ମୁମ୍ବାଇ : ମୁମ୍ବାଇ ଆତଙ୍କବାଦୀ ହମଲାର ଆଜି ଷୋଡ଼ଶତମ ବାର୍ଷିକୀ। ୨୬/୧୧ ଆକ୍ରମଣର ବର୍ଷପୂର୍ତ୍ତି ଅବସରରେ ମୁମ୍ବାଇରେ ଆୟୋଜିତ ହୋଇଛି ସ୍ବତନ୍ତ୍ର କାର୍ଯ୍ୟକ୍ରମ। ୨୦୦୮ ନଭେମ୍ବର ୨୬ରେ ତାଜ ହୋଟେଲ, ଛତ୍ରପତି ଟର୍ମିନସ, ଲିଓପାର୍ଡ କେଫ, ମୁମ୍ବାଇ ଛବାଦ ହାଉସ, ନରିମାନ ହାଉସ, କାମା ହସ୍ପିଟାଲ, ମେଟ୍ରୋ ସିନେମା ଆଦି ସ୍ଥାନରେ ଲସ୍କର-ଇ-ତଏବା ସଂଗଠନ ହମଲା କରିଥିଲା। ଏଥିରେ ୧୬୬ ଲୋକଙ୍କ ମୃତ୍ଯୁ ହୋଇଥିବାବେଳେ ସେମାନଙ୍କ ମଧ୍ଯରେ ଥିଲେ ୨୦ ଜଣ ନିରାପତ୍ତା ରକ୍ଷୀ, ୨୬ ବିଦେଶୀ। ୩୦୦ରୁ ଅଧିକ ଲୋକ ଆହତ ହୋଇଥିଲେ। ପାକିସ୍ତାନରୁ ଆତଙ୍କବାଦୀମାନେ ଆସି ଅନାୟାସରେ ଆର୍ଥିକ ରାଜଧାନୀରେ ଖେଳିଥିଲେ ରକ୍ତର ହୋରି। ଘଟଣାରେ ଆତଙ୍କବାଦୀଙ୍କ ସହ ମୁକାବିଲା କରୁଥିବାବେଳେ ପ୍ରାଣ ହରାଇଥିଲେ ମେଜର ସନ୍ଦୀପ ଉନ୍ନିକ୍ରିଷ୍ଣନ। ଏହା ସହ ୧୯୮୨ ବ୍ଯାଚର ଆଇପିଏସ ଅଧିକାରୀ ତଥା ଆଣ୍ଟି ଟେରରିଷ୍ଟ ସ୍କ୍ବାଡ ମୁଖ୍ଯ ହେମନ୍ତ କେରକାରେଙ୍କ ବି ମୃତ୍ଯୁ ଘଟିଥିଲା।
ସମ୍ବିଧାନ ଲାଗୁର ୭୫ ବର୍ଷ ପୂର୍ତ୍ତି ; ଦେଶର ଏକତା ଓ ଅଖଣ୍ଡତାକୁ ବଜାୟ ରଖିବାକୁ ରାଷ୍ଟ୍ରପତିଙ୍କ ଆହ୍ୱାନ
ନୂଆଦିଲ୍ଲୀ : ସମ୍ବିଧାନ ଲାଗୁର ୭୫ ବର୍ଷ ପୂର୍ତ୍ତି ଅବସରରେ ଆୟୋଜିତ ହୋଇଛି ସ୍ବତନ୍ତ୍ର ଅଧିବେଶନ। ଦେଶର ଏକତା ଓ ଅଖଣ୍ଡତାକୁ ବଜାୟ ରଖିବା ଲାଗି ଏହି ଦିବସରେ ଦିଆଯାଇଛି ଆହ୍ବାନ। ଏହି ଅବସରରେ ଉଦବୋଧନ ଦେଇ ରାଷ୍ଟ୍ରପତି ଦ୍ରୌପଦୀ ମୁର୍ମୁ ସମ୍ବିଧାନ ନିର୍ମାତା ବାବାସାହେବ ଆମ୍ବେଦକରଙ୍କ ସ୍ମୃତିଚାରଣ କରିଛନ୍ତି। ସେ କହିଛନ୍ତି, ଭାରତ ଲୋକତନ୍ତ୍ରର ଜନନୀ। ଏହି ଭାବନାକୁ ବଜାୟ ରଖିବାକୁ ପଡିବ। ମହିଳା ସଶକ୍ତିକରଣ ଦେଶର ଗଣତନ୍ତ୍ରରେ ନୂଆ ଅଧ୍ଯାୟ ସୃଷ୍ଟି କରିଛି। ସମ୍ବିଧାନ ସବୁଠାରୁ ବଡ଼ ଗ୍ରନ୍ଥ। ଗୃହରେ ମହିଳା ସଦସ୍ଯଙ୍କ ଯୋଗଦାନକୁ ପ୍ରଣାମ ଜଣାଇଛନ୍ତି ରାଷ୍ଟ୍ରପତି।
୧୯୪୯ର ଆଜିର ଦିବସରେ ଲାଗୁ ହୋଇଥିଲା ସମ୍ବିଧାନ। ସମ୍ବିଧାନ ଦିବସ ଅବସରରେ ସଂସଦର ମିଳିତ ଅଧିବେଶନରେ ଯୋଗଦେଇଛନ୍ତି ସାଂସଦ। ୧୯୪୯ ନଭେମ୍ବର ୨୬ରେ ଦେଶରେ ସମ୍ବିଧାନ କାର୍ଯ୍ୟକାରୀ ହୋଇଥିଲା। ଏହି ଦିବସ ଲାଗି କେନ୍ଦ୍ର ସରକାର ଏକ ବର୍ଷ ବ୍ଯାପୀ କାର୍ଯ୍ୟକ୍ରମର ଆୟୋଜନ କରୁଛନ୍ତି। ପ୍ରତି ବର୍ଷ ନଭେମ୍ବର ୨୬କୁ ସମ୍ବିଧାନ ଦିବସ ପାଳୁ କରିବା ଲାଗି କେନ୍ଦ୍ର ସାମାଜିକ ନ୍ୟାୟ ଓ ସଶକ୍ତିକରଣ ମନ୍ତ୍ରାଳୟ ପକ୍ଷରୁ ଗତ ୨୦୧୫ ନଭେମ୍ବର ୧୯ରେ ଘୋଷଣା କରାଯାଇଥିଲା।
ବିଧାନସଭାର ଶୀତ ଅଧିବେଶନ ଆରମ୍ଭରୁ ଗରମ, ବାରମ୍ୱାର ହେଉଛି ମୁଲତବୀ
ଭୁବନେଶ୍ୱର : ଶୀତ ଅଧିବେଶନ ଆରମ୍ଭରୁ ଗରମ, ବାରମ୍ୱାର ହେଉଛି ମୁଲତବୀ । ଶୂନ୍ଯକାଳରେ ଉଠିଲା ସମ୍ବିଧାନ ମୁଖବନ୍ଧରେ ଧର୍ମନିରପେକ୍ଷ ଓ ସମାଜବାଦ ଶବ୍ଦକୁ ବାଦ ଦିଆଯିବା ପ୍ରସଙ୍ଗ । ବିଜେଡି ବିଧାୟକ ଏହି ପ୍ରସଙ୍ଗ ଉଠାଇବା ପରେ ଏହାକୁ ନେଇ ହୋହଲ୍ଲା ହେବାରୁ ବାଚସ୍ପତି ଗୃହକୁ ୪ଟା ଯାଏଁ ମୁଲତବୀ ଘୋଷଣା କରିଛନ୍ତି । ବିଜେଡି ବିଧାୟକ ରଣେନ୍ଦ୍ର ପ୍ରତାପ ସ୍ବାଇଁ ପ୍ରସଙ୍ଗ ଉଠାଇ ଦୁଇ ଶବ୍ଦ ନଥିବା ଅତ୍ଯନ୍ତ ଦୁଃଖଦାୟକ । ଏପରି ମାନସିକତା କଣ ପାଇଁ ବୋଲି ପ୍ରଶ୍ନ କରି ଉତ୍ତର ଲୋଡିଥିଲେ । ହେଲେ ହଙ୍ଗାମା ହେବାରୁ ଗୃହକୁ ୪ଟା ଯାଏଁ ମୁଲତବୀ ଘୋଷଣା କରାଯାଇଛି । ପ୍ରଥମେ ୧୨ଟା ୨୫ ଯାଏଁ ମୁଲତବୀ ପରେ ଗୃହ ଏହାକୁ ନେଇ ପୁଣି ଅଶାନ୍ତ ହେବାରୁ ୪ଟା ଯାଏଁ ମୁଲତବୀ ରଖାଯାଇଛି ।
ବିଧାନସଭାରେ ରଖାଯାଇଥିବା ସମ୍ବିଧାନରେ ଧର୍ମନିରପେକ୍ଷ ଓ ସମାଜବାଦକୁ ବାଦ ଦିଆଯାଇଥିବାରୁ ଏହାର ତୀବ୍ର ବିରୋଧ କରିଛନ୍ତି ବିରୋଧୀ ବିଜେଡି ଓ କଂଗ୍ରେସ । ଧର୍ମନିରପେକ୍ଷ ଓ ସମାଜବାଦ ଦେଶର ସମ୍ବିଧାନରେ ୧୯୭୬ରେ ଯୋଡ଼ା ଯାଇଥିବାବେଳେ ଓଡ଼ିଶା ବିଧାନସଭାରେ ରଖାଯାଇଥିବା ସମ୍ବିଧାନରେ ଏହା କାହିଁକି ନାହିଁ ବୋଲି ପ୍ରଶ୍ନ କରିଛି ବିଜେଡି । ଏହା ଭାରତୀୟ ସମ୍ବିଧାନକୁ ଅସମ୍ମାନ। ଏପରି ଭୁଲ ଏକ ଅପରାଧ । ଏଥିରେ ତୁରନ୍ତ ଏହି ଦୁଇ ଶବ୍ଦ ସାମିଲ କରିବାକୁ ବିଜେଡି ଦାବି କରିଛି ।
ଗତକାଲି ସୁପ୍ରିମକୋର୍ଟ ବି ନିଷ୍ପତ୍ତି ଦେଇଛନ୍ତ ଯେ ଏହି ଦୁଇ ଶବ୍ଦ ବାଦ ହୋଇ ପାରିବ ନାହିଁ । ଆଜି ନଭେମ୍ବର ୨୬ ତାରିଖ, ସମ୍ବିଧାନ ଦିବସ ପାଳନ କରୁଛି ଦେଶ । ହେଲେ ଏଠି ଏହାକୁ ପାଳନରେ ଅମର୍ଯ୍ୟାଦା କରାଯାଉଛି । ଏହାକୁ ଅସମ୍ମାନ କରି କୌଣସି ସରକାର କି ବିଧାନସଭା ଚାଲି ପାରିବ ନାହିଁ । ୧୯୭୬ ମସିହାରେ ୪୭ ତମ ସଂଶୋଧନ ଦ୍ୱାରା କରାଯାଇ ଏହି ଦୁଇ ଶବ୍ଦକୁ ଯୋଡାଯାଇଛି । ତେଣୁ ଏହି ଦୁଇ ଶବ୍ଦକୁ ଯୋଡି ପୂର୍ଣ୍ଣ ସମ୍ବିଧାନ ପାଇଁ ବିଜେଡି ଦାବି କରି କହିଛି ଏପରି ଭୁଲ ଏକ ଅପରାଧ ।
ଆଜି ବିଧାନସଭାର ପ୍ରଥମ ଦିନରେ ଏପରି ଏକ ଘଟଣା ଦେଖିବାକୁ ମିଳିଲା । ଏବେ ଦେଶରେ ଅମୃତ କାଳ ଚାଲିଛି ବୋଲି ସରକାର କହୁଛନ୍ତି । ଡବଲ ଇଂଜିନ ସରକାର ବୋଲି ଘୋଷି ହେଉଛନ୍ତି । ମୁଖ୍ୟମନ୍ତ୍ରୀ ଆଜି ଦିନକୁ ସ୍ୱାଧୀନତା ଦିବସ କହିଲେ । ସମ୍ବିଧାନ ଦିବସରେ ସମ୍ବିଧାନକୁ ରାଜ୍ୟ ସରକାର ହତାଦର କରିଛନ୍ତି ବୋଲି ଅଭିଯୋଗ କରିଛନ୍ତି ବିରୋଧୀ। ହତାଦର କରିଛନ୍ତି ବୋଲି କହିଛନ୍ତି ରାଜ୍ୟ ସରକାର । ଏହି ଦୁଇ ଶବ୍ଦ ନ ଥିବାକୁ ବିଜେଡି ବିରୋଧ କରୁଛି । ସେହିପରି କଂଗ୍ରେସ ମଧ୍ଯ ସରକାରଙ୍କୁ ଏହି ପ୍ରସଙ୍ଗରେ କଡ଼ା ସମାଲୋଚନା କରିଛି । ସୁପ୍ରିମକୋର୍ଟ ଏହା ବିରୋଧରେ ନିଷ୍ପତ୍ତି ନେଇଛନ୍ତି । ତେଣୁ ରାଜ୍ଯ ସରକାର ଏହାକୁ ମାନିବାକୁ ବାଧ୍ୟ ବୋଲି କହିଛନ୍ତି କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡ଼ାମ ।
ଭାରତର ଏହି ପଡ଼ୋଶୀ ଦେଶରେ ସୁନା ହେଲା ୧୬ ହଜାର ଟଙ୍କା ଶସ୍ତା
ନୂଆଦିଲ୍ଲୀ : ଭାରତର ପଡୋଶୀ ଦେଶ ନେପାଳରେ ହ୍ରାସ ପାଇଛି ସୁନାଦର । ସୁନା ମୂଲ୍ୟ ହ୍ରାସ ପାଇ ୧୫,୯୦୦ ଟଙ୍କା ହୋଇଛି । ଭାରତର ଆଭିମୁଖ୍ୟକୁ ନଜରରେ ରଖି ନେପାଳ ସରକାର ଏହି ନିଷ୍ପତ୍ତି ନେଇଛନ୍ତି ବୋଲି କୁହାଯାଉଛି । ଏହାପୂର୍ବରୁ ଜୁଲାଇରେ ଉପସ୍ଥାପିତ ବଜେଟରେ ଭାରତ ସରକାର ମଧ୍ୟ ସୁନା ଓ ରୂପା ଉପରେ ଆମଦାନୀ ଶୁଳ୍କକୁ ୧୫ ପ୍ରତିଶତରୁ ୬ ପ୍ରତିଶତକୁ ହ୍ରାସ କରିଥିଲେ, ଯେଉଁ କାରଣରୁ ସୁନା ମୂଲ୍ୟ ପ୍ରାୟ ୬ ହଜାର ଟଙ୍କା ଶସ୍ତା ହୋଇଛି। ଭାରତକୁ ଦେଖି ନେପାଳ ସରକାର ମଧ୍ୟ ଏଭଳି ପଦକ୍ଷେପ ନେଇଛନ୍ତି, ଯେଉଁ କାରଣରୁ ସେଠାରେ ସୁନା ମୂଲ୍ୟ ଭରି ପିଛା ପ୍ରାୟ ୧୬ ହଜାର ଟଙ୍କା ହ୍ରାସ ପାଇଛି।
ବାସ୍ତବରେ ନେପାଳ ସରକାର ସୁନା ଉପରେ ସୀମା ଶୁଳ୍କ ୫୦ ପ୍ରତିଶତ ହ୍ରାସ କରିଛନ୍ତି। ସୀମା ଶୁଳ୍କକୁ ଅଧା କରିବା ନିଷ୍ପତ୍ତି ପରେ ସୁନାର ମୂଲ୍ୟରେ ଭରି ପିଛା ୧୫,୯୦୦ ଟଙ୍କା (୧୧.୬୬୪ ଗ୍ରାମ) ହ୍ରାସ ଘଟିଛି। ଫେଡେରେସନ୍ ଅଫ୍ ନେପାଳ ଗୋଲ୍ଡ ଏବଂ ସିଲଭର ଡିଲର ଆସୋସିଏସନ୍ ଅନୁଯାୟୀ ସୋମବାର ଦିନ ହଲମାର୍କ ସୁନା ଭରି ପିଛା ୧,୫୧,୩୦୦ ଟଙ୍କା ଧାର୍ଯ୍ୟ କରାଯାଇଛି, ଯାହା ରବିବାର ଦିନ ଭରି ପିଛା ୧,୬୭,୨୦୦ ଟଙ୍କା ଥିଲା।
ଆମଦାନୀ ଶୁଳ୍କରେ କେତେ ହ୍ରାସ ?
ନେପାଳ ସରକାର ସୁନା ଆମଦାନୀ ଉପରେ ସୀମା ଶୁଳ୍କକୁ ୨୦ ପ୍ରତିଶତରୁ ୧୦ ପ୍ରତିଶତକୁ ହ୍ରାସ କରିଛନ୍ତି । ଅଧିକାରୀମାନଙ୍କ ମତରେ, ସୋମବାର ଠାରୁ କାର୍ଯ୍ୟକାରୀ ହୋଇଥିବା କ୍ୟାବିନେଟ ବୈଠକରେ ଏହି ନିଷ୍ପତ୍ତି ନିଆଯାଇଛି। ଏହାପୂର୍ବରୁ ଭାରତ ସୁନା ଓ ରୂପା ଉପରେ ସୀମା ଶୁଳ୍କକୁ ୧୫ ପ୍ରତିଶତରୁ ୬ ପ୍ରତିଶତକୁ ହ୍ରାସ କରିଥିଲା। ଅପରପକ୍ଷେ, ନେପାଳ ଚଳିତ ଆର୍ଥିକ ବର୍ଷ ପାଇଁ ବଜେଟରେ ସୁନା ଉପରେ ସୀମା ଶୁଳ୍କକୁ ୫ ପ୍ରତିଶତରୁ ୨୦ ପ୍ରତିଶତକୁ ବୃଦ୍ଧି କରିଛି।
ଚୋରା ଚାଲାଣ ବନ୍ଦ ପାଇଁ ପଦକ୍ଷେପ:
ଭାରତ ଆମଦାନୀ ଶୁଳ୍କ ହ୍ରାସ କରିବା ପରେ ନେପାଳରେ ସୁନା ମହଙ୍ଗା ହେଲା ଏବଂ ଭାରତରେ ଶସ୍ତା ହେଲା, ଯେଉଁଥିପାଇଁ ସୁନା ଚୋରା ଚାଲାଣ ବୃଦ୍ଧି ପାଇଲା। ମହାସଂଘ ଅନୁଯାୟୀ, ସୀମାର ନିୟୋଜିତ ଥିବା କିଛି ଅଫିସରଙ୍କ ମନମାନି କାରଣରୁ ବେଆଇନ ବାଣିଜ୍ୟ କାରବାର ବଢିଯାଇଥିଲା। ଏହିପରି ଚୋରା କାରୋବାରକୁ ବନ୍ଦ କରିବାକୁ ଫେଡେରେଶନ ପରାମର୍ଶ ଦେଇଛି, ଯେ ସୁନା ଉପରେ ସୀମା ଶୁଳ୍କ ୮ ପ୍ରତିଶତକୁ ବୃଦ୍ଧି କରାଯାଉ। ଏହାକୁ ୧୦ ପ୍ରତିଶତକୁ ବୃଦ୍ଧି କରିବାକୁ ସରକାର ଅନୁମତି ଦେଇଛନ୍ତି ।
ଭାରତ ଏବଂ ନେପାଳରେ ସୁନା ହାର କେତେ?
ନେପାଳରେ ସୁନା ଶସ୍ତା ହେବା ପରେ ଏହାର ମୂଲ୍ୟ ଭାରତ ତୁଳନାରେ ହ୍ରାସ ପାଇଛି। କିନ୍ତୁ ଭାରତରେ ୧୦ ଗ୍ରାମ ସୁନା ହାର ପ୍ରାୟ ୭୯,୫୯୫ ଟଙ୍କା ରହିଛି ଥିବା ବେଳେ ନେପାଳରେ ଭାରତୀୟ ମୂଲ୍ୟ ଅନୁଯାୟୀ ୧୦ ଗ୍ରାମ ସୁନାର ମୂଲ୍ୟ ପ୍ରାୟ ୮୦ ହଜାର ୯୩୦ ଟଙ୍କା ହେବ । ନେପାଳରେ ଭାରତୀୟ ମୂଲ୍ୟ ଅନୁଯାୟୀ ସୁନା ଦର ଭରି ପିଛା ୧,୫୧,୩୦୦ ଟଙ୍କା (94,366 ଭାରତୀୟ ଟଙ୍କା) ଅଟେ । ଅର୍ଥାତ୍ ବର୍ତ୍ତମାନ ସୁଦ୍ଧା ନେପାଳରେ ଭାରତ ତୁଳନାରେ ସୁନା ମୂଲ୍ୟ ଅଧିକ ରହିଛି।
ମହାରାଷ୍ଟ୍ର ମୁଖ୍ଯମନ୍ତ୍ରୀ ପଦରୁ ଇସ୍ତଫା ଦେଲେ ଏକନାଥ ସିନ୍ଦେ
ପୁଣେ : ମହାରାଷ୍ଟ୍ର ମୁଖ୍ଯମନ୍ତ୍ରୀ ପଦରୁ ଇସ୍ତଫା ଦେଲେ ଏକନାଥ ସିନ୍ଦେ। ରାଜ୍ଯରେ ମୁଖ୍ଯମନ୍ତ୍ରୀ ପଦ ନେଇ ଭାଗବଣ୍ଟା ଛିଣ୍ଡୁ ନଥିବାବେଳେ ସିନ୍ଦେଙ୍କ ଇସ୍ତଫା ଅଧିକ ଚର୍ଚ୍ଚା ସୃଷ୍ଟି କରିଛି। ରାଜ୍ଯପାଳ ସି.ପି. ରାଧାକ୍ରିଷ୍ଣନଙ୍କୁ ଇସ୍ତଫା ପତ୍ର ଦେଇଛନ୍ତି ସିନ୍ଦେ। ଇସ୍ତଫା ଦେବା ସମୟରେ ଦୁଇ ଉପମୁଖ୍ଯମନ୍ତ୍ରୀ ଅଜିତ ପାୱାର ଓ ଦେବେନ୍ଦ୍ର ଫଡନବିସ ବି ଉପସ୍ଥିତ ଥିଲେ।
ତେବେ ନୂଆ ମୁଖ୍ଯମନ୍ତ୍ରୀ ହେବା ଯାଏ ସିନ୍ଦେ କାମଚଳା ମୁଖ୍ଯମନ୍ତ୍ରୀ ରହିବେ। ଆଜି ମହାରାଷ୍ଟ୍ର ବିଧାନସଭା ଅଧିବେଶନ କାର୍ଯ୍ୟକାଳ ଶେଷ ହେଉଥିବାବେଳେ ଏ ପର୍ଯ୍ୟନ୍ତ ମୁଖ୍ୟମନ୍ତ୍ରୀ ନେଇ ଛିଡୁନି ଅଙ୍କ। ବିଜେପିର ଦେବେନ୍ଦ୍ର ଫଡନବିସ ହେବେ ନା ଶିବସେନାର ଏକନାଥ ସିନ୍ଦେ ମୁଖ୍ୟମନ୍ତ୍ରୀ ହେବେ। ଏ ଯାଏଁ ଘୋଷଣା ହୋଇପାରିନି। ତେବେ ବିଧାନସଭା ଅଧିବେଶନ କାର୍ଯ୍ୟକାଳ ଶେଷ ପୂର୍ବରୁ ସରକାର ଗଠନ ହେବା ନିୟମ ରହିଛି। ଯଦି ଆଜି ସୁଦ୍ଧା ସରକାର ଗଠନ ନହୁଏ ତେବେ ମହାରାଷ୍ଟ୍ରରେ ରାଷ୍ଟ୍ରପତି ଶାସନ ଲଗାଇବାକୁ ପଡିବ। ଏଭଳି ସ୍ଥିତିରେ ବିଜେପି ଏବଂ ମହାୟୁତି ମେଣ୍ଟରୁ ମୁଖ୍ୟମନ୍ତ୍ରୀ କିଏ ହେବ ନାଁ ଘୋଷଣା କରିବାକୁ ପଡିବ ।
RBI ଗଭର୍ଣ୍ଣର ଶକ୍ତିକାନ୍ତ ଦାସ ମେଡିକାଲରେ ଭର୍ତ୍ତି
ନୂଆଦିଲ୍ଲୀ : RBI ଗଭର୍ଣ୍ଣର ଶକ୍ତିକାନ୍ତ ଦାସ ମେଡିକାଲରେ ଭର୍ତ୍ତି । ସ୍ୱାସ୍ଥ୍ୟଜନିତ ସମସ୍ୟା ନେଇ ତାଙ୍କୁ ଚେନ୍ନାଇର ଆପୋଲୋ ହସପିଟାଲରେ ଭର୍ତ୍ତି କରାଯାଇଛି । ସୂଚନା ଅନୁସାରେ ଚିକିତ୍ସା ପରେ ତାଙ୍କ ସ୍ୱାସ୍ଥ୍ୟବସ୍ଥା ସ୍ଥିର ଥିବା RBI ପକ୍ଷରୁ କୁହାଯାଇଛି । ଆଉ ଦୁଇ ତିନି ଘଣ୍ଟା ପରେ ସେ ଡିସଚାର୍ଜ ହୋଇପାରନ୍ତି । ଆର୍ବିଆଇର ମୁଖପାତ୍ର ତାଙ୍କ ସ୍ବାସ୍ଥ୍ୟ ସଂପର୍କରେ ସୂଚନା ଦେଇ କହିଛନ୍ତି ଯେ ”ଚିନ୍ତା କରିବାର କୌଣସି କାରଣ ନାହିଁ। ସେ ଏବେ ଭଲ ଅଛନ୍ତି ଓ ଖୁବ୍ ଶୀଘ୍ର ଡିସ୍ଚାର୍ଜ ହେବେ।”
ଦିଲ୍ଲୀ ପୋଲିସକୁ ସୁପ୍ରିମକେର୍ଟଙ୍କ ଭର୍ତ୍ସନା : ବଳବତ୍ତର ରହିବ ଜିଆର୍ଏପି-୪
ନୂଆଦିଲ୍ଲୀ : ଦିଲ୍ଲୀର ବାୟୁ ପ୍ରଦୂଷଣ ଏବେ ବି ଉତ୍କଟ ରହିଥିବାରୁ ଗ୍ରେଡେଡ୍ ରେସ୍ପନ୍ସ ଆକ୍ସନ ପ୍ଲାନ୍ର ଚତୁର୍ଥ ପର୍ଯ୍ୟାୟ (ଜିଆର୍ଏପି-୪) ବଳବତ୍ତର ରହିବ ବୋଲି ସୁପ୍ରିକୋର୍ଟ କହିଛନ୍ତି। ସେହି ଅନୁଯାୟୀ ଦିଲ୍ଲୀ ଭିତରେ, ବାହାର ଟ୍ରକ୍ ଓ ଅନ୍ୟାନ୍ୟ ଗାଡ଼ି ପ୍ରବେଶ ଏବଂ ନିର୍ମାଣ କାର୍ଯ୍ୟ ଉପରେ କଟକଣା କଡ଼ାକଡ଼ି ରହିବ। ତେବେ କଟକଣା କଡ଼ାକଡ଼ି ଭାବେ କାର୍ଯ୍ୟକାରୀ କରିବାରେ ବିଫଳ ହୋଇଥିବା ଦିଲ୍ଲୀ ପୋଲିସକୁ ଜଷ୍ଟିସ୍ ଏ.ଏସ୍. ଓକା ଏବଂ ଏ.ଜି. ମସିହଙ୍କ ଖଣ୍ଡପୀଠ ଭର୍ତ୍ସନା କରିଛନ୍ତି।
ସପ୍ତାହରେ ଦିଲ୍ଲୀର ବାୟୁ ଗୁଣବତ୍ତା ସୂଚକାଙ୍କ ୪୫୦ ଟପିବା ପରେ ଜିଆର୍ଏପି-୪ ଲାଗୁ ହୋଇଥିଲା। ଅଦାଲତଙ୍କ ବିନା ଅନୁମୋଦନରେ ଏହାକୁ କୋହଳ ନ କରିବାକୁ ସର୍ବୋଚ୍ଚ ଅଦାଲତ ପୂର୍ବରୁ କହିଥିଲେ। ମାମଲାର ପରବର୍ତ୍ତୀ ଶୁଣାଣି ଗୁରୁବାର ହେବ। ଗତ ସପ୍ତାହ ତୁଳନାରେ ଦିଲ୍ଲୀର ଏକ୍ୟୁଆଇରେ ସାମାନ୍ୟ ଉନ୍ନତି ହୋଇଛି। ତେଣୁ ଦିଲ୍ଲୀ ଏବଂ ଜାତୀୟ ରାଜଧାନୀ ଅଞ୍ଚଳର ଅନ୍ୟ ସହରଗୁଡ଼ିକରେ ସ୍କୁଲ୍ ଖୋଲିବା ସମ୍ପର୍କରେ ବାୟୁ ଗୁଣବତ୍ତା ପରିଚାଳନା ଆୟୋଗ (ସିଏକ୍ୟୁଏମ୍) ବିଚାର କରିପାରିବ ବୋଲି ଅଦାଲତ କହିଛନ୍ତି।
ବାୟୁ ପ୍ରଦୂଷଣ ନିୟନ୍ତ୍ରଣ ପାଇଁ ଲାଗୁ ହୋଇଥିବା କଟକଣାର ତଦାରଖ ନିମନ୍ତେ କୋର୍ଟଙ୍କ ଦ୍ୱାରା ନିଯୁକ୍ତ ୧୩ କମିଶନରଙ୍କ ପକ୍ଷରୁ ଆଇନଜୀବୀ ଖଣ୍ଡପୀଠଙ୍କୁ ଜଣାଇଥିଲେ ଯେ, ଯାନବାହନ ଚଳାଚଳ ଯାଞ୍ଚ ହେଉଥିଲେ ମଧ୍ୟ ତାହା କେତେ ପ୍ରଭାବୀ ସ୍ପଷ୍ଟ ହୋଇନାହିଁ। ଅନେକ ଚେକ୍ପଏଣ୍ଟରେ ବ୍ୟାରିକେଡିଂ କରାଯାଇ ନ ଥିବାରୁ ଟ୍ରକ୍ଗୁଡ଼ିକୁ ଅଟକାଇବା ପାଇଁ ପୋଲିସ କର୍ମଚାରୀମାନେ ରାସ୍ତା ମଝିକୁ ଚାଲିଯାଉଛନ୍ତି। ଚେକ୍ ପଏଣ୍ଟରେ ବିଭିନ୍ନ ସ୍ତରରେ କର୍ମଚାରୀମାନଙ୍କୁ ନିୟୋଜିତ କରାଯାଇଥିବା ଦିଲ୍ଲୀ ସରକାରଙ୍କ ଓକିଲ କହିଥିଲେ। ୨୩ଟି ଚେକ୍ପୋଷ୍ଟ ପାଇଁ ସ୍ବତନ୍ତ୍ର ନିର୍ଦ୍ଦେଶ ଦିଆଯାଇଥିବାବେଳେ ଅନ୍ୟଗୁଡ଼ିକ ପାଇଁ କାହିଁକି ଦିଆଯାଇ ନାହିଁ ବୋଲି ଖଣ୍ଡପୀଠ ସିଏକ୍ୟୁଏମ୍ ଏବଂ କେନ୍ଦ୍ର ସରକାରଙ୍କୁ ଜବାବ ମାଗିଥିଲେ।
ବଡ ଭାଇର ଫାଉଡା ଚୋଟରେ ସାନଭାଇର ମୃତ୍ୟୁ
କଟକ : ଭାଇକୁ ହତ୍ୟା କଲା ଭାଇ। ବଡ ଭାଇର ଫାଉଡା ଚୋଟରେ ସାନଭାଇର ମୃତ୍ୟୁ । କଟକ ଜିଲ୍ଲା ଗୁରୁଡିଝାଟିଆ ଥାନା ଖିରିଖିଆ ଗାଁରେ ଘଟିଛି ଏଭଳି ଅଭାବନୀୟ ଘଟଣା । ମୃତକ ହେଲେ ସାନଭାଇ ବର୍ଜୁ ବଦରା । ପାରିବାରିକ କଳହରୁ ଘର ଆଗରେ ପିଟିପିଟି ଅତି ନିର୍ମମ ଭାବେ ହତ୍ୟା କରିଛି ବଡ଼ ଭାଇ ବେହେରା ବଦରା। ଖବରପାଇ ଘଟଣାସ୍ଥଳରେ ଗୁରୁଡିଝାଟିଆ ପୋଲିସ ପହଞ୍ଚି ବଡଭାଇକୁ ଥାନାରେ ଅଟକ ରଖି ପଚରାଉଚରା କରିବା ସହ ଘଟଣାର ତଦନ୍ତ ଚଳାଇଛି।
ଶ୍ବଶୁର ଘର ସାମ୍ନାରେ ଯୌତୁକ ସାମଗ୍ରୀ ଜାଳିଲା ଜ୍ବାଇଁ
ନୟାଗଡ଼ : ଶ୍ବଶୁର ଘର ସାମ୍ନାରେ ଯୌତୁକ ସାମଗ୍ରୀ ଜାଳିଲା ଜ୍ବାଇଁ । ଦଶପଲ୍ଲା ଥାନା ନେଳିଗୁଡ଼ା ଗାଁରେ ଘଟିଛି ଏଭଳି ଅଭାବନୀୟ ଘଟଣା । ଗାଁର ମମତା ନାଏକ ୧୫ବର୍ଷ ତଳେ ବୁରୁସାହି ଗାଁର ବିଜୟ ନାୟକଙ୍କୁ ରୀତିନୀତି ଅନୁଯାୟୀ ବିବାହ କରିଥିଲେ ।କିନ୍ତୁ ଶ୍ବଶୁର ଘର ଲୋକେ ବିବାହ ସମୟ ରେ ଜ୍ୱାଇଁକୁ ବାଇକ ଦେବା ପାଇଁ କହିଥିଲେ। କିନ୍ତୁ ଅସୁବିଧା ହେତୁ ଗାଡି ନ ଦେବାରୁ ଗତକିଛି ଦିନ ହେବ ସ୍ବାମୀ , ସ୍ତ୍ରୀଙ୍କ ମଧ୍ୟରେ ବିବାଦ ଦେଖାଯାଉଥିଲା। ତେବେ ଏହି ଘଟଣାକୁ ନେଇ ମମତା ତାଙ୍କ ବାପଘର ନେଳିଗୁଡ଼ାକୁ ଚାଲିଯାଇଥିଲେ। ଆଜି ବିଜୟ ଫୋନ ଯୋଗେ ସ୍ତ୍ରୀ ଓ ଝିଅକୁ ଆସିବା ପାଇଁ କହିଥିଲେ। ଏଥିରେ ସ୍ତ୍ରୀ ରାଜି ନ ହେବାରୁ ଗାଳିଗୁଲଜ କରିବା ସହିତ ଯୌତୁକରେ ମିଳିଥିବା ସିନ୍ଦୁକ ସହିତ ସମସ୍ତ ଆସବାପତ୍ର ନେଇ ଶ୍ବଶୁର ଘର ସାମ୍ନାରେ ଏହାକୁ ଜାଳି ଦେଇଥିବା ଜଣାପଡ଼ିଛି ।ଖବର ପାଇ ଘଟଣା ସ୍ଥଳରେ ଦଶପଲ୍ଲା ପୋଲିସ ପହଂଚି ତଦନ୍ତ ଜାରି ରଖିଛି।
ଆଜି ଶେଷ ହେବ ମହାରାଷ୍ଟ୍ର ବିଧାନସଭା କାର୍ଯ୍ୟକାଳ,ଏ ପର୍ଯ୍ୟନ୍ତ ମୁଖ୍ୟମନ୍ତ୍ରୀ ନେଇ ଛିଡୁନି ଅଙ୍କ
ପୁଣେ : ଆଜି ଶେଷ ହେଉଛି ମହାରାଷ୍ଟ୍ର ବିଧାନସଭା ଅଧିବେଶନ କାର୍ଯ୍ୟକାଳ। ହେଲେ ଏ ପର୍ଯ୍ୟନ୍ତ ମୁଖ୍ୟମନ୍ତ୍ରୀ ନେଇ ଛିଡୁନି ଅଙ୍କ। ବିଜେପିର ଦେବେନ୍ଦ୍ର ଫଡନବିସ ହେବେ ନା ଶିବସେନାର ଏକନାଥ ସିନ୍ଦେ ମୁଖ୍ୟମନ୍ତ୍ରୀ ହେବେ, ଏ ଯାଏଁ ଘୋଷଣା ହୋଇପାରିନି। ତେବେ ବିଧାନସଭା ଅଧିବେଶନ କାର୍ଯ୍ୟକାଳ ଶେଷ ପୂର୍ବରୁ ସରକାର ଗଠନ ହେବା ନିୟମ ରହିଛି।
ଯଦି ଆଜି ସୁଦ୍ଧା ସରକାର ଗଠନ ନହୁଏ ତେବେ ମହାରାଷ୍ଟ୍ରରେ ରାଷ୍ଟ୍ରପତି ଶାସନ ଲଗାଇବାକୁ ପଡିବ। ଏଭଳି ସ୍ଥିତିରେ ବିଜେପି ଏବଂ ମହାୟୁତି ମେଣ୍ଟରୁ ମୁଖ୍ୟମନ୍ତ୍ରୀ କିଏ ହେବ ନାଁ ଘୋଷଣା କରିବାକୁ ପଡିବ। ବିଜେପିର ଏକାକୀ ୧୩୨ ଆସନ ହାତେଇଥିବାବେଳେ ମହାୟୁତି ମେଣ୍ଟ ୨୩୦ ଆସନ ଜିତିଛି। ସେଥିରେ ଏକନାଥ ସିନ୍ଦେଙ୍କ ଶିବସେନାର ୫୭ ଆସନ ରହିଛି। ଏନସିପିର ଅଜିତ ପାୱାର ୪୧ ଆସନ ଜିତିଛନ୍ତି। ବିଜେପି ଅଧିକ ଆସନ ଜିତିଥିବାରୁ ମୁଖ୍ୟମନ୍ତ୍ରୀ ରେସରେ ସବୁଠାରୁ ଆଗରେ ରହିଛନ୍ତି।
ତେବେ ଦିଲ୍ଲୀ ହାଇକମାଣ୍ଡ ଅନ୍ତିମ ନିଷ୍ପତ୍ତି ନେବ। ବିହାର ମଡେଲରେ ଗଠନ ହୋଇପାରେ ମହାରାଷ୍ଟ୍ରରେ ସରକାର। ମୁଖ୍ୟମନ୍ତ୍ରୀଙ୍କ ସହ ରହିପାରନ୍ତି ଦୁଇ ଜଣ ମୁଖ୍ୟମନ୍ତ୍ରୀ। ଦେବେନ୍ଦ୍ର ଫଡନବିସ ମୁଖ୍ୟମନ୍ତ୍ରୀ ହେଲେ ଏକନାଥ ସିନ୍ଦେ ଓ ଏନସିପିର ଅଜିତ ପାୱାର ଉପମୁଖ୍ୟମନ୍ତ୍ରୀ ହୋଇପାରନ୍ତି। ଗତ ନିର୍ବାଚନ ତୁଳନାରେ ଏମଭିଏ ୨୫ ଆସନ ହରାଇଛି। ୨୮୮ ଆସନ ଲାଗି ମ୍ଯାଜିକ ନମ୍ବର ହେଉଛି ୧୪୫। ବିଜେପି ଏକାକୀ ୧୩୨ ଆସନ ପାଇଥିବାରୁ ମେଣ୍ଟ ସହଯୋଗୀଙ୍କ ଗୁରୁତ୍ବ ବି ହ୍ରାସ ପାଇଛି ।