ଅଯୋଧ୍ୟା: ରାମମୟ ସାରା ଜଗତ। ସାମ୍ନାକୁ ଆସିଲା ପ୍ରଭୁ ଶ୍ରୀରାମଙ୍କ ଭବ୍ୟ ପ୍ରତିମାର ପ୍ରଥମ ଫଟୋ। ଅଯୋଧ୍ୟାରେ ଶ୍ରୀରାମଙ୍କ ଭବ୍ୟ ମନ୍ଦିର ଲୋକାର୍ପିତ ହୋଇଛି । ମନ୍ଦିରରେ ବିରାଜମାନ ପରେ ଶ୍ରୀରାମଙ୍କ ଠାରେ ପ୍ରାଣ ପ୍ରତିଷ୍ଠା ବିଧି ସମ୍ପନ୍ନ ହୋଇଛି । ଧାର୍ଯ୍ୟ ସମୟ ମୁତାବକ ଶୁଭ ମୁହୂର୍ତ୍ତ ୮୪ ସେକେଣ୍ଡର ରହିଥିଲା । ଏହି ଶୁଭବେଳାରେହିଁ ରାମଙ୍କ ପ୍ରାଣ ପ୍ରତିଷ୍ଠା ହୋଇଥିଲା । ମଧ୍ୟାହ୍ନ ୧୨ଟା ୨୯ ମିନିଟ ୨ ସେକେଣ୍ଡରୁ ୧୨ଟା ୩୦ ମିନିଟ ୩୨ ସେକେଣ୍ଡ ପର୍ଯ୍ୟନ୍ତ ଏହି ଶୁଭ ମୁହୂର୍ତ୍ତ ଥିଲା । ସମସ୍ତ ରୀତିନୀତି ଅନୁଯାଇ ଏହି ପ୍ରାଣ ପ୍ରତିଷ୍ଠା କାର୍ଯ୍ୟ ସମ୍ପନ୍ନ ହୋଇଛି । ଶ୍ରୀରାମଙ୍କ ମନ୍ଦିର ଗର୍ଭଗୃହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରାମଲାଲାଙ୍କ ମୂର୍ତ୍ତିରେ ପ୍ରାଣ ପ୍ରତିଷ୍ଠା କରିଥିଲେ । ମନ୍ତ୍ରୋଚ୍ଚାରଣ ସହ ଅନ୍ୟ ବିଧିବିଧାନ ମୁତାବକ ଏହି ନୀତି ସମ୍ପନ୍ନ ହୋଇଛି ।

ମନ୍ଦିରରେ ବିରାଜମାନ ପ୍ରଭୁ ଶ୍ରୀରାମଙ୍କ ସ୍ୱର୍ଣ୍ଣ ଅଳଙ୍କାରରେ ଆଭୁଷିତ ପ୍ରତିମାର ପ୍ରଥମ ଫଟୋ ସାମନାକୁ ଆସିଛି । ଏହି ଅବସରରେ ଦୁଲୁକୁଛି ରାମଙ୍କ ନଗରୀ ଅଯୋଧ୍ୟା। ଲକ୍ଷାଧିକ ଭକ୍ତଙ୍କ ସମାଗମ ହୋଇଛି । ଚାରିଆଡେ ଶୁଭୁଛି ରାମନାମର ସ୍ବର। ପୂରା ଜଗତ ରାମମୟ ହୋଇପଡିଛି। ସାରା ଦେଶରୁ ବିଶିଷ୍ଟ ବ୍ୟକ୍ତିଙ୍କ ସମାଗମ ହୋଇଛି । ବଲିଉଡ ସୁପରଷ୍ଟାର ଅମିତାଭ ବଚ୍ଚନ, ଶିଳ୍ପପତି ମୁକେଶ ଅମ୍ବାନୀ, ଗୌତମ ଆଦାନୀ, କ୍ରିକେଟ କିମ୍ବଦନ୍ତୀ ସଚିନ ତେନ୍ଦୁଲକର, ଅଭିନେତା ଚିରଂଜିବୀ, ବିକି କୌଶଲ,ଅଭିନେତ୍ରୀ କାଟ୍ରିନା କୈଫ, ଅନୁପମ ଖେରଙ୍କ ସହ ସିନେମା ଓ କ୍ରୀଡା ଜଗତର ଅନେକ ବିଶିଷ୍ଟ ପ୍ରମୁଖ ବ୍ୟକ୍ତି ଯୋଗ ଦେଇଛନ୍ତି। ପ୍ରାୟ ୭ ହଜାର ସାଧୁସନ୍ଥ, ପ୍ରତିଷ୍ଠିତ ବ୍ୟକ୍ତି ଓ ଶ୍ରଦ୍ଧାଳୁଙ୍କୁ ଏହି କାର୍ଯ୍ୟକ୍ରମରେ ଯୋଗ ଦେଇଛନ୍ତି । ଏହି ଅବସରରେ ପୂରା ଅଯୋଧ୍ୟାରେ ଦୀପାବଳୀ ଆୟୋଜନ ହେଉଛି। ୧୦ ଲକ୍ଷ ଦୀପରେ ଝଲସିବ ଅଯୋଧ୍ୟା ନଗରୀ।