ନୂଆଦିଲ୍ଲୀ : ନୂଆଦିଲ୍ଲୀରେ ଆରମ୍ଭ ହୋଇଛି ବିଶ୍ୱର ସବୁଠାରୁ ବଡ଼ ସାହିତ୍ୟ ମହାକୁମ୍ଭ ସାହିତ୍ୟ ଉତ୍ସବ-୨୦୨୪ । କେନ୍ଦ୍ର ସାହିତ୍ୟ ଏକାଡେମୀ ଦ୍ୱାରା ଆୟୋଜିତ ଏହି ଉତ୍ସବକୁ କେନ୍ଦ୍ର ସଂସ୍କୃତି ମନ୍ତ୍ରୀ ଅର୍ଜୁନରାମ ମେଘୱାଲ ଉଦଘାଟନ କରିଛନ୍ତି । ଏହି ଅବସରରେ ସାହିତ୍ୟ ଏକାଡେମୀର ସଭାପତି ମାଧବ କୌଶିକ, ସମ୍ପାଦକ କେ. ଶ୍ରୀନିବାସ ରାଓ, ଉପସଭାପତି କୁମୁଦ ଶର୍ମା ପ୍ରମୁଖ ଉପସ୍ଥିତ ଥିଲେ। ୬ ଦିବସୀୟ ସମାରୋହରେ ୧୧ ଶହରୁ ଅଧିକ ଲେଖକ ଓ ବିଦ୍ୱାନ ଭାଗ ନେଉଛନ୍ତି।
ଚଳିତବର୍ଷ ସାହିତ୍ୟ ଏକାଡେମୀ ୭୦ ବର୍ଷ ପୂର୍ତ୍ତି ପାଳନ କରୁଛି । ଏହି ଅବସରକୁ ସ୍ମରଣୀୟ କରିବା ପାଇଁ ଚଳିତବର୍ଷର ସାହିତ୍ୟ ଉତ୍ସବକୁ ବିଶ୍ଵର ସବୁଠାରୁ ବଡ଼ ସାହିତ୍ୟ ଉତ୍ସବ ଭାବେ ପାଳନ କରାଯାଉଛି । ଆସନ୍ତା ୧୬ ତାରିଖ ପର୍ଯ୍ୟନ୍ତ ନୂଆଦିଲ୍ଲୀ ରବୀନ୍ଦ୍ର ଭବନ ପରିସରରେ ଉତ୍ସବ ଚାଲିବ ।
କେନ୍ଦ୍ର ସାହିତ୍ୟ ଏକାଡେମୀ ପୁରସ୍କାର ବିଜୟିନୀ, ଜଣାଶୁଣା କବୟିତ୍ରୀ ଡକ୍ଟର ଗାୟତ୍ରୀବାଳା ପଣ୍ଡା ଆଜି ଲାଲଦେୟ ସଭାଗାରରେ ‘ମେରେ ଲିୟେ କବିତା କା ଅର୍ଥ’ ବା ମୋ ପାଇଁ କବିତାର ଅର୍ଥ ଆଲୋଚନାରେ ଅଭିଭାଷଣ ରଖିଥିଲେ । ଉତ୍ସବରେ ୨୦୦ରୁ ଅଧିକ ଅଧିବେଶନ ଥିବା ବେଳେ ହିନ୍ଦୀ ସମେତ ୧୭୫ରୁ ଅଧିକ ଭାରତୀୟ ଭାଷାରେ ଆଲୋଚନା କରାଯିବ । ଭାରତୀୟ ସନ୍ଥଙ୍କ ନାମରେ ନିର୍ମିତ ସଭାସ୍ଥଳ ଗୁଡ଼ିକରେ ପୂର୍ବାହ୍ନ ୧୧ଟାରୁ ସନ୍ଧ୍ୟା ୬ ପର୍ଯ୍ୟନ୍ତ ଆଲୋଚନା ହେବ । ଏଥିରେ ବହୁଭାଷୀ କାହାଣୀ ଓ କବିତା ପାଠ, ପୂର୍ବୋତ୍ତର, ଉତ୍ତର ପୂର୍ବ ଲେଖକ ସମ୍ମିଳନୀ, ଯୁବ ସାହିତ୍ୟିକ ସମ୍ମିଳନୀ, ଭାରତର ଭକ୍ତି ସାହିତ୍ଯ, ଭାରତର ସାଂସ୍କୃତିକ ଅଭିବ୍ୟକ୍ତି ମାଧ୍ୟମ ରୂପରେ ରଙ୍ଗମଞ୍ଚ, ଭାରତୀୟ ବାଳ ସାହିତ୍ୟର ଅନୁବାଦ ସମ୍ବନ୍ଧିତ ସମସ୍ୟା, ସାହିତ୍ୟ ଏବଂ ନାରୀ ସଶକ୍ତିକରଣ ଆଦି ଅନ୍ୟାନ୍ୟ ବିଷୟରେ ଆଲୋଚନା ହେଉଛି । ଏଥିସହିତ ଅଖିଳ ଭାରତୀୟ ଦିବ୍ୟାଙ୍ଗ ଲେଖକ ସମ୍ମିଳନୀ, ଗୋପିଚନ୍ଦ ନାରଙ୍ଗଙ୍କ ଉପରେ ମହତ୍ଵପୂର୍ଣ୍ଣ କାର୍ଯ୍ୟକ୍ରମ ରହିଛି ।
