ନନ୍ଦିଘୋଷ ବ୍ୟୁରୋ: ଦିଗପହଣ୍ଡି ରେଞ୍ଜ ସାନଖେମୁଣ୍ଡି ବ୍ଲକ ପାଟପୁର ସେକ୍ସନରେ ହାତୀପଲଙ୍କ ଉପଦ୍ରବ। ଜଙ୍ଗଲରୁ ଜନ ବସତି ମୁହାଁ ହେଉଛନ୍ତି ଚାରି ଟିକିଆ ହାତୀ ପଲ। ଯାହାକୁ ନେଇ ଭୟଭୀତ ଅବସ୍ଥାରେ ଅଛନ୍ତି ଅଞ୍ଚଳବାସୀ। ହାତୀ କବଳରୁ ଫସଲକୁ କିଭଳି ସୁରକ୍ଷା ଦେବେ ସେନେଇ ଚିନ୍ତାରେ ଚାଷୀକୂଳ। ଗତ କିଛି ଦିନ ତଳେ ପଳାସପୁର ଇନ୍ଦିରାବାସ ନୂଆଗଡ ଢେପାଗୁଡା ଠାରେ ବହୁ କଦଳୀ ଗଛ,ଆମ୍ବ ଗଛ, ପଣସ ଗଛ ଓ ଧାନ ଗଦା ଖାଇ ନଷ୍ଟ କରିଥିଲେ। ଚାଷ ଜମି ନିକଟରେ ଥିବା ଚାଷୀ ଙ୍କ ପାୱାର ଟିଲର , ପାଣି ପମ୍ପ ଓ ବିଛାଯାଇଥିବା ପାଇପକୁ କଚାଡି ନଷ୍ଟ କରିଥିଲେ ହାତୀପଲ।ତେବେ ଏହି ଚାରି ଟିକିଆ ହାତୀ ପଲର ଗତିବିଧି ଉପରେ ନଜର ରଖିଛି ବନ ବିଭାଗ ଟିମ୍ ! ରାତିରେ ପେଟ୍ରୋଲିଂକୁ ଜୋରଦାର କରାଯାଇଛି।
ଘର ମାଲିକଙ୍କ ନିର୍ଯାତନା : ଶୀତ ରାତିରେ ଭଡ଼ାଟିଆଙ୍କୁ ବାହାର କରିଦେଲେ..
ନନ୍ଦିଘୋଷ ବ୍ୟୁରୋ: ଶୀତ ରାତିରେ ରାଜଧାନୀରେ ଘର ମାଲିକଙ୍କ ନିର୍ଯାତନା । ରାତି ଅଧରେ ଘରୁ ବାହାର କରିଦେଲେ ଭଡାଟିଆଙ୍କୁ। ଭଡାଟିଆ ଚାକିରିକୁ ଯାଇଥିବା ବେଳେ ତାଙ୍କ ଘରୁ ଜିନିଷ କାଢ଼ିଦେଲେ ମାଲିକ । ରାତି ସାରା ଘର ବାହାରେ ବସିଲେ ଭଡାଟିଆ , ତାଙ୍କ ପତ୍ନୀ ଓ ବୁଢ଼ୀ ମା’ । ଭୁବନେଶ୍ୱର ଡମଣା ଠାରେ ଗତକାଲି ବିଳମ୍ବିତ ରାତିରେ ଘଟିଛି ଏଭଳି ଘଟଣା । ଡମଣା ବଦ୍ରୀ ଗାର୍ଡେନ ଆପାର୍ଟମେଣ୍ଟ ପାଖରେ ଥିବା ଏକ ଘରେ ଭଡ଼ାରେ ରୁହନ୍ତି ସୌମ୍ୟାଜିତ ମହାପାତ୍ର । ଗତ କିଛିଦିନ ହେଲା ମାଲିକଙ୍କ ସହ ତାଙ୍କର ଘର ଭଡ଼ାକୁ କେନ୍ଦ୍ର କରି ଝଗଡା ଚାଲିଥିଲା। କଥା ଯାଇ ଥାନାରେ ପହଞ୍ଚିଥିଲା । ଚନ୍ଦ୍ରଶେଖରପୁର ଥାନା ପୋଲିସର ବୁଝାମଣା ମୁତାବକ ଏହି ମାସ ଶେଷରେ ଘର ଛାଡିବାକୁ ତାଙ୍କୁ କୁହାଯାଇଥିଲା। କିନ୍ତୁ ସୌମ୍ୟାଜିତଙ୍କ ପରିବାର ଲୋକେ ବାହାରକୁ ଯାଇଥିବା ବେଳେ ଘରୁ ସମସ୍ତ ଜିନିଷ ବାହାରକୁ କାଢି ଘର ତାଲା ପକାଇଦେଇଛନ୍ତି ମାଲିକ। ଏ ନେଇ ଘର ମାଲିକଙ୍କ ପ୍ରତିକ୍ରିୟା ମିଳିପାରିନାହିଁ ।
ଆଜି ୧୨ ଘଣ୍ଟିଆ ଦେବଗଡ଼ ବନ୍ଦ
ନନ୍ଦିଘୋଷ ବ୍ୟୁରୋ: ଆଜି ୧୨ ଘଣ୍ଟିଆ ଦେବଗଡ଼ ବନ୍ଦ। ଜିଲ୍ଲା ମୁଖ୍ୟ ଚିକିତ୍ସାଳୟ ପୁରୁଣା କୋଠାରେ ୨୪ ଘଣ୍ଟିଆ ସ୍ୱାସ୍ଥ୍ୟ ସେବା ପ୍ରଦାନ ଦାବିରେ ଜିଲ୍ଲା ମହିଳା ଏକତା ମଞ୍ଚ ପକ୍ଷରୁ ବନ୍ଦ ଡାକରା ଦିଆଯାଇଛି। ସକାଳ ୬ଟାରୁ ସନ୍ଧ୍ୟା ୬ଟା ଯାଏଁ ବନ୍ଦ ପାଳନ ହେଉଥିବାବେଳେ ଏହାର ପ୍ରଭାବ ଦେଖିବାକୁ ମିଳିଛି l ଦୋକାନ ବଜାର ଓ ଗାଡ଼ିମୋଟର ଚଳାଚଳ ବନ୍ଦ ରହିଛି l ଜରୁରୀ କାଳୀନ ସେବା ବ୍ୟତୀତ ସମସ୍ତ ସେବା ବନ୍ଦ ରହିଛି l ୪୯ ନମ୍ବର ଜାତୀୟ ରାଜପଥର ଉଭୟ ପାର୍ଶ୍ଵରେ ଅଟକି ରହିଥିଲା ଯାନବାହାନ l ପୋଲିସ ପହଞ୍ଚି ଆନ୍ଦୋଳନକାରୀଙ୍କୁ ଜାତୀୟ ରାଜପଥରୁ ଉଠାଇ ନେଇଥିବାବେଳେ ଯାନବାହାନ ଚଳାଚଳ ସ୍ୱାଭାବିକ ହୋଇଛି l
ପୁଣି ଶ୍ରୀମନ୍ଦିର ଭିତର ଫଟୋ ଭାଇରାଲ
ନନ୍ଦିଘୋଷ ବ୍ୟୁରୋ: ପୁଣି ଶ୍ରୀମନ୍ଦିର ସୁରକ୍ଷା ଉପରେ ବଡ଼ ପ୍ରଶ୍ନବାଚୀ। ଶ୍ରୀମନ୍ଦିର ଭିତର ଫଟୋ ଭାଇରାଲ। ସୋସିଆଲ ମିଡିଆରେ ଆଶୀର୍ବାଦ-945 ନାମକ ଆଇଡି ବ୍ୟବହାର କରୁଥିବା ବ୍ୟକ୍ତି ଫଟୋ କରିଛନ୍ତି ଭାଇରାଲ। ରତ୍ନ ସିଂହାସନରେ ମହାପ୍ରଭୁ ଶ୍ରୀଜଗନ୍ନାଥଙ୍କ ଫଟୋ ହୋଇଛି ଭାଇରାଲ। ଅତି ନିକଟରୁ ଫଟୋ ନିଆଯାଇଥିବା ଦେଖିବାକୁ ମିଳିଛି। ବ୍ୟକ୍ତି ଜଣକ କିଭଳି ଶ୍ରୀମନ୍ଦିର ଭିତରେ ଫଟୋ ଉଠାଇଲେ ତାହାର ତଦନ୍ତ ଦାବି ହୋଇଛି। ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଛି।
ସୁଦାନରୁ ଫେରିଲେ ଓଡ଼ିଆ ପୁଅ ଆଦର୍ଶ ବେହେରା
ନନ୍ଦିଘୋଷ ବ୍ୟୁରୋ: ଆଫ୍ରିକା ସୁଦାନରୁ ଫେରିଲେ ଓଡ଼ିଆ ପୁଅ ଆଦର୍ଶ ବେହେରା । ଜଗତସିଂହପୁର ଜିଲ୍ଲା ତିର୍ତ୍ତୋଲ ଥାନା କୋଟକଣା ଗାଁର ଆଦର୍ଶ ବେହେରା ଓଡ଼ିଶା ଫେରିଛନ୍ତି। ସୁଦାନରେ କାର୍ଯ୍ୟ କରୁଥିବା ବେଳେ ଓଡ଼ିଆ ଯୁବକଙ୍କୁ ଆତଙ୍କବାଦୀ ଅପହରଣ କରିଥିଲେ । ଗୃହ ଯୁଦ୍ଧରେ ସାମିଲ ବିଦ୍ରୋହୀଙ୍କ ଦ୍ୱାରା ଅପହରଣ ହୋଇଥିଲେ ଆଦର୍ଶ । ଦୀର୍ଘ ଦିନ ପରେ ଆଜି ଭୁବନେଶ୍ୱର ବିମାନବନ୍ଦରରେ ପହଞ୍ଚିଛନ୍ତି ଆଦର୍ଶ । ବିମାନବନ୍ଦରରେ ପରିବାର ପକ୍ଷରୁ ସ୍ବାଗତ କରାଯାଇଛି।
ଆଦର୍ଶଙ୍କ ଫେରିବା ବାଟକୁ ଚାହିଁ ରହିଥିଲେ ପରିବାର। ଜଙ୍ଗଲ ଭିତରେ ଆଦର୍ଶଙ୍କୁ ଦିଆଯାଉଥିଲା ନିର୍ଯାତନା। ଆତଙ୍କବାଦୀମାନେ ଆଦର୍ଶଙ୍କୁ ଶାହାରୁଖ ଖାନଙ୍କୁ ଜାଣିଛନ୍ତି କି ବୋଲି କରୁଥିଲେ ପ୍ରଶ୍ନ। ଆଦର୍ଶ ମୁମ୍ବାଇରେ କାମ କରିବା ସମୟରେ ସୁଦାନରେ ଏକ ପ୍ଲାଷ୍ଟିକ କାରଖାନାରେ କାମ କରିବା ପାଇଁ ଚୁକ୍ତି କରିଥିଲେ। ସୁଦାନର ରାଜଧାନୀ ଖାରତୁମ ଠାରୁ ହଜାର କିଲୋମିଟର ଦୂରରେ ସେ କାମ କରିବା ବେଳେ ଅପହରଣକାରୀ ଅପହରଣ କରିଥିଲେ। ଗତ ୨୦୨୨ ମସିହାରୁ ଆଦର୍ଶ ସୁଦାନରେ ଶୁକ୍ରତି ପ୍ଲାଷ୍ଟିକ ଫାକ୍ଟେରିରେ କାମ କରିଆସୁଥିଲେ।
ଶୀତରେ ଥରୁଛି ସାରା ଓଡିଶା
ନନ୍ଦିଘୋଷ ବ୍ୟୁରୋ: ଶୀତରେ ଥରୁଛି ସାରା ଓଡିଶା। ସବୁଠି ଜାଡ ଶୀତ ଅନୁଭୂତ ହେଉଥିବା ବେଳେ ଆଗାମୀ ୭ ଦିନ ଯାଏ ଏଥିରେ କୌଣସି ପରିବର୍ତ୍ତନ ହେବାର ନାହିଁ। ଗତ ୨୪ ଘଂଟାରେ ଫୁଲବାଣୀରେ ସର୍ବନିମ୍ନ ତାପମାତ୍ରା ୭.୦ ଡିଗ୍ରୀ ରେକର୍ଡ ହୋଇଥିବା ବେଳେ ପାହାଡିଆ ଅଂଚଳର ସିମିଲିଗୁଡାରେ ୫.୨ ଡିଗ୍ରୀ ସର୍ବନିମ୍ନ ତାପମାତ୍ରା ରେକର୍ଡ କରାଯାଇଛି । ଗତ ଦୁଇଦିନ ହେବ ଶୀତ ସାମାନ୍ୟ କମ ରହିଥିବା ବେଳେ କିଛି କିଛି ସ୍ଥାନରେ ସ୍ୱାଭାବିକ ଠାରୁ ୨ ରୁ ୩ ଡିଗ୍ରୀ ତାପମାତ୍ରା ବୃଦ୍ଧି ପାଇଛି । ସେପଟେ ଘନ କୁହୁଡି କିଛି କିଛି ସ୍ଥାନରେ ଦୃଶ୍ୟମାନ ହେଉଥିବା ବେଳେ ଆଗାମୀ ଦୁଇଦିନ ଯାଏଁ ଚେତାବନୀ ଦେଇଛି ପାଣିପାଗ ବିଭାଗ । ଆଜି ପାଇଁ କୋରାପୁଟ କନ୍ଧମାଳ ସୁନ୍ଦରଗଡ ୩ ଜିଲ୍ଲାକୁ ଘନ କୁହୁଡି ପାଇଁ ୟେଲୋ ଓ୍ବାର୍ଣ୍ଣି ଜାରି କରିଛି ପାଣିପାଗ ବିଭାଗ। ଅନ୍ୟପଟେ ଗତ ୨୪ ଘଣ୍ଟାରେ ୫ ଟି ସ୍ଥାନରେ ଘନ କୁହୁଡି ପରିଲିକ୍ଷିତ ହୋଇଥିବା ବେଳେ ରାଉଲକେଲାରେ ମାତ୍ରାଧିକ ଘନ କୁହୁଡି ଦୃଶ୍ୟମାନ ହୋଇଛି।.
ଆଜି ଓଟିଇଟି ପରୀକ୍ଷା
ନନ୍ଦିଘୋଷ ବ୍ୟୁରୋ: ଆଜି ଓଟିଇଟି ପରୀକ୍ଷା । 452 ଟି ପରୀକ୍ଷା କେନ୍ଦ୍ରରେ ଦେଢ଼ ଲକ୍ଷରୁ ଅଧିକ ପରୀକ୍ଷାର୍ଥୀ ପରୀକ୍ଷା ଦେବେ । ଦୁଇଟି ସିଟିଂ ପରୀକ୍ଷା ହେବ । ପ୍ରଥମ ସିଟିଂ ସକାଳ 9 ରୁ ସାଢେ 11 ଟା ପର୍ଯ୍ୟନ୍ତ ଚାଲିବ । ଏବଂ ଦ୍ୱିତୀୟ ସିଟିଂ ଅପରାହ୍ନ ସାଢେ ଗୋଟାଏରୁ ଅପରାହ୍ନ 4 ଟା ପର୍ଯ୍ୟନ୍ତ ଚାଲିବ । ପରୀକ୍ଷା ସମୟ ରେ ସାମାନ୍ୟ ପରିବର୍ତ୍ତନ କରିଛି ବୋର୍ଡ । ଦ୍ୱିତୀୟ ସିଟିଂ ପରୀକ୍ଷା ଅପରାହ୍ନ 2 ଟାରୁ ଆରମ୍ଭ ହୋଇ ଅପରାହ୍ନ 4.30 ରେ ଶେଷ ହୋଇଥାନ୍ତା । ଯାହାକି ପରିବର୍ତ୍ତନ କରାଯାଇ ଅପରାହ୍ନ 1.30 ରୁ ଅପରାହ୍ନ 4 ଟା ସମୟ ଧର୍ଯ୍ୟ କରାଯାଇଛି । ଏନେଇ ବୋର୍ଡ ପକ୍ଷରୁ ପ୍ରେସ ବିଜ୍ଞପ୍ତି ମାଧ୍ୟମରେ ସୂଚନା ଦିଆଯାଇଛି । ତେବେ ସମସ୍ତ କେନ୍ଦ୍ର ରେ ପ୍ରଶ୍ନ ପତ୍ର ସୁରକ୍ଷିତ ଭାବରେ ପହଞ୍ଚି ସାରିଛି ।
୭ ରାଷ୍ଟ୍ର ବିରୋଧରେ ଟ୍ରାଭେଲ ବ୍ୟାନ୍ : ପୁଣି କଠୋରେ ହେଲେ ଆମେରିକା ରାଷ୍ଟ୍ରପତି ଟ୍ରମ୍ପ
ନନ୍ଦିଘୋଷ ବ୍ୟୁରୋ: ନିରାପତ୍ତା, ସାଧାରଣ ଜନତାଙ୍କ ସୁରକ୍ଷା ଓ ଭିସା ପ୍ରସଙ୍ଗରେ ଅଧିକ କଠୋର ହେଲେ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ। ୭ଟି ଦେଶର ନାଗରିକାଙ୍କ ଆମେରିକା ପ୍ରବେଶ ଉପରେ ଜାରି କଲେ କଟକଣା।ପୂର୍ବରୁ ଟ୍ରମ୍ପ ଏହି ନିଷ୍ପତ୍ତି ୩୦ଟି ରାଷ୍ଟ୍ର ବିରୋଧରେ ସମ୍ପୂର୍ଣ୍ଣ ଓ ଆଂଶିକ କାର୍ଯ୍ଯକାରୀ କରିଥିଲେ। ଆସନ୍ତା ଜାନୁଆରୀ ୧ରୁ ବୁର୍କିନା ଫାସୋ, ମାଳି, ନାଇଜର ,ଦକ୍ଷିଣ ସୁଦାନ, ସିରିୟା, ଲାଓସ ଓ ସିଏରା ଲିଓନ ବିରୋଧରେ ଏହି ଘୋଷଣା କାର୍ଯ୍ୟକାରୀ ହେବ। ଜାନୁଆରୀ ୧ରୁ ଏହି ନୂଆ ନିୟମ ବଳରେ ଏହି ସବୁ ଦେଶର ନାଗରିକମାନେ ଏଣିକି ଆମେରିକା ଯାଇପାରିବେ ନାହିଁ।
ଏହା ସହ ପାଲେଷ୍ଟାଇନ କର୍ତ୍ତୃପକ୍ଷଙ୍କ ଦ୍ବାରା ଜାରି ଟ୍ରାଭେଲ ଡକୁମେଣ୍ଟ ହାସଲ କରିଥିବା ନାଗରିକମାନେ ବି ଆମେରିକା ଯାଇପାରିବେ ନାହିଁ। ୱେଷ୍ଟବ୍ୟାଙ୍କ ଓ ଗାଜାରେ ଆତଙ୍କବାଦୀମାନେ ରହୁଥିବା କାରଣରୁ ଆମେରିକା ଏହି ନିଷ୍ପତ୍ତି ନେଇଛି। ପୂର୍ବରୁ ଯେଉଁ ୧୨ଟି ରାଷ୍ଟ୍ର ଉପରେ ଏହି କଟକଣା ସମ୍ପୂର୍ଣ୍ଣ ଜାରି ହୋଇଥିଲା ସେହି ଦେଶଗୁଡ଼ିକ ହେଲେ- ଆଫଗାନିସ୍ତାନ, ବର୍ମା, ଚାଦ, କଙ୍ଗୋ, ଗିନି, ଏରିଟ୍ରିଆ, ହାଇତି, ଇରାନ, ଲିବ୍ୟା, ସୋମାଲିଆ ଓ ୟେମେନ। ସେହିପରି ଯେଉଁ ରାଷ୍ଟ୍ରଗୁଡିକ ଉପରେ ଆଂଶିକ କଟକଣା ଲଗାଯାଇଥିଲା ସେହି ରାଷ୍ଟ୍ରଗୁଡିକ ହେଲେ- ବୁରୁଣ୍ଡି, କ୍ଯୁବା, ଟୋଗୋ, ଭେନେଜୁଏଲା ଆଦି ରାଷ୍ଟ୍ର।
ଅଜଣା ଗାଡ଼ି ଧକ୍କାରେ ଦମ୍ପତି ମୃତ, ୬ ମାସର ଶିଶୁପୁତ୍ର ଗୁରୁତର
ନନ୍ଦିଘୋଷ ବ୍ୟୁରୋ: ଯାଜପୁର ୫୩ ନମ୍ବର ଜାତୀୟ ରାଜପଥର କଳିଙ୍ଗନଗର ଥାନା ବ୍ରାହ୍ମଣୀ ସେତୁ ନିକଟରେ ମର୍ମନ୍ତୁଦ ସଡ଼କ ଦୁର୍ଘଟଣା । ଅଜଣା ଗାଡ଼ି ଧକ୍କାରେ ସ୍ବାମୀ ସ୍ତ୍ରୀଙ୍କ ମୃତ୍ୟୁ ହୋଇଥିବା ବେଳେ ତାଙ୍କ ୬ ମାସର ଶିଶୁପୁତ୍ର ଗୁରୁତର । ଗୁରୁତର ଆହତ ଅବସ୍ଥାରେ ଶିଶୁପୁତ୍ରକୁ କଟକ ଶିଶୁଭବନକୁ ସ୍ଥାନାନ୍ତର କରାଯାଇଛି । ଘଟଣାକୁ ନେଇ ଉତ୍ତେଜନା ପ୍ରକାଶ ପାଇଛି । ବେଳେ ଉତ୍ୟକ୍ତ ଲୋକେ ଚଣ୍ଡିଖୋଲ ଡ଼ୁବୁରୀ ରାସ୍ତା ଅବରୋଧ କରିଛନ୍ତି । ମୃତକ ସ୍ଥାନୀୟ ପଙ୍କପାଳ ଗ୍ରାମର ଜନ୍ମେଜୟ ଦଳେଇ ଓ ତାଙ୍କ ସ୍ତ୍ରୀ ବୈଶାଖୀ । ଦମ୍ପତି ନିଜ ୬ ମାସର ଶିଶୁପୁତ୍ରକୁ ନେଇ ଆଜି ସନ୍ଧ୍ୟାରେ କବାଟବନ୍ଧ ମେଡ଼ିକାଲକୁ ଯାଇଥିଲେ । ମେଡିକାଲରୁ ଘରକୁ ଫେରିବା ସମୟରେ ଘଟିଛି ଦୁର୍ଘଟଣା । ପୋଲିସ ପହଞ୍ଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରିବା ସହ ଘଟଣାର ତଦନ୍ତ ଆରମ୍ଭ କରିଛି । ତେବେ ରାସ୍ତା ସମ୍ପ୍ରସାରଣ କାର୍ଯ୍ୟ ଚାଲୁ ରହିଥିବାରୁ ବାରମ୍ବାର ଏହି ରାସ୍ତାରେ ଦୁର୍ଘଟଣା ଘଟି ଲୋକଙ୍କ ଧନଜୀବନ ହାନି ହେଉଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି ।
ମରଣଯନ୍ତା ପାଲଟିଛି ସହର ରାସ୍ତା: ଅସାବଧାନ ହେଲେ ଦୁର୍ଘଟଣା ସୁନିଶ୍ଚିତ
ମରଣଯନ୍ତା ପାଲଟିଛି ସହର ରାସ୍ତା । ସବୁଠି ଖାଲଖମା, ସବୁଠି ଉଠିଲାଣି ପିଚୁ । ଅସାବଧାନ ହେଲେ ଦୁର୍ଘଟଣା ସୁନିଶ୍ଚିତ । ରାଉରକେଲା ପାନପୋଷ ଛକ ଠାରୁ ଉଦିତନଗର ଛକ ପର୍ଯ୍ୟନ୍ତ ନବନିର୍ମିତ ହୋଇଥିବା ଏହି ରାସ୍ତାର ବିଭିନ୍ନ ସ୍ଥାନରେ ଗାତ ସୃଷ୍ଟି ହୋଇଥିବାରୁ ବାଧାପ୍ରାପ୍ତ ହେଉଛି ଯାତାୟାତ । ରାସ୍ତାରୁ ଗୋଡ଼ି ଉଠିଯାଇଥିବାରୁ ଅନେକ ସମୟରେ ଦୁର୍ଘଟଣା ଘଟୁଥିବା ଲୋକେ ଅଭିଯୋଗ କରିଛନ୍ତି । ଖାଲି ଏହି ଗୋଟିଏ ରାସ୍ତା ନୁହେଁ ସ୍ମାର୍ଟ ସିଟି ରାଉରକେଲାର ବିଶ୍ରା ଛକ ଠାରୁ ବନ୍ଧମୁଣ୍ଡା ରାସ୍ତା ସହ ସହରର ଅଧିକାଂଶ ରାସ୍ତା ନିମ୍ନମାନର କାମ ଯୋଗୁଁ ଏପରି ସ୍ଥିତି ଉପୁଜିଥିବା ଲୋକେ ଅଭିଯୋଗ କରିଛନ୍ତି ।
ରାଉରକେଲା ସହରର ସମସ୍ତ ଖାଲଖମା ଓ ଗର୍ତ୍ତ ସୃଷ୍ଟି ହୋଇଥିବା ରାସ୍ତା ଆସନ୍ତା ମାର୍ଚ୍ଚ ମାସ ୩୧ ତାରିଖ ସୁଦ୍ଧ ମରାମତି କରିବା ପାଇଁ ରାଉରକେଲା ମହାନଗର ନିଗମ କମିଶନର ବିଭାଗୀୟ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି । କାମ ସମୟରେ ଲୋକଙ୍କ ଯେପରି ଅସୁବିଧା ନହୁଏ ସେଥିପାଇଁ ରାସ୍ତା ଖୋଳି କୈଣସି କାମ ଆରମ୍ଭ କରିବା ପୂର୍ବରୁ ଅନୁମତି ନେବାକୁ ନିର୍ଦ୍ଦେଶ ଦେଇଛନ୍ତି କମିଶନର । ୨୦୨୬ ମାର୍ଚ୍ଚ ସୁଦ୍ଧା ରାଉରକେଲା ସହରର ସମସ୍ତ ରାସ୍ତା ଗୁଡିକୁ ମରାମତି କରିବା ସହ ରାସ୍ତାକୁ ଗର୍ତ୍ତମୁକ୍ତ କରିବାକୁ କୁହାଯାଇଛି । ରାଉରକେଲା ସହରରେ ବିଭିନ୍ନ ବିଭାଗରେ ନିମ୍ନ ମାନର ରାସ୍ତା କାମ କରୁଥିବା ଠିକାଦାରଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ତଦାରଖ ଦାୟିତ୍ଵରେ ଥିବା ଯନ୍ତ୍ରୀଙ୍କ ବିରୁଦ୍ଧରେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଦାବି ହୋଇଛି ।