spot_img
Home Blog Page 2315

ତାରା ତାରିଣୀଙ୍କର ଆଜି ଦ୍ବିତୀୟ ଚୈତ୍ର ମଙ୍ଗଳବାର, ପୀଠକୁ ଛୁଟିଛି ଶ୍ରଦ୍ଧାଳୁଙ୍କ ସୁଅ

ଗଞ୍ଜାମ: ଚଳଚଞ୍ଚଳ ଗଞ୍ଜାମର ରତ୍ନଗିରି ପାହାଡ଼ । ମାଆ ତାରା ତାରିଣୀଙ୍କର ଆଜି ଦ୍ବିତୀୟ ଚୈତ୍ର ମଙ୍ଗଳବାର । ମାଆଙ୍କ ଦର୍ଶନ ପାଇଁ ପୀଠରେ ଜମିଛି ଶ୍ରଦ୍ଧାଳୁଙ୍କ ଭିଡ଼ । ରାଜ୍ଯ ତଥା ରାଜ୍ଯ ବାହାରୁ ତାରାତାରିଣୀ ପୀଠକୁ ଶ୍ରଦ୍ଧାଳୁଙ୍କ ସୁଅ ଛୁଟିଛି ।  ମନସ୍କାମନା ପୂର୍ଣ୍ଣ ହେବା ଲାଗି ମାନସିକଧାରୀ ମାନେ ମୁଣ୍ଡନ କରିବା ସହ ଅନେକ ଭକ୍ତ ୯୯୯ ପାହାଚ ଚଢ଼ି ମାଆଙ୍କୁ ଦର୍ଶନ କରୁଛନ୍ତି ।

ଚୈତ୍ର ଯାତ୍ରା ସମୟରେ ମାଆଙ୍କୁ ଦର୍ଶନ କଲେ ସମସ୍ତ ମନସ୍କାମନା ପୂର୍ଣ୍ଣ ହୁଏ ବୋଲି ଭକ୍ତଙ୍କ ଅତୁଟ ବିଶ୍ବାସ। ଭୋରରୁ ଦ୍ବାରଫିଟା ସହ ଅନ୍ୟାନ୍ୟ ନୀତି ପରେ ଆରମ୍ଭ ହୋଇଛି ସର୍ବସାଧାରଣ ଦର୍ଶନ । ଶୃଙ୍ଖଳିତ ଦର୍ଶନ ପାଇଁ ପ୍ରଶାସନ ପକ୍ଷରୁ ବ୍ଯାପକ ବ୍ଯବସ୍ଥା କରାଯାଇଛି । ଭକ୍ତ ମାନଙ୍କ ନିମନ୍ତେ ପାନୀୟ ଜଳ, ଶୃଙ୍ଖଳିତ ଦର୍ଶନ ପାଇଁ ବ୍ୟାରିକେଡ଼ ସହ ପାହାଡ ଉପରକୁ ଯାଇ ମାଆଙ୍କୁ ଦର୍ଶନ କରିବା ନିମନ୍ତେ ୨୦ରୁ ଅଧିକ ସିଟି ବସର ବ୍ୟବସ୍ଥା କରାଯାଇଛି ।

 

ଆଜିଠୁ ରାଜ୍ଯରେ ଉଷ୍ମ ରାତି, ୬ ତାରିଖ ଯାଏ ନିସ୍ତାର ନାହିଁ  

ଭୁବନେଶ୍ବର: ରାଜ୍ଯରେ ଆଜିଠୁ ଆହୁରି ବଢିବ ତାପମାତ୍ରା । ୪୦ ଡିଗ୍ରୀ ଉପରେ ରହିବ ଅଧିକାଂଶ ସହରର ପାରଦ । ଉପକୂଳ ଓଡ଼ିଶା ସମେତ ଆଭ୍ୟନ୍ତରୀଣ ଓଡ଼ିଶାରେ ସ୍ବାଭାବିକ ଠାରୁ ୩ ରୁ ୪ ଡିଗ୍ରୀ ଉପରେ ରହିବ ପାରଦ। ଆସନ୍ତା ୪ ଦିନ ପର୍ଯ୍ୟନ୍ତ ତାତିରୁ ନିସ୍ତାର ମିଳିବ ନାହିଁ ବୋଲି ପୂର୍ବାନୁମାନ କରିଛି ପାଣିପାଗ କେନ୍ଦ୍ର ।

ବର୍ତ୍ତମାନ ରାଜ୍ୟ ଉପରେ କୌଣସି ପାଣିପାଗ ସ୍ଥିତି ନାହିଁ। ମେଘମୁକ୍ତ ଆକାଶ ସମେତ ଶୁଖିଲା ପାଗ ପାଇଁ ତାତି ବୃଦ୍ଧି ପାଇଛି। ଅନ୍ଯପଟେ ଆଜିଠୁ ରାଜ୍ଯରେ ଉଷ୍ମ ରାତି । ରାତିରେ ସ୍ବାଭାବିକ ଠାରୁ ୬ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ଅଧିକ ରହିବ। ଫଳରେ ଏକ ଅସହ୍ୟ ପାଣିପାଗ ସ୍ଥିତି ଉପୁଜିବ। ଏଥିପାଇଁ ବୌଦ୍ଧ, ସୋନପୁର, ବଲାଙ୍ଗିର, କଳାହାଣ୍ଡି, କନ୍ଧମାଳ ଏବଂ ମାଲକାନଗିରିକୁ ୟେଲୋ ଆଲର୍ଟ ଜାରି କରାଯାଇଛି । ସେହିଭଳି ୪ ତାରିଖରୁ ୬ ତାରିଖ ପର୍ଯ୍ୟନ୍ତ ରାଜ୍ୟରେ ପ୍ରବଳ ଗ୍ରୀଷ୍ମ ପ୍ରବାହ ହେବ।

ଏଥିପାଇଁ ଭଦ୍ରକ, ଯାଜପୁର, କଟକ, ନୟାଗଡ, ବୌଦ୍ଧ, ସୋନପୁର ଏବଂ କନ୍ଧମାଳ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି। ୫ ତାରିଖରେ ସର୍ବାଧିକ ଗ୍ରୀଷ୍ମ ପ୍ରବାହ ନେଇ ସତର୍କତା ଜାରି କରାଯାଇଛି। ଭଦ୍ରକ, ଯାଜପୁର, କଟକ, ଖୋର୍ଦ୍ଧା, ନୟାଗଡ, ବୌଦ୍ଧ, କନ୍ଧମାଳ, ସୋନପୁର ଜିଲ୍ଲାରେ ଅଗ୍ନୀ ବର୍ଷା ହେବ ବୋଲି ଆକଳନ କରାଯାଇଛି।

ଆଜିଠୁ ଆରମ୍ଭ ହେଲା ସକାଳୁଆ ସ୍କୁଲ ଏବଂ ଅଙ୍ଗନବାଡ଼ି, ପାଣି ଓ ଓଆରଏସ ରଖିବାକୁ ନିର୍ଦ୍ଦେଶ

ଭୁବନେଶ୍ବର: ଆଜିଠୁ ଆରମ୍ଭ ହେଲା ସକାଳୁଆ ସ୍କୁଲ । ରାଜ୍ୟରେ କ୍ରମାଗତ ଭାବେ ତାପମାତ୍ରା ବୃଦ୍ଧି ପାଉଛି ।  ଗ୍ରୀଷ୍ମପ୍ରବାହକୁ ଦୃଷ୍ଟିରେ ରଖି ରାଜ୍ୟ ସରକାର ସ୍କୁଲ ସମୟ ପରିବର୍ତ୍ତନ କରିଛନ୍ତି। ଆଜିଠାରୁ ବିଦ୍ୟାଳୟ ଗୁଡ଼ିକରେ ପାଠପଢ଼ା ସକାଳ ୭ଟାରୁ ଆରମ୍ଭ ହୋଇ ଦିନ ସାଢ଼େ ୧୧ଟା ପର୍ଯ୍ୟନ୍ତ ଜାରି ରହିବ।  ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ପ୍ରଥମରୁ ଦ୍ବାଦଶ ଶ୍ରେଣୀ ଯାଏଁ ସ୍କୁଲ ସମୟ ପରିବର୍ତ୍ତନ କରାଯାଇଛି ।

ଏହି ସମୟରେ ପାନୀୟ ଜଳ, ଓଆରଏସ୍ ମହଜୁଦ ରଖିବା ପାଇଁ ନିର୍ଦ୍ଦେଶ ଦିଆଯାଇଛି ।   ଜିଲ୍ଲାପାଳମାନେ ନିଜ ଜିଲ୍ଲାର ପାଗର ସ୍ଥିତି ନେଇ ବିଦ୍ୟାଳୟ ଖୋଲିବା ନେଇ ନିଷ୍ପତ୍ତି ନେଇପାରିବେ ବୋଲି କୁହାଯାଇଛି ।

ଆଜିଠୁ ଅଙ୍ଗନବାଡ଼ି ମଧ୍ଯ ସକାଳୁ ଆରମ୍ଭ ହୋଇଛି । ପ୍ରବଳ ଗ୍ରୀଷ୍ମପ୍ରବାହ ପାଇଁ ଅଙ୍ଗନବାଡି କେନ୍ଦ୍ର ସକାଳୁଆ ଚାଲିବା ନିଷ୍ପତ୍ତି ନେଇଛି ମହିଳା ଶିଶୁ ବିକାଶ ବିଭାଗ । ସକାଳ ୭ଟାରୁ ୧୧ଟା ୩୦ ଯାଏ ଚାଲିବ ଅଙ୍ଗନବାଡ଼ି । ଖରା ଓ ଗରମକୁ ଦୃଷ୍ଟିରେ ରଖି ଅଙ୍ଗନବାଡି କେନ୍ଦ୍ରରେ ଶୁଦ୍ଧ ପାନୀୟ ଜଳ ସହ ଯଥେଷ୍ଟ ପରିମାଣର ଓଆରଏସ୍ ରଖିବାକୁ ନିର୍ଦ୍ଦେଶ ଜାରି କରାଯାଇଛି।

ରାଜ୍ୟରେ କ୍ରମାଗତ ଭାବେ ବହୁଥିବା ତାପମାତ୍ରାକୁ ଆଖି ଆଗରେ ରଖି ରାଜ୍ୟ ସରକାରଙ୍କ ପକ୍ଷରୁ ଗାଇଡଲାଇନ ଜାରି କରାଯାଇଛି । ବିଭିନ୍ନ ବିଭାଗ ମଧ୍ୟରେ ସମନ୍ଵୟ ରକ୍ଷାକରି ପ୍ରଚଣ୍ଡ ଗ୍ରୀଷ୍ମ ପ୍ରବାହର ପ୍ରତିକାର ଓ ମୁକାବିଲା କରାଯିବା ପାଇଁ ସ୍ୱତନ୍ତ୍ର ଚିକିତ୍ସା କମିଶନରଙ୍କ ପକ୍ଷରୁ ବିଭିନ୍ନ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ପାଇଁ ନିର୍ଦ୍ଦେଶ ଦିଆଯାଇଛି ।

ଲୋକପ୍ରିୟ କଣ୍ଠଶିଳ୍ପୀ ଶାନ୍ତିଲତା ବାରିକଙ୍କ ଶେଷ ଭିଡ଼ିଓ…

ଭୁବନେଶ୍ୱର: ଓଡ଼ିଆ ଭକ୍ତି ସଂଗୀତ ଜଗତକୁ ସ୍ତବ୍ଧ କରି ଚିରବିଦାୟ ନେଇଛନ୍ତି କଣ୍ଠଶିଳ୍ପୀ ଶାନ୍ତିଲତା ବାରିକ। ସାରା ଜୀବନ ଭକ୍ତି ସଂଗୀତ ଲାଗି ଉତ୍ସର୍ଗୀକୃତ ଥିଲେ ଶାନ୍ତିଲତା। ଶୟନ, ସପନେ, ଜାଗରଣେ କଣ୍ଠରେ ତୋଳୁଥିଲା ଜଗନ୍ନାଥ ଜଣାଣ ସମେତ ଭକ୍ତିଗୀତ। ହେଲେ ଯାହାର ଜନ୍ମ ଭକ୍ତି ସଂଗୀତ ଲାଗି ସେ କିପରି ଜୀବନର ଶେଷ କାଳରେ ତାହାକୁ ଛାଡିପାରିବେ।

ଦୀର୍ଘ ଦିନ ଧରି କ୍ୟାନସରରେ ପିଡିତ ଥିଲେ ଶାନ୍ତିଲତା। ମାତ୍ର କଣ୍ଠ ନଥିଲା ନିଷ୍ପ୍ରଭ। ଶଯ୍ୟାଶାୟୀ ଅବସ୍ଥାରେ ବି ଗାଉଥିଲେ ଭଜନ। ଜୀବନାବସାନର ସନ୍ଧିକ୍ଷଣରେ ବି କଣ୍ଠରେ ମହକିଥିଲା ସେହି ଚିର ପରିଚିତ ସ୍ବର। ଏବେ ଆସନ୍ତୁ ଶୁଣିବା ସେହି ଅମର କଣ୍ଠରୁ କିଛି…

ଅଧିକ ପଢନ୍ତୁ:- ପରଲୋକରେ ବିଶିଷ୍ଟ ଗାୟିକା ଶାନ୍ତିଲତା ବାରିକ

ରାଷ୍ଟ୍ରୀୟ ମର୍ଯ୍ୟାଦା ସହ ହେବ ଶାନ୍ତିଲତା ବାରିକଙ୍କ ଶେଷକୃତ୍ୟ, ଶୋକପ୍ରକାଶ କଲେ ମୁଖ୍ୟମନ୍ତ୍ରୀ

ଭୁବନେଶ୍ୱର: ବିଶିଷ୍ଟ କଣ୍ଠଶିଳ୍ପୀ ଶାନ୍ତିଲତା ବାରିକଙ୍କ ବିୟୋଗରେ ଗଭୀର ଶୋକ ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ସ୍ୱର୍ଗତ ଶାନ୍ତିଲତା ବାରିକଙ୍କ ଶେଷକୃତ୍ୟ ରାଷ୍ଟ୍ରୀୟ ମର୍ଯ୍ୟାଦା ସହ କରାଯିବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି। ଶାନ୍ତିଲତାଙ୍କ ଭଜନ ତାଙ୍କୁ ଅମର କରି ରଖିବ ବୋଲି କହିଛନ୍ତି ନବୀନ।

ଲୋକପ୍ରିୟ ଭଜନ ଗାୟିକା ଶାନ୍ତିଲତା ବାରିକ ଜଗନ୍ନାଥଙ୍କର ଅନନ୍ୟ ଭକ୍ତ ଥିଲେ। ଭାବପୂର୍ଣ୍ଣ କଣ୍ଠରେ ଗାଇଥିବା ଜଗନ୍ନାଥ ଭଜନ ପାଇଁ ଓଡିଶାର ଘରେ ଘରେ ସେ ସୁପରିଚିତ ଥିଲେ। ତାଙ୍କ ଭଜନ ଥିଲା ଭକ୍ତି ଓ ସମର୍ପଣର ସଂଗୀତମୟ ନିବେଦନ। ତାଙ୍କ ସ୍ୱର ପରିବେଶକୁ ଭକ୍ତିମୟ କରିବା ସହ ଶ୍ରୋତାଙ୍କ ହୃଦୟରେ ଭାବାବେଗ ସୃଷ୍ଟି କରି ପାରୁଥିଲା। ତାଙ୍କର ବିୟୋଗ ଓଡ଼ିଶାର ସାଂସ୍କୃତିକ ଜଗତ ପାଇଁ ଅପୂରଣୀୟ କ୍ଷତି ବୋଲି କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଶାନ୍ତିଲତା ବାରିକଙ୍କ ଅମର ଆତ୍ମାର ସଦଗତି କାମନା କରିବା ସହିତ ଶୋକ ସନ୍ତପ୍ତ ପରିବାରବର୍ଗଙ୍କୁ ଗଭୀର ସମବେଦନା ଜ୍ଞାପନ କରିଛନ୍ତି ନବୀନ।

ପରଲୋକରେ ବିଶିଷ୍ଟ ଗାୟିକା ଶାନ୍ତିଲତା ବାରିକ

ଭୁବନେଶ୍ୱର: ପରଲୋକରେ ବିଶିଷ୍ଟ ଗାୟିକା ଶାନ୍ତିଲତା ବାରିକ। ଦୀର୍ଘ ଦିନ ଧରି କ୍ୟାନସରରେ ପୀଡ଼ିତ ଥିଲେ ଶାନ୍ତିଲତା। ଭୁବନେଶ୍ବରର ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ପରଲୋକ ଘଟିଛି। ଦୀର୍ଘଦିନ ଧରି ଚିକିତ୍ସାଧୀନ ଥିଲେ ଶାନ୍ତିଲତା। ଅନେକ ଲୋକପ୍ରିୟ ଭଜନ ଗାଇଥିବା ଶାନ୍ତିଲତା ଓଡ଼ିଶାର ଘରେ ଘରେ ଖୁବ୍ ପରିଚିତ।

ଶାନ୍ତିଲତା ବାରିକ ଛୋଟରାୟ ଓଡ଼ିଆ ଭକ୍ତି ସଂଗୀତର ଜଣେ ଅତି ପରିଚିତ ନାଁ। ଶାନ୍ତିଲତା ବାରିକ ଛୋଟରାୟ ଓଡ଼ିଆ ଭକ୍ତି ସଙ୍ଗୀତର ଜଣେ ଅତି ପରିଚିତ ଓ ଆପଣାର ନାଁ। ନିଜ କଣ୍ଠର ଯାଦୁଗରୀରେ ଅପୂର୍ବ ଭକ୍ତି ଭାବନା ଯୋଡ଼ି ସେ ଯେଉଁ ସଙ୍ଗୀତ ପରିବେଷଣ କରନ୍ତି, ତାହା ଶ୍ରୋତାଙ୍କ ଭିତରେ ଭକ୍ତି, ସମର୍ପଣ ଏବଂ ଭଗବାନ ଚେତନା ସୃଷ୍ଟି କରିଥାଏ। କୋଟିକୋଟି ଓଡ଼ିଆଙ୍କ ହୃଦୟରେ ସେ ଗ୍ରହଣ କରିଥିଲେ ସ୍ବତନ୍ତ୍ର ସ୍ଥାନ।

ଶାନ୍ତିଲତାଙ୍କ ଭଜନ ଓଡ଼ିଶାର କଳା, ସଂସ୍କୃତି ଏବଂ ଶ୍ରୀ ଜଗନ୍ନାଥଙ୍କ ସହ ଲୋକଙ୍କୁ ଯୋଡ଼ିବାରେ ସକ୍ଷମ ହୋଇଥିଲା। ‘ହେ ଚକାନୟନ’, ‘ମୁଁ ଯେ ଦେଉଳ ବେଢ଼ା ଦୀପ,’ ‘ଏକା ମୋ ଜଗା ସବୁରି ମୂଳ,’ ଆଦି ହେଉଛି ଶାନ୍ତିଲତାଙ୍କ ଜନପ୍ରିୟ ଭଜନ। ତାଙ୍କର ଅଧିକାଂଶ ଗୀତ କାଳିଆ ସାଆନ୍ତ ଏବଂ ଶ୍ରୀକୃଷ୍ଣଙ୍କ ଲାଗି ସମର୍ପିତ। ଭକ୍ତି ସଂଗୀତର ଯାଦୁକରୀରେ ସେ କୋଟି କୋଟି ଓଡ଼ିଆଙ୍କ ହୃଦୟରେ ସ୍ଥାନ ପାଇଛନ୍ତି।

ମହଙ୍ଗା ପଡିଲା ବିଜେପି ସହ ମେଣ୍ଟ; ଦଳ ଛାଡିଲେ ସାହିଦ ସିଦ୍ଦିକ

ନୂଆଦିଲ୍ଲୀ: ମହଙ୍ଗା ପଡିଲା ବିଜେପି ସହ ମେଣ୍ଟ। ରାଷ୍ଟ୍ରୀୟ ଲୋକ ଦଳ ଛାଡ଼ିଲେ ଜାତୀୟ ଉପସଭାପତି ସାହିଦ ସିଦ୍ଦିକ। ଆସନ୍ତା ଲୋକସଭା ନିର୍ବାଚନରେ ଏନଡିଏ ମେଣ୍ଟରେ ସାମିଲ ହେବା ଲାଗି ଆରଏଲଡି ନେତା ଜୟନ୍ତ ଚୌଧୁରୀ ଘୋଷଣା କରିବା ପ୍ରତିବାଦରେ ଦଳ ଛାଡିଛନ୍ତି ସାହିଦ।

ସାହିଦ କହିଛନ୍ତି ଯେ, ସେ ଓ ତାଙ୍କ ପରିବାର ଇନ୍ଦିରା ଗାନ୍ଧୀଙ୍କ ଜରୁରୀକାଳୀନ ପରିସ୍ଥିତି ବିରୋଧରେ ଲଢେଇ କରିଥିଲେ। ବର୍ତ୍ତମାନ ଯାହା ଚାଲିଛି ତାହାକୁ ସେ ବିରୋଧ କରୁଛନ୍ତି। ବର୍ତ୍ତମାନ ଗଣତନ୍ତ୍ର ଉପରେ ହମଲା ଚାଲିଛି। ମୁଖ୍ଯମନ୍ତ୍ରୀଙ୍କୁ ଜେଲରେ ପୂରାଯାଉଛି। ଦେଶର ସମସ୍ତ ବ୍ଯବସ୍ଥା ଉପରେ ଆକ୍ରମଣ କରାଯାଉଛି। ଜେଜେ ତଥା ପୂର୍ବତନ ପ୍ରଧାନମନ୍ତ୍ରୀ ଚୌଧୁରୀ ଚରଣ ସିଂଙ୍କୁ ଭାରତ ରତ୍ନ ସମ୍ମାନ ପ୍ରଦାନ କରିବା ପରେ ଏନଡିଏରେ ସାମିଲ ହୋଇଥିଲେ ଜୟନ୍ତ ଚୌଧୁରୀ।

ଓ୍ବାନ ଫେମିଲି ଓ୍ବାନ ଟିକେଟ; ନିଜେ ଦେଇଥିବା ପ୍ରତିଶ୍ରୁତି ଭୁଲି ଯାଉଛି କଂଗ୍ରେସ

ଭୁବନେଶ୍ୱର: ନିଜେ ଦେଇଥିବା ପ୍ରତିଶ୍ରୁତି ନିଜେ ଭୁଲି ଯାଉଛି କଂଗ୍ରେସ । ଓ୍ବାନ ଫେମିଲି ଓ୍ବାନ ଟିକେଟ, କଂଗ୍ରେସର ମାନଦଣ୍ଡ ଥିବା ବେଳେ କଳାହାଣ୍ଡିରେ ଏହାର ବ୍ୟତିକ୍ରମ ଦେଖବାକୁ ମିଳିଥିବା ଅଭିଯୋଗ ହୋଇଛି । ଏନେଇ ନୂଆ ଦିଲ୍ଲୀ ଏଆଇସିସି ମୁଖ୍ୟ କାର୍ଯ୍ୟାଳୟରେ କଳାହାଣ୍ଡି ଜିଲ୍ଲା ଆଶାୟୀ ଧାରଣା ଦେଇଛନ୍ତି । `ଓ୍ବି ଓ୍ବାଣ୍ଟ ଜଷ୍ଟିସ’ ନାରାରେ କଂଗ୍ରେସ ଭବନରେ ବିରୋଧ କରିଛନ୍ତି ଆଶାୟୀ ।

କଳାହାଣ୍ଡି ଜିଲ୍ଲାରେ ଗୋଟିଏ ପରିବାରକୁ ଦୁଇଟି ଟିକେଟ କିଭଳି ମିଳୁଛି ବୋଲି ପ୍ରଶ୍ନ କରିଛନ୍ତି ଧାରଣାରତ ଆଶାୟୀ । ପ୍ଲା କାର୍ଡରେ କଂଗ୍ରେସ ନିର୍ବାଚନ ପ୍ରଚାର କମିଟି ଅଧ୍ୟକ୍ଷ ଭକ୍ତ ଚରଣ ଦାସଙ୍କୁ ବିରୋଧ କରିଛନ୍ତି। ତାଙ୍କ ବିରୋଧ ରେ ନାରା ଦେଇଛନ୍ତି ଆଶାୟୀ । କଳାହାଣ୍ଡି ଜିଲ୍ଲାର ନର୍ଲାରୁ ଭକ୍ତଙ୍କୁ ଟିକେଟ ମିଳୁଥିବା ଶୁଣା ଯାଉଥିବାବେଳେ ତାଙ୍କ ପୁଅ ସାଗର ଚରଣ ଦାସ ଭବାନୀପାଟଣାରୁ ଲଢ଼ିବେ । ତେବେ ସାଧାରଣ କଂଗ୍ରେସ କର୍ମୀ କୁଆଡେ ଯିବେ ବୋଲି ସେ ପ୍ରଶ୍ନ କରିଛନ୍ତି । କଂଗ୍ରେସ ପାଇଁ ବାପା ଦାଦା ଅମଳରୁ ଆମେ କରିଛି । ଟିକେଟ ପାଇବା ଆମ ହକ । ତଥାପି ଆମକୁ ଟିକେଟ ମିଳୁନି କିନ୍ତୁ ଦଳ ଡିଆଁଙ୍କୁ ଟିକେଟ ମିଳୁଥିବା ଅଭିଯୋଗ କରିଛନ୍ତି ଆଶାୟୀ ।

ଉତ୍କଳ ଦିବସ ଅବସରରେ ରାଜ୍ଯବାସୀଙ୍କୁ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକଙ୍କ ବାର୍ତ୍ତା

ଭୁବନେଶ୍ୱର: ଉତ୍କଳ ଦିବସ ଅବସରରେ ରାଜ୍ଯବାସୀଙ୍କୁ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକଙ୍କ ବାର୍ତ୍ତା। ସେ କହିଛନ୍ତି ଯେ ଦେଶର ସ୍ବାଧୀନତା ସଂଗ୍ରାମରେ ଓଡ଼ିଶାର ଭୂମିକା ଗୁରୁତ୍ବପୂର୍ଣ୍ଣ ରହିଛି। ମାଟିର ସ୍ବାଭିମାନର ସୁରକ୍ଷା ଲାଗି ଜୟୀ ରାଜଗୁରୁ, ବକ୍ସି ଜଗବନ୍ଧୁ, ବୀର ସୁରେନ୍ଦ୍ର ସାଏ, ସହିଦ ବାଜି ରାଉତ, ସହିଦ ଲକ୍ଷ୍ମଣ ନାୟକଙ୍କ ଅବଦାନ ଅବିସ୍ମରଣୀୟ।

ଉତ୍କଳ ଦିବସ ଅବସରରେ ଏହି ସମସ୍ତ ମହାନ ବ୍ଯକ୍ତିଙ୍କୁ ମୁଖ୍ଯମନ୍ତ୍ରୀ ଜଣାଇଛନ୍ତି ଶ୍ରଦ୍ଧାଞ୍ଜଳି। ମୁଖ୍ଯମନ୍ତ୍ରୀ କହିଛନ୍ତି ଯେ, ଓଡ଼ିଆ ଭାଷା ଶାସ୍ତ୍ରୀୟ ମାନ୍ୟତା ଲାଭ କରିଛି। ଓଡ଼ିଶାର କଳା ଓ ସଂସ୍କୃତି ଦେଶ ବିଦେଶରେ ପରିଚୟ ଲାଭ କରିଛି। ଦେଶ ବିଦେଶର ଥିବା ଓଡ଼ିଆ ଭାଇ ଭଉଣୀମାନେ ସେମାନଙ୍କ ଦକ୍ଷତା ଦ୍ବାରା ଏ ମାଟିର ଗୌରବ ବୃଦ୍ଧି କରିଛନ୍ତି। ଏ ପବିତ୍ର ଭୂମି ଯୁଗେଯୁଗେ ସାରା ବିଶ୍ବକୁ ଶାନ୍ତି, ପ୍ରେମ, ଅହିଂସା ଓ ସଦଭାବନାର ବାର୍ତ୍ତା ଦେଇ ଆସିଛି। ଏ ମହାନ ମାଟି ପ୍ରତି ସମସ୍ତଙ୍କ ଦାୟିତ୍ବ ରହିଛି। ବରପୁତ୍ରମାନଙ୍କ ଆଦର୍ଶରେ ଓଡ଼ିଆ ମାଟିର ଅସ୍ମିତା, ସ୍ବାଭିମାନର ସୁରକ୍ଷା ଲାଗି ମିଳିତ ଭାବେ କାର୍ଯ୍ୟ କରିଚାଲିବାକୁ ଆହ୍ବାନ ଦେଇଛନ୍ତି ମୁଖ୍ଯମନ୍ତ୍ରୀ।

ଦୁର୍ଗମ ଅଞ୍ଚଳରେ ଖୁସି ଆଣିଛି ଲକ୍ଷ୍ମୀ ବସ

ରାୟଗଡା: ଦୁର୍ଗମ ଅଞ୍ଚଳରେ ଖୁସି ଆଣିଛି ଲକ୍ଷ୍ମୀ ବସ। କମ୍ ଦାମରେ ଆରାମଦାୟକ ଭାବେ ଯାତାୟତ କରୁଛନ୍ତି ଲୋକ। ଗ୍ରାମାଞ୍ଚଳରୁ ସହରାଞ୍ଚଳକୁ ହେଉଛି ଯୋଗାଯୋଗ ସୁଗମ। ରାୟଗଡା ଜିଲ୍ଲାର ୧୮୨ଟି ପଞ୍ଚାୟତରେ ଗଡୁଛି ୩୯ଟି ଲକ୍ଷ୍ମୀ ବସ। ଉପକୃତ ହେଉଛନ୍ତି ଛାତ୍ରଛାତ୍ରୀଙ୍କ ଠାରୁ ଆରମ୍ଭ କରି ଆବାଳ ବୃଦ୍ଧବନିତା। ଗ୍ରାମାଞ୍ଚଳର ଚାଷୀ ସହରକୁ ସୁବିଧାରେ ପନିପରିବା ନେଇ କରିପାରୁଛନ୍ତି ବିକ୍ରି। ପୂର୍ବରୁ ଛାତ୍ରଛାତ୍ରୀମାନଙ୍କୁ ସ୍କୁଲ ଓ କଲେଜ ଯିବା ପାଇଁ ଅଟୋର ସାହାଯ୍ୟ ନେବାକୁ ପଡୁଥିଲା। ଅଧିକ ଖର୍ଚ୍ଚାନ୍ତ ହେଉଥିଲେ। ଏବେ ବସରେ ୫ ଟଙ୍କାରେ ସହରକୁ ଯାତ୍ରା କରୁଥିବାରୁ ଖୁସି ବ୍ଯକ୍ତ କରିଛନ୍ତି ଯାତ୍ରୀ।

ଲକ୍ଷ୍ମୀବସ ଜରିଆରେ ଗ୍ରାମାଞ୍ଚଳର ଲୋକ ଉପକୃତ ହେଉଛନ୍ତି । ଏଥିସହିତ ଗାଁର ଶିକ୍ଷିତ ମହିଳାଙ୍କୁ ନିଯୁକ୍ତି ପ୍ରଦାନ କରିଛି ଲକ୍ଷ୍ମୀ ବସ । ବସରେ କଣ୍ଡକ୍ଟର ଓ ସୁପରଭାଇଜର ପଦବୀରେ ନିଯୁକ୍ତ ହେଉଛନ୍ତି ମହିଳା । ମାସିକ ରୋଜଗାର କରୁଛନ୍ତି ୧୩ ହଜାର ଟଙ୍କା । ସେହିପରି ଭାବେ ଡ୍ରାଇଭର ମାନେ ପୂର୍ବରୁ ଘରୋଇ ଗାଡିରେ କାର୍ଯ୍ୟ କରି ନିଜ ପରିବାର ଗୁଜରାଣ ମେଣ୍ଟାଇବା କଷ୍ଟ ଦାୟକ ହେଉଥିଲା। ବର୍ତମାନ ଲକ୍ଷ୍ମୀ ବସରେ ଦାୟିତ୍ୱ ପାଇବା ପରେ ମାସିକ ସ୍ଥାୟୀ ଦରମା ନିଶ୍ଚିତ ରହୁଥିବାରୁ ଖୁସି ବ୍ୟକ୍ତ କରିଛନ୍ତି ଡ୍ରାଇଭର।