ନନ୍ଦିଘୋଷ ବ୍ୟୁରୋ: ଛତିଶଗଡ଼ ସସପେନ୍ସ ଓଭର । ଆଦିବାସୀ ନେତା ବିଷ୍ଣୁଦେବ ସାଏଙ୍କ ଉପରେ ସୁନାକଳସ ଢାଳିଛନ୍ତି ହାଇକମାଣ୍ଡ । ରାଜ୍ୟର ପ୍ରଥମ ଆଦିବାସୀ ସିଏମ ହେବେ ବିଷ୍ଣୁଦେବ । ବିଜେପି ରାଜ୍ୟ ସଭାପତି, ବିଧାୟକ ଓ କେନ୍ଦ୍ରମନ୍ତ୍ରୀ ଭାବେ ରହିଛି ଯଥେଷ୍ଟ ଅଭିଜ୍ଞତା । ଅରୁଣ ସାଓ ଓ ବିଜୟ ଶର୍ମା ହେବେ ଉପମୁଖ୍ୟମନ୍ତ୍ରୀ । ପୂର୍ବତନ ମୁଖ୍ୟମନ୍ତ୍ରୀ ରମଣ ସିଂ ହେବେ ବାଚସ୍ପତି । ରାଜ୍ୟପାଳଙ୍କୁ ଭେଟି ସରକାର ଗଠନ ଲାଗି ଦାବି କଲେ ବିଷ୍ଣୁଦେବ । ସେପଟେ ଆସନ୍ତାକାଲି ଆସିପାରେ ମଧ୍ୟପ୍ରଦେଶ ଓ ରାଜସ୍ଥାନ ସିଏମଙ୍କ ନାଁ ।

ସରପଞ୍ଚରୁ ସିଏମ । ପଛରେ ପଡିଗଲେ ଚର୍ଚ୍ଚିତ ହେଭିଓ୍ବେଟ । ଓବିସି କାର୍ଡ ବଦଳରେ ଆଦିବାସୀ କାର୍ଡ । ବିଷ୍ଣୁଦେବ ସାଏ ଛତିଶଗଡ଼ର ନୂଆ ସିଏମ । ରାଜ୍ୟ ଦେଖିଲା ପ୍ରଥମ ଆଦିବାସୀ ମୁଖ୍ୟମନ୍ତ୍ରୀ । ବିଷ୍ଣୁଦେବଙ୍କ ଉପରେ ହାଇକମାଣ୍ଡ କରିଛନ୍ତି ଭରସା । ଦଳର ୫୪ ବିଧାୟକଙ୍କୁ ନେଇ ବସିଥିବା ବୈଠକରେ ବିଷ୍ଣୁଦେବଙ୍କ ନାଁ ଉପରେ ବାଜିଛି ମୋହର । ସିଏମ ଚୟନ ଲାଗି ଦୁଇ କେନ୍ଦ୍ରମନ୍ତ୍ରୀ ଅର୍ଜୁନ ମୁଣ୍ଡା, ସର୍ବାନନ୍ଦ ସୋନୋୱାଲ ଓ ବରିଷ୍ଠ ନେତା ଦୁଶ୍ୟନ୍ତ ଗୌତମଙ୍କୁ ନେଇ ଗଠିତ ହୋଇଥିଲା ପର୍ଯ୍ୟବେକ୍ଷକ ଟିମ । ଦୁଇ ଜଣଙ୍କୁ ଉପମୁଖ୍ୟମନ୍ତ୍ରୀ କରିବାକୁ ହୋଇଛି ନିଷ୍ପତ୍ତି । ନୂଆ ସିଏମ ଘୋଷଣା ହେବା ପରେ କର୍ମୀ ମନାଇଛନ୍ତି ଖୁସି ।

ଏବେ ଆସନ୍ତୁ ନଜର ପକାଇବା ଚର୍ଚ୍ଚାରେ ନଥିବା ବିଷ୍ଣୁଦେବଙ୍କ ଉପରେ । ୨୧ ଫେବ୍ରୁଆରୀ ୧୯୬୪ରେ ବାଗିୟାରେ ତାଙ୍କର ହୋଇଥିଲା ଜନ୍ମ । ୧୯୯୦ରୁ ୧୯୯୮ ଯାଏ ଥିଲେ ମଧ୍ୟପ୍ରଦେଶରୁ ବିଧାୟକ । ୧୯୯୯, ୨୦୦୪, ୨୦୦୯ ଓ ୨୦୧୪ରେ ରାଇଗଡ ଆସନରୁ ଲୋକସଭାକୁ ହୋଇଥିଲେ ନିର୍ବାଚିତ । ୨୦୧୪ରୁ ୨୦୧୯ ମଧ୍ୟରେ ସେ ହୋଇଥିଲେ କେନ୍ଦ୍ର ଖଣି, ଇସ୍ପାତ, ଶ୍ରମ ଓ ନିଯୁକ୍ତି ମନ୍ତ୍ରୀ । ୨୦୦୬ ଓ ୨୦୨୦ରେ ସେ ଥିଲେ ଛତିଶଗଡ ବିଜେପି ମୁଖ୍ୟ । ଗତ ବିଧାନସଭା ନିର୍ବାଚନରେ କଂଗ୍ରେସ ପ୍ରାର୍ଥୀଙ୍କୁ ହରାଇ କୁନକୁରି ଆସନରୁ ହୋଇଛନ୍ତି ବିଜୟୀ ।

ପ୍ରଶ୍ନ ଉଠୁଛି ଅନେକ ହେଭିଓ୍ବେଟଙ୍କୁ ବାଦ୍ ଦେଇ କାହିଁକି ବିଷ୍ଣୁଦେବଙ୍କ ଉପରେ ବାଜିଲା ମୋହର । ସାହୁ ବା ତେଲି ସମ୍ପ୍ରଦାୟର ଜଣେ ପ୍ରଭାବଶାଳୀ ଆଦିବାସୀ ନେତା ବିଷ୍ଣୁଦେବ । ଦୁର୍ଗ, ରାୟପୁର ଓ ବିଳାସପୁରରେ ସେମାନଙ୍କ ରହିଛି ଦବଦବା । ଆଦିବାସୀ ଅଧ୍ୟୁଷିତ ସୁରଗୁଜା ଡିଭିଜନରୁ ଆସିଛନ୍ତି ବିଷ୍ଣୁଦେବ । ରାଜ୍ୟ ଜନସଂଖ୍ୟାର ୩୨ ପ୍ରତିଶତ ହେଉଛନ୍ତି ଆଦିବାସୀ । ଏସଟିମାନଙ୍କ ଲାଗି ସଂରକ୍ଷିତ ୨୯ ଆସନରୁ ବିଜେପି ୧୭ ଆସନରେ ହୋଇଛି ବିଜୟୀ । ୨୦୧୮ରେ ଏହି ୨୯ ଆସନରୁ ବିଜେପି ହାସଲ କରିଥିଲା ମାତ୍ର ୩ଟି ଆସନ ।