କୋରାପୁଟ : କୋରାପୁଟ ଜିଲ୍ଲା ଜୟପୁର ବ୍ଲକ କୁମୁଲିପୁଟ ଗାଁରେ ଜଣେ ମିଲ ମାଲିକଙ୍କୁ ଅପହରଣ । ଗତକାଲି ସନ୍ଧ୍ୟା ଠାରୁ ଘରକୁ ଫେରିନାହାନ୍ତି ମିଲ ମାଲିକ । ଅପହରଣ ହୋଇଥିବା ମିଲ୍ ମାଲିକ ହେଲେ ଏ. ରାମେଶ ପାତ୍ର। ସେ ପେରାହାଣ୍ଡି SLVN ମୋଡେନ ରାଇସ ମିଲର ମାଲିକ। ଗତ କାଲି ରାତିରେ ପେରାହାଣ୍ଡି ମିଲରୁ ଘରକୁ ଫେରୁଥିବା ବେଳେ କିଛି ଦୁର୍ବୃତ୍ତ ତାଙ୍କ କାରକୁ ଅଟକାଇଥିଲେ। ପରେ କାର୍ କାଚ ଭାଙ୍ଗି ତାଙ୍କୁ ଅପହରଣ କରିଥିଲେ। ଅପହରଣର କାରଣ ଅସ୍ପଷ୍ଟ ଥିବା ବେଳେ, ଅପହରଣକାରୀମାନେ ଟଙ୍କା ମାଗୁଥିବା ଚର୍ଚ୍ଚା ହେଉଛି। ବୋରିଗୁମ୍ମା ଥାନାରେ ପରିବାର ଲୋକଙ୍କ ଏତଲା ଦେଇଥିବା ବେଳେ, ପୋଲିସ ଘଟଣାର ତଦନ୍ତ କରୁଛି।
ଗାଡ଼ି ଓଭର ଟେକିଂରୁ ଚାଲିଗଲା ହୋମଗାର୍ଡଙ୍କ ଜୀବନ
ପାରାଦ୍ଵୀପ : ଆଇରନ ଗାଡି ଓଭରଟେକିଙ୍ଗରୁ ଚାଲିଗଲା ଜଣେ ହୋମଗାର୍ଡଙ୍କ ଜୀବନ। ଏଭଳି ଏକ ସମ୍ବେଦନଶୀଳ ଘଟଣା ଘଟିଛି ପାରାଦ୍ଵୀପ ଦୋଛକି ନିକଟରେ। ଗତକାଲି ବିଳମ୍ବିତ ରାତ୍ରିରେ ଦୋଛକି ନିକଟରେ ଡିୟୁଟିରେ ଥିବା ରାଜେନ୍ଦ୍ର ପ୍ରଧାନ ଓ ତାଙ୍କ ସହିତ ଆଉ ତିନିଜଣ ହୋମଗାର୍ଡ ରହିଥିଲେ। ଆଇରନ ଗାଡି ଗୁଡିକ ଧାଡିରେ ଯିବା ବଦଳରେ ଦୃତଗତିରେ ଡାହାଣ ପଟେ ଯିବା ଆସିବା କରୁଥିବାରୁ , ଏହାକୁ ରୋକିବା ପାଇଁ ଏମାନଙ୍କୁ ଡିୟୁଟି ଦିଆଯାଇଥିଲା।
ତେବେ ବିଳମ୍ବିତ ରାତ୍ରିରେ ଧାଡି ଭାଙ୍ଗି ଯାଉଥିବା ଗୋଟିଏ ଆଇରନ ଟ୍ରକକୁ ରାଜେନ୍ଦ୍ର ଓ ତାଙ୍କ ସହଯୋଗୀ ଅଟକାଉଥିବା ବେଳେ, ଆଇରନ ଟ୍ରକ ଟି ରାଜେନ୍ଦ୍ରଙ୍କ ଉପରେ ଚଢି ଯାଇଥିଲା। ଘଟଣାସ୍ଥଳରେ ରାଜେନ୍ଦ୍ରଙ୍କ ମୃତ୍ୟୁ ଘଟିଥିବାବେଳେ ଟ୍ରକ ଓ ଡ୍ରାଇଭର ଫେରାର ହୋଇଯାଇଛନ୍ତି। ଯାହାକୁ ନେଇ ରାଜେନ୍ଦ୍ରଙ୍କ ପରିବାର ଓ ବାଲିଡିଆ ଗ୍ରାମବାସୀ ଦୋଛକି ନିକଟରେ ଟାୟାର ଜାଳି ରାସ୍ତା ଅବରୋଧ କରିଛନ୍ତି। ରାଜେନ୍ଦ୍ରଙ୍କ ସହିତ ଥିବା ଅନ୍ୟ ତିନିଜଣ ହୋମଗାର୍ଡ, ଟ୍ରକ, ଡ୍ରାଇଭର ଓ ଟ୍ରକ ମାଲିକକୁ ଡାକିବା ଦାବିରେ ଅଡି ବସିଛନ୍ତି ଗ୍ରାମବାସୀ।
ଟ୍ରକକୁ ପିଟିଲା ଯାତ୍ରୀବାହୀ; ଡ୍ରାଇଭର ସହ ୨ ଯାତ୍ରୀଙ୍କ ମୃତ୍ୟୁ, ୧୧ ଗୁରୁତର
ବାରିପଦା: ବାରିପଦା ସଦର ଥାନା ୧୮ ନମ୍ବର ଜାତୀୟ ରାଜପଥର ବୁଢ଼ିଖମାରୀ ଛକ ନିକଟରେ ମର୍ମନ୍ତୁଦ ସଡକ ଦୁର୍ଘଟଣା। ଟ୍ରକକୁ ପିଟିଲା ଯାତ୍ରୀ ବାହୀ ବସ। ଦୁର୍ଡ୍ରାଘଟଣାରେ ଡ୍ରାଇଭର ସମେତ ୩ ଜଣଙ୍କ ମୃତ୍ୟୁ ହୋଇଛି। ଏଥିସହ ଗୁରୁତର ଥିବା ୧୧ ଜଣ ଯାତ୍ରୀଙ୍କୁ ପଣ୍ଡିତ ରଘୁନାଥ ମୁର୍ମୁ ମେଡିକାଲ କଲେଜ ଓ ହସ୍ପିଟାଲରେ ଭର୍ତ୍ତି କରାଯାଇଛି। ବାରିପଦା ସଦର ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ହାଇଦ୍ରାବାଦରୁ ଗୟା ଯାଉଥିଲେ ସମସ୍ତ ଯାତ୍ରୀ। ବସରେ ୨୦ ଜଣ ଯାତ୍ରୀ ଓ ଜଣେ ଡ୍ରାଇଭର ଓ ହେଲ୍ପର ଥିଲେ। ମୃତ ବସ୍ ଡ୍ରାଇଭର ହାଇଦ୍ରାବାଦ ଚାରମିନାର ଅଞ୍ଚଳର ଉଦୟ ସିଂ। ହାଇଦ୍ରାବାଦରୁ ବାହାରି ଭୁବନେଶ୍ବର ଓ ବାଲେଶ୍ଵର ଦେଇ ତୀର୍ଥ କରିବାକୁ ଗୟା ଯିବା ବେଳେ, ଏହି ଦୁର୍ଘଟଣା ଘଟିଛି।
ମେଗାସେଲିବ୍ରେସନରେ ଅନନ୍ତ ୱେଡସ ରାଧିକା ୱେଡିଂ ସମ୍ପନ୍ନ, ଆଜି ଶୁଭ ଆଶୀର୍ବାଦ କାର୍ଯ୍ଯକ୍ରମ
ନୂଆଦିଲ୍ଲୀ : ରାଜକୀୟ ଥାଟରେ ସମ୍ପନ୍ନ ଅନନ୍ତ ଅମ୍ବାନି ଓ ରାଧିକା ମର୍ଚ୍ଚାଣ୍ଟଙ୍କ ବିବାହ ସମ୍ପନ୍ନ। ଆଜି ଶୁଭ ଆଶୀର୍ବାଦ କାର୍ଯ୍ଯକ୍ରମ ଓ ଆସନ୍ତାକାଲି ହେବ ମଙ୍ଗଳ ଉତ୍ସବ ଅର୍ଥାତ ରିସେପସନ। ଗତକାଲି ଅତି ଜାକଜକମ ସହ ହୋଇଥିଲା ମ୍ଯାରେଜ। ଉତ୍ସବରେ ସାମିଲ ହୋଇଥିଲେ ସହସ୍ରାଧିକ ଶିଳ୍ପପତି, ଅନ୍ତର୍ଜାତୀୟ ଓ ଜାତୀୟ ତାରକା। ମୁମ୍ବାଇ ଜିଓ ୱାର୍ଲଡ କନଭେନସନ ସେଣ୍ଟରରେ ଚାଲିଥିବା ବିବାହ ଉତ୍ସବ ସାରା ମୁମ୍ବାଇକୁ ଚମକାଇ ଦେଇଥିଲା। ଏହି ହାଇ ପ୍ରୋଫାଇଲ ମ୍ୟାରେଜ ସେରିମନି ପାଇଁ ୫ହଜାର କୋଟି ଖର୍ଚ୍ଚ ହେଉଛି।
ପ୍ରଥମେ ଜାମନଗରରେ ପ୍ରିୱେଡିଂ ସେଲିବ୍ରେସନ ହେବା ପରେ ଇଟାଲୀରେ ହୋଇଥିଲା ଦ୍ବିତୀୟ ପ୍ରିୱେଡିଂ ସେଲିବ୍ରେସନ। ଗତ ସପ୍ତାହଠାରୁ ଆରମ୍ଭ ହୋଇଥିଲା ନୀତା ମୁକେଶ ଅମ୍ବାନି କଲଚରାଲ ସେଣ୍ଟରରେ ରଙ୍ଗାରଙ୍ଗ ସଙ୍ଗୀତ ସେରିମନି। ଏହି ଉତ୍ସବରେ ସାମିଲ ହୋଇଛନ୍ତି ଶାହାରୁଖ ଖାଁ, ସଲମାନ ଖାଁ, ରଣବୀର ସିଂ, ଦୀପିକା ପାଦୁକୋନ, ଆମିର ଖାଁ, ଜାହ୍ନବୀ କପୁର, ଆଲିଆ ଭଟ୍ଟ, ଅନନ୍ଯା ପାଣ୍ଡେ, ରଣବୀର କପୁର, ଭିକ୍କି କୌଶଲ, କାଟ୍ରିନା କୈଫ, ଅମିତାଭ ବଚ୍ଚନ, ଐଶ୍ବର୍ଯ୍ୟା ରାୟ, ପ୍ରିୟଙ୍କା ଚୋପ୍ରା, ନିକ ଜୋନସ, କିମ କାର୍ଦସିଆନ, ହଲିଉଡ ଅଭିନେତା ଜନ ସେନା ପ୍ରମୁଖ।
୧୪ରେ ହେବ ମଙ୍ଗଳ ଉତ୍ସବ ଅର୍ଥାତ ରିସେପସନ। ଅନନ୍ତ ଓ ରାଧିକାଙ୍କ ବିବାହ ଚଳିତ ଦଶନ୍ଧିର ସବୁଠାରୁ ଚର୍ଚ୍ଚିତ ବିବାହ ବୋଲି କୁହାଯାଉଛି। ମୁକେଶ ଓ ନୀତାଙ୍କ ସାନପୁଅ ଅନନ୍ତଙ୍କ ସହ ତାଙ୍କର ପୁରୁଣା ବାନ୍ଧବୀ ତଥା ବୀରେନ ଓ ଶୈଳ ମର୍ଚ୍ଚାଣ୍ଟଙ୍କ କନ୍ଯା ରାଧିକାଙ୍କ ବିବାହ ଲାଗି ଗତ କିଛିମାସ ଧରି ସାରା ଦେଶରେ ଜାରି ରହିଛି ଚର୍ଚ୍ଚା। ଏହି ବିବାହରେ ଭାରତର ସମୃଦ୍ଧ ସଂଗୀତ ପରମ୍ପରା ସହିତ ଅତିଥିମାନଙ୍କୁ ପରିଚିତ କରାଯାଇଛି।
ବଢୁଛି ପ୍ରୋବେସନାରୀ ଆଇଏଏସ ଅଫିସର ପୂଜା ଖେଡକରଙ୍କ ଅଡୁଆ
ନୂଆଦିଲ୍ଲୀ : ବଢିବାରେ ଲାଗିଛି ପ୍ରୋବେସନାରୀ ଆଇଏଏସ ଅଫିସର ପୂଜା ଖେଡକରଙ୍କ ଅଡୁଆ । ତାଙ୍କ ବିରୋଧରେ ତଦନ୍ତ ଲାଗି କେନ୍ଦ୍ର ସରକାର ଗଠନ କରିଛନ୍ତି ଜଣେ ବରିଷ୍ଠ ଅଧିକାରୀଙ୍କ ନେତୃତ୍ବରେ ଜଣିକିଆ କମିଟି । ଆସନ୍ତା ଦୁଇ ସପ୍ତାହ ମଧ୍ଯରେ ଏହି କମିଟି ରିପୋର୍ଟ ଦେବ । ସର୍ବଭାରତୀୟ ରାଙ୍କ ୮୨୧ ରଖିଥିବା ଏହି ଅଧିକାରୀ ଏବେ ସାରା ଦେଶରେ ଚର୍ଚ୍ଚାରେ ଅଛନ୍ତି ।
ତେଣେ ଗତ ୨୦୨୩ରେ ପୂଜାଙ୍କ ମା ପୁଣେର ମୁଲସି ତହସିଲରେ ଜଣେ କୃଷକଙ୍କୁ ପିସ୍ତଲରେ ଧମକ ଦେଉଥିବାର ଭିଡିଓ ଭାଇରାଲ ହୋଇଛି । ଏକ ଜମି ବିବାଦକୁ ନେଇ ସେ ପିସ୍ତଲ ଦେଖାଉଥିବା ଭିଡିଓରେ ରହିଛି । ପୁଣେର ମୁଲସି ତହସିଲରେ ପୂଜାଙ୍କ ପରିବାର ୨୫ ଏକର ଜମି କ୍ରୟ କରିଥିଲେ । ପରେ ଏହାକୁ ନେଇ ବିବାଦ ଉପୁଜିଥିଲା । ପୂଜାଙ୍କ ନାମରେ ୨୨ କୋଟି ଟଙ୍କାର ସମ୍ପତ୍ତି ଅଛି ଏବଂ ତାଙ୍କ ନାମରେ ୨୧ଟି ଟ୍ରାଫିକ ଉଲ୍ଲଂଘନ ମାମଲା ପଡିଥିବା ସୂଚନା ମିଳିଛି। ସମ୍ପତ୍ତି ମଧ୍ଯରେ ରହିଛି ୫ଟି ପ୍ଲଟ ଓ ୨ଟି ଆପାର୍ଟମେଣ୍ଟ ।
୫ ଟଙ୍କା ୯୦ ପଇସାରେ ଗୁଣାତ୍ମକ ମଧ୍ୟାହ୍ନ ଭୋଜନ କେମିତି ଖାଇବେ ଛାତ୍ରଛାତ୍ରୀ ?
ଭୁବନେଶ୍ବର: ଆକାଶ ଛୁଆଁ ପରିବା ଓ ଡାଲି ଦର । ୭୦ ଟଙ୍କା ଉପରେ ପରିବା କେଜି । ଡାଲି କଥା ନକହିବା ଭଲ । ଆଉ ମଧ୍ୟହ୍ନ ଭୋଜନ ପାଇଁ ପିଲାଙ୍କ ମୁଣ୍ଡପିଛା ମିଳୁଛି ୫ ଯଙ୍କା ୯୦ ପଇସା । ଏହାରି ଭିତିରେ ପିଲାଙ୍କୁ ପୁଷ୍ଟିକର ଓ ଗୁଣଶତ୍ମକ ଖାଦ୍ୟ ଦେବାକୁ କହିଛନ୍ତି ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ । ଯାହାକୁ ନେଇ ଏବେ ଚର୍ଚ୍ଚା ଜୋର ଧରିଛି । ଗୋଟିଏ ସାଧାରଣ ମିଲର ଦାମ ଅତି କମରେ ୨୦ରୁ ୨୫ ଟଙ୍କା ତଳକୁ ହୋଇପାରିବ ନାହିଁ ବୋଲି କୁହାଯାଇଛି । ଅଭିଭାବକମାନଙ୍କଠାରୁ ଆରମ୍ଭ କରି ସ୍କୁଲର ପ୍ରଧାନଶିକ୍ଷକ, ଛାତ୍ର ସମସ୍ତେ ଦରଦାମ ବୃଦ୍ଧିର ବଡ଼ ପ୍ରଭାବ ମଧ୍ୟାହ୍ନ ଭୋଜନର ମାନ ଉପରେ ପଡିଥିବା କହିଛନ୍ତି । ତେଣୁ ଠିକ ଏଭଳି ସମୟରେ ମିଲର ଦର ନ ବଢ଼ାଇ ମନ୍ତ୍ରୀ ପୁଷ୍ଟିକର ଖାଦ୍ୟର କଥା କହିବାକୁ ନାପସନ୍ଦ କରାଯାଇଛି ।
ମଧ୍ଯାହ୍ନ ଭୋଜନର ମାନକୁ ନେଇ ସବୁବେଳେ ଅଭିଯୋଗ ହୋଇଆସୁଛି । ଏବେକାର କଥା ଆହୁରି ନିଆରା । ଏବେ ଚାଉଳ, ଡାଲିଠୁ ଆରମ୍ଭ କରି ପନିପରିବା ଦର ଆକାଶଛୁଆଁ । ଲୋକମାନେ ପନିପରିବା କିଣିବାକୁ ଡରୁଛନ୍ତି । ଏଭଳି ସମୟରେ ଛାତ୍ରଛାତ୍ରୀଙ୍କୁ ପୁଷ୍ଟିକର ମଧ୍ୟାହ୍ନ ଭୋଜନ ଦେବା ପାଇଁ କହିଛନ୍ତି ବିଦ୍ୟାଳୟ ଗଣଶିକ୍ଷା ମନ୍ତ୍ରୀ । ଅପପୁଷ୍ଟି ନିରାକରଣ ପାଇଁ ଏହାକୁ ଗୁରୁତ୍ୱ ଦେବାକୁ ସେ କହିଛନ୍ତି । ଗୁଣାତ୍ମକ ମଧ୍ୟାହ୍ନ ଭୋଜନ ପାଇଁ ପାଚିକା ଓ ସହାୟିକାମାନଙ୍କୁ ପ୍ରଶିକ୍ଷଣ ଦିଆଯାଉଥିବା ବେଳେ ମନ୍ତ୍ରୀ ସେମାନଙ୍କୁ ଏ କଥା କହିଛନ୍ତି । କିନ୍ତୁ ଏହାକୁ ନେଇ ପ୍ରଶ୍ନ ଉଠାଇଛି ଅଭିଭାବକ ମହାସଂଘ । ବର୍ତ୍ତମାନ ମାର୍କେଟ ଦର ଯାହା ଅଛି ଗୋଟିଏ ସର୍ବନିମ୍ନ ମିଲର ଦାମ ୨୦ରୁ ୨୫ ଟଙ୍କା ହେବ । ମାତ୍ର ୫ ଟଙ୍କା ୯୦ ପଇସାରେ କିଭଳି ଗୁଣାତ୍ମକ ଖାଦ୍ୟ ଦିଆଯାଇ ପାରିବ ବୋଲି ପ୍ରଶ୍ନ କରିଛି ଅଭିବାବକ ମହାସଂଘ । ପିଲାଙ୍କୁ ପୁଷ୍ଟିକର ଖାଦ୍ୟ ପ୍ରଦାନ ନିଷ୍ପତ୍ତି ସ୍ୱାଗତଯୋଗ୍ୟ, କିନ୍ତୁ ଏତିକି ଟଙ୍କାରେ କିଭଳି ପୁଷ୍ଟିକର ଖାଦ୍ୟ ଦିଆଯାଇପାରିବ ସେ ନେଇ ସରକାର ଚିନ୍ତା କରନ୍ତୁ ବୋଲି କୁହାଯାଇଛି । ସେହିପରି ମଧ୍ୟାହ୍ନ ଭୋଜନ ଷ୍ଟିୟରିଂ କମିଟିର ପୂର୍ବତନ ସଦସ୍ୟଙ୍କ କହିବା କଥା ଛାତ୍ରଛାତ୍ରୀଙ୍କୁ ଏତିକି ଟଙ୍କାରେ ପୁଷ୍ଟିକର ଖାଦ୍ୟ ଦେବା କଥା କହିବା ଆଦୌ ଗ୍ରହଣୀୟ ନୁହେଁ । ଏପରିକି ପାଚିକା ଓ ସହାୟିକାମାନେ ସର୍ବନିମ୍ନ ମଜୁରୀ ପାଉ ନଥିବାବେଳେ ସେମାନଙ୍କ ଦୁଃଖକୁ ମଧ୍ୟ ଧ୍ୟାନ ଦେବାକୁ ପରାମର୍ଶ ଦିଆଯାଇଛି ।
ସେପଟେ ବିଦ୍ୟାଳୟ ଗୁଡିକରେ ମଧ୍ୟାହ୍ନ ଭୋଜନ ଉପରେ ଦରଦାମ ବୃଦ୍ଧିର ପ୍ରଭାବ ପଡିଥିବା ଦେଖିବାକୁ ମିଳିଛି । ପୂର୍ବାପେକ୍ଷା ଭୋଜନର ଗୁଣାତ୍ମକ ମାନ କମିଛି ବୋଲି ସ୍କୁଲରେ ରୋଷେଇ କରୁଥିବା ପାଚିକା, ପ୍ରଧାନଶିକ୍ଷକ, ଛାତ୍ରଛାତ୍ରୀ ଓ ଅଭିଭାବକ ମାନେ କହିଛନ୍ତି । ଦରଦାମ କମିଲେ ପିଲାମାନେ ପନିପରିବା ଖାଆନ୍ତେ । ପିଲାଙ୍କୁ ପୋଷଣ ଆଉ ଭିଟାମିନ ମିଳନ୍ତା । ପରିବା ଦର ଆକାଶଛୁଆଁ ଯୋଗୁଁ ପନିପରିବା କିଣିବା କମୁଥିବାରୁ ଖାଦ୍ଯର ମାନ ମଧ୍ଯ କମୁଛି । ସେପଟେ ଅର୍ଥନୀତି ସମୀକ୍ଷକଙ୍କ କହିବା କଥା ଏତିକି ଟଙ୍କାରେ ପୁଷ୍ଟିକର ଖାଦ୍ୟ ଦେବା ଅସମ୍ଭବ । ତେଣୁ ସ୍କୁଲ ଗୁଡିକ ପିଲାଙ୍କ ଉପସ୍ଥାନକୁ ବଢ଼ାଇ କମ ମାନର ଖାଦ୍ୟ ଦେବାକୁ ବାଧ୍ୟ ହେଉଛନ୍ତି । ଯାହା ଫଳରେ ମିଛ ଉପସ୍ଥାନ ସଂଖ୍ୟା ବଢୁଥିବା ଅଭିଯୋଗ ହୋଇଛି ।
ପୂର୍ବରୁ ଦରଦାମ କମ ଥିବା ସମୟରେ ଏତିକି ଟଙ୍କାରେ ପିଲାଙ୍କୁ ନିମ୍ନମାନର ଖାଦ୍ୟ ମିଳୁଥିବା ଅଭିଯୋଗ ହେଉଥିବା ବେଳେ ଏବେ ଦର ଆକାଶଛୁଆଁ ହୋଇଥିବାରୁ ପୁଷ୍ଟିକର ଖାଦ୍ୟ କିଭଳି ସମ୍ଭବ ତାକୁ ନେଇ ପ୍ରଶ୍ନ ଉଠିଛି ।
ମହାନଦୀ ଉପରେ ଛତିଶଗଡ଼ର ଆଉ ଏକ ଭୟଙ୍କର ଷଡ଼ଯନ୍ତ୍ର, ବିପଦରେ ହୀରାକୁଦ
ଭୁବନେଶ୍ବର: ମହାନଦୀକୁ ନେଇ ଛତିଶଗଡ଼ର ଆଉ ଏକ ଭୟଙ୍କର ଖେଳ । ଉପରମୁଣ୍ଡରେ କଲମା ବ୍ୟାରେଜକୁ ଲାଗି ଆରମ୍ଭ କରିଛି ୨୦ରୁ ଅଧିକ ଜଳ ଯୋଗାଣ ପ୍ରକଳ୍ପ । ଯାହା ଓଡିଶାର ଜନ ଜୀବନ ମହାନଦୀ ଉପରେ ସୃଷ୍ଟଇ କରିବାକୁ ଯାଉଛି ଘୋର ବିପଦ । ମହାନଦୀ ଉପରେ ଓଡ଼ିଶାର ବି ଅଧିକାର ରହିଛି । ମହାନଦୀ ମାମଲା ଟ୍ରିବୁନାଲରେ ଚାଲିଛି । ହେଲେ ଏଥିପ୍ରତି ଛତିଶଗଡ଼ର ନାହିଁ ଖାତିର । ଉପରମୁଣ୍ଡରେ ଛତିଶଗଡ଼ର ଏପରି ଦାଦାଗିରିକୁ ବୁଦ୍ଧିଜୀବୀ ନାପସନ୍ଦ କରିଛନ୍ତି ।
ସାମ୍ନାକୁ ଆସିଲା ଛତିଶଗଡ଼ର ଆଉ ଏକ ଭୟଙ୍କର ଖେଳ । ଉପର ମୁଣ୍ଡରେ ୭୦୦ କୋଟି ଟଙ୍କାରେ ନିର୍ମାଣ ଚାଲିଛି ୨୦ରୁ ଅଧିକ ମେଗା ଜଳ ପ୍ରକଳ୍ପ । ସବୁ ପ୍ରକଳ୍ପ କାର୍ଯ୍ୟକାରୀ ହେଲେ ଘନେଇ ଆସିବ ହୀରାକୁଦ ପ୍ରତି ବିପଦ । ଅଣମୌସୁମୀ ସମୟରେ ଶୁଖିଯିବ ହୀରାକୁଦ । ପ୍ରଭାବିତ ହେବ ଜଳସେଚନ, ପାନୀୟ ଜଳ ପ୍ରକଳ୍ପ ଓ ଚାଷ । ମହାନଦୀ ଜଳ ବିବାଦ ଟ୍ରିବ୍ୟୁନାଲରେ ବିଚାରାଧୀନ ଥିବା ବେଳେ ଛତିଶଗଡ଼ର ମନମୁଖି କାର୍ଯ୍ୟଧାରାକୁ ନେଇ ସବୁଠି ଅସନ୍ତୋଷ । ଝାରୁସୁଗୁଡ଼ାରେ ଓଡ଼ିଶାକୁ ଲାଗି ମହାନଦୀର ଉପରେ ଥିବା କଲମା ବ୍ୟାରେଜ ପାଖରେ ଜଳ ଜୀବନ ମିଶନ ଅଧୀନରେ ୨୦ରୁ ଅଧିକ ମେଗା ପାଇପ ଜଳ ଯୋଗାଣ ପ୍ରକଳ୍ପ ନିର୍ମାଣ ଚାଲିଛି । ପଡ଼ୋଶୀ ଛତିଶଗଡ଼ର ଏପରି ଦାଦାଗିରିକୁ ସ୍ଥାନୀୟ ବାସିନ୍ଦା ନିନ୍ଦା କରିଥିବା ବେଳେ ଆପୋସ ସମାଧାନ ପାଇଁ ଉଭୟ ସରକାରଙ୍କୁ ଅନୁରୋଧ କରିଛନ୍ତି ।
୨୦୧୬ ପରେ ମହାନଦୀ ଉପରେ ଛତିଶଗଡ଼ ୧୨ରୁ ଅଧିକ ବ୍ୟାରେଜ କରିବା ବିଷୟ ସାମ୍ନାକୁ ଆସିବା ପରେ ଆରମ୍ଭ ହୋଇଥିଲା ବିବାଦ । ଆପୋସ ବୁଝାମଣା ନହେବାରୁ ମାମଲା ଯାଇଥିଲା କୋର୍ଟକୁ । ୨୦୧୮ରୁ ଟ୍ରିବ୍ୟୁନାଲରେ ମାମଲାର ବିଚାର ଚାଲିଥିଲେ ମଧ୍ୟ ଏଯାଏଁ କିଛି ବାଟ ବାହାରିନାହିଁ । ଏଭଳି ସ୍ଥିତିରେ ଛତିଶଗଡ଼ର ଏକପାଖିଆ ନିଷ୍ପତ୍ତିକୁ ବୁଦ୍ଧିଜୀବୀ ଓ ବିଶେଷଜ୍ଞ ସହଜରେ ଗ୍ରହଣ କରିପାରୁନାହାନ୍ତି । ପାନୀୟ ଜଳ ପ୍ରକଳ୍ପ ବାହାନାରେ ମହାନଦୀ ପାଣିକୁ ନିଜ କବଜାରେ ଛତିଶଗଡ଼ ରଖିବାକୁ ଚାହୁଁଥିବାରୁ ସମସ୍ୟା ବଢି ଚାଲିଛି । ଝାରସୁଗୁଡ଼ାରୁ ଜଗତସିଂହପୁର ଯାଏଁ ମହାନଦୀ କୂଳରେ ଥିବା ପ୍ରାୟ ୧୬ଟି ଜିଲ୍ଲାର ଲୋକେ ଭୀଷଣ ପ୍ରଭାବିତ ହେବେ । କେନ୍ଦ୍ର-ଛତିଶଗଡ଼-ଓଡ଼ିଶାରେ ବିଜେପିର ଟ୍ରିପଲ ଇଞ୍ଜିନ ସରକାର ଥିବାରୁ ସମସ୍ତେ ମିଳିମିଶି ମହାନଦୀ ବିବାଦର ସମାଧାନ ପାଇଁ ବାଟ ବାହାର କରିବାକୁ ବିଶେଷଜ୍ଞ ମତ ରଖିଛନ୍ତି ।
୨୦୧୮ରୁ ଆନ୍ତଃରାଜ୍ୟ ନଦୀ ବିବାଦର ସମାଧାନ ପାଇଁ ମହାନଦୀ ଟ୍ରିବ୍ୟୁନାଲ କାମ କରୁଥିଲେ ମଧ୍ୟ କେହି ଏଥିରେ ଅଧ୍ୟକ୍ଷ ନଥିବାରୁ ଏହା ସ୍ଥାଣୁ ହୋଇଛି । କୋର୍ଟଙ୍କ ଅନୁମତି ନେଇ କେନ୍ଦ୍ର ସରକାରଙ୍କ ନେତୃତ୍ବରେ ଉଭୟ ରାଜ୍ୟ ମହାନଦୀ ଜଳ ବଣ୍ଟନକୁ ନେଇ ପୁଣି ଥରେ ଆଲୋଚନା କରିବାର ସମୟ ଆସିଛି ।
ପ୍ରାକ୍ ବଜେଟ ଆଲୋଚନାରେ ଓଡ଼ିଶାକୁ ସ୍ବତନ୍ତ୍ର ପ୍ୟାକେଜ୍, କୋଇଲା ରୟାଲଟି ବୃଦ୍ଧି ପ୍ରସଙ୍ଗ
ଭୁବନେଶ୍ବର: ଓଡ଼ିଶାକୁ କେନ୍ଦ୍ର ଦେଉ ସ୍ବତନ୍ତ୍ର ପ୍ୟାକେଜ୍ । ଖଣି ରୟାଲଟି ବୃଦ୍ଧି କଲେ ରାଜସ୍ବ ସମ୍ବଳ ବୃଦ୍ଧି ହେବ । ଏହାସହ ସେସ୍ ଅର୍ଥରୁ ରାଜ୍ୟକୁ ମିଳୁ ଭାଗ । ରାଜ୍ୟ ବଜେଟ୍ ପ୍ରସ୍ତୁତି ନେଇ ପ୍ରାକ୍ ବଜେଟ୍ ଆଲୋଚନାରେ ମୁଖ୍ୟମନ୍ତ୍ରୀଙ୍କୁ ଏପରି ଦାବି କରିଛନ୍ତି ପୂର୍ବତନ ଅର୍ଥମନ୍ତ୍ରୀ ଓ ବିଶେଷଜ୍ଞ । ଏହାସହ ପନିପରିବା ଓ ଖାଦ୍ୟ ସାମଗ୍ରୀ ଦର ନିୟନ୍ତ୍ରଣ ପାଇଁ ଉତ୍ପାଦନ ବଢାଇବାକୁ ହୋଇଛି ଦାବି । ସେପଟେ ରାଜ୍ୟ ସରକାର ଏକ ଲୋକାଭିମୁଖୀ ବଜେଟ୍ ଆଗତ କରିବେ ବୋଲି ପ୍ରତିଶ୍ରୁତି ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ।
ସୁଭଦ୍ରା, ଏମ୍ଏସପି ଓ ଭତ୍ତା ବାବଦରେ ଖର୍ଚ୍ଚ ହେବ ପ୍ରାୟ ୬୬ ହଜାର କୋଟି ଟଙ୍କା । ରାଜ୍ୟର ଆର୍ଥିକ ସ୍ଥିତି ଭଲ ଅଛି । ତଥାପି ଅତିରିକ୍ତ ଖର୍ଚ୍ଚ ପାଇଁ ଆବଶ୍ୟକ ଅତିରିକ୍ତ ସମ୍ବଳ । ଏଥିପାଇଁ ଦୀର୍ଘ ବର୍ଷରୁ ଓଡ଼ିଶାର ଦାବି ମୁତାବକ ଖଣିଜ ଓ ଲଘୁ ଖଣିଜ ପଦାର୍ଥ ଉପରେ ରୟାଲଟି ବୃଦ୍ଧି କରାଯାଉ । ଆଜି ସଚିବାଳୟ କନଭେନସନ୍ ସେଣ୍ଟରରେ ୨୦୨୪-୨୫ ଆର୍ଥିକ ବର୍ଷ ପାଇଁ ଅନୁଷ୍ଠିତ ପ୍ରାକ୍ ବଜେଟ୍ ପରାମର୍ଶ ବୈଠକରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଆଗରେ ଏପରି ଦାବି ରଖିଛନ୍ତି ପୂର୍ବତନ ଅର୍ଥମନ୍ତ୍ରୀ ଓ ବିଶେଷଜ୍ଞ ।
ଡବଲ ଇଞ୍ଜିନ ସରକାର ଥିବାରୁ ଖଣି ରୟାଲଟି ବୃଦ୍ଧି ପାଇଁ କେନ୍ଦ୍ର ସରକାରଙ୍କ ପାଖରେ ଦାବି ରଖନ୍ତୁ ରାଜ୍ୟ ସରକାର । ପୂର୍ବ ସରକାର ସମୟରେ ରାଜ୍ୟର ଋଣଭାର ଅନ୍ୟ ରାଜ୍ୟ ତୁଳନାରେ ଯଥେଷ୍ଟ କମ୍ ରହିଛି । ତଥାପି ଓଡ଼ିଶାର ଆର୍ଥିକ ଅଭିବୃଦ୍ଧି ପାଇଁ କେନ୍ଦ୍ର ସରକାର ସ୍ବତନ୍ତ୍ର ରାଜ୍ୟ ପାହ୍ୟା ଓ କିମ୍ବା ସ୍ବତନ୍ତ୍ର ଆର୍ଥିକ ପ୍ୟାକେଜ୍ ଦେବାକୁ ଜୋରଦାର ଦାବି ଉଠିଛି । ଏହାସହ ଖାଦ୍ୟ ସାମଗ୍ରୀ ଦର ନିୟନ୍ତ୍ରଣ ପାଇଁ କୃଷି ଉତ୍ପାଦନ ବୃଦ୍ଧି ଉପରେ ଜୋର ଦିଆଯାଇଛି ।
ମୋହନ ସରକାରଙ୍କ ପ୍ରଥମ ବଜେଟ୍ । ବଜେଟ୍କୁ ନେଇ ସାଧାରଣ ଲୋକଙ୍କଠାରୁ ୧୨ ହଜାର ଉପାଦେୟ ମତ ମିଳିଛି । ଏହାସହ ପ୍ରାକ୍ ବଜେଟ୍ ଆଲୋଚନାରେ ଶିଳ୍ପ, ଆରବିଆଇ, ଏନଜିଓ, ମଜଦୁର ସଂଘ, ଶିଳ୍ପ ସଂଘ, ବ୍ୟବସାୟୀ ମହାସଂଘର ପ୍ରାୟ ଦେଢ଼ଶହ ପ୍ରତିନିଧି ଯୋଗଦେଇ ବହୁ ଗୁରୁତ୍ବପୂର୍ଣ୍ଣ ମତ ଦେଇଛନ୍ତି । ଏ ସମସ୍ତ ମତ ଉପରେ ସରକାର ବିଚାର କରି ବଜେଟରେ ସ୍ଥାନ ଦେବେ । ସବୁବର୍ଗର ଲୋକଙ୍କ ଆଶା ଆକାଂକ୍ଷା ଯେପରି ପୂରା ହେବ ସେ ନେଇ ବଜେଟରେ ବ୍ୟୟ ବରାଦ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି ମୁଖ୍ୟମନ୍ତ୍ରୀ ।
ପୂର୍ବ ସରକାର ଚଳିତ ଆର୍ଥିକ ବର୍ଷ ପାଇଁ ୨ ଲକ୍ଷ ୫୫ ହଜାର କୋଟିର ବଜେଟ୍ ଦେଇଥିଲେ । ଆସନ୍ତା ୨୫ ତାରିଖରେ ପୂର୍ଣ୍ଣାଙ୍ଗ ବଜେଟ୍ ଆଗତ କରିବେ ରାଜ୍ୟର ନୂଆ ସରକାର । ବଜେଟ୍ ଆକାର ପ୍ରାୟ ୨ ଲକ୍ଷ ୭୦ ହଜାର କୋଟିରୁ ଅଧିକ ହେବ ବୋଲି ଆଶା କରାଯାଉଛି ।
ରବିବାର ଖୋଲିବ ତ ରତ୍ନଭଣ୍ଡାର, ଏସଓପିକୁ ନେଇ ବିରୋଧୀ ପଚାରିଲେ ପ୍ରଶ୍ନ
ଭୁବନେଶ୍ବର: ରତ୍ନଭଣ୍ଡାର ଖୋଲିବାକୁ ମଝିରେ ରହିଲା ଆଉ ମାତ୍ର ଗୋଟିଏ ଦିନ । ଆସନ୍ତା ରବିବାର ରତ୍ନ ଭଣ୍ଡାର ଖୋଲିବାକୁ ହୋଇଛି ନିଷ୍ପତ୍ତି । କିନ୍ତୁ ଏଯାଏଁ ରାଜ୍ଯ ସରକାର ଏସଓପି ଆଣି ପାରି ନାହାନ୍ତି । ଯଦି ରବିବାର ରତ୍ନଭଣ୍ଡାର ଖୋଲାଯାଏ ତେବେ ଆସନ୍ତାକାଲି ସୁଦ୍ଧା ଆଣିବାକୁ ପଡ଼ିବ ଏସଓପି । ସେପଟେ ବିରୋଧୀ ଏହାକୁ ନେଇ ରାଜ୍ୟ ସରକାରଙ୍କ ଉପରେ ପ୍ରଶ୍ନବାଣ ଛାଡ଼ିଥିବା ବେଳେ ରତ୍ନଭଣ୍ଡାର ଚାବି ଓ ଏସଓପିକୁ ନେଇ ସରକାରଙ୍କୁ ମାଗିଛନ୍ତି ସ୍ପଷ୍ଟୀକରଣ ।
୧୪ ତାରିଖରେ ରତ୍ନଭଣ୍ଡାର ଖୋଲିବାକୁ ନିଷ୍ପତ୍ତି ହୋଇଛି । ହେଲେ ୧୪ରେ ଖୋଲିବ ତ ମହାପ୍ରଭୁଙ୍କ ରତ୍ନଭଣ୍ଡାର ? କାରଣ ରତ୍ନଭଣ୍ଡାର ଖୋଲିବାକୁ ଏସଓପି ଆଣିବେ ବୋଲି କହିଥିଲେ ରାଜ୍ୟ ସରକାର । ହାତରେ ଆଉ ଗୋଟିଏ ଦିନ ଥିବା ବେଳେ ଏପର୍ଯ୍ୟନ୍ତ ସରକାର ଆଣି ପାରିଲେନି ଏସଓପି । ଏମିତି ସ୍ଥିତିରେ ଆସନ୍ତାକାଲି ମଧ୍ୟରେ ଏସଓପି ଆଣିବାକୁ ଅଣ୍ଟା ଭିଡ଼ିଛି ଆଇନ ବିଭାଗ ।
ଆଇନଗତ ଓ ବିଭିନ୍ନ ଦିଗ ଉପରେ ତର୍ଜମା ଚାଲିଥିବା ଆଇନମନ୍ତ୍ରୀ ପୃଥ୍ବୀରାଜ ହରିଚନ୍ଦନ କହିବା ପରେ ଏହାକୁ ନେଇ ଆରମ୍ଭ ହୋଇଛି ରାଜନୈତିକ ବୟାନବାଜି । ବରିଷ୍ଠ ବିଜେଡ଼ି ବିଧାୟକ ଅମର ପ୍ରସାଦ ଶତପଥୀ କହିଛନ୍ତି, ଏପର୍ଯ୍ୟନ୍ତ ରତ୍ନଭଣ୍ଡାର ଚାବି ପ୍ରସଙ୍ଗ ରହସ୍ୟ ଘେରରେ ରହିଛି । ସରକାର ଚାବି ସମ୍ପର୍କରେ ସ୍ପଷ୍ଟତା ଆଣିବା ଦରକାର । ଡୁପ୍ଲିକେଟ ଚାବିରେ ରତ୍ନଭଣ୍ଡାର ଖୋଲାଯିବ କି ଅସଲି ଚାବିରେ ଖୋଲାଯିବ, ତାହା ସରକାର ସ୍ପଷ୍ଟ କରନ୍ତୁ । ଏସଓପିରେ କ’ଣ ରହିଛି ତାହା ବି ପ୍ରକାଶ କରନ୍ତୁ । ରଘୁବର ଦାସ କମିଶନଙ୍କ ରିପୋର୍ଟ ସାର୍ବଜନୀନ ହେବା ଆବଶ୍ୟକ । ବିରୋଧୀ ଆସନରେ ଥିବା ବେଳେ ବିଜେପି ଏହି ସବୁ ଦାବି କରୁଥିଲା । ଏବେ କ୍ଷମତାକୁ ଆସିଥିବାରୁ ଯେଉଁ ଦାବି ସେମାନେ ଉଠାଉଥିଲେ, ତାହା ପୂରଣ କରନ୍ତୁ ବୋଲି ଅମର କହିଛନ୍ତି ।
ସେପଟେ ଆଡ଼ପ ମଣ୍ଡପ ବିଜେ ସମୟରେ ବଡ଼ ଠାକୁର ବଳଭଦ୍ର ପଡ଼ିଯିବାରୁ ଏହାକୁ ନେଇ ବଢ଼ିବାରେ ଲାଗିଛି ଅସନ୍ତୋଷ । ଏହି ଅଭାବନୀୟ ଘଟଣା ସମସ୍ତ ଜଗନ୍ନାଥ ପ୍ରେମୀଙ୍କୁ ଆଘାତ ଦେଇଛି । ଏହି ଘଟଣାରେ ରାଜ୍ୟ ସରକାର କଠୋର ପଦକ୍ଷେପ ନିଅନ୍ତୁ ବୋଲି ଦାବି କରିଛି କଂଗ୍ରେସ । ରତ୍ନଭଣ୍ଡାର ଖୋଲିବା ପ୍ରସଙ୍ଗରେ ବି ଅନେକ ପ୍ରଶ୍ନ କରିଛି ଦଳ । ଆଇନମନ୍ତ୍ରୀ କହିଛନ୍ତି, ବଡ଼ ଠାକୁର ତଳେ ପଡ଼ିବା ଘଟଣାରେ ପ୍ରାଥମିକ ପଦକ୍ଷେପ ନିଆଯାଇଛି । ତଦନ୍ତ ପରେ କାର୍ଯ୍ୟାନୁଷ୍ଠାନ ନିଆଯିବ ।
ରତ୍ନଭଣ୍ଡାର ଖୋଲିବା ଏବେ ରାଜ୍ଯର ଏକ ପ୍ରମୁଖ ପ୍ରସଙ୍ଗ ପାଲଟିଛି । ପୂର୍ବ ସରକାରଙ୍କ କମିଟି ଭାଙ୍ଗି ନୂଆ କମିଟି ଗଠନ କରିଛନ୍ତି ବର୍ତ୍ତମାନର ବିଜେପି ସରକାର । ଏହାକୁ ନେଇ ରାଜନୈତିକ ଗନ୍ଧ ବାରିଛି ବିଜେଡି ।
ନୂଆ ଶ୍ରୀମନ୍ଦିର ମୁଖ୍ଯ ପ୍ରଶାସକଙ୍କ କଡ଼ା ଆଭିମୁଖ୍ଯ; ସେବାୟତଙ୍କ ପାଇଁ କଟକଣା, ନମାନିଲେ ଆକ୍ସନ
ପୁରୀ: ପହଣ୍ଡି ସମୟରେ ଚାରମାଳ ଉପରେ ବଡ଼ ଠାକୁର ବଳଦେବ ପଡିଯିବା ଘଟଣା ପରେ ବଦଳିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ । ନୂଆ ପ୍ରଶାସକ ଭାବେ ଦାୟିତ୍ବ ନେଇଛନ୍ତି ଡକ୍ତର ଅରବିନ୍ଦ ପାଢୀ । ଆଉ ଦାୟିତ୍ବ ନେଉ ନେଉ ବଳଭଦ୍ର ପଡ଼ିଯିବା ଘଟଣାକୁ ନେଇ ଗ୍ରହଣ କରିଛନ୍ତି କଡା ଆଭିମୁଖ୍ୟ । ରଥ ଉପରେ ସେବାୟତଙ୍କ ପାଇଁ ଜାରି କରିଛନ୍ତି କଟକଣା । ବରିଷ୍ଠ ସେବାୟତମାନେ ବି ଏହି ଘଟଣାରେ ଦୁଃଖ ପ୍ରକାଶ କରିଥିବାବେଳେ ଶାସ୍ତ୍ରୀୟ ବିଧି ଅନୁଯାୟୀ ପ୍ରାୟଶ୍ଚିତ କରିବାକୁ ପରାମର୍ଶ ଦେଇଛନ୍ତି ମୁକ୍ତିମଣ୍ଡପ ପଣ୍ଡିତ ସଭା ସଦସ୍ୟ ପଣ୍ଡିତ ବିଶ୍ବମ୍ବର ଦାଶ ।
ରଥ ଉପରକୁ ଯିବନି ଫୋନ, ଉଠିବନି ସେଲଫି । ସେବା ନଥିଲେ ସେବାୟତଙ୍କୁ ରଥ ଚଢ଼ିବା ମନା । ରଥ ଉପରେ ବଡ ଠାକୁର ପଡ଼ିବା ପରେ କଠୋର ହୋଇଛି ଶ୍ରୀମନ୍ଦିର ପ୍ରଶାସନ । ରଥ ଉପରେ ଫଟୋ ଓ ସେଲଫି ନେବା ଉପରେ ଲାଗାଇଛି କଟକଣା । ଅନଧିକାର ପ୍ରବେଶ କଲେ ହେବ କାର୍ଯ୍ୟାନୁଷ୍ଠାନ ।
ଆଡପ ପହଣ୍ଡି ସମୟରେ ଅଘଟଣ ପରେ ସରକାରଙ୍କ ଚେତା ପଶିଛି । ବଦଳିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ଓ ଦାୟିତ୍ବ ନେଇଛନ୍ତି ନୂଆ ପ୍ରଶାସକ ଡକ୍ତର ଅରବିନ୍ଦ ପାଢୀ । ଆଉ ଚେତାଇ ଦେଇଛନ୍ତି, ମହାପ୍ରଭୁଙ୍କ ସେବାରେ ଅବ୍ୟବସ୍ଥାକୁ କରାଯିବନି ବରଦାସ୍ତ । ରଥ ଉପରେ ଅଣସେବାୟତ ରହିଲେ କାର୍ଯ୍ୟାନୁଷ୍ଠାନ ହେବ ବୋଲି ଚେତାଇ ଦେଇଛନ୍ତି ନୂଆ ପ୍ରଶାସକ । ରଥ ଉପରେ ରହୁଥିବା ସେବାୟତମାନେ ଫଟୋ ଓ ସେଲଫି ନେଇପାରିବେ ନାହିଁ । ଏପରିକି ମହାପ୍ରଭୁଙ୍କ ଆଗରେ କୌଣସି ସେବାୟତ ରହିପାରିବେ ନାହିଁ । ଆଗକୁ ବାହୁଡା, ସୁନାବେଶ, ଅଧରପଣା ଓ ନିଳାଦ୍ରୀ ବିଜେ ନୀତିକାନ୍ତିକୁ ଶୃଙ୍ଖଳିତ କରିବାକୁ ସବୁ ନିଯୋଗ ସହ ଆଲୋଚନା କରାଯିବ ବୋଲି କହିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ।
ଏପଟେ ଆଡପ ପହଣ୍ଡି ଅଘଟଣ ନେଇ ବରିଷ୍ଠ ସେବାୟତମାନେ ଦୁଃଖ ପ୍ରକାଶ କରିଛନ୍ତି । ସମନ୍ୱୟ ଅଭାବରୁ ଏଭଳି ଏକ ଅଭାବନୀୟ ଘଟଣା ଘଟିଛି ବୋଲି କହିଛନ୍ତି ବରିଷ୍ଠ ସେବାୟତ ରଘୁନାଥ ଗୋଛିକାର l ସେ କହିଛନ୍ତି, ଆଗାମୀ ଦିନରେ ଅଘଟଣର କିପରି ପୁନରାବୃତ୍ତି ହେବ ନାହିଁ ସେଥିପାଇଁ ସମସ୍ତେ ଯତ୍ନବାନ ରହିବୁ । ସେପଟେ ମୁକ୍ତିମଣ୍ଡପ ପଣ୍ଡିତ ସଭା ସଦସ୍ୟ ପଣ୍ଡିତ ବିଶ୍ବମ୍ବର ଦାଶ କହିଛନ୍ତି, ବିଧିବିଧାନ ଅନୁଯାୟୀ ପ୍ରାୟଶ୍ଚିତ କରିବାକୁ ପଡ଼ିବ । ସମସ୍ତଙ୍କ ମଙ୍ଗଳ ପାଇଁ ଏକ ଲକ୍ଷ ପଚିଶ ହଜାର ଜପ ସହ ହୋମ, ତର୍ପଣ, ମାର୍ଜନ କରିବାକୁ ସେ ପରାମର୍ଶ ଦେଇଛନ୍ତି ।