଏବଂ ସଚିନ ବାପା ।
ଭାଇରାଲ ଭିଡିଓରେ ଦେଖିବାକୁ ମିଳୁଛି କି, ସଚିନକୁ ସୀମା ପ୍ରେଗ୍ନେନ୍ସି କିଟ ଦେଖାଇ ସେ ଗର୍ଭବତୀ ଥିବା କହୁଛନ୍ତି କିନ୍ତୁ ପ୍ରଥମେ ସଚିନ ଏହାକୁ ବିଶ୍ବାସ କରୁନାହାନ୍ତି । କିନ୍ତୁ ପରେ ସେ ଖୁସୀରେ ପାଗଳ ହେଇଯାଉଛନ୍ତି । ଏହାପରେ ଖୁସୀରେ ସଚିନ୍ ସୀମାକୁ ଆଲିଙ୍ଗନ କରୁଛନ୍ତି । ପ୍ରେମ ପକ୍ଷୀଙ୍କର ଏହି ଭିଡିଓ ଭାଇରାଲ ହେବା ପରେ ସେମାନଙ୍କ ପାଇଁ ପ୍ରଶଂସାର ସୁଅ ଛୁଟୁଛି ।
ସୀମା ହାଇଦର ଓ ସଚିନଙ୍କ ପ୍ରେମ କାହାଣୀ ପୁରା ଭିନ୍ନ । ସୀମା ତାଙ୍କ ପ୍ରେମକୁ ପାଇବା ପାଇଁ ପାକିସ୍ତାନରୁ ଭାରତ ଆସିଥିଲେ । ସେ ନେପାଳ ସୀମା ଦେଇ ଭାରତରେ ପ୍ରବେଶ କରିଥିଲେ । ବର୍ତ୍ତମାନ ତାଙ୍କ ସ୍ୱାମୀ ସଚିନ ସୀମାଙ୍କ ସହ ଗ୍ରେଟର ନୋଏଡାରେ ରହୁଛନ୍ତି ।
ଆସନ୍ତାକାଲି ଦେଶର ସବୁ ଜିଲ୍ଲାରେ ରାଲି କରିବ କଂଗ୍ରେସ
ଭୁବନେଶ୍ୱର: ଆମ୍ବେଦକରଙ୍କୁ ଅପମାନ ପ୍ରସଙ୍ଗ । ଏନେଇ ଆସନ୍ତାକାଲି ଦେଶସାରା ସବୁ ଜିଲ୍ଲାରେ ରାଲି କରିବ କଂଗ୍ରେସ । ଆମ୍ବେଦକରଙ୍କ ପ୍ରତିମୂର୍ତ୍ତୀରେ ମାଲ୍ୟାର୍ପଣ କରିବା ସହ ଜିଲ୍ଲା ସ୍ତରରେ ବିକ୍ଷୋଭ କରି ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ସ୍ମାରକପତ୍ର ଦେବ କଂଗ୍ରେସ । କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଇସ୍ତଫା ନଦେବା ପର୍ଯ୍ୟନ୍ତ କଂଗ୍ରେସ ପ୍ରତିବାଦ କରିବ । ସାମ୍ବାଦିକ ସମ୍ମିଳନୀ କରି ଘୋଷଣା କଲା କଂଗ୍ରେସ ।
କଂଗ୍ରେସ କହିଛି, ବିଜେପି ସମ୍ବିଧାନ ବିରୋଧୀ । ଆମ୍ବେଦକରଙ୍କୁ ଅସମ୍ମାନ ଗ୍ରହଣୀୟ ନୁହେଁ । ବାରମ୍ବାର ଦାବି ସତ୍ତ୍ବେ କେନ୍ଦ୍ର ଗୃହ ମନ୍ତ୍ରୀ ନିଜ ବୟାନ ନେଇ କ୍ଷମା ମାଗିଲେନି । ଇସ୍ତଫା ଦେବାକୁ ରାଜି କିନ୍ତୁ ଭୁଲ ମାଗିବେନି କହି ଜିଦରେ ଅଟଳ । ତେଣୁ ଆମ୍ବେଦକରଙ୍କୁ ଅପମାନ ବିରୁଦ୍ଧରେ ଆସନ୍ତାକାଲି ଦେଶର ସବୁ ଜିଲ୍ଲାରେ ରାଲି କରିବ କଂଗ୍ରେସ । ଆମ୍ବେଦକର ସବୁ ଆଦିବାସୀଙ୍କ ପାଇଁ ଭଗବାନ । ଆମ୍ବେଦକରଙ୍କ ଅପମାନ କରିଛନ୍ତି ବିଜେପି ନେତା । ପ୍ରଧାନମନ୍ତ୍ରୀ ବି ଏ ସଂପର୍କରେ ଚୁପ । ତେଣୁ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହ ଇସ୍ତଫା ନଦେବା ପର୍ଯ୍ୟନ୍ତ କଂଗ୍ରେସ ପ୍ରତିବାଦ କରିବ । ଏ ନେଇ ଆଜି ଏକ ସାମ୍ବାଦିକ ସମ୍ମିଳନୀ କରି ଘୋଷଣା କରିଛି କଂଗ୍ରେସ । ୨୪ ନଭେମ୍ବର ସମ୍ବିଧାନ ଦିବସ ପାଳନ ପରେ ଲୋକସଭା ଏବଂ ରାଜ୍ୟସଭାରେ ସମ୍ବିଧାନ ଉପରେ ଚର୍ଚ୍ଚା ପାଇଁ ଦାବି କରିଥିଲା କଂଗ୍ରେସ । ଚର୍ଚ୍ଚା ବେଳେ ପ୍ରିୟଙ୍କା ଗାନ୍ଧୀ ସମ୍ବିଧାନ ବାବଦରେ ଅନେକ କଥା ଉଲ୍ଲେଖ କରିଥିଲେ । କିନ୍ତୁ ବିଜେପି ନେହେରୁ ଓ ଇନ୍ଦିରା ଗାନ୍ଧୀଙ୍କୁ ଟାର୍ଗେଟ କଲା । ଯାହା କି ଦୁଃଖ ଦାୟକ ।
ସେହିପରି ଜାତି ଜନଗଣନା ପାଇଁ କଂଗ୍ରେସ ବାରମ୍ବାର ଦାବି କରି ଆସିଛି । କଂଗ୍ରେସ ସାଂସଦ ମାନଙ୍କୁ ବିଜେପି ସାଂସଦ ମାନେ ସଂସଦ ଭିତରକୁ ପ୍ରବେଶ କରିବାକୁ ଦେଲେ ନାହିଁ । ଏ ନେଇ ମକର ଦ୍ବାରରେ ଧସ୍ତାଧସ୍ତି କାଣ୍ଡ ଘଟିଗଲା । ରାହୁଲ ଗାନ୍ଧୀ କାହାକୁ ଧକ୍କା ମାରିନାହାନ୍ତି । ରାହୁଲଙ୍କ ବିରୋଧରେ ମାମଲା ହୋଇଛି । କିନ୍ତୁ ରାହୁଲ ଗାନ୍ଧୀ ମାମଲାକୁ ଭୟ କରନ୍ତି ନାହିଁ । ବିଜେପି ଦଳ ଦଳିତ, ଜନଜାତି, ପଛୁଆ ବର୍ଗ ବିରୋଧୀ ବୋଲି କହିଛି କଂଗ୍ରେସ ।
ନକଲି ଡାକ୍ତରର ଭୁଲ ଚିକିତ୍ସା ଯୋଗୁଁ ଚାଲିଗଲା ଜୀବନ
ବଲାଙ୍ଗୀର: ବଲାଙ୍ଗୀର ଜିଲ୍ଲା କଣ୍ଟାବାଞ୍ଜିରେ ଅଭାବନୀୟ ଘଟଣା । ନକଲି ଡାକ୍ତରର ଭୁଲ ଚିକିତ୍ସା ଯୋଗୁଁ ଜଣଙ୍କ ମୃତ୍ୟୁ । ମୃତକ ଜଣକ ହେଲେ ଲାଠୋର ଥାନା ଅଞ୍ଚଳର ଶ୍ରୀମତ କଟା । ସମ୍ପୃକ୍ତ ନକଲି ଡାକ୍ତର ତୁରକେଲା ଥାନା ବଡଡ଼କଲା ଗାଁରେ ଅସ୍ଥାୟୀ କ୍ଲିନିକ କରି ରୋଗୀଙ୍କ ଚିକିତ୍ସା କରୁଥିଲେ । ତୁରେକେଲା ପୋଲିସ ସଂପୃକ୍ତ ନକଲି ଡାକ୍ତର ଟିଟୁ ବିଶ୍ୱାସକୁ ଗିରଫ କରି ଅଧିକ ତଦନ୍ତ କରୁଛି । କ୍ଲିନିକରୁ ବିଭିନ୍ନ ପ୍ରକାରର ଔଷଧ ଓ ସାଲାଇନ ଜବତ କରାଯାଇଛି ।