ନନ୍ଦିଘୋଷ ଟିଭି: ରାଜ୍ଯରେ ସରକାର ଗଠନ ପାଇଁ ଦିବାସ୍ବପ୍ନ ଦେଖୁଛି ବିଜେପି। ଯାହାକୁ ରାଜ୍ଯ ବିଜେପିର ଏକ ପୁରୁଣା ଅଭ୍ଯାସ ବୋଲି କହିଛନ୍ତି ବିଜେଡି ମୁଖପାତ୍ର ସସ୍ମିତ ପାତ୍ର। ୨୦୧୪ ନିର୍ବାଚନରେ ବି ସେମାନେ ରାଜ୍ୟରେ ସରକାର ଗଠନ କରିବେ ବୋଲି ଦିବାସ୍ବପ୍ନ ଦେଖିଥିଲେ । ସେହିପରି ୨୦୧୯ରେ ମଧ୍ଯ ବିଜେପି ସରକାର ଗଠନ କରିବା ନେଇ ଦିବାସ୍ବପ୍ନ ଦେଖିଥିଲେ। ତେଣୁ ଏଥର ମଧ୍ଯ ଦିବାସ୍ବପ୍ନ ଦେଖିବା କିଛି ନୂଆ କଥା ନୁହେଁ । ବିଜେପି ଓ ଦଳର ନେତାଙ୍କ ଦିବାସ୍ବପ୍ନକୁ ଶୁଭେଚ୍ଛା ଜଣାଇବା ସହ ସେମାନେ ଏଥିରେ ଦକ୍ଷ ହେବା ଭଲ କଥା ବୋଲି କହି କଟାକ୍ଷ କରିଛନ୍ତି ସସ୍ମିତ।
ନନ୍ଦିଘୋଷ ବ୍ୟୁରୋ: ଫଟାଫଟ କ୍ରିକେଟ ମହାକୁମ୍ଭ ଟି-୨୦ ବିଶ୍ବକପ ଚାଲିଥିବାବେଳେ ଫାଇନାଲ କାହା ମଧ୍ୟରେ ହେବ ତାକୁ ନେଇ କ୍ରିକେଟ ବିଶେଷଜ୍ଞମାନେ ନିଜର ମତ ଦେଉଛନ୍ତି । ତେବେ ପୂର୍ବତନ ଭାରତୀୟ କ୍ରିକେଟର ଯୁବରାଜ ସିଂ ନିଜର ଫାନାଲ ଆକଳନ କରିଛନ୍ତି । ସେ କହିଛନ୍ତି ଫାଇନାଲ ଖେଳିବା ପାଇଁ ୩ଟି ଟିମ୍ ଦାବିଦାର ଅଛନ୍ତି । ସେ କହିଛନ୍ତି କି, ଭାରତ, ପାକିସ୍ତାନ ଏବଂ ଓ୍ବେଷ୍ଟଇଣ୍ଡିଜ୍ ମୁଖ୍ୟ ଦାବିଦାର । ସେ ଏକ ଗଣମାଧ୍ୟମକୁ ନିଜର ପ୍ରତିକ୍ରିୟା ଦେବା ସମୟରେ ଏଭଳି କହିଛନ୍ତି । ସେପଟେ ଦିନିକିଆ ବିଶ୍ବକପ ଚାମ୍ପିୟନ ହୋଇଥିବା ଅଷ୍ଟ୍ରେଲିଆ ନାମ କହିଥିବାବେଳେ ହସିଥିଲେ ଯୁବରାଜ । ଅନ୍ୟପଟେ କହିଥିଲେ କି, ଏହି ଟୁର୍ଣ୍ଣାମେଣ୍ଟରେ ଋଷଭ ପନ୍ଥଙ୍କ ଉପରେ ସମସ୍ତଙ୍କ ନଜର ରହିବ ବୋଲି କହିଛନ୍ତି ଯୁବରାଜ ।
ନୀଳଗିରି : ଦଳିଲା ହାତୀ ହେଲେ ଭାଗ୍ୟ ଜୋର ଅଳ୍ପକେ ବର୍ତ୍ତିଗଲେ ଛାତ୍ରୀ ଜଣକ। ନୀଳଗିରି ଉପଖଣ୍ଡ ଟୁଲୁଙ୍କଡ଼ାବ ଗାଁରେ ଦେଖିବାକୁ ମିଳିଛି ଏଭଳି ଦୃଶ୍ୟ। ଶୌଚ ପାଇଁ ବାଡ଼ି ପଟକୁ ଯାଇଥିବା ବେଳେ ସତ୍ୟ ପଳେଇଙ୍କ ଝିଅ ଅନୁସୟାଙ୍କୁ ହାତୀଟି ଦଳି ଦେଇଥିଲା। ବାପାଙ୍କ ଉପସ୍ଥିତ ବୁଦ୍ଧି ଯୋଗୁ ଆସନ୍ନ ମୃତ୍ୟୁରୁ ବର୍ତ୍ତିଗଲେ ଅନୁସୟା ।
କୁଲଡିହା ଜଙ୍ଗଲରୁ ଖସି ଆସିଥିବା ହାତୀଟି ହଠାତ ତାଙ୍କୁ ଗୋଡ଼ାଇ ଥିଲା। ସେ ଏକ ଖାଲୁଆ କାଦ ସ୍ଥାନରେ ପଡ଼ି ଯାଇଥିବାବେଳେ ହାତୀଟି ଗୋଡ଼ ପକାଇ ଦଳି ଦେଇଥିଲା। ଝିଅର ଚିତ୍କାର ଶୁଣି ବାପା ପାଟି କରି ହାତୀକୁ ଘଉଡାଇଥିଲେ। ଅନୁସୟାଙ୍କୁ ଉଦ୍ଧାର କରି ନୀଳଗିରି ଡାକ୍ତରଖାନାରେ ଭର୍ତି କରାଯାଇଛି। ତାଙ୍କ ଦେହରେ ଗଭୀର ଆଘାତ ଲାଗିଛି। ଖବର ପାଇ କୁଲଡିହା ରେଞ୍ଜର ଓ ଫରେଷ୍ଟର ପହଞ୍ଚି ତଦନ୍ତ ଆରମ୍ଭ କରିଛନ୍ତି।
ନୂଆଦିଲ୍ଲୀ : ଗ୍ରାହକଙ୍କୁ ପୁଣି ଝଟକା । ଅମୁଲ ପରେ ମଦର ଡାଏରୀ ହେଲା ମହଙ୍ଗା । ଦେଶର ପ୍ରମୁଖ କ୍ଷୀର ଉତ୍ପାଦନକାରୀ କମ୍ପାନୀ ମଦର ଡାଏରୀ ଲିଟର ପିଛା କ୍ଷୀର ମୂଲ୍ୟରେ ୨ ଟଙ୍କା ବୃଦ୍ଧି ଘୋଷଣା କରିଛି । ସୋମବାରରୁ ଏହି ନୂଆ ଦର ଲାଗୁ ହୋଇଛି ।
ଦିଲ୍ଲୀ-ଏନସିଆରରେ ମଦର ଡାଏରୀ ଫୁଲ୍ କ୍ରିମ୍ କ୍ଷୀର ବର୍ତ୍ତମାନ ଲିଟର ପିଛା ୬୮ ଟଙ୍କାରେ ବିକ୍ରୀ ହେଉଥିବା ବେଳେ ଟୋନଡ ଓ ଡବଲ ଟୋନଡ କ୍ଷୀର ଲିଟର ପିଛା ୫୬ ଓ ୫୦ ଟଙ୍କା ରହିଛି । ମଇଁଷି କ୍ଷୀର ଲିଟର ପିଛା ୭୨ ଓ ଗାଈ କ୍ଷୀର ଲିଟର ପିଛା ୫୮ ଟଙ୍କା ରହିଛି । ଗୁଜୁରାଟ କୋଅପରେଟିଭ ମିଲ୍କ ମାର୍କେଟିଂ ଫେଡେରେଶନ ସାରା ଦେଶରେ ଆଜିଠାରୁ ଅମୁଲ କ୍ଷୀରର ମୂଲ୍ୟ ଲିଟର ପିଛା ୨ ଟଙ୍କା ବୃଦ୍ଧି କରିଛି । । ଶେଷଥର ପାଇଁ ଫେବୃଆରୀ ୨୦୨୩ରେ କ୍ଷୀରର ମୂଲ୍ୟ ବୃଦ୍ଧି କରିଥିଲା ମଦର ଡାଏରୀ ।
ଭୁବନେଶ୍ୱର : ଭଙ୍ଗ ହେବ ଷୋଡ଼ଶ ଓଡ଼ିଶା ବିଧାନସଭା । ଏ ନେଇ ରାଜ୍ଯ କ୍ଯାବିନେଟ ବୈଠକରେ ମୋହର ବାଜିଛି । ବିଧାନସଭା ଭଙ୍ଗ ନେଇ ରାଜ୍ଯପାଳଙ୍କୁ ସୁପାରିସ କରାଯାଇଛି । ଆଜି ପୂର୍ବାହ୍ନରେ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ଯକ୍ଷତାରେ ବସିଥିବା ଗୁରୁତ୍ବପୂର୍ଣ୍ଣ ବୈଠକରେ ସୁପାରିସ ପ୍ରସ୍ତାବ ପାରିତ ହୋଇଛି । ନବୀନଙ୍କ ପଞ୍ଚମ ପାଳି ସରକାରଙ୍କ ଆଜି ଶେଷ କ୍ଯାବିନେଟ ବୈଠକ ଥିଲା ।
ଭୁବନେଶ୍ୱର : ପ୍ରକାଶ ପାଇଲା ଓଜେଇଇ ପରୀକ୍ଷା ଫଳ । www.ojee.nic.inରେ ରେଜଲ୍ଟ ଉପଲବ୍ଧ ହୋଇଛି । ଛାତ୍ରଛାତ୍ରୀମାନେ ଏହି ୱେବସାଇଟକୁ ଯାଇ ନିଜର ରେଜଲ୍ଟ ଜାଣିପାରିବେ । ବି. ଫାର୍ମରେ ସାଗରିକା ଦାଶ ଟପ୍ପର ହୋଇଥିବା ବେଳେ, ଏମ୍. ଫାର୍ମରେ ପଦ୍ମାଳୟା ମିଶ୍ର, ଏମବିଏରେ ସୂର୍ଯ୍ୟକାନ୍ତ ପୃଷ୍ଟି, ଏମସିଏରେ ବ୍ରହ୍ମାନନ୍ଦ ମହରଣା, ସିଭିଲ ଇଞ୍ଜିନିୟରିଂରେ ରବୀନ୍ଦ୍ର ସାହୁ, ଇଲେକ୍ଟ୍ରିକାଲ ଇଞ୍ଜିନିୟରିଂରେ ପୂର୍ବପ୍ରିୟା ନାୟକ, ମେକାନିକାଲ ଇଞ୍ଜିନିୟରିଂରେ ଗୋବିନ୍ଦ ନାୟକ ଓ କମ୍ପ୍ୟୁଟର ସାଇନ୍ସରେ ଆକାଶ କୁମାର ଦାସ ଟପ୍ପର ହୋଇଛନ୍ତି।
ଚଳିତ ବର୍ଷ ମେ ମାସ ରେ ହୋଇଥଲା ପରୀକ୍ଷା। ଯେଁଉଥିରେ ୬୫ ହଜାର ୭୪୨ ଜଣ ପରୀକ୍ଷାର୍ଥୀ ପଞ୍ଜିକରଣ କରିଥିବା ବେଳେ, ୫୬ ହଜାର ୪୭ ଜଣ ପରୀକ୍ଷା ଦେଇଥିଲେ। ଯେଁଉଥିରୁ ୫୬ ହଜାର ପରୀକ୍ଷାର୍ଥୀ କୃତକାର୍ଯ୍ୟ ହୋଇଥିବା ବେଳେ ୨୩ଟି ବିଭାଗରେ ୨୩ ଜଣ ଟପ୍ପର ହୋଇଛନ୍ତି।
ନୂଆଦିଲ୍ଲୀ : ଭୋଟିଂରେ ଭାରତର ବିଶ୍ବ ରେକର୍ଡ । ଚବିଶ ନିର୍ବାଚନ ଐତିହାସିକ ବୋଲି କହିଛନ୍ତି ଦେଶର ମୁଖ୍ଯ ନିର୍ବାଚନ କମିଶନର ରାଜୀବ କୁମାର । ଭୋଟ୍ ଗଣତି ପୂର୍ବରୁ ଆଜି ଏକ ପ୍ରେସମିଟ୍ କରି ସମସ୍ତ ମତଦାତାଙ୍କୁ କୃତଜ୍ଞତା ଜଣାଇଛନ୍ତି ମୁଖ୍ଯ ନିର୍ବାଚନ କମିଶନର । ତେବେ ଚଳିତ ନିର୍ବାଚନରେ ୬୪ କୋଟିରୁ ଅଧିକ ମତଦାତା ନିଜର ମତାଧିକାର ସାବ୍ଯସ୍ତ କରିଥିବାବେଳେ ୩୧ କୋଟିରୁ ଅଧିକ ମହିଳା ଭୋଟର ମତଦାନ ପର୍ବରେ ସାମିଲ ହୋଇଛନ୍ତି ବୋଲି କହିଛନ୍ତି ଇସିଆଇ ।
ସେହିପରି ଜାମ୍ମୁ ଓ କାଶ୍ମୀରରେ ଗତ ୪ ଦଶନ୍ଧୀରେ ସବୁଠୁ ଅଧିକ ମତଦାନ ହୋଇଛି । ଉପତ୍ଯକାରେ ୫୧.୦୫ ପ୍ରତିଶତ ପୋଲିଂ ହୋଇଛି । ମାତ୍ର ୩୯ଟି ବୁଥରେ ପୁନର୍ବାର ମତଦାନ ହୋଇଛି । ସାରା ଦେଶରେ ଶାନ୍ତି ଶୃଙ୍ଖଳାର ସହ ପୋଲିଂ ସରିଛି । ସାତଟି ପର୍ଯ୍ୟାୟରେ ହୋଇଥିବା ମତଦାନରେ କୌଣସି ବଡ଼ ହିଂସାକାଣ୍ଡ ଘଟିନି । ଏହି ନିର୍ବାଚନରେ ୬୮ ହଜାର ମନିଟରିଂ ଟିମ, ଦେଢ କୋଟି ପୋଲିଂ ଓ ସୁରକ୍ଷା କର୍ମଚାରୀ ନିୟୋଜିତ ଥିଲେ । ୪ ଲକ୍ଷ ଯାନବାହାନ, ୧୩୫ ସ୍ବତନ୍ତ୍ର ଟେର୍ନ, ୧୬୯୨ ବିମାନ, ହେଲିକପ୍ଟର ଆଦି ବ୍ଯବହାର କରାଯାଇଥିଲା । ୪୯୫ ଆଚରଣ ବିଧି ଉଲ୍ଲଂଘନ ଅଭିଯୋଗରୁ ୯୦ ପ୍ରତିଶତ ସମାଧାନ ହୋଇଛି ।
ଭୁବନେଶ୍ୱର : ବିଧାନସଭାରେ ବିଜେଡିକୁ ୧୦୦ରୁ ୧୧୫ ଆସନ ମିଳିବା ସମ୍ଭାବନା । ଟାଇମ୍ସ ନାଓର ଓଡ଼ିଶା ବିଧାନସଭା ନିର୍ବାଚନ ଏକଜିଟ ପୋଲ୍ ରିପୋର୍ଟରେ ଏହା ପ୍ରକାଶ ପାଇଛି। ବିଜେଡି ଜିତିବ ୧୦୦ରୁ ୧୧୫ ବିଧାନସଭା ଆସନ । ବିଜେପିକୁ ୩୦ରୁ ୩୮ ଆସନ ମିଳିପାରେ । କଂଗ୍ରେସ ୪ରୁ ୭ଟି ଏବଂ ଅନ୍ୟାନ୍ୟ ୧ରୁ ୨ଟି ଆସନ ପାଇବେ। ବିଜେଡିକୁ ମିଳିବ ୪୭ ପ୍ରତିଶତ ଭୋଟ୍। ବିଜେପିକୁ ୩୮ ଓ କଂଗ୍ରେସକୁ ୧୧ପ୍ରତିଶତ ଭୋଟ୍ ମିଳିବ। ଅନ୍ୟାନ୍ୟ ୫ପ୍ରତିଶତ ଭୋଟ୍ ପାଇପାରନ୍ତି। ଟାଇମ୍ସ ନାଓର ଓଡ଼ିଶା ବିଧାନସଭା ନିର୍ବାଚନ ଏକଜିଟ ପୋଲ୍ ସର୍ଭେ ରିପୋର୍ଟରେ ଏହା ଆକଳନ କରାଯାଇଛି।
ନୂଆଦିଲ୍ଲୀ : ଏବେ ବିବାଦ ଘେରରେ ବଲିଉଡ ଅଭିନେତ୍ରୀ ରବୀନା ଟଣ୍ଡନ । ମୁମ୍ୱାଇରେ ରବୀନାଙ୍କ ନାଁରେ ହୋଇଥିବା ମାରପିଟ୍ ଅଭିଯୋଗକୁ ନେଇ ସତ ସାମ୍ନାକୁ ଆସିଛି । ଶନିବାର ରାତିରେ ରବୀନା ତାଙ୍କ ଡ୍ରାଇଭରକୁ ରକ୍ଷା କରିବାକୁ ଚେଷ୍ଟା କରିବା ବେଳେ ତାଙ୍କୁ ଆକ୍ରମଣ କରାଯାଇଥିଲା । କିନ୍ତୁ ଜଣେ ବୃଦ୍ଧାଙ୍କ ସମେତ ୩ଜଣ ମହିଳାଙ୍କ ସହ ମାରପିଟ୍ କରିବା ନେଇ ରବୀନାଙ୍କ ନାଁରେ ଅଭିଯୋଗ ହୋଇଥିଲା। କିନ୍ତୁ ସିସିଟିଭି ଫୁଟେଜ ଅନୁଯାୟୀ ଏହା ମିଥ୍ୟା ଅଭିଯୋଗ କରାଯାଇଥିବା କୁହାଯାଉଛି । ଏହି ଘଟଣାକୁ ନେଇ ରବୀନା କୌଣସି ବୟାନ ଜାରି କରିନାହାନ୍ତି ।
ଅନ୍ୟପକ୍ଷେ ତଦନ୍ତ କରୁଥିବା ବରିଷ୍ଠ ପୋଲିସ ଅଧିକାରୀ କହିଛନ୍ତି ଯେ, ଅଭିଯୋଗକାରୀମାନେ ରବୀନା ଟଣ୍ଡନଙ୍କ ନାଁରେ ମିଥ୍ୟା ଅଭିଯୋଗ ଆଣିଛନ୍ତି । ଘଟଣାକୁ ନେଇ ସମ୍ପୂର୍ଣ୍ଣ ସିସିଟିଭି ଫୁଟେଜ ଯାଞ୍ଚ କରାଯାଇଛି । ଏଥିରେ ଅଭିନେତ୍ରୀଙ୍କ ଡ୍ରାଇଭର କାର୍ ପଛକୁ କରି ପାର୍କିଂ କରୁଥିବା ବେଳେ , ସେହି ରାସ୍ତା ଦେଇ ମହିଳାଙ୍କ ଏକ ଗ୍ରୁପ୍ ଯାଉଥିଲେ ଏବଂ ସେମାନେ କହିଥିଲେ କି କାର୍ ବ୍ୟାକ୍ କରିବା ବେଳେ ପଛରେ କେହି ଅଛନ୍ତି କି ନାହିଁ ଦେଖିକି ବ୍ୟାକ୍ କରନ୍ତୁ । ଏହି କଥାକୁ ନେଇ ଯୁକ୍ତିତର୍କ ଆରମ୍ଭ ହୋଇଯାଇଥିଲା । କିନ୍ତୁ କାର କାହାକୁ ଧକ୍କା ମାରି ନାହିଁ କି କେହି ଆହତ ହୋଇନଥିବା ନେଇ ପୋଲିସ ସ୍ପଷ୍ଟ କରିଛି ।
ରବୀନା ନିଜ ଉପରେ ଲାଗିଥିବା ଏପରି ଅଭିଯୋଗକୁ ନେଇ ଇଷ୍ଟାଗ୍ରାମରେ ଷ୍ଟୋରୀ ଅପଲୋଡ କରିଥିଲେ । ସେ କହିଥିଲେ କି ଯେଉଁପ୍ରକାର ଏହି ଘଟଣାକୁ ଦର୍ଶାଯାଇଛି, ସେଥିରେ ସେ ଭୁଲ୍ ବୋଲି ଜଣାପଡୁଛନ୍ତି । କିନ୍ତୁ ସିସିଟିଭିରେ ସତ କଥା ପ୍ରମାଣ ହୋଇଯିବ । କାର୍ ପାର୍କିଂ ବେଳେ ମହିଳାଙ୍କ ଏକ ଗ୍ରୁପ୍ ସହ ତାଙ୍କ ଡ୍ରାଇଭର ଯୁକ୍ତିତର୍କ ଏବଂ ଧକ୍କା ମରାମରି ପରିସ୍ଥିତି ସୃଷ୍ଟି ହୋଇଯାଇଥିଲା । ସେତେ ବେଳେ ନିଜ ଡ୍ରାଇଭରକୁ ବଞ୍ଚାଇବା ପାଇଁ ସେ ଏଥିରେ ସାମିଲ ହୋଇଥିଲେ ବୋଲି ରବୀନା କହିଛନ୍ତି ।
ନନ୍ଦିଘୋଷ ବ୍ୟୁରୋ : ସେୟାର ବଜାରରେ ଏକଜିଟ ପୋଲର ବଡ଼ ପ୍ରଭାବ । ସପ୍ତାହର ପ୍ରଥମ କାରବାରି ଦିନରେ ଭାରତୀୟ ସେୟାର ବଜାର ସୋମବାର ଦିନ ନୂଆ କିର୍ତ୍ତିମାନ ସ୍ଥାପନ କରିଛି । ବଜାର ଆରମ୍ଭରୁ ସେନସେକ୍ସ ଓ ନିଫ୍ଟି ରେକର୍ଡ ସ୍ତରକୁ ଛୁଇଁଛନ୍ତି । ସେନସେକ୍ସ ୭୬ ହଜାର ପଏଣ୍ଟ ଅତିକ୍ରମ କରିଥିବା ବେଳେ ନିଫ୍ଟି ଉପରେ ମଧ୍ୟ ଆଜି ବୁଲ ମାର୍କେଟର ପ୍ରଭାବ ଦେଖିବାକୁ ମିଳିଥିଲା । ନିଫ୍ଟି ଆଜି ୨୩ ହଜାର ପଏଣ୍ଟ ଅତିକ୍ରମ କରିଛି । ସେହିଭଳି ଭୟର ସୂଚକାଙ୍କ ଭାବେ ପରିଚିତ ଇଣ୍ଡିଆ ଭିକ୍ସ ୨୦ରୁ କମରେ ଅଛି ।
ନିର୍ବାଚନ ଫଳାଫଳର ଗୋଟିଏ ଦିନ ପୂର୍ବରୁ ହିଁ ଏପରି ରେକର୍ଡ ଛୁଇଁଲା ସେୟାର ବଜାର । ସେନସେକ୍ସ ରେ ୨ହଜାର ପଏଣ୍ଟ ବୃଦ୍ଧି ସହ କାରବାର ଆରମ୍ଭ ହୋଇଛି । ୭୬ ହାର ପଏଣ୍ଟ ପାର କରିଛି ସେନସେକ୍ସ, ସେହିପରି ୬୦୦ପଏଣ୍ଟ ବୃଦ୍ଧି ସହ ୨୩ ହଜାର ପଏଣ୍ଟ ପାର କରିଛି ନିଫ୍ଟି । ମାର୍କେଟ ଧାରାକୁ ଦେଖିଲେ ଅଧିକ ଅଭିବୃଦ୍ଧି ନେଇ ଆକଳନ କରାଯାଉଛି । ରିପୋର୍ଟ ଲେଖିବା ସମୟରେ ସେନେସକ୍ସ ଏବଂ ନିପ୍ଟ ଏହି ପଏଣ୍ଟରେ କାରବାର କରୁଥିଲା । ଏହାର ପ୍ରଭାବ ସୁନା ଏବଂ ରୂପା ଦରରେ ମଧ୍ୟ ଦେଖିବାକୁ ମିଳିବ ବୋଲି ଅନୁମାନ କରାଯାଉଛି ।
ବଜାର ମୋଦି ସରକାରର ପ୍ରତ୍ୟାବର୍ତ୍ତନକୁ ନେଇ ଆଶାବାଦୀ ଥିବାରୁ ଏଭଳି ବ୍ୟବହାର କରୁଛି ବୋଲି କୁହାଯାଉଛି । ସୂଚନାଯୋଗ୍ୟ ଯେ, ମାର୍କେଟ ବିଶେଷଜ୍ଞଙ୍କ ଅନୁସାରେ ମୋଦି ସରକାର ଯଦି ଜୁନ ୪ ତାରିଖରେ ୩୫୦ରୁ ଅଧିକ ଆସନ ପାଏ ତେବେ ସେୟାର ବଜାରରେ ୧୦ ପ୍ରତିଶତ ବୃଦ୍ଧି ଘଟିବ ବୋଲି କହୁଛନ୍ତି । ସେହିଭଳି ଯଦି ମୋଦି ସରକାର ସଂଖ୍ୟାଗରିଷ୍ଠତା ପାଏ ନାହିଁ ତେବେ ବଜାର ୧୦ ପ୍ରତିଶତ ମଙ୍ଗଳବାର ଦିନ ହ୍ରାସ ପାଇପାରେ ବୋଲି ଆଶଙ୍କା ରହିଛି ।
