ଭୁବନେଶ୍ୱର : ବିଦେଶରେ ଚାକିରୀ ନାଁ ରେ ଚୁନ। ନିରୀହ ଯୁବକଙ୍କ ଜୀବନ ସହ ଖେଳିଲା ଠକ ସଂସ୍ଥା । ଆବୁଧାବିରେ ଚାକିରୀ ଦେବାକୁ କହି ୭୮ ଓଡ଼ିଆ ପିଲାଙ୍କ ଠାରୁ ପାଖାପାଖି ୪୦ ଲକ୍ଷରୁ ଉର୍ଦ୍ଧ ଟଙ୍କା ଠକେଇର ଆସିଛି ସଙ୍ଗୀନ ଅଭିଯୋଗ। ଆନ୍ଧ୍ରପ୍ରଦେଶ ବିଜୟନଗରମ ସ୍ଥିତ ଲାଇଫ ଲାଇନ ଟ୍ରାଭେଲ ନାମକ ସଂସ୍ଥା ଆବୁଧାବିରେ ଚାକିରୀ ଦେବାକୁ କହି ବାଲୁଗାଁ ଓ ବାଣପୁର ଅଞ୍ଚଳର ୭୮ ଜଣ ଯୁବକଙ୍କ ଠାରୁ ମୁଣ୍ଡପିଛା ୬୦ ହଜାର ଟଙ୍କା ଲେଖାଏଁ ନେଇଥିଲା।
ଚେନ୍ନାଇରୁ ଆବୁଧାବି ଯିବା ପାଈଁ ସମସ୍ତ ଲୋକଙ୍କ ପାଖରୁ ବିମାନ ଟିକେଟ ଓ ଭିସା ଆସିଥିଲା। ଗତ ମାସ ୫ ତାରିଖରେ ସମସ୍ତ ଲୋକଙ୍କୁ ବିଜୟନଗରମରେ ପହଞ୍ଚିବାକୁ କୁହାଯାଇଥିଲା। ସେହି ଅନୁଯାୟୀ ସମସ୍ତେ ୫ ତାରିଖ ସକାଳୁ ନିଜର ସାର୍ଟିଫିକେଟ ଓ ଲଗେଜ୍ ଧରି ପହଞ୍ଚିଥିଲେ। ଫୋନ ଯୋଗେ ସୋସିଆଲ ମିଡିଆରେ ତାଙ୍କର ମୋଟିଭେସନାଲ କ୍ଳାସ ହେବ ବୋଲି କୁହାଯାଇଥିଲା। କିନ୍ତୁ ସେଠାରେ ପହଞ୍ଚିବା ବେଳକୁ ନିର୍ଦ୍ଦିଷ୍ଟ ଠିକଣାରୁ ଉଭାନ ହୋଇଯାଇଥିଲା ସଂସ୍ଥା। ଯୋଗାଯୋଗ କରିବା ବେଳକୁ ସଂସ୍ଥା ପରିଚାଳକଙ୍କ ଫୋନ ସୁଇଚ ଅଫ ହୋଇଯାଇଥିଲା।
ସେପଟେ ଏୟାରପୋର୍ଟରେ ଖବର ନେବା ବେଳକୁ ଫ୍ଲାଇଟ ଟିକେଟ ମଧ୍ୟ କ୍ୟାନସଲ ହୋଇଯାଇଥିଲା। ଝାଳ ବୁହା ଟଙ୍କା ନେଇ ଛୁ ମାରିଥିଲା ଠକ ସଂସ୍ଥା । ଏ ନେଇ ଯୁବକମାନେ ବିଜୟନଗରମ ଗ୍ରାମାଞ୍ଚଳ ଥାନାରେ ଏତଲା ଦେଇଛନ୍ତି । ସ୍ଥାନୀୟ ଏସପି ଘଟଣା ବିଷୟରେ ଜାଣିବା ପରେ ଟ୍ରାଭେଲ ଅଫିସକୁ ପୋଲିସ ପଠାଇ ଠକାମୀର ଶିକାର ଯୁବକ ମାନଙ୍କର ପାସପୋର୍ଟ ଓ କିଛି ଗୁରୁତ୍ୱପୂର୍ଣ୍ଣ ଡକ୍ୟୁମେଣ୍ଟ, ଲେଟରପ୍ୟାଡ଼, ଷ୍ଟାମ୍ପ ଆଦି ଜବତ କରିଛନ୍ତି। କିଛିଦିନ ମଧ୍ୟରେ ଠକକୁ ଗିରଫ କରାଯିବ ଓ ଠକେଇ ଟଙ୍କା ଫେରିପାଇବା ଆଶାରେ ଯୁବକ ମାନେ ବିଜୟନଗରମ ଷ୍ଟେସନ ନିକଟରେ ଏକ ହୋଟେଲ ରେ ରହି ନ୍ୟାୟ ଭିକ୍ଷା କରିଛନ୍ତି।
