ନନ୍ଦିଘାେଷ ବ୍ୟୁରୋ: ବରଦାନ ସାଜିଲା ଟ୍ରାଫିକ ଜାମ୍ । ଅପହରଣକାରୀଙ୍କ କବଳରୁ ଖସିପଳାଇଲେ ଛାତ୍ରୀ । ଆଜ୍ଞା ହଁ ଘଟଣାଟି ଯେତେ କୌତୁହଳ ସେତେ ଗମ୍ଭୀର ମଧ୍ୟ । ପାଟନାର ବିହଟାରେ କିଛି ଦୁବୃର୍ତ୍ତ ଜଣେ ସ୍କୁଲ ଛାତ୍ରୀଙ୍କୁ ଅପହରଣ କରିନେଇଥିଲେ । କିନ୍ତୁ ସୌଭାଗ୍ୟବଶତଃ ଛାତ୍ରୀ ଜଣଙ୍କ ନିଜ ବୁଦ୍ଧି ବଳରେ ତାଙ୍କ କବଳରୁ ମୁକ୍ତ ହୋଇଥିଲେ । ଛାତ୍ରୀ ଜଣକ ଟ୍ରାଫିକ ଜାମର ସୁଯୋଗ ନେଇ ଗାଡି ଡିକ୍କିରୁ ଖସି ପଳାଇଥିଲେ । ଚତୁର୍ଥରେ ପଢୁଥିବା ଛାତ୍ରୀ ଜଣକ ଘରକୁ ଫେରୁଥିବା ବେଳେ କିଛି ଦୃର୍ବୁତ୍ତ ଠିକଣା ପଚାରିବା ବାହାନାରେ ତାଙ୍କୁ ଏକ ସ୍କର୍ପିଓ ଗାଡିରେ ଉଠାଇନେଇଥିଲେ । ହେଲେ ରାସ୍ତାରେ ଟ୍ରାଫିକ ଜାମରେ ଗାଡିଟି ଫସିଯାଇଥିବା ବେଳେ ଛାତ୍ରୀ ଜଣକ ଡିକ୍କିରୁ ବାହାରି ନିକଟରେ ଥିବା ମଲରେ ପହଞ୍ଚିଥିଲେ । ସେଠାରେ ଉପସ୍ଥିତ ଥିବା ଲୋକଙ୍କ ସାହାଯ୍ୟରେ ନିଜ ପରିବାରଙ୍କୁ ଅଭିଯୁକ୍ତଙ୍କ ବାବଦରେ ସୂଚନା ଦେଇଥିଲେ ।
ଘଟଣାର ସମ୍ପର୍କରେ ଜାଣିବା ପରେ ତୁରନ୍ତ ପରିଜନ ଲୋକ ଥାନାରେ ପହଞ୍ଚି ଅଭିଯୁକ୍ତଙ୍କ ବିରୁଦ୍ଧରେ ମାମଲା ଦାଏର କରିଥିଲେ । ପୀଡିତାଙ୍କ ମା’ଙ୍କ କହିବାନୁଯାୟୀ ସ୍ଥାନୀୟ ପ୍ରାଇଭେଟ ସ୍କୁଲରେ ତାଙ୍କ ଝିଅ ଚତୁର୍ଥ ଶ୍ରେଣୀରେ ପାଠ ପଢୁଥିବା ବେଳେ ସକାଳେ ସ୍କୁଲ ଯାଇଥିବା ବେଳେ ତାଙ୍କର ଅପହରଣ କରାଯାଇଥିଲା । ଟ୍ରାଫିକ ଜାମ ଯୋଗୁ ମୋ ଝିଅ ଖସିଯାଇ ଆମକୁ ସୂଚନା ଦେଇଥିବାରୁ ଆମେ ତାକୁ ଫେରି ପାଇଛୁ ।
ପୀଡିତା ଛାତ୍ରୀଙ୍କ କହିବାନୁଯାୟୀ ପ୍ରଥମେ ଜଣେ ଅଙ୍କଲ ତାଙ୍କୁ ତାଙ୍କର ନାମ ପଚାରିଥିଲା ଏବଂ ପରେ ମୁହଁରେ କପଡା ଦେଇ ଜୋର ଜବରଦସ୍ତି ଗାଡି ଡିକିରେ ଭର୍ତ୍ତି କରିଥିଲେ । ପରେ ଟ୍ରାଫିକ ଜାମର ସୁଯୋଗ ପାଇଁ ସେ ଖସି ପଳାଇଥିବା ସୂଚନା ଦେଇଛନ୍ତି । ତେବେ ଅଭିଯୋଗ ଅନୁଯାୟୀ ପୋଲିସ ମାମଲାର ତଦନ୍ତ କରିବା ସହିତ ଛାନବିନ ଆରମ୍ଭ କରିଛି । ଅଭିଯୁକ୍ତଙ୍କୁ ଧରିବା ପାଇଁ ସିସିଟିଭି ମାଧ୍ୟମରେ ଖୋଜା ଚାଲିଛି ।
