ଭୁବନେଶ୍ବର: କେରଳକୁ ମୌସୁମୀ ଛୁଇଁଲାଣି ହେଲେ ଓଡ଼ିଶାକୁ କଲବଲ କରୁଛି ଖରା । ଆଜି ରାଜ୍ଯରେ ପ୍ରବଳ ଗ୍ରୀଷ୍ମପ୍ରବାହ ନେଇ ସତର୍କତା ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର । ହିଟ୍ ୱେବ୍ ସହ ଉଷ୍ମ ରାତି ଓ ଉପକୂଳରେ ହଟ୍ ଆଣ୍ଡ ହ୍ୟୁମିଡ ସ୍ଥିତି ଜାରି ରହିବ।
ଝାରସୁଗୁଡ଼ା, ସମ୍ବଲପୁର, ସୋନପୁର, ବୌଦ୍ଧ, କନ୍ଧମାଳ, ବଲାଙ୍ଗୀରକୁ ହିଟ୍ ୱେବ୍ ନେଇ ଅରେଞ୍ଜ ଆଲର୍ଟ ଜାରି ହୋଇଛି । ସୁନ୍ଦରଗଡ, ଦେବଗଡ଼, କେନ୍ଦୁଝର, ଖୋର୍ଦ୍ଧା, ଗଞ୍ଜାମ, ଗଜପତି, ବରଗଡ଼, ନୂଆପଡ଼ା, କଳାହାଣ୍ଡି ଓ ମାଲକାନଗିରିକୁ ୟେଲୋ ଆଲର୍ଟ ଜାରି କରାଯାଇଛି । କିଛି ସ୍ଥାନରେ କାଳବୈଶାଖୀ ସମ୍ଭାବନା ମଧ୍ଯ ରହିଛି ।
ନନ୍ଦିଘୋଷ ବ୍ୟୁରୋ: ଆଧାର ଓ ପାନ୍ ଲିଙ୍କ ଅବଧିର ଆଜି ଶେଷ ଦିନ। ଏନେଇ ରିମାଇଣ୍ଡର ଜାରି କରିଛି ଆୟକର ବିଭାଗ। ଯଦି ଏହି ଲିଙ୍କ ନିର୍ଦ୍ଦିଷ୍ଟ ତାରିଖ ମଧ୍ଯରେ କରା ନଯାଏ ତେବେ ଆୟକର ଆଇନର ଧାରା ୨୦୬ଏଏ ଓ ଧାରା ୨୦୬ ସିସି ଅନୁସାରେ ଦୁଇଗୁଣ ଟାକ୍ସ ଡିଡକ୍ସନ ଆଟ ସୋର୍ସ ବା ଟିଡିଏସ ଲାଗୁ ହେବ ବୋଲି ଆୟକର ବିଭାଗ କହିଛି।
ପୂର୍ବରୁ ଗତ ଏପ୍ରିଲ ୨୩ ତାରିଖରେ କେନ୍ଦ୍ରୀୟ ପ୍ରତ୍ୟେକ୍ଷ କର ପରିଷଦ ବା ସିବିଡିଟି ପକ୍ଷରୁ ତୁରନ୍ତ ପାନ ଓ ଆଧାର ଲିଙ୍କ ଲାଗି ସର୍କୁଲାର ଜାରି କରାଯାଇଥିଲା। ଆଧାର ସହ ପାନ କାର୍ଡର ଲିଙ୍କକୁ ବାଧ୍ଯତାମୂଳକ କରିଛି ଆୟକର ବିଭାଗ। ଏପରିକି ଏହି ଲିଙ୍କ ନ କଲେ ପାନ୍ କାର୍ଡ ଅଚଳ ହୋଇଯିବ ବୋଲି ସତର୍କ କରାଯାଇଛି। ତେବେ ଯେଉଁମାନେ ଆୟକରରୁ ଛାଡ ପାଇଛନ୍ତି ସେମାନଙ୍କ ଲାଗି କୌଣସି ସମସ୍ଯା ନାହିଁ ବୋଲି କହିଛି ଆୟକର ବିଭାଗ।
ବେଙ୍ଗାଲୁରୁ: ଅନେକ ମହିଳାଙ୍କ ସହ ଯୌନ ଉତ୍ପୀଡନ ମାମଲାର ଅଭିଯୁକ୍ତ ଜନତା ଦଳ (ସେକ୍ୟୁଲାର) ସାଂସଦ ପ୍ରଜ୍ଜ୍ବଳ ରେବନ୍ନା ଗିରଫ । ବେଙ୍ଗାଲୁରୁ ପହଞ୍ଚିବା କ୍ଷଣି ତାଙ୍କୁ ଗିରଫ କରାଯାଇଛି ।ଜର୍ମାନୀରୁ ଫେରିବା ପରେ ତାଙ୍କୁ ବିମାନ ବନ୍ଦରରୁ ଗିରଫ କରି ଏସଆଇଟି ଅଧିକ ପଚରାଉଚୁରା ପାଇଁ ସିଆଇଡି କାର୍ଯ୍ୟାଳୟ ଆଣିଛି । ଏହା ପୂର୍ବରୁ ତାଙ୍କ ଆଗୁଆ ଜାମିନ ଆବେଦନକୁ ଖାରଜ କରିଦେଇଥିଲା ସ୍ଥାନୀୟ କୋର୍ଟ ।
ପୂର୍ବତନ ପ୍ରଧାନମନ୍ତ୍ରୀ ଏଚଡି ଦେବ ଗୌଡାଙ୍କ ନାତି ପ୍ରଜୱାଲ ରେବନ୍ନାଙ୍କ ବିରୁଦ୍ଧରେ ମହିଳାଙ୍କୁ ଯୌନ ଶୋଷଣ ଅଭିଯୋଗ ହୋଇଥିଲା । ନିଜ ନିର୍ବାଚନମଣ୍ଡଳୀରେ ଲୋକସଭା ନିର୍ବାଚନ ଭୋଟ୍ ଦେବାର ଗୋଟିଏ ଦିନ ପରେ ପ୍ରଜ୍ବଲ ଏପ୍ରିଲ ୨୭ରେ ବିଦେଶ ପଳାଇଥିଲେ। ଗିରଫ ହେବାର ୨୪ ଘଣ୍ଟା ମଧ୍ୟରେ ଏସଆଇଟି ପ୍ରଜ୍ବଲ ରେଭାନ୍ନାଙ୍କୁ କୋର୍ଟରେ ହାଜର କରି ରିମାଣ୍ଡରେ ନେବେ।
ସୁନ୍ଦରଗଡ: କେମିତି ଚାଲିଗଲା ୧୪ ଜଣଙ୍କ ଜୀବନ । ଗତକାଲି ସୁନ୍ଦରଗଡ଼ ଜିଲ୍ଲାରେ ୧୪ ଜଣଙ୍କ ମୃତ୍ଯୁକୁ ନେଇ ଚାଞ୍ଚଲ୍ଯ ଖେଳିଯାଇଛି । ସୁନ୍ଦରଗଡ଼ ମେଡିକାଲରେ ୪ ଓ ରାଉରକେଲା ସରକାରୀ ଡାକ୍ତରଖାନାରେ ୧୦ ଜଣଙ୍କ ମୃତ୍ଯୁ ହୋଇଛି ।
ମୃତ୍ଯୁର କାରଣ ଅସ୍ପଷ୍ଟ ରହିଥିବାବେଳେ ଅଂଶୁଘାତରେ ଜୀବନ ଯାଇଥିବା ସନ୍ଦେହ କରାଯାଉଛି । ୧୫ ଜଣଙ୍କ ଅବସ୍ଥା ଗୁରୁତର ରହିଛି । ସେମାନଙ୍କ ମଧ୍ଯରୁ ୧୧ ଜଣ ରାଉରକେଲା ସରକାରୀ ଡାକ୍ତରଖାନା ଓ ଅନ୍ଯ ୪ ଜଣ ଘରୋଇ ହସପିଟାଲରେ ଚିକିତ୍ସାଧୀନ ଅଛନ୍ତି । ସ୍ବତନ୍ତ୍ର ଡାକ୍ତରୀ ଦଳ ସମସ୍ତଙ୍କ ଉପରେ ନଜର ରଖିଛନ୍ତି ।
ରାଉରକେଲା ମହାନଗର ନିଗମ କମିଶନର ଓ ପାନପୋଷ ଉପଜିଲ୍ଲାପାଳ ଡାକ୍ତରଖାନାରେ ପହଞ୍ଚି ସ୍ଥିତି ଅନୁଧ୍ୟାନ କରିବା ସହ ଡାକ୍ତରଙ୍କ ସହ ଆଲୋଚନା କରିଛନ୍ତି । କେଉଁ ପରିସ୍ଥିତିରେ ଓ କେଉଁ କାରଣରୁ ସମସ୍ତଙ୍କର ମୃତ୍ଯୁ ହେଲା ସେନେଇ ତଦନ୍ତ କରାଯାଉଛି ।
ଭୁବନେଶ୍ବର: ଆଦର୍ଶ ଆଚରଣ ବିଧିର ଖୋଲାଖୋଲି ଉଲ୍ଲଂଘନ। ଅନ୍ଯ କେହି ନୁହଁ, ଖୋଦ ଗଣମାଧ୍ଯମ କଲେ ଆଚରଣ ବିଧି ଉଲ୍ଲଂଘନ। ଦଳୀୟ ସ୍ବାର୍ଥ ଲାଗି ନୀତି ଓ ନୈତିକତା ହରାଇଲେ ଗଣମାଧ୍ଯମ ସଂସ୍ଥା। ନିର୍ବାଚନ କମିଶନଙ୍କ ଗାଇଡଲାଇନକୁ ହେୟଜ୍ଞାନ କଲେ ଓ-ଟିଭି ଓ ଏହାର ଡିଜିଟାଲ ପୋର୍ଟାଲ ଓଡ଼ିଶା ରିପୋର୍ଟର ଏବଂ ଅର୍ଗସ ନ୍ଯୁଜ। ଏହା ବିରୋଧରେ ମୁଖ୍ଯ ନିର୍ବାଚନ ଅଧିକାରୀଙ୍କ ନିକଟରେ ଫେରାଦ ହୋଇଛନ୍ତି ବିଜେଡି ଟିମ। ବିଜେଡି ଟିମ ଦର୍ଶାଇଛି- ଏହି ୩ଟି ସଂସ୍ଥାର ମନମାନିକୁ ଦେଖିଲେ ଲାଗୁଛି ସତେ ଯେପରି ଦୁଇ ପ୍ରକାର ଆଚରଣ ବିଧି ନିୟମ ରହିଛି। ଗୋଟିଏ ବିଧି ଓ-ଟିଭି, ଏହାର ଡିଜିଟାଲ ପୋର୍ଟାଲ ଓଡ଼ିଶା ରିପୋର୍ଟର ଏବଂ ଅର୍ଗସ ନ୍ଯୁଜ ଲାଗି। ଅନ୍ଯ ଟିଭି ଚାନେଲ ଲାଗି ଅନ୍ଯ ପ୍ରକାର ନୀତି। ଓ-ଟିଭି ପକ୍ଷରୁ ଓଡ଼ିଶା ବିଜେପି ଲାଗି ପେଡ ନ୍ୟୁଜ ହିସାବରେ ଏକ ପ୍ରଚାର ଅଭିଯାନ କରାଯାଇଛି। ଏଥିରେ ଜଣେ ବିଜେପି ନେତା ତଥା ଏମପି ପ୍ରାର୍ଥୀ ପ୍ରଦୀପ ପାଣିଗ୍ରାହୀ ସିଧାସଳଖ ବିଜେପିକୁ ଭୋଟ ଦେବା ଲାଗି ଭୋଟରଙ୍କୁ ଆହ୍ବାନ କରୁଛନ୍ତି। ଏପରିକି ନିଷିଦ୍ଧ ସମୟକାଳରେ ବି ଏହା ପ୍ରସାରିତ ହୋଇଥିବା ଦେଖାଯାଇଛି। ବିଜେପିକୁ ଭୋଟ ଦିଅନ୍ତୁ ଏବଂ ଏକ ନୂଆ ଓଡ଼ିଶା ଗଢିବା ବୋଲି ସେ କହୁଛନ୍ତି। ସେହିପରି ଆସନ୍ତା ଜୁନ ୧ ତାରିଖରେ ହେବାକୁ ଯାଉଥିବା ନିର୍ବାଚନ ପରିପ୍ରେକ୍ଷୀରେ ଏକ ନିର୍ଦ୍ଦିଷ୍ଟ ନିର୍ବାଚନ ମଣ୍ଡଳିର ଜନମତକୁ ପ୍ରସାରିତ କରାଯାଇଛି। ଏହି ପ୍ରସାରଣର ବିଭିନ୍ନ ପ୍ରମାଣ ବି ସିଇଓଙ୍କ ନିକଟରେ ଦାଖଲ କରିଥିଲେ ବିଜେଡି ଟିମ। ତେଣେ ଆସନ୍ତା ୧ ତାରିଖରେ ଭୋଟ ହେବାକୁ ଯାଉଥିବା ଯାଜପୁର ଜିଲ୍ଲା ସମ୍ପର୍କରେ ଏକ ବ୍ଯାପକ ତର୍କବିତର୍କ କାର୍ଯ୍ୟକ୍ରମ ପରିବେଷଣ କରିଛି ଅର୍ଗସ ନ୍ଯୁଜ। ଆଦର୍ଶ ଆଚରଣ ବିଧି ଅନୁସାରେ ନିଷିଦ୍ଧ ସମୟ ପରେ କୌଣସି ତର୍କ ବିତର୍କ କିମ୍ବା ସାକ୍ଷାତକାର ପ୍ରସାରଣ ହେବା କଥା ନୁହେଁ। ମାତ୍ର ଅର୍ଗସ ନ୍ୟୁଜ ତର୍କବିତର୍କ କାର୍ଯ୍ୟକ୍ରମ ପରିବେଷଣ କରି ଆଚରଣ ବିଧି ଉଲ୍ଲଂଘନ କରିଛି। ପ୍ରମାଣ ସ୍ବରୂପ ଏହାର ସ୍କ୍ରିନସଟ ଓ ୱେବ ଲିଙ୍କ ସିଇଓଙ୍କୁ ପ୍ରଦାନ କରିଛି ବିଜେଡି ଟିମ। ୧୯୫୧ ଜନ ପ୍ରତିନିଧି ଆଇନ ଅନୁସାରେ ଓ-ଟିଭି, ଓଡ଼ିଶା ରିପୋର୍ଟର ଓ ଅର୍ଗସ ନ୍ଯୁଜ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛି ବିଜେଡି। ଯଦି ଏହି ସଂସ୍ଥାଗୁଡିକ ବିରୋଧରେ କାର୍ଯ୍ୟାନୁଷ୍ଠାନ ନିଆ ନଯାଏ ତେବେ ମୁକ୍ତ ଓ ଅବାଧ ନିର୍ବାଚନ ପ୍ରକ୍ରିୟାରେ ବାଧା ସୃଷ୍ଟି ହେବ ବୋଲି କହିଛି ବିଜେଡି।
ରାଉରକେଲା: ସୁନ୍ଦରଗଡ଼ ଜିଲ୍ଲାରେ ଗୋଟିଏ ଦିନରେ ୧୪ ଜଣଙ୍କ ଅସ୍ବାଭାବିକ ମୃତ୍ୟୁ। ରାଉରକେଲାରେ ଗୋଟିଏ ଦିନରେ ୧୦ ଜଣଙ୍କ ମୃତ୍ୟୁ ହୋଇଥିବା ବେଳେ, ସୁନ୍ଦରଗଡ଼ରେ ୪ ଜଣଙ୍କ ଜୀବନ ଯାଇଛି। ୧୫ ଜଣଙ୍କ ଗୁରୁତର ଅଛନ୍ତି। ସମସ୍ତଙ୍କୁ ରାଉରକେଲା ସରକାରୀ ହସପିଟାଲରେ ଚିକିତ୍ସା କରାଯାଉଛି। ଗୁରୁତର ଥିବା ୪ ଜଣଙ୍କୁ ଘରୋଇ ହସପିଟାଲକୁ ସ୍ଥାନାନ୍ତର କରାଯାଇଛି। ମୃତ୍ୟୁର କାରଣ ଅସ୍ପଷ୍ଟ ଥିବା ବେଳେ, ଅଂଶୁଘାତରୁ ଜୀବନ ଯାଇଥିବା ସନ୍ଦେହ କରାଯାଉଛି। ଆରଜିଏଚରେ ରାଉରକେଲା ମହାନଗର ନିଗମ କମିଶନର ଓ ପାନପୋଷ ଉପଜିଲ୍ଲାପାଳ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି। ମୃତ ୧୦ ଜଣଙ୍କ ମଧ୍ୟରୁ ୯ ଜଣଙ୍କ ପରିଚୟ ମିଳିଥିବା ବେଳେ, ଜଣଙ୍କ ପରିଚୟ ମିଳିନାହିଁ। ସୁନ୍ଦରଗଡ଼ରେ ୪ ମୃତକଙ୍କ ମୁଣ୍ଡ ବୁଲାଇବା ସହ ଅସ୍ବାଭାବିକ ଅନୁଭୂତି ନେଇ ମେଡିକାଲରେ ଭର୍ତ୍ତି ହୋଇଥିଲେ । ଚିକିତ୍ସାଧୀନ ଅବସ୍ଥାରେ ଜିଲ୍ଲା ମୁଖ୍ୟ ଚିକିତ୍ସାଳୟରେ ସେମାନଙ୍କର ମୃତ୍ୟୁ ହୋଇଛି। ଶବ ବ୍ୟବଚ୍ଛେଦ ପରେ ପ୍ରକୃତ କାରଣ ଜଣାପଡିବ ବୋଲି ଅତିରିକ୍ତ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ସୂଚନା ଦେଇଛନ୍ତି।
ନନ୍ଦିଘୋଷ ବ୍ୟୁରୋ: ସରିଲା ଶେଷ ପର୍ଯ୍ୟାୟ ଲାଗି ପ୍ରଚାର । ଆଉ ଦିନକ ପରେ ପଡିବ ଭୋଟ । ଏନେଇ ବ୍ଯାପକ ପ୍ରସ୍ତୁତି ଶେଷ କରିଛନ୍ତି ରାଜ୍ଯ ନିର୍ବାଚନ ଅଧିକାରୀ । ଚତୁର୍ଥ ପର୍ଯାୟରେ ୬ଟି ସଂସଦୀୟ କ୍ଷେତ୍ରର ୪୨ଟି ବିଧାନସଭା କ୍ଷେତ୍ରରେ ହେବ ନିର୍ବାଚନ। ଚତୁର୍ଥ ପର୍ଯାୟରେ ସବୁଠାରୁ ଅଧିକ ଭୋଟର ରହିଛନ୍ତି | 99.61 ଲକ୍ଷ ଭୋଟର ମତଦାନ କରିବେ | ପୁରୁଷ ଭୋଟର ୫୦.୮୮ ଲକ୍ଷ ,ମହିଳା ଭୋଟର ୪୮.୭୨ ଲକ୍ଷ ରହିଛନ୍ତି । ୧୦ ହଜାର ୮୮୨ଟି ମତଦାନ କେନ୍ଦ୍ରରେ ଭୋଟର ମତଦାନ କରିବେ ବୋଲି କହିଛନ୍ତି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ । ୧୪୦୦ ବୁଥ ମହିଳାଙ୍କ ଦ୍ୱାରା ପରିଚାଳିତ ହେବ | ୨୦% ଆଦର୍ଶ ବୁଥ ରହିଛି । ୭୦ ହଜାରରୁ ଅଧିକ ପୋଲିଂ କର୍ମଚାରୀ ନିୟୋଜିତ ହେବେ | ଚତୁର୍ଥ ପର୍ଯାୟ ନିର୍ବାଚନ ପାଇଁ ୪୬୦ ଜଣ ପ୍ରାର୍ଥୀ ଅଛନ୍ତି | ଚଳିତଥର ଚତୁର୍ଥ ପର୍ଯାୟରେ ୩୯୪ ବିଧାନସଭା ପ୍ରାର୍ଥୀ, ୬୬ ଲୋକସଭା ପ୍ରାର୍ଥୀ ନିଜ ଭାଗ୍ୟ ପରୀକ୍ଷା କରୁଛନ୍ତି । ସୁରକ୍ଷା ପାଇଁ ଭୋଟ କେନ୍ଦ୍ର ନିକଟରେ ୧୨୫ କମ୍ପାନୀ CAPF ମୃତୟନ ହୋଇଛନ୍ତି | ଯାଜପୁର 20, ବାଲେଶ୍ୱର 22, କେନ୍ଦ୍ରାପଡ଼ା 18, ଭଦ୍ରକ 16, ଜଗତସିଂହପୁର 12, ମୟୂରଭଞ୍ଜ 18, କଟକ 12, ପୁରୀରେ 7 କମ୍ପାନୀ CAPF ମୁତୟନ କରାଯାଇଛି । PWD ଭୋଟରଙ୍କ ପାଇଁ ନିଃଶୁଳ୍କ ପରିବହନ ବ୍ୟବସ୍ଥା ହୋଇଛି | ପୋଲିଂ ବୁଥକୁ ମୋବାଇଲ ମନା ରହିଛି | ଏଜେଣ୍ଟ ଓ ଭୋଟର ବୁଥ କୁ ମୋବାଇଲ ନେଇ ପାରିବେ ନାହିଁ | କେବଳ ପ୍ରି ଜାଡିଙ୍ଗ ଅଫିସର ମୋବାଇଲ ନେଇପାରିବେ। 2019ରେ ଏହି 6 ଟି ସଂସଦୀୟ କ୍ଷେତ୍ରରେ 74% ମତଦାନ ହାର ରହିଥିଲା | ବୋଲଗଡ଼ର ବୁଥ ଭିତର ସିସିଟିଭି ଭିଡିଓ ଭାଇରାଲ ଘଟଣାରେ ତଦନ୍ତ କରି ରିପୋର୍ଟ ଦେବେ ଖୋର୍ଦ୍ଧା ଜିଲ୍ଲାପାଳ |
ନନ୍ଦିଘୋଷ ବ୍ୟୁରୋ: ଚାନ୍ଦବାଲି ନିର୍ବାଚନ ମଣ୍ଡଳୀର କରଞ୍ଜମାଳ ପଞ୍ଚାୟତରେ ଲୋକଙ୍କୁ ଟଙ୍କା ବାଣ୍ଟି ଆକ୍ରୋଶର ଶିକାର ହେଲେ ବିଜେପି ରାଜ୍ୟ ଯୁବମୋର୍ଚ୍ଚା ସଭାପତି ଅଭିଳାଷ ପଣ୍ଡା । ଆଜି ପ୍ରଚାର ସମୟର ଅବଧି ଶେଷ ହେବା ପରେ ବିଜେପିର ଏହି ଯୁବ ନେତା କିଛି ସହଯୋଗୀଙ୍କୁ ଧରି କରଞ୍ଜମାଳ ପଂଚାୟତରେ ଭୋଟରମାନଙ୍କୁ ଟଙ୍କା ବାଣ୍ଟିବାକୁ ପହଞ୍ଚିଥିଲେ। ଏହାକୁ ବିରୋଧ କରିଥିଲେ ସ୍ଥାନୀୟ ବାସିନ୍ଦା ଓ ସେଠାରେ ଉପସ୍ଥିତ ଥିବା ବିଜେଡି କର୍ମୀ। ଏଥିରେ ଉତକ୍ଷିପ୍ତ ହୋଇ ଅଭିଳାଷ ପଣ୍ଡା ଓ ତାଙ୍କ ସହଯୋଗୀ ବିଜେଡି କର୍ମୀଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରିଥିଲେ। ଏହାପରେ ବିଜେପି କର୍ମୀ ଆଖିବୁଜା ଆକ୍ରମଣ ଆରମ୍ଭ କରି ଦେଇଥିଲେ। ଏଥିରେ ବିଜେଡି ନେତା ରମେଶ ନାୟକ ଓ ତାଙ୍କ ଭାଇ ଅକ୍ଷୟ ନାୟକ ଗୁରୁତର ଆହତ ହୋଇ ବାସୁଦେବପୁର ଡାକ୍ତରଖାନାରେ ଭର୍ତ୍ତି ହୋଇଛନ୍ତି । ଘଟଣା ସ୍ଥଳରେ ବାଂଶଡା ପୋଲିସ ପହଞ୍ଚି ତଦନ୍ତ ଚାଲୁ ରଖିଛି।
ନନ୍ଦିଘୋଷ ବ୍ୟୁରୋ: ଝାରସୁଗୁଡ଼ାରେ ଅଗ୍ନିବର୍ଷା। ରେକର୍ଡ ହେଲା ଚଳିତ ସିଜିନର ସର୍ବୋଚ୍ଚ ତାପମାତ୍ରା। ଝାରସୁଗୁଡ଼ାରେ ୪୭ ଡିଗ୍ରୀ ଛୁଇଁଲା ଦିନର ତାପମାତ୍ରା। ଝାରସୁଗୁଡ଼ାରେ ମେ ମାସରେ ଏହା ସର୍ବକାଳୀନ ରେକର୍ଡ। ଆଜିର ତାପମାତ୍ରାକୁ ମିଶାଇ ଝାରସୁଗୁଡ଼ାରେ ୬ ଥର ତାପମାତ୍ରା ୪୭ ଡିଗ୍ରୀ ଉପରେ ରହିଛି। ୧୯୯୮ ମେ ୨୮ ତାରିଖରେ ଝାରସୁଗୁଡ଼ାରେ ତାପମାତ୍ରା ୪୮ ଡିଗ୍ରୀ ରେକର୍ଡ ହୋଇଥିଲା। ଆଜି ରାଜ୍ୟରେ ୪୦ ଡିଗ୍ରୀ ଉପରେ ରହିଛି ୧୯ ସହରର ତାପମାତ୍ରା। ଟିଟିଲାଗଡ଼ରେ ତାପମାତ୍ରା ୪୬ ଦଶମିକ ୫ ଡିଗ୍ରୀ ଥିବା ବେଳେ, ବରଗଡ଼ରେ ୪୬ ଦଶମିକ ୩, ସମ୍ବଲପୁରରେ ୪୬.୨, ସୋନପୁର ଓ ମାଲକାନଗିରିରେ ୪୫.୬, ଭବାନୀପାଟଣାରେ ୪୫.୫ ଡିଗ୍ରୀ ତାପମାତ୍ରା ରେକର୍ଡ ହୋଇଛି। ସେହିପରି ବଲାଙ୍ଗୀରରେ ୪୫.୩ ଡିଗ୍ରୀ ତାପମାତ୍ରା ଥିବା ବେଳେ, ହୀରାକୁଦରେ ୪୫.୨, ରାଉରକେଲାରେ ୪୪.୯, ନୂଆପଡ଼ାରେ ୪୪.୫, ବୌଦ୍ଧରେ ୪୪.୧, ସୁନ୍ଦରଗଡ଼ରେ ୪୩.୬, ଫୁଲବାଣୀରେ ୪୩.୪, ଅନୁଗୁଳରେ ୪୨.୩, ତାଳଚେରରେ ୪୨.୨, କେନ୍ଦୁଝରରେ ୪୧.୪, ପାରଳାଖେମୁଣ୍ଡିରେ ୪୦.୪ ଓ ରାୟଗଡ଼ାରେ ତାପମାତ୍ରା ୪୦.୨ ଡିଗ୍ରୀ ରେକର୍ଡ ହୋଇଛି। ଏପଟେ ପ୍ରଚଣ୍ଡ ଗ୍ରୀଷ୍ମ ପ୍ରବାହ ମଧ୍ୟରେ ଆସିଛି ଆଶ୍ୱସ୍ତିକର ଖବର । ସମୟ ପୂର୍ବରୁ କେରଳ ଛୁଇଁଛି ଦକ୍ଷୀଣ ପଶ୍ଚିମ ମୌସୁମୀ ବାୟୁ । ଏନେଇ ଭାରତୀୟ ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଛି । ମୌସୁମୀ ବାୟୁ ପ୍ରଭାବରେ କେରଳର ଅନେକ ଅଂଚଳରେ ବର୍ଷା ଆରମ୍ଭ ହୋଇଯାଇଛି । ପୂର୍ବରୁ ମେ ୩୦ରେ ମୌସୁମୀ କେରଳ ଛୁଇଁବା ନେଇ ଆକଳନ କରିଥିଲା ପାଣିପାଗ ବିଭାଗ । ତେବେ ଜୁନ ୧୨ ତାରିଖ ପରେ ଓଡ଼ିଶାରେ ମୌସୁମୀ ପହଁଚିବାର ସମ୍ଭାବନା ରହିଛି । ଚଳିତ ବର୍ଷ ଭଲ ବର୍ଷା ହେବା ନେଇ ମଧ୍ୟ ପୂର୍ବାନୁମାନ କରାଯାଇଛି।
ନନ୍ଦିଘୋଷ ବ୍ୟୁରୋ: ଡେଙ୍ଗୁ ଜ୍ବରର ଟିକାକୁ ଗ୍ରୀନ ସିଗନାଲ। ଜାପାନର ଫାର୍ମାସ୍ଯୁଟିକାଲ କମ୍ପାନି ତାକେଡା ଫାର୍ମାସ୍ଯୁଟିକାଲ କମ୍ପାନୀର ଟିକାକୁ ଅନୁମୋଦନ କରିଛନ୍ତି ବିଶ୍ବ ସ୍ବାସ୍ଥ୍ଯ ସଂଗଠନ। ଏହି ଟିକା ଡେଙ୍ଗୁ ଭୂତାଣୁର ଚାରିଟି ଷ୍ଟେରିଓଟାଇପ କବଳରୁ ରକ୍ଷା କରିପାରିବ। ବିଶେଷ କରି ୬ରୁ ୧୬ ବର୍ଷର ପିଲାଙ୍କୁ ଏହି ଟିକା ଦିଆଯାଇପାରିବ। ସାଧାରଣତଃ ମଶା କାମୁଡାରୁ ଡେଙ୍ଗୁ ଜ୍ବର ହୋଇଥାଏ। ପ୍ରବଳ ଜ୍ବର, ମୁଣ୍ଡ ଓ ଶରୀର ବ୍ଯଥା ଆଦି ଡେଙ୍ଗୁ କ୍ଷେତ୍ରରେ ଦେଖାଯାଇଥାଏ। ତାକେଡା ଦ୍ବାରା ପ୍ରସ୍ତୁତ ଟିକା କିଦେଙ୍ଗା ବ୍ରାଣ୍ଡ ନାମର ନାମିତ କରାଯାଇଛି। ଭାରତୀୟ ଟିକା କମ୍ପାନି ବାୟୋଲୋଜିକାଲ- ଇ ସହ ଏହାର ଉତ୍ପାଦନ ଲାଗି ଏକ ରାଜିନାମା ସ୍ବାକ୍ଷରିତ କରିଛି କିଦେଙ୍ଗା। ବାର୍ଷିକ ୧୦୦ ନିୟୁତ ଡୋଜ ପ୍ରସ୍ତୁତ କରାଯିବ ବୋଲି ଲକ୍ଷ୍ଯ ରହିଛି। ଖୁବ ଶୀଘ୍ର ଆସିବ ଡେଙ୍ଗୁ ପ୍ରତିଷେଧକ ଟିକା। ଭାରତୀୟ ମେଡିକାଲ ଗବେଷଣା ପରିଷଦ ବା ଆଇସିଏମଆର, ପୁଣେସ୍ଥିତ ନ୍ଯାସନାଲ ଇନଷ୍ଟିଚ୍ଯୁଟ ଅଫ ଭିରୋଲୋଜି ବା ଏନଆଇଭି ଓ ଅନ୍ଯାନ୍ଯ ପ୍ରତିଷ୍ଠାନ ପକ୍ଷରୁ ଡେଙ୍ଗୁ ଟିକାର ତୃତୀୟ ପର୍ଯ୍ୟାୟ କ୍ଲିନିକାଲ ଟ୍ରାଏଲ ଆରମ୍ଭ ହେବ।
ଏନେଇ ସୂଚନା ଦେଇଛନ୍ତି କେନ୍ଦ୍ର ସ୍ବାସ୍ଥ୍ଯ ସଚିବ ଅପୂର୍ବ ଚନ୍ଦ୍ର। ଜେନେଭାରେ ବିଶ୍ବ ସ୍ବାସ୍ଥ୍ଯ ସଂଗଠନର ୭୭ତମି ବିଶ୍ବ ସ୍ବାସ୍ଥ୍ୟ ଆସେମ୍ବ୍ଲି ବା ଏମଏଚଏ ବୈଠକ ପରିପ୍ରେକ୍ଷୀରେ ଆୟୋଜିତ ବ୍ରିକସ ରାଷ୍ଟ୍ରଗୋଷ୍ଠୀ ସ୍ବାସ୍ଥ୍ୟମନ୍ତ୍ରୀ ବୈଠକରେ ଏହି ସୂଚନା ଦେଇଛନ୍ତି ଅପୂର୍ବ। ସେ କହିଛନ୍ତି ଗତ ମାର୍ଚ୍ଚ ୨୦୨୨ରେ ଭାରତର ସଭାପତିତ୍ବ କାଳରେ ବ୍ରିକସ ଭାକସିନ ରିସର୍ଚ୍ଚ ଆଣ୍ଡ ଡେଭଲେପମେଣ୍ଟ ସେଣ୍ଟର ପ୍ରତିଷ୍ଠା ହୋଇଥିଲା। ସେ ଆହୁରି କହିଛନ୍ତି- କେବଳ ଡେଙ୍ଗୁ ଲାଗି ନୁହଁ, କାଇସାନୁର ଫରେଷ୍ଟ ଜିଜିଜ ବା କେଏଫଡି, ନିପା ଭାଇରସ, ହ୍ଯୁମାନ ପାପିଲୋମାଭାଇରସ, ମାଇକୋବ୍ଯାକ୍ଟେରିଅମ ଟ୍ଯୁବରକୁଲେସିସ ଭାକ୍ସିନ ବା ଏମଟିବିଭିଏସିର ମୁକାବିଲା ଲାଗି ଗବେଷଣା ଓ ଟ୍ରାଏଲ ଲାଗି ମିଳିତ ଭାବେ କାର୍ଯ୍ୟ କରାଯାଉଛି। ସେହିପରି ନ୍ୟୁକ୍ଲିଅର ମେଡିସିନ ଓ ରେଡିଓଆକ୍ଟିଭ ଫାର୍ମାସ୍ଯୁଟିକାଲ ସାଇନସ କ୍ଷେତ୍ରରେ ବ୍ରିକସ ରାଷ୍ଟ୍ରଗୋଷ୍ଠୀ ସହ ଭାରତ ସହଭାଗିତା ଭିତ୍ତିରେ କାର୍ଯ୍ୟ କରୁଛି ବୋଲି ସେ କହିଛନ୍ତି।
