କଟକ: କଟକ ଘରୋଇ ନର୍ସିଂହୋମରେ ଅଗ୍ନିକାଣ୍ଡ । ପୁରୀଘାଟ ଥାନା ନିକଟରେ ଥିବା ନର୍ସିଂହୋମରେ ନିଆଁ ଲାଗିଛି । ନର୍ସିଂହୋମର ତୃତୀୟ ମହଲାରେ ନିଆଁ । ନିଆଁ ଲାଗିବାର କାରଣ ଅସ୍ପଷ୍ଟ ଥିବା ସୂଚନା ମିଳିଛି । ନର୍ସିଂହୋମରେ ଫସିଥିବା ରୋଗୀଙ୍କୁ ଉଦ୍ଧାର ଜାରି। ଉଦ୍ଧାର ରୋଗୀଙ୍କୁ ଅନ୍ୟ ମେଡିକାଲକୁ ସ୍ଥାନାନ୍ତର। ICU ରେ ଥିବା ୫ ଜଣ ରୋଗୀଙ୍କୁ ବଡ ମେଡିକାଲକୁ ସ୍ଥାନାନ୍ତର କରାଯାଇଛି । ନିଆଁ ଲିଭାଇବାକୁ ପ୍ରୟାସ କରୁଛନ୍ତି ଅଗ୍ନିଶମ ବାହିନୀ ।
ବଳଭଦ୍ର ହାମୁଡେଇ ପଡିବା ଏକ ପ୍ରକାର ଅଶୁଭ ସଙ୍କେତ ଦେଉଛି: ହଳଧର ଦାସ ମହାପାତ୍ର
ପୁରୀ: ଆଡ଼ପ ପହଣ୍ଡିବେଳେ ତାଳଧ୍ବଜ ରଥର ଚାରମାଳ ଉପରେ ପ୍ରଭୁ ବଳଭଦ୍ର ପଡିଯିବା ଘଟଣାରେ ପ୍ରତିକ୍ରିୟା ରଖିଛନ୍ତି ତାଳଧ୍ଵଜ ରଥର ମୁଖ୍ୟ ବାଡଗ୍ରାହୀ ହଳଧର ଦାସ ମହାପାତ୍ର। ସେ କହିଛନ୍ତି: ଏଭଳି ଘଟଣା ତାଙ୍କ ଜୀବନକାଳ ଭିତରେ କେବେ ଘଟିନଥିଲା । ମହାପ୍ରଭୁଙ୍କ ନୀତି କାନ୍ତିରେ ବିଭ୍ରାଟ, ରଥ ଉପରେ ମାଳ ମାଳ ସେବାୟତ ଏବଂ ଶ୍ରୀମନ୍ଦିର ପ୍ରଶାସନର କୋହଳ ମନୋଭାବ ଯୋଗୁ ଗତ ଆଡପ ମଣ୍ଡପ ଦିନ ପହଣ୍ଡି ସମୟରେ ଏତେ ବଡ ଅଘଟଣ ଘଟିଗଲା ବୋଲି ସେ କହିଛନ୍ତି।
ପ୍ରଭୁ ବଳଭଦ୍ରଙ୍କ ରଥ ଉପରେ ଅନଧିକୃତ ବା ପାଳି ନଥିବା ସେବାୟତ ରଥ ଉପରେ ରହିଥିଲେ। ପହଣ୍ଡି ସମୟରେ ଯେତିକି ସଂଖ୍ୟକ ସେବାୟତଙ୍କ ଆବଶ୍ୟକତା ରହିଛି ତା ଠାରୁ ଅଧିକ ସେବାୟତ ରହିବା ଦ୍ବାରା ପହଣ୍ଡିରେ ଏତେ ବଡ ଅଘଟଣ ଘଟିଗଲା। ପ୍ରଭୁ ବଳଭଦ୍ର ଚାରମାଳ ଉପରେ ଏଭଳି ହାମୁଡେଇ ପଡିବା ଏକ ପ୍ରକାର ଅଶୁଭ ସଙ୍କେତ ଦେଉଛି ବୋଲି ବାଡଗ୍ରାହୀ ହଳଧର ଦାସ ମହାପାତ୍ର କହିଛନ୍ତି। ତେଣୁ ବାହୁଡା ଦିନ ଯଦି ରଥ ଉପରେ ଅନଧିକୃତ ସେବାୟତ ରୁହନ୍ତି ତେବେ ମହାପ୍ରଭୁଙ୍କ ପହଣ୍ଡି ନୀତିରେ ବିଭ୍ରାଟ ହେବ। ଶ୍ରୀମନ୍ଦିର ପ୍ରଶାସନ ଏ ସବୁ ଦିଗରେ ବିଶେଷ ଧ୍ୟାନ ଦେବାର ନିହାତି ଆବଶ୍ୟକ ରହିଛି। ନଚେତ୍ ଆଗକୁ ଆହୁରି କିଛି ବଡ ଅଘଟଣ ଘଟିପାରେ ବୋଲି ସୂଚେଇ ଦେଇଛନ୍ତି ବଳଭଦ୍ରଙ୍କ ବାଡଗ୍ରାହୀ।
ରାଜ୍ୟପାଳଙ୍କ ପୁଅଙ୍କୁ ତୁରନ୍ତ ଗିରଫ କରାଯାଉ: ତାରା ପ୍ରସାଦ ବାହିନୀପତି
ଭୁବନେଶ୍ୱର: ରାଜଭବନର ଏଏସଓକୁ ରାଜ୍ୟପାଳଙ୍କ ପୁଅ ଲଳିତ କୁମାର ମାଡ ମାରିବା ଘଟଣାରେ କଡ଼ା ପ୍ରତିକ୍ରିୟା ରଖିଛନ୍ତି କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି। ସେ କହିଛନ୍ତି, ପୋଲିସ ରାଜ୍ଯପାଳଙ୍କ ପୁଅଙ୍କୁ ତୁରନ୍ତ ଗିରଫ କରିବା ଦରକାର । ରାଜ୍ଯପାଳଙ୍କ ପୁଅଙ୍କ ସମେତ ତାଙ୍କ ସହଯୋଗୀଙ୍କୁ ପୋଲିସ ଗିରଫ କରିବା ଦରକାର । ଗଭର୍ଣ୍ଣର ହାଉସର ଜଣେ ସରକାରୀ କର୍ମଚାରୀଙ୍କୁ ଯେପରି ମାଡ ମରାଗଲା ଓ ଜୀବନରୁ ମାରି ଦେବାକୁ ଧମକ ଦିଆଗଲା ସେଥିଲାଗି ଦଫା ୩୦୭ ଲାଗିବା ଉଚିତ। ରାଜ୍ଯପାଳ ଜଣେ ପୂର୍ବତନ ମୁଖ୍ଯମନ୍ତ୍ରୀ ଥିଲେ। ସେ ଗତ ନିର୍ବାଚନରେ ବିଜେପି ସରକାର ଗଢିବା ନେଇ ଉଦ୍ଯମ କରିଥିଲେ । ଏବେ ରାଜ୍ଯରେ ବିଜେପି ସରକାର ଚାଲିଛି । ତେଣୁ ପୋଲିସ ଆକ୍ସନ ଲାଗି କୁଣ୍ଠାବୋଧ କରୁଛି ବୋଲି ତାରା କହିଛନ୍ତି ।
ପୋଲିସ ନିଜ ଆଡୁ ଗିରଫ କରିବାକୁ ତାରା ଦାବି କରିଛନ୍ତି । ଘଟଣାକୁ କଂଗ୍ରେସ ତୀବ୍ର ନିନ୍ଦା କରିବା ସହ ରାଜ୍ଯପାଳଙ୍କ ପୁଅ ଓ ତାଙ୍କ ସହଯୋଗୀଙ୍କୁ ବାନ୍ଧିବାକୁ ଦାବି କରୁଛି । ନହେଲେ ଆଗାମୀ ଦିନରେ କଂଗ୍ରେସ ଜୋରଦାର ଆନ୍ଦୋଳନ କରିବାକୁ ପଛାଇବ ନାହିଁ। ଆବଶ୍ଯକ ପଡିଲେ ରାଜ୍ଯପାଳଙ୍କୁ ବିରୋଧ କରାଯିବ । ବିଧାନସଭାରେ କଥା ଉଠାଯିବ ବୋଲି କହିଛନ୍ତି ତାରା।
୭ ରାଜ୍ଯର ୧୩ ବିଧାନସଭା ଆସନରେ ଉପନିର୍ବାଚନ ଗଣତି; ଏନଡିଓ ଓ ଇଣ୍ଡିଆ ମେଣ୍ଟ ମଧ୍ଯରେ କଡା ଟକ୍କର
ନୂଆଦିଲ୍ଲୀ : ୭ ରାଜ୍ଯର ୧୩ ବିଧାନସଭା ଆସନରେ ଉପନିର୍ବାଚନ ଗଣତି। ବ୍ଯାକଫୁଟରେ ଅଛି ଏନଡିଏ। ୯ ଆସନରେ ଆଗୁଆ ଅଛି ଇଣ୍ଡିଆ ମେଣ୍ଟ। ପଶ୍ଚିମବଙ୍ଗର ୪, ହିମାଚଳ ପ୍ରଦେଶର ୩, ଉତ୍ତରାଖଣ୍ଡର ୨, ବିହାର, ପଞ୍ଜାବ, ମଧ୍ଯପ୍ରଦେଶ ଓ ତାମିଲନାଡୁରେ ଗୋଟିଏ ଲେଖାଏ ଆସନରେ ହୋଇଥିଲା ଉପନିର୍ବାଚନ। ପଞ୍ଜାବ ଜଳନ୍ଧର ୱେଷ୍ଟ ଆସନରୁ ବିଜୟ ଲାଭ କରିଛନ୍ତି ଆପ ନେତା ମହୀନ୍ଦର ଭଗତ। ପଶ୍ଚିମବଙ୍ଗର ସମସ୍ତ ୪ ଆସନ- ବାଗଦା, ରାଣାଘାଟ, ମାଣିକତାଲା ଓ ରାଇଗଞ୍ଜରେ ଟିଏମସି ପ୍ରାର୍ଥୀ ଆଗୁଆ ଅଛନ୍ତି।
ହିମାଚଳ ପ୍ରଦେଶର ଡେରା ଆସନରୁ ବିଜୟୀ ହୋଇଛନ୍ତି ମୁଖ୍ଯମନ୍ତ୍ରୀ ସୁଖବିନ୍ଦର ସିଂ ସୁଖୁଙ୍କ ପତ୍ନୀ କମଳେଶ ଠାକୁର । ସେ ବିଜେପି ପ୍ରାର୍ଥୀ ହୋସିଆର ସିଂଙ୍କୁ ୯ ହଜାରରୁ ଅଧିକ ଭୋଟରେ ହରାଇଛନ୍ତି। ନାଲଗଡ, ହମିରପୁରରେ କଂଗ୍ରେସ ପ୍ରାର୍ଥୀ ଆଗୁଆ ଅଛନ୍ତି। ଉତ୍ତରାଖଣ୍ଡର ମଙ୍ଗଳୁର ଓ ବଦ୍ରିନାଥରେ କଂଗ୍ରେସ ଆଗରେ ରହିଛି । ବିହାରର ରୁପାଉଲି ଆସନରେ ଜେଡିୟୁ ପ୍ରାର୍ଥୀ ଆଗରେ ଥିବା ସୂଚନା ମିଳିଛି।ତାମିଲନାଡୁର ବିକ୍ରବନ୍ଦୀରେ ଡିଏମକେ ପ୍ରାର୍ଥୀ ଆଗରେ ଅଛନ୍ତି। ମଧ୍ଯପ୍ରଦେଶର ଛନ୍ଦୱାରା ଅନ୍ତର୍ଗତ ଅମରୱାରା ଆସନରେ ବିଜେପି ଓ କଂଗ୍ରେସ ମଧ୍ଯରେ ତୀବ୍ର ପ୍ରତିଦ୍ବନ୍ଦ୍ବିତା ହେଉଛି।
ନୀତିକାନ୍ତି ବିଳମ୍ବ ଯୋଗୁ ଲକ୍ଷାଧିକ ଟଙ୍କାର ମହାପ୍ରସାଦ ନଷ୍ଟ
ପୁରୀ : ଗୁଣ୍ଡିଚା ମନ୍ଦିରରେ ମହାପ୍ରଭୁଙ୍କ ନୀତି କାନ୍ତି ବିଳମ୍ବ ଯୋଗୁ ଲକ୍ଷାଧିକ ଟଙ୍କାର ମହାପ୍ରସାଦ ନଷ୍ଟ ହୋଇଛି । ଗତକାଲି ଦ୍ବିତୀୟ ଭୋଗମଣ୍ଡପ ରାତି ୧୦ଟା ୧୦ ରେ ଶେଷ ହୋଇଥିଲା। ଠିକ୍ ସମୟରେ ଆଡପ ଅବଢ଼ା ନବାହାରିବାରୁ ଭକ୍ତ ମାନେ ଅସନ୍ତୋଷ ପ୍ରକାଶ କରିଥିଲେ। ନୀତିକାନ୍ତି ସୁଚାରୁରୂପେ କରାଯାଉନଥିବା ସୁଆର ଓ ମହାସୁଆର ନିଯୋଗ ସମ୍ପାଦକ ନାରାୟଣ ମହାସୁଆର ଅଭିଯୋଗ କରିଛନ୍ତି। ଏହା ସହିତ ପ୍ରଶାସନ ତୁରନ୍ତ କ୍ଷତିପୂରଣ ଦେବାକୁ ଦେବାକୁ ଦାବି କରିଛନ୍ତି।
ଏତଲା ସତ୍ତ୍ବେ ମିଳୁନି ନ୍ଯାୟ ; ଏଏସଓଙ୍କୁ ମାଡ ଘଟଣାରେ କାହିଁକି ସରକାର ନିରବ : ବିଜେଡି
ଭୁବନେଶ୍ୱର : କର୍ତ୍ତବ୍ଯରତ ଅଧିକାରୀଙ୍କୁ ରାଜ୍ଯପାଳଙ୍କ ପୁଅ ମାଡ ମାରିବା ଘଟଣାରେ ତୀବ୍ର ପ୍ରତିକ୍ରିୟା ପ୍ରକାଶ କରିଛି ବିଜେଡି । ରାଜ୍ଯପାଳଙ୍କ ପୁଅଙ୍କର ଏଭଳି ଆଚରଣ ନିନ୍ଦୀନୀୟ ବୋଲି କହିଛନ୍ତି ବିଜେଡି ବିଧାୟକ ପ୍ରତାପ ଦେବ । ମୁଖ୍ୟମନ୍ତ୍ରୀ ନିଜେ ଗୃହ ଓ ସାଧାରଣ ପ୍ରଶାସନ ବିଭାଗର ମନ୍ତ୍ରୀ। ତାଙ୍କ ଅଧିନସ୍ଥ କର୍ମଚାରୀ ଏଏସଓ । ରାଜ୍ଯପାଳଙ୍କ ପୁଅଙ୍କ ବିରୋଧରେ ଏତଲା ହୋଇଛି, ମାନବାଧିକାର କମିଶନରେ ବି ଅଭିଯୋଗ ହୋଇଛି । କିନ୍ତୁ ଆଜି ଯାଏ ପୋଲିସ ପକ୍ଷରୁ କୌଣସି କାର୍ଯ୍ୟନୁଷ୍ଠାନ ନିଆଯାଇନାହିଁ। ପଣ୍ଡିତଙ୍କ ପୁଅ ମାଙ୍କଡ ମାରିଲେ କଣ ଦୋଷ ନାହିଁ ବୋଲି ପ୍ରଶ୍ନ କରିଛି ବିଜେଡି ।
ପୂର୍ବ ସରକାରରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ନିଆଯାଇଛି। ଏଏସଓ ଛୋଟ କର୍ମଚାରୀ ହୋଇଥାଇ ପାରନ୍ତି କିନ୍ତୁ କଥା ଛୋଟ ନୁହେଁ । ମୁଖ୍ୟମନ୍ତ୍ରୀ ନ୍ୟାୟ ଦିଅନ୍ତୁ ବୋଲି ଦାବି କରିଛି ବିଜେଡି । ଓଡିଆ ଅସ୍ମିତା କଥା କହି ବିଜେପି ରାଜ୍ଯରେ ସରକାର ଗଢିବାରେ ସଫଳ ହୋଇଛି । ଏବେ ରାଜ୍ଯପାଳଙ୍କ ପୁଅ ଓଡିଆ ଅଧିକାରୀଙ୍କୁ ମାଡ ମାରିବା କଣ ଓଡିଆ ଅସ୍ମିତା ଉପରେ ଆକ୍ରମଣ ନୁହେଁ କି ବୋଲି ପଚାରିଛି ବିଜେଡି । ମୁଖ୍ୟମନ୍ତ୍ରୀ ନିଜେ ଅଭିଯୋଗ ପ୍ରକୋଷ୍ଠ ଖୋଲିଛନ୍ତି । ସାଧାରଣ କର୍ମଚାରୀଙ୍କୁ ମୁଖ୍ଯମନ୍ତ୍ରୀ ନ୍ୟାୟ ଦିଅନ୍ତୁ ବୋଲି ନିବେଦନ କରିଛି ବିଜେଡି ।
ରାଜ୍ୟପାଳଙ୍କ ପୁଅର ଦାଦାଗିରି ପ୍ରତିବାଦରେ ରାସ୍ତାକୁ ଓହ୍ଲାଇଲା ଛାତ୍ର କଂଗ୍ରେସ। ଗତ ୭ ତାରିଖରେ ଜଣେ କର୍ତବ୍ୟରତ ଏଏସଓଙ୍କୁ ରାଜ୍ୟପାଳଙ୍କ ପୁଅ ଲଳିତ କୁମାର ଓ ତାଙ୍କ ସହଯୋଗୀ ପୁରୀ ରାଜଭବନରେ ମରଣାନ୍ତକ ଆକ୍ରମଣ କରିଥିବା ଅଭିଯୋଗ ହୋଇଛି। ଏହାକୁ ବିରୋଧ କରି ରାଜଭବନ ଘେରାଉ ପାଇଁ ଯିବା ବେଳେ ଅଟକାଇଥିଲା ପୋଲିସ। ରାଜ ରାସ୍ତାରେ କଂଗ୍ରେସ କର୍ମୀ ଓ ପୋଲିସ ମଧ୍ୟରେ ଧସ୍ତାଧସ୍ତି ହୋଇଥିଲା। ପୋଲିସ ଆନ୍ଦୋଳନକାରୀ କଂଗ୍ରେସ କର୍ମୀଙ୍କୁ ଗିରଫ କରିଥିଲା। ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଦାବି କରିଛି ଛାତ୍ର କଂଗ୍ରେସ। ଏହି ପ୍ରସଙ୍ଗରେ ପୁରୀ ସମୁଦ୍ର କୂଳ ଥାନାରେ ଅଭିଯୋଗ ହୋଇଥିବା ବେଳେ ସଚିବାଳୟ ସେବା ସଂଘ ପକ୍ଷରୁ ମୁଖ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରାଯାଇଛି।
ରାଜ୍ଯପାଳ ରଘୁବର ଦାସଙ୍କ ପୁଅ ଲଳିତ କୁମାରଙ୍କ ବିରୁଦ୍ଧରେ ସଙ୍ଗୀନ ଅଭିଯୋଗ
ଭୁବନେଶ୍ୱର : ରାଜ୍ଯପାଳ ରଘୁବର ଦାସଙ୍କ ପୁଅ ଲଳିତ କୁମାରଙ୍କ ବିରୁଦ୍ଧରେ ସଙ୍ଗୀନ ଅଭିଯୋଗ । ୫ଜଣ ସହଯୋଗୀଙ୍କ ସହ ମିଶି ବିଳମ୍ବିତ ରାତ୍ରିରେ ଓଡ଼ିଶା ସଚିବାଳୟ ସେବାର ଜଣେ କର୍ତ୍ତବ୍ୟରତ ଅଫିସର ବୈକୁଣ୍ଠନାଥ ପ୍ରଧାନଙ୍କୁ ମରଣାନ୍ତକ ଆକ୍ରମଣ କରି ଲହୁଲୁହାଣ କରିଥିବା ନେଇ ଅଭିଯୋଗ ହୋଇଛି। ଏନେଇ ରାଜ୍ୟପାଳଙ୍କ ପ୍ରମୁଖ ସଚିବ ଶାଶ୍ୱତ ମିଶ୍ରଙ୍କୁ ଗତ ଜୁଲାଇ ୮ତାରିଖରେ ମୌଖିକ ଅବଗତ କରି ନ୍ୟାୟ ପାଇଁ ଗୁହାରି କରିଥିଲେ ମଧ୍ୟ କିଛି ସୁଫଳ ମିଳିନାହିଁ। ଏନେଇ ସେ ଗତ ଜୁଲାଇ ୧୦ରେ ସମୁଦ୍ରକୂଳ ଥାନାରେ ଲିଖିତ ଅଭିଯୋଗ କରାଯାଇଛି।
ନ୍ୟାୟ ପାଇବା ପାଇଁ ପରବର୍ତ୍ତୀ ପଦକ୍ଷେପ ସମ୍ପର୍କରେ ସେ ଆଇନଗତ ପରାମର୍ଶ ଲୋଡ଼ୁଥିବା ମଧ୍ୟ ସୂଚନା ଦେଇଛନ୍ତି ପ୍ରଧାନ। ଶ୍ରୀ ପ୍ରଧାନ ଏବେ ସଂସଦୀୟ ବ୍ୟାପାର ବିଭାଗରେ ନିଯୁକ୍ତ ପାଇଛନ୍ତି ଓ ଡେପୁଟେସନରେ ରାଜଭବନର ହାଉସହୋଲଡ ସେକ୍ସନରେ ଏଏସଓ(ଆସିଷ୍ଟାଣ୍ଟ ସେକ୍ସନ ଅଫିସର) ଭାବେ କାର୍ଯ୍ୟରତ ଅଛନ୍ତି । ଅଭିଯୋଗ ଅନୁସାରେ- ପୁରୀ ରାଜଭବନରେ ଜୁଲାଇ ୭ ରାତିରେ ରାଜ୍ୟପାଳଙ୍କ ପୁଅ ଲଳିତ କୁମାର ଓ ତାଙ୍କର ଅନ୍ୟ ୫ଜଣ ସହଯୋଗୀ ମିଳିତ ଭାବେ ତାଙ୍କ ଉପରେ ମରଣାନ୍ତକ ଆକ୍ରମଣ କରିଥିଲେ।
ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଜୁଲାଇ ୭ ଓ ୮ ତାରିଖ ପୁରୀ ଗସ୍ତକୁ ଦୃଷ୍ଟିରେ ରଖି ତାଙ୍କର ରାଜଭବନ ରହଣୀର ପ୍ରସ୍ତୁତି ତଦାରଖ ପାଇଁ ସେ ୫ତାରିଖରୁ ପୁରୀରେ ରହିଥିଲେ । ୭ ତାରିଖରେ ରାଷ୍ଟ୍ରପତିଙ୍କ ଗସ୍ତ ସମ୍ପାଦନ ହୋଇଥିଲା । କିନ୍ତୁ ସେହି ରାତି ପ୍ରାୟ ୧୧ଟା ୪୫ମିନିଟରେ ସେ ରାଜଭବନସ୍ଥିତ ଅଫିସ ରୁମରେ ବସିଥିବାବେଳେ ରାଜ୍ୟପାଳଙ୍କ ବ୍ୟକ୍ତିଗତ ରୋଷେୟା ଆକାଶ ସିଂ ତାଙ୍କ ପାଖକୁ ଆସି ଲଳିତ କୁମାର ଡାକୁଥିବା କହିଥିଲେ । ରାଜଭବନର ସୁଇଟ ନମ୍ବର-୪ରେ ରହୁଥିବା ଲଳିତଙ୍କୁ ଭେଟିବାକୁ ସେ ଯାଇଥିଲେ କିନ୍ତୁ ତାଙ୍କୁ ଦେଖୁଦେଖୁ ଲଳିତ ଉତକ୍ଷିପ୍ତ ହୋଇ ଅତ୍ୟନ୍ତ ଅଶାଳୀନ ଭାଷାରେ ବଡ଼ ପାଟିରେ ଗାଳିଗୁଲଜ କରିଥିଲେ । ତାଙ୍କର ଏଭଳି ଆଚରଣକୁ ପ୍ରତିବାଦ କରିବାରୁ ଲଳିତ ତାଙ୍କୁ ଚାପୁଡ଼ା ମାରିବା ଆରମ୍ଭ କରିଥିଲେ ବୋଲି ଶ୍ରୀ ପ୍ରଧାନ ଅଭିଯୋଗ କରିଛନ୍ତି । ଲଳିତ ତାଙ୍କୁ ମାଡମାରିବା ସହ ହତ୍ୟା ଧମକ ଦେଇଥିବା କହିଥିବା ନେଇ ଅଭିଯୋଗ ହୋଇଛି।
ଏସମସ୍ତ ଘଟଣା ପ୍ରତି ଦୃଷ୍ଟି ଦେଇ ତାଙ୍କୁ ନ୍ୟାୟ ଦେବା ସହ ଦୋଷୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ପାଇଁ ଶ୍ରୀ ପ୍ରଧାନ ଦାବି କରିଛନ୍ତି । ଏହି ଘଟଣା ନେଇ ଜାତୀୟ ମାନବାଧିକାର କମିଶନଙ୍କ ନିକଟରେ ମାମଲା ରୁଜୁ ହୋଇଛି। ସେପଟେ ଏହି ଘଟଣାରେ କର୍ତ୍ତବ୍ୟରତ ଅଫିସରଙ୍କୁ ଉପଯୁକ୍ତ ନ୍ୟାୟ ମିଳୁ ବୋଲି ମୁଖ୍ଯମନ୍ତ୍ରୀଙ୍କ ନିକଟରେ ଦାବି କରିଛି ଓଡ଼ିଶା ସଚିବାଳୟ ସେବା ସଂଘ। ତେଣେ ଏହି ଘଟଣାକୁ ନେଇ କଟାକ୍ଷ କରିଛନ୍ତି ସାମ୍ବାଦିକ ରବିଶ କୁମାର। ସେ କହିଛନ୍ତି- ରାଜଭବନରେ ଏଣିକି ରାଜ୍ଯପାଳଙ୍କ ପରିବାରର ସଦସ୍ଯଙ୍କ ଲାଗି ଲକଜରି କାର୍ କିଣି ରଖାଯାଉ।
ଆଇନଗତ ଯୁଦ୍ଧରେ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମରାନଙ୍କ ପିଟିଆଇର ବିଜୟ
ଇସଲାମବାଦ : ଆଇନଗତ ଯୁଦ୍ଧରେ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମରାନ ଖାଁଙ୍କ ପାକିସ୍ତାନ ତେହରିକ-ଇ-ଇନସାଫ ପାର୍ଟିର ବିଜୟ । ସଂସଦରେ ମହିଳା ଓ ସଂଖ୍ଯାଲଘୁଙ୍କ ଲାଗି ସଂରକ୍ଷିତ ଥିବା ୨୦ରୁ ଅଧିକ ଆସନ ପିଟିଆଇ ଲାଗି ପ୍ରଯୁଜ୍ଯ ହେବ ବୋଲି କହିଛନ୍ତି ସୁପ୍ରିମକୋର୍ଟ । ପାକିସ୍ତାନ ନିର୍ବାଚନ କମିଶନ ମୁଖ୍ଯଙ୍କ ଇସ୍ତଫା ଦାବି କରୁଥିବ ଇମରାନଙ୍କ ଲାଗି ଏହା ଏକ ବିଜୟ ସାବ୍ଯସ୍ତ ହୋଇଛି ।
ଗତ ଫେବ୍ରୁଆରୀ ୮ ନିର୍ବାଚନରେ ନିର୍ବାଚନ କମିଶନ ପକ୍ଷରୁ ପିଟିଆଇର ନିର୍ବାଚନ ସଙ୍କେତ ପ୍ରତ୍ଯାହାର କରାଯିବା ପରେ ପିଟିଆଇର ପ୍ରାର୍ଥୀମାନେ ସ୍ବାଧୀନ ଭାବେ ଲଢିବା ସହ ସୁନ୍ନି ଇତେହାଦ କାଉନସିଲ ବା ଏସଆଇସିରେ ସାମିଲ ହୋଇଥିଲେ । ନିର୍ବାଚନ କମିଶନଙ୍କ ନିଷ୍ପତ୍ତି ବିରୋଧରେ ଏସଆଇସି ପେଶଓ୍ବାର ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲା । ମାତ୍ର କୋର୍ଟ ପକ୍ଷରୁ କମିଶନଙ୍କ ଆଦେଶକୁ କାଏମ ରଖାଯାଇଥିଲା ।
ପ୍ରଧାନବିଚାରପତି କାଜି ଫଏଜ ଇସାଙ୍କୁ ନେଇ ଗଠିତ ୧୩ଜଣିଆ ଖଣ୍ଡପୀଠଙ୍କ ଏହି ରାୟ ପ୍ରଧାନମନ୍ତ୍ରୀ ଶେହବାଜ ସରିଫଙ୍କ ନେତୃତ୍ବାଧୀନ ମେଣ୍ଟ ସରକାର ପ୍ରତି ଚାଲେଞ୍ଜ ସୃଷ୍ଟି କରିଛି । ଖଣ୍ଡପୀଠ କହିଛନ୍ତି ନିର୍ବାଚନ କମିଶନ ସାମ୍ବିଧାନିକ କର୍ତ୍ତବ୍ଯ ନିର୍ବାହ କରିବା ଉଚିତ । ଏକ ରାଜନୈିତିକ ଦଳର ଆଇନଗତ ଅଧିକାରର ସୁରକ୍ଷା ପ୍ରତି କମିଶନ ଦୃଷ୍ଟି ଦେବା ଜରୁରୀ । ଦେଶରେ ୨୫କୋଟି ଲୋକଙ୍କ ଲାଗି ଏକ ଖୁସିର ଦିନ ବୋଲି କହିଛନ୍ତି ପିଟିଆଇ ମୁଖ୍ୟ ଗୋହର ଖାଁ । ସୁପ୍ରିମକୋର୍ଟଙ୍କ ରାୟ ପରେ ନ୍ଯାସନାଲ ଆସେମ୍ବ୍ଲିରେ ପିଟିଆଇର ସଦସ୍ଯ ସଂଖ୍ଯା ୮୬ରୁ ୧୦୯କୁ ବୃଦ୍ଧି ପାଇବ । ୩୩୬ ଆସନ ବିଶିଷ୍ଟ ନ୍ଯାସନାଲ ଆସେମ୍ବ୍ଲିରେ ସରକାରୀ ଦଳର ସାଂସଦ ସଂଖ୍ଯା ଅଛନ୍ତି ୧୪୧ । ସେଥିରେ ଅଛନ୍ତି ପିଏମଏଲଏନର ୧୦୮, ଏମକ୍ଯୁଏମ-ପିର ୨୧ ଓ ପିଏମଏଲ-କ୍ଯୁର ୫ ସଦସ୍ଯ ଅଛନ୍ତି । ସରକାରକୁ ସମର୍ଥନ କରୁଛି ୬୮ ସଦସ୍ଯବିଶିଷ୍ଟ ପିପିପି ।
ରାଇସ ମିଲ ମାଲିକଙ୍କୁ ଅପହରଣ, କାର ଭାଙ୍ଗି କିଡନାପ କରିନେଲେ ଦୁର୍ବୃତ୍ତ !
କୋରାପୁଟ : କୋରାପୁଟ ଜିଲ୍ଲା ଜୟପୁର ବ୍ଲକ କୁମୁଲିପୁଟ ଗାଁରେ ଜଣେ ମିଲ ମାଲିକଙ୍କୁ ଅପହରଣ । ଗତକାଲି ସନ୍ଧ୍ୟା ଠାରୁ ଘରକୁ ଫେରିନାହାନ୍ତି ମିଲ ମାଲିକ । ଅପହରଣ ହୋଇଥିବା ମିଲ୍ ମାଲିକ ହେଲେ ଏ. ରାମେଶ ପାତ୍ର। ସେ ପେରାହାଣ୍ଡି SLVN ମୋଡେନ ରାଇସ ମିଲର ମାଲିକ। ଗତ କାଲି ରାତିରେ ପେରାହାଣ୍ଡି ମିଲରୁ ଘରକୁ ଫେରୁଥିବା ବେଳେ କିଛି ଦୁର୍ବୃତ୍ତ ତାଙ୍କ କାରକୁ ଅଟକାଇଥିଲେ। ପରେ କାର୍ କାଚ ଭାଙ୍ଗି ତାଙ୍କୁ ଅପହରଣ କରିଥିଲେ। ଅପହରଣର କାରଣ ଅସ୍ପଷ୍ଟ ଥିବା ବେଳେ, ଅପହରଣକାରୀମାନେ ଟଙ୍କା ମାଗୁଥିବା ଚର୍ଚ୍ଚା ହେଉଛି। ବୋରିଗୁମ୍ମା ଥାନାରେ ପରିବାର ଲୋକଙ୍କ ଏତଲା ଦେଇଥିବା ବେଳେ, ପୋଲିସ ଘଟଣାର ତଦନ୍ତ କରୁଛି।
ଗାଡ଼ି ଓଭର ଟେକିଂରୁ ଚାଲିଗଲା ହୋମଗାର୍ଡଙ୍କ ଜୀବନ
ପାରାଦ୍ଵୀପ : ଆଇରନ ଗାଡି ଓଭରଟେକିଙ୍ଗରୁ ଚାଲିଗଲା ଜଣେ ହୋମଗାର୍ଡଙ୍କ ଜୀବନ। ଏଭଳି ଏକ ସମ୍ବେଦନଶୀଳ ଘଟଣା ଘଟିଛି ପାରାଦ୍ଵୀପ ଦୋଛକି ନିକଟରେ। ଗତକାଲି ବିଳମ୍ବିତ ରାତ୍ରିରେ ଦୋଛକି ନିକଟରେ ଡିୟୁଟିରେ ଥିବା ରାଜେନ୍ଦ୍ର ପ୍ରଧାନ ଓ ତାଙ୍କ ସହିତ ଆଉ ତିନିଜଣ ହୋମଗାର୍ଡ ରହିଥିଲେ। ଆଇରନ ଗାଡି ଗୁଡିକ ଧାଡିରେ ଯିବା ବଦଳରେ ଦୃତଗତିରେ ଡାହାଣ ପଟେ ଯିବା ଆସିବା କରୁଥିବାରୁ , ଏହାକୁ ରୋକିବା ପାଇଁ ଏମାନଙ୍କୁ ଡିୟୁଟି ଦିଆଯାଇଥିଲା।
ତେବେ ବିଳମ୍ବିତ ରାତ୍ରିରେ ଧାଡି ଭାଙ୍ଗି ଯାଉଥିବା ଗୋଟିଏ ଆଇରନ ଟ୍ରକକୁ ରାଜେନ୍ଦ୍ର ଓ ତାଙ୍କ ସହଯୋଗୀ ଅଟକାଉଥିବା ବେଳେ, ଆଇରନ ଟ୍ରକ ଟି ରାଜେନ୍ଦ୍ରଙ୍କ ଉପରେ ଚଢି ଯାଇଥିଲା। ଘଟଣାସ୍ଥଳରେ ରାଜେନ୍ଦ୍ରଙ୍କ ମୃତ୍ୟୁ ଘଟିଥିବାବେଳେ ଟ୍ରକ ଓ ଡ୍ରାଇଭର ଫେରାର ହୋଇଯାଇଛନ୍ତି। ଯାହାକୁ ନେଇ ରାଜେନ୍ଦ୍ରଙ୍କ ପରିବାର ଓ ବାଲିଡିଆ ଗ୍ରାମବାସୀ ଦୋଛକି ନିକଟରେ ଟାୟାର ଜାଳି ରାସ୍ତା ଅବରୋଧ କରିଛନ୍ତି। ରାଜେନ୍ଦ୍ରଙ୍କ ସହିତ ଥିବା ଅନ୍ୟ ତିନିଜଣ ହୋମଗାର୍ଡ, ଟ୍ରକ, ଡ୍ରାଇଭର ଓ ଟ୍ରକ ମାଲିକକୁ ଡାକିବା ଦାବିରେ ଅଡି ବସିଛନ୍ତି ଗ୍ରାମବାସୀ।