କଟକ: ଏସସିବିରେ ଲଜ୍ଜା। ଏସସିବିରେ ମହିଳା ରୋଗୀଙ୍କୁ ଡାକ୍ତରଙ୍କ ଅସଦାଚରଣ ଅଭିଯୋଗ । ଇସିଜି କରିବା ବାହାନାରେ ଦୁଷ୍କର୍ମ ଅଭିଯୋଗ । କାର୍ଡିଓଲୋଜି ବିଭାଗର ଜଣେ ଡାକ୍ତରଙ୍କ ନାଁରେ ଅଭିଯୋଗ ଆସିଛି । ଏ ନେଇ ପରିବାର ଲୋକ ମଙ୍ଗଳାବାଗ ଥାନାରେ ଅଭିଯୋଗ କରିଛନ୍ତି । ପୋଲିସ ମାମଲା ରୁଜୁ କରି ପୀଡିତାଙ୍କ ବୟାନ ରେକର୍ଡ କରି ତଦନ୍ତ ଜାରି ରଖିଛି ।
୧୬୧ ଧାରାରେ ବୟାନ ରେକର୍ଡ କରିଛି ପୋଲିସ । ଏହାପରେ ୧୬୪ ଧାରାରେ ପୀଡିତାଙ୍କ ବୟାନ ରେକର୍ଡ କରାଯିବ । ଡାକ୍ତରଙ୍କ ପରିବାର ଲୋକ ମଧ୍ୟ ପ୍ରତିଅଭିଯୋଗ କରିଥିବା ଜଣାପଡିଛି ।
ପୁରୀ: ଆଡପ ମଣ୍ଡପ ପହଣ୍ଡି ବେଳେ ବଡ଼ ଠାକୁର ପଡ଼ିଯିବା ଘଟଣାର ତଦନ୍ତ ଆରମ୍ଭ ହୋଇଛି। ବଳଭଦ୍ରଙ୍କ ବାଡଗ୍ରାହୀଙ୍କୁ ପଚରା ଉଚରା କରିଛି ୩ ଜଣିଆ ଟିମ୍। ଏହା ସହିତ ଖୁଣ୍ଟିଆ ସେବକ, ପ୍ରତିହାରୀ ସେବକ, ଜେଟିପି, ଶ୍ରୀମନ୍ଦିର ପ୍ରଶାସନ ର ଅଧିକାରୀ ସମେତ ବରିଷ୍ଠ ଦଇତାପତି ସେବକଙ୍କୁ ପଚରା ଉଚରା କରାଯାଇଥିବା ଜଣାପଡ଼ିଛି। ଭିଡିଓ ଦେଖି ତିନି ଜଣିଆ କମିଟି ତଦନ୍ତ କରୁଛନ୍ତି।
ଏହି କମିଟିରେ ଅଛନ୍ତି ଏଡିଏମ୍, ନୀତି ପ୍ରଶାସକ, ସିଟି ଡିଏସପି। ଏହି ରଥଯାତ୍ରା ବେଳେ ବିରାଟ ବିଭ୍ରାଟ ହୋଇଥିଲା। ଆଡ଼ପ ମଣ୍ଡପକୁ ନିଆଯାଉଥିବା ବେଳେ ପହଣ୍ଡି ସମୟରେ ବଳଭଦ୍ର ମୁହଁମାଡ଼ି ପଡ଼ି ଯାଇଥିଲା। ଏପରି ଅଘଟଣ କେବେ ବି ହୋଇନାହିଁ। ଏତେ ବଡ଼ ଅଘଟଣ କିପରି ହେଲା, ଏଥିପାଇଁ ଦାୟୀ କିଏ, କାହା ଅବହେଳାରୁ ଏପରି ହୋଇଥିଲା, ସେସବୁର ଉତ୍ତର ଖୋଜୁଛି କମିଟି।
ବଲାଙ୍ଗୀର: ସରପଞ୍ଚଙ୍କୁ ଘାରିଛି ଅନାସ୍ଥା ଭୟ। ତେଣୁ ୱାର୍ଡ ମେମ୍ବରଙ୍କୁ ଭୋଜି ଭାତ ଖାଇବାକୁ ଦେଇ ମୁଣ୍ଡିଆ ମାରୁଛନ୍ତି ସରପଞ୍ଚ। ବଲାଙ୍ଗୀର ତୁରେକେଲା ବ୍ଲକ ବଡବାଙ୍କୀର ସରପଞ୍ଚ ଡୋଳାଧର ବାଗଙ୍କ ମୁଣ୍ଡିଆ ମାରିବା ଭିଡିଓ ସୋସିଆଲ ମିଡିଆରେ ଭାଇରାଲ୍ ହେବାରେ ଲାଗିଛି।
ଅନାସ୍ଥାରୁ ରକ୍ଷା ପାଇବା ପାଇଁ ୱାର୍ଡ ମେମ୍ବରମାନଙ୍କୁ ଭୋଜି ଭାତ ଦେଇ ମୁଣ୍ଡିଆ ମାରୁଥିବା ଚର୍ଚ୍ଚା ହେଉଛି। ସରପଞ୍ଚଙ୍କ ବିରୋଧରେ ଅନାସ୍ଥା ଆଣିବା ପାଇଁ ୱାର୍ଡ଼ମେମ୍ବର ମାନେ ବୈଠକ କରିଥିଲେ । ଏହା ଜାଣିବା ପରେ ସରପଞ୍ଚ ଡୋଲାଧର ପହଂଚି ତାଙ୍କ ଭୁଲ୍ ହୋଇଗଲା ବୋଲି କହିଛନ୍ତି। ଅନାସ୍ଥା ପ୍ରସ୍ତାବ ନ ଆଣିବାକୁ ମୁଣ୍ଡିଆ ମାରି ଗୋଡ଼ ହାତ ଧରୁଛନ୍ତି ସରପଞ୍ଚ।
ଭୁବନେଶ୍ବର: ପୂର୍ବତନ ରାସ୍ତା ଓ ଗୃହ ନିର୍ମାଣ ବିଭାଗ ମୁଖ୍ୟଯନ୍ତ୍ରୀ ଗିରଫ। ପୂର୍ବତନ ମୁଖ୍ୟଯନ୍ତ୍ରୀ ତାରାପ୍ରସାଦ ମିଶ୍ରଙ୍କୁ ଗିରଫ କଲା ଭିଜିଲାନ୍ସ। ଗତକାଲି ତାଙ୍କ ଘରୁ ବାହାରିଥିଲା ଅମାପ ସମ୍ପତ୍ତି। ବିଭିନ୍ନ ସହରରେ ୧୦ଟି ଦାମିକିଆ ଫ୍ଲାଟ। ଭୁବନେଶ୍ଵର, ଝାରସୁଗୁଡ଼଼ାରେ ଏହି ପ୍ଲାଟ ରହିଛି। ୭ଟି ପ୍ଲଟ ମଧ୍ୟ ଠାବ ହୋଇଥିଲା।
୨ କୋଟି ୭୦ ଲକ୍ଷ ଟଙ୍କାର ବ୍ଯାଙ୍କ ଓ ବୀମା ଜମା, ପ୍ରାୟ ଦେଢ କେଜି ସୁନା, ୬ ଲକ୍ଷରୁ ଅଧିକ ନଗଦ ଟଙ୍କା ମିଳିଛି। ଗୋଟିଏ ଦାମି ମର୍ସିଡିଜ ଓ କିଆ କାର। ରୋଲେକ୍ସ ପରି ଦାମି ବ୍ରାଣ୍ଡର ୧୩ ଲକ୍ଷ ଟଙ୍କା ମୂଲ୍ୟର ଅନେକ ଘଣ୍ଟା ମିଳିଛି। ଶତାଧିକ ହଳ ଯୋତା, ଝିଅର ମେଡିିକାଲ ପାଠପଢା ଲାଗି ଖର୍ଚ୍ଚ କରିଛନ୍ତି ୮୦ ଲକ୍ଷ ଟଙ୍କା।
ଆମେରିକା, ଥାଇଲାଣ୍ଡ, ଭିଏତନାମ, ୟୁଏଇ, କାନାଡା, ମେକ୍ସିକୋ, ମାଲେସିଆ ଓ ସିଙ୍ଗାପୁର ପରି ଦେଶର ବିଦେଶୀ ଟଙ୍କା ମିଳିଥିଲା। ଆୟବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ପୂର୍ବତନ ମୁଖ୍ୟଯନ୍ତ୍ରୀ ତାରାପ୍ରସାଦ ମିଶ୍ରଙ୍କ ଘରେ ଚଢାଉ କରିଥିଲା ଭିଜିଲାନ୍ସ। ଭୁବନେଶ୍ଵର, କଟକ ଓ ଝାରସୁଗୁଡ଼ା ସମେତ ୯ଟି ସ୍ଥାନରେ ଏକକାଳୀନ ରେଡ କରିଥିଲା।
ଜୟପୁର: ରାଜସ୍ଥାନର ଶିପ୍ରାପଥ ଥାନା ଭିତରେ ତାତିଲେ ସୈନିକ କଲ୍ୟାଣ ମନ୍ତ୍ରୀ ରାଜ୍ୟବର୍ଦ୍ଧନ ସିଂ ରାଠୋର । ଏସିପିଙ୍କୁ ପରାମର୍ଶ ଦେଉଥିବା ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଭିଡିଓରେ ମନ୍ତ୍ରୀ ରାଗରେ ନିଆଁ ହୋଇଯାଉଥିବା ଦେଖିବାକୁ ମିଳିଛି । ଏସିପିଙ୍କ ସହ ମନ୍ତ୍ରୀଙ୍କ ଯୁକ୍ତିତର୍କ ସୋସିଆଲ ମିଡିଆରେ ଭାଇରାଲ ହେଉଛି । ପାରା କମାଣ୍ଡୋ ଅରବିନ୍ଦ ସିଂ ରାଜପୁତଙ୍କୁ ପୋଲିସ ମାଡ ମାରିବା ଘଟଣାକୁ ନେଇ ବର୍ଷିଥିଲେ ମନ୍ତ୍ରୀ ।
ଏହି ଘଟଣାକୁ ନେଇ ଜବାବ ମାଗିବାକୁ ଶିପ୍ରାପଥ ଥାନାରେ ପହଞ୍ଚିଥିଲେ ସୈନିକ କଲ୍ୟାଣ ମନ୍ତ୍ରୀ । ଏହାପରେ ସେ ଥାନାରେ ପହଞ୍ଚି ଏସିପି ସଞ୍ଜୟ ଶର୍ମାଙ୍କ ଉପରେ ଜୋରଦାର ବର୍ଷିଥିଲେ । ମନ୍ତ୍ରୀ ପଚାରିଥିଲେ ଯେ ‘‘ଆପଣ ସେନା ଯବାନଙ୍କୁ କାହିଁକି ଉଲ୍ଲଗ୍ନ କରି ମାଡ ମାରିଲେ ? ଯଦି ଯବାନଙ୍କ ସହ ଏଭଳି ବ୍ୟବହାର କରୁଛନ୍ତି ତେବେ ସାଧାରଣ ଜନତାଙ୍କ ସହ କିଭଳି ବ୍ୟବହାର କରୁଥିବେ? ମୁଁ ଆପଣଙ୍କ ସହ କଥା ହେଉଛି ହେଲେ ଆପଣ ସେଠାରେ କାହା ସହ କଥା ହେଉଛନ୍ତି ? ମୁଁ ଏଠାରେ ଧୈର୍ଯ୍ୟ ଧରି ବସିଛି । ଯେତେବେଳେ ଆପଣଙ୍କ ସହ କଥା ହେଉଛି ଉତ୍ତର ଦିଅନ୍ତୁ ନଚେତ ସାବଧାନ ରୁହନ୍ତୁ । ସାଧାରଣ ଭଦ୍ରାମି ଆପଣ ଶିଖି ନାହାନ୍ତି ନା ବର୍ଦ୍ଦିର ଅଂହକାର ଦେଖାଉଛନ୍ତି । ଏଠାରେ କୌଣସି ପ୍ରକାର ଦାଦାଗିରି ଚାଲିନି ତ ?’’
କିଛି ଦିନ ପୂର୍ବରୁ ଶିପ୍ରାପଥ ପୋଲିସ ଏକ ହୁକ୍କା ବାର୍ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା । ଏହି ସମୟରେ ଜଣେ ଯବାନଙ୍କୁ ପୋଲିସ ଅଟକ ରଖିଥିଲା । ଯବାନଙ୍କ ଜାମିନ ପାଇଁ ସେଠାରେ ପହଞ୍ଚିଥିବା କାଶ୍ମୀରର ଯବାନ ଅରବିନ୍ଦ ସିଂଙ୍କୁ ଉଲଗ୍ନ କରି ମାଡ ମରାଯାଇଥିଲା ।
ଭୁବନେଶ୍ବର: ଘୂର୍ଣ୍ଣିବଳୟ ସାଙ୍ଗକୁ ସକ୍ରିୟ ରହିଛି ମୌସୁମୀ ବାୟୁ । ଏହାର ପ୍ରଭାବରେ ଆସନ୍ତାକାଲି ଠୁ ବଢିବ ବର୍ଷା । ୧୭ ତାରିଖ ପର୍ଯ୍ୟନ୍ତ ରାଜ୍ୟରେ ପ୍ରବଳ ବର୍ଷା ସମ୍ଭାବନା ରହିଛି । ଝାଡ଼ଖଣ୍ଡ ଓ ସଂଲଗ୍ନ ଅଞ୍ଚଳରେ ସୃଷ୍ଟି ହୋଇଥିବା ଘୂର୍ଣ୍ଣିବଳୟ ପ୍ରଭାବରେ ଆସନ୍ତା ୨୪ ଘଣ୍ଟା ମଧ୍ୟରେ କିଛି କିଛି ସ୍ଥାନରେ ବିଜୁଳି ଘଡଘଡି ସହ ବର୍ଷାର ସମ୍ଭାବନା ରହିଛି ।
ବାଲେଶ୍ଵର, ଭଦ୍ରକ, ଯାଜପୁର, କେନ୍ଦ୍ରାପଡ଼ା,କଟକ, ଜଗତସିଂହପୁର, ସୁନ୍ଦରଗଡ଼,ଝାରସୁଗୁଡ଼ା, ବରଗଡ, ସମ୍ବଲପୁର, ଦେଓଗଡ଼, ଅନୁଗୁଳ, ଢେଙ୍କାନାଳ, କେନ୍ଦୁଝର, ମୟୂରଭଞ୍ଜରେ ରହିବ ବର୍ଷାର ପ୍ରଭାବ । ୬ ଜିଲ୍ଲାରେ ୭ ରୁ ୧୧ ସେମି ବର୍ଷା ସମ୍ଭାବନା ଥିବାରୁ ଏହି ସବୁ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି । ସେହିପରି ୧୪ ତାରିଖ ପାଇଁ ୪ ଜିଲ୍ଲାକୁ ଜାରି ହୋଇଛି ୟେଲୋ ୱାର୍ଣ୍ଣିଂ ।
୧୮ ତାରିଖରୁ ବଦଳିବ ପାଗ । ଚଳିତ ମୌସୁମୀ ସିଜିନରେ ରାଜ୍ୟରେ ଜୁନ ୧ରୁ ଏଯାବତ ୬୩୪ ଦଶମିକ ୯ ମିଲିମିଟର ବର୍ଷା ରେକର୍ଡ ହୋଇଛି । ଏବେବି ୯ ପ୍ରତିଶତ ନିଅଁଟିଆ ବର୍ଷା ହୋଇଥିବା ସୂଚନା ଦେଇଛି ପାଣିପାଗ କେନ୍ଦ୍ର । ଗୋଟିଏ ଜିଲ୍ଲା ମାଲକାନଗିରିରେ ସ୍ଵାଭାବିକ ଠାରୁ ଅତ୍ୟଧିକ ବର୍ଷା ହୋଇଥିବା ବେଳେ ୪ ଜିଲ୍ଲାରେ ଅଧିକ ବର୍ଷା ଓ ୧୬ ଜିଲ୍ଲାରେ ସ୍ୱାଭାବିକ ଓ ବାକି ୧୦ ଜିଲ୍ଲାରେ ନିଅଣ୍ଟିଆ ବର୍ଷା ହୋଇଛି ।
ଭୁବନେଶ୍ବର: ଟୋକିଓ ପାରାଅଲିମ୍ପିକ୍ସରେ ସ୍ବର୍ଣ୍ଣ ପଦକ ବିଜେତା ପ୍ରମୋଦ ଭଗତଙ୍କୁ ଝଟକା । ବିଶ୍ବ ବ୍ୟାଡମିଣ୍ଟନ ଫେଡରେସନ ପ୍ରମୋଦଙ୍କୁ ଡୋପିଂ ସମ୍ବନ୍ଧୀୟ ନିୟମ ଉଲ୍ଲଙ୍ଘନ ମାମଲାରେ ନିଲମ୍ବନ କରିଛି । ୧୮ ମାସ ପର୍ଯ୍ୟନ୍ତ ଖେଳି ପାରିବେନି ପ୍ରମୋଦ । ପ୍ୟାରିସ ପାରାଅଲିମ୍ପିକ୍ସ ଆଉ ଖେଳି ପାରିବେନି ପ୍ରମୋଦ । ପ୍ୟାରିସରେ ଆଗାମୀ ଅଗଷ୍ଟ ୨୮ରୁ ସେପ୍ଟେମ୍ବର ୮ ପର୍ଯ୍ୟନ୍ତ ଖେଳାଯିବ ପାରାଅଲିମ୍ପିକ୍ସ ।
କୋର୍ଟ ଅଫ ଅର୍ବିଟ୍ରେସନ ଫର ସ୍ପୋର୍ଟ (CAS) ଭଗତଙ୍କୁ ୧୨ ମାସ ଭିତରେ ତିନି ଥର ଦୋଷୀ ପାଇଛନ୍ତି । ମାର୍ଚ୍ଚ ୧, ୨୦୨୪ରେ CASର ଆଣ୍ଟି ଡୋପିଂ ଡିଭିଜନ ଭଗତଙ୍କୁ ୧୨ ମାସ ମଧ୍ୟରେ ତିନି ଥର ଆଣ୍ଟି ଡୋପିଂ ନିୟମର ଉଲ୍ଲଙ୍ଘନ କରିଥିବା ଜାଣିବାକୁ ପାଇଛି । ସେପଟେ ୨୯ ଜୁଲାଇ ୨୦୨୪ରେ ସିଏଏସର ଆବେଦନ ଡିଭିଜନ ଭଗତଙ୍କ ଅପିଲ୍କୁ ଖାରଜ କରିଦେଇଥିଲା । ମାର୍ଚ୍ଚ ୧ରୁ ସିଏଏସର ଆଣ୍ଟି ଡୋପିଂ ଡିଭିଜନ ଭଗତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଆରମ୍ଭ କରିଥିଲା ।
ଚଳିତବର୍ଷ ପ୍ରମୋଦ ପାରା ବ୍ୟାଡମିଣ୍ଟନ ବିଶ୍ବ ଚାମ୍ପିଅନଶିପରେ ଇଂଲଣ୍ଡର ଡାନିଏଲ ବେଥେଲଙ୍କୁ କଡା ଟକ୍କର ଦେଇ ପୁରୁଷ ସିଙ୍ଗଲ ଏସଏଲ୩ ଟାଇଟଲ ନିଜ ନାଁରେ କରିପାରିଥିଲେ ।
ବରଗଡ: ଚାଲିଗଲେ କଂସ ଭୂମିକାରେ ଅଭିନୟ କରୁଥିବା ଗୋପାଳ ସାହୁ। ମୁକ୍ତାକାଶ ରଙ୍ଗମଞ୍ଚ ବରଗଡ଼ ଧନୁଯାତ୍ରା ମହୋତ୍ସବରେ କଂସ ମହାରାଜ ଭାବେ ଅଭିନୟ କରିଥିଲେ ଗୋପାଳ ସାହୁ। ୭୦ ବର୍ଷ ବୟସରେ ତାଙ୍କ ପରଲୋକ ଘଟିଛି।
କିଛି ଦିନ ହେବ ସେ ମଧୁମେହ ରୋଗରେ ପୀଡ଼ିତ ହୋଇ ହସ୍ପିଟାଲରେ ଭର୍ତ୍ତି ହୋଇଥିଲେ। ଏଣେ ବରଗଡ଼ ଜିଲ୍ଲା ବରପାଲି ସ୍ଥିତ ତାଙ୍କ ବାସଭବନରେ ତାଙ୍କ ଶେଷ ଦର୍ଶନ ପାଇଁ ଲୋକଙ୍କ ଭିଡ଼ ଜମିଛି। ବିଳମ୍ବିତ ରାତିରେ ତାଙ୍କର ବିୟୋଗ ହୋଇଛି। ଦୀର୍ଘ ୨୩ ବର୍ଷ ଧରି ମୁକ୍ତାକାଶ ରଙ୍ଗମଞ୍ଚରେ କଂସ ଭୂମିକାରେ ସେ ଅଭିନୟ କରିଆସୁଥିଲେ। ଚମତ୍କାର ଅଭିନୟରେ ଲୋକଙ୍କୁ ବାନ୍ଧି ରଖୁଥିଲେ ଗୋପାଳ।
କୋଲକତା: ଟ୍ରେନି ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ଘଟଣା ପୁଣି ଥରେ ନିର୍ଭୟା ମାମଲାକୁ ଜୀବନ୍ତ କରିଦେଇଛି । ଏଭଳି ଲୋମଟାଙ୍କୁରା ଘଟଣା ଦେଶବାସୀଙ୍କୁ ବିଚଳିତ କରିଦେଇଛି । ଦିନକୁ ଦିନ ସାମନାକୁ ଆସୁଛି ଲୋମହର୍ଷଣକାରୀ ଘଟଣାର ନୂଆ ନୂଆ ତଥ୍ୟ । କୋଲକତା ଆରଜି କର ମେଡିକାଲ ଓ ହସ୍ପିଟାଲର ଟ୍ରେନି ଡାକ୍ତରଙ୍କୁ ଅମାନୁଷିକ ଭାବେ ହତ୍ୟା କରିବା ପୂର୍ବରୁ ନିର୍ଯାତନା ଦିଆଯାଇଥିବା ଶବ ବ୍ୟବଚ୍ଛେଦ ରିପୋର୍ଟରେ ଜଣାପଡିଛି । ହତ୍ୟା ପୂର୍ବରୁ ଅଭିଯୁକ୍ତ ଡାକ୍ତରଙ୍କୁ ମାଡ ମାରିଥିଲା । ଏପରିକି ପିଡିତାଙ୍କ ଚଷମା ଭାଙ୍ଗିଯିବା ସହ ଆଖି ଭିତରେ କାଚ ପଶିଯାଇଥିଲା । ଆରଜି କର ହସ୍ପିଟାଲରେ ଟ୍ରେନି ମହିଳା ଡାକ୍ତରଙ୍କ ସହ ବର୍ବରତା ମାମଲାରେ ସମଗ୍ର ଦେଶର ଡାକ୍ତର ମାନେ ବିରୋଧ ପ୍ରଦର୍ଶନ କରିଛନ୍ତି ।
ଶବ ବ୍ୟବଚ୍ଛେଦ ରିପୋର୍ଟରୁ ଜଣାପଡିଛି ଯେ ୩୧ ବର୍ଷୀୟ ପିଜି ଡାକ୍ତର ଛାତ୍ରୀଙ୍କୁ ଦୁଷ୍କର୍ମ ପୂର୍ବରୁ ବିରୋଧ ପାଇଁ ଅମାନୁଷିକ ଭାବେ ମାଡ ମରାୟାଇଥିଲା । ତାଙ୍କୁ ଏଭଳି ଭାବେ ମାଡ ମରାଯାଇଥିଲା ଯେ ପିଡିତାହକ୍ ଶରୀରରେ ଅନେକ କ୍ଷତ ଚିହ୍ନ ଦେଖିବାକୁ ମିଳିଥିଲା । ପିଡିତାଙ୍କ ହାତ ଓ ଚେହେରାରେ କାମୁଡା ଦାଗ ମଧ୍ୟ ରହିଥିଲା । ଅଭିଯୁକ୍ତ ପିଡିତାଙ୍କ ମୁଣ୍ଡକୁ ଏତେ ଜୋରରେ କାନ୍ଥରେ ବାଡେଇ ଦେଇଥିଲା ଯେ ମୁଣ୍ଡରେ ଗଭୀର ଆଘାତ ଲାଗିଥିଲା ।
ମେଡିକାଲ କଲେଜର ସେମିନାର ହଲରେ ଟ୍ରେନି ଡାକ୍ତର ବିଶ୍ରାମ ନେଉଥିବା ସମୟରେ ତାଙ୍କ ସହ ଏଭଳି ଅଘଟଣ ଘଟିଥିଲା । ଏହାପରେ ତାଙ୍କୁ ହତ୍ୟା କରାଯାଇଥିଲା । ଗୁରୁବାର ବିଳମ୍ବିତ ରାତିରେ ଏହି ଘଟଣା ଘଟିଥିବା ବେଳେ ଶୁକ୍ରବାର ଦିନ ଡାକ୍ତରଙ୍କ ମୃତଦେହ ମିଳିଥିଲା । କୋଲକାତା ପୋଲିସ ସଞ୍ଜୟ ରାଏ ନାମକ ଅଭିଯୁକ୍ତଙ୍କୁ ଗିରଫ କରିଛି । ଅଭିଯୁକ୍ତ କୋଲକାତା ପୋଲିସ ସହ କାମ କରୁଥିବା ସିଭିକ ଭଲିଣ୍ଟିଅର ଅଟେ ।
ଶାହଜାନପୁର: ଉତ୍ତର ପ୍ରଦେଶ ଶାହଜାନପୁରର ସେଣ୍ଟ୍ରାଲ ବ୍ୟାଙ୍କ ବଲିଉଡ ଅଭିନେତା ରାଜପାଲ ଯାଦବଙ୍କ କୋଟି କୋଟି ଟଙ୍କାର ସମ୍ପତ୍ତି ଜବତ କରିଛନ୍ତି । ସେଣ୍ଟ୍ରାଲ ବ୍ୟାଙ୍କ ଅଫ ଇଣ୍ଡିଆ ମୁମ୍ବାଇ ଶାଖାରୁ ରାଜପାଲ ଯାଦବ କୋଟି କୋଟି ଟଙ୍କା ଋଣ ନେଇଥିଲେ । ଯେଉଁଥିପାଇଁ ସେ ବାପା ନାରଙ୍ଗ ଯାଦବଙ୍କ ନାଁରେ ଥିବା ଜମି ଓ ଘର ବନ୍ଧକ ରଖି ଟଙ୍କା ଆଣିଥିଲେ ।
ସେଣ୍ଟ୍ରାଲ ବ୍ୟାଙ୍କ ଅଫ ଇଣ୍ଡିଆ, ବାନ୍ଦ୍ରା କୁର୍ଲା କମ୍ପ୍ଲେକ୍ସ ମୁମ୍ବାଇ ଶାଖାର ଟିମ ଦୁଇ ଦିନ ପୂର୍ବରୁ ଶାହାଜାନପୁରରେ ପହଞ୍ଚିଥିଲା । ଏହା ପରେ ଗୋପନୀୟ ଢଙ୍ଗରେ ଋଣରେ ବୁଡିଥିବା ରାଜପାଲ ଯାଦବଙ୍କ ସମ୍ପତ୍ତିକୁ ଜବତ କରିଥିଲା ବ୍ୟାଙ୍କ ।
ରାଜପାଲ ଯାଦବଙ୍କ ବାପାଙ୍କ ନାମରେ କୋଟି କୋଟି ମୂଲ୍ୟର ଏହି ସମ୍ପତ୍ତି ସହରର ସଦର ବଜାର ନିକଟ ସେଟ ଏକ୍ବାଲ୍ୟାବ ପାଖରେ ଏହି ସମ୍ପତ୍ତି ରହିଛି । ବ୍ୟାଙ୍କ କର୍ମଚାରୀ ମାନେ ଗେଟ୍ରେ ତାଲା ପକାଇ ସିଲ୍ କରିଦେଇଛନ୍ତି । ଏହା ସହ ସେଠାରେ ବ୍ୟାଙ୍କ ସମ୍ପତ୍ତି ଲେଖି ବ୍ୟାନର ମାରିଛନ୍ତି । ଆପଣଙ୍କୁ କହି ରଖିଛୁ ଯେ ଏହା ପୂର୍ବରୁ ଅତା ପତା ଲାପତା ଫିଲ୍ମର ଋଣ ନ ସୁଝିବା ଯୋଗୁଁ ଜେଲ ଯାଇସାରିଛନ୍ତି ରାଜପାଲ ଯାଦବ ।
ପୁଣି ଥରେ ବ୍ୟାଙ୍କ କରଜ ନ ସୁଝିବା ଯୋଗୁଁ ବନ୍ଧକ ରଖିଥିବା ସମ୍ପତ୍ତିକୁ ଜବତ କରିଛି ବ୍ୟାଙ୍କ ।
