ନୂଆଦିଲ୍ଲୀ: ଦିଲ୍ଲୀର ନବସରାଇରେ ଲୋମହର୍ଷକ ହତ୍ଯା ଘଟଣା । ଖୋଦ୍ ପୁଅ ହିଁ ଥିଲା ହତ୍ଯାକାରୀ । ବାପା, ମା ଓ ଭଉଣୀଙ୍କୁ ହତ୍ଯା କରି ମିଛ ନାଟକ ରଚିଥିଲା ପୁଅ। ହତ୍ଯାର କିଛି ସମୟ ପରେ ପୁଅକୁ ଗିରଫ କରିଛି ପୋଲିସ । ବଡ଼କଥା ହେଉଛି ମର୍ଣ୍ଣିଂଓ୍ବାକରୁ ଫେରି ହତ୍ଯା ସମ୍ପର୍କରେ ପୋଲିସ ଓ ମାମୁଁଙ୍କୁ ଅଭିଯୁକ୍ତ ସୂଚନା ଦେବା ସହ କେହି ଦୁର୍ବୃତ୍ତ ହତ୍ଯାକାଣ୍ଡ ଘଟାଇଛି ବୋଲି ଦର୍ଶାଇଥିଲା। ତେବେ ହତ୍ଯା ପଛର କାରଣ ଥିଲା ସମ୍ପତ୍ତି । ଭଉଣୀ ନାମରେ ସମସ୍ତ ସମ୍ପତ୍ତି କରିବାକୁ ବାପା ଚାହୁଁଥିବାରୁ ଏହାର ପ୍ରତିଶୋଧ ନେବାକୁ ଚାହିଁଥିଲା ଅଭିଯୁକ୍ତ । ସମସ୍ତେ ଶୋଇଥିବା ଅବସ୍ଥାରେ ସେମାନଙ୍କୁ ସେ ହତ୍ଯା କରିଥିଲା । ବାପା, ମାଆଙ୍କ ବିବାହ ବାର୍ଷିକୀ ଦିନ ହିଁ ସେ ଏହି ହତ୍ଯାକାଣ୍ଡ ଘଟାଇବା ଲାଗି ଯୋଜନା କରିଥିଲା। ଗତ ବୁଧବାର ରାଜେଶ କୁମାର, ପତ୍ନୀ କୋମଲ ଓ ୨୩ ବର୍ଷ ବୟସ୍କା ଝିଅ କବିତାଙ୍କୁ ହତ୍ଯା କରାଯାଇଥିଲା । ଅନ୍ଯ କେହି ନୁହେଁ, ହତ୍ଯା କରିଥିଲା ଖୋଦ ୨୩ ବର୍ଷର ପୁଅ ଅର୍ଜୁନ। ହତ୍ଯା ଘଟିଥିବା ଦିନ ଦମ୍ପତି ସେମାନଙ୍କ ୨୭ତମ ବିବାହ ବାର୍ଷିକୀ ପାଳନ କରିଥିଲେ । ଛୁରୀ ଭୁସିବା ସହ ସମସ୍ତଙ୍କ ଗଳାକାଟି ଦେଇଥିଲା ଅର୍ଜୁନ । ପରେ ସେ ବାହାରକୁ ଚାଲିଯାଇଥିଲା । ପ୍ରଥମେ ଅଭିଯୁକ୍ତ ପୋଲିସ ନିକଟରେ ବିଭିନ୍ନ ନାଟକବାଜି କରିଥିଲା । ତେବେ ପୋଲିସ ସିସିଟିଭି ଯାଞ୍ଚ କରିବା ପରେ ଜଣାଯାଇଥିଲା ଯେ ଘର ଭିତରକୁ କୌଣସି ବାହାର ବ୍ଯକ୍ତି ପ୍ରବେଶ କରିନାହାନ୍ତି । ଜେରା ସମୟରେ ଅର୍ଜୁନ ଅନେକ ବିଭ୍ରାନ୍ତିମୂଳକ ଯୁକ୍ତି କରିଥିବାରୁ ପୋଲିସର ସନ୍ଦେହ ଘନୀଭୂତ ହୋଇଥିଲା। ପରେ ତାକୁ ଗିରଫ କରାଯାଇଥିଲା।

ଅର୍ଜୁନ ଦିଲ୍ଲୀ ବିଶ୍ବବିଦ୍ୟାଳୟରେ କଳାର ଛାତ୍ର ଥିଲା । ସେ ବକ୍ସିଂରେ ପାରଙ୍ଗମ ଥିଲା । ଏହି ହତ୍ଯା ଲାଗି ସେ ଡିସେମ୍ବର ୪କୁ ବାଛିଥିଲା ।