ଆଠଗଡ଼: ତିଗିରିଆ ଥାନା ବିନ୍ଧାଣୀମା ରାସ୍ତାରେ ଦୁର୍ଘଟଣା। ବିବାହ ଭୋଜି ଖାଇ ଫେରୁଥିବା ବେଳେ ଘର କାନ୍ଥରେ ପିଟି ହେଲା କାର। ଦୁର୍ଘଟଣାରେ ୪ ଜଣଙ୍କ ମୃତ୍ୟୁ ହୋଇଛି। ୪ ଜଣ ସାଙ୍ଗ ଖଜୁରୀପଦାରୁ ଭୋଜି ଖାଇ ଫେରୁଥିବା ବେଳେ ଏଭଳି ଦୁର୍ଘଟଣା ଘଟିଛି। ଘଟଣାସ୍ଥଳରେ ତିଗିରିଆ ପୋଲିସ୍ ପହଞ୍ଚି ତଦନ୍ତ ଆରମ୍ଭ କରିଛି।
ଭିଜିଲା ଆଭ୍ୟନ୍ତରୀଣ ଓଡିଶା, କୁହୁଡି ପାଇଁ ୧୦ଟି ଜିଲ୍ଲାକୁ ସତର୍କତା
ଭୁବନେଶ୍ବର: ଦୁଇ ଦିନ ଘାଣ୍ଟିବ ଘନ କୁହୁଡି। ଉପକୂଳ ଓଡ଼ିଶା ସମେତ ଆଭ୍ୟନ୍ତରୀଣ ଓଡ଼ିଶାର ଅଧିକାଂଶ ଜିଲ୍ଲାରେ ଘନ କୁହୁଡିର ଆସ୍ତରଣ ନେଇ ସତର୍କତା ଜାରି କରାଯାଇଛି। ଆଜି ଘନ କୁହୁଡି ପାଇଁ ୧୦ଟି ଜିଲ୍ଲାକୁ ସତର୍କତା ଜାରି କରାଯାଇଛି। ବାଲେଶ୍ବର, ଭଦ୍ରକ, ଯାଜପୁର, କେନ୍ଦ୍ରାପଡା, କଟକ, ଜଗତସିଂହପୁର, ମୟୁରଭଞ୍ଜ, କେନ୍ଦୁଝର, ସୁନ୍ଦରଗଡ ଏବଂ ଝାରସୁଗୁଡାକୁ ୟେଲୋ ଆଲର୍ଟ ଜାରି କରାଯାଇଛି। ସେହିଭଳି ୪ ତାରିଖରେ ଘନ କୁହୁଡି ନେଇ ୬ଟି ଜିଲ୍ଲାକୁ ଆଲର୍ଟ ଜାରି କରିଛି ପାଣିପାଗ କେନ୍ଦ୍ର।
ଏହି ସବୁ ଜିଲ୍ଲାରେ ଦୃଶ୍ୟମାନ ଦୂରତା ୫୦ ରୁ ୨୦୦ ମିଟର ମଧ୍ୟରେ ରହିବ। ବାକି ଓଡ଼ିଶାର କିଛି ଜିଲ୍ଳାରେ ହାଲୁକାରୁ ମଧ୍ୟମ ଧରଣର କୁହୁଡି ଅନୁଭୁତ ହେବ ବୋଲି ପୂର୍ବାନୁମାନ କରିଛି ପାଣିପାଗ କେନ୍ଦ୍ର। ବର୍ତ୍ତମାନ ବାୟୁମଣ୍ଡଳରେ ଜଳୀୟବାଷ୍ପରର ପରିମାଣ ଅଧିକ ରହୁଥିବାରୁ ଏଭଳି ପରିସ୍ଥିତି ଦେଖାଦେଇଛି। ପାଣିପାଗ କେନ୍ଦ୍ରର ସତର୍କତା ପରେ ପୋଲିସ ଡିଜି ଏବଂ ପରିବହନ ବିଭାଗକୁ ଚିଠି ଲେଖିଛନ୍ତି ଏସ୍ଆରସି।
ଘନ କୁହୁଡି ସମୟରେ ଗାଡି ଚଳାଚଳ ଉପରେ ନଜର ରଖିବା ସହ ଡ୍ରାଇଭର ମାନଙ୍କୁ ସଚେତନ କରିବାକୁ ନିର୍ଦ୍ଦେଶ ଦିଆଯାଇଛି। ସେପଟେ ଆଜି ସକାଳ ସାଢେ ଆଠଟା ସୁଦ୍ଧା ଉତ୍ତର ଆଭ୍ୟନ୍ତରୀଣ ଓଡ଼ିଶାର କିଛି ଜିଲ୍ଲାରେ ହାଲୁକା ବର୍ଷା ସମ୍ଭାବନା ରହିଛି। ବର୍ତ୍ତମାନ ରାଜ୍ୟରେ କୌଣସି ପାଣିପାଗ ନିୟାମକ ନଥିବାରୁ ତାପମାତ୍ରାରେ କୌଣସି ପରିବର୍ତ୍ତନ ହେବାର ସମ୍ଭାବନା ନାହିଁ।
ତୁଷାର ତାଣ୍ଡବ ପାଇଁ ବନ୍ଦ ସ୍କୁଲ କଲେଜ, ବାହ୍ୟ ଜଗତରୁ ବିଚ୍ଛିନ୍ନ ସିମଲା
ଶିମଲା: ସାରା ହିମାଚଳ ପ୍ରଦେଶରେ ବରଫ ତାଣ୍ଡବ। ରାଜ୍ଯର ଅଧିକାଂଶ ସ୍ଥାନରେ ଜାରି ରହିଛି ବରଫ ବର୍ଷା। ଆଜି ବି ଲାହୌଲ ସ୍ପିତି ଜିଲ୍ଲାରେ ବନ୍ଦ ରହିବ ସ୍କୁଲ ଓ କଲେଜ। ସେହିପରି ରାଜଧାନୀ ହିମାଚଳ ପ୍ରଦେଶରେ ବି ଜାରି ରହିଛି ତୁଷାର ତାଣ୍ଡବ। ରାଜପଥ ସମେତ ବିଭିନ୍ନ ଅଞ୍ଚଳରେ ବରଫପାତ ଯୋଗୁଁ ସିମଳାର ଅଧିକାଂଶ ଅଞ୍ଚଳ ବାହ୍ୟ ଜଗତରୁ ବିଚ୍ଛିନ୍ନ ହୋଇଛି।
ତୁଷାରପାତ ଯୋଗୁ କୁଫ୍ରି, ମସୋବରା, ନରକଣ୍ଡାରେ ବି ଜନଜୀବନ ବାଧାପ୍ରାପ୍ତ ହୋଇଛି। ମନାଲି,ଗୁଲାବା, ସୋଲାଙ୍ଗ ଓ କୋଠି ଅଞ୍ଚଳରେ ଘରୁ ବାହାରିବା ମୁସ୍କିଲ ହୋଇଛି। କେତେକ ସ୍ଥାନରେ ୫୦ ସେଣ୍ଟିମିଟରର ବରଫ ଆସ୍ତରଣ ପଡିଥିବା ଦେଖାୟାଇଛି। ଗତ ବୁଧବାର ଠାରୁ ଲାହୌଲ ସ୍ପିତି, କିନ୍ନାଉର, କୁଲ୍ଲୁ, ସିମଳା, ସିରମାଉର, ସାମ୍ବା ଜିଲ୍ଲାରେ ବରଫପାତ ଜାରି ରହିଛି।
ଭାରତ ମହାସାଗରରେ ଦମ୍ ଦେଖାଇବା ବାହୁବଳୀ, ଆଜି କାର୍ଯ୍ୟକ୍ଷମ ହେବ INS ସନ୍ଧ୍ଯାକ
ବିଶାଖାପାଟଣା: ଆଜି କାର୍ଯ୍ୟକ୍ଷମ ହେବ ଆଇଏନଏସ ସନ୍ଧ୍ଯାକ । ବିଶାଖପାଟଣାସ୍ଥିତ ନାଭାଲ ଡକୟାର୍ଡରେ ଏହାକୁ ଉନ୍ମୋଚନ କରିବେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ । ଉତ୍ସବରେ ନୌସେନା ମୁଖ୍ୟ ଆଡମିରାଲ ଆର. ହରିକୁମାର, ଭାଇସ ଆଡମିରାଲ ରାଜେଶ ପେନ୍ଧାରକର ଓ ନୌସେନା ଅଧିକାରୀ ଏହି ଉତ୍ସବରେ ସାମିଲ ହେବେ । ସେହିପରି ଗାର୍ଡନ ରିଚ୍ ସିପ୍ ବିଲଡର୍ସ ଆଣ୍ଡ ଇଞ୍ଜିନିୟର୍ସର ଅଫିସରମାନେ ବି ଏହି ଉତ୍ସବରେ ଯୋଗଦେବେ ।
କୋଲକାତାର ଗାର୍ଡନ ରିଚ୍ ସିପ୍ ବିଲଡର୍ସ ଆଣ୍ଡ ଇଞ୍ଜିନିୟର୍ସରେ ନିର୍ମିତ ଆଇଏନଏସ ସନ୍ଧ୍ଯାକର ଲମ୍ବା 110 ମିଟର ହୋଇଥିବାବେଳେ ଓଜନ 3 ହଜାର 800 ଟନ । ଏହାର ଯନ୍ତ୍ରାଂସ ମଧ୍ୟରୁ 80 ପ୍ରତିଶତ ହେଉଛି ସ୍ବଦେଶୀ ନିର୍ମିତ । ଏଥିରେ ଦୁଇଟି ଡିଜେଲ ଇଞ୍ଜିନ ରହିଛି । ବିଗତ 2021 ଜୁନ 4ରେ ଡିକମିସନିଂ ହୋଇଥିବା ସନ୍ଧ୍ୟାକର ଏହା ନୂଆ ଭର୍ସନ । ଏହା ଘଣ୍ଟାକୁ 18 ନଟିକାଲ ମାଇଲ ବେଗରେ ଗତି କରିଥାଏ ଏବଂ କ୍ରମାଗତ 25 ଦିନ ଗତି କରିପାରିଥାଏ ।
ଭାରତୀୟ ମହାସାଗରରେ ଦବଦବା ଦେଖାଇବାକୁ ସକ୍ଷମ ଆଇଏନଏସ ସନ୍ଧ୍ୟାକ । ଗତ 2023 ଡିସେମ୍ବର 4ରେ ଆଇଏନଏସ ସନ୍ଧ୍ୟାକକୁ ଭାରତୀୟ ନୌସେନା ହାତରେ ଅର୍ପଣ କରାଯାଇଥିଲା ।
ଆଜିଠାରୁ ଭୁବନେଶ୍ବରରେ ଭାଷାବିତ୍ଙ୍କ ଭିଡ, ଦେଶ ବିଦେଶରୁ ଯୋଗ ଦେବେ
ଭୁବନେଶ୍ବର: ଆଜିଠାରୁ ଆରମ୍ଭ ହେଉଛି ବିଶ୍ଵ ଓଡିଆ ଭାଷା ସମ୍ମିଳନୀ। ଜନତା ମଇଦାନରେ ଭାଷାର ମହାକୁମ୍ଭ ପାଇଁ ସାରା ରାଜ୍ଯରେ ଉତ୍ସୁକତା। ଦେଶ ବିଦେଶରୁ ୧୦୦ରୁ ଅଧିକ ଭାଷାବିତ୍ ଯୋଗ ଦେଉଥିବାବେଳେ ସେମାନେ ନିଜ ନିଜର ମୂଲ୍ଯବାନ ମତ ରଖିବେ। ସମସ୍ତଙ୍କ ମତ ଆଧାରରେ ଆଗାମୀ ଦିନ ପାଇଁ ଓଡ଼ିଆ ଭାଷାକୁ ନେଇ ରୋଡମ୍ୟାପ ପ୍ରସ୍ତୁତ କରିବେ ସରକାର। ତିନି ଦିନ ଧରି ଚାଲିବାକୁ ଥିବା ଏହି ସମ୍ମିଳନୀରେ ରହିଛି ମୋଟ ୧୭ଟି ସେସନ୍।
ଉଦଘାଟନୀ ଦିବସରେ ଜଗନ୍ନାଥ ସଂସ୍କୃତି ଉପରେ ସ୍ବତନ୍ତ୍ର ଅଧିବେଶନ ରହିଛି। ଓଡ଼ିଆ ଭାଷା ଉପରେ ଏକ ମ୍ୟୁଜିୟମ ପ୍ରସ୍ତୁତ କରାଯାଇଛି। ସାରା ରାଜ୍ୟରେ ଲୋକ ଏହାର ସିଧା ପ୍ରସାରଣ ଦେଖିବା ପାଇଁ ସବୁ ପଂଚାୟତ ଓ ପୌରାଞ୍ଚଳରେ ବ୍ୟବସ୍ଥା ହୋଇଛି। ଅକ୍ଷର ଭୂମିକୁ ବି ଉଦଘାଟନ କରିଛନ୍ତି ମୁଖ୍ୟମନ୍ତ୍ରୀ। ଆଜି ସମସ୍ତେ ବନ୍ଦେ ଉତ୍କଳ ଜନନୀ ଗାନ କରିବାକୁ ଅପିଲ୍ କରାଯାଇଛି। ଭାଷା ଆଧାରରେ ସ୍ଵତନ୍ତ୍ର ରାଜ୍ୟ ଗଠନ ହୋଇଛି ଓଡିଶା। ଓଡିଆ ଭାଷାକୁ ଶାସ୍ତ୍ରୀୟ ମାନ୍ୟତା ମିଳିବା ସହ ସରକାରୀ ଭାଷା ଭାବେ ବ୍ୟବହାର କରାଯାଉଛି। ଓଡିଆ ଭାଷା କାହିଁକି ଉତ୍କୃଷ୍ଟ, କିପରି ଓଡିଆ ଭାଷା ସବୁଠୁ ସମୃଦ୍ଧ, ଏ ବାବଦରେ ସମ୍ମିଳନୀରେ ବିସ୍ତୃତ ଆଲୋଚନା ହେବ। ବରପୁତ୍ରଙ୍କ ନାମରେ ସମ୍ମିଳନୀ କକ୍ଷ, ସ୍ଵତନ୍ତ୍ର ପ୍ରଦର୍ଶନୀ, ବିଭିନ୍ନ ପ୍ରସଙ୍ଗରେ ବିଶେଷ ଆଲୋଚନା ହେବ ।
ପ୍ରଦୀପଙ୍କ ବାଚାଳାମି ଚରମସୀମାରେ ପହଞ୍ଚିଛି
ଭୁବନେଶ୍ବର: ଜନବିରୋଧୀ ନେତା ପ୍ରଦୀପଙ୍କ ବାଚାଳାମି ଚରମସୀମାରେ ପହଞ୍ଚିଯାଇଛି । ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାରେ କୋର୍ଟ ଚାର୍ଜଫ୍ରେମ କରିବା ପରେ ପ୍ରଦୀପଙ୍କ ବୁଦ୍ଧି ହଜିଯାଇଛି । ସେ କେତେବେଳେ କ’ଣ କହୁଛନ୍ତି, କ’ଣ କରୁଛନ୍ତି ଜାଣିପାରୁନାହାଁନ୍ତି କହି ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀଙ୍କ ଉପରେ ବର୍ଷିଛି ଗଞ୍ଜାମ ବିଜେଡି ।
ଏହାସହ ପ୍ରଦୀପ ଗଣମାଧ୍ୟମରେ ଦେଇଥିବା ବିବୃତିର ପ୍ରତିକ୍ରିୟା ରଖିଛି ଗଞ୍ଜାମ ଜିଲ୍ଲା ବିଜେଡି । ତାଙ୍କ ମୁଣ୍ଡ ଠିକ ନାହିଁ ବୋଲି କହିଛନ୍ତି ବରିଷ୍ଠ ବିଜେଡି ନେତା ତଥା ଗଞ୍ଜାମ ଜିଲ୍ଲା ବିଜେଡି ସଭାପତି ରମେଶ ଚନ୍ଦ୍ର ଚ୍ଯାଉପଟ୍ଟନାୟକ । ଲୋକ ପ୍ରତିନିଧି ହୋଇ ଲୋକଙ୍କୁ ଠକିଛନ୍ତି । ଚାକିରି ଦେବା ନାଁରେ ଲୋକଙ୍କଠାରୁ ଲକ୍ଷାଧିକ ଟଙ୍କା ଠକି ନେଇଛନ୍ତି । ବିଜେଡିରୁ ତଡା ଖାଇବା ପରେ ଦଳ ବିରୋଧରେ ପାଗଳଙ୍କ ଭଳି ପ୍ରଳାପ କରୁଛନ୍ତି । ସେ ଭଲ ଭାବରେ ଜାଣିଛନ୍ତି ସେ ଦୋଷ କରିଛନ୍ତି । ତଥ୍ଯ ଓ ପ୍ରମାଣ ଅଛି । କଠିନ ଦଣ୍ଡ ପାଇବା ଭୟରେ ସେ ଏଭଳି ଆଚରଣ କରୁଛନ୍ତି । ଏବେ ଏକ ନିର୍ଦ୍ଦିଷ୍ଟ ଦଳକୁ ଯିବା ପାଇଁ ଡିଣ୍ଡିମ ପିଟୁଥିବା ବେଳେ ସେ ଦଳ ଏଭଳି ଲୋକଙ୍କୁ ଗ୍ରହଣ କରୁନାହିଁ । ଏଭଳି ବିବୃତିକୁ ଲୋକେ ଗ୍ରହଣ କରିବେ ନାହିଁ ବୋଲି କହିଛନ୍ତି ବ୍ରହ୍ମପୁର ବିଧାୟକ ବିକ୍ରମ ପଣ୍ଡା ।
ଅକ୍ଷର ଭୂମିର ଲୋକାର୍ପଣ କଲେ ମୁଖ୍ୟମନ୍ତ୍ରୀ, କାଲିଠୁ ବିଶ୍ବ ଓଡ଼ିଆ ଭାଷା ସମ୍ମିଳନୀ
ଭୁବନେଶ୍ବର: ଆସନ୍ତାକାଲିଠାରୁ ପ୍ରଥମ ବିଶ୍ବ ଓଡ଼ିଆ ଭାଷା ସମ୍ମିଳନୀ । ଏହି ଉପଲକ୍ଷେ ଭୁବନେଶ୍ବର କଳାମଣ୍ଡଳ ପରିସରରେ ନିର୍ମିତ ଅକ୍ଷର ଭୂମିର ଲୋକାର୍ପଣ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଅକ୍ଷର ଭୂମିର କାନ୍ଥବାଡ ବଖାଣୁଛି ଓଡ଼ିଆ ଲିପିର କାହାଣୀ । ପଥର ଖୋଦିତ ଅକ୍ଷର ସାଙ୍ଗକୁ ଦେଖିବାକୁ ମିଳୁଛି ଥ୍ରୀଡି ଝଲକ । ମନ ମୋହୁଛି ମୁକ୍ତେଶ୍ବର ମନ୍ଦିର ତୋରଣ ଆକୃତି ତୋରଣ । ଭାଷାବିତଙ୍କୁ ଟାଣିନେଉଛି ବୃହତ୍ ଆକୃତିର ଓଡ଼ିଆ ଲିପି `ଅ’। ସ୍ମାରକୀ ହେବାକୁ ଯାଉଛି ଭୁବନେଶ୍ବର କଳାମଣ୍ଡଳ ପରିସରରେ ଥିବା ଏହି ଭାଷା ସୌଧ ।
ଭୁବନେଶ୍ବର କଳାମଣ୍ଡଳ ପରିସରରେ ନିର୍ମାଣ ହୋଇଛି ଅକ୍ଷର ଭୂମି । ଭାଷାକୁ ନେଇ ତିଆରି ହୋଇଛି ନୂଆ କାରୁକାର୍ଯ୍ୟ । ଅକ୍ଷର ଭୂମିର ମଝି ଅଂଶରେ ମୁକ୍ତେଶ୍ଵର ମନ୍ଦିର ପରିସରରେ ଥିବା ତୋରଣ ଶୈଳୀରେ ଏକ ସୁନ୍ଦର ତୋରଣ ନିର୍ମାଣ କରାଯାଇଛି । ତୋରଣର ଠିକ୍ ପଛରେ ଓଡ଼ିଆ ଲିପି ‘ଅ’ର ବୃହତ ଅକ୍ଷର କରାଯାଇଛି । ଦୁଇ ପାର୍ଶ୍ଵରେ ୬ଟି ଅକ୍ଷର କାନ୍ଥ ରହିଛି । କାନ୍ଥ ଗୁଡ଼ିକରେ ଖଣ୍ଡୋଲାଇଟ୍ ପଥରକୁ ଖୋଦେଇ କରାଯାଇ ଓଡ଼ିଆ ବର୍ଣ୍ଣମାଳାକୁ ସ୍ଥାନ ଦିଆଯାଇଛି । ୪୦ ମିଟର ଲମ୍ବ ଓ ୩୦ ମିଟର ଚଉଡାର ଏହି ପ୍ରକଳ୍ପକୁ ସ୍ପାନ୍ଇନଫ୍ରା ବିଲଡର୍ସ ନିର୍ମାଣ କରିଛି । ଏଥିରେ ପ୍ରାୟ ୮୦ ଲକ୍ଷ ଟଙ୍କା ଖର୍ଚ୍ଚ ହୋଇଛି ।
ସୁଜାତା ରାଉତ କାର୍ତ୍ତିକେୟନଙ୍କ ସମୀକ୍ଷା
ତିନି ଦିନ ଧରି ଚାଲିବାକୁ ଥିବା ଏହି ସମ୍ମିଳନୀରେ ମୋଟ ୧୭ଟି ସେସନ୍ ରହିଛି । ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ସଚିବ ସୁଜାତା ରାଉତ କାର୍ତ୍ତିକେୟନ ଜନତା ମଇଦାନରେ ପହଂଚି ସମୀକ୍ଷା କରିଛନ୍ତି । ସମସ୍ତ ମଞ୍ଚ ବୁଲି ଦେଖିଛନ୍ତି ସୁଜାତା ରାଉତ କାର୍ତ୍ତିକେୟନ । କେଉଁ ମଞ୍ଚର କାମ କେତେ ଦୂର ଆଗେଇଛି ବୁଲି ଦେଖିଛନ୍ତି । ବନ୍ଦେ ଉତ୍କଳ ଜନନୀ ଗାନ ରିହରସଲ ମଧ୍ୟ ଦେଖିଥିଲେ । ଉଦଘାଟନୀ ଦିବସରେ ଜଗନ୍ନାଥ ସଂସ୍କୃତି ଉପରେ ସ୍ବତନ୍ତ୍ର ଅଧିବେଶନ ରହିଛି । ସମୀକ୍ଷା ବେଳେ କୃଷି ବିଭାଗର ପ୍ରମୁଖ ଶାସନ ସଚିବ ଅରବିନ୍ଦ ପାଢ଼ୀ, ପରିବହନ ପ୍ରମୁଖ ଶାସନ ସଚିବ ଉଷା ପାଢ଼ୀ, କେନ୍ଦ୍ରାଞ୍ଚଳ ଆରଡିସି ରଂଜନ ଦାଶ, ସତ୍ୟବ୍ରତ ସାହୁ, ଓଏଫଡିସି ଅଧ୍ୟକ୍ଷ କୁନା ତ୍ରିପାଠୀ, ଆଇଟି ସଚିବ ମନୋଜ ମିଶ୍ର, ଓପେପା ନିର୍ଦ୍ଦେଶକ ଅନୁପମ ଶାହା, ଭୁବନେଶ୍ୱର ଡିସିପି ପ୍ରତୀକ ସିଂ ଉପସ୍ଥିତ ଥିଲେ । କମିଶନରେଟ ପୋଲିସ ପକ୍ଷରୁ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି । ବିଶ୍ୱ ଓଡ଼ିଆ ଭାଷା ସମିଳନୀ ପାଇଁ ୧୦ ପ୍ଲାଟୁନ ପୋଲିସ ଫୋର୍ସ ମୁତୟନ ହେବେ ।
ବିଶ୍ବ ଓଡ଼ିଆ ଭାଷା ସମ୍ମିଳନୀର ସ୍ମାରକୀ ହେବ ଅକ୍ଷର ଭୂମି
ଭୁବନେଶ୍ବର: ବିଶ୍ବ ଓଡ଼ିଆ ଭାଷା ସମ୍ମିଳନୀ ପାଇଁ ସଜେଇ ହୋଇଛି ଭୁବନେଶ୍ବର । ଜନତା ମଇଦାନଠାରୁ ଆରମ୍ଭ କରି ରାସ୍ତାରେ ଓଡ଼ିଆ ଭାଷାର ଝଲକ ଦେଖିବାକୁ ମିଳିଛି । ଏହି ଅବସରରେ ଭୁବନେଶ୍ବର କଳାମଣ୍ଡଳ ପରିସରରେ ନିର୍ମାଣ ହୋଇଛି ଅକ୍ଷର ଭୂମି । ଭାଷାକୁ ନେଇ ତିଆରି ହୋଇଛି ନୂଆ କାରୁକାର୍ଯ୍ୟ । ଭାଷା ସମ୍ମିଳନୀ ଉପଲକ୍ଷେ ଏହା ଏକ ସ୍ମାରକୀ ହେବାକୁ ଯାଉଛି । ଯାହା ଭାଷାବିତ୍, ବୁଦ୍ଧିଜୀବୀ ଏବଂ ଛାତ୍ରଛାତ୍ରୀଙ୍କୁ ବେଶ ଆକୃଷ୍ଟ କରୁଛି । ଦିନରେ ଯେତିକି ଝଲସୁଛି ରାତି ହେଲେ ସେତିକି ବଖାଣୁଛି ଓଡ଼ିଆ ଭାଷା ଏବଂ ସଂସ୍କୃତିର ଗାଥା । ସବୁଠାରୁ ଆକର୍ଷଣୀୟ ହୋଇଛି ଓଡ଼ିଆ ଲିପି- ଅ।
ବିଶ୍ବ ଓଡ଼ିଆ ଭାଷା ସମ୍ମିଳନୀର ସ୍ମାରକୀ ହେବ ଅକ୍ଷର ଭୂମି। କାନ୍ଥବାଡ ବଖାଣୁଛି ଓଡ଼ିଆ ଲିପିର କାହାଣୀ । ପଥର ଖୋଦିତ ଅକ୍ଷର ସାଙ୍ଗକୁ ଥ୍ରୀଡି ଝଲକ । ଦିନ ଅପେକ୍ଷା ରାତିରେ ଦିଶୁଛି ଅଧିକ ଆକର୍ଷଣୀୟ । ମନ ମୋହୁଛି ମୁକ୍ତେଶ୍ବର ମନ୍ଦିର ତୋରଣ ଆକୃତିର ତୋରଣ । ଭାଷାବିତଙ୍କୁ ଟାଣି ନେଉଛି ବୃହତ୍ ଆକୃତିର ଓଡ଼ିଆ ଲିପି `ଅ’। ବିଶ୍ବ ଓଡ଼ିଆ ଭାଷା ସମ୍ମିଳନୀ ପାଇଁ ଭୁବନେଶ୍ବର ଗଜପତି ନଗର କଳାମଣ୍ଡଳ ପରିସରରେ ନିର୍ମାଣ ହୋଇଥିବା ଅକ୍ଷର ଭୂମି ପ୍ରତିଟି ଓଡ଼ିଆଙ୍କୁ କରିବ ଆକର୍ଷିତ । ୪୦ ମିଟର ଲମ୍ବ ଓ ୩୦ ମିଟର ଚଉଡାର ଏହି ପ୍ରକଳ୍ପ । ଏଥିରେ ପ୍ରାୟ ୮୦ ଲକ୍ଷ ଟଙ୍କା ଖର୍ଚ୍ଚ ହୋଇଛି । ସମସ୍ତ ନିର୍ମାଣ ଖଣ୍ଡୋଲାଇଟ୍ ପଥରେ କରାଯାଇଛି ।
ଶିଳ୍ପୀମାନଙ୍କ ହାତଛୁଆଁରେ ପଥରର କାରୁକାର୍ଯ୍ୟ ଜୀବନ୍ତ ହୋଇ ଉଠିଛି । ଅକ୍ଷର ଭୂମି ମଝି ଅଂଶରେ ମୁକ୍ତେଶ୍ଵର ମନ୍ଦିର ପରିସରରେ ଥିବା ତୋରଣ ଶୈଳୀରେ ଏକ ସୁନ୍ଦର ତୋରଣ ନିର୍ମାଣ କରାଯାଇଛି କରାଯାଇଛି । ତୋରଣର ଠିକ୍ ପଛରେ ଓଡ଼ିଆ ଲିପି ‘ଅ’ର ବୃହତ ଅକ୍ଷର କରାଯାଇଛି । ଦୁଇ ପାର୍ଶ୍ଵରେ ୬ଟି ଅକ୍ଷର କାନ୍ଥ ରହିଛି । କାନ୍ଥ ଗୁଡ଼ିକରେ ଖଣ୍ଡୋଲାଇଟ୍ ପଥରକୁ ଖୋଦେଇ କରାଯାଇ ଓଡ଼ିଆ ବର୍ଣ୍ଣମାଳାକୁ ସ୍ଥାନ ଦିଆଯାଇଛି । ଖୋଦେଇ ଅକ୍ଷର ଭିତରେ ଅତ୍ୟାଧୁନିକ ଆଲୋକ ଲଗାଯାଇଛି । ଯାହା ରାତି ସମୟରେ ପରିସର ଅଧିକ ସୁନ୍ଦର କରୁଛି । ଖାଲି ସେତିକି ନୁହେଁ ଏଠାରେ ପଥରର କାରୁକାର୍ଯ୍ୟ ସହ ସବୁଜମୟ ପରିବେଶ ଆଖିଦୃଶିଆ ହୋଇଛି । ଚାରି କୋଣରେ ସବୁଜ ଘାସ ସହ ଫୁଲ ଗଛ ଲଗାଯାଇଛି । ଏଥିସହ ଫୁଟ୍ ପାଥ୍, ସେଲଫି ଜୋନ୍ ମଧ୍ୟ କରାଯାଇଛି ।
ପାଚେରି ଚାରିପାଖରେ ବଡ଼ ବଡ଼ ବଉଳ ଗଛ ଓ ଆଲୋକୀକରଣ ପରିବେଶକୁ ସ୍ବତନ୍ତ୍ର ପରିଚୟ ଦେଉଛି । ଭାଷା ସମ୍ମିଳନୀର ସ୍ମାରକୀ ଭାବେ ‘ଅକ୍ଷର ଭୂମି’ ସବୁ ବେଳେ ସ୍ମୃତିକୁ ସତେଜ କରି ରଖିବ ।
ଚିତ୍ରକଳା ପ୍ରଦର୍ଶନୀ
ପ୍ରଥମ ବିଶ୍ଵ ଓଡ଼ିଆ ଭାଷା ସମ୍ମିଳନୀ ଅବସରରେ ବୁଦ୍ଧ ଆର୍ଟ ଗ୍ୟାଲେରୀରେ ଓଡିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ପକ୍ଷରୁ ପ୍ରଦର୍ଶିତ ହେଲା ସମସାମୟିକ ଚିତ୍ରକଳା । ଏଥିରେ ଧର୍ମପଦ ପୁରସ୍କାରପ୍ରାପ୍ତ ଶିଳ୍ପୀଙ୍କ ଦ୍ୱାରା ୩୬ଟି ସୁନ୍ଦର ସୁନ୍ଦର ଚିତ୍ରକଳା ପ୍ରଦର୍ଶିତ ହୋଇଛି । ଉତ୍ସବକୁ ଧର୍ମପଦ ପୁରସ୍କାର ପ୍ରାପ୍ତ ବରିଷ୍ଠ ଚିତ୍ର ଶିଳ୍ପୀ ବିନୋଦ ମହାରଣା, ବଂଶୀଧର ପ୍ରତିହାରୀ ଓ ଶ୍ୟାମସୁନ୍ଦର ପଟ୍ଟନାୟକ ପ୍ରମୁଖ ଉଦଘାଟନ କରିଥିଲେ । ଏଥିରେ ଓଡ଼ିଶାର ଖ୍ୟାତନାମା ବରିଷ୍ଠ ଚିତ୍ରଶିଳ୍ପୀ ଡ଼ ମୁରଲିଧର ଟାଲି, ରବିନାରାୟଣ ନାୟକ, ଅଜିତ କେଶରୀ ରାୟ, ଅନନ୍ତ କୁମାର ପଣ୍ଡା, ଅସିତ ମୁଖାର୍ଜୀ, ଗୋକୁଳ ବିହାରୀ ପଟ୍ଟନାୟକ, ଡ଼ ଦୁର୍ଗା ପ୍ରସାଦ ଦାସ, ପଦ୍ମଭୂଷଣ ଡ଼ ଯତୀନ ଦାସ, ଦୀନନାଥ ପାଠୀ, ପଦ୍ମବିଭୂଷଣ ରଘୁନାଥ ମହାପାତ୍ର, ବନବିହାରୀ ପରିଡ଼ା, ଶ୍ୟାମ ସୁନ୍ଦର ପଟ୍ଟନାୟକ, ଜଗଦୀଶ ଚନ୍ଦ୍ର କାନୁନଗୋ, ବିନୋଦ ମହାରଣା, ମହେନ୍ଦ୍ର ପ୍ରସାଦ ମହାପାତ୍ର, ଲଲାଟ ମୋହନ ପଟ୍ଟନାୟକ ପ୍ରମୁଖଙ୍କ ଚିତ୍ରକଳା ପ୍ରଦର୍ଶିତ ହୋଇଛି । ଏହି ପ୍ରଦର୍ଶନୀ ଆଜିଠାରୁ ଆରମ୍ଭ ହୋଇ ଆସନ୍ତା ୭ ତାରିଖ ପର୍ଯ୍ୟନ୍ତ ଚାଲିବ । ସାଧାରଣ ଲୋକ ସକାଳ ୧୧ ଘଟିକାରୁ ସନ୍ଧ୍ୟା ୭ ଘଟିକା ପର୍ଯ୍ୟନ୍ତ ବୁଲି ଏହି ଚିତ୍ରକଳାର ମଜା ନେଇପାରିବେ ।
କାଲିଠୁ ଓଡ଼ିଆ ବିଶ୍ଵ ଭାଷା ସମ୍ମିଳନୀ, ଆଜି ଅକ୍ଷର ଭୂମି ଉଦଘାଟନ କରିବେ ମୁଖ୍ୟମନ୍ତ୍ରୀ
ଭୁବନେଶ୍ବର: ଆସନ୍ତାକାଲିଠୁ ଆରମ୍ଭ ହେଉଛି ଓଡ଼ିଆ ବିଶ୍ଵ ଭାଷା ସମ୍ମିଳନୀ । ଆଜି ସନ୍ଧ୍ୟାରେ ଅକ୍ଷର ଭୂମି ଉଦଘାଟନ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ତିନି ଦିନ ଧରି ଚାଲିବାକୁ ଥିବା ଏହି ସମ୍ମିଳନୀରେ ମୋଟ ୧୭ଟି ଅଧିବେଶନ ରହିଛି । ଉଦଘାଟନୀ ଦିବସରେ ଜଗନ୍ନାଥ ସଂସ୍କୃତି ଉପରେ ସ୍ବତନ୍ତ୍ର ଅଧିବେଶନ କରାଯାଉଛି । ଦେଶ ବିଦେଶରୁ ୧୦୦ରୁ ଅଧିକ ଭାଷାବିତ ଯୋଗଦେଇ ରଖିବେ ସେମାନଙ୍କର ମତ । ସମସ୍ତଙ୍କ ମତକୁ ଆଧାର କରି ଆଗାମୀ ଦିନ ପାଇଁ ଓଡ଼ିଆ ଭାଷାକୁ ନେଇ ରାଜ୍ୟ ସରକାର ପ୍ରସ୍ତୁତ କରିବେ ରୋଡ ମ୍ୟାପ ।
ସେପଟେ ଲୋକାର୍ପଣ ପୂର୍ବରୁ କାର୍ଯ୍ୟର ସମୀକ୍ଷା କରିଛନ୍ତ ବିଭାଗୀୟ ଶାସନ ସଚିବ ସୁଜାତା ରାଉତ କାର୍ତ୍ତିକେୟନ୍ । ଅକ୍ଷର ଭୂମି ତଦାରଖ କରିବା ସହ ଓଡ଼ିଆ ଭାଷା ସାହିତ୍ୟ ଓ ସଂସ୍କୃତି ବିଭାଗ ନିର୍ଦ୍ଦେଶକଙ୍କ ସହ ଆଲୋଚନା କରିଛନ୍ତି । ଭୁବନେଶ୍ୱର ଗଜପତି ନଗରରେ ନିର୍ମାଣ ହୋଇଛି ଅକ୍ଷର ଭୂମି । ଅକ୍ଷର ଭୂମିରେ ଶୋଭା ପାଉଛି ଓଡ଼ିଆ ଅକ୍ଷର । ଆକର୍ଷଣ ସାଜିଛି ବୃହତ ଓଡ଼ିଆ ଲିପି ‘ଅ’।
ଓଡ଼ିଆ ଭାଷା ଉପରେ ଏକ ମ୍ୟୁଜିୟମ ପ୍ରସ୍ତୁତ କରାଯାଇଛି । ସାରା ରାଜ୍ୟରେ ଲୋକ ଏହାର ସିଧା ପ୍ରସାରଣ ଦେଖିପାରିବେ । ପଞ୍ଚାୟତ ଓ ପୌରାଞ୍ଚଳରେ ଏନେଇ ବ୍ୟବସ୍ଥା ହୋଇଛି । ସ୍ଵଂୟ ସହାୟକ ମହିଳା ଏଥିରେ ସାମିଲ ହେବେ । ଆସନ୍ତାକାଲି ୧୧ ଟା ସମୟରେ ସମସ୍ତେ ବନ୍ଦେ ଉତ୍କଳ ଜନନୀ ଗାନ କରିବାକୁ କୁହାଯାଇଛି ।
ସାଧୁ ମେହେର: ସମୟଠାରୁ ଥିଲେ ଆଗରେ, ଟ୍ରାକରୁ ହଟି କରୁଥିଲେ କାମ
ଭୁବନେଶ୍ବର: ସାଧୁ ମେହର । ସମାନ୍ତରାଳ ସିନେମାର ସନ୍ଥ । ଗୁରୁ ଗମ୍ଭୀର ସ୍ୱର । ଅଭିନୟ ଏମିତି, ଯାହା ସିଧା ହୃଦୟକୁ ଆଘାତ କରୁଥିଲା । ପ୍ରଥମ ଓଡିଆ ଯିଏ ଅଭିନୟ ପାଇଁ ପାଇଥିଲେ ଜାତୀୟ ସମ୍ମାନ । ଓଡିଆ ଫିଲ୍ମକୁ ସର୍ବଭାରତୀୟ ସ୍ତରରେ ପହଂଚାଇବାର ଶ୍ରେୟ ତାଙ୍କୁ ମଧ୍ଯ ଯାଏ । ବଳିଷ୍ଠ ଅଭିନୟ ଓ ଦମଦାର ସ୍ୱର ପାଇଁ ପରିଚିତ ସାଧୁ ମେହରଙ୍କ ଜୀବନ ଯାତ୍ରା ଶୁକ୍ରବାର ଶେଷ ହୋଇଛି ।
ଦୁନିଆ ରଙ୍ଗମଞ୍ଚରେ ନିଜ ଅଭିନୟ ସାରି ସାଧୁ ମେହର ଚାଲିଯାଇଛନ୍ତି । ପଛରେ ଛାଡ଼ିଯାଇଛନ୍ତି ଉପଲବ୍ଧିର ପାହାଡ଼ । ଯାହା ଆଗକୁ ପ୍ରେରଣା ଦେବ ।
ସାଧୁ ମେହରଙ୍କ ଯେତେବେଳେ ଆଜି ଆମେ ମନେ ପକାଉ, ସେତେବେଳେ ହୁଏତ ସେ ଆଜିର ପୀଢି ପାଇଁ ଜଣେ ବର୍ଷୀୟାନ ଅଭିନେତା ହୋଇପାରନ୍ତି । ଯିଏ ଅଭିନୟରୁ ଅବସର ନେଇ ନିଜ ଅବସର ଜୀବନ କାଟୁଥିଲେ । କିନ୍ତୁ ଗୋଟିଏ ସମୟ ଥିଲା ,ସାଧୁ ଥିଲେ ସମାନ୍ତରାଳ ସିନେମାର ବଳିଷ୍ଠ ଚେହେରା । ୧୯୮୦ ଦଶକରେ ପାରାଲାଲ ସିନେମାର ଗୋଟିଏ ଚିହ୍ନା ନାମ ଥିଲେ ସାଧୁ ମେହର । ୧୯୭୪ ମସିହାରେ ଅଙ୍କୁର ପାଇଁ ସେ ପାଇଥିଲେ ଜାତୀୟ ଫିଲ୍ମ ପୁରସ୍କାର । ଏଭଳି ସମ୍ମାନ ପାଇବାର ସେ ଥିଲେ ପ୍ରଥମ ଓଡ଼ିଆ । ଅଙ୍କୁର ତାଙ୍କୁ ପରିଚୟ ଦେବାର ୩ ବର୍ଷ ପରେ ସେ ଅଭିମାନ ଜରିଆରେ କ୍ୟାମେରା ପଛକୁ ଆସିଥିଲେ । ଅଭିମାନ ଥିଲା ନିର୍ଦ୍ଦେଶକ ଭାବେ ତାଙ୍କର ପ୍ରଥମ ଫିଲ୍ମ । ଏହି ଫିଲ୍ମକୁ ଆଜି ମଧ୍ୟ ଏକ କଲ୍ଟ କ୍ଲାସିକ୍ ଭାବେ ବିବେଚନା କରାଯାଏ ।
ସାଧୁ ମେହର ଟ୍ରାକରୁ ହଟି କାମ କରୁଥିଲେ । ୧୯୮୦ ଦଶକରେ ଓଡ଼ିଆ ଫିଲ୍ମ ଶିଳ୍ପ ଯେତେବେଳେ ମସଲା ମୋଭି’ରେ ବ୍ୟସ୍ତ ଥିଲା ସେତେବେଳେ ସାଧୁ ଲିକରୁ ହଟି ଓଡିଶାକୁ ଦେଇଥିଲେ ପ୍ରଥମ ସାଇନ୍ସ ଫିକ୍ସନ ଫିଲ୍ମ । ଫିଲ୍ମର ନାଁ ଥିଲା ବାବୁଲା । ୧୯୮୫ରେ ଆସିଥିବା ଏହି ଫିଲ୍ମ ତା’ ସମୟଠାରୁ ଢେର ଆଗରେ ଥିଲା । ଫଳରେ ଫିଲ୍ମ ଚାଲି ନଥିଲା । କିନ୍ତୁ ଗୋଟିଏ କଥା ପ୍ରମାଣିତ କରିଥିଲା, ସାଧୁ ନିଜ ସମୟଠାରୁ ଆଗରେ ଥିଲେ । ବାବୁଲ ଫିଲ୍ମ ଶିଶୁ ଚଳଚିତ୍ର ଥିଲା । ପିଲାଙ୍କୁ ଫିଲ୍ମ ଦ୍ୱାରା ପ୍ରେରିତ କରିବା ପାଇଁ ସାଧୁଙ୍କର ଇଏ ଗୋଟିଏ ଉଦ୍ୟମ ଥିଲା ।
୧୯୬୯ରେ ଭୁବନସୋମ୍ ଜରିଆରେ ସାଧୁ ଫିଲ୍ମ ଦୁନିଆକୁ ପ୍ରଥମେ ପ୍ରବେଶ କରିଥିଲେ । ପାଖାପାଖି ୬ ଦଶକର ଅଭିନୟ ଯାତ୍ରାରେ ସେ ପ୍ରାୟ ୨୭ ଫିଲ୍ମରେ ଅଭିନୟ କରିଥିଲେ ଓ ୫ ଫିଲ୍ମର ନିର୍ଦ୍ଦେଶନା ଦେଇଥିଲେ । ୧୯୭୭ରେ ଅଭିମାନ ନିର୍ଦ୍ଦେଶନା ଦେବାର ୨୦ ବର୍ଷ ପରେ ୧୯୯୫ରେ ଶେଷ ଥର ପାଇଁ ଗୋପରେ ବଢୁଛି ମୋ କଳା କହ୍ନେଇ ଫିଲ୍ମର ନିର୍ଦ୍ଦେଶନା ଦେଇଥିଲେ ।