ନନ୍ଦିଘୋଷ ବ୍ୟୁରୋ: କାନ୍ଥ ପଡି ଶ୍ରମିକ ଦମ୍ପତ୍ତିଙ୍କ ମୃତ୍ଯୁ । ଏଭଳି ଅଭାବନୀୟ ଘଟଣା ଘଟିଛି ସୁବର୍ଣ୍ଣପୁର ଜିଲ୍ଲା ସୋନପୁରରେ। ସୂଚନା ଅନୁସାରେ ଜଣେ ସ୍ଥାନୀୟ ଲୋକେ ନିଜ ଘର ନିକଟରେ ବାଡ ଦେବାପାଇଁ ଶ୍ରମିକଙ୍କୁ ନେଇ ଗାତ ଖୋଳୁଥିଲେ। ନିକଟରେ ଥିବା ପୁରୁଣା କାନ୍ଥଟି ଢଳି ପଡି ଦୁଇଜଣ ଶ୍ରମିକ ପୋତି ହୋଇ ଯାଇଥିଲେ। ତୁରନ୍ତ ଦମକଳବାହିନୀ ଖବର ପାଇ ଉଭୟଙ୍କୁ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲା। ଡାକ୍ତର ସେଠାରେ ଦମ୍ପତିଙ୍କୁ ମୃତ ଘୋଷଣା କରିଥିଲେ। ୨ ମୃତକ ହେଲେ ବୀରମହାରାଜପୁର ବଡ଼ଖମାର ଗାଁର ଦୂର୍ଲଭା ମିର୍ଦ୍ଧା ଓ ମୁନୁ ମିର୍ଦ୍ଧା। ଖବର ପାଇ ବୀରମହାରାଜପୁର ବିଧାୟକ ରଘୁନାଥ ଜଗଦଲ ପହଞ୍ଚି ମୃତକଙ୍କ ପରିବାରଙ୍କୁ ଭେଟି ସମବେଦନା ଜଣାଇଛନ୍ତି ।
ଜିଏସଟି କ୍ଷେତ୍ରରେ ରିହାତି ଦେବା ଲାଗି ଜିଏସଟି ପରିଷଦ ବୈଠକରେ ଆଲୋଚନା
ନନ୍ଦିଘୋଷ ବ୍ୟୁରୋ: କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଅଧ୍ଯକ୍ଷତାରେ ଜିଏସଟି ପରିଷଦ ବୈଠକ। ବ୍ଯବସାୟୀମାନଙ୍କୁ ଜିଏସଟି କ୍ଷେତ୍ରରେ ରିହାତି ଦେବା ଲାଗି ବୈଠକରେ ଆଲୋଚନା ହୋଇଥିବା ସୂଚନା ମିଳିଛି। ଜିଏସଟି ରିଟର୍ଣ୍ଣ ଫାଇଲିଂରେ ପରିବର୍ତ୍ତନ କିମ୍ବା ଯୋଗ ଲାଗି ଆସିଥିବା ପ୍ରସ୍ତାବ ସମ୍ପର୍କରେ ବି ବିଚାର କରାଯାଇଛି। ବୈଠକରେ ବିଭିନ୍ନ ରାଜ୍ଯର ଅର୍ଥମନ୍ତ୍ରୀ ଯୋଗଦେଇଥିଲେ। ପ୍ରଥମ ଥର ଲାଗି ଜିଏସଟି ରେଜିଷ୍ଟ୍ରେସନ ଲାଗି ଆଧାର ବାୟୋମେଟ୍ରିକ ଅଥେନଟିକେସନ ବ୍ଯବସ୍ଥା ଲାଗୁ ହେବା ଲାଗି ପଦକ୍ଷେପ ନିଆଯିବା ସମ୍ଭାବନା ରହିଛି। ଏହା ସହ ଦେଶରେ ଅନଲାଇନ ଗେମିଂ ଶିଳ୍ପ ଲାଗି କେନ୍ଦ୍ର ଅର୍ଥ ମନ୍ତ୍ରାଳୟ ପକ୍ଷରୁ କେନ୍ଦ୍ରୀୟ ସାମଗ୍ରୀ ଓ ସେବା କର ବା ସିଜିଏସଟି ଆଇନ, ୨୦୧୭କୁ ସଂଶୋଧନ ଲାଗି ପ୍ରସ୍ତାବ ଅଣାଯିବା ସମ୍ଭାବନା ରହିଛି। ଯଦି ଏହି ପ୍ରସ୍ତାବ ଗୃହୀତ ହୁଏ ତେବେ ଇ-ଗେମିଂ, କାସିନୋ, ହର୍ଷ ରେସିଂ ଆଦି କ୍ଷେତ୍ରରେ ୨୮ ପ୍ରତିଶତ ଜିଏସଟି ଆଦାୟ କରାଯାଇ ନପାରେ। ସେହିପରି ଭାରତର ପ୍ରତିଯୋଗିତା କମିଶନ ବା ସିସିଆଇକୁ ଅଧିକ ଶକ୍ତିଶାଳୀ କରିବା ଲାଗି ପଦକ୍ଷେପ ଗ୍ରହଣ କରାଯାଇପାରେ। ଜିଏସଟି ଆପେଲେଟ ଟ୍ରିବ୍ଯୁନାଲ ବା ଜିଏସଟିଏଟି, ହାଇକୋର୍ଟ, ସୁପ୍ରିମକୋର୍ଟ ଦ୍ବାରା ଗ୍ରହଣ କରାଯାଉଥିବା ମାମଲାଗୁଡିକରେ ଆର୍ଥିକ ସୀମା ନିର୍ଦ୍ଧାରଣ କରିବା ଲାଗି ମଧ୍ଯ ପରିଷଦରେ ଆଲୋଚନା କରାଯିବ। ଜିଏସଟିଏଟି ଲାଗି ସର୍ବାଧିକ ମନିଟାରୀ ଲିମିଟ ୨୦ ଲକ୍ଷ, ହାଇକୋର୍ଟଗୁଡିକ ଲାଗି ସର୍ବାଧିକ ୧ କୋଟି ଓ ସୁପ୍ରିମକୋର୍ଟ ଲାଗି ସର୍ବାଧିକ ୨ କୋଟି ଟଙ୍କାର ସୀମା ନିର୍ଦ୍ଧାରଣ ଲାଗି ଲ କମିଟି ଯେଉଁ ପ୍ରସ୍ତାବ ଦେଇଥିଲା ସେ ସମ୍ପର୍କରେ ନିଷ୍ପତ୍ତି ନିଆଯାଇପାରେ।
ଜଗନ ସାମ୍ରାଜ୍ଯ ଉପରେ ଟିଡିପିର ବୁଲଡୋଜର, ମାଟିରେ ମିଶିଲା ୱାଇଏସଆର କଂଗ୍ରେସର ନିର୍ମାଣାଧୀନ କେନ୍ଦ୍ରୀୟ କାର୍ଯ୍ୟାଳୟ
ନନ୍ଦିଘୋଷ ବ୍ୟୁରୋ: ଜଗନ ସାମ୍ରାଜ୍ଯ ଉପରେ ଟିଡିପିର ବୁଲଡୋଜର। ଆନ୍ଧ୍ରପ୍ରଦେଶ ଗୁଣ୍ଟୁରର ତାଡେପାଲ୍ଲିସ୍ଥିତ ୱାଇଏସଆର କଂଗ୍ରେସ ପାର୍ଟିର ନିର୍ମାଣାଧୀନ କେନ୍ଦ୍ରୀୟ କାର୍ଯ୍ୟାଳୟକୁ ଭାଙ୍ଗିଦିଆଯାଇଛି। ମ୍ଯୁନିସପାଲିଟି କର୍ତ୍ତୃପକ୍ଷ ଦ୍ବାରା ଏହି ଅର୍ଦ୍ଧନିର୍ମିତ କୋଠାକୁ ଭାଙ୍ଗିଦିଆଯାଇଛି। ଆଜି ଭୋରରୁ ସେଠାରେ ମଙ୍ଗଳଗିରି-ତାଡେପାଲ୍ଲି ମ୍ଯୁନିସିପାଲ କର୍ପୋରେସନ ବା ଏମଟିଏମସି ପକ୍ଷରୁ ବୁଲଡୋଜରରେ ଭଙ୍ଗା କାର୍ଯ୍ୟ ଆରମ୍ଭ ହୋଇଥିଲା। ସେଠାରେ ବେଆଇନ କାର୍ଯ୍ୟ ଜରିଆରେ କୋଠା ନିର୍ମାଣ କରାଯାଉଥିଲା ବୋଲି ପୂର୍ବରୁ ୱାଇଏସଆରସିପିକୁ ନୋଟିସ ଜାରି କରିଥିଲା କ୍ଯାପିଟାଲ ରିଜନ ଡେଭଲେପମେଣ୍ଟ ଅଥରିଟି ବା ସିଆରଡିଏ। ଏହି ନୋଟିସକୁ ବିରୋଧ କରି ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲା ଦଳ। ମ୍ଯୁନିସିପାଲଟି ପକ୍ଷରୁ ଅଭିଯୋଗ କରାଯାଇଛି- ଜଳସେଚନ ବିଭାଗ ଜମିରେ ୱାଇଏସଆରସିପି ପକ୍ଷରୁ କୋଠା ନିର୍ମାଣ କରାଯାଉଛି।
ଉପନିର୍ବାଚନରେ ପ୍ରିୟଙ୍କାଙ୍କ ପାଇଁ ପ୍ରଚାର କରିପାରନ୍ତି ମମତା ବାନାର୍ଜୀ
ନନ୍ଦିଘୋଷ ବ୍ୟୁରୋ: କେରଳର ୱାୟନାଡରୁ ଇଲେକ୍ସନ ଡେବ୍ଯୁ କରିବେ ରାଜୀବ ତନୟା ପ୍ରିୟଙ୍କା ଗାନ୍ଧି ଭଦ୍ରା । ଜୀବନର ପ୍ରଥମଥର ପାଇଁ ନିର୍ବାଚନ ଲଢ଼ିବାକୁ ଯାଉଛନ୍ତି କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧି ଭଦ୍ରା। ଏଠାରେ ହେବାକୁ ଥିବା ଉପନିର୍ବାଚନରେ ପ୍ରିୟଙ୍କାଙ୍କ ପାଇଁ ପ୍ରଚାର କରିପାରନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ। ପ୍ରଚାର ପାଇଁ କଂଗ୍ରେସ ପକ୍ଷରୁ ମମତାଙ୍କୁ ଅନୁରୋଧ କରାଯାଇଥିଲା। ସବୁ ବିବାଦକୁ ଭୁଲି କଂଗ୍ରେସ ଓ ପ୍ରିୟଙ୍କାଙ୍କ ପାଇଁ ମମତା ପ୍ରଚାର କରିବାକୁ ରାଜି ହୋଇଥିବା ଜଣାପଡ଼ିଛି।
ଗତ ସାଧାରଣ ନିର୍ବାଚନରେ ପ୍ରିୟଙ୍କା ବାରାଣସୀରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିରୋଧରେ ପ୍ରାର୍ଥୀ ହୁଅନ୍ତୁ ବୋଲି ପ୍ରଥମେ ମମତା ହିଁ ପ୍ରସ୍ତାବ ଦେଇଥିଲେ। ପଞ୍ଚିମବଙ୍ଗରେ କଂଗ୍ରେସ ଓ ଟିଏମସି ପୃଥକ ପୃଥକ ଭାବେ ନିର୍ବାଚନ ଲଢ଼ିଥିଲେ। ହେଲେ ମମତା ଇଣ୍ଡିଆ ମେଣ୍ଟକୁ ରାଜ୍ୟ ବାହାରେ ସମର୍ଥନ କରିଥିଲେ। ଗତକାଲି ବରିଷ୍ଠ କଂଗ୍ରେସ ନେତା ପି. ଚଦାମ୍ବରମ ପଞ୍ଚିମବଙ୍ଗ ଯାଇ ମମତା ବାନାର୍ଜୀଙ୍କୁ ଭେଟିଥିଲେ। ଉଭୟଙ୍କ ମଧ୍ୟରେ ଦୀର୍ଘ ସମୟ ଧରି ଆଲୋଚନା ପରେ ପ୍ରିୟଙ୍କାଙ୍କ ପାଇଁ ପ୍ରଚାର କରିବାକୁ ମମତା ବାନାର୍ଜୀ ରାଜି ହୋଇଥିବା ଜଣାପଡିଛି। ସାଧାରଣ ନିର୍ବାଚନରେ ୱାୟନାଡରୁ ରାହୁଲ ଗାନ୍ଧି ବିଜୟୀ ହୋଇଥିଲେ। ଏଥିସହ ସେ ରାଏବରେଲୀରୁ ମଧ୍ୟ ଜିତିଥିଲେ।
ଦୁଇଟି ଆସନରେ ଜିତିଥିବାରୁ ବାଧ୍ୟ ହୋଇ ୱାୟନାଡ ତାଙ୍କୁ ଛାଡ଼ିବାକୁ ପଡ଼ିଛି। ଓ୍ବାୟନାଡ଼ରେ ରାହୁଲ ଗାନ୍ଧି ନିଜର ନିକଟତମ ପ୍ରତିଦ୍ବନ୍ଦୀ ତଥା ସିପିଆଇ ପ୍ରାର୍ଥୀ ଆନ୍ନି ରାଜାଙ୍କୁ ପରାସ୍ତ କରିଥିଲେ। ଏଠାରେ ବିଜେପି ପ୍ରାର୍ଥୀ କେ. ସୁରେନ୍ଦ୍ରନଙ୍କୁ ତୃତୀୟ ସ୍ଥାନରେ ରହିବାକୁ ପଡ଼ିଥିଲା। ରାହୁଲ ଗାନ୍ଧିଙ୍କୁ ୬ ଲକ୍ଷ ୪୭ ହଜାର ୪୪୫ ଖଣ୍ଡ ଭୋଟ ମିଳିଥିବା ବେଳେ, ଆନ୍ନି ରାଜାଙ୍କୁ ୨ ଲକ୍ଷ ୮୩ ହଜାର ୨୩ ଖଣ୍ଡ ଓ ବିଜେପି ପ୍ରାର୍ଥୀ କେ. ସୁରେନ୍ଦ୍ରନଙ୍କୁ ୧ ଲକ୍ଷ ୪୧ ହଜାର ୪୫ ଖଣ୍ଡ ଭୋଟ ମିଳିଥିଲା। ରାହୁଲ ଆସନ ଛାଡ଼ିଥିବାରୁ ଏଠାରେ ଉପନିର୍ବାଚନ ହେବ। ରାହୁଲଙ୍କ ସ୍ଥାନରେ ପ୍ରିୟଙ୍କାଙ୍କୁ ୱାୟନାଡରୁ ପ୍ରାର୍ଥୀ କରିବାକୁ ଘୋଷଣା କରିଛି କଂଗ୍ରେସ । ପ୍ରିୟଙ୍କା ପ୍ରଥମଥର ପାଇଁ କୌଣସି ନିର୍ବାଚନ ଲଢ଼ିବାକୁ ଯାଉଥିବାରୁ ଏହା ଉପରେ ସମସ୍ତଙ୍କ ନଜର ରହିଛି।
ପ୍ରଶ୍ନପତ୍ର ଲିକ୍ କଲେ ଆଉ ମିଳିବନି ତ୍ରାହି
ନନ୍ଦିଘୋଷ ବ୍ୟୁରୋ: ପ୍ରଶ୍ନପତ୍ର ଲିକ୍ କଲେ ଆଉ ମିଳିବନି ତ୍ରାହି। ଏଥର ପ୍ରଶ୍ନପତ୍ର ଲିକ୍ କଲେ ହେବ ୧୦ ବର୍ଷ ଯାଏ ଜେଲ ଦଣ୍ଡାଦେଶ। କେବଳ ସେତିକି ନୁହେଁ ୧୦ ଲକ୍ଷରୁ ୧ କୋଟି ଯାଏ ଜରିମାନା ମଧ୍ୟ ଦେବାକୁ ପଡିବ। ଦେଶରେ ଲାଗୁ ହୋଇଛି ଆଣ୍ଟି ପେପର୍ ଲିକ୍ ଆଇନ୍। ପ୍ରଶ୍ନ ପତ୍ର ଲିକ୍ ସମ୍ବନ୍ଧରେ ଚଳିତ ବର୍ଷ ଫେବ୍ରୁଆରୀରେ ପାରିତ ହୋଇଥିବା ଆଇନ ଆଜି ଠାରୁ ଲାଗୁ ହୋଇଛି। ସରକାର ଏହି ଆଇନର ବିଜ୍ଞପ୍ତି ଜାରି କରିଛନ୍ତି। ଏହି ଆଇନ୍ର ନାଁ ସର୍ବସାଧାରଣ ପରୀକ୍ଷା ଅଧିନିୟମ ୨୦୨୪ ଅର୍ଥାତ୍ ପବ୍ଲିକ୍ ଏଗଜାମିନେସନ୍ ଆଇନ୍ ୨୦୨୪ ନାମରେ ନାମିତ କରାଯାଇଛି। ଫେବୃଆରୀ ୨୦୨୪ରେ ସଂସଦ ଦ୍ୱାରା ଏହି ଆଇନ ପାରିତ ହୋଇଥିଲା। ଏହି ଆଇନ କାର୍ଯ୍ୟକାରୀ ହେବା ପରେ ତିନି ବର୍ଷରୁ ୧୦ ବର୍ଷ ପର୍ଯ୍ୟନ୍ତ ଦଣ୍ଡବିଧାନ ଏବଂ ପେପର୍ ଲିକରେ ଦୋଷୀ ସାବ୍ୟସ୍ତ ହୋଇଥିବା ବ୍ୟକ୍ତିଙ୍କ ପାଇଁ ୧୦ ଲକ୍ଷରୁ ୧ କୋଟି ପର୍ଯ୍ୟନ୍ତ ଜୋରିମାନା ବ୍ୟବସ୍ଥା ରହିଛି। UPSC, SSC, ରେଳବାଇ, ବ୍ୟାଙ୍କିଙ୍ଗ୍ ନିଯୁକ୍ତି ପରୀକ୍ଷା ଏବଂ ଜାତୀୟ ପରୀକ୍ଷା ଏଜେନ୍ସି (NTA) ଦ୍ୱାରା ପରିଚାଳିତ ସମସ୍ତ କମ୍ପ୍ୟୁଟର ଭିତ୍ତିକ ପରୀକ୍ଷା ଏହି ଆଇନରେ ଅନ୍ତର୍ଭୁକ୍ତ ହେବ। ସର୍ବସାଧାରଣ ପରୀକ୍ଷା ଅଧିନିୟମ ୨୦୨୪ରେ କୁହାଯାଇଛି ଯେ, ପ୍ରଶ୍ନପତ୍ର ଲିକ୍ କିମ୍ବା ଉତ୍ତର କପି ଲିକ୍’, କୌଣସି ସାର୍ବଜନୀନ ପରୀକ୍ଷାରେ ପ୍ରାର୍ଥୀଙ୍କୁ ପ୍ରତ୍ୟକ୍ଷ କିମ୍ବା ପରୋକ୍ଷ ଭାବରେ ସହାୟତା କରିବା, ଏବଂ କୌଣସି ବ୍ୟକ୍ତି, ଗୋଷ୍ଠୀ କିମ୍ବା ଅନୁଷ୍ଠାନ ଦ୍ୱାରା କମ୍ପ୍ୟୁଟର ନେଟୱାର୍କ କିମ୍ବା କମ୍ପ୍ୟୁଟର ସିଷ୍ଟମ ସହିତ ଟାମ୍ପରିଂ କରିବା ଅପରାଧ। NET ଓ NEET ପରୀକ୍ଷାରେ ହେରଫେର ଖବର ସାମ୍ନାକୁ ଆସିବା ପରେ ଏହାକୁ ନେଇ ପୂରା ଦେଶରେ ଜୋରଦାର ବିରୋଧ ଜାରି ରହିଛି। ଏଭଳି ପରିସ୍ଥିତିରେ CSIR-UGC-NET ପରୀକ୍ଷାକୁ ସ୍ଥଗିତ ରଖିଛି ଏନଟିଏ । ଏହି ପରୀକ୍ଷା ଆସନ୍ତା ୨୫ରୁ ୨୭ ତାରିଖ ମଧ୍ୟରେ ହେବାର ଥିଲା। ତେବେ କିଛି ଅନିବାର୍ଯ୍ୟ କାରଣରୁ ଏହି ପରୀକ୍ଷାକୁ ସ୍ଥଗିତ କରାଯାଇଥିବା ଏନଟିଏ କହିଛି ।
ତମାଣ୍ଡୋ ହତ୍ୟାକାଣ୍ଡର ପର୍ଦ୍ଦାଫାସ କଲା ପୋଲିସ
ନନ୍ଦିଘୋଷ ବ୍ୟୁରୋ: ତମାଣ୍ଡୋ ହତ୍ୟାକାଣ୍ଡର ପର୍ଦ୍ଦାଫାସ କଲା ପୋଲିସ । ସର୍ଟଟେମ୍ପର ଗୁଣ ଓ ମଦ ନିଶା ପାଇଁ ହୋଇଥିଲା ଛାତି ଥରାଇ ଦେବାଭଳି ହତ୍ୟାକାଣ୍ଡ। ଅଭିଯୁକ୍ତର ନାଁ ରଞ୍ଜନ ଦୀପ । ଘର ବୌଦ୍ଧ । ଗତକାଲି ତମାଣ୍ଡୋ ଥାନା ଅର୍ନ୍ତଗତ ରେତଙ୍ଗ ରୋଡର ଜଣେ ଯୁବକଙ୍କ ରକ୍ତ ଜୁଡୁବୁଡୁ ଅବସ୍ଥାରେ ମୃତଦେହ ମିଳିଥିଲା। ମୃତ ବ୍ୟକ୍ତି ହେଲେ ଖୋର୍ଦ୍ଧା ଅଞ୍ଚଳର ସୁଶାନ୍ତ ଶତପଥୀ। ଘଟଣାସ୍ଥଳରେ ତମାଣ୍ଡୋ ପୋଲିସ ଓ ସାଇଣ୍ଟିଫିକ ଟିମ ଛାନବିନ କରିଥିଲେ । ଅଭିଯୁକ୍ତ ରଞ୍ଜନ ଓ ସୁଶାନ୍ତ ଏକାଠି ଭଡ଼ା ଘରେ ରହୁଥିଲେ। ସୁଶାନ୍ତ ରୋଷେୟା ଭାବେ କାମ କରୁଥିବା ବେଳେ, ରଞ୍ଜନ ମିସ୍ତ୍ରୀ ଭାବେ କାମ କରନ୍ତି। ଗୁରୁବାର ରାତିରେ ଉଭୟ ନିଶାଶକ୍ତ ଅବସ୍ଥାରେ ଥିଲେ। ସୁଶାନ୍ତ ଅଧିକାଂଶ ସମୟରେ ରଞ୍ଜନଙ୍କୁ ମାନସିକ ଓ ଶାରୀରିକ ଅତ୍ୟାଚାର କରୁଥିଲେ । ଯାହାକୁ ନେଇ ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ପରେ ଏହା ଉଗ୍ର ରୂପ ଧାରଣ କରିଥିଲା। ସୁଶାନ୍ତଙ୍କୁ ରଂଜନ ଲୁହାଛଡ଼ରେ ନିସ୍ତୁକ ମାଡ଼ ମାରିଥିଲା। ଏଥିରେ ସେ ରକ୍ତାକ୍ତ ହୋଇଥିଲେ। ସୁଶାନ୍ତଙ୍କୁ ରକ୍ତ ଜୁଡୁବୁଡୁ ଅବସ୍ଥାରେ ଦେଖି ସ୍ଥାନୀୟ ଲୋକେ ଉଦ୍ଧାର କରିଥିଲେ। ଡାକ୍ତରଖାନରେ ଭର୍ତ୍ତି କରିଥିଲେ। ତେବେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଅଭିଯୁକ୍ତ ଜଣଙ୍କ ନାଁରେ ପୂର୍ବରୁ ୩ଟି ସଙ୍ଗୀନ ଅଭିଯୋଗ ରହିଛି । ୨୦୧୯ ମସିହାରେ ବୌଦ୍ଧ ପୁରୁଣା କଟକ ଥାନାରେ ଅଭିଯୁକ୍ତ ନାଁରେ ରେପ ଆଣ୍ଡ ମର୍ଡର, ୨୦୧୬ ମସିହାରେ ବାପାଙ୍କୁ ଶାରୀରିକ ଅତ୍ୟାଚାର ଓ ୨୦୧୦ ମସିହାରେ ଅପହରଣ ଭଳି ସାଙ୍ଘାତିକ ଅପରାଧ ସେ ଘଟାଇଥିବା କହିଛନ୍ତି ଭୁବନେଶ୍ୱର ଡିସିପି ପ୍ରତୀକ ସିଂ ।
ରିଲିଜ ହେଲା ‘ହମାରେ ବାରହ’, ନିଜ ବିଷୟବସ୍ତୁ ପାଇଁ ଚର୍ଚ୍ଚାରେ ପିଲ୍ମ
ମୁମ୍ୱାଇ: ବଲିଉଡ ଇଣ୍ଡଷ୍ଟ୍ରିରେ ଏମିତି କିଛି ଚଳଚ୍ଚିତ୍ର ରହିଛି ଯାହା ନିଜର କଣ୍ଟ୍ରୋଭର୍ସିଆଲ ବିଷୟବସ୍ତୁ ପାଇଁ ଚର୍ଚ୍ଚାରେ ରହିଥାଏ। ସମୟ ସମୟରେ ଫିଲ୍ମର କଣ୍ଟେଣ୍ଟ ପାଇଁ ନିର୍ଦ୍ଦେଶକ, ପ୍ରଯୋଜକ ଓ ଫିଲ୍ମ ମେକର୍ସଙ୍କୁ କୋର୍ଟ ଦ୍ବାରସ୍ଥ ମଧ୍ୟ ହେବାକୁ ପଡିଥାଏ । ଠିକ ସେମିତି ବର୍ତ୍ତମାନ ଏକ ଫିଲ୍ମ ବିବାଦ ଘେରରେ ରହିଛି ଫିଲ୍ମଟି ହେଉଛି ‘ହମାରେ ବାରହ’ । ବିଗତ କିଛି ଦିନରୁ ଏହି ଫିଲ୍ମଟି ନିଜ ବିଷୟବସ୍ତୁ ପାଇଁ ଚର୍ଚ୍ଚାରେ ରହିଛି ଏବଂ ଏହାର ମାମଲା କୋର୍ଟ ଯାଇ ପହଞ୍ଚିଛି । ଫିଲ୍ମର ରିଲିଜ ଉପରେ ରୋକ ଲଗାଇବାକୁ ଦାବି କରାଯାଇଥିବା ବେଳେ ଏହି ପ୍ରସଙ୍ଗକୁ ଅସ୍ବିକାର କରିଛି କୋର୍ଟ । ଶେଷରେ ସାରା ଦେଶରେ ଏହି ଫିଲ୍ମକୁ ରିଲିଜ ପାଇଁ ସ୍ବିକୃତୀ ମିଳିଛି । ଫିଲ୍ମଟି ଆଜି ସାରା ଦେଶରେ ମୁକ୍ତିଲାଭ କରିଛି ।
ଫିଲ୍ମର ବିଷୟ ବସ୍ତୁ ଲୋକଙ୍କୁ ପସନ୍ଦ ଆସିଥିବା ବେଳେ ସମାଜକୁ ପ୍ରତି କିଛି ଶିକ୍ଷଣୀୟ ତଥ୍ୟ ପ୍ରଦାନ କରୁଛି । ଫିଲ୍ମ ବିଷୟ ବସ୍ତୁ ଅନୁଯାୟୀ, ଫିଲ୍ମରେ ଅନ୍ନୁ କପୁର ରୃଢିବାଦୀ ବିଚାରଧାରା ରଖୁଥିବା ବ୍ୟକ୍ତିର ଚରିତ୍ର ନିର୍ବାହ କରିଛନ୍ତି । ଗୋଟିଏ ସାଧାରଣ ପରିବାରକୁ ନେଇ ତିଆରି କରାଯାଇଥିବା ଏହି ଫିଲ୍ମରେ ୧୨ ଟି ସନ୍ତାନର ବାପା ହୋଇଛନ୍ତି ଅନ୍ନୁ କପୁର । ଦ୍ବିତୀୟ ସ୍ତ୍ରୀ ଏହା ପୂର୍ବରୁ ୫ଟି ସନ୍ତାନ ଜନ୍ମ କରି ସାରିଛନ୍ତି ଡାକ୍ତରଙ୍କ କହିବାନୁସାରେ ୬ ନମ୍ବର ସନ୍ତାନ ଜନ୍ମ ଦେଲେ ସ୍ତ୍ରୀ ଜୀବନ ଉପରେ ସଙ୍କଟ ଭରି ରହିଛି କିନ୍ତୁ ରୁଢିବାଦୀ ଚିନ୍ତାଧାରା ରଖୁଥିବା କବ୍ବାଲ ଏହି ସବୁ କଥାକୁ ନଜରଅନ୍ଦାଜ କରୁଛି।
ଫୀଲ୍ମରେ ଦର୍ଶାଯାଇଥିବା ସମସ୍ତ ଚରିତ୍ରଙ୍କ ଅଭିନୟ ଖୁବ ଉଚ୍ଚକୋଟିର ରହିବା ସହିତ ଦର୍ଶକେ ଏକ ଭିନ୍ନ କ୍ରାଇମ ଡ୍ରାମା ଫିଲ୍ମ ଦେଖିବାକୁ ପାଉଛନ୍ତି । ଫିଲ୍ମ ମାଧ୍ୟମରେ ଦର୍ଶକେ ସଚେତନ ହେବା ସହିତ କିଛି ଶିକ୍ଷା ମଧ୍ୟ ପାଇପାରୁଛନ୍ତି। କମ ବଜେଟରେ ଏମିତି ଉଚ୍ଚକୋଟିର କାହାଣୀ ଦର୍ଶାଇବା ସହିତ ନିର୍ଦ୍ଦେଶକଙ୍କ ଚିନ୍ତାଧାରାକୁ ନେଇ ଫିଲ୍ମଟି ପ୍ରସଂଶା ସାଉଁଟୁଛି ।
ବାରିପଦାରେ ଗଡୁନି ବସ, ଯାତ୍ରୀ ହନ୍ତସନ୍ତ
ବାରିପଦା: ବାରିପଦାରେ ବସ ଚଳାଚଳ ସମୟକୁ ନେଇ ଗଣ୍ଡଗୋଳ ପରେ ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ ରହିଛି ବସ ଚଳାଚଳ। ଗୋଷ୍ଠୀ ସଂଘର୍ଷ ଘଟଣାରେ ପ୍ରତିବାଦ କରାଯିବା ସହ ବସ ଚଳାଚଳ ବନ୍ଦ ରହିଛି। ଫଳରେ ଯାତ୍ରୀମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଛନ୍ତି। ଯେଉଁ ବସ ଚଳାଚଳ ସମୟକୁ ନେଇ ବିବାଦ ଉଠିଥିଲା ସେହି ବସକୁ ବାରିପଦା ଟାଉନ ପୋଲିସ ନିଜ ହେପାଜତକୁ ନେଇଛି।
ବାରିପଦା ଘରୋଇ ବସ ମାଲିକ ସଂଘ ଅଭିଯୋଗ କ୍ରମେ ୬ ଜଣ ଆକ୍ରମଣକାରୀଙ୍କୁ ବାରିପଦା ଟାଉନ ପୋଲିସ ଗିରଫ କରିଥିବା ବେଳେ, ରାଇରଙ୍ଗପୁର ବସ ମାଲିକ ସଂଘର ଅଭିଯୋଗ ପରେ ବାରିପଦା ବସ ମାଲିକ ସଂଘର ୪ ଜଣଙ୍କୁ ଗିରଫ କରିଛି ବାରିପଦା ଟାଉନ ପୋଲିସ। ବାରିପଦା ଘରୋଇ ବସ ମାଲିକ ସଂଘର ସମ୍ପାଦକ ସୁନୀଲ ଦାସଙ୍କୁ ପୋଲିସ ଗିରଫ କରିବା ପରେ ବସ ମାଲିକ ସଂଘର କର୍ମକର୍ତ୍ତାଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ସ୍ଥିତିକୁ ନଜରରେ ରଖି ଉଭୟ ବସ ମାଲିକ ସଂଘର କର୍ମକର୍ତ୍ତାଙ୍କୁ ନେଇ ଆଲୋଚନା କରିଛି ପୋଲିସ।
ଆଜି ନୂଆଦିଲ୍ଲୀରେ ବସିବ ୫୩ତମ ଜିଏସଟି ପରିଷଦ ବୈଠକ
ନୂଆଦିଲ୍ଲୀ: ଆଜି ନୂଆଦିଲ୍ଲୀରେ ବସିବ ୫୩ତମ ଜିଏସଟି ପରିଷଦ ବୈଠକ। ପ୍ରଥମ ଥର ଲାଗି ଜିଏସଟି ରେଜିଷ୍ଟ୍ରେସନ ଲାଗି ଆଧାର ବାୟୋମେଟ୍ରିକ ଅଥେନଟିକେସନ ବ୍ଯବସ୍ଥା ଲାଗୁ ହେବା ଲାଗି ପଦକ୍ଷେପ ନିଆଯିବା ସମ୍ଭାବନା ରହିଛି। ଏହା ସହ ଦେଶରେ ଅନଲାଇନ ଗେମିଂ ଶିଳ୍ପ ଲାଗି କେନ୍ଦ୍ର ଅର୍ଥ ମନ୍ତ୍ରାଳୟ ପକ୍ଷରୁ କେନ୍ଦ୍ରୀୟ ସାମଗ୍ରୀ ଓ ସେବା କର ବା ସିଜିଏସଟି ଆଇନ, ୨୦୧୭କୁ ସଂଶୋଧନ ଲାଗି ପ୍ରସ୍ତାବ ଅଣାଯିବା ସମ୍ଭାବନା ରହିଛି। ଯଦି ଏହି ପ୍ରସ୍ତାବ ଗୃହୀତ ହୁଏ ତେବେ ଇ-ଗେମିଂ, କାସିନୋ, ହର୍ଷ ରେସିଂ ଆଦି କ୍ଷେତ୍ରରେ ୨୮ ପ୍ରତିଶତ ଜିଏସଟି ଆଦାୟ କରାଯାଇ ନପାରେ।
ସେହିପରି ଭାରତର ପ୍ରତିଯୋଗିତା କମିଶନ ବା ସିସିଆଇକୁ ଅଧିକ ଶକ୍ତିଶାଳୀ କରିବା ଲାଗି ପଦକ୍ଷେପ ଗ୍ରହଣ କରାଯାଇପାରେ। ଜିଏସଟି ଆପେଲେଟ ଟ୍ରିବ୍ଯୁନାଲ ବା ଜିଏସଟିଏଟି, ହାଇକୋର୍ଟ, ସୁପ୍ରିମକୋର୍ଟ ଦ୍ବାରା ଗ୍ରହଣ କରାଯାଉଥିବା ମାମଲାଗୁଡିକରେ ଆର୍ଥିକ ସୀମା ନିର୍ଦ୍ଧାରଣ କରିବା ଲାଗି ମଧ୍ଯ ପରିଷଦରେ ଆଲୋଚନା କରାଯିବ। ଜିଏସଟିଏଟି ଲାଗି ସର୍ବାଧିକ ମନିଟାରୀ ଲିମିଟ ୨୦ ଲକ୍ଷ, ହାଇକୋର୍ଟଗୁଡିକ ଲାଗି ସର୍ବାଧିକ ୧ କୋଟି ଓ ସୁପ୍ରିମକୋର୍ଟ ଲାଗି ସର୍ବାଧିକ ୨ କୋଟି ଟଙ୍କାର ସୀମା ନିର୍ଦ୍ଧାରଣ ଲାଗି ଲ କମିଟି ଯେଉଁ ପ୍ରସ୍ତାବ ଦେଇଥିଲା ସେ ସମ୍ପର୍କରେ ନିଷ୍ପତ୍ତି ନିଆଯାଇପାରେ।
ସେପଟେ କେନ୍ଦ୍ର ଅର୍ଥ ମନ୍ତ୍ରାଳୟର ପ୍ରାକ୍ ବଜେଟ ବୈଠକ ଓ ଜିଏସଟି କାଉନସିଲ ବୈଠକରେ ଯୋଗଦେବେ ଉପ-ମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ । ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ କାର୍ଯ୍ୟବ୍ୟସ୍ତତା ଯୋଗୁଁ ତାଙ୍କ ପରାମର୍ଶ କ୍ରମେ ଉପ ମୁଖ୍ୟମନ୍ତ୍ରୀ ସିଂହଦେଓ ଏହି ବୈଠକରେ ଯୋଗଦେବେ।
ବାଲେଶ୍ବରରେ କୋହଳ ହେଲା କଟକଣା, ସକାଳ ୫ରୁ ଦିନ ୨ଟା ଯାଏଁ କଟକଣା ହଟିଛି
ବାଲେଶ୍ବର: ବାଲେଶ୍ବରରେ ଆହୁରି କୋହଳ ହେଲା କଟକଣା। ଆଜି ୯ ଘଣ୍ଟା ଯାଏଁ କର୍ଫ୍ଯୁ କୋହଳ କରାଯାଇଛି । ସକାଳ ୫ରୁ ଦିନ ୨ଟା ଯାଏଁ କଟକଣା ହଟିଛି । ଏହି ସମୟରେ ଦୋକାନ ବଜାର ଖୋଲିବା ସହ ଲୋକମାନେ କିଣାକିଣି କରୁଛନ୍ତି । ଶିଳ୍ପାଞ୍ଚଳ ଥାନା ଅଞ୍ଚଳରୁ ସମ୍ପୂର୍ଣ୍ଣ କର୍ଫ୍ୟୁ ହଟିଥିବା ବେଳେ ସହଦେବଖୁଣ୍ଟା ଥାନା ଓ ଟାଉନ ଥାନା ଅଞ୍ଚଳରେ କଟକଣା ଜାରି ରହିଛି । ଲିଜ୍ ଲାଇନ୍ ସହିତ ବ୍ରଡବ୍ୟାଣ୍ଡରେ ଇଣ୍ଟରନେଟ ସେବା ମିଳୁଛି ।
ତେବେ ମୋବାଇଲରେ ଇଣ୍ଟରନେଟ ବନ୍ଦ ରହିବ । ମ୍ୟୁନିସିପାଲିଟିରେ ଆଜି ବି ବନ୍ଦ ରହିଛି ସମସ୍ତ ସ୍କୁଲ, କଲେଜ, ଅଙ୍ଗନବାଡି କେନ୍ଦ୍ର । ଗତ ସୋମବାର ଦିନ ସହରରେ ଦୁଇ ଗୋଷ୍ଠୀ ମଧ୍ଯରେ ସଂଘର୍ଷ ପରେ ତୀବ୍ର ଉତ୍ତେଜନା ଦେଖାଦେଇଥିଲା । ଘଟଣାରେ ଏଯାଏଁ ୬୫ ଜଣଙ୍କୁ ପୋଲିସ ଗିରଫ କରିଛି । ଗୁଜବରୁ ଦୂରେଇ ରହିବାକୁ ଲୋକଙ୍କୁ ନିବେଦନ କରିଛନ୍ତି ଜିଲ୍ଲାପାଳ ଆଶିଷ ଠାକରେ ।