ପୁରୀ: ପୁରୀ ଲୋକସଭା କ୍ଷେତ୍ରରେ ନିର୍ବାଚନ ଆଚରଣ ବିଧି ଖୋଲାଖୋଲି ଉଲ୍ଲଂଘନ ଅଭିଯୋଗ। ଭୋଟରଙ୍କୁ ବିଜେପି ସାଂସଦ ପ୍ରାର୍ଥୀ ସମ୍ବିତ ପାତ୍ର ପଦ୍ମଫୁଲ ଚିହ୍ନ ଥିବା ଘଣ୍ଟା ବାଣ୍ଟୁଥିବା ନେଇ ଅଭିଯୋଗ। ଉପହାର ଦେଇ ଭୋଟରଙ୍କ ମନଜିଣିବାକୁ ପ୍ରୟାସ। ପୁରୀ ଲୋକସଭାର ବିଜେପି ପାର୍ଥୀ ସମ୍ବିତ ପାତ୍ର ଘଣ୍ଟା ବାଣ୍ଟିବା ନେଇ ଏବେ ଚର୍ଚ୍ଚା ଜୋର ଧରିଛି l ଘଣ୍ଟାରେ ସମ୍ବିତ ପାତ୍ର ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଫଟୋ ସହ ବିଜେପି ନିର୍ବାଚନ ସଙ୍କେତ ପଦ୍ମ ଫୁଲ ଚି଼ହ୍ନ ରହିଛି l ଘଣ୍ଟାର ପ୍ରଲୋଭନ ଦେଖାଇ ସମ୍ବିତ ପାତ୍ର ନିଜର ଓ ବିଜେପିର ପ୍ରଚାର ନିମନ୍ତେ ଏହି ଫର୍ମୁଲା ଆପଣେଇଛନ୍ତି ଯାହା ଆଇନ ବିରୋଧୀ l ନିର୍ବାଚନ ଆଚରଣ ଵିଧି ଲାଗିଥିବାବେଳେ ବିଜେପି ସାଂସଦ ପ୍ରାର୍ଥୀ ନିଜ ଫଟୋ ଥିବା ଘଣ୍ଟା କିପରି ବଣ୍ଟନ କରୁଛନ୍ତି ଯାହାକୁ ନେଇ ଏବେ ପୁରୀରେ ବିରୋଧ ଦେଖାଦେଇଛି l ଏ ଘଟଣା ନେଇ ଆମ ଆଦମୀ ପାର୍ଟି ପକ୍ଷରୁ ନିର୍ବାଚନ ଅଧିକାରୀଙ୍କ ନିକଟରେ ଅଭିଯୋଗ ପ୍ରଦାନ କରାଯାଇଛି l ସେପଟେ ଏ ଘଟଣାକୁ ତୀବ୍ର ବିରୋଧ କରିଛନ୍ତି ରାଜ୍ୟସଭା ସାଂସଦ ଶୁଭାଶିଷ ଖୁଣ୍ଟିଆ l ଭୋକ ବିକଳରେ ତାଟିଆ କାମୁଡୁଛନ୍ତି ବିଜେପି ସାଂସଦ ପ୍ରାର୍ଥୀ। ପୁରୀ ଲୋକମାନଙ୍କୁ ମିଥ୍ୟା ପ୍ରତିଶୃତି ଓ ପ୍ରଲୋଭନ ଦେଖାଇ ଭୁଁଆ ବୁଲାଉଛନ୍ତି। ଏହାର ଜବାବ ଚଳିତ ସାଧାରଣ ନିର୍ଵାଚନ ରେ ପୁରୀ ଜନସାଧାରଣ ଦେବେ ବୋଲି କହିଛନ୍ତି ଶୁଭାଶିଷ।
୭୫ ହଜାର ଟଙ୍କା ଛୁଇଁଲା ୨୪ କ୍ୟାରେଟ୍ ସୁନାଦର
ନନ୍ଦିଘୋଷ ବ୍ୟୁରୋ: ରକେଟ ବେଗରେ ବଢୁଛି ସୁନା ଦର। ପୁଣି ବଢିଲା ସୁନା । ୨୪ କ୍ୟାରେଟ୍ ସୁନାଦର ୭୫ ହଜାର ଟଙ୍କା ଛୁଇଁଲା । ଆଗକୁ ଆହୁରି ବଢିବ । ପାର କରିବ ୮୦ ହଜାର । ଲଗାତାର ଭାବେ ଦୁଇମାସ ହେଲାଣି ସୁନା ଦର ବଢିଚାଲିଛି । ଆମେରିକାରେ ମୁଦ୍ରାସ୍ଫୀତି ନିୟନ୍ତ୍ରଣରେ ରଖିବାକୁ ଋଣ ଉପରେ ସୁଧ କଟ୍ କରୁଛନ୍ତି ସେଠାକାର ସେଣ୍ଟ୍ରାଲ୍ ବ୍ୟାଙ୍କ । ମୁଦ୍ରାସ୍ଫୀତି ମୁକାବିଲା କରିବାକୁ ଫେଡେରାଲ୍ ରିଜର୍ଭ ବ୍ୟାଙ୍କ ଅନ୍ତରାଷ୍ଟ୍ରୀୟ ବଜାରରୁ ସୁନା କିଣିଚାଲିଛି । ଆମେରିକାକୁ ଦେଖି ସୁନା କିଣିଚାଲିଛନ୍ତି ଚୀନ୍ ସେଣ୍ଟାଲ୍ ବ୍ୟାଙ୍କ ଓ ଇଉରୋପିୟାନ୍ ସେଣ୍ଟ୍ରାଲ ବ୍ୟାଙ୍କ । ଏହାସହିତ ଇସ୍ରାଏଲ ଓ ଇରାନ୍କୁ ନେଇ ମଧ୍ୟପ୍ରାଚ୍ୟରେ ଅସ୍ଥିରତା ଯୋଗୁ ସୁନା ବଜାରରେ ତାତି ଲାଗି ରହିଛି । ଖାଲି ସେତିକି ନୁହେଁ, ଡଲାର ତୁଳନାରେ କ୍ରମାଗତ ଭାବେ ଭାରତୀୟ ଟଙ୍କାର ମୂଲ୍ୟ ହ୍ରାସ ଯୋଗୁ ମଧ୍ୟ ସୁନା ଦର ବଢୁଛି । ଆଜି ୨୨ କ୍ୟାରେଟ୍ ସୁନା ୧୦ ଗ୍ରାମ ପିଛା ୬୭ ହଜାର ୨୦୦ ଟଙ୍କା ଥିବାବେଳେ ଆଗକୁ ଏହାର ମୂଲ୍ୟ ୭୦ ହଜାର ଛୁଇଁବା ସମ୍ଭାବନା ରହିଛି । ବିବାହ, ବ୍ରତ ପାଇଁ ସୁନା କିଣାରେ ଲୋକ କିଛିଟା ନିରାଶ ହେଉଛନ୍ତି । ଅନ୍ୟପଟେ ସୁନା ଭଲ ରିଟର୍ଣ୍ଣ ଦେଉଥିବାରୁ କେତେକ ସୁନା କିଣିବାକୁ ଆଗ୍ରହ ଦେଖାଉଛନ୍ତି । ସୁନାକୁ ଦେଖି ରୂପା କିଲୋ ବି ୮୮ ହଜାର ଟଙ୍କାରେ ପହଞ୍ଚିଲାଣି ।
’ପୁଷ୍ପା-୨’ର ମ୍ୟୁଜିକ୍ ରାଇଟ୍ସ ଯେତେ ଟଙ୍କାରେ ବିକ୍ରି ହେଲା ସେତିକି ଟଙ୍କାରେ ନିର୍ମାଣ ହୋଇଥିଲା ଅଜୟ ଦେବଗନଙ୍କ ଏହି ଫିଲ୍ମ
ନନ୍ଦିଘୋଷ ବ୍ୟୁରୋ: ସାଉଥ ଇଣ୍ଡିଆନ ଫିଲ୍ମ ’ପୁଷ୍ପା’ ଦର୍ଶକଙ୍କ ମହଲରେ ବେଶ ଆଦୃତ ହୋଇଥିଲା । ଅଲ୍ଲୁ ଅର୍ଜୁନଙ୍କ ଅଭିନୀତ ଏହି ଚଳଚ୍ଚିତ୍ରଟି ହିଟ୍ ହେବା ସହ ଦ୍ବିତୀୟ ଭାଗକୁ ଚାହିଁ ରହିଛନ୍ତି । ନିକଟରେ ଅଲ୍ଲୁ ଅର୍ଜୁନଙ୍କ ଜନ୍ମଦିନ ଅବସରରେ ଫିଲ୍ମର ଟିଜର ରିଲିଜ ହୋଇଥିଲା । ଯାହାକି ବେଶ ଭାଇରାଲ ହେବା ସହ ଦର୍ଶକେ ଏହାକୁ ବେଶ ପସନ୍ଦ କରିଛନ୍ତି । ଏପ୍ରିଲ୍ ୮ ତାରିଖରେ ଟିଜର ରିଲିଜ୍ ହୋଇଛି । ତେବେ ଫିଲ୍ମର ମ୍ୟୁଜିକ୍ ରାଇଟ୍ସ କିଣିଛି ଟି-ସିରିଜ୍ । ୬୦ କୋଟି ଟଙ୍କାରେ ଫିଲ୍ମର ସମସ୍ତ ଭାଷାର ମ୍ୟୁଜିକ୍ ରାଇଟ୍ସ କିଣିଛି । ତେବେ ଏହି ବଜେଟରେ ଅଜୟ ଦେବଗନଙ୍କ ସୈତାନ ଫିଲ୍ମ ନିର୍ମାଣ ହୋଇଥିଲା । କୁହାଯାଉଛି କି, ଫିଲ୍ମରେ ଦୁଇଟି ଆଇଟମ୍ ସଙ୍ଗ ରହିଛି । ଏହାସହ ଫିଲ୍ମର ଗୀତ ଗୁଡ଼ିକ ବେଶ ହିଟ୍ ହେବ ବୋଲି ପ୍ରଯୋଜନା ସଂସ୍ଥା ପକ୍ଷରୁ ଆଶା ରଖାଯାଇଛି ।
ସେପଟେ ଫିଲ୍ମରେ ଏଭଳି ଏକ ସିନ୍ ରହିଛି ଯାହାକୁ ସୁଟିଂ କରିବା ପାଇଁ ୧୦ଦିନ ସମୟ ଲାଗିଥିଲା । ଏହି ସିନଟି ମାତ୍ର ୨ ମିନିଟରୁ ୬ ମିନିଟ ମଧ୍ୟରେ ରହିଛି । ତେବେ ଏହି ସିନର ସୁଟିଂ ପାଇଁ ୬୦ କୋଟି ଟଙ୍କା ଖର୍ଚ୍ଚ କରାଯାଇଛି । କୁହାଯାଉଛି କି, ଏହା ସବୁଠାରୁ ହାଇ ବଜେଟ୍ ଫିଲ୍ମ ହେବ । ଏପରିକି ଦର୍ଶକଙ୍କ ମହଲରେ ମଧ୍ୟ ପୁଷ୍ପା ୨ ଅପୂର୍ବ ସଫଳତା ହାସଲ କରିବ ।
ନଜର ପକାନ୍ତୁ ପ୍ରବଳ ଗ୍ରୀଷ୍ମ ପ୍ରବାହ କାରଣରୁ କେଉଁସବୁ ରୋଗର ସମ୍ମୁଖୀନ ହେବାକୁ ପଡ଼େ ଏବଂ ଏହାର ଉପଚାର
ନନ୍ଦିଘୋଷ ବ୍ୟୁରୋ: ଚାଲିଛି ଗ୍ରୀଷ୍ମ ପ୍ରବାହ । ପ୍ରବଳ ଖରା ଲାଗି ଜନ ଜୀବନ ଅସ୍ତବ୍ୟସ୍ତ ହୋଇ ପଡ଼ୁଛନ୍ତି । ତେବେ ଅତ୍ୟଧିକ ଗ୍ରୀଷ୍ମ ପ୍ରବାହ କାରଣରୁ ଜନ ଜୀବନ ପ୍ରତି ବିପଦ ରହିଥାଏ । ଏପରିକି ଜୀବନ ଚାଲିଯିବାର ମଧ୍ୟ ଭୟ ରହିଥାଏ । ଅତ୍ୟଧିକ ଗ୍ରୀଷ୍ମ ପ୍ରବାହ କାରଣରୁ ମଣିଷକୁ ହାର୍ଟ ଆଟାକ ମଧ୍ୟ ଆସିପାରେ । ସାଧାରଣତଃ ଖରାଦିନରେ ଅଧିକାଂଶ ଲୋକେ ଶୀଘ୍ର ଥକି ପଡ଼ନ୍ତି । ଶରୀରର ତାପମାତ୍ରା ସ୍ବାଭାବିକ ରହେ ନାହିଁ । ହାଲିଆ ଲାଗିବା ସହ ଥକାପଣ ମଧ୍ୟ ଅନୁଭବ ହୋଇଥାଏ । ଯାହାକି ହାର୍ଟ ଆଟାକର ଲକ୍ଷଣ ବୋଲି ଡାକ୍ତରମାନେ କୁହନ୍ତି । ଏଣୁ ଏହାକୁ ଅଣଦେଖା ନକରି ଡାକ୍ତରଙ୍କ ପରାମର୍ଶ ନେବା ଉଚିତ ।
ଅନ୍ୟପଟେ ଯଦି ଅତ୍ୟଧିକ ଖରାରେ ଆପଣ ବୁଲି ଆସନ୍ତି ତାହେଲେ ମୁଣ୍ଡବିନ୍ଧା ହୋଇଥାଏ । ଶରୀରରେ ଜଳର ପରିମାଣ କମିବା କାରଣରୁ ଏଭଳି ଅନୁଭବ ହୋଇଥାଏ । ମୁଖ୍ୟତଃ ବ୍ରଡ ପ୍ରେସର ସଠିକ ସମୟରେ ଚେକ୍ ନକଲେ ଏଭଳି ଲାଗିଥାଏ । ଏହା ମଧ୍ୟ ହାର୍ଟ ଆଟାକର ଲକ୍ଷଣ ବୋଲି କୁହାଯାଇପାରେ । ହାର୍ଟ ସ୍ପେଶାଲିଷ୍ଟ ଅଜିତ ଜେନା କହିଛନ୍ତି କି, ଅଧିକ ଖରା କାରଣରୁ ହୃଦଘାତ ହୋଇଥାଏ । ମୁଖ୍ୟତଃ ଉତାପ ବୃଦ୍ଧି କାରଣରୁ ଶରୀର ଏହାର ତାପାମାତ୍ରା ବଜାୟ ରଖିବାକୁ ଚେଷ୍ଟା କରିଥାଏ । ଏହି କାରଣରୁ ଶରୀର ଅଧିକ ରକ୍ତ ସଞ୍ଚାଚଳ କରିବାକୁ ପଡ଼େ । ତେବେ ଖରା ସମୟରେ ବୃଦ୍ଧ, ଗର୍ଭବତୀ ମହିଳା ଏବଂ ଶିଶୁମାନେ ବାହାରକୁ ନଯିବା ଉଚିତ । ଏମାନଙ୍କ କ୍ଷେତ୍ରରେ ଅଧିକାଂଶ ପ୍ରଭାବ ପଡ଼ିଥାଏ ।
ପୁଣି ଗରମ କରିବ କଲବଲ
ଭୁବନେଶ୍ବର: ରାଜ୍ୟକୁ ଫେରିବ ପ୍ରବଳ ଗ୍ରୀଷ୍ମପ୍ରବାହ। ଏପ୍ରିଲ ୧୭ ରୁ ୨୦ ଯାଏଁ ହେବ ସାଙ୍ଘାତିକ ସ୍ଥିତି । ୪ ଦିନ ପର୍ଯ୍ୟନ୍ତ ପିକ୍ ସମୟ ନେଇ ଘୋଷଣା କରିଛି ପାଣିପାଗ ବିଜ୍ଞାନ କେନ୍ଦ୍ର । ଆଭ୍ୟନ୍ତରୀଣ ଓଡିଶାରେ ୧୫ ଡିଗ୍ରୀ ଯାଏଁ ପାରଦ ବୃଦ୍ଧି ପାଇବ । ୪୩ ରୁ ୪୫ ଡିଗ୍ରୀ ଯାଏଁ ତାପମାତ୍ରା ଛୁଇଁବ । ସୃଷ୍ଟି ହେବ ଅସହ୍ୟ ପାଣିପାଗ ସ୍ଥିତି । ଶରୀର ପାଇଁ ଘାତକ ହୋଇପାରେ ବୋଲି ସତର୍କ କରାଇଛି ପାଣିପାଗ ବିଜ୍ଞାନ କେନ୍ଦ୍ର । ସେପଟେ ଏପ୍ରିଲ ମାସରେ ୭୨ ବର୍ଷରେ ସବୁଠୁ ଥଣ୍ଡା ଦିନ ଅନୁଭୂତ ହୋଇଛି । ଗତକାଲି ସର୍ବନିମ୍ନ ତାପମାତ୍ରା ୨୪ ଡିଗ୍ରୀ ଟିଟିଲାଗଡରେ ରେକର୍ଡ କରାଯାଇଛି ।
୬ ସ୍କୁଲ ପିଲାଙ୍କ ଜୀବନ ନେଇଥିବା ବସରେ କ’ଣ ସବୁ ତ୍ରୁଟି ଥିଲା ?
ବ୍ୟୁରୋ ରିପୋର୍ଟ: ହରିୟାଣାର ମହେନ୍ଦ୍ରଗଡରେ ଗତକାଲି ଏକ ସ୍କୁଲ ବସ୍ ଦୁର୍ଘଟଣାଗ୍ରସ୍ତ ହୋଇ ୬ ଜଣ ଛାତ୍ରଛାତ୍ରୀଙ୍କ ମୃତ୍ୟୁ ହୋଇଥିବା ବେଳେ ଅନେକ ଆହାତ ହୋଇଛନ୍ତି। ଡ୍ରାଇଭର ଜଣକ ନିଶାସକ୍ତ ଅବସ୍ଥାରେ ଗାଡ଼ି ଚଳାଉଥିବାରୁ ଏହି ଦୁର୍ଘଟଣା ଘଟିଛି। ଏହି ଘଟଣାରେ ସ୍କୁଲ କର୍ତ୍ତୁପକ୍ଷ ମଧ୍ୟ ସମାନ ଭାବରେ ଦାୟୀ ଅଛନ୍ତି। ଏଥିପାଇଁ ସ୍କୁଲକୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି।
ଏହି ମାମଲାରେ ସ୍କୁଲ କର୍ତ୍ତୁପକ୍ଷ ଗତକାଲି ଇଦ୍ରେ କାହିଁକି ସ୍କୁଲ ଖୋଲାରଖିଥିଲେ ? ଏବଂ ବସର ରୋଡ୍ ପରିମିଟ୍ ନଥିବା ବେଳେ କାହିଁକି ଚଳାଇବାକୁ ଅନୁମତି ଦିଆଯାଇଥିଲା ସେ ନେଇ କାରଣ ଦର୍ଶଅ ନୋଟିସ୍ ଜାରି ହୋଇଛି। କେବଳ ସେତିକି ନୁହେଁ ବସର ଅନେକ ତ୍ରୁଟି ମଧ୍ୟ ରହିଛି।
ପରିବହନ ବିଭାଗର ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଦୁର୍ଘଟଣାଗ୍ରସ୍ତ ବସର ଫିଟନେସ୍ ସାର୍ଟିଫିକେଟର ଅବଧି ଛଅ ବର୍ଷ ପୂର୍ବେ ଅର୍ଥାତ୍ ୨୦୧୮ ରେ ଶେଷ ହୋଇଯାଇଥିଲା । ୧୦୧୭ ମସିହାରୁ ବସର ରୋଡ୍ ଟ୍ୟାକ୍ସ ମଧ୍ୟ ଦିଆଯାଇନାହିଁ। ବସଟିରେ ୱିଣ୍ଡୋ ଗ୍ରିଲ୍ ମଧ୍ୟ ନଥିଲା, ଯଦିଓ ସ୍କୁଲ ପିଲାମାନଙ୍କ ପାଇଁ ଏହା ବାଧ୍ୟତାମୂଳକ ଅଟେ। ପ୍ରାଥମିକ ଚିକିତ୍ସା ପାଇଁ ବସ୍ ଭିତରେ କୌଣସି ପ୍ରାଥମିକ ସହାୟତା ବାକ୍ସ ରଖାଯାଇ ନଥିଲା। ଦୁର୍ଘଟଣାଗ୍ରସ୍ତ ବସଟି ବ୍ୟାପକ ନୀୟମ ଉଲ୍ଲଂଘନ କରିଛି । ଏହି ଘଟଣାରେ ପରିବହନ ବିଭାଗର ଆସିଷ୍ଟାଣ୍ଟ ସେକ୍ରେଟାରୀଙ୍କୁ ସସ୍ପେଣ୍ଡ କରାଯାଇଛି।
ବାଙ୍ଗାଲୁରୁ କାଫେ ବିସ୍ଫୋରଣର ମୁଖ୍ୟ ଅଭିଯୁକ୍ତକୁ ଧରିଲା NIA
ବ୍ୟୁରୋ ରିପୋର୍ଟ: ବେଙ୍ଗାଳୁରୁ ରାମେଶ୍ବରମ୍ କାଫେ ବିସ୍ଫୋରଣ ଘଟଣା। ଏନଆଇଏକୁ ମିଳିଲା ବଡ଼ ସଫଳତା। କୋଲକାତାରୁ ୨ ସନ୍ଦିଗ୍ଧଙ୍କୁ ଗିରଫ କଲା NIA। ବିସ୍ଫୋରଣ ଘଟଣାର ମାଷ୍ଟରମାଇଣ୍ଡ ଗିରଫ ହୋଇଛି। କୋଲକାତା ପୂର୍ବ ମେଦିନିପୁର ଜିଲ୍ଲାର କାନ୍ଥିରୁ ଆଜି ସକାଳୁ ୨ ସନ୍ଦିଗ୍ଧଙ୍କୁ କାବୁ କଲା ଏନଆଇଏ। ଗିରଫ ୨ ଜଣ ହେଲେ ମୁଶାବୀର୍ ହୁସେନ୍ ସାଜେବ୍ ଓ ଅବଦୁଲ୍ ମଥିନ ତାହା। ମୁଶାବୀର୍ ହୁସେନ୍ ସାଜେବ ରାମେଶ୍ବରମ୍ କାଫେରେ ବିସ୍ଫୋରକ ସାମଗ୍ରୀ ଖଞ୍ଜିଥିବା ଅଭିଯୋଗ ହୋଇଥିବା ବେଳେ ଅବଦୁଲ୍ ମଥିନ ତାହା ବିସ୍ଫୋରଣର ମାଷ୍ଟରମାଇଣ୍ଡ ବୋଲି କୁହାଯାଉଛି। ୨ ସନ୍ଦିଗ୍ଧଙ୍କ ଠାବ କରିବାକୁ କେନ୍ଦ୍ରୀୟ ତଦନ୍ତକାରୀ ସଂସ୍ଥା NIA ସହ କୋଲକାତା, କର୍ଣ୍ଣାଟକ, ତେଲେଙ୍ଗାନା ଓ କେରଳ ପୋଲିସର ସହଯୋଗରେ ୨ ଅଭିଯୁକ୍ତଙ୍କୁ ଗିରଫ କରାଯାଇଛି।
ମାଷ୍ଟରମାଇଣ୍ଡ ମଥିନକୁ ଗିରଫ କରିବାକୁ କର୍ଣ୍ଣାଟକ, ତାମିଲନାଡୁ ଓ ଉତ୍ତରପ୍ରେଦଶର ୧୮ଟି ସ୍ଥାନରେ ରେଡ୍ କରାଯାଇଥିଲା। ଏହି ଘଟଣାରେ ପୂର୍ବରୁ ମୁଜାମିଲ ସରିଫକୁ ମାର୍ଚ୍ଚ ୨୬ରେ ଗିରଫ କରାଯାଇଛି। ଗତ ମାର୍ଚ୍ଚ ପହିଲାରେ ବେଙ୍ଗାଳୁରୁର ରାମେଶ୍ଵରମ କାଫେରେ ଘଟିଥିଲା ଏହି ବିସ୍ଫୋରଣ। ଏଥିରେ ଅନେକ ଗ୍ରାହକ ଆହତ ହୋଇଥିଲେ।
ବିଜେପି ନେତାଙ୍କ ବିରୋଧରେ ସିଇଓଙ୍କୁ ଫେରାଦ ହେଲେ ଖୋର୍ଦ୍ଧା ଜିଲ୍ଲାର କର୍ତ୍ତବ୍ୟରତ ସାମ୍ୱାଦିକ
ଖୋର୍ଦ୍ଧା: ବିଜେପି ନେତାଙ୍କ ବିରୋଧରେ ସିଇଓଙ୍କୁ ଫେରାଦ ହେଲେ ଖୋର୍ଦ୍ଧା ଜିଲ୍ଲାର କର୍ତ୍ତବ୍ୟରତ ସାମ୍ବାଦିକ। ଖୋର୍ଦ୍ଧା ଛଣଗିରିରେ ବିଜେପି ନେତା ପ୍ରଶାନ୍ତ ଜଗଦ୍ଦେବଙ୍କ ଦାଦାଗିରିକୁ ତୀବ୍ର ବିରୋଧ କରି ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଦାବି କରିଛନ୍ତି। ଏହାପୂର୍ବରୁ ଖୋର୍ଦ୍ଧା ଜିଲ୍ଲାପାଳଙ୍କୁ ଭେଟି ଅଭିଯୋଗ କରିବା ସହିତ ସ୍ମାରକ ପତ୍ର ପ୍ରଦାନ କରିଥିଲେ ସାମ୍ବାଦିକ।
ଗତକାଲି ଛଣଗିରିରେ ଖବର ସଂଗ୍ରହବେଳେ ସାମ୍ବାଦିକଙ୍କୁ ଆକ୍ରମଣ କରିଥିଲେ ବିଜେପିର ଜନବିରୋଧୀ ନେତା ପ୍ରଶାନ୍ତ ଜଗଦ୍ଦେବ। ଏନେଇ ତାଙ୍କ ବିରୋଧରେ ଥାନାରେ ଏତଲା ମଧ୍ଯ ଦାୟର ହୋଇଛି।
ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ କଂଗ୍ରେସର ରଣକୌଶଳ, ଓଡିଶା ଆସିବେ ସୋନିଆ ଗାନ୍ଧୀ
କୋରାପୁଟ: ନିର୍ବାଚନ ରଣକୌଶଳ ପାଇଁ ପ୍ରସ୍ତୁତ କଂଗ୍ରେସ। ପ୍ରଥମ ପର୍ଯ୍ୟାୟରେ ନିର୍ବାଚନ ହେବାକୁ ଥିବା ୪ଟି ଲୋକସଭା ଓ ୨୮ଟି ବିଧାନସଭା କ୍ଷେତ୍ରରେ ପ୍ରଚାର କରିବେ ଷ୍ଟାର ପ୍ରଚାରକ। ମେ’ ପ୍ରଥମ ସପ୍ତାହରେ ସୋନିଆ ଗାନ୍ଧୀ, ପ୍ରିୟଙ୍କା ଗାନ୍ଧୀ ଓ ରାହୁଲ ଗାନ୍ଧୀଙ୍କ ସମେତ ତେଲେଙ୍ଗାନା ମୁଖ୍ୟମନ୍ତ୍ରୀ ରେବନ୍ତ ରେଡ୍ଡୀ ଓଡିଶା ଆସିବାର ଯୋଜନା କରାଯାଇଛି।
ମେ ୧୩ରେ ଓଡ଼ିଶାର ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ମତଦାନ ରହିଛି। କୋରାପୁଟ ଗସ୍ତରେ ଆସିବେ ୟୁପିଏ ଅଧ୍ୟକ୍ଷା ସୋନିଆ ଗାନ୍ଧୀ। ରାୟଗଡ଼ା ଗସ୍ତରେ ଆସିବେ ରାହୁଲ ଗାନ୍ଧୀ। ସୋନିଆ ରାହୁଲଙ୍କ ସହ ଷ୍ଟାର ପ୍ରଚାରକ ତେଲେଙ୍ଗାନା ମୁଖ୍ୟମନ୍ତ୍ରୀ ରେବନ୍ତ ରେଡ୍ଡୀ କୋରାପୁଟ ଲୋକସଭା ଅନ୍ତର୍ଗତ ଗୁଣୁପୁର, ରାୟଗଡା, ବିଷମକଟକ ଓ ଜୟପୁର ନିର୍ବାଚନ ମଣ୍ଡଳୀରେ ଯୋଗ ଦେବାର ଯୋଜନା କରାଯାଇଛି। ତେଲୁଗୁ ଭୋଟର ବା ଯୁବ ଭୋଟରଙ୍କୁ ଆକୃଷ୍ଟ କରିବା ପାଇଁ କହ୍ନେୟା କୁମାର ରୋଡ ସୋ କରିବେ ବୋଲି କହିଛନ୍ତି ସାଂସଦ ପ୍ରାର୍ଥୀ ସପ୍ତଗିରି ଶଙ୍କର ଉଲାକା।
ଆସନ୍ତା ୧୯ ତାରିଖରେ କୋରାପୁଟରେ ନାମାଙ୍କନ ପତ୍ର ଦାଖଲ କରିବେ ସପ୍ତଗିରି। ଆଜି ଜୟପୁର ଠାରେ ଜିଲ୍ଲା ସ୍ତରୀୟ କାର୍ଯ୍ୟକର୍ତ୍ତା ବୈଠକରେ ସାଂସଦ ସପ୍ତଗିରି ଉଲାକାଙ୍କ ସମେତ ବିଧାୟକ ତାରା ପ୍ରସାଦ ବାହିନିପତି ଓ ଜିଲ୍ଲାର ଅନ୍ୟ ୪ ନିର୍ବାଚନ ମଣ୍ଡଳୀର ପ୍ରାର୍ଥୀ ଏକାଠି ହୋଇ ଆଲୋଚନା କରିବା ସହ ନିର୍ବାଚନ ପାଇଁ ଗୁରୁମନ୍ତ୍ର ନେଇଛନ୍ତି ।
ପୂର୍ବତନ ମନ୍ତ୍ରୀ କମଳା ଦାସଙ୍କ ବିୟୋଗରେ ଗଭୀର ଶୋକପ୍ରକାଶ କରିଛନ୍ତି ରାଷ୍ଟ୍ରପତି ଓ ମୁଖ୍ଯମନ୍ତ୍ରୀ
ଭୁବନେଶ୍ୱର: ପୂର୍ବତନ ମନ୍ତ୍ରୀ କମଳା ଦାସଙ୍କ ବିୟୋଗରେ ଗଭୀର ଶୋକ ପ୍ରକାଶ କରିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ ଓ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ। ତାଙ୍କ କାମ ସର୍ବଦା ସ୍ମରଣୀୟ ରହିବ। ତାଙ୍କ ଦେହାନ୍ତ ଖବର ଶୁଣି ଅତ୍ଯନ୍ତ ମର୍ମାହତ ବୋଲି କହିବା ସହିତ ଅମର ଆତ୍ମାର ସଦଗତି କାମନା କରିଛନ୍ତି ମୁଖ୍ଯମନ୍ତ୍ରୀ।
ସେହିପରି ରାଷ୍ଟ୍ରପତି ଦ୍ରୌପଦୀ ମୁର୍ମୁ ତାଙ୍କ ସୁଦୀର୍ଘ କ୍ଯାରିଅରରେ ଓଡ଼ିଶାର ଉନ୍ନତିପାଇଁ ତାଙ୍କ କାମକୁ ସ୍ମରଣ କରିଛନ୍ତି। ଶୋକସନ୍ତପ୍ତ ପରିବାରକୁ ସେ ସମବେଦନା ଜଣାଇଛନ୍ତି। ରାଜ୍ଯପାଳ ରଘୁବର ଦାସ, ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ, ବିଜେଡି ରାଜ୍ଯସଭା ସାଂସଦ ମାନସ ରଞ୍ଜନ ମଙ୍ଗରାଜ ମଧ୍ଯ କମଳାଙ୍କ ବିୟୋଗରେ ଗଭୀର ଶୋକ ପ୍ରକାଶ କରିବା ସହ ଅମର ଆତ୍ମାର ସଗଦତି କାମନା କରିଛନ୍ତି।