ନୂଆଦିଲ୍ଲୀ: କେନ୍ଦ୍ରକୁ ବରିଷ୍ଠ କଂଗ୍ରେସ ନେତ୍ରୀ ସୋନିଆଙ୍କ ଟାର୍ଗେଟ । କହିଲେ- କଂଗ୍ରେସକୁ ଆର୍ଥିକ ଭାବେ ଦୁର୍ବଳ କରିବାକୁ ଯୋଜନାବଦ୍ଧ ଉଦ୍ୟମ ହେଉଛି । ଦେଶରେ ଗଣତନ୍ତ୍ର ବୋଲି କିଛି ନାହିଁ । ସାଧାରଣ ନିର୍ବାଚନର ପ୍ରଥମ ପର୍ଯ୍ଯାୟ ନେଇ ନାମାଙ୍କନ ଦାଖଲ ପ୍ରକ୍ରିୟା ଆରମ୍ଭ ହୋଇଥିବା ବେଳେ କେନ୍ଦ୍ର ଉପରେ ଏଭଳି କହି ବର୍ଷିଛି କଂଗ୍ରେସ ।
ବରିଷ୍ଠ କଂଗ୍ରେସ ନେତା ରାହୁଲ ଗାନ୍ଧି ମଧ୍ୟ ସମାନ ଅଭିଯୋଗ କରି କେନ୍ଦ୍ର ଉପରେ ବର୍ଷିଛନ୍ତି । ସାମ୍ବାଦିକ ସମ୍ମିଳନୀ କରି ତୀବ୍ର ସମାଲୋଚନା କରିଛନ୍ତି ରାହୁଲ । କଂଗ୍ରେସର ଦଳୀୟ ବ୍ଯାଙ୍କ ଆକାଉଣ୍ଟକୁ ଫ୍ରିଜ୍ କରି ଦିଆଯାଇଛି । ଏହା କେବଳ କଂଗ୍ରେସର ନୁହେଁ ଗଣତନ୍ତ୍ରର ପତନ ବୋଲି କହିଛନ୍ତି ରାହୁଲ । ଏହାକୁ ନେଇ କଂଗ୍ରେସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିପାରୁନାହିଁ । ଗଣତନ୍ତ୍ର ଉପରେ ଏହି ହମଲା କରାଯାଉଛି । ସାଧାରଣ ନିର୍ବାଚନରେ ପ୍ରଚାର ଲାଗି ସ୍ଲଟ୍ ମିଳୁନାହିଁ । ଏହା ଯୋଜନାବଦ୍ଧ ଷଡ଼ୟନ୍ତ୍ର ବୋଲି କହିଛନ୍ତି ରାହୁଲ । ଏହା ଉପରେ କୌଣସି ଅଦାଲତ ନା ଅନ୍ଯ କେହି କିଛି କହୁନାହାନ୍ତି । ଦେଶର ୨୦ ପ୍ରତିଶତ ଲୋକଙ୍କ ଆମେ ପ୍ରତିନିଧିତ୍ଵ କରୁଛୁ । ହେଲେ ଆମ ଦଳର ନେତାଙ୍କ ଲାଗି ଗୋଟିଏ ଟ୍ରେନ ଟିକେଟ ମଧ୍ୟ ବୁକ୍ କରିପାରୁନାହୁଁ । ଏହା ଉପରେ ନିର୍ବାଚନ କମିଶନ କିଛି କହୁନାହାନ୍ତି । କଂଗ୍ରେସକୁ ଲୋପ କରିବାକୁ ସବୁ ପ୍ରକାର ଯୋଜନା କରାଯାଉଛି । ଗତ ମାସରେ ଆୟକର ବିଭାଗ ୨୦୧୮-୧୯ ଆର୍ଥିକ ବର୍ଷ ଲାଗି ବକେୟା ଜରିମାନା ଆକାରରେ ୨୧୦ କୋଟି ଦାବି କରି କଂଗ୍ରେସ ବ୍ଯାଙ୍କ ଖାତାରୁ ୧୧୫ କୋଟି ଫ୍ରିଜ୍ କରି ଦେଇଛି ବୋଲି କହିଛନ୍ତି ରାହୁଲ ।
