ମୟୂରଭଞ୍ଜ: ମୂର୍ତ୍ତି ଭସାଣ ବେଳେ ଦୁଇ ଗୋଷ୍ଠୀ ମୁଁହାମୁହିଁ। ଛୁରା ମାଡ଼ରେ ଉଭୟ ପକ୍ଷର ୩ ଜଣ ଆହତ। ବାରିପଦାରେ ଗଣେଶ ପୂଜା ଭସାଣବେଳେ ଦୁଇ ଗୋଷ୍ଠୀ ମୁଁହାମୁଁହି ହୋଇଥିଲେ। ଆହତ ଦୁଇ ଜଣ ହେଲେ ପିଆରଏମ ହସ୍ପିଟାଲର ସିକ୍ୟୁରୀଟି ଗାର୍ଡ ଚୈତନ୍ୟ ମୁଖୀ ଓ ଅଜୁ ମୁଖୀ। ବୁଧବାର ରାତି ପ୍ରାୟ ୧୦ସମୟରେ ଶୁନଗଡ଼ିଆ ଅଞ୍ଚଳରେ ଗଣେଶ ପୂଜା ମୂର୍ତ୍ତି ଭସାଣି ବେଳେ ରାସ୍ତା ଜାମ ହେବାକୁ ନେଇ ଦୁଇ ଗୋଷ୍ଠୀ ମଧ୍ୟରେ ମୁଁହାମୁହିଁ ହୋଇଥିଲେ। ଯାହାକୁ ନେଇ ଶୁନଗଡ଼ିଆ ଅଞ୍ଚଳର ଆକାଶ ମୁଖୀ ଓ କୁନ୍ଦନ ମୁଖୀ ତାଙ୍କ ସାଙ୍ଗମାନଙ୍କ ସହିତ ଦୁଇ ଜଣଙ୍କୁ ଛୁରା ମାଡ଼ କରିଥିଲେ। ଏହାକୁ ନେଇ ଅନ୍ୟ ଗୋଷ୍ଠୀ ମଧ୍ୟ ପ୍ରତି ଆକ୍ରମଣ କରିଥିଲେ। ଯାହା ଫଳରେ ସମୁଦାୟ ୩ଜଣ ଆହତ ହୋଇଛନ୍ତି। ଏନେଇ ବାରିପଦା ଟାଉନ ଥାନାରେ ଅଭିଯୋଗ ପରେ ଆହତଙ୍କୁ ଚିକିତ୍ସା ଲାଗି ପିଆରଏମ ହସ୍ପିଟାଲରେ ଭର୍ତ୍ତି କରାଯାଇଛି ।
ଟ୍ରକକୁ ଧକ୍କା ଦେଲା ପିକଅପ୍ ଭ୍ଯାନ, ୨ ମୃତ
ଗଞ୍ଜାମ: ଗଞ୍ଜାମ ପିତଳ ଅଞ୍ଚଳରେ ଦୁର୍ଘଟଣା। ଟ୍ରକକୁ ଧକ୍କା ଦେଲା ପିକଅପ୍ ଭ୍ଯାନ। ଏଥିରେ ୨ ଜଣଙ୍କ ମୃତ୍ଯୁ ହୋଇଥିବା ଜଣାପଡିଛି। ଏକ ପନିପରିବା ବୋଝେଇ ପିକଅପ୍ ଭ୍ଯାନ ବ୍ରହ୍ମପୁର ଯାଉଥିବାବେଳେ ଟ୍ରକକୁ ପଛପଟୁ ଧକ୍କା ଦେଇଥିଲା। ଭ୍ଯାନରେ ବସିଥିବା ୨ ଜଣଙ୍କ ମୃତ୍ଯୁ ହୋଇଥିବା ଜଣାପଡିଛି। ଗତ ମଧ୍ୟ ରାତ୍ରିରେ ହିଞ୍ଜିଳି ଥାନା ପିତଳ ଛକ ନିକଟରେ ଘଟିଛି ଏ ଦୁର୍ଘଟଣା।
ଆଜି ମହାକାଶରେ ଜନ୍ମଦିନ ପାଳିବେ ସୁନୀତା ଓ୍ବିଲିୟମ୍ସ
ନନ୍ଦିଘୋଷ ବ୍ୟୁରୋ: ଆଜି ମହାକାଶରେ ଜନ୍ମଦିନ ପାଳିବେ ସୁନୀତା ଓ୍ବିଲିୟମ୍ସ। ଆଜି ତାଙ୍କର ଜନ୍ମଦିନ ହୋଇଥିବାବେଳେ ସେ ଏବେ ଇଣ୍ଟରନ୍ୟାସନାଲ ସ୍ପେସ୍ ଷ୍ଟେସନରେ ରହିଛନ୍ତି । ମହାକାଶରେ ଏହା ହେବ ତାଙ୍କର ଦ୍ଵିତୀୟ ଜନ୍ମଦିନ । ବେରି ଓ୍ବିଲମୋରଙ୍କ ସହ ଆଇଏସଏସକୁ ଯାତ୍ରା କରିଥିବା ସୁନୀତା ବୋଇଂ ଷ୍ଟାରଲାଇନର ସ୍ପେସକ୍ରାଫ୍ଟରେ ଯାନ୍ତ୍ରିକ ତ୍ରୁଟି ଯୋଗୁଁ ଫସି ରହିଛନ୍ତି । ବର୍ତ୍ତମାନ ସୁଦ୍ଧା ସୁନୀତା ମହାକାଶରେ ମୋଟ ୩ ଶହରୁ ଅଧିକ ଦିନ ବିତାଇ ସାରିଲେଣି। ଆସନ୍ତା ଫେବୃଆରୀ ମାସରେ କ୍ରୁ-9 ମିଶନ ଜରିଆରେ ସେମାନଙ୍କୁ ସ୍ପେସ ଏକ୍ସର ସ୍ସେସ ସିପ ସାହାଯ୍ୟରେ ପୃଥିବୀକୁ ଅଣାଯିବା ନେଇ ଘୋଷଣା କରିଛି ନାସା । ଏଥିପାଇଁ ନାସାର ଦୁଇ ମହାକାଶଚାରୀ ପ୍ରସ୍ତୁତି ଆରମ୍ଭ କରିଛନ୍ତି।
ସୂଚନା ମୁତାବକ, ସେପ୍ଟେମ୍ବର ୨୬ରେ ସ୍ପେସ-ଏକ୍ସ ସହାୟତାରେ କ୍ରୁ -9 ମିଶନ ଆରମ୍ଭ ହେବ । ନାସାର ଦୁଇ ଜଣ ମହାକାଶଚାରୀଙ୍କୁ ଫାଲକନ-9 ରକେଟ ସାହାଯ୍ୟରେ ଅନ୍ତରୀକ୍ଷ ମହାକାଶ ଷ୍ଟେସନକୁ ପଠାଯିବ । ଉଡ଼ାଣର ପ୍ରାୟ ୬ ଘଣ୍ଟା ପରେ ଉଭୟ ମହାକାଶଚାରୀ ଅନ୍ତର୍ଜାତୀୟ ସ୍ପେସ ଷ୍ଟେସନରେ ପହଞ୍ଚିବେ। ଆସନ୍ତା ଫେବୃଆରୀ ମାସରେ କ୍ରୁ-9 ମିଶନ ଅଧୀନରେ ଡ୍ରାଗନ ଅନ୍ତରୀକ୍ଷ ଯାନ ଜରିଆରେ ମହାକାଶଚାରୀ ପୃଥିବୀକୁ ଫେରିବେ ବୋଲି ଯୋଜନା ରହିଛି।
ଆଜିଠୁ ଭାରତ-ବାଂଲାଦେଶ ଟେଷ୍ଟ ସିରିଜ
ନୂଆଦିଲ୍ଲୀ: ଆଜିଠୁ ଭାରତ-ବାଂଲାଦେଶ ଟେଷ୍ଟ ସିରିଜ। ବାଂଲାଦେଶ ସହିତ ଦୁଇଟି ଟେଷ୍ଟ ଓ ୩ଟି ଟି-ଟ୍ବେଣ୍ଟି ସିରିଜ ଖେଳିବ ଟିମ୍ ଇଣ୍ଡିଆ। ଆଜି ସକାଳ ସାଢେ ୯ଟାରୁ ଚେନ୍ନାଇର ଏମଏ ଚିଦାମ୍ବରମ ଷ୍ଟାଡିୟମରେ ପ୍ରଥମ ଟେଷ୍ଟ ଆରମ୍ଭ ହେବ। ଦୀର୍ଘ ୭ ମାସ ପରେ ପୁଣି ଟେଷ୍ଟ ସିରିଜ୍ ଖେଳିବ ଟିମ୍ ଇଣ୍ଡିଆ। କ୍ଯାପଟେନ ରୋହିତ ଶର୍ମାଙ୍କ ଅଧିନାୟକତ୍ବରେ ଭାରତ ପଡ଼ିଆକୁ ଓହ୍ଲାଇବ ଭାରତ। ଟିମରେ ଯଶସ୍ୱୀ ଜୈସୱାଲ, ଶୁଭମନ ଗିଲ, ବିରାଟ କୋହଲି, କେ.ଏଲ୍ ରାହୁଲ, ଋଷଭ ପନ୍ତ ରବୀନ୍ଦ୍ର ଜାଡେଜା, ରବିଚନ୍ଦ୍ରନ୍ ଅଶ୍ୱିନ୍, କୁଲଦୀପ ଯାଦବ, ମହମ୍ମଦ ସିରାଜ ଓ ଜସପ୍ରୀତ ବୁମ୍ରା ସ୍ଥାନ ପାଇଛନ୍ତି । ବିଶ୍ୱ ଟେଷ୍ଟ ଚାମ୍ପିଅନସିପ ପଏଣ୍ଟ ଟେବୁଲରେ ଏବେ ଏକ ନମ୍ବର ସ୍ଥାନରେ ରହିଛି ଭାରତ। ଏହି ସିରିଜର ଫଳାଫଳ ବିଶ୍ୱ ଟେଷ୍ଟ ଚାମ୍ପିଅନସିପର ପଏଣ୍ଟ ଟେବୁଲକୁ ପ୍ରଭାବିତ କରିବ । ଯଦି ଭାରତ ବାଂଲାଦେଶ ବିପକ୍ଷରେ କ୍ଲିନ ସୁଇପ କରିବ ତେବେ ବିଶ୍ୱ ଟେଷ୍ଟ ଚାମ୍ପିଅନସିପ ଫାଇନାଲ ପାଇଁ ଆଉ ଗୋଟିଏ ପାଦ ଆଗକୁ ବଢିବ । ଗୋଟିଏ ବି ମ୍ୟାଚ ହାରିଲେ ଏକ ନମ୍ବର ସ୍ଥାନରୁ ଖସିଆସିବ ଭାରତ ।
ବାଂଲାଦେଶ ନିକଟରେ ପାକିସ୍ତାନ ଗସ୍ତରେ ୨-୦ରେ ଐତିହାସିକ ଟେଷ୍ଟ ସିରିଜ୍ ବିଜୟ ହାସଲ କରିଥିଲା । ସେ ଦୃଷ୍ଟିରୁ ବାଂଲାଦେଶର ଦୃଢ ମନୋବଳ ରହିଛି । ଟିମ ଇଣ୍ଡିଆ ହେଡ୍ କୋଚ୍ ଭାବେ ଗୌତମ ଗମ୍ଭୀରଙ୍କ ବାଂଲାଦେଶ ସିରିଜ୍ ହେବ ପ୍ରଥମ ଟେଷ୍ଟ ସିରିଜ୍ । ତେବେ ଭାରତ ଗତ ୧୨ ବର୍ଷରେ ଘରୋଇ ମାଟିରେ ଟେଷ୍ଟ ସିରିଜ୍ ହାରିନାହିଁ।
ରାସ୍ତା ପାର ହେବା ବେଳେ ପ୍ରଖର ସ୍ରୋତରେ ଭାସି ଗଲେ ୫
ଜଳେଶ୍ବର: ବାଲେଶ୍ବର ଜିଲ୍ଲାରେ ବନ୍ୟା ସ୍ଥିତି ଜଟିଳ । ସୁବର୍ଣ୍ଣରେଖାରେ ବନ୍ୟା ପାଣି ଆସି ଗାଁ ଗଣ୍ଡାରେ ପଶିଛି । ରାସ୍ତା ପାଣିରେ ବୁଡିଛି । କେଉଁଠି ବିଲ କେଉଁଠି ରାସ୍ତା କିଛି ଜଣାପଡୁନାହିଁ । ଏମିତି ସ୍ଥିତିରେ ରାସ୍ତା ପାର ହେଉଥିବା ବେଳେ ପ୍ରଖର ସ୍ରୋତରେ ଭାସି ଯାଇଥିଲେ ୫ ଜଣ ସେମାନଙ୍କୁ ଅଗ୍ନିଶମ କର୍ମଚାରୀମାନେ ଉଦ୍ଧାର କରିଛନ୍ତି । ସେମାନଙ୍କ ମଧ୍ୟରୁ ଜଣଙ୍କ ସ୍ବାସ୍ଥ୍ୟାବାସ୍ଥା ଗୁରୁତର ରହିଛି । ତାଙ୍କୁ ବାଲିଆପାଳ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଛି ।
ସୁବର୍ଣ୍ଣରେଖା ନଦୀରେ ବନ୍ୟା ଆସି ବାଲିଆପାଳ ବ୍ଲକର ୭ଟି ପଞ୍ଚାୟତ ୫୦ରୁ ଅଧିକ ଗାଁ ପାଣି ଘେରରେ ରହିଛି । ଅନେକ ମୁଖ୍ୟ ରାସ୍ତାରେ ୩ରୁ ୪ ଫୁଟ ଉପରେ ପ୍ରବାହିତ ହେଉଛି ବନ୍ୟା ପାଣି । କୁହ୍ଲାଚଡ ଗ୍ରାମରୁ ୨ ଜଣ ପୁରୁଷ ୩ ଜଣ ମହିଳା ରାଶନ ସାମଗ୍ରୀ ପାଇଁ ବାଲିଆପାଳ ଆସୁଥିଲେ । ଏହି ସମୟରେ କୁହ୍ଲାଚଡ ଜାମକୁଣ୍ଡା ରାସ୍ତାରେ ପ୍ରବାହିତ ହେଉଥିବା ପ୍ରଖର ସ୍ରୋତରେ ଭାସି ଯାଇଥିଲେ । ଘଟଣା ସ୍ଥଳରେ ଅଗ୍ନିଶମ ବାହିନୀ ପହଞ୍ଚି ସମସ୍ତଙ୍କୁ ଉଦ୍ଧାର କରିଛି ।
ପୂର୍ବର ନବୀନ ସରକାରଙ୍କୁ କେନ୍ଦ୍ର ସରକାରଙ୍କ ପ୍ରଶଂସା
ଭୁବନେଶ୍ବର: ପୁଣି ଦେଶରେ ଚମକିଲା ପୂର୍ବର ନବୀନ ସରକାର । ଅର୍ଥନୈତିକ ବିକାଶରେ ନବୀନ ଓଡ଼ିଶା ସାରା ଦେଶରେ ଉଦାହରଣ । ଏନେଇ ସାର୍ଟିଫିକେଟ ଦେଇଛି ଖୋଦ୍ କେନ୍ଦ୍ର । ଦେଶର ଜିଡିପିରେ ଓଡ଼ିଶାର ଯୋଗଦାନ ଉଲ୍ଲେଖନୀୟ ଭାବେ ବୃଦ୍ଧି ଘଟିଛି । ପିଏମ ୱାର୍କିଂ ପେପରରେ ଓଡ଼ିଶାର ଅର୍ଥନୈତିକ ବିକାଶକୁ ପ୍ରଶଂସା କରାଯାଇଛି ।
ଗତ ଦୁଇ ଦଶନ୍ଧିରେ ଓଡ଼ିଶାର ଅର୍ଥନୀତିରେ ଆଖିଦୃଶିଆ ବିକାଶ ଘଟିଛି । ଇଏସି-ପିଏମ ରିପୋର୍ଟ ଅନୁସାରେ ୨୦୦୦-୦୧ ଆର୍ଥିକ ବର୍ଷରେ ଓଡ଼ିଶାର ମୁଣ୍ଡପିଛା ଆୟ ୫୫.୮ ପ୍ରତିଶତ ରହିଥିବାବେଳେ ୨୦୨୩-୨୪ରେ ଏହା ୮୮.୫ ପ୍ରତିଶତକୁ ବୃଦ୍ଧି ପାଇଛି । ସେହିପରି ୨୦୦୦-୦୧ରେ ଦେଶର ଜିଡିପିରେ ଓଡ଼ିଶାର ଯୋଗଦାନ ରହିଥିଲା ମାତ୍ର ୨.୩ ପ୍ରତିଶତ । ଯାହାକି ୨୦୨୩-୨୪ରେ ୨.୮ ପ୍ରତିଶତକୁ ବୃଦ୍ଧି ପାଇଛି । ଏନେଇ ସୋସିଆଲ ମିଡିଆ ଏକ୍ସରେ ସୂଚନା ଦେଇ ଖୁସି ପ୍ରକାଶ କରିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ । ବିଜେଡି ସରକାରର ଦକ୍ଷ ଅର୍ଥନୈତିକ ପରିଚାଳନା ଓ ସାମଗ୍ରିକ ବିକାଶ ନୀତି ଏହି ସଫଳତା ଆଣି ଦେଇଛି ।
ପୁଣି ଥରିଲା ଲେବାନନ, ଓ୍ବାକିଟକି ବିସ୍ଫୋରଣରେ ତିନି ମୃତ
ନୂଆଦିଲ୍ଲୀ: ବିସ୍ଫୋରଣରେ ପୁଣି ଥରିଲା ଲେବାନନ । ଆଜି ୱାକିଟକିରେ ହୋଇଛି ବିସ୍ଫୋରଣ । ଆଇକମ ଡିଭାଇସରେ ବିସ୍ଫୋରଣ ହୋଇ ୩ ଜଣଙ୍କ ମୃତ୍ଯୁ ହୋଇଥିବାବେଳେ ଶତାଧିକ ଆହତ ହୋଇଥିବା ଜଣାପଡ଼ିଛି । ଲେବାନନରେ ସକ୍ରିୟ ଆତଙ୍କୀ ସଂଗଠନ ହେଜବୁଲ୍ଲାକୁ ଟାର୍ଗେଟ କରି ପକେଟ୍ ବୋମା ଦ୍ଵାରା ବିସ୍ଫୋରଣ କରାଯାଇଛି । ଗୋଟି ଗୋଟି କରି ଏକାଧିକ ୱାକିଟକି ବ୍ଲାଷ୍ଟ ହୋଇଥିଲା ।
ଗତକାଲି ଲେବାନନରେ ପେଜର ବିସ୍ଫୋରଣ ଘଟିଥିଲା । ଏଥିରେ ୧୨ ଜଣଙ୍କ ମୃତ୍ଯୁ ଘଟିଥିବା ବେଳେ ୩ ହଜାରରୁ ଅଧିକ ଆହତ ହୋଇଥିଲେ। ଏକାଥରକେ ଗୋଟିଏ ସମୟରେ ଏହି ସବୁ ପେଜରରେ ବିସ୍ଫୋରଣ ଘଟିଥିଲା । ଗତକାଲିର ବିସ୍ଫୋରଣରେ ୨ ଶହରୁ ଅଧିକ ଲୋକ ଗୁରୁତର ହୋଇ ମେଡିକାଲରେ ଭର୍ତ୍ତି ହୋଇଛନ୍ତି ।
ବିସ୍ଫୋରଣକୁ ନେଇ ଇସ୍ରାଏଲକୁ ଟାର୍ଗେଟ କରିଛି ଲେବାନନରେ ସକ୍ରିୟ ଆତଙ୍କୀ ସଂଗଠନ ହେଜବୁଲ୍ଲା । ପେଜର ଏବଂ ୱାକିଟକିରୁ ହ୍ଯାକ୍ କରି ଏହି ବିସ୍ଫୋରଣ କରାଯାଇଥିବା ସନ୍ଦେହ କରାଯାଉଛି । ହ୍ଯାକ୍ କରି ପେଜର ଓ ୱାକିଟକିରେ ଥିବା ଲିଥିୟମ ବ୍ଯାଟେରୀଙ୍କୁ ଏତେ ମାତ୍ରାରେ ଗରମ କରାଯାଉଛି ଯେ ଏହି ବ୍ଯାଟେରୀରେ ବିସ୍ଫୋରଣ ଘଟୁଛି ।
ସରକାରୀ କର୍ମଚାରୀଙ୍କୁ ଦୁର୍ବ୍ୟବହାର, ବିଜେପି ନେତାଙ୍କୁ ଛି ଛି…
ଜୟପୁର: ବିଜେପି ନେତାଙ୍କୁ ମହଙ୍ଗା ପଡିଛି ସରକାରୀ କର୍ମଚାରୀଙ୍କୁ ଦୁର୍ବ୍ୟବହାର । ସୁଭଦ୍ରା ଯୋଜନା ଶୁଭାରମ୍ଭ ବେଳେ ଜୟପୁର ବିଜେପି ନେତା ଗୌତମ ସାମନ୍ତରାଏଙ୍କ ଅଶୋଭନୀୟ ଆଚରଣ ତାଙ୍କ ପାଇଁ ଅଡୁଆ ବଢ଼ାଇଛି । ଗତକାଲି ଗୌତମଙ୍କ ବିରୋଧରେ ଥାନରେ ଏତଲା ଦେଇଥିଲେ ଜୟପୁର ବିଡିଓ । ସେପଟେ ଘଟଣାକୁ ନେଇ ସବୁ ସ୍ତରରେ ଦୃଢ ନିନ୍ଦା କରାଯିବା ସହ ପ୍ରତିବାଦର ସ୍ବର ଉଠିଛି ।
ଆଜି ବିଜେପି ନେତାଙ୍କ ଦାଦାଗିରି ବିରୋଧରେ ଜୟପୁର ବ୍ଲକର ସମସ୍ତ ଜନ ପ୍ରତିନିଧି ଧାରଣା ଦେଇଛନ୍ତି । ବ୍ଲକର ସମସ୍ତ ସରପଞ୍ଚ ଓ ସମିତି ସଭ୍ୟ ସମେତ ଜିଲ୍ଲା ପରିଷଦ ସଭ୍ୟ ଏହାକୁ ଦୃଢ଼ ନିନ୍ଦା କରିଛନ୍ତି । ଏପରିକି ସରକାରୀ ଅଧିକାରୀଙ୍କୁ ଅଶୋଭନୀୟ ଆଚରଣ ସହିତ ଦାଦାଗିରି ଦେଖାଇଥିବା ବିଜେପି ନେତାଙ୍କୁ ଗିରଫ କରିବାକୁ ଦାବି କରିଛନ୍ତି ।
ଜୟପୁର ବିଡିଓ ଶକ୍ତି ମହାପାତ୍ର ଜଣେ ଯୁବ ଅଫିସର । ସେ ବ୍ଲକ ପାଇଁ ବହୁତ ଭଲ କାମ କରୁଥିବା ବେଳେ ବିଜେପି ନେତାଙ୍କ ଏପରି ଆଚରଣକୁ ବରଦାସ୍ତ କରାଯିବ ନାହିଁ ବୋଲି କହିଛନ୍ତି ବ୍ଲକ ଉପାଧ୍ୟକ୍ଷ । କିଛି ଗୁଣ୍ଡା ଶ୍ରେଣୀର ବିଜେପି ନେତା ନିଜକୁ ଦେଖାଇ ହେବା ପାଇଁ ଏପରି ଅଶୋଭନୀୟ ଆଚରଣ ପ୍ରଦର୍ଶନ କରୁଥିବା କହିଛନ୍ତି ବିଧାୟକ ତାରା ପ୍ରସାଦ ବାହିନିପତି । ଜଣେ ସରକାରୀ ଅଧିକାରୀଙ୍କୁ ଏଭଳି ଦୁର୍ବ୍ୟବହାର ବିରୋଧରେ ବିଜେପିର ରାଜ୍ଯ ନେତୃତ୍ବକୁ ଜଣାଇବେ ବାଲି କହିଛନ୍ତି ତାରା । ସେପଟେ ବିଡିଓଙ୍କୁ ଚିହ୍ନି ନାହାନ୍ତି କି କାହାକୁ କିଛି ଆକ୍ଷେପ କରିନାହାନ୍ତି ବୋଲି କହିଛନ୍ତି ଗୌତମ ସାମନ୍ତରାଏ ।
ସରିଲା ରତ୍ନଭଣ୍ଡାରର ପ୍ରାରମ୍ଭିକ ଯାଞ୍ଚ
ପୁରୀ: ଶ୍ରୀମନ୍ଦିରର ରତ୍ନଭଣ୍ଡାରର ଆଜି ହୋଇଛି ପ୍ରାରମ୍ଭିକ ଯାଞ୍ଚ । ଭାରତୀୟ ପ୍ରତ୍ନତାତ୍ତ୍ୱିକ ସର୍ବେକ୍ଷଣ ସଂସ୍ଥା ଏଏସଆଇ ନେତୃତ୍ୱରେ କରାଯାଇଛି ଯାଞ୍ଚ । ରତ୍ନଭଣ୍ଡାର ଭିତରେ ଆଉ ସୁଡଙ୍ଗ ଅଛି କି ନାହିଁ ? ଆଉ କିଛି ରତ୍ନ ଅଳଙ୍କାର ଭଣ୍ଡାରରେ ରହିଛି କି ? ଏସବୁକୁ ନେଇ ଚତୁର୍ଥ ପର୍ଯ୍ୟାୟରେ ଭିତର ରତ୍ନଭଣ୍ଡାରର ପ୍ରାରମ୍ଭିକ ନୀରିକ୍ଷଣ ଓ ବୈଷୟିକ ଯାଞ୍ଚ ଆରମ୍ଭ କରିଛି ଏଏସଆଇ ।
ଯାଞ୍ଚ ପୂର୍ବରୁ ଶ୍ରୀମନ୍ଦିର ପ୍ରଶାସନ କାର୍ଯ୍ୟାଳୟରେ ତଦାରଖ କମିଟି ଅଧକ୍ଷ ଜଷ୍ଟିସ ବିଶ୍ୱନାଥ ରଥଙ୍କ ଅଧକ୍ଷତାରେ ଗୁରୁତ୍ୱପୂର୍ଣ୍ଣ ବୈଠକ ବସିଥିଲା । ବୈଠକ ପରେ ଠିକ୍ ଅପରାହ୍ନ ଗୋଟାଏରେ ଏଏସଆଇର ଅତରିକ୍ତ ମହାନିର୍ଦ୍ଦେଶକ ଜାନଭିଜ୍ ଶର୍ମାଙ୍କ ନେତୃତ୍ୱରେ ୧୨ ଜଣିଆ କମିଟି ଓ ଶ୍ରୀମନ୍ଦିର ପ୍ରଶାସନର ୧୪ ଜଣଙ୍କୁ ମିଶାଇ ମୋଟ ୨୬ ଜଣିଆ ସଦସ୍ୟ ଶ୍ରୀମନ୍ଦିରକୁ ପ୍ରବେଶ କରିଥିଲେ । ପରେ ବାହାର ଓ ଭିତର ରତ୍ନଭଣ୍ଡାରର ଚାବି ଖୋଲାଯାଇ ଆରମ୍ଭ ହୋଇଥିଲା ବୈଷୟିକ ଯାଞ୍ଚ । ତା’ ପୂର୍ବରୁ ଓଡ୍ରାଫ, ଅଗ୍ନି ନିର୍ବାନକ ଯନ୍ତ୍ର ଓ ସ୍ନେକ୍ ହେଲପ୍ ଲାଇନର ସଦସ୍ୟ ଭିତରକୁ ଯାଇଥିଲେ । ଆଜି ଜିପିଆର ସର୍ଭେ ହୋଇନାହିଁ । ଭିତର ରତ୍ନଭଣ୍ଡାରର ଭରଟିକାଲ୍ ଓ ହରାଇଜୋଣ୍ଟାଲ ଯାଞ୍ଚ ପରେ କେଉଁ ଧରଣର ଓ କେତେ ଓଜନ ବିଶିଷ୍ଟ ମେସିନ୍ ବ୍ୟବହାର କରାଯିବ ତାହା ନିଷ୍ପତ୍ତି ନିଆଯିବ ।
ଆଜି ଯାଞ୍ଚର ଡକୁମେଣ୍ଟଟେସନ ହୋଇଛି । ଏନଜିଆରଆଇ ଟିମ୍ ଶୀଘ୍ର ଜିପିଆର ସର୍ଭେ କରିବେ । ସମସ୍ତ ଯାଞ୍ଚର ଭିଡିଓଗ୍ରାଫି ହୋଇଥିବା କହିଛନ୍ତି ତଦାରଖ କମିଟି ଅଧକ୍ଷ ଜଷ୍ଟିସ ବିଶ୍ୱନାଥ ରଥ । ଜିପିଆରଏସ ସର୍ଭେ ମେସିନ୍ ଖୁବଶୀଘ୍ର ଆସିବ । ୨୫ ତାରିଖ ସୁଦ୍ଧା ସମ୍ପୂର୍ଣ୍ଣ ଯାଞ୍ଚ ପ୍ରକ୍ରିୟା ଶେଷ କରିବା ପାଇଁ ଅନୁରୋଧ କରିଛନ୍ତି ଜଷ୍ଟିସ ବିଶ୍ବାନାଥ । କେବଳ ଯାଞ୍ଚ ନୁହେଁ ଭିତର ରତ୍ନଭଣ୍ଡାରର ସ୍ଥିତି ଜାଣିବା ପାଇଁ ଷ୍ଟ୍ରକଚରାଲ୍ ଯାଞ୍ଚ ଆରମ୍ଭ ହୋଇଛି । ଭିତର ରତ୍ନଭଣ୍ଡାର ତଦାରଖ କମିଟିର ଅଧ୍ୟକ୍ଷ ଜଷ୍ଟିସ ବିଶ୍ୱନାଥ ରଥ, ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀ, ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ୱାଇଁ, ଏସପି ପିନାକ ମିଶ୍ର ମଧ୍ୟ ଯାଞ୍ଚ ବେଳେ ଉପସ୍ଥିତ ରହିଥିଲେ । ମହାପ୍ରଭୁଙ୍କ ସେବାପୂଜା, ରୀତିନୀତି ଓ ଧର୍ମୀୟ ବ୍ୟବସ୍ଥାକୁ ଦୃଷ୍ଟିରେ ରଖି ଏହି ଯାଞ୍ଚ କରାଯାଇଛି ।
ତେଲ ଦାମ ବୃଦ୍ଧିକୁ ନେଇ ବ୍ୟାପକ ହେବାରେ ଲାଗିଛି କେନ୍ଦ୍ର ବିରୋଧରେ ଅସନ୍ତୋଷ
ଭୁବନେଶ୍ବର: ବିଭିନ୍ନ ଅତ୍ୟାବଶ୍ୟକ ସାମଗ୍ରୀର ଦରବୃଦ୍ଧି ଲୋକଙ୍କୁ ଅତିଷ୍ଠ କରିଥିବା ବେଳେ ଏବେ ଖାଇବା ତେଲରେ ଆମଦାନୀ ଶୁଳ୍କ ବୃଦ୍ଧିକୁ ନେଇ ସରକାରଙ୍କ ବିରୋଧରେ ଅସନ୍ତୋଷ ବ୍ୟାପକ ହେବାରେ ଲାଗିଛି । ଯେଉଁମାନେ ସରକାରଙ୍କୁ ଆସନରେ ବସାଇଛନ୍ତି ସେମାନଙ୍କ ଆର୍ଥିକ ସୁରକ୍ଷା ସରକାରଙ୍କ ପ୍ରମୁଖ ଦାୟିତ୍ୱ । ତୁରନ୍ତ ଦରଦାମ ବୃଦ୍ଧି ନିୟନ୍ତ୍ରଣ ଦିଗରେ ସରକାର କାର୍ଯ୍ୟ କରିବାକୁ ଦୃଢ଼ ଦାବି ରଖିଛି ଓଡିଶା ବ୍ୟବସାୟୀ ସଂଘ । ଏପରିକି ରାଜ୍ୟ ସରକାର ଓଡିଶାବାସୀଙ୍କ ସ୍ୱାର୍ଥ ଦୃଷ୍ଟିରୁ କେନ୍ଦ୍ର ନିକଟରେ ଦରଦାମ ନିୟନ୍ତ୍ରଣ ପାଇଁ ଦାବି ରଖନ୍ତୁ ବୋଲି କୁହାଯାଇଛି । ସେପଟେ ସାଧାରଣ ଲୋକେ ଓ ସିଟିଜେନସ ଫୋରମ ମଧ୍ୟ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ଆଭିମୁଖ୍ୟକୁ ନେଇ ପ୍ରଶ୍ନ ଉଠାଇବା ସହ ଲୋକେ କେମିତି ବଞ୍ଚିବେ ତାକୁ ନେଇ ପ୍ରଶ୍ନ ଉଠାଇଛନ୍ତି ।
ଆଳୁ, ପନିପରିବା, ଡାଲି ଚାଉଳଠାରୁ ଆରମ୍ଭ କରି ଏବେ ଖାଇବା ତେଲ । ସମସ୍ତ ଅତ୍ୟାବଶ୍ୟକ ଖାଉଟି ସାମଗ୍ରୀ ଉପରେ ଲଗାତର ଦରବୃଦ୍ଧି ଯୋଗୁଁ ଲୋକେ ପ୍ରମାଦ ଗଣିବା ଆରମ୍ଭ କରିଛନ୍ତି । ସ୍ଥିତି ଏମିତି ହୋଇଛି, ଦରଦାମ ନିୟନ୍ତ୍ରଣ ପାଇଁ ଲୋକେ ଯାହାକୁ ଗୁହାରୀ କରୁଛନ୍ତି ସେହି ସରକାର ହିଁ ଶୁଳ୍କ ବଢ଼ାଇବା ବୋଝ ଉପରେ ନଳିତା ବିଡା ଭଳି ହୋଇଛି । ଯାହାକୁ ନେଇ ଅସନ୍ତୋଷ ତୀବ୍ର ହେବାରେ ଲାଗିଛି । ଏହାକୁ ନେଇ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ଉପରେ ବର୍ଷିଛି ଓଡିଶା ବ୍ୟବସାୟୀ ସଂଘ । ସରକାରଙ୍କ ନୀତିକୁ ନେଇ ପ୍ରଶ୍ନ ଉଠାଇଛି ସଂଘ । କୃଷି ଓ କୃଷକଙ୍କ ଉନ୍ନତିର ଦ୍ୱାହି ଦେଇ କେନ୍ଦ୍ର ସରକାର ଶୁଳ୍କ ବଢ଼ାଉଛନ୍ତି । ଏଭଳି ସ୍ଥିତିରେ ଅତ୍ୟାବଶ୍ୟକ ସାମଗ୍ରୀର ଦର ବଢିଲେ ସ୍ୱଳ୍ପ ରୋଜଗାରରେ ଲୋକଟିଏ କେମିତି ହୋମ ମ୍ୟାନେଜମେଣ୍ଟ କରିବ ବୋଲି ପ୍ରଶ୍ନ କରିଛି ବ୍ୟବସାୟୀ ସଂଘ । ସରକାରଙ୍କ କର୍ପୋରେଟ ପ୍ରୀତି ପାଇଁ ଲୋକଙ୍କ ସ୍ବାର୍ଥ ବଳି ପଡୁଛି । ତେଣୁ ସରକାର ଦର ନିୟନ୍ତ୍ରଣକୁ ନିଜ ହାତକୁ ନେଇ ଲୋକଙ୍କ ସ୍ୱାର୍ଥ ରକ୍ଷା କରିବାକୁ ଦାବି ରଖିଛି ସଂଘ ।ଦିଲ୍ଲୀରେ ହେବାକୁ ଥିବା ବ୍ୟବସାୟୀ ସଂଘର ଗଭର୍ଣ୍ଣିଂ କାଉନସିଲ ବୈଠକର ଜିରୋ ଆୱାରରେ ରାଜ୍ୟର ସ୍ୱାର୍ଥ ସମ୍ବଳିତ ଏସବୁ କଥା ଉଠିବ ବୋଲି କୁହାଯାଇଛି ।
ସେପଟେ ଦରଦାମ ବୃଦ୍ଧିକୁ ନେଇ ଲୋକେ ଲଗାତର ଅସନ୍ତୋଷ ଝାଡୁଥିଲେ ମଧ୍ୟ ଯେଉଁ ସରକାର ଏସବୁକୁ ଧ୍ୟାନ ଦେବା କଥା ସେମାନେ ହିଁ ପୁଣି ଦର ବଢାଉଥିବା କହିଛି ଓଡିଶା ସିଟିଜେନସ ଫୋରମ । ତେଣୁ ବର୍ତ୍ତମାନର ବିଜେପି ସରକାର ଉପରେ ଭରସା ତୁଟି ସାରିଥିବା ଫୋରମ ପକ୍ଷରୁ କୁହାଯାଇଛି । ଗୋଟିଏ ପଟେ ଲୋକଙ୍କ ରୋଜଗାର କମିଥିବା ବେଳେ ଏଭଳି ଗୋଟିଏ ପରେ ଗୋଟିଏ ବୋଝ ସାଧାରଣ ଲୋକେ କିଭଳି ସହିବେ ତାକୁ ନେଇ ପ୍ରଶ୍ନ ଉଠାଇବା ସହ ଏଭଳି ସ୍ଥିତି ଜାରି ରହିଲେ ଆଗାମୀ ଦିନରେ ଏକ ବଡ଼ ଜନ ଆନ୍ଦୋଳନ ପାଇଁ ଏହା ବାଟ ଖୋଲୁଥିବା କୁହାଯାଇଛି । ସାଧାରଣ ଲୋକେ ମଧ୍ୟ ସରକାରଙ୍କ ଏଭଳି ଆଭିମୁଖ୍ୟକୁ କଡା ସମାଲୋଚନା କରିଛନ୍ତି ।
ଆସନ୍ତା ୨୮ ଓ ୨୯ ତାରିଖରେ ଦିଲ୍ଲୀରେ ହେବାକୁ ଥିବା ବ୍ୟବସାୟୀଙ୍କ ଗଭର୍ଣ୍ଣିଂ କାଉନସିଲ ବୈଠକରେ ଏସବୁ ପ୍ରସଙ୍ଗରେ ସ୍ୱତନ୍ତ୍ର ଭାବେ ଜାତୀୟସ୍ତରରେ ଦୃଷ୍ଟି ଆକର୍ଷଣ କରିବାକୁ ଓଡିଶା ବ୍ୟବସାୟୀ ସଂଘ ନିଷ୍ପତ୍ତି ନେଇଛି । ବିଭିନ୍ନ ଅତ୍ୟାବଶ୍ୟକ ସାମଗ୍ରୀର ଦରବୃଦ୍ଧି କର୍ପୋରେଟ ହାଉସ କରୁଥିବା ବେଳେ ସରକାର ନିଦାବିଷ୍ଣୁ ସାଜିଥିବା ଅଭିଯୋଗ କରିଛି ସଂଘ । ଏପରିକି ଦରବୃଦ୍ଧିର କୌଣସି ଲାଭ ଚାଷୀ ପାଉ ନାହିଁ । ଏହା କର୍ପୋରେଟ ହାଉସ ଖାତାକୁ ଯାଉଛି ବୋଲି କୁହାଯାଇଛି ।