ନୂଆଦିଲ୍ଲୀ : ଆଜି ଘୋଷଣା ହେବ ରିଜର୍ଭ ବ୍ଯାଙ୍କ ମୁଦ୍ରାନୀତି। ଲୋକସଭା ନିର୍ବାଚନ ପରେ ପ୍ରଥମ ମୁଦ୍ରାନୀତି ଘୋଷଣା ଉପରେ ରହିଛି ସମସ୍ତଙ୍କ ନଜର। ତେବେ ନୂଆ ମୁଦ୍ରାନୀତିରେ ସୁଧ ହାର ହ୍ରାସ କରିବା ସମ୍ଭାବନା ନାହିଁ ବୋଲି ସୂଚନା ମିଳିଛି। ଗତ ୨୦୨୩ ଫେବ୍ରୁଆରୀରୁ ରେପୋରେଟ ୬.୫ ପ୍ରତିଶତ ରହିଥିବାବେଳେ ଏହା ଅପରିବର୍ତ୍ତିତ ରହିବ ବୋଲି ସୂଚନା ମିଳିଛି।
ଅର୍ଥନୈତିକ ଅଭିବୃଦ୍ଧିକୁ ଦୃଷ୍ଟିରେ ରଖି ଆରବିଆଇର ମନିଟାରୀ ପଲିସି କମିଟି ବା ଏମପିସି ଏହି ପଦକ୍ଷେପ ନେବ। ଗତ ୫ ତାରିଖଠାରୁ ବସିଥିଲା ଏମପିସି ବୈଠକ। ଯଦି ରେପୋରେଟ ଅପରିବର୍ତ୍ତିତ ରୁହେ ତେବେ ଏହା ଅଷ୍ଟମ ଥର ଲାଗି ଅପରିବର୍ତ୍ତିତ ରହିବ।
ନୂଆଦିଲ୍ଲୀ : ମହାରାଷ୍ଟ୍ର ଏନସିପିରେ ସବୁକିଛି ଚାଲିନି ଠିକ୍। ଦାଦା ଶରଦ ପାୱାରଙ୍କୁ ଧୋକା ଦେଇ ଚାଲିଆସିଥିବା ଉପମୁଖ୍ଯମନ୍ତ୍ରୀ ଅଜିତ ପାୱାରଙ୍କୁ ପାନେ ଦେବା ଲାଗି କୁଆଡେ ମେଳି ବାନ୍ଧିଲେଣି ଏନସିପି ଅଜିତ ପାୱାର ଗୋଷ୍ଠୀ ବିଧାୟକ। ବସିଥିବା ବିଧାୟକ ଦଳ ବୈଠକରେ ସାମିଲ ହେଲେନି ୫ ବିଧାୟକ। ସେହି ବିଧାୟକମାନେ ଶରଦ ପାୱାରଙ୍କ ଗୋଷ୍ଠୀରେ ସାମିଲ ହେଉଥିବା ସୂଚନା ମିଳିଛି।
୧୦ରୁ ୧୫ ବିଧାୟକ ଶରଦ ଗୋଷ୍ଠୀ ସହ ଯୋଗସୂତ୍ରରେ ଥିବା କୁହାଯାଉଛି। ଏକ ପଞ୍ଚତାରକା ହୋଟେଲରେ ଅଜିତ ପାୱାର ଏକ ବୈଠକ ଡାକିଥିଲେ। ମାତ୍ର ଲୋକସଭା ନିର୍ବାଚନ ନେଇ ଅସନ୍ତୁଷ୍ଟ ଥିବା ବିଧାୟକମାନେ ଏହି ବୈଠକରେ ସାମିଲ ହୋଇ ନଥିଲେ। ବୈଠକରେ ସାମିଲ ହୋଇ ନଥିବା ବିଧାୟକମାନେ ହେଉଛନ୍ତି ଧର୍ମାରାଓ ବାବା ଆତରାମ, ନରହରି ଜିରୱାଲ, ସୁନୀଲ ତିଙ୍ଗ୍ରେ, ରାଜେନ୍ଦ୍ର ସିଙ୍ଗାନେ ଓ ଆନ୍ନା ବାନସୋଦ। ବାରମତି ଆସନରେ ଅଜିତଙ୍କ ପତ୍ନୀ ସୁନେତ୍ରାଙ୍କ ପରାଜୟ ପରେ ଦଳରେ ବିଶୃଙ୍ଖଳା ଅଧିକ ହୋଇଛି। ଅଜିତ ପାୱାରଙ୍କ ଏନସିପି ୪ଟି ଆସନରେ ଲଢିଥିବାବେଳେ କେବଳ ରାଇଗଡ ଆସନ ହାତେଇଥିଲା।
ନୂଆଦିଲ୍ଲୀ : ଆଜି ଆରମ୍ଭ ହେବ ସରକାର ଗଠନ ଲାଗି ବିଧିବଦ୍ଧ ପ୍ରକ୍ରିୟା। ଦିଲ୍ଲୀରେ ବସିବ ଏନଡିଏର ଗୁରୁତ୍ବପୂର୍ଣ୍ଣ ବୈଠକ। ରାଷ୍ଟ୍ରପତିଙ୍କୁ ଭେଟି ସରକାର ଗଠନ ଲାଗି ଦାବି ଜଣାଇବ ଏନଡିଏ। ସମ୍ଭବତଃ ୯ ତାରିଖ ସନ୍ଧ୍ଯାରେ ପ୍ରଧାନମନ୍ତ୍ରୀ ଭାବେ ନରେନ୍ଦ୍ର ମୋଦୀ ନେଇପାରନ୍ତି ଶପଥ।
ସେପଟେ କେନ୍ଦ୍ରରେ ସରକାର ଗଠନ ନହେଉଣୁ ଦେଖାଦେଲାଣି ବିବାଦ। ମୁଖ୍ଯ ସହଯୋଗୀ ତେଲଗୁ ଦେଶମ ପାର୍ଟି ଚାହିଁଛି ବାଚସ୍ପତି ପଦ ସମେତ ୫ଟି କ୍ଯାବିନେଟ ବର୍ଥ। ଟିଡିପି ୧୬ଟି ଆସନ ଜିଣିଥିବାରୁ ନିଜର ଦବଦବା ଜାରି ରଖିବା ଲାଗି କରିଛି ପ୍ରୟାସ। ୨୦୧୪ରେ ଏନଡିଏ ସରକାର ବେଳେ ଟିଡିପି ଗୋଟିଏ କ୍ଯାବିନେଟ ଓ ଗୋଟିଏ ରାଷ୍ଟ୍ରମନ୍ତ୍ରୀ ପଦ ପାଇଥିଲା।
ଜନସେନା ପାର୍ଟିକୁ ବି ମନ୍ତ୍ରୀ ପଦ ଦେବା ନେଇ ଚର୍ଚ୍ଚା ଚାଲିଛି। ୱାଇଏସଆରସିପିକୁ ଗାଦିଚ୍ଯୁତ କରିବାରେ ଜନସେନାର ଥିଲା ପ୍ରମୁଖ ଭୂମିକା। ସେପଟେ ମହାରାଷ୍ଟ୍ର ମୁଖ୍ଯମନ୍ତ୍ରୀ ଏକନାଥ ସିନ୍ଦେ ବି ପୁଅ ଶ୍ରୀକାନ୍ତଙ୍କ ସମେତ ୩ଟି ପଦବୀ ଚାହିଁଥିବା ସୂଚନା ମିଳିଛି। ତେଣେ ବିଜେପି ନିଜ ହାତରେ ରେଳବାଇ, ଗୃହ, ଅର୍ଥ, ପ୍ରତିରକ୍ଷା, ଆଇନ ଓ ଆଇଟି ବିଭାଗ ରଖିବାକୁ ଯୋଜନା କରିଛି। ତେଣେ ଜେଡିୟୁ ୨ଟି, ଏଲଜେପି ରାମ ବିଳାସ ୩ଟି, ହାମ ଗୋଟିଏ ପଦ ଚାହିଁଛନ୍ତି।
ଆଠଗଡ଼: ଆଠଗଡ଼ରେ ଘଟି ଯାଇଛି ଦୁଃଖଦ ଘଟଣା । ଅଜଣା ଗାଡି ଧକ୍କାରେ ଜଣେ ନାବାଳକଙ୍କ ମୃତ୍ୟୁ ଘଟିଛି । ୫୫ ନମ୍ବର ଜାତୀୟ ରାଜପଥ ରାଧାଦାମୋଦରପୁର ଛକରେ ଏହି ଦୁର୍ଘଟଣା ଘଟିଛି ।
ମୃତ ନାବାଳକ ହେଲେ ଖୁଣ୍ଟୁଣୀ ଥାନା ରାଧାଦାମୋଦରପୁର ଗାଁର ସଞ୍ଜୟ ପରିଡ଼ାଙ୍କ ପୁଅ ଆରିୟନ ପରିଡ଼ା । ସେ ଏକ ଅଟୋରେ ଯାଉଥିବା ବେଳେ କୌଣସି ଏକ ଗାଡି ଅଟୋଟିକୁ ଧକ୍କା ଦେଇ ଫେରାର ହୋଇଯାଇଥିଲା । ଘଟଣା ସ୍ଥଳରେ ଆରିୟନଙ୍କ ମୃତ୍ୟୁ ଘଟିଥିଲା । କ୍ଷତିପୂରଣ ଦାବିରେ ସ୍ଥାନୀୟ ଲୋକେ ଜାତୀୟ ରାଜପଥ ଅବରୋଧ କରିଥିଲେ । ଫଳରେ ରାସ୍ତାର ଉଭୟ ପାର୍ଶ୍ବରେ ଶହ ଶହ ଗାଡ଼ି ଅଟକି ରହିଥିଲା । ଘଟଣାସ୍ଥଳରେ ଖୁଣ୍ଟୁଣୀ ପୋଲିସ ସହ ଆଠଗଡ଼ ତହସିଲଦାର ପହଞ୍ଚି ଲୋକଙ୍କ ସହ ଆଲୋଚନା କରିଛନ୍ତି ।
କନ୍ଧମାଳ: ଭାରସାମ୍ୟ ହରାଇ ଇଲେକ୍ଟ୍ରି ଖୁଣ୍ଟିରେ ପିଟିହେଲା ବାଇକ । ଘଟଣାସ୍ଥଳରେ ବାଇକ ଚାଳକଙ୍କ ମୃତ୍ୟୁ ଘଟିଥିବା ବେଳେ ଦୁଇ ଜଣ ଗୁରୁତର ହୋଇଛନ୍ତି ।
ମିଳିଥିବା ସୂଚନା ଅନୁସାରେ, କନ୍ଧମାଳ ଜିଲ୍ଲା ବାଲିଗୁଡ଼ା ଥାନା ଅନ୍ତର୍ଗତ ଡାବୁଲକିଆ ଗାଁର ତ୍ରିନାଥ ମଲ୍ଲିକ, ବାପି ମଲ୍ଲିକ ଏବଂ ସାମନ୍ତ ମଲ୍ଲିକ ଘରୋଇ ସାମଗ୍ରୀ କିଣିବାକୁ ଯାଉଥିଲେ । ଗୋପାଳପୁର ରାୟପୁର ୫୯ ନମ୍ୱର ଜାତୀୟ ରାଜପଥ ବାଟାଗୁଡ଼ା ଗାଁ ପୂର୍ବରୁ ସେମାନଙ୍କ ବାଇକ ଏକ ଇଲେକ୍ଟ୍ରି ଖୁଣ୍ଟିରେ ଦୁର୍ଘଟଣା ଘଟିଥିଲା । ଘଟଣାସ୍ଥଳରେ ବାଇକ ଚାଳକ ତ୍ରିନାଥ ମଲ୍ଲିକଙ୍କ ଘଟିଥିବା ବେଳେ ଦୁଇ ବାଇକ ଆରୋହୀ ବାପି ଓ ସାମନ୍ତ ଗୁରୁତର ହୋଇଛନ୍ତି । ଅଞ୍ଚଳବାସୀ ଦୁଇ ଗୁରୁତରଙ୍କୁ ଉଦ୍ଧାର କରି ବାଲିଗୁଡ଼ା ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଥିଲେ । ବାଲିଗୁଡ଼ା ପୋଲିସ ଘଟଣାସ୍ଥଳରେ ପହଁଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇ ଘଟଣାର ତଦନ୍ତ ଆରମ୍ଭ କରିଛି ।
ନୂଆଦିଲ୍ଲୀ: ଦେଶରେ ନିର୍ବାଚନ ସରିଛି, ଫଳାଫଳ ବି ଆସି ସାରିଛି । ଏନଡିଏକୁ ସ୍ପଷ୍ଟ ବହୁମତ ମଳିଥିବା ବେଳେ ବିଜେପି ସରକାର ଗଠନ ପ୍ରକ୍ରିୟା ଆରମ୍ଭ କରିଛି । ହେଲେ ଘରେ ନପଶୁଣୁ ଚାଳ ବାଜିବା ସ୍ଥିତି ଉପୁଜିଲାଣି । ସରକାର ଗଠନ ପୂର୍ବରୁ ବିଜେପିର ସହଯୋଗୀ ଦଳଙ୍କ ମଧ୍ୟରେ ମନ୍ତ୍ରୀପଦ ନେବାକୁ କସରତ ଆରମ୍ଭ କରି ଦେଇଥିବା ଶୁଣିବାକୁ ମିଳୁଛି । ଏପରିକି ସହଯୋଗୀ ଦଳମାନେ ବିଜେପି ଉପରେ ଏନେଇ ଚାପ ପକାଇବା ମଧ୍ୟ ଆରମ୍ଭ କରି ଦେଇଥିବା ଶୁଣିବାକୁ ମିଳୁଛି ।
ଏନଡିଏର ମୁଖ୍ଯ ସହଯୋଗୀ ତେଲଗୁ ଦେଶମ ପାର୍ଟି ବାଚସ୍ପତି ପଦ ସମେତ ୫ଟି କ୍ଯାବିନେଟ ବର୍ଥ ନେବାକୁ ଚାହୁଁଛି । ଟିଡିପି ୧୬ଟି ଆସନ ଜିଣିଥିବାରୁ ନିଜର ଦବଦବା ଜାରି ରଖିବା ଲାଗି ପ୍ରୟାସ ଚଲାଇଛି । ୨୦୧୪ରେ ଏନଡିଏ ସରକାର ବେଳେ ଟିଡିପି ଗୋଟିଏ କ୍ଯାବିନେଟ ଓ ଗୋଟିଏ ରାଷ୍ଟ୍ରମନ୍ତ୍ରୀ ପଦ ପାଇଥିଲା ।
ସେପଟେ ଜନସେନା ପାର୍ଟିକୁ ବି ମନ୍ତ୍ରୀ ପଦ ଦେବା ନେଇ ଚର୍ଚ୍ଚା ଚାଲିଛି । ୱାଇଏସଆରସିପିକୁ ଗାଦିଚ୍ଯୁତ କରିବାରେ ଜନସେନାର ପ୍ରମୁଖ ଭୂମିକା ଥିଲା । ସେପଟେ ମହାରାଷ୍ଟ୍ର ମୁଖ୍ଯମନ୍ତ୍ରୀ ଏକନାଥ ସିନ୍ଦେ ବି ପୁଅ ଶ୍ରୀକାନ୍ତଙ୍କ ସମେତ ୩ଟି ପଦବୀ ଚାହିଁଥିବା ସୂଚନା ମିଳିଛି । ତେଣେ ବିଜେପି ନିଜ ହାତରେ ରେଳବାଇ, ଗୃହ, ଅର୍ଥ, ପ୍ରତିରକ୍ଷା, ଆଇନ ଓ ଆଇଟି ବିଭାଗ ରଖିବାକୁ ଯୋଜନା କରିଛି । ତେଣେ ଜେଡିୟୁ ୨ଟି, ଏଲଜେପିର ରାମ ବିଳାସ ୩ଟି, ହାମ ଗୋଟିଏ ପଦ ଚାହିଁଛନ୍ତି ।
ଭୁବନେଶ୍ବର: ବିଜୁ ଜନତା ଦଳର ସଭାପତି ନବୀନ ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ କୌଣସି କାର୍ଯ୍ୟବଶତଃ ବିଜେଡି ନେତା କାର୍ତ୍ତିକ ପାଣ୍ଡିଆନ ଦିଲ୍ଲୀ ଗସ୍ତରେ ଅଛନ୍ତି । ହେଲେ କେତେକ ନିର୍ଦ୍ଦିଷ୍ଟ ଗଣମାଧ୍ୟମ ତାଙ୍କ ଦିଲ୍ଲୀ ଗସ୍ତକୁ ନେଇ ଅତ୍ୟନ୍ତ ଅରୁଚିକର, ତଥ୍ୟ ବିହୀନ, ମନ୍ଦ ଉଦ୍ଦେଶ୍ୟ ପ୍ରଣୋଦିତ ଓ ବିଭ୍ରାନ୍ତିକର ଖବର ପ୍ରସାରଣ କରୁଛନ୍ତି । ଏପରି ଅରୁଚିକର ଓ ମନ୍ଦ ଉଦ୍ଦେଶ୍ୟ ପ୍ରଣୋଦିତ ଖବର ପ୍ରସାରଣରୁ କ୍ଷାନ୍ତ ରହିବାକୁ ସମ୍ପୃକ୍ତ ଗଣମାଧ୍ୟମକୁ ଅନୁରୋଧ କରିଛି ବିଜେଡି ।
ବିଜେଡି ରାଜ୍ଯସଭା ସାଂସଦ ସସ୍ମିତ ପାତ୍ର କହିଛନ୍ତି, ‘କୌଣସି ଦଳର ନେତା ବା ନେତୃବୃନ୍ଦ କୌଣସି ସ୍ଥାନକୁ ଗସ୍ତ କଲେ ଗଣମାଧ୍ୟମକୁ ସୂଚନା ଦେଇ ଯିବାର କୌଣସି ପ୍ରାବଧାନ ବା ନିୟମ ନାହିଁ । ତେଣୁ ଦୟାକରି ସମ୍ପୃକ୍ତ ଗଣମାଧ୍ୟମ ଏପରି ଖବର ପ୍ରସାରଣରୁ ବିରତ ରହିବାକୁ ପୁନଃ ଅନୁରୋଧ କରୁଛୁ ।’
ଭୁବନେଶ୍ବର: ପ୍ରଦର୍ଶନ ନେଇ ଜୋସରେ କଂଗ୍ରେସ । ରାଜ୍ଯବାସୀଙ୍କୁ ଧନ୍ୟବାଦ ଦେବା ସହ କଲା ସତର୍କ । ପିସିସି ପ୍ରଭାରୀଙ୍କ ଆଶଙ୍କା, ସୁଟ୍ ବୁଟ୍ ପିନ୍ଧା ନେତା ଓଡ଼ିଶାର ଜମି, ଖଣି ଓ ପାଣି ବିକି ଦେବେ । ୨୦୧୯ରେ ରାଜ୍ୟରେ ଏକ ଅଙ୍କ ଭିତରେ ସୀମିତ ଥିଲା କଂଗ୍ରେସ । ୨୦୨୪ରେ ଓଡ଼ିଶାବାସୀ ୧୪ ଜଣ ବିଧାୟକଙ୍କୁ ନିର୍ବାଚିତ କରିବା ସହ ପୁଣି କୋରାପୁଟ ସାଂସଦଙ୍କୁ ବିଜୟ ମୁକୁଟ ପିନ୍ଧାଇଛନ୍ତି । କେନ୍ଦ୍ରରେ ବି କଂଗ୍ରେସ ଭଲ ପ୍ରଦର୍ଶନ କରିଛି । ଓଡ଼ିଶାରେ ଶାସନ ପରିବର୍ତ୍ତନ ପରେ ଓଡ଼ିଶାବାସୀଙ୍କୁ ସତର୍କ କରାଇଦେଇଛି ଦଳ ।
ପିସିସି ପ୍ରଭାରୀ ଅଜୟ କୁମାର ଆଶଙ୍କା କରିଛନ୍ତି ଯେ, ଓଡ଼ିଶାର ବରବାଦୀ ଆରମ୍ଭ ହେବାକୁ ଯାଉଛି । ବହୁ ସୁଟ ବାଲା ଓଡ଼ିଶାର ଜଙ୍ଗଲ, ଜମି ଓ ପାଣି ବିକିବାକୁ ଆସିଛନ୍ତି । ଏପରିକି ଓଡ଼ିଶାବାସୀ ନିଜ ଘର ଖଣ୍ଡେ ସୁରକ୍ଷିତ ରଖିପାରିବେ ନାହିଁ । ଛତିଶଗଡ଼ର ଉଦାହରଣ ଦେଇ ଏପରି ଅଭିଯୋଗ କରିଛନ୍ତି ପିସିସି ପ୍ରଭାରୀ ଅଜୟ କୁମାର ଓ ତେଲଙ୍ଗାନା ଉପମୁଖ୍ୟମନ୍ତ୍ରୀ ମାଲୁଭଟୀ ବିକ୍ରମାର୍କା । ଯଦି ଏପରି ହୁଏ, କଂଗ୍ରେସ ଲଢ଼େଇ କରିବ ବୋଲି ସେମାନେ କହିଛନ୍ତି ।
ମିଶନ ୯ରୁ ୯୦ ଫେଲ ମାରିବା ପରେ କଂଗ୍ରେସର ବିଫଳତା ପାଇଁ ନୈତିକତା ଦୃଷ୍ଟିରୁ ନିଜ ମୁଣ୍ଡକୁ ଦାୟିତ୍ବ ନେଇଛନ୍ତି ପିସିସି ସଭାପତି ଶରତ ପଟ୍ଟନାୟକ । ଆଗକୁ ଓଡ଼ିଶାରେ କିପରି କଂଗ୍ରେସ କ୍ଷମତାକୁ ଫେରିବ ସେ ଚେଷ୍ଟା ଜାରି ରଖିବେ ବୋଲି ସେ କହିଛନ୍ତି ।
ସେପଟେ କଂଗ୍ରେସରେ ଥାଇ ଦଳ ବିରୋଧୀ କାମ କରିଥିବା ନେତାଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଚେତାବନୀ ଦିଆଯାଇଛି । ନିର୍ବାଚନରେ ଦଳ ପାଇଁ ପରିଶ୍ରମ କରିଥିବା ନେତାଙ୍କୁ ସଂଗଠନରେ ଗୁରୁତ୍ବପୂର୍ଣ୍ଣ ଦାୟିତ୍ବ ଦିଆଯିବ ବୋଲି ପିସିସି ସଭାପତି କହିଛନ୍ତି ।
୨୦୨୪ରେ ଓଡ଼ିଶାରେ କଂଗ୍ରେସର ବିଧାନସଭା ଆସନ ବୃଦ୍ଧି ପାଇଥିଲେ ମଧ୍ୟ ଭୋଟ ହାର କମିଛି । ଆଗକୁ ସଂଗଠନରେ ବଡ଼ ପରିବର୍ତ୍ତନ ସହ ତୃଣମୂଳସ୍ତରରୁ ଦଳକୁ ମଜଭୁତ କରିବା ପାଇଁ ଏବେଠାରୁ ଅଣ୍ଟା ଭିଡ଼ିଲାଣି କଂଗ୍ରେସ ।
ରାଜନଗର: ସରିଛି ନିର୍ବାଚନ, ଆସି ସାରିଛି ଫଳାଫଳ । ୨୫ ବର୍ଷ ବିଜେଡି ଶାସନ ପରେ ଓଡ଼ିଶାରେ ନୂଆ ସରକାର ଗଠନ ହେବାକୁ ଯାଉଛି । ନିର୍ବାଚନ ଫଳାଫଳ ଆସିବା ପରେ ଗତକାଲି ନବୀନ ପଟ୍ଟନାୟକ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ । ତେବେ ନବୀନ ଇସ୍ତଫା ଦେବା ପରେ ଗାଁ ଗହଳିରେ ବୃଦ୍ଧବୃଦ୍ଧା ତାଙ୍କୁ ଝୁରୁଛନ୍ତି । ବୟସରେ ଅପରାହ୍ନରେ ପହଞ୍ଚି ସାରିଥିବା ଏହି ବୃଦ୍ଧାବୃଦ୍ଧଙ୍କ ଆଖିରୁ ଝରୁଛି ଲୁହ ।
କେନ୍ଦ୍ରାପଡ଼ା ଜିଲ୍ଲା ରାଜନଗର ଗାଁରେ ବୃଦ୍ଧାମାନେ ଏକାଠି ବସିଥିବା ବେଳେ ତାଙ୍କ ଆଖିରୁ ଲୁହ ଝରୁଥିବା ଦେଖିବାକୁ ମିଳିଥିଲା । ଗତକାଲି ନବୀନ ପଟ୍ଟନାୟକ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବା ପରେ ଏମାନେ ଭାଙ୍ଗି ପଡିଛନ୍ତି । ଆଉ ନିଜ ମନର ବ୍ୟଥା ପାଣି ହୋଇ ସେମାନଙ୍କ ଆଖିରୁ ବୋହି ଯାଉଛି ।
ବାର୍ଦ୍ଧକ୍ୟ ଭତ୍ତା, ହରିଶ୍ଚନ୍ଦ୍ର ଯୋଜନା, ମାଗଣା ରାସନ୍, ବିଜୁ ସ୍ଵାସ୍ଥ୍ୟ କଲ୍ୟାଣ ଯୋଜନାରେ ରୋଗୀ ସେବା, ସ୍ବୟଂ ସହାୟକ ଗୋଷ୍ଠୀମାନଙ୍କୁ ବିନା ସୁଧରେ ଋଣ ଆଦି ଯୋଜନା ଗାଁ ଗହଳିର ଲୋକଙ୍କ ମନ ଜିଣି ନେଇଥିଲା । ଯାହାଦ୍ବାରା ସାଧାରଣ ଲୋକେ ଉପକୃତ ହେଉଥିଲେ । କିନ୍ତୁ ଗତକାଲିଠାରୁ ତାଙ୍କର ପ୍ରିୟ ମୁଖ୍ୟମନ୍ତ୍ରୀ ଇସ୍ତଫା ଦେବା ପରେ ବାହୁନି ବାହୁନି କାନ୍ଦୁଛନ୍ତି ଗାଁ ଗହଳିର ସାଧାରଣ ଜନତା ।
ନୂଆଦିଲ୍ଲୀ: ସେୟାର ମାର୍କେଟ ଓ ଏକଜିଟ ପୋଲକୁ ନେଇ ରାହୁଲ ଗାନ୍ଧୀଙ୍କ ବଡ଼ ବୟାନ । ଜାଣିଶୁଣି ଷ୍ଟକ ମାର୍କେଟ ନିବେଶକଙ୍କୁ କ୍ଷତିରେ ଠେଲି ଦିଆଯାଇଥିବା ଅଭିଯୋଗ ଆଣିଲେ ରାହୁଲ । କହିଲେ- ଗୋଟିଏ ଦିନରେ ନିବେଶକ ହରାଇଲେ ୨୦ ଲକ୍ଷ କୋଟି ଟଙ୍କା । ଏହାର ଯୁଗ୍ମ ସଂସଦୀୟ କମିଟି ତଦନ୍ତ ଦାବି କରିଛନ୍ତି ରାହୁଲ ।
ସେ କହିଛନ୍ତି, ଜୁନ ୧ ପୂର୍ବରୁ ଦେଶବାସୀଙ୍କୁ କୁହାଯାଉଥିଲା ଏଥର ଷ୍ଟକ ମାର୍କେଟ ଆଖିଦୃଶିଆ ବୃଦ୍ଧି ପାଇବ । ଏହି ବୟାନକୁ ଦୃଷ୍ଟିରେ ରଖି ଷ୍ଟକ ମାର୍କେଟରେ ଉତ୍ସାହ ଦେଖାଯାଇଥିଲା । ଏପରିକି ଫେକ ଏକଜିଟ ପୋଲ ଜରିଆରେ ଏହି ଆଶାକୁ ବହୁଗୁଣ ବଢାଯାଇଥିଲା । ମାତ୍ର ଗଣତି ଦିନ ଯାହା ଫଳ ଆସିଲା ସେଥିରେ ଷ୍ଟକ ମାର୍କେଟରେ ଭୟଙ୍କର କ୍ଷତି ଘଟିଲା ଓ ନିବେଶକ ୨୦ ଲକ୍ଷ କୋଟି ଟଙ୍କା ହରାଇଲେ । ଏହା ଥିଲା ଖୁଚୁରା ନିବେଶକଙ୍କ ବଡ଼ କ୍ଷତି । ଏହା ବି ଥିଲା ଭାରତର ସବୁଠାରୁ ବଡ ଷ୍ଟକ ମାର୍କେଟ ସ୍କାମ । ଏହାର ଜେପିସି ତଦନ୍ତ ହେଲେ ପ୍ରକୃତ ସତ ପଦାକୁ ଆସିବ ।
ଏହାସହ ରାହୁଲ କହିଛନ୍ତି, ବିଜେପିର ଆଭ୍ଯନ୍ତରୀଣ ସର୍ଭେ କହୁଥିଲା ଦଳ ୨୨୦ ସିଟି ପାଇବ । ଗୁଇନ୍ଦା ସଂସ୍ଥା ବି ୨୦୦ରୁ ୨୨୦ ସିଟ ପାଇବ ବୋଲି ଆକଳନ କରିଥିଲେ ।
