ପୁରୀ: ପୁରୀରେ ବଲିଉଡର ପ୍ରଖ୍ୟାତ ସଙ୍ଗୀତ ନିର୍ଦେଶକ ଓ ଗାୟକ ପଦ୍ମଶ୍ରୀ ଶଙ୍କର ମହାଦେବନ l ପୁରୀ ଗସ୍ତରେ ଆସି ଶ୍ରୀ ମନ୍ଦିର ଯାଇ ମହାପ୍ରଭୁଙ୍କ ଦର୍ଶନ ସହ ସାନିଧ୍ୟ୍ୟ ଲାଭ କରିଛନ୍ତି ଶଙ୍କର l ମହାପ୍ରଭୁଙ୍କ ଦର୍ଶନ କରି ଏକ ସୁନ୍ଦର ଭଜନ ଗାଇଥିଲେ ପ୍ରଖ୍ୟାତ କଣ୍ଠଶିଳ୍ପୀ l ପୂର୍ବ ଅପେକ୍ଷା ପୁରୀ ଏବେ ନୂଆ ରୂପ ନେବାରେ ଲାଗିଛି । ଶ୍ରୀ ମନ୍ଦିର ଚତୁର୍ପାଶ୍ୱରେ ଚାଲିଥିବା ପରିକ୍ରମା ପ୍ରକଳ୍ପ କାର୍ଯ୍ୟ ଭକ୍ତଙ୍କୁ ଏକ ନୂଆ ଅନୁଭୂତି ଆଣିଦେଉଛି l ମହାପ୍ରଭୁଙ୍କ ଜଣେ ଭକ୍ତ ହିସାବରେ ଏହି ପ୍ରକଳ୍ପ କାର୍ଯ୍ୟକୁ ସେ ସ୍ୱାଗତ କରୁଛନ୍ତି ବୋଲି କହିଥିଲେ । ସାରା ଭାରତ ବର୍ଷରୁ ମହାପ୍ରଭୁଙ୍କ ଦର୍ଶନ ପାଇଁ ପ୍ରତିଦିନ ହଜାର ହଜାର ଭକ୍ତ ଶ୍ରଦ୍ଧାଳୁ ପୁରୀ ଆସୁଛନ୍ତି । ପରିକ୍ରମା ପ୍ରକଳ୍ପ ଦ୍ୱାରା ଭକ୍ତ ମାନେ ବିଭିର୍ନ ପ୍ରକାର ସୁବିଧା ସୁଯୋଗ ମଧ୍ୟ ପାଇପାରୁଛନ୍ତି l ମହାପ୍ରଭୁଙ୍କ ଦର୍ଶନ ସାଙ୍ଗକୁ ଶ୍ରୀକ୍ଷେତ୍ର ଆସୁଥିବା ଭକ୍ତ ମାନେ ନୂଆ ଅନୁଭୂତି ନେଇ ଫେରୁଛନ୍ତି l ତାଙ୍କର ସୌଭାଗ୍ୟ ଯେ ସେ ମହାପ୍ରଭୁଙ୍କ ଏହି ପରିକ୍ରମା ପ୍ରକଳ୍ପ କାର୍ଯ୍ୟ ଦେଖିବାକୁ ସୁଯୋଗ ପାଇଲେ | ସାରା ବିଶ୍ୱବାସୀଙ୍କର ମହାପ୍ରଭୁ ମଙ୍ଗଳ କରନ୍ତୁ ବୋଲି ଆଶା ବ୍ୟକ୍ତ କରିଛନ୍ତି ଶଙ୍କର ମହାଦେବନ ।
ସାଧାରଣତନ୍ତ୍ର ଦିବସ ପାଇଁ ରାଜଧାନୀ ଦିଲ୍ଲୀରେ ପ୍ରସ୍ତୁତି ଆରମ୍ଭ
ନୂଆଦିଲ୍ଲୀ: ସାଧାରଣତନ୍ତ୍ର ଦିବସ ପାଇଁ ରାଜଧାନୀ ଦିଲ୍ଲୀରେ ପ୍ରସ୍ତୁତି ଆରମ୍ଭ । କର୍ତ୍ତବ୍ୟ ପଥରେ ପ୍ୟାରେଡ ପାଇଁ ଆରମ୍ଭ ହୋଇସାରିଛି ପ୍ରାକ୍ଟିସ । ଚଳିତ ବର୍ଷ ପ୍ୟାରେଡର ଥିମ୍ ରହିଛି ନାରୀ ଶକ୍ତି । ସେଥିପାଇଁ ପ୍ୟାରେଡର ସମଗ୍ର କଣ୍ଟିଜେଣ୍ଟରେ କେବଳ ମହିଳା ଦେଖିବାକୁ ମିଳିବେ । ଜାତୀୟ ସେବା ସ୍କିମ (NSS) ପ୍ଲାଟୁନ ପାଇଁ ସମଗ୍ର ଦେଶରୁ ୨୦୦ ଜଣ ଛାତ୍ରୀ ମୋନିନିତ ହୋଇ ଦିଲ୍ଲୀ ଆସିଛନ୍ତି । ଓଡ଼ିଶାର ବିଭିନ୍ନ ବିଶ୍ୱବିଦ୍ୟାଳୟ ଏବଂ କଲେଜରୁ ମୋନୋନିତ ହୋଇ ଦିଲ୍ଲୀ ଆସିଛନ୍ତି ୮ ଜଣ ଛାତ୍ରୀ । ସାଧାରଣତନ୍ତ୍ର ଦିବସ ଅବସରରେ କ୍ରୀଡା ଏବଂ ଯୁବ ବ୍ୟାପାର ପକ୍ଷରୁ ଆୟୋଜିତ ବିଭିନ୍ନ କାର୍ଯ୍ୟକ୍ରମ ରେ ସେମାନେ ଭାଗ ନେଉଛନ୍ତି । ସେ ମଧ୍ୟରୁ ମନୋନୀତ ଛାତ୍ରୀ କର୍ତ୍ତବ୍ୟ ପଥରେ ପରେଡ ମଧ୍ୟ ଯୋଗ ଦେବେ। ଜବାହରଲାଲ ଷ୍ଟାଡିୟମ୍ ଠାରେ ସେମାନଙ୍କ ନିୟମିତ ପ୍ରାକ୍ଟିସ ଚାଲିଛି। ଦିଲ୍ଲୀରେ ଶୀତ ଲହରୀ ଜାରି ଥିବା ସତ୍ତ୍ବେ ତାହାକୁ ଖାତିର ନକରି ସକାଳ ୬ ରୁ ଜାରି ରହିଛି ତାଙ୍କ ପ୍ୟାରେଡ ପ୍ରାକ୍ଟିସ୍ । ତାଙ୍କ ସହ ଅଧିକ ଆଲୋଚନା କରିଛନ୍ତି ଆମ ନୂଆଦିଲ୍ଲୀ ପ୍ରତିନିଧି ଲିପିକା ମାହାନ୍ତ।
କ୍ବାର୍ଟର୍ସ ଛାଡିନାହାନ୍ତି ପୂର୍ବତନ ତୃଣମୂଳ କଂଗ୍ରେସ ସାଂସଦ ମହୁଆ ମୈତ୍ରୋ
ନନ୍ଦିଘୋଷ ବ୍ୟୁରୋ: କ୍ବାର୍ଟର୍ସ ଛାଡିନାହାନ୍ତି ପୂର୍ବତନ ତୃଣମୂଳ କଂଗ୍ରେସ ସାଂସଦ ମହୁଆ ମୈତ୍ରୋ । ଘର ଛାଡିବାକୁ ନୋଟିସ ଜାରି କଲା ଡିରେକ୍ଟୋରେଟ ଅଫ ଏଷ୍ଟେଟ୍ସ । ଗତ ଡିସେମ୍ବର ୮ରେ ଲୋକସଭା ସାଂସଦ ପଦରୁ ବହିଷ୍କୃତ ହୋଇଥିଲେ ସାଂସଦ । ପ୍ରଶ୍ନ ଲାଗି ଟଙ୍କା ମାମଲାରେ ବିବାଦରେ ଫସିଥିଲେ ମହୁଆ ମୈତ୍ରୋ । ପୂର୍ବରୁ ଜାନୁଆରୀ ୭ ସୁଦ୍ଧା ବଙ୍ଗଳା ଛାଡିବା ଲାଗି ତାଙ୍କୁ ନୋଟିସ ହୋଇଥିଲା । ମାତ୍ର ସେ କ୍ବାର୍ଟର୍ସ ଛାଡି ନଥିବାରୁ ତାଙ୍କୁ ପୁଣି ନୋଟିସ ଜାରି କରାଯାଇଛି ।
ରାଜସ୍ଥାନରେ ବିଜେପିକୁ ଝଟକା
ଜୟପୁର: ରାଜସ୍ଥାନରେ ବିଜେପିକୁ ଝଟକା । ଶ୍ରୀକରଣପୁର ବିଧାନସଭା ଉପନିର୍ବାଚନରେ ହାରିଲେ ବିଜେପିରୁ ମନ୍ତ୍ରୀ ଥିବା ସୁରେନ୍ଦର ପାଲ ସିଂହ । କଂଗ୍ରେସ ପ୍ରାର୍ଥୀ ରୁପିନ୍ଦର ସିଂ କୁନ୍ନର ସୁରେନ୍ଦ୍ର ପାଲ ସିଂହଙ୍କୁ ପରାସ୍ତ କରି ବିଧାୟକ ଭାବେ ନିର୍ବାଚିତ। ରାଜସ୍ଥାନରେ ମୁଖ୍ୟମନ୍ତ୍ରୀ ଭଜନ ଲାଲଙ୍କ ନେତୃତ୍ବାଧିନ ସରକାରରେ ମନ୍ତ୍ରୀ ହୋଇଥିଲେ ସୁରେନ୍ଦର ପାଲ ସିଂହ । ସୁରେନ୍ଦର ପାଲଙ୍କୁ ରୁପିନ୍ଦର ସିଂହ କୁନ୍ନର ୧୧ ହଜାର ୨୮୪ ଭୋଟରେ ପରାସ୍ତ କରିଛନ୍ତି ।ରୁପିନ୍ଦର ମୋଟ ୯୦ ହଜାର ୯୮ଟି ଭୋଟ ପାଇ ବିଧାୟକ ଭାବେ ନିର୍ବାଚିତ ହୋଇଛନ୍ତି । ରାଜସ୍ଥାନ ବିଧାନସଭା ନିର୍ବାଚନରେ ବିଜେପିର ବିପୁଳ ବିଜୟ ପରେ ସରକାର ଥାଇ ନିର୍ବାଚନ ହାରିବା ବିଜେପି ପାଇଁ ବଡ଼ ଝଟକା ।
କାରଣ ନିକଟରେ ଶେଷ ହୋଇଥିବା ବିଧାନସଭା ନିର୍ବାଚନରେ ବିଜେପି ଏହି ସିଟ୍ ହାତେଇଥିଲା।୧୯୯ ଆସନରୁ ୧୧୫ ସିଟ ପାଇଛି ବିଜେପି । ବିଧାନସଭା ନିର୍ବାଚନରେ ବିପୁଳ ବିଜୟ ପରେ ଉପନିର୍ବାଚନ ହାରିବା କେନ୍ଦ୍ରୀୟ ନେତୃତ୍ବକୁ ବଡ଼ ଝଟକା।କଂଗ୍ରେସ ପ୍ରାର୍ଥୀ ରୁପିନ୍ଦରଙ୍କ ବିଜୟ ପରେ କଂଗ୍ରେସରୁ ରାଜସ୍ଥାନର ପୂର୍ବତନ ମୁଖ୍ୟମନ୍ତ୍ରୀ ଅଶୋକ ଗେହଲଟ ବିଜୟର ଶୁଭେଚ୍ଛା ଜଣାଇଛନ୍ତି । ଶ୍ରୀକରଣପୁର ଆସନ କଂଗ୍ରେସ ଜିତିବା ପରେ ବିଜେପିର ଗର୍ବ ଅହଂକାର ଚୁରମାର ହୋଇଯାଇଛି ବୋଲି କହିଛନ୍ତି ଅଶୋକ ଗେହଲଟ । ରାଜସ୍ଥାନବାସୀ ବିଜେପିକୁ ତାର ବାଟ ଦେଖାଇଛନ୍ତି। ଶ୍ରୀକରଣପୁରରୁ ବିଧାୟକ ଥିବା ଗୁରମିତ ସିଂହଙ୍କ ମୃତ୍ୟୁ ପରେ ଏହି ଆସନ ଖାଲି ହୋଇଥିଲା । ପରାଜୟ ପ୍ରାର୍ଥୀ ସୁରେନ୍ଦର ପାଲ ସିଂହ ହେଉଛନ୍ତି ଗୁରମିତଙ୍କ ପୁଅ ।
ରାଜ୍ୟ କଂଗ୍ରେସକୁ ୨୪ ଚିନ୍ତା
ଭୁବନେଶ୍ବର: ରାଜ୍ୟ କଂଗ୍ରେସକୁ ୨୪ ଚିନ୍ତା । ହେଭିଓ୍ବେଟ୍ ନେତାମାନେ ବିଧାୟକ ନୁହେଁ, ସାଂସଦ ପ୍ରାର୍ଥୀ ହେବାକୁ ଦଳ ପ୍ରସ୍ତାବ ଦେଇଛି । ଏନେଇ ଦୁଇଦିନ ଧରି ହୋଇଛି ମାନସମନ୍ଥନ। ୨୪ରେ ଅଧିକ ଯୁବକଙ୍କୁ ପ୍ରାର୍ଥୀ କରିବାକୁ ଏହି ଷ୍ଟ୍ରାଟେଜି ଆପଣାଇଛି ରାଜ୍ୟ କଂଗ୍ରେସ । ଏନେଇ ବରିଷ୍ଠ ନେତାମାନେ ମିଶ୍ର ପ୍ରତିକ୍ରିୟା ପ୍ରକାଶ କରିଛନ୍ତି । ସୁରେଶ ରାଉତ କହିଛନ୍ତି, ବରିଷ୍ଠ ନେତାମାନେ ନିର୍ବାଚନ ନ ଲଢ଼ିବା ଉଚିତ। ଯାହାକୁ ନେଇ କଂଗ୍ରେସ ଶିବିର ଉଷ୍ମ ହୋଇଛି ।
୨୪ ପାଇଁ ରାଜ୍ୟ କଂଗ୍ରେସର ନୂଆ ଷ୍ଟ୍ରାଟେଜି । ଫୋକସରେ ସଂସଦୀୟ କ୍ଷେତ୍ର । ବରିଷ୍ଠ ନେତାଙ୍କୁ ସାଂସଦ ପ୍ରାର୍ଥୀ କରିବାକୁ ପ୍ରସ୍ତାବ । ସୁର କହିଲେ ମୁଁ ଲଢ଼ିବିନି ନିର୍ବାଚନ । ଜୟଦେବ, ଶରତ ଓ ତାରାଙ୍କ ଭିନ୍ନମତ । ୨୦୨୪ରେ ରାଜ୍ୟ କଂଗ୍ରେସ ଆପଣାଇବ ୧୯୮୦ର ରଣନୀତି । ରସାତଳକୁ ଚାଲିଯାଇଥିବା ସଂଗଠନକୁ ଉଠାଇବା ପାଇଁ ଦଳ କସରତ ଆରମ୍ଭ କରିଛି । ବରିଷ୍ଠ ନେତାମାନେ ବିଧାୟକ ନୁହେଁ, ସାଂସଦ ପ୍ରାର୍ଥୀ ହେବାକୁ ପ୍ରସ୍ତାବ ଦେଇଛି କଂଗ୍ରେସ । ଏପରି ନିଷ୍ପତ୍ତି ରାଜ୍ୟ କଂଗ୍ରେସର ବରିଷ୍ଠ ନେତାମାନଙ୍କୁ ଚିନ୍ତାରେ ପକାଇଛି । ପୂର୍ବତନ ପିସିସି ସଭାପତି ଜୟଦେବ ଜେନା କହିଛନ୍ତି, ବରିଷ୍ଠମାନେ ସାଂସଦ ପ୍ରାର୍ଥୀ ହେଲେ ଅସୁବିଧା ନାହିଁ । ହେଲେ ପ୍ରାର୍ଥୀ ଚୟନ ବେଳେ ବିଜୟ ସମ୍ଭାବନାକୁ ଅଧିକ ଗୁରୁତ୍ବ ଦିଆଯିବା ଆବଶ୍ୟକ । ସବୁ ବିଧାନସଭା ଆସନ ମଧ୍ୟ ଯୁବକଙ୍କୁ ଛାଡ଼ିଦେବା ଠିକ୍ ହେବ ନାହିଁ । ବରିଷ୍ଠ କଂଗ୍ରେସ ବିଧାୟକ ସୁରେଶ ରାଉତରାୟ ଆଉ ପାଦେ ଆଗକୁ ଯାଇ କହିଛନ୍ତି, ବରିଷ୍ଠ ନେତାମାନେ ନିର୍ବାଚନ ନ ଲଢ଼ିବା ଆବଶ୍ୟକ ।
କଂଗ୍ରେସ ରାଜନୈତିକ ବ୍ୟାପାର କମିଟି ବୈଠକରେ ମଧ୍ୟ ୨୦୨୪ରେ ଓଡ଼ିଶାର ବରିଷ୍ଠ କଂଗ୍ରେସ ନେତାମାନେ ସାଂସଦ ପ୍ରାର୍ଥୀ ହେବା ନେଇ ଆଲୋଚନା ହୋଇଛି । ସାଂଗଠନିକ ସ୍ଥିତିକୁ ବିଚାର କରି ଦଳ ଏପରି ରଣନୀତି ଦଳ ଆପଣାଇଥିବା ଶରତ ରାଉତ କହିଛନ୍ତି । ବିଧାୟକ ତାରାପ୍ରସାଦ ବାହିନୀପତି ମଧ୍ୟ ବରିଷ୍ଠ ନେତାମାନେ ସାଂସଦ ପ୍ରାର୍ଥୀ ହେବା ସପକ୍ଷରେ ଯୁକ୍ତି ବାଢ଼ିଛନ୍ତି ।
୨୦୧୯ ନିର୍ବାଚନରେ ରାଜ୍ୟର ୨୧ଟି ଲୋକସଭା ଆସନରୁ କଂଗ୍ରେସ ମାତ୍ର ଗୋଟିଏ ପାଇଥିଲା । ବିଧାନସଭାରେ ମଧ୍ୟ ଦୁଇ ଅଙ୍କ ଛୁଇଁପାରିନଥିଲା ଦଳ । ପଞ୍ଚାୟତ, ପୌର ଓ ଉପନିର୍ବାଚନରେ ମଧ୍ୟ କଂଗ୍ରେସର ଭୋଟ୍ ହାର କମିଛି । ଏହା ଭିତରେ ପୁରୁଖା ନେତାଙ୍କୁ ସାଂସଦ ପ୍ରାର୍ଥୀ କରି ସଂଗଠନକୁ ସଜାଡ଼ିବା ପାଇଁ ଅଣ୍ଟା ଭିଡୁଥିବା ରାଜ୍ୟ କଂଗ୍ରେସ କେତେ ସଫଳ ହେଉଛି ତାହା ଦେଖିବାର କଥା।
ରାୟଗଡ଼ା ପର୍ଯ୍ୟଟନସ୍ଥଳୀର ହେବ ବିକାଶ, ମଞ୍ଜୁର ହୋଇଛି ୩ କୋଟି ଟଙ୍କା
ରାୟଗଡା: ରାୟଗଡା ଜିଲ୍ଲା ପର୍ଯ୍ୟଟନ ସ୍ଥଳୀର ହେବ ବିକାଶ । ଜିଲ୍ଲାକୁ ଘେରିରହିଛି ସବୁଜିମା ଘେରା ପ୍ରାକୃତିକ ପରିବେଶ ସାଙ୍ଗକୁ ଚିରସ୍ରୋତା ନଦୀ ,ଝରଣା ଓ ଜଳପ୍ରପାତ । ପର୍ଯ୍ୟଟନ ସ୍ଥଳୀର ବିକାଶ ପାଇଁ ରାଜ୍ୟ ସରକାର ମଞ୍ଜୁର କରିଛନ୍ତି ୩ କୋଟି ୪୪ଲକ୍ଷ ୨୯ ହଜାର ଟଙ୍କା । ଆର୍ଥିକ ଅନୁଦାନରେ ହେବ ଦୁମାଗୁଡା ଭ୍ୟୁ ପଏଣ୍ଟ ଠାରେ ମିଶନ ଶକ୍ତି କାଫେଟେରିଆ, ହଲୁଆ ଠାରୁ ଗୁମ୍ମା ପର୍ଯ୍ୟନ୍ତ ବୋହିଯାଇଥିବା ଚିରସ୍ରୋତା ଝଞ୍ଜାବତୀ ନଦୀ ଉପକୂଳର ସୌନ୍ଦର୍ଯ୍ୟକରଣ ଓ ଦୁର୍ଗାପାଡ଼ୁ ଜଳପ୍ରପାତର ସୌନ୍ଦର୍ଯ୍ୟକରଣ , ନିୟମଗିରି ପାହାଡ଼ରେ ବୋହୁଥିବା ଉପର ଗଦଗଦା ଜଳପ୍ରପାତର ସୌନ୍ଦର୍ଯ୍ୟକରଣ ।
ସିଲଟିଗୁଡା ଡ୍ୟାମରେ ମିଶନ ଶକ୍ତି ମାଆ ମାନେ ମାଛ ଚାଷ କରି ଉପକୃତ ହେଉଛନ୍ତି । ଏହାର ବିକାଶ ପରେ ଅଧିକ ମାତ୍ରାରେ ମାଛ ଚାଷ ହେବା ସହ ଜିଲ୍ଲାରେ ପର୍ଯ୍ୟଟନ କ୍ଷେତ୍ରର ବିକାଶ ହୋଇପାରିଛି। ଫଳରେ ସ୍ଥାନୀୟ ବାସିନ୍ଦା ବ୍ୟବସାୟ କରି ସ୍ୱାବଲମ୍ବୀ ହେବା ସହ ସେମାନଙ୍କର ଆର୍ଥିକ ଅଭିବୃଦ୍ଧି ହୋଇପାରିବ। ରାଜ୍ୟ ସରକାର ପର୍ଯ୍ୟଟନ କ୍ଷେତ୍ରର ବିକାଶ ପାଇଁ ଏପରି ପଦକ୍ଷେପ ନେଇଥିବାରୁ ସ୍ଥାନୀୟ ବାସିନ୍ଦା ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ।
ସମସ୍ତେ ପିଅନ୍ତି କିନ୍ତୁ ମୋତେ ଜଣେ ସିନିୟର କ୍ରିକେଟର ବଦନାମ କରିଲେ
ନୂଆଦିଲ୍ଲୀ: ଭାରତୀୟ କ୍ରିକେଟ ଦଳର ପୂର୍ବତନ ବୋଲର ପ୍ରବୀଣ କୁମାରଙ୍କ ସୁଇଙ୍ଗ ବୋଲିଂ ପାଇଁ ବେଶ ଜଣାଶୁଣା । ୨୦୦୭ରୁ ୨୦୧୨ ପର୍ଯ୍ୟନ୍ତ ଭାରତୀୟ ଦଳ ପାଇଁ ଖେଳିଥିବା ଏହି ଭେଟେରାନ ବୋଲର ଏକ ଆରୋପ ଆଣିଛନ୍ତି । ଜାତୀୟ ଗଣମାଧ୍ୟମକୁ ଦେଇଥିବା ଏକ ଇଣ୍ଟରଭିୟୁରେ କହିଛନ୍ତି କି, ମୁଁ ଯେତେବେଳେ ଭାରତୀୟ ଦଳରେ ଥିଲି ମୋତେ ସିନିୟର ଖେଳାଳିମାନେ କହୁଥିଲେ କି, ତୁମେ ପିଅ ନାହିଁ, ଏମିତି କରନାହିଁ । କିନ୍ତୁ ସିନିୟରମାନେ ସବୁ କରନ୍ତି ମାତ୍ର ମୁଁ ପିଇଥାଏ ବୋଲି କୁହନ୍ତି । ସନ୍ୟାସ ନେବା ପରେ ୟୁପି ବୋଲିଂ କୋଚ ପାଇଁ ମଧ୍ୟ ଡକାଗଲା ନାହିଁ । ସେପଟେ ରିପୋର୍ଟରମାନେ ପ୍ରଶ୍ନ କରିଥିଲେ କି, ସଚିନ, ଦ୍ରାବିଡ ଏବଂ ସୌରଭ ଗାଙ୍ଗୁଲିଙ୍କ ଭଳି ଖେଳାଳିମାନେ ମଦ ପିଇବାକୁ ମନା କରୁଥିଲେ କି? ଏହାର ଉତ୍ତରରେ ପ୍ରବୀଣ କହିଥିଲେ କି, ନାମ କହିବାକୁ ପଡ଼ିବ ନାହିଁ । ଆପଣମାନେ ଭଲଭାବେ ଜାଣିପାରୁଥିବେ । ଯେଉଁମାନେ ଲୋକମାନେ ମୋତେ ଭଲଭାବେ ଜାଣିଛନ୍ତି ସେମାନେ ଜାଣିଛନ୍ତି ମୁଁ କଣ । ମାତ୍ର ମୋ ଛବି ଅନ୍ୟମାନଙ୍କ ଆଗରେ ଜଣେ ମଦୁଆ ବୋଲି ପ୍ରମାଣିତ କରି ଦେଇଛନ୍ତି ।
ସୂଚନା ଥାଉକି, ପ୍ରବୀଣ କୁମାର ୨୦୦୭ରୁ ୨୦୧୨ ପର୍ଯ୍ୟନ୍ତ ଭାରତୀୟ ଦଳରେ ଖେଳିଥିଲେ । ୬ ଟେଷ୍ଟ, ୬୮ ଦିନିକିଆ ଏବଂ ୧୦ଟି ଟି-୨୦ ମ୍ୟାଚ ଖେଳିଛନ୍ତି । ତାଙ୍କ ସୁଇଙ୍ଗ ବୋଲିଂ ଆଗରେ ବଡ଼ ବଡ଼ ବ୍ୟାଟ୍ସମ୍ୟାନମାନେ ମଧ୍ୟ ଧରାଶାୟୀ ହେଉଥିଲେ । ସେପଟେ ଆଇପିଏଲରେ ପ୍ରବୀଣ ରୟାଲ ଚ୍ୟାଲେଞ୍ଜର ବାଙ୍ଗାଲୋର, କିଙ୍ଗସ ଇଲେଭେନ ପଞ୍ଜାବ ଏବଂ ସନ ରାଇଜର୍ସ ହାଇଦ୍ରାବାଦ ପକ୍ଷରୁ ଖେଳିଛନ୍ତି ।
ଟେନି କଏଟରେ ଦମ ଦେଖାଇବ ଓଡ଼ିଶା ଟିମ୍
ଭୁବନେଶ୍ବର: କ୍ରୀଡାର ହବ ପାଲଟିଛି ଓଡ଼ିଶା । ରାଜ୍ୟ ସରକାରଙ୍କ ପ୍ରତ୍ସାହନରୁ ସବୁ ଖେଳାଳିଙ୍କୁ ମିଳୁଛି ନିଜର ପ୍ରତିଭା ଦେଖାଇବାର ସୁଯୋଗ । ଏହି ସ୍ଥିତିରେ ରାଜ୍ୟରେ ଟେନି କଏଟ୍ ଖେଳ ପ୍ରତି ବଢିଛି ଯୁବପିଢିଙ୍କ ଆଗ୍ରହ । ଆନ୍ଧ୍ରପ୍ରଦେଶର ପଲାସା ଠାରେ ଆୟୋଜିତ ହେଉଛି ୪୭ତମ ଜାତୀୟ ସିନିୟର ଟେନି କଏଟ୍ ଚାମ୍ପିଅନସିପ୍ । ଏଥିରେ ଭାଗ ନେବେ ଓଡ଼ିଶାର ୧୨ ଜଣିଆ ପୁରୁଷ ଓ ମହିଳା ଟିମ୍ । କଟକ ସତ୍ୟବ୍ରତ ଷ୍ଟାଡିୟମରେ ଜୋରଦାର ଅଭ୍ୟାସ ପରେ ଦଳ ଆଜି ପଲାସ ଯାତ୍ରା କରିଛି ।
ଟେନି କଏଟରେ ଦମ ଦେଖାଇବ ଓଡ଼ିଶା ଟିମ୍ । ପୁରୁଷ ଓ ମହିଳା ବର୍ଗରେ ହେବ ଚାମ୍ପିଅନସିପ । ଆନ୍ଧ୍ରପ୍ରଦେଶର ପଲାସାରେ ଜାନୁଆରୀ ୯ରୁ ୧୩ ତାରିଖ ଯାଏଁ ଚାଲିବ ୪୭ ତମ ଜାତୀୟ ସିନିୟର ଟେନି କଏଟ୍ ଚାମ୍ପିଅନସିପ । ରାଜ୍ୟ ସରକାରଙ୍କ ସହଯୋଗରେ ଓଡ଼ିଶାରୁ ୧୨ ଜଣିଆ ଟିମ୍ ପଲାସା ଯାତ୍ରା କରିଛନ୍ତି । ଏଥିରେ ସାମିଲ ହେବା ପୂର୍ବରୁ କଟକ ସତ୍ୟବ୍ରତ ଷ୍ଟାଡିୟମରେ ଖେଳାଳିମାନେ କରିଛନ୍ତି ଜୋରଦାର ଅଭ୍ୟାସ ।
ଚୟନ ଓ ପ୍ରଶିକ୍ଷଣ ପାଇଁ କଟକ ସତ୍ୟବ୍ରତ ଷ୍ଟାଡିୟମ ପରିସରରେ ଆୟୋଜିତ ହୋଇଥିବା ଶିବିରରେ ୭ ଟି ଜିଲ୍ଲାରୁ ୫୦ରୁ ଅଧିକ ଖେଳାଳି ଭାଗ ନେଇଥିଲେ । ଶ୍ରେଷ୍ଠ ପ୍ରଦର୍ଶନ ଆଧାରରେ ଓଡିଶା ଟିମ ଚୟନ କରାଯାଇ ଟିମ୍ ଗଠନ କରାଯାଇଛି । ଏହି ଖେଳାଳିମାନେ ସେଠାରେ ଟିମ ଇଭେଣ୍ଟ ସହିତ ବ୍ୟକ୍ତିଗତ ଇଭେଣ୍ଟରେ ଭାଗ ନେବେ। ଓଡିଶା ପୁରୁଷ ଟିମରେ ଭଦ୍ରକର ଅନ୍ତର୍ଜାତୀୟ ଟେନି କଏଟ୍ ଖେଳାଳି ନିର୍ମଳ ସେନ୍ ସ୍ଥାନ ପାଇଛନ୍ତି । ମହିଳା ଟିମରେ ଅଛନ୍ତି ସମ୍ଭାବ୍ଯ ଭାରତୀୟ ଦଳରେ ସ୍ଥାନ ପାଇଥିବା କଟକର ପ୍ରମିଳା ରାଉତ । ତେଣୁ ଖେଳାଳିମାନେ ଏହି ଚାମ୍ପିଅନସିପରେ ଭଲ ପ୍ରଦର୍ଶନ ନେଇ ଆଶା ରଖିଛନ୍ତି ।
ସବୁଠି ଓଡ଼ିଶା କଳା, ସଂସ୍କୃତି ଓ ଐତିହ୍ୟର ଛାପ, ଝଟକୁଛି ଶ୍ରୀମନ୍ଦିର ପରିକ୍ରମା ପ୍ରକଳ୍ପ
ଭୁବନେଶ୍ବର: କଳିଙ୍ଗ ସ୍ଥାପତ୍ୟ କଳା ଓ ପରମ୍ପରାରେ ମଠ, ମନ୍ଦିରରେ ଖଣ୍ଡୋଲାଇଟ ପଥରର ବ୍ୟବହାର ବହୁ ପ୍ରାଚୀନ । ତେଣୁ ଓଡ଼ିଶାର ସଂସ୍କୃତି, ଐତିହ୍ୟକୁ ବଜାୟ ରଖିବା ସହ ଭକ୍ତଙ୍କ ଭାବାବେଗକୁ ନଜରରେ ରଖି ଶ୍ରୀମନ୍ଦିର ପରିକ୍ରମା ପ୍ରକଳ୍ପରେ ଏହାର ବ୍ୟବହାର କରାଯାଇଛି । ରାଜ୍ୟ ସରକାରଙ୍କ ପକ୍ଷରୁ ଏହି ପଥର ଯୋଗାଇ ଦିଆଯାଇଥିବା ବେଳେ କୁଶଳୀ କାରିଗରଙ୍କ ଦ୍ବାରା ଏଥିରେ ନିର୍ମିତ କାରୁକାର୍ଯ୍ୟକୁ ଶ୍ରଦ୍ଧାଳୁ, ସେବାୟତ ଓ ପର୍ଯ୍ୟଟକ ବେଶ ପ୍ରଶଂସା କରିଛନ୍ତି ।
ଝଟକୁଛି ଶ୍ରୀମନ୍ଦିର ପରିକ୍ରମା ପ୍ରକଳ୍ପ । ସବୁଠି ଓଡ଼ିଶା କଳା, ସଂସ୍କୃତି ଓ ଐତିହ୍ୟର ଛାପ । ଏହାକୁ ଆହୁରି ଉଜ୍ଜୀବିତ କରିଛି ଖଣ୍ଡୋଲାଇଟ୍ ପଥରର କାରିଗରି । ଏହି ସୁନ୍ଦର ପଥର କାରୁକାର୍ଯ୍ୟରେ ପରିସ୍ଫୁଟ ହୋଇଛି ଶିଳ୍ପୀର ସୁନ୍ଦର ଭାସ୍କର୍ଯ୍ୟ କଳା । ଶ୍ରୀଜଗନ୍ନାଥ ସଂସ୍କୃତି ବେଶ ପୂରାତନ ହୋଇଥିବା ବେଳେ ଏଥିରେ ଖଣ୍ଡୋଲାଇଟ ପଥର ବ୍ୟବହାର କରିବାକୁ ନିଷ୍ପତ୍ତି ନେଇଥିଲେ ରାଜ୍ୟ ସରକାର । ଓଡ଼ିଆ ସଂସ୍କୃତିରେ ଏହି ପଥରର ବ୍ୟବହାର ବେଶ ପୁରୁଣା । ସେଥିପାଇଁ ଓଡିଶା ଖଣି ନିଗମ ପକ୍ଷରୁ ପ୍ରକଳ୍ପ ନିର୍ମାଣ ନିମନ୍ତେ ଆବଶ୍ୟକୀୟ ପଥର ଯୋଗାଇ ଦିଆଯାଇଥିଲା । କୁଶଳୀ କାରିଗରଙ୍କ ହାତର ଯାଦୁ ଏହାକୁ ଦେଇଛି ଆକର୍ଷଣୀୟ ରୂପ ।
ଖଣ୍ଡୋଲାଇଟ୍ ପଥରରେ ନିର୍ମିତ ମଠ, ମନ୍ଦିର, କ୍ଲକ ରୁମ, ଅଭ୍ୟର୍ଥନା ଗୃହ ଦୂରରୁ ବି ଶ୍ରଦ୍ଧାଳୁଙ୍କୁ ଆକର୍ଷିତ କରୁଛି । ଯେଉଁଠି ଶୋଭାପାଉଛି ସେମାନଙ୍କ ଐତିହ୍ୟ ଓ କିମ୍ବଦନ୍ତୀର ସମସ୍ତ ଚିତ୍ର । ଏହି ପଥର ବ୍ୟବହାର ଦ୍ବାରା ଶ୍ରୀମନ୍ଦିରର ପ୍ରାଚୀନତାକୁ ବଜାୟ ରଖିବାକୁ ପ୍ରୟାସ କରାଯାଇଥିବା ବେଳେ ଏକ ଆଧ୍ୟାତ୍ମିକ ବାତାବରଣ ସୃଷ୍ଟି କରିଛି । ଯାହାକୁ ସ୍ବାଗତ କରିବା ସହ ବେଶ ପ୍ରଶଂସା କରିଛନ୍ତି ଭକ୍ତ, ସେବାୟତ ଓ ପର୍ଯ୍ୟଟକ ।
ବିବାଦ ପରେ ଏବେ ଅଧିକ ସର୍ଚ୍ଚ ହେଉଛି ଲାକ୍ଷାଦ୍ବୀପ, ମାଳଦ୍ବୀପକୁ ଲୋକେ କରୁଛନ୍ତି ନାପସନ୍ଦ
ନୂଆଦିଲ୍ଲୀ: ଲାକ୍ଷାଦ୍ବୀପ ପାଇଁ ଭାରତ ଏବଂ ମାଳଦ୍ବୀପ ଭିତରେ ବିବାଦ ଏବଂ ଆହୁରୀ ଗମ୍ଭୀର ହେବାକୁ ଯାଉଛି । ସରକାର ସହ ସାଧାରଣ ନାଗରିକ ମଧ୍ୟ ମାଳଦ୍ବୀପକୁ ବହିସ୍କାର କରୁଛନ୍ତି । ଏବେ ଲାକ୍ଷାଦ୍ବୀପ ବିଷୟରେ ଜାଣିବାକୁ ଲୋକଙ୍କ ରୁଚି ବଢ଼ିବାରେ ଲାଗିଛି । ଏହାରି ଭିତରେ ଏବେ ମେକ ମାଇ ଟ୍ରିପରେ ବହୁତ ସର୍ଚ୍ଚ ହେଉଛି ଲାକ୍ଷାଦ୍ବୀପ । ବିଭିନ୍ନ ଟୁରିଷ୍ଟ ଟ୍ରିପ ସାଇଟରେ ମଧ୍ୟ ଲାକ୍ଷାଦ୍ବୀପକୁ ସର୍ଚ୍ଚ କରୁଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଗସ୍ତ ପରେ ଏବଂ ମାଳଦ୍ବୀପକୁ ଲୋକ ଯିବାକୁ ପସନ୍ଦ କରୁ ନାହାନ୍ତି । ଛୁଟି କାଟିବା ପ୍ଲାନ୍ କରିଥିବା ବ୍ୟକ୍ତି ଏବେ ପ୍ଲାନ୍ ବଦଳେଇ ଦେଉଛନ୍ତି ।
ଏଠାରେ ଆମେ କହି ରଖିବାକୁ ଚାହୁଁଛୁ ଯେ, ଭାରତ ବିରୋଧରେ ଟିପ୍ପଣୀ ଦେଇଥିଲା ମାଳଦ୍ବୀପ। ମାଳଦ୍ବୀପର ୩ ମନ୍ତ୍ରୀ ଏଥିପାଇଁ ନିଲମ୍ବିତ ବି ହୋଇଛନ୍ତି। ସୋସିଆଲ ମିଡିଆରେ ଭାରତ ବିରୋଧୀ ମନ୍ତବ୍ୟ ଦେଇଥିଲେ ମାଳଦ୍ବୀପର ୩ ମନ୍ତ୍ରୀ ମରିୟମ ଶିଉନା, ମାଲଶା ସରିଫ ଏବଂ ମହଜୁମ ମାଜିଦ । ଭାରତ ବିରୋଧରେ ଅଭଦ୍ର ଭାଷାର ପ୍ରୟୋଗ କରିଥିବାରୁ ରାଷ୍ଟ୍ରପତି ମୁଇଜୁଙ୍କ ସରକାର ୩ ମନ୍ତ୍ରୀଙ୍କୁ ନିଲମ୍ବିତ କରିଛନ୍ତି। ୩ ମନ୍ତ୍ରୀ ଦେଇଥିବା ଅଭଦ୍ର ଟିପ୍ପଣୀ ତାଙ୍କର ବ୍ୟକ୍ତିଗତ ବୋଲି କହିଛି ମାଳଦ୍ବୀପ।
https://www.instagram.com/p/C11NYMNS_j0/?utm_source=ig_embed&ig_rid=fb916df0-d1a1-4165-a6ae-275930fa2264