ଖଡ଼ିଆଳ: ନିଟ ପରୀକ୍ଷାରେ ଶ୍ବେତା ଶତାବ୍ଦୀଙ୍କ ସଫଳତା । ନୂଆପଡା ଜିଲ୍ଲା ଖଡିଆଳର ଶ୍ୱେତା ନିଟ ପରୀକ୍ଷାରେ ୭୨୦ରୁ ରଖିଛନ୍ତି ୭୧୦ ମାର୍କ । ଏହାସହ ସେ ଜିଲ୍ଲା ଟପର ହୋଇଛନ୍ତି । ଏହି ସଫଳତା ପାଇ ଜିଲ୍ଲା ପାଇଁ ଗର୍ବ ଆଣି ଦେଇଛନ୍ତି ଶ୍ୱେତା ।
ସର୍ବ ଭାରତୀୟ ସ୍ତରରେ ୭୦୬ ରାଙ୍କରେ ରହିଛନ୍ତି ଶ୍ୱେତା । ସଫଳତା ପାଇଁ କୋଚିଙ୍ଗ ସେଣ୍ଟର୍ ଓ ମାଆବାପାଙ୍କୁ ଶ୍ରେୟ ଦେଇଛନ୍ତି ଶ୍ବେତା । ଝିଅର ସଫଳତାକୁ ନେଇ ବେଶ ଖୁସି ଅଛନ୍ତି ପରିବାରର ଲୋକେ ।
ବାଲେଶ୍ବର: ହଠାତ ଥରିଗଲା ବାଲେଶ୍ବର । ଆକାଶରୁ ଶୁଭିଲା ପ୍ରଚଣ୍ଡ ଶବ୍ଦ । ଥରେ ନୁହେଁ, ଦୁଇ ଥର ପ୍ରଚଣ୍ଡ ଶବ୍ଦ ହୋଇଥିଲା । ଯାହା ପୂରା ଅଞ୍ଚଳରେ ଭୟର ବାତାବରଣ ଖେଳାଇ ଦେଇଛି ।
ସବୁକିଛି ସ୍ବାଭାବିକ ଥିବା ବେଳେ ହଠାତ ବାଲେଶ୍ବର ଆକାଶରୁ ଶୁଭିଥିଲା ପ୍ରଚଣ୍ଡ ଶବ୍ଦ । ଦୋହଲି ଯାଇଥିଲା ଲୋକଙ୍କ ଘରର କବାଟ ଓ ଝରକା । ଚାରିଆଡେ ଖେଳି ଯାଇଥିଲା ଭୟର ବାତାବରଣ । ଲୋକେ ଭୟରେ ଘରୁ ବାହାରକୁ ପଳାଇ ଆସିଥିଲେ । ତେବେ ଏହି ଶବ୍ଦ କେଉଁଠୁ ଆସିଲା ? ଏହା ପଛର କାରଣ କ’ଣ ତାହା ସ୍ପଷ୍ଟ ହୋଇନାହିଁ ।
ଯାଜପୁର: ବରୀ ନିର୍ବାଚନ ମଣ୍ଡଳୀରେ ବିଜେଡି ବିଧାୟକ ପ୍ରାର୍ଥୀ ବିଶ୍ବରଞ୍ଜନ ମଲ୍ଲିକ ବିଜୟୀ ହୋଇଛନ୍ତି । ତାଙ୍କ ବିଜୟକୁ ନେଇ ଏବେ ସବୁଠି ଚର୍ଚ୍ଚା ଲାଗି ରହିଛି । କାରଣ ବିଶ୍ବରଞ୍ଜନ ତାଙ୍କ ନିକଟତମ ପ୍ରତିଦ୍ବନ୍ଦ୍ବୀ ଉମେଶ ଜେନାଙ୍କୁ ୫୧ ହଜାର ୪୬୫ ଖଣ୍ଡ ଭୋଟରେ ପରାସ୍ତ କରିଛନ୍ତି ।
ସୂଚନାଯୋଗ୍ୟ, ୨୦୧୯ରେ ବିଶ୍ବରଞ୍ଜନ ବିଜେପିରୁ ବିଧାୟକ ପ୍ରାର୍ଥୀ ହୋଇଥିଲେ । ଏହି ନିର୍ବାଚନରେ ସେ ୬୮ ହଜାର ୪୯୭ ହଜାରରୁ ଅଧିକ ଭୋଟ ପାଇଥିଲେ । ତାଙ୍କୁ ବିଜେଡି ପ୍ରାର୍ଥୀଙ୍କ ପାଖରୁ ପରାଜୟ ବରଣ କରିବାକୁ ପଡିଥିଲା । ହେଲେ ସେ ଆଜି ରାଜ୍ୟରେ ସର୍ବାଧିକ ବ୍ୟବଧାନରେ ଜିତିଥିବା ଏକ ମାତ୍ର ବିଧାୟକ ।
ବିଶ୍ଵ ତାଙ୍କ ପ୍ରତିକ୍ରିୟାରେ କହିଛନ୍ତି ଏ ବିଜୟ ମୋର ନୁହେଁ ବରୀବାସୀଙ୍କର ଓ ବିଜେଡି ସଭାପତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କର । ଆଗାମୀ ଦିନରେ ବରୀ ନିର୍ବାଚନ ମଣ୍ଡଳୀର ସ୍ଵାସ୍ଥ୍ୟ, ଶିକ୍ଷା, ଗମନାଗମନ ଓ ସାଧାରଣ ଲୋକଙ୍କ ନିକଟତର ହୋଇ ସେମାନଙ୍କ ମୌଳିକ ସମାସ୍ୟର ସମାଧାନ କ୍ଷେତ୍ରରେ ଉଦ୍ୟମ ଜାରି ରଖିବି ।
କଟକ: କଟକ ଜିଲ୍ଲା ମାଣିଆବନ୍ଧ ଥାନା ଭଙ୍ଗାରୁଜା ଘଟଣାରେ ୬ ଅଭିଯୁକ୍ତ ଗିରଫ । ଉଭୟ ବଡମ୍ବା ଓ ମାଣିଆବନ୍ଧ ଥାନା ପୋଲିସ ମିଳିତ ଭାବେ ଅଭିଯୁକ୍ତଙ୍କୁ ଗିରଫ କରିଛନ୍ତି । ବଡମ୍ବା ଥାନାରେ ଏନେଇ କଟକ ଅତିରିକ୍ତ ଏସପି କୃଷ୍ଣଚନ୍ଦ୍ର ପଟ୍ଟନାୟକ ସାମ୍ବାଦିକ ସମ୍ମିଳନୀ କରି ସୂଚନା ଦେଇଛନ୍ତି ।
ଗିରଫ ବ୍ୟକ୍ତିମାନେ ହେଲେ ମୁଖ୍ୟ ଅଭିଯୁକ୍ତ ଶ୍ରୀକାନ୍ତ ଜେନା ଓରଫ (କାଳିଆ), ଅନ୍ୟ ସହଯୋଗୀ ଅରବିନ୍ଦ ଜେନା, ନିରଞ୍ଜନ ବେହେରା, ଭଗବାନ ବେହେରା, ଆଲୋକ ପ୍ରଧାନ, ପ୍ରକାଶ ରାଉତ । ବିଭିନ୍ନ ଦଫା ଲଗାଇ ସେମାନଙ୍କୁ କୋର୍ଟ ଚାଲାଣ କରାଯାଇଛି । ପୂର୍ବରୁ ଏହି ଅଭିଯୁକ୍ତଙ୍କ ନାଁରେ ଏକାଧିକ ମାମଲା ଥିବା ବେଳେ ଏମାନଙ୍କ ବିରୋଧରେ ଗିରଫ ବିହୀନ ପରୱାନା ଜାରି କରାଯାଇଛି ।
ଭୁବନେଶ୍ୱର: ଆସନ୍ତା ଦୁଇରୁ ତିନି ଦିନ ମଧ୍ୟରେ ଓଡିଶା ଛୁଇଁବ ଦକ୍ଷିଣ ପଶ୍ଚିମ ମୌସୁମୀ ବାୟୁ । ସ୍ବାଭାବିକ ସମୟର ଦୁଇ ଦିନ ପୂର୍ବରୁ ମୌସୁମୀ ଓଡ଼ିଶା ଛୁଇଁବ। ଓଡିଶା ଛୁଇଁବା ପାଇଁ ପାଗ ଅନୁକୂଳ ରହିଛି । ତେବେ ୪୮ ଘଣ୍ଟା ମଧ୍ୟରେ ରାଜ୍ୟରେ ପ୍ରଚଣ୍ଡ ବିଜୁଳି ଘଡଘଡି ସହ ବର୍ଷା ହେବ । ବଜ୍ରପାତ ନେଇ ୨୦ ଜିଲ୍ଲାକୁ ୟେଲୋ ଆଲର୍ଟ ଜାରି କରିଛି ପାଣିପାଗ କେନ୍ଦ୍ର ।
ଦକ୍ଷିଣ ଓଡ଼ିଶାରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ଗଞ୍ଜାମ, ଗଜପତି, ରାୟଗଡା, ମାଲକାନଗିରି, କୋରାପୁଟ, ନବରଙ୍ଗପୁର, କଳାହାଣ୍ଡି, କନ୍ଧମାଳରେ ପ୍ରବଳ ବର୍ଷା ହେବ । ଏହି କାଳବୈଶାଖୀ ମୌସୁମୀକୁ ବାଟ କଢାଇବାରେ ସହାୟକ ହେବ । ୮, ୯, ୧୦ ତାରିଖରେ ପଶ୍ଚିମ ଓଡ଼ିଶାରେ ଗ୍ରୀଷ୍ମପ୍ରବାହ ହେବ ବୋଲି କହିଛି ପାଣିପାଗ କେନ୍ଦ୍ର।
ବରଗଡ଼, ବଲାଙ୍ଗୀର ଏବଂ ନୂଆପଡାରେ ହିଟଓ୍ବେଭ ନେଇ ସତର୍କ ଜାରି ହୋଇଛି । ୪୦ ରୁ ୪୩ ଡିଗ୍ରୀ ମଧ୍ୟରେ ତାପମାତ୍ରା ରେକର୍ଡ ହୋଇପାରେ । ଅନ୍ଯପଟେ ୫ ଦିନ ପର୍ଯ୍ୟନ୍ତ ଗରମ ଗୁଳୁଗୁଳିରେ ସନ୍ତୁଳି ହେବେ ଉପକୂଳବାସୀ ।
ଭୁବନେଶ୍ୱର: ଓଡିଶାବାସୀଙ୍କୁ ଚେତାଇଲେ କଂଗ୍ରେସ ପ୍ରଭାରୀ ଅଜୟ କୁମାର । ବହୁ ସୁଟ୍ ବାଲା ଏବେ ଓଡିଶା ଆସିଗଲେ ଏଥର ଜଙ୍ଗଲ, ଜମି, ପାଣି ବିକ୍ରୀ ହେବ । ଏଥିପାଇଁ କଂଗ୍ରେସ ଲଢେଇ କରିବ। ୧୪ଜଣ ବିଧାୟକ ଏଥିପାଇଁ ଲଢ଼ିବେ ବୋଲି କହିଛନ୍ତି ଅଜୟ କୁମାର । ସେ ଆହୁରୀ ମଧ୍ୟ କହିଛନ୍ତି, ବିଜେପି ଆସିଲା, ଓଡିଶାର ଅର୍ଥ ଅପଚୟ ଆରମ୍ଭ ହେବ । ଚାକିରୀ ଯିବ, ଘର ଯିବ, ଜମି ବି ଲୁଟହେବ। ଅପେକ୍ଷା କରନ୍ତୁ ବୋଲି କହିଛନ୍ତି କଂଗ୍ରେସ ପ୍ରଭାରୀ ଅଜୟ କୁମାର।
ବିଜେପିର ଏସବୁ ଗୁଣ ଯୋଗୁଁ ସେମାନେ ଓଡ଼ିଶାରେ କ୍ଷମତାରୁ ବାହାରେ ଥିଲେ। କଂଗ୍ରେସ ସଙ୍ଗଠନରେ ଯେଉଁମାନେ ବିଦ୍ରୋହୀ ଅଛନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ।
ନୂଆଦିଲ୍ଲୀ: ଗରମରେ ସନ୍ତୁଳି ହେଉଥିବା ଦିଲ୍ଲୀବାସୀଙ୍କୁ ଆଶ୍ବସ୍ତିର ବାଟ ଦେଖାଇଛନ୍ତି ସୁପ୍ରିମକୋର୍ଟ। ହିମାଚଳ ପ୍ରଦେଶକୁ ୧୩୭ କ୍ଯୁସେକ ପାଣି ଛାଡିବାକୁ ନିର୍ଦ୍ଦେଶ ଦେଇଛନ୍ତି ସର୍ବୋଚ୍ଚ କୋର୍ଟ। ହିମାଚଳ ପ୍ରଦେଶ ଶୁକ୍ରବାରଠାରୁ ଦିଲ୍ଲୀ ପାଇଁ ପାଣି ଛାଡିବ। ଏଥିରେ ହରିୟାଣା କୌଣସି ପ୍ରକାର ବାଧା ଦେଇପାରିବନି ବୋଲି ନିର୍ଦ୍ଦେଶ ଦେଇଛନ୍ତି କୋର୍ଟ । ଗତ ବୁଧବାର ଯମୁନା ରିଭର ବୋର୍ଡ ସହିତ ବସିଥିବା ବୈଠକରେ ସମସ୍ତ ସଦସ୍ଯ ଏଥିରେ ସହମତି ପ୍ରଦାନ କରିଥିଲେ। ବୈଠକରେ ହିମାଚଳ ପ୍ରଦେଶ ମଧ୍ଯ ସାମିଲ ଥିଲା ।
ଦିଲ୍ଲୀକୁ ପାଣି ଦେବାକୁ ରାଜି ଅଛି ହିମାଚଳ ପ୍ରଦେଶ। ୧୩୭ କ୍ଯୁସେକ ପାଣି ହିମାଚଳ କାଲିଠାରୁ ଦିଲ୍ଲୀକୁ ମାସେ ପର୍ଯ୍ଯନ୍ତ ଦେବ। ତେବେ ହରିୟାଣା ଏଥିରେ କୌଣସି ପ୍ରକାର ବାଧା ଦେଇପାରିବନି ବୋଲି କୋର୍ଟଙ୍କ ନିର୍ଦ୍ଦେଶ ରହିଛି। ବଜିରାବାଦ ପର୍ଯ୍ୟନ୍ତ ପାଣି ବିନା ବାଧାରେ ପହଞ୍ଚିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। ଦିଲ୍ଲୀରେ ଯେପରି ପାଣି ନଷ୍ଟ ହେବନି ସେ ନେଇ ଧ୍ଯାନ ରଖିବାକୁ କହିଛନ୍ତି କୋର୍ଟ।
ଭୁବନେଶ୍ୱର: ବିଏସକେୱାଇ କାର୍ଡଧାରୀଙ୍କ ପାଇଁ ଆସ୍ୱସ୍ତି। BSKY କାର୍ଡକୁ ନେଇ ଲାଗିରହିଥିବା ଦ୍ୱନ୍ଦ୍ୱକୁ ଦୂର କଲେ ମୁଖ୍ୟ ଶାସନ ସଚିବ ପ୍ରଦୀପ ଜେନା । BSKY କାର୍ଡକୁ ନେଇ ସ୍ୱାସ୍ଥ୍ୟ ବିଭାଗ ଦେଲା ବଡ ସୂଚନା । ରାଜ୍ୟରେ BSKY କାର୍ଡ ବର୍ତ୍ତମାନ ବଳବତ୍ତର ରହିଛି ବୋଲି କହିଛନ୍ତି ପ୍ରଦୀପ ଜେନା। ସେ କହିଛନ୍ତି, ସମସ୍ତ ହସ୍ପିଟାଲରେ BSKY କାର୍ଡରେ ଚିକିତ୍ସା ଚାଲୁ ରହିବ । କୌଣସି ହସ୍ପିଟାଲରେ ବିଏସକେୱାଇ ହିତାଧିକାରୀଙ୍କୁ ଚିକିତ୍ସାରେ ଅବହେଳା କିମ୍ୱା ଫେରାଇ ପାରିବେ ନାହିଁ । ଏନେଇ ସ୍ୱାସ୍ଥ୍ୟ ବିଭାଗ ପକ୍ଷରୁ ଜରୁରୀ ଟେଲିଫୋନ ନମ୍ୱର- ୧୦୪ ଜାରି ହୋଇଛି । BSKYରେ ଅବହେଳା ହେଲେ ୧୦୪କୁ କଲ୍ କରିବା ପାଇଁ ପରାମର୍ଶ ଦିଆଯାଇଛି । କୌଣସି ହସ୍ପିଟାଲ ଏହାକୁ ଅବମାନନା କଲେ ଦୃଢ କାର୍ଯ୍ୟାନୁଷ୍ଠାନ ହେବ ବୋଲି ପ୍ରଦୀପ ଜେନା ସୂଚନା ଦେଇଛନ୍ତି।
ଯେପର୍ଯ୍ୟନ୍ତ ନୂଆ ନିଷ୍ପତ୍ତି ନିଆଯାଇନି ସେ ପର୍ଯ୍ୟନ୍ତ ବିଏସକେୱାଇ କାର୍ଡରେ ସେବା ଜାରି ରହିବ ବୋଲି ସ୍ୱାସ୍ଥ୍ୟ ସଚିବ ସ୍ପଷ୍ଟ କରିଛନ୍ତି ।
ସମ୍ବଲପୁର: ମହାଦେବଙ୍କ ମାନବୀୟଲୀଳା। ମର୍ତ୍ତମଣ୍ଡଳରେ ବିବାହ କରିବେ ବାବା ତ୍ରୈଲୋକ୍ୟନାଥ । ପବିତ୍ର ଶୀତଳଷଷ୍ଠୀରେ ଦେବଦମ୍ପତିଙ୍କ ସମ୍ପନ୍ନ ହେବ ବିବାହ କାର୍ଯ୍ୟ । ଆଜିଠୁ ଆରମ୍ଭ ହେବ ପତ୍ରପେଣ୍ଡି ପର୍ବ । ଏହାକୁ ମହାଦେବଙ୍କ ପାଇଁ କନ୍ୟାଖୋଜା ପର୍ବ ବୋଲି ମଧ୍ୟ କୁହାଯାଏ । ସନ୍ଧ୍ୟାରେ ସପ୍ତଋଷି ବାହାରି କନ୍ୟା ପିତାମାତାଙ୍କ ଘରେ ପହଞ୍ଚି ଶିବ ପାର୍ବତୀଙ୍କ ବିବାହ ସ୍ଥିର କରିବେ ସେଥିପାଇଁ ଉତ୍ସବ ମୁଖର ସମ୍ବଲପୁର ସହର ।
ନୂଆଦିଲ୍ଲୀ: ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ.ପି ନଡ୍ଡାଙ୍କ ବାସଭବନରେ ଦଳର ପ୍ରମୁଖ ନେତାଙ୍କୁ ନେଇ ବସୁଛି ବୈଠକ। ପ୍ରଧାନମନ୍ତ୍ରୀଙ୍କ ଶପଥ ସମାରୋହ ଉତ୍ସବ ପୂର୍ବରୁ ଏହି ବୈଠକ ଡାକିଛନ୍ତି ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା। ବୈଠକରେ ବିଜେପିର ବରିଷ୍ଠ ନେତା ଅମିତ ଶାହା, ରାଜନାଥ ସିଂହ, ବିଏଲ ସନ୍ତୋଷଙ୍କ ସହ ଅନ୍ଯ ପ୍ରମୁଖ ନେତା ଯୋଗ ଦେବାର କାଯ୍ଯକ୍ରମ ରହିଛି। ଯେଉଁଥିରେ ମଧ୍ଯପ୍ରଦେଶ ପୂର୍ବତନ ମୁଖ୍ଯମନ୍ତ୍ରୀ ଶିବରାଜ ସିଂ ଚୌହ୍ବାନ ମଧ୍ଯ ସାମିଲ ଅଛନ୍ତି । ଶିବରାଜଙ୍କ ନେତୃତ୍ବରେ ଦଳ ରାଜ୍ଯରେ ୨୯ ସିଟ ଦଖଲ କରିପାରିଛି । ଏପରିକି ଶିବରାଜ ମଧ୍ଯ ନିଜେ ବୃହତ ମାର୍ଜିନରେ ବିଜୟୀ ହୋଇଛନ୍ତି । ତାଙ୍କୁ ବଡ଼ ଦାୟିତ୍ବ ମିଳିପାରେ ବୋଲି ଚର୍ଚ୍ଚା ହେଉଛି ।
ତେବେ ପୂର୍ବରୁ ଆସନ୍ତା ୮ ତାରିଖରେ ଲଗାତାର ତୃତୀୟଥର ଲାଗି ମୋଦି ପ୍ରଧାନମନ୍ତ୍ରୀ ଭାବେ ଶପଥଗ୍ରହଣ କରିବାର କାର୍ଯ୍ୟକ୍ରମ ଥିଲା । ଏବେ ୯ ତାରିଖରେ ଶପଥ ଗ୍ରହଣ ହେବ ବୋଲି ଜଣାପଡିଛି । ଗତକାଲି ଏନଡିଏର ବସିଥିବା ବୈଠକରେ ସର୍ବସମ୍ମତକ୍ରମେ ନେତା ନିର୍ବାଚିତ ହୋଇଛନ୍ତି। ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଆଜି ସାକ୍ଷାତ କରିବେ ଭାରତୀୟ ମୁଖ୍ୟ ନିର୍ବାଚନ କମିଶନର। ନିର୍ବାଚିତ ସାଂସଦଙ୍କ ନୂତନ ତାଲିକା ରାଷ୍ଟ୍ରପତିଙ୍କୁ ପ୍ରଦାନ କରିବେ। ଦେଶରେ କେଉଁ ଦଳ ସାଧାରଣ ନିର୍ବାଚନରେ ସଂଖ୍ଯାଗରିଷ୍ଠତା ଏ ନେଇ ତାଲିକା ପ୍ରଦାନ କରିବେ ଭାରତୀୟ ନିର୍ବାଚନ କମିଶନ। ଏହାପରେ ବିଧିବଦ୍ଧ ଭାବେ ସଂଖ୍ଯାଗରିଷ୍ଠତା ହାସଲ କରିଥିବା ଦଳକୁ ସରକାର ଗଠନ ଲାଗି ଆହ୍ଵାନ କରିବେ ରାଷ୍ଟ୍ରପତି।
