ସୁବର୍ଣ୍ଣପୁର: ଲଗାଣ ବର୍ଷାରେ କାନ୍ଥ ଭୁଶୁଡ଼ି ଗୋଟିଏ ପରିବାରର ୫ ଆହତ। ଆହତଙ୍କ ମଧ୍ଯରେ ଅଛନ୍ତି ଦମ୍ପତି, ୨ ଶିଶୁପୁତ୍ର ଓ ଜଣେ ଝିଅ। ଆହତଙ୍କୁ ଡୁଙ୍ଗୁରିପାଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଛି। ସୁବର୍ଣ୍ଣପୁର ଜିଲ୍ଲା ବିନିକା ବ୍ଲକ ଡାହୁକବୁଡ଼ ଗାଁରେ ଘଟିଛି ଅଘଟଣ । ଗତକାଲି ବିଳମ୍ବିତ ରାତ୍ରିରେ ପରିବାର ଶୋଇଥିବା ବେଳେ ଘର କାନ୍ଥ ଭୁଶୁଡି ପଡିଥିଲା। ଆହତଙ୍କୁ ଗାଁ ଲୋକେ ଉଦ୍ଧାର କରି ଡୁଙ୍ଗୁରିପାଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଭର୍ତ୍ତି କରିଛନ୍ତି । ଆହତମାନେ ହେଲେ ସୁଶୀଲ ପଧାନ, ବାସ୍ତୁରୀ ପଧାନ, ରୀତିକା ପଧାନ, କ୍ରିଷ ପଧାନ ଓ କୌର ପ୍ରଧାନ।
ଘନେଇଲା ମଧ୍ଯପ୍ରାଚ୍ଯ ସଙ୍କଟ; ଇସ୍ରାଏଲ ଉପରେ ସିଧାସଳଖ ହମଲା ଲାଗି ନିର୍ଦ୍ଦେଶ
ନନ୍ଦିଘୋଷ ବ୍ୟୁରୋ: ଘନେଇଲା ମଧ୍ଯପ୍ରାଚ୍ଯ ସଙ୍କଟ। ଇସ୍ରାଏଲ ଉପରେ ସିଧାସଳଖ ହମଲା କରିବା ଲାଗି ଇରାନର ସୁପ୍ରିମ ଲିଡର ଆୟାତୋଲ୍ଲା ଅଲି ଖୋମେନୀଙ୍କ ନିର୍ଦ୍ଦେଶ। ହମାସ ନେତା ଇସମାଇଲ ହାନିଏଙ୍କୁ ହତ୍ଯା ପ୍ରତିବାଦରେ ଇସ୍ରାଏଲ ଉପରେ ହମଲା ଲାଗି ସେ ନିର୍ଦ୍ଦେଶ ଦେଇଛନ୍ତି। ଇସ୍ରାଏଲର ଆକ୍ରମଣରେ ପ୍ରାଣ ହରାଇଥିଲେ ଇସମାଇଲ ଓ ରିଭଲ୍ଯୁସନାରୀ ଗାର୍ଡର ୨ ସଦସ୍ଯ। ଇସମାଇଲଙ୍କ ମୃତ୍ଯୁ ଘଟଣା ପରେ ପରେ ଇରାନର ସୁପ୍ରିମ ନ୍ଯାସନାଲ ସିକ୍ଯୁରିଟି କାଉନସିଲର ଏକ ଜରୁରୀ ବୈଠକ ଡାକି ସେଠାରେ ଇସ୍ରାଏଲ ଉପରେ ଆକ୍ରମଣ ଲାଗି ଖୋମେନି ନିର୍ଦ୍ଦେଶ ଦେଇଥିଲେ।
ଇରାନର ନୂଆ ରାଷ୍ଟ୍ରପତିଙ୍କ ଉଦଘାଟନୀ ଉତ୍ସବରେ ଯୋଗଦେବା ଲାଗି ଇସମାଇଲ ତେହେରାନରେ ଥିବାବେଳେ ସେଠାରେ ତାଙ୍କୁ ହତ୍ଯା କରାଯାଇଥିଲା। ପୂର୍ବରୁ ଇରାନରେ କେତେକ ଆଣବିକ ବିଜ୍ଞାନୀ, ସାମରିକ କମାଣ୍ଡରଙ୍କୁ ଇସ୍ରାଏଲ ହତ୍ଯା କରିବାର ନଜିର ରହିଛି। ଇସ୍ରାଏଲ ଓ ହମାସ ମଧ୍ଯରେ ଯୁଦ୍ଧର ୧୦ ମାସ ପରେ ବି ସ୍ଥିତି ସୁଧୁରୁନାହିଁ ଏବଂ ଗାଜାର ବହୁ ଅଞ୍ଚଳରେ ଏବେ ବି ଇସ୍ରାଏଲର ହମଲା ଜାରି ରହିଛି।
ଗତ ଏପ୍ରିଲରେ ସିରିଆର ରାଜଧାନୀ ଡାମାସ୍କସ ଉପରେ ଇସ୍ରାଏଲର ଆକ୍ରମଣ ପ୍ରତିବାଦରେ ଇସ୍ରାଏଲ ଉପରେ ଜୋରଦାର ଆକ୍ରମଣ କରିଥିଲା ଇରାନ। ଇସ୍ରାଏଲ କିମ୍ବା ଆମେରିକାର ସମ୍ଭାବ୍ଯ ଆକ୍ରମଣର ମୁକାବିଲା ଲାଗି ପ୍ରସ୍ତୁତ ହେବାକୁ ରିଭଲ୍ଯୁସନାରୀ ଗାର୍ଡକୁ ନିର୍ଦ୍ଦେଶ ଦେଇଛନ୍ତି ଖୋମେନୀ। ସୁପ୍ରିମଲିଡରଙ୍କ ଆକ୍ରମଣ ଆହ୍ବାନକୁ ସମର୍ଥନ କରିଛନ୍ତି ରାଷ୍ଟ୍ରପତି ମାସୁଦ ପେଜେସକିଆନ।
ଆଜିଠୁ ପର୍ଯ୍ୟଟକଙ୍କ ପାଇଁ ଖୋଲିଲା ଭିତରକନିକା ଜାତୀୟ ଉଦ୍ୟାନ
କେନ୍ଦ୍ରପଡା: ପର୍ଯ୍ୟଟକଙ୍କ ପାଇଁ ଖୁସି ଖବର। ଖୋଲିଲା ଭିତରକନିକା ଜାତୀୟ ଉଦ୍ୟାନ। ୩ ମାସ ଧରି ବନ୍ଦ ରହିବା ପରେ ଭିତରକନିକା ଖୋଲିଥିବାରୁ ପର୍ଯ୍ୟଟକଙ୍କ ମଧ୍ୟରେ ବେଶ ଉତ୍ସାହ ଦେଖାଦେଇଛି। ଅପରପକ୍ଷରେ ପର୍ଯ୍ୟଟକଙ୍କୁ ସ୍ବାଗତ କରିବା ପାଇଁ ବନବିଭାଗ ବ୍ଯାପକ ପ୍ରସ୍ତୁତି କରିଛି।
କୁମ୍ଭୀର ପ୍ରଜନନ ପାଇଁ ଭିତରକନିକା ଜାତୀୟ ଉଦ୍ୟାନ ମେ’ ୧ ତାରିଖରୁ ଜୁଲାଇ ୩୧ ତାରିଖ ପର୍ଯ୍ୟନ୍ତ ୩ ମାସ ଧରି ବନ୍ଦ ରହିଥିଲା। ଏହି ସମୟରେ କୁମ୍ଭୀର ହିଂସ୍ର ରହୁଥିବାରୁ ପର୍ଯ୍ୟଟକଙ୍କ ସୁରକ୍ଷାକୁ ଦୃଷ୍ଟିରେ ରଖି ଭିତରକନିକା ବନ୍ଦ ରହିଥିଲା। ଭିତରକନିକାରେ ପ୍ରଥମଥର ନିର୍ମାଣ କରାଯାଇଛି ସ୍କାଏ ଓ୍ଵାକ୍ । ଜଙ୍ଗଲ ଉପରେ ଚାଲିଚାଲି ଜଙ୍ଗଲର ସୌନ୍ଦର୍ଯ୍ୟକୁ ଉପଭୋଗ କରିପାରିବେ ପର୍ଯ୍ୟଟକ। ପର୍ଯ୍ୟଟକମାନେ ଡାଙ୍ଗମାଳ, ଖୋଳା, ଗୁପ୍ତି ଓ ଚାନ୍ଦବାଲି ପ୍ରବେଶ ଦ୍ଵାର ଦେଇ ଭିତରକନିକା ବୁଲିପାରିବେ। ନୌବିହାର, ବଉଳା କୁମ୍ଭୀର, ଦେଶୀୟ ପକ୍ଷୀ ଓ ପ୍ରକୃତିର ମନୋରମ ଦୃଶ୍ୟ ଉପଭୋଗ କରିପାରିବେ ପର୍ଯ୍ୟଟକ । ଭିତରକନିକା ଖୋଲିଥିବାରୁ ପର୍ଯ୍ୟଟକଙ୍କ ସହ ଭିତରକନିକା ଉପରେ ନିର୍ଭର କରୁଥିବା ବୋଟ, ହୋଟେଲ, ଟ୍ରାଭେଲ୍ ଏଜେନ୍ସି , ଛୋଟ ବ୍ୟବସାୟ, ଟୁରିଷ୍ଟ ଗାଇଡ଼ମାନେ ଚଳଚଞ୍ଚଳ ହୋଇ ଉଠିଛନ୍ତି ।
କେରଳ ୱାୟନାଡରେ ହାହାକାର, ଧ୍ବଂସସ୍ତୂପ ତଳୁ ବାହାରିବାରେ ଲାଗିଛି ମୃତଦେହ
ନନ୍ଦିଘୋଷ ବ୍ୟୁରୋ: କେରଳ ୱାୟନାଡରେ ହାହାକାର। ଧ୍ବଂସସ୍ତୂପ ତଳୁ ବାହାରିବାରେ ଲାଗିଛି ମୃତଦେହ। ମୃତ୍ଯୁ ସଂଖ୍ଯା ଟପିଛି ୨୭୦। ଏବେ ବି ମାଟିତଳେ ଆହୁରି ଅନେକ ଶବ ପୋତି ରହିଥିବା ଆଶଙ୍କା କରାଯାଉଛି। ଶତାଧିକ ନିଖୋଜଙ୍କ ସନ୍ଧାନରେ ନିୟୋଜିତ ତିନିବାହିନୀ ଓ ଏନଡିଆରଏଫ ଯବାନ। ଯୁଦ୍ଧକାଳୀନ ଭିତ୍ତିରେ ଚାଲିଛି ଉଦ୍ଧାର କାର୍ଯ୍ୟ। ୱାୟନାଡର ମୁନ୍ଦାକାଇ, ଚୋରଲମାଲା, ଅଟ୍ଟମାଲା ଓ ନୁଲପୁଝା ଗ୍ରାମ ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଛି।
ଅନ୍ୟପଟେ ପ୍ରିୟଜନଙ୍କୁ ହରାଇ ଦୁଃଖରେ ଭାଙ୍ଗିପଡିଛନ୍ତି ପରିବାର। ହଜାର ହଜାର ଲୋକ ହୋଇପଡିଛନ୍ତି ବେସାହାରା। ବିପନ୍ନଙ୍କ ଲାଗି ବଢିଛି ସହାୟତାର ହାତ। ସେପଟେ ୱାୟନାଡ ଗସ୍ତରେ ଯାଇଛନ୍ତି ବିରୋଧୀ ଦଳ ନେତା ରାହୁଲ ଗାନ୍ଧି ଓ କଂଗ୍ରେସ ସାଧାରଣ ସମ୍ପାଦିକା ପ୍ରିୟଙ୍କା ଗାନ୍ଧି।
ଦିଲ୍ଲୀ କୋଚିଂ ସେଣ୍ଟର ମୃତ୍ଯୁ ଘଟଣା: ନ୍ୟାୟ ଦାବିରେ ଜାରି ରହିଛି ଛାତ୍ର ଆନ୍ଦୋଳନ
ନୂଆଦିଲ୍ଲୀ: ଦିଲ୍ଲୀ ପୁରୁଣା ରାଜିନ୍ଦର ନଗରରେ ୩ ଆଇଏଏସ ଆଶାୟୀଙ୍କ ମୃତ୍ଯୁ ଘଟଣା। ନ୍ୟାୟ ଦାବିରେ ଜାରି ରହିଛି ଛାତ୍ର ଆନ୍ଦୋଳନ। ପ୍ରବଳ ବର୍ଷା ସତ୍ତ୍ବେ ଛାତ୍ରଛାତ୍ରୀ ଆନ୍ଦୋଳନରେ ସାମିଲ ହୋଇଛନ୍ତି। ମୃତ ଛାତ୍ରଛାତ୍ରୀଙ୍କ ପରିବାରକୁ କ୍ଷତିପୂରଣ ଏବଂ ମୃତ୍ଯୁର ପ୍ରକୃତ କାରଣର ସନ୍ଧାନ କରିବା ଦାବିରେ ଏହି ଆନ୍ଦୋଳନ ଜାରି ରହିଛି। ଗତ ଜୁଲାଇ ୨୯ରେ ପୁରୁଣା ରାଜିନ୍ଦର ନଗରର ଏକ ବେସମେଣ୍ଟରେ ଚାଲିଥିବା ରାଓସ ଆଇଏଏସ କୋଚିଂ ସେଣ୍ଟରରେ ପାଣି ପଶିଯିବାରୁ ୩ ଆଶାୟୀଙ୍କ ମୃତ୍ଯୁ ଘଟଣା ପରଠାରୁ ଜାରି ରହିଛି ଆନ୍ଦୋଳନ।
ଆନ୍ଦୋଳନକାରୀମାନେ କହିଛନ୍ତି ମୃତ ଛାତ୍ରଛାତ୍ରୀଙ୍କ ପରିବାରକୁ ୫ କୋଟି ଲେଖାଏ କ୍ଷତିପୂରଣ ଦିଆଯାଉ। ଏହା ସହ କୋଚିଂ ସେଣ୍ଟର ଅଘଟଣରେ ମୃତ୍ଯୁ ସଂଖ୍ଯା ୩ରୁ ଅଧିକ ବୋଲି ଆଶଙ୍କା କରାଯାଉଥିବାରୁ ଏହାର ପ୍ରକୃତ ତଦନ୍ତ ହେଉ। ସେହିପରି କୋଚିଂ ସେଣ୍ଟରଗୁଡିକର ଲାଇବ୍ରେରୀଗୁଡିକ ଉପରେ ଧ୍ଯାନ ଦିଆଯାଉ ବୋଲି ଆନ୍ଦୋଳନକାରୀ ଦାବି କରିଛନ୍ତି।
ଆଜିଠୁ ଦେଶରେ ଅନେକ ନିୟମରେ ପରିବର୍ତ୍ତନ, ଗ୍ୟାସ ସିଲିଣ୍ଡରର ମୂଲ୍ୟରେ ପରିବର୍ତ୍ତନ !
ନନ୍ଦିଘୋଷ ବ୍ୟୁରୋ: ଆଜିଠୁ ଦେଶରେ ଅନେକ ନିୟମରେ ଆସୁଛି ପରିବର୍ତ୍ତନ। ଯାହାକି ଆପଣଙ୍କ ପକେଟ ଉପରେ ବଡ଼ ପ୍ରଭାବ ପକାଇପାରେ । ଗ୍ୟାସ ସିଲିଣ୍ଡର ମୂଲ୍ୟରେ ପରିବର୍ତ୍ତନ ଠାରୁ ଆରମ୍ଭ କରି, କ୍ରେଡିଟ କାର୍ଡ ନିୟମ ଏବଂ FASTag ଯାଏ କେତେକ ନିୟମରେ ପରିବର୍ତ୍ତନ ହେବ । ଗ୍ୟାସ ସିଲିଣ୍ଡରର ମୂଲ୍ୟରେ ପରିବର୍ତ୍ତନ ହେବାର ସମ୍ଭାବନା ରହିଛି। ପ୍ରତ୍ୟେକ ମାସ ଆରମ୍ଭରୁ ତୈଳ କମ୍ପାନୀଗୁଡିକ ଏଲପିଜି ଗ୍ୟାସ୍ ସିଲିଣ୍ଡରର ମୂଲ୍ୟ ସଂଶୋଧନ କରିଥାନ୍ତି। ଯଦିବା ଜୁଲାଇରେ ୧୯ କିଲୋଗ୍ରାମ ବ୍ୟବସାୟିକ ସିଲିଣ୍ଡରର ମୂଲ୍ୟ ହ୍ରାସ ପାଇଥିଲା । ଏଥର ମଧ୍ୟ ସିଲିଣ୍ଡରର ମୂଲ୍ୟ ହ୍ରାସ କରାଯାଇପାରେ ବୋଲି ଆଶା କରାଯାଉଛି।
ସେହିପରି ଟୋଲ୍ ପେମେଣ୍ଟକୁ ଅପଡେଟ୍ କରିବା ଏବଂ ଟୋଲ୍ ପ୍ଲାଜାରେ ଭିଡ଼ କମାଇବା ଲାଗି ଅଗଷ୍ଟ ମାସରୁ FASTag ସମ୍ପର୍କିତ ନୂଆ ନିୟମ ଲାଗୁ ହେବାକୁ ଯାଉଛି। ଏଥିରେ ୩-୫ ବର୍ଷ ପୁରୁଣା FASTag କେୱାଇସିର ଅପଡେଟ୍ କରାଯିବ। HDFC ବ୍ୟାଙ୍କ ଦ୍ୱାରା ଟାଟା ନ୍ୟୁ ଇନଫିନିଟି ଏବଂ ଟାଟା ନ୍ୟୁ ପ୍ଲସ୍ କ୍ରେଡିଟ୍ କାର୍ଡରେ ପରିବର୍ତ୍ତନ କରାଯିବ। ଏହି କାର୍ଡଧାରୀମାନେ ଟାଟା ନ୍ୟୁ ୟୁପିଆଇ ଆଇଡି ବ୍ୟବହାର କରି କାରବାର ଉପରେ ୧.୫% ନୂତନ କଏନ୍ ପାଇବେ।
ଗୁଗୁଲ୍ ମ୍ୟାପ୍ସ ଦ୍ୱାରା କରାଯାଇଥିବା ନିୟମର ପରିବର୍ତ୍ତନ ଆଜିଠୁ ଲାଗୁ ହେଉଛି । କମ୍ପାନୀ ଭାରତରେ ଏହାର ସେବା ପାଇଁ ଦେୟକୁ ୭୦ ପ୍ରତିଶତ ପର୍ଯ୍ୟନ୍ତ ହ୍ରାସ କରିଛି। ଏହା ବ୍ୟତୀତ ଗୁଗୁଲ୍ ମ୍ୟାପ୍ସ ସେବା ପାଇଁ ଡଲାର ବଦଳରେ ଭାରତୀୟ ଟଙ୍କାରେ ଚାର୍ଜ ନେବ।
ଲେଫ୍ଟନାଣ୍ଟ ଜେନେରାଲ୍ ସାଧନା ନାୟାର ସ୍ଥଳସେନା ମେଡିକାଲ୍ ସର୍ଭିସେସ ଡିଜି
ନନ୍ଦିଘୋଷ ବ୍ୟୁରୋ: ଲେଫ୍ଟନାଣ୍ଟ ଜେନେରାଲ୍ ସାଧନା ସକ୍ସସେନା ନାୟାର ହୋଇଛନ୍ତି ଭାରତୀୟ ସ୍ଥଳସେନା ମେଡିକାଲ୍ ସର୍ଭିସେସର ଡିଜି । କୌଣସି ଭାରତୀୟ ମହିଳା ଆର୍ମି ମେଡିକାଲ୍ ସର୍ଭିସେସର ଡିଜି ହେବା ପ୍ରଥମ ଘଟଣା। ସେହିକ୍ରମରେ ସାଧନା ପ୍ରଥମ ମହିଳାଭାବେ ଏହି ପଦରେ ଅଭିସିକ୍ତ ହୋଇଛନ୍ତି।
ଆଜି ଲେଫ୍ଟନାଣ୍ଟ ଜେନେରାଲ୍ ସାଧନା ସକ୍ସସେନା ନାୟାର ତାଙ୍କର ଦାୟିତ୍ବ ଗ୍ରହଣ କରିବେ। ଏୟାର ମାର୍ସଲ ରାଙ୍କକୁ ପଦୋନ୍ନତି ପାଇବାରେ ସେ ରେକର୍ଡ କରିଛନ୍ତି । ୧୯୮୫ ମସିହା ଡିସେମ୍ବର ୨୬ ତାରିଖରେ ଭାରତୀୟ ବାୟୁସେନାର ମେଡିକାଲ୍ ବ୍ରାଞ୍ଚରେ ତାଙ୍କର କମିସନିଂ ହୋଇଥିଲା । ୨୦୦୦ ମସିହାରେ ୱିଙ୍ଗ କମାଣ୍ଡର ରାଙ୍କକୁ ତାଙ୍କର ପଦୋନ୍ନତି ହୋଇଥିବା ବେଳେ ୨୦୦୯ରେ ଗ୍ରୁପ୍ କ୍ଯାପଟେନ୍, ୨୦୨୦ରେ AVM ଏବଂ ୨୦୨୩ରେ ଆକ୍ଟିଂ ଏୟାର ମାର୍ସଲ ଭାବେ ନିଯୁକ୍ତି ପାଇଥିଲେ । ଭାରତୀୟ ସେନାର ଜଣେ ଦକ୍ଷ ଅଧିକାରୀଭାବେ ସେ ଜଣାଶୁଣା । ଏବେ ଦିଲ୍ଲୀ ମୁଖ୍ଯାଳୟରେ ତାଙ୍କର ନିଯୁକ୍ତି ହୋଇଛି ।
ବନ୍ଦ ଘରେ ଦମ୍ପତିଙ୍କ ମୃତଦେହ,କାହିଁକି ନେଲେ ଚରମ ନିଷ୍ପତ୍ତି ?
କୋରାପୁଟ: ବନ୍ଦ ଘରେ ଦମ୍ପତିଙ୍କ ମୃତଦେହ। ଖଟ ଉପରେ ସ୍ତ୍ରୀଙ୍କ ମୃତଦେହ ପଡିଥିବାବେଳେ ଝୁଲୁନ୍ତା ଅବସ୍ଥାରେ ସ୍ବାମୀଙ୍କ ମୃତଦେହ ଉଦ୍ଧାର ହୋଇଛି । ଏଭଳି ଚାଞ୍ଚଲ୍ଯକରଣ ଘଟଣା ଘଟିଛି କୋରାପୁଟ ସଦର ଥାନା ମାଲିଙ୍ଗଯୋଡ଼ି ଗାଁରେ । ମୃତକ ହେଲେ ସ୍ବାମୀ ନରେଶ ନାୟକ ଓ ସ୍ତ୍ରୀ ଭବାନୀ ନାୟକ ।
ସୂଚନା ଅନୁଯାୟୀ, ଗତବର୍ଷ ଜୁଲାଇରେ ଉଭୟଙ୍କର ବିବାହ ହୋଇଥିଲା। ତେବେ ଗତକାଲି ରାତିରେ ବନ୍ଦ ଘରେ ଦମ୍ପତିଙ୍କ ମୃତଦେହ ଦେଖି ପରିବାର ଲୋକ ପୋଲିସକୁ ଖବର ଦେଇଥିଲେ । କୋରାପୁଟ ସଦର ଥାନା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରି ତଦନ୍ତ କରୁଛି । ତେବେ କାହିଁକି ନବଦମ୍ପକି ଏଭଳି ଚରମ ନିଷ୍ପତ୍ତି ନେଲେ ସେନେଇ କୌଣସି ସ୍ପଷ୍ଟ ସୂଚନା ମିଳିପାରିନି । ପରିବାର ଲୋକଙ୍କୁ ପଚରାଉଚରା କରି ପୋଲିସ ତଦନ୍ତ କରୁଥିବାବେଳେ ବ୍ଯବଚ୍ଛେଦ ରିପୋର୍ଟ ଆସିବା ପରେ ମୃତ୍ଯୁ କାରଣ ଜଣାପଡ଼ିବ ବୋଲି ପୋଲିସ କହିଛି ।
ଆଉନାହାନ୍ତି ପୂର୍ବତନ କ୍ରିକେଟର ଅଂଶୁମାନ ଗାଏକୱାଡ
ନନ୍ଦିଘୋଷ ବ୍ୟୁରୋ: ଆଉନାହାନ୍ତି ପୂର୍ବତନ କ୍ରିକେଟର ଅଂଶୁମାନ ଗାଏକୱାଡ। ୭୧ ବର୍ଷ ବୟସରେ ରକ୍ତ କର୍କଟରେ ଜୀବନ ସହ ସଂଗ୍ରାମ କରୁଥିବା କିମ୍ବଦନ୍ତୀ କ୍ରିକେଟରଙ୍କ ମୃତ୍ୟୁ ହୋଇଛି। ୧୨ ବର୍ଷ ଧରି ସେ ଭାରତୀୟ କ୍ରିକେଟ ଜଗତ ଲାଗି କରିଥିଲେ ତ୍ଯାଗ। ସେ ଜୀବନ କାଳରେ ୪୦ଟି ଟେଷ୍ଟ, ୧୫ଟି ଦିନିକିଆ ଖେଳିବା ସହ ସେ ୨ ହଜାର ୨୫୪ ରନ ସଂଗ୍ରହ କରିଥିଲେ। ୧୯୮୩ରେ ଜଳନ୍ଧରରେ ପାକିସ୍ତାନ ସହ ମ୍ଯାଚରେ ସେ ହାସଲ କରିଥିଲେ ସର୍ବାଧିକ ୨୦୧ ରନ। ଗାଏକୱାଡଙ୍କ ଚିକିତ୍ସା ଲାଗି ବିସିସିଆଇ ସମ୍ପାଦକ ଜୟ ଶହ ୧ କୋଟି ଟଙ୍କା ମଞ୍ଜୁର କରିଥିଲେ। ତାଙ୍କ ଚିକିତ୍ସା ଲାଗି କପିଳ ଦେବ ବି ବ୍ଯକ୍ତିଗତ ପାଣ୍ଠି ଯୋଗାଡ ଅଭିଯାନରେ ସାମିଲ ହୋଇଥିଲେ।
ସୂଚନାଯୋଗ୍ୟ ଯେ, ୧୯୯୭, ୧୯୯୯ ଓ ୨୦୦୦ ମସିହାରେ ଗାଏକୱାଡ ଭାରତୀୟ ଟିମର ମୁଖ୍ଯ କୋଚ ଦାୟିତ୍ବ ସମ୍ଭାଳିଥିଲେ। ସେ କୋଚ ଥିବା ସମୟରେ ୨୦୦୦ ଚାମ୍ପିଅନସ ଟ୍ରଫି ରନର୍ସ ଅପ ହୋଇଥିଲା ଭାରତ। ୧୯୯୦ ଦଶକରେ ସେ ଜାତୀୟ ଚୟନକର୍ତ୍ତା ହେବା ସହ ଭାରତୀୟ କ୍ରିକେଟର୍ସ ଆସୋସିଏସନର ସଭାପତି ଥିଲେ। ତାଙ୍କ ମୃତ୍ଯୁରେ ପ୍ରଧାନମନ୍ତ୍ରୀଙ୍କ ସମେତ ବହୁ ବିଶିଷ୍ଟ ବ୍ଯକ୍ତି ଶୋକବ୍ଯକ୍ତ କରିଛନ୍ତି।
ପୋଲିସକୁ ଚକମା ଦେଇ କଏଦୀ ଚମ୍ପଟ
ନନ୍ଦିଘୋଷ ବ୍ୟୁରୋ: ବରଗଡ଼ କୋର୍ଟରୁ ପୋଲିସକୁ ଚକମା ଦେଇ କଏଦୀ ଚମ୍ପଟ । ଫେରାର କଏଦୀ ଜଣକ ବରଗଡ଼ ସଦର ଥାନା ସୟା ଗାଁର ବାବାଜୀ ଛୁରିଆ । ନାବାଳିକାଙ୍କୁ ଦୁଷ୍କର୍ମ ମାମଲାରେ ୨୦୨୧ରୁ ସଜା କାଟୁଥିଲେ । ଅଭିଯୁକ୍ତକୁ ଆଜି ପୋସ୍କୋ କୋର୍ଟରେ ହାଜର କରାଇବାକୁ ଆଣିଥିଲା ପୋଲିସ । ହେଲେ ଜେଲକୁ ନେବା ପାଇଁ ଅଭିଯୁକ୍ତକୁ କୋର୍ଟରୁ ବାହାରକୁ ଆଣୁଥିବା ବେଳେ ପୋଲିସକୁ ଧକାଦେଇ ଫେରାର ହୋଇଯାଇଥିଲେ । ତାକୁ ଧରିବା ପାଇଁ ବରଗଡ଼ ସହରରେ ବିଭିନ୍ନ ସ୍ଥାନରେ ପୋଲିସ ଚଢାଉ କରିଛି । ହଠାତ କୋର୍ଟରୁ ଦୌଡ଼ି ଫେରାର ମାରିଥିବା ଘଟଣା ସମସ୍ତଙ୍କୁ ଆଶ୍ଚର୍ଯ୍ୟ କରିବା ସହ ପୋଲିସର କାର୍ଯ୍ୟଶୈଳୀ ଉପରେ ପ୍ରଶ୍ନ ଉଠାଇଛି ।