ଭୁବନେଶ୍ବର : ଦିଲ୍ଲୀ ଗସ୍ତରେ ବିରୋଧୀ ଦଳ ନେତା ତଥା ବିଜେଡି ସଭାପତି ନବୀନ ପଟ୍ଟନାୟକ। ଆଜି ସକାଳେ ସେ ୪ ଦିନିଆ ଦିଲ୍ଲୀ ଗସ୍ତରେ ଯାଇଛନ୍ତି। ସୂଚନା ଅନୁସାରେ ଉପରାଷ୍ଟ୍ରପତି ନିର୍ବାଚନ ନେଇ ଦଳୀୟ ସାଂସଦଙ୍କ ସହିତ ସେ କରିବେ ଆଲୋଚନା । ଗତକାଲି ପିଏସି ବୈଠକରେ ଦଳର ବରିଷ୍ଠ ନେତାଙ୍କ ମତାମତ ମାଗିଥିଲେ। ନେତାମାନେ ନିଜ ନିଜର ମତ ପ୍ରକାଶ କରିଥିଲେ। ତେବେ କୌଣସି ନିର୍ଦ୍ଦିଷ୍ଟ ନିଷ୍ପତ୍ତି ନିଆଯାଇନଥିଲା। ଦଳୀୟ ସାଂସଦଙ୍କ ଆଲୋଚନା କରିବାକୁ ଆଜି ଦିଲ୍ଲୀ ଯାଇଛନ୍ତି ନବୀନ ପଟ୍ଟନାୟକ। ଦିନକ ପରେ ଉପରାଷ୍ଟ୍ରପତି ନିର୍ବାଚନ। ମହାରାଷ୍ଟ୍ରର ରାଜ୍ୟପାଳ ଥିବା ସିପି ରାଧାକ୍ରିଷ୍ଣନଙ୍କୁ ଏନଡିଏ ପ୍ରାର୍ଥୀ କରିଥିବା ବେଳେ ସୁପ୍ରିମକୋର୍ଟର ପୂର୍ବତନ ବିଚାରପତି ସୁଦର୍ଶନ ରେଡ୍ଡିଙ୍କୁ ପ୍ରାର୍ଥୀ କରିଛି ଇଣ୍ଡିଆ ମେଣ୍ଟ। ବିଜେଡି ଏଯାଏ ନିଜ କାର୍ଡ ଖୋଲି ନାହିଁ, କାହାକୁ ସମର୍ଥନ କରିବ।
ସୃଜନ ମାଧ୍ୟମରେ କଂଗ୍ରେସର ଜିଲ୍ଲା ସଭାପତି ଚୟନ ପ୍ରକ୍ରିୟାରେ ଲଢେଇ ଜୋରଦାର
ଭୁବନେଶ୍ୱର : କଂଗ୍ରେସ ଜିଲ୍ଲା ସଭାପତି ପଦ ପାଇଁ ଜିଲ୍ଲା ସ୍ତରରେ ହେଉଛି ଲଢେଇ ଜୋରଦାର। ସୃଜନ କାର୍ଯ୍ୟକ୍ରମରେ ବି ଚାଲିଛି ଜୋରଦାର ଲବି। ଏପରିକି ବିଭିନ୍ନ ଜିଲ୍ଲାରେ ଏହାକୁ ନେଇ ମୁହାଁମୁହିଁ ସ୍ଥିତି ମଧ୍ୟ ସୃଷ୍ଟି ହୋଇଛି। କିନ୍ତୁ ଏସବୁ ଭିତରେ ପିସିସି ସଭାପତି ଭକ୍ତ ଦାସ କଡା ବାଣୀ ଶୁଣାଇଛନ୍ତି। ସୃଜନ ଦ୍ୱାରା ଜିଲ୍ଲା ସଭାପତି ଚୟନ ହେବାର ୩ ମାସ ଜୋରଦାର କାମ ହେବ। ସେଥିରେ ଯେଉଁମାନେ ପାସ ନ ହେବେ ସେମାନେ ପଦରୁ ବିଦା ହେବେ। ଦଳ ପକ୍ଷରୁ ଯେଉଁ କାମ ଦିଆଯିବ ତାହା ସଠିକ ଭାବେ କରି ଦେଖାଇଲେ ପଦରେ ରହିବେ ନ ହେଲେ ବିଦା ହେବେ। ତେଣୁ ଯେଉଁ ବାଟରେ ସଭାପତି ପଦରେ ବସିଲେ ବି କାମ କରି ଦେଖାଇବାକୁ ପଡିବ।
ସେପଟେ ସଂଗଠନ ସୃଜନ କାର୍ଯ୍ୟକ୍ରମରେ ବିଭିନ୍ନ ସ୍ଥାନରେ ଆଶାୟୀଙ୍କ ମଧ୍ୟରେ ଗଣ୍ଡଗୋଳ ଖବର ଆସୁଛି। ସୃଜନ କାର୍ଯ୍ୟକ୍ରମରେ ସମସ୍ତ ବର୍ଗଙ୍କ ମତ ରଖିବାର ବ୍ୟବସ୍ଥା ରହିଛି। ଏଥିରେ ଗଣତାନ୍ତ୍ରିକ ପ୍ରକ୍ରିୟାକୁ ଓପନ କରାଯାଇଛି। କିନ୍ତୁ ଏଆଇସିସି କି ପିସିସି ତରଫରୁ ଏଥିରେ କିଛି ହସ୍ତକ୍ଷେପ ନାହିଁ ବୋଲି ପିସିସି ସଭାପତି କହିଛନ୍ତି। ଜିଲ୍ଲାର ସବୁଠୁ ଦୃଢ଼ ଲୋକ ସଭାପତି ହୋଇ ଆସନ୍ତୁ। ପ୍ରତିବାଦ ହେବା ସୁସ୍ଥ ପରମ୍ପରା। ଏହା ଦ୍ୱାରା ଭଲ ବ୍ୟକ୍ତି ହିଁ ନିର୍ବାଚିତ ହେବେ। ପଦ ପାଇଁ ଲବି କଲେ କିଛି ଅସୁବିଧା ନାହିଁ ବୋଲି କହିଛନ୍ତି ପିସିସି ସଭାପତି। ଏଆଇସିସି ନିର୍ଦେଶରେ ରାଜ୍ୟରେ ଭିନ୍ନ ଢାଞ୍ଚାରେ ସଂଗଠନ ସଜଡ଼ା କାର୍ଯ୍ୟ ହେଉଛି। ଜିଲ୍ଲା ସଭାପତି ଚୟନ ପାଇଁ ହେଉଥିବା ସୃଜନ ଵ୍ୟଵସ୍ଥାରେ ରାଜ୍ୟବ୍ୟାପୀ କଂଗ୍ରେସ ଶିବିର ହୋଇଛି ଚଳଚଞ୍ଚଳ।
ଜନବିରୋଧୀ ବିଜେପି ସରକାରର ଅପାରଗତାକୁ ପଦାରେ ପକାଇବାକୁ ବିଜେଡିର ବଡ଼ ଷ୍ଟ୍ରାଟେଜି
ଭୁବନେଶ୍ଵର : ରାଜ୍ୟର ଜନବିରୋଧୀ ବିଜେପି ସରକାର ବିରୋଧରେ ଲଢେଇକୁ ଜୋରଦାର କରିବ ବିଜେଡି। ବିଧାନସଭା ଭିତରେ ଓ ବାହାରେ ସଂଗ୍ରାମ ହେବ। ଦାୟିତ୍ଵବାନ ବିରୋଧୀ ଦଳ ଭାବେ ଲୋକଙ୍କ ସ୍ଵର ହୋଇ ସମସ୍ତ ପ୍ରସଙ୍ଗ ଉତଥାପନ କରିବ। ଏଥିପାଇଁ ବିଜେଡିର ପିଏସି ବୈଠକରେ ରଣନୀତି ପ୍ରସ୍ତୁତ କରିଛନ୍ତି ଦଳର ମୁଖିଆ ନବୀନ ପଟ୍ଟନାୟକ। ଗତକାଲି ନବୀନ ନିବାସରେ ହୋଇଥିଲା ପିଏସି ବୈଠକ। ଦେଢ଼ ବର୍ଷରେ ବିଜେପି ସରକାର ବିରୋଧରେ ଆସିଛି ମାଳ ମାଳ ଅଭିଯୋଗ। ରଥଯାତ୍ରାରେ ଦଳାଚକଟା ହୋଇ ଭକ୍ତଙ୍କ ଜୀବନ ଗଲା। ଗତ ବର୍ଷ ବଳଭଦ୍ର ମୁହଁ ମାଡ଼ି ପଡ଼ିଥିଲେ। ପ୍ରତିଦିନ ନାରୀ ନିର୍ଯାତନା, ଛାତ୍ରୀ ଆତ୍ମାହୁତି, ବିପର୍ଯ୍ୟସ୍ତ ଆଇନ ଶୃଂଖଳାର ଖବର। ନିର୍ବାଚନ ପୂର୍ବରୁ ଯେଉଁ ସବୁ ପ୍ରତିଶ୍ରୁତି ଦେଇଥିଲା ବିଜେପି, ତାହା ପୂରଣ କରି ନାହିଁ। ଲୋକଙ୍କୁ ଦେଇଛି କେବଳ ପ୍ରତାରଣା। ଚାଷୀ ସମସ୍ୟା, ଆଦିବାସୀ ନିର୍ଯାତନା, ଉପମୁଖ୍ୟମନ୍ତ୍ରୀଙ୍କ ଅଞ୍ଚଳ ବଳଙ୍ଗାରେ ନାବାଳିକା ପୋଡ଼ିକୁ ଚପାଇ ଦିଆଯିବା ପରି ଘଟଣାକୁ ବିଧାନସଭାରେ ଉଠାଇବ ବିଜେଡି। ସେପଟେ ଗୃହ ବାହାରେ ସରକାରଙ୍କ ତୃଟି ବିରୋଧରେ ଆନ୍ଦୋଳନ କରିବେ ବିଜେଡିର ଛାମୁଆ ସଂଗଠନ। ଯୁବ, ଛାତ୍ର ଓ ମହିଳା ସଂଗଠନକୁ ତୃଣମୂଳରୁ ସୁଦୃଢ କରି ସରକାରଙ୍କ ବିରୋଧରେ ସ୍ଵର ଉଠାଇବାକୁ ନବୀନ ନିର୍ଦ୍ଦେଶ ଦେଇଛନ୍ତି।
ମହିଳା ସୁରକ୍ଷାର ସ୍ଥିତି ରାଜ୍ୟରେ ଉଦବେଗଜନକ। ବିଜେପି ସରକାର ଆସିବା ଦିନରୁ ହତ୍ୟା, ଗଣଦୁଷ୍କର୍ମ ବଢିଥିବା ଅଭିଯୋଗ ଆଣିଛି କଂଗ୍ରେସ। ବିପର୍ଯ୍ୟସ୍ତ ଆଇନ ଶୃଙ୍ଖଳା ପାଇଁ ଦଳ ବିଜେପି ସରକାରକୁ ଦାୟୀ କରିଛି। ଶିକ୍ଷକ ଓ ଡାକ୍ତର ଅଭାବ ପ୍ରସଙ୍ଗକୁ ମଧ୍ୟ ବିଧାନସଭାରେ ଉଠାଇବାକୁ କଂଗ୍ରେସ ନିଷ୍ପତ୍ତି ନେଇଛି। ଗତ ବିଧାନସଭା ଅଧିବେଶରେ କଂଗ୍ରେସର ସମସ୍ତ ବିଧାୟକଙ୍କୁ ଗୃହରୁ ନିଲମ୍ଵିତ କରାଯାଇଥିଲା।
ଏଥର ଭିନ୍ନ ଢଙ୍ଗରେ ସବୁ ପ୍ରସଙ୍ଗ ଉପସ୍ଥାପନ କରିବାକୁ କଂଗ୍ରେସ ସଜବାଜ ହେଉଛି। ବିଜେପି କହିଛି, ବିରୋଧୀଙ୍କ ମୁକାବିଲା ପାଇଁ ଆମେ ପ୍ରସ୍ତୁତ। ତେବେ ଗୃହକୁ ସୁରୁଖୁରୁରେ ଚଳାଇବାକୁ ବିରୋଧୀଙ୍କ ସହଯୋଗ ଲୋଡ଼ିଛି ବିଜେପି। ଜନତାଙ୍କ ସମସ୍ୟା ସହ ଜଡ଼ିତ ହୋଇ ରାଜ୍ୟବାସୀଙ୍କ ସ୍ୱର ହେବାକୁ ବିଜେଡି ସୁପ୍ରିମୋ ନବୀନ ପଟ୍ଟନାୟକ ଦଳର ସମସ୍ତ କର୍ମୀ ଓ ନେତାଙ୍କୁ ନିର୍ଦ୍ଦେଶ ଦେଇଛନ୍ତି। ସାମ୍ପ୍ରତିକ ସ୍ଥିତି ଓ ସରକାରଙ୍କ ଜନବିରୋଧୀ କାର୍ଯ୍ୟ ପ୍ରତିବାଦରେ ରାଜ୍ୟବାସୀଙ୍କ ସ୍ୱର ହୋଇ ଲୋକଙ୍କ ପାଇଁ ସରକାର ବିରୋଧରେ ତୀବ୍ର ଲଢେଇ କରିବାକୁ ବିଜେଡି ସଜବାଜ ହେଲାଣି।
ବିନା ଆଲୋଚନାରେ ନିଷ୍ପତ୍ତିକୁ ଶିକ୍ଷାବିତ ଓ ଶିକ୍ଷକ ସଂଗଠନର ବିରୋଧ
ଭୁବନେଶ୍ୱର : ରାଜ୍ୟରେ ଜାତୀୟ ଶିକ୍ଷା ନୀତି ଲାଗୁ ହେବା ପରେ ଶିକ୍ଷାରେ ନୂଆ ନୂଆ ବ୍ୟବସ୍ଥା ଲାଗୁ କରି ଚାଲିଛନ୍ତି ସରକାର। ପ୍ରାଥମିକ ବିଦ୍ୟାଳୟରେ ଶିଶୁ ବାଟୀକା ଠୁ ଆରମ୍ଭ କରି ବିଶ୍ୱବିଦ୍ୟାଳୟରେ ବହୁ ନୂଆ ବ୍ୟବସ୍ଥା ପ୍ରଚଳନ ହେଉଛି। ବିନା ଆଲୋଚନାରେ ଏସବୁ କରାଯାଉ ଥିବାରୁ ଏହାକୁ ଶିକ୍ଷାବିତ ଓ ଶିକ୍ଷକ ସଂଗଠନ ବିରୋଧ କରୁଛନ୍ତି। କିନ୍ତୁ ସେସବୁ ଭିତରେ ଆଉ ଏକ ବଡ଼ ନିଷ୍ପତ୍ତିକୁ କାର୍ଯ୍ୟକାରୀ କରିବାକୁ ଯାଉଛନ୍ତି ସରକାର। ଖୁବ ଶୀଘ୍ର ରାଜ୍ୟର ଦଶମ ବୋର୍ଡ ପରୀକ୍ଷା କରୁଥିବା ବୋର୍ଡ ଅଫ ସେକେଣ୍ଡାରୀ ଏଜୁକେସନ ଓ ଯୁକ୍ତ ଦୁଇ ପରୀକ୍ଷା ପରିଚାଳନା କରୁଥିବା ଉଚ୍ଚ ମାଧ୍ୟମିକ ଶିକ୍ଷା ପରିଷଦକୁ ଗୋଟିଏ କରିବାକୁ ପ୍ରକ୍ରିୟା ତ୍ୱରାନ୍ୱିତ କରାଯାଇଛି। ଅନ୍ୟ ରାଜ୍ୟରେ ଯେଭଳି ଗୋଟିଏ ବୋର୍ଡ ଦ୍ୱାରା ଦଶମ ଓ ଦ୍ଵାଦଶ ପରୀକ୍ଷା ପରିଚାଳନା ହେଉଛି ସେଭଳି ଓଡ଼ିଶାରେ କରାଯିବ ବୋଲି ବିଦ୍ୟାଳୟ ଗଣଶିକ୍ଷା ମନ୍ତ୍ରୀ କହିଛନ୍ତି। ଏହାଦ୍ୱାରା ଓଡ଼ିଶାର ଶିକ୍ଷା ବ୍ୟବସ୍ଥା ସୁଦୃଢ଼ ହେବ ବୋଲି କୁହାଯାଇଛି।
ସେହିଭଳି ଧନ୍ଦାମୂଳକ ଶିକ୍ଷାକୁ ଜାତୀୟ ଶିକ୍ଷା ନୀତିରେ ଗୁରୁତ୍ୱ ଦିଆଯାଉଥିବାରୁ ରାଜ୍ୟରେ ଡିଜିଟାଲ ଏଜୁକେଶନକୁ ଗୁରୁତ୍ଵ ଦିଆଯାଇଛି। ଏହି ଶିକ୍ଷାକୁ ହାସଲ କରି ପିଲାମାନେ ନିଜ ଗୋଡ଼ରେ ନିଜେ ଛିଡା ହେବେ। ନୂତନ ଜାତୀୟ ଶିକ୍ଷା ନୀତି ଅଧୀନରେ ଚଳିତ ବର୍ଷ ପରିବେଶ ସନ୍ତୁଳନ, ସୁରକ୍ଷା ବିଷୟକୁ ବାଧ୍ୟତାମୂଳକ କରାଯାଇଛି। ଏହାଛଡା ୭ ଟି ଧନ୍ଦାମୂଳକ ବିଷୟକୁ ପାଠ୍ୟକ୍ରମରେ ରଖାଯାଇଛି ବୋଲି କହିଛନ୍ତି ଉଚ୍ଚ ମାଧ୍ୟମିକ ଶିକ୍ଷା ପରିଷଦ ଅଧ୍ୟକ୍ଷ। ସେପଟେ ଦୁଇଟି ବୋର୍ଡର ମିଶ୍ରଣ ହେଲେ ଛାତ୍ରଛାତ୍ରୀ ଲାଭବାନ ହେବେ ବୋଲି କହିଛନ୍ତି ବିଏସଇ ସଭାପତି। ଉଚ୍ଚ ମାଧ୍ୟମିକ ଶିକ୍ଷା ପରିଷଦର ୪୩ ତମ ପ୍ରତିଷ୍ଠା ଦିବସରେ ମୁଖ୍ୟ ଅତିଥି ଭାବେ ଯୋଗ ଦେଇ ବିଦ୍ୟାଳୟ ଓ ଗଣଶିକ୍ଷା ବିଭାଗ ମନ୍ତ୍ରୀ ଦୁଇଟି ବୋର୍ଡକୁ ଗୋଟିଏ କରିବାକୁ ନିଷ୍ପତି ହେବା ଏହାର ସୁଫଳ ସବୁ ଛାତ୍ରଛାତ୍ରୀ ପାଇବେ ବୋଲି ମତ ରଖିଛନ୍ତି।
ଅପହରଣ ଘଟଣାର ତଦନ୍ତବେଳେ ଧରା ପଡ଼ିଲେ ସାଇବରର ଲୁଟେରା
ଭୁବନେଶ୍ବର : ଅପହରଣ ଘଟଣାର ତଦନ୍ତବେଳେ ଧରା ପଡ଼ିଲେ ସାଇବରର ଲୁଟେରା । ଠକ ଗ୍ୟାଙ୍ଗର ୫ ଜଣଙ୍କୁ ଗିରଫ କଲା କମିଶନରେଟ ପୋଲିସ । ଚନ୍ଦକା ଥାନା ଅଞ୍ଚଳରେ ଥିବା ଏକ ପରିବାର ଏହି ସାଇବର ଠକେଇ ଗ୍ୟାଙ୍ଗରେ ସାମିଲ ଥିଲେ । ମାଷ୍ଟର ମାଇଣ୍ଡ ବିହାରରେ ରହିଥିବା ବେଳେ ଓଡିଶାରେ ଏହି ଠକ ପରିବାର ମ୍ୟୁଲ ଆକାଉଣ୍ଟ୍ କରି ବିହାରର ମାଷ୍ଟର ମାଇଣ୍ଡକୁ ଦେଉଥିଲେ। ୧.୪ ପ୍ରତିଶତ ଟଙ୍କା ପାଇବା ସହ ଏମାନେ ଏକାଧିକ ବ୍ୟାଙ୍କ୍ ଆକାଉଣ୍ଟ୍ ଖୋଲି କାରବାର କରିବା ପାଇଁ ଦେଇଥିଲେ । ପରେ ସାରା ଦେଶରେ ବିଭିନ୍ନ ଉପାୟରେ ଏମାନେ କୋଟି କୋଟି ଟଙ୍କା ଠକେଇ କରିଥିବା ଜଣାପଡିଛି ॥ ମାଷ୍ଟରମାଇଣ୍ଡ ସହ ଓଡିଶାର ଲୋକଙ୍କ ଭାଗ ନ ଛିଡିବାରୁ ଭୁବନେଶ୍ୱର ଡାକି ତାକୁ ଅପହରଣ କରିଥିଲେ । ଏହି ଅପହରଣ ଘଟଣା ପରେ ସାମ୍ନାକୁ ଆସିଥିଲା ସାଇବର ଠକ ଗ୍ୟାଙ୍ଗ । ଲୁଟେରାଙ୍କ ଠାରୁ ୩ଟି ଆକାଉଣ୍ଟ ଜବତ କରିଛି ପୋଲିସ ।
ଜାପାନ ପ୍ରଧାନମନ୍ତ୍ରୀ ସିଗେରୁ ଇସିବାଙ୍କ ଇସ୍ତଫା
ନନ୍ଦିଘୋଷ ବ୍ୟୁରୋ : ଜାପାନ ପ୍ରଧାନମନ୍ତ୍ରୀ ସିଗେରୁ ଇସିବାଙ୍କ ଇସ୍ତଫା। ଗତ ଜୁଲାଇରେ ହୋଇଥିବା ସଂସଦ ନିର୍ବାଚନରେ ଦଳର ଶୋଚନୀୟ ପରାଜୟ ପରେ ସେ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି। ଗତ ବର୍ଷ ଅକ୍ଟୋବରରେ ଦାୟିତ୍ବ ନେବାପରଠାରୁ ଇସିବା ଦଳ ଭିତରେ ଥିବା ଦକ୍ଷିଣ ପନ୍ଥୀ ଗୋଷ୍ଠୀଙ୍କଠାରୁ ତୀବ୍ର ବିରୋଧର ସମ୍ମୁଖୀନ ହୋଇଆସୁଥିଲେ। ନିର୍ବାଚନରେ ପରାଜୟକୁ ନେଇ ତାଙ୍କ ଦଳ ଲିବରାଲ ଡେମୋକ୍ରାଟିକ ପାର୍ଟି ଭିତରୁ ତାଙ୍କୁ ବିରୋଧ କରାଯାଉଥିଲା। ଆମେରିକା ପକ୍ଷରୁ ଲାଗୁ ହୋଇଥିବା ଟାରିଫ ଓ ଏହାର ଅର୍ଥନୈତିକ ପ୍ରଭାବ ସମ୍ପର୍କରେ ସେ ସ୍ବର ଉତ୍ତୋଳନ କରିଆସୁଥିଲେ। ଏହା ସହ ଦରବୃଦ୍ଧି ଏବଂ ଅନ୍ୟାନ୍ୟ ପ୍ରସଙ୍ଗରେ ସେ ଦଳ ଭିତରୁ ବିରୋଧର ସମ୍ମୁଖୀନ ହୋଇଥିଲେ। ତାଙ୍କ ସ୍ଥାନରେ କାହାକୁ ନିଯୁକ୍ତି ଦିଆଯିବ ସେନେଇ ଦଳ ପକ୍ଷରୁ ଖୁବ୍ ଶୀଘ୍ର ନିଷ୍ପତ୍ତି ନିଆଯିବ। ସେ କହିଛନ୍ତି- ଦଳର ପରବର୍ତ୍ତୀ ନେତୃତ୍ବ କିଏ ନେବେ ତାହାକୁ ସେ ବିଚାର କରିବେ। ଦେଶ ଭିତରେ ଓ ବାହାରେ ଜାପାନ ଅନେକ ଚାଲେଞ୍ଜର ସମ୍ମୁଖୀନ ହେଉଥିବା ସ୍ଥିତିର ପ୍ରଧାନମନ୍ତ୍ରୀଙ୍କ ଇସ୍ତଫା ରାଜନୈତିକ ଅସ୍ଥିରତା ସୃଷ୍ଟି କରିଛି। ଦଳ ଭିତରେ ବିଦ୍ରୋହ ତୀବ୍ର ଆକାର ଧାରଣ କରୁଥିବାରୁ ଦଳକୁ ବିଭାଜନରୁ ରକ୍ଷା କରିବା ଲାଗି ଇସିବା ଏହି ପଦକ୍ଷେପ ନେଇଥିବା କୁହାଯାଇଛି। ଗତ ଜୁଲାଇରେ ୨୪୮ ଆସନ ବିଶିଷ୍ଟ ଅପରହାଉସ ନିର୍ବାଚନରେ ଶାସକ ମେଣ୍ଟ ସଂଖ୍ଯା ଗରିଷ୍ଠତା ହାସଲ କରିବାରେ ବିଫଳ ହୋଇଥିଲା।
ଆସନ୍ତାକାଲିଠାରୁ ଆରମ୍ଭ ହେବ ପିତୃପକ୍ଷ
ପୁରୀ : ଭାଦ୍ରବ ମାସ ପୂର୍ଣ୍ଣିମା । ଏକମାସ ଧରି ଆରମ୍ଭ ହେଉଛି ପିତୃପକ୍ଷ । ଆଶ୍ୱିନ ମାସ ଅମାବାସ୍ୟା ଯାଏଁ ଅପରପକ୍ଷ । ୧୫ ଦିନ ଧରି ଚାଲିବ ପିତୃପକ୍ଷ । ବିଶ୍ୱାସ ରହିଛି ଏହି ସମୟରେ ସମସ୍ତ ପିତୃପୁରୁଷ ମାନେ ଶ୍ରାଦ୍ଧ, ପିଣ୍ଡଦାନକୁ ଅପେକ୍ଷା କରିଥାନ୍ତି । ତେଣୁ ଶ୍ରଦ୍ଧାର ସହ ଶ୍ରାଦ୍ଧ ଏହି ସମୟରେ ରୀତିନୀତି ଅନୁସାରେ କରାଯାଇଥାଏ । ପିତୃ ପୁରୁଷମାନେ ସେମାନଙ୍କ ବଂଶଧରମାନଙ୍କ ଦ୍ୱାରା କରାଯାଇଥିବା ତର୍ପଣ, ଶ୍ରାଦ୍ଧ ଏବଂ ପିଣ୍ଡଦାନ ଇତ୍ୟାଦିରେ ସନ୍ତୁଷ୍ଟ ହୋଇ ସେମାନେ ବଂଶ ବୃଦ୍ଧି, ସୁଖ ଏବଂ ସମୃଦ୍ଧତା ପାଇଁ ଆଶୀର୍ବାଦ କରିଥାନ୍ତି ।
ହିନ୍ଦୁ ଧର୍ମରେ ଏହାର ରହିଛି ବିଶେଷ ମହତ୍ବ । ନିୟମ ନିଷ୍ଠାର ସହ ଏହି ଅପରପକ୍ଷ ବା ପିତୃପକ୍ଷକୁ ପାଳନ କରନ୍ତି ଶ୍ରଦ୍ଧାଳୁ । ପିତୃପକ୍ଷ ସମୟରେ ଖିଅର ହେବା ସମ୍ପୂର୍ଣ୍ଣ ନିଷିଦ୍ଧ ରହିଥିବା ବେଳେ ଏହି ସମୟରେ ନଖ ମଧ୍ୟ କଟାଯିବା ବାରଣ କରାଯାଛି । ଏପରିକି ଅପର ପାଗରେ ଅର୍ଥାତ ବାହାରେ ଭୋଜନ କରିବା ସମ୍ପୂର୍ଣ ନିଷିଦ୍ଧ କରାଯାଇଛି । ସେହିପରି ତିଳ ତର୍ପଣ, ଶ୍ରାଦ୍ଧ ଓ ପିଣ୍ଡଦାନ କରିବା ସମୟରେ ସମ୍ପୂର୍ଣ୍ଣ ଶୁଦ୍ଧପୂତ ଭାବେ ରହିବା କୁ ଶାସ୍ତ୍ରରେ ବର୍ଣ୍ଣନା କରାଯାଇଛି । ଶ୍ରୀକ୍ଷେତ୍ରରେ ବହୁ ପୁରାତନ ସମୟରୁ ତୀର୍ଥ ପୁଷ୍କରିଣୀରେ ଏହି ପିତୃପକ୍ଷ ସମୟରେ ଶ୍ରାଦ୍ଧ, ତର୍ପଣ ଏବଂ ପିଣ୍ଡ ଦାନ କରିବା ଶୁଭ ବୋଲି ବିବେଚନା କରାଯାଏ । ତେଣୁ ଶ୍ରଦ୍ଧାଳୁଙ୍କ ଆଗମନ ଆରମ୍ଭ ହୋଇଯାଇଛି ।
କଟକ ସହରରେ ଜୋରସୋର ଚାଲିଛି ମାଆଙ୍କ ମୂର୍ତ୍ତି ନିର୍ମାଣ କାମ
କଟକ : କଟକରେ ଜମିଲାଣି ପାର୍ବଣ ମାହୋଲ । ଦଶହରା ପାଖେଇ ଆସୁଥିବାରୁ ବିଭିନ୍ନ ମଣ୍ଡପରେ ଜୋରସୋର ଚାଲିଛି ପ୍ରସ୍ତୁତି । ଅଧିକାଂଶ ମଣ୍ଡପ ଗୁଡ଼ିକରେ ମାଆଙ୍କ ମୂର୍ତ୍ତିକାମ ଆଗେଇ ଚାଲିଛି । ମୂର୍ତ୍ତି ସବୁ ଏକମାଟିଆ ସରିଥିବାବେଳେ ଦୋମାଟିଆ କରି ମହାଳୟାରୁ ଆରମ୍ଭ ହେବ ଖଡ଼ିଚଢ଼ା । ରାଜ୍ଯ ବାହାରୁ କାରିଗରମାନେ ଆସି ମୂର୍ତ୍ତି ନିର୍ମାଣରେ ଲାଗିଛନ୍ତି । ସେପଟେ ପୂଜା ପାଇଁ ସମସ୍ତ ପ୍ରସ୍ତୁତି କରାଯାଉଥିବା କହିଛନ୍ତି ପୂଜକ ।
ମୂର୍ତ୍ତି ଗଢ଼ା ସାଙ୍ଗକୁ ମେଢ଼ କାମ ବି ଜୋରସୋରରେ ଆଗେଇ ଚାଲିଛି । ବିଶେଷ କରି ଜରି ମେଢ କାରିଗର ଜାପାନୀ ସିଂଙ୍କ ଟିମକୁ ଏବେ ଫୁରସତ ନାହିଁ । ସୁନେଲି ଓ ରୂପେଲି ମେଢ ନିର୍ମାଣ ପାଇଁ କଟକ ସହର, ରାଜ୍ୟ ଓ ରାଜ୍ଯ ବାହାରୁ ବଇଣା ଆସିଛି । ୧୦-୧୨ ଦିନ ଭିତରେ ମେଢ କାମ ସାରି ପୂଜା ମଣ୍ଡପକୁ ପଠାଇବେ । କଟକର ବିଭିନ୍ନ ସ୍ଥାନରେ ସୁନା, ଚାନ୍ଦି ମେଢ଼ ବଢ଼ିଥିଲେ ସୁଦ୍ଧା ଜରିମେଢ଼ ଅଧିକ ଆକର୍ଷଣୀୟ ହେଉଥିବା କହିଛନ୍ତି କାରିଗର । ବର୍ଷା ଯୋଗୁଁ କାମ ସାମାନ୍ଯ ମାନ୍ଦା ଥିବାବେଳେ ଆଗକୁ ପାଗ ଅନୁକୂଳ ହେଲେ ଦୁର୍ଗାପୂଜା ପ୍ରସ୍ତୁତି ଆହୁରି ଜୋର ଧରିବ ବୋଲି ସମସ୍ତଙ୍କ ଆଶା ରଖିଛନ୍ତି ।
ପୋଷା କୁକୁରଙ୍କୁ ନେଇ ସ୍ପା ସେଣ୍ଟରେ କୁକୁର ପ୍ରେମୀଙ୍କ ଭିଡ଼
ଭୁବନେଶ୍ବର : ସୁନ୍ଦର ଦିଶିବା ପାଇଁ ସମସ୍ତେ ଆଗ୍ରହୀ । ଏଥିପାଇଁ ରାଜଧାନୀରେ ସ୍ଥାନେ ସ୍ଥାନେ ଖୋଲିଛି ସେଲନ, ସ୍ପା ସେଣ୍ଟର । ଭଳିକି ଭଳି ଟ୍ରିଟମେଣ୍ଟ କରି ନିଜକୁ ସୁନ୍ଦ ଭାବେ ସଜାଏ ମଣିଷ । ମଣିଷଙ୍କ ପରି ପୋଷା କୁକୁର ମାନଙ୍କ ପାଇଁ ମଧ୍ଯ ରହିଛି ସ୍ପା ସେଣ୍ଟର । ଚୁଟି କଟାଠୁ ଆରମ୍ଭ କରି ଗାଧୋଇବା, ନଖ କଟା ସହ ଫେସିଆଲ ବଡ଼ି ମସାଜ ସବୁ ଯୋଗାଇ ଦେଉଛନ୍ତି ସ୍ପା ସେଣ୍ଟର କର୍ମଚାରୀ । ରାଜଧାନୀର ପଟିଆ ଅଞ୍ଚଳରେ ଖୋଲିଛି ଦି ଡଗ୍ ସ୍ପା ଗୃମିଙ୍ଗ ସେଣ୍ଟର । ଯେଉଁଠି ପୋଷା କୁକୁର ଲଭରମାନଙ୍କ ଚାହିଦା ମୁତାବକ ସେବା ଯୋଗାଇ ଦେଉଛନ୍ତି ପ୍ରଶିକ୍ଷିତ କର୍ମଚାରୀ I ଉଚ୍ଚମାନର ସାମ୍ପୁ, କଣ୍ଡିସନର ଲଗାଇଇ ଗାଧୋଇବା ପରେ ସୁନ୍ଦ ହେୟାର ଷ୍ଟାଇଲ କରି ମାଲିକଙ୍କୁ ହସ୍ତାନ୍ତର କରନ୍ତି କର୍ମଚାରୀ ।
ସ୍ପା ସେଣ୍ଟରରେ ସଂକ୍ରମଣ ଯେପରି ନହୁଏ ସେଥିପାଇଁ ଅଧିକ ଧ୍ଯାନ ଦେଇଥାନ୍ତି କର୍ମଚାରୀ । କାମ କରିବା ସମୟରେ ଯଦି କୁକୁର କାମୁଡ଼ନ୍ତି ଦେବେ ସେଥିପାଇଁ ମଧ୍ଯ ସୁରକ୍ଷା ବ୍ଯବସ୍ଥା ରହିଛି । ଗ୍ରାହକଙ୍କ ଚାହିଦା ମୁତାବକ କୁକୁରଙ୍କ ସମସ୍ତ ଯତ୍ନ ନେଇ କାମ କରିଥାନ୍ତି କର୍ମଚାରୀ । ଖାଲି ସେତିକୁ ନୁହେଁ କୁକୁରଙ୍କ ପାଇଁ ବିଭିନ୍ନ ପ୍ରସାଧନ ସାମଗ୍ରୀ ମଧ୍ଯ ଏଠାରେ ଯୋଗାଇ ଦିଆଯାଉଛି । ଦିନକୁ ଦିନ ରାଜଧାନୀରେ ପୋଷା କୁକୁରଙ୍କ ସଂଖ୍ଯା ବଢୁଥିବାରୁ ଏହି ସ୍ପା ସେଣ୍ଟରର ବି ଚାହିଦା ବଢୁଥିବା କହିଛନ୍ତି ପଶୁପ୍ରେମୀ ।
ବିପଦରେ କୋରାପୁଟ ଜିଲ୍ଲା ପାତ୍ରପୁଟ ନିକଟ ଐତିହାସିକ ଲୁହା ବ୍ରିଜ
ଜୟପୁର : ବ୍ରିଟିଶ ଅମଳର ମୁକସାକ୍ଷୀ ପାତ୍ରପୁଟ ଲୁହା ବ୍ରିଜ । ୧୯୩୧ରେ ହୋଇଥିଲା ନିର୍ମାଣ । ଏହି ଐତିହାସିକ ପୋଲ ଏବେ ବିପଦରେ । ଜୟପୁର ଠାରୁ ବୈପାରିଗୁଡା ୨୬ ନମ୍ବର ଜାତୀୟ ରାଜପଥ ପାତ୍ରପୁଟ ନିକଟରେ ଶହେବର୍ଷ ହେଲା ସାଜିଛି ଯାତାୟାତର ମାଧ୍ଯମ । ପ୍ରତିଦିନ ହଜାର ହଜାର ଭାରିଜାନ ଓ ବସ ଟ୍ରକ ଏହାରୁ ଉପଦେଇ ଯିବା ଆସିବା କରୁଛି । କିନ୍ତୁ ମରାମତି କରାଯାଉନାଥିବାରୁ ଏହା କୌଣସି ସମୟରେ ଭୁଷୁଡ଼ିବା ଆଶଂକା ସୃଷ୍ଟି ହୋଇଛି । ଦୁଇବର୍ଷ ତଳେ ଏହି ପୋଲ ପାର୍ଶ୍ବରେ ଏକ ନୁଆ ପୋଲ ପାଇଁ ଟେଣ୍ଡେର କରାଯାଇ କାମ ଆରମ୍ଭ ହେଇଥିଲା । କିନ୍ତୁ ଠିକାଦାର କାମ ନକରିବାରୁ କାର୍ଯ୍ଯାଦେଶ ବାତିଲ୍ କରାଯାଇଛି । ତେଣୁ ତୁରନ୍ତ ନୁତନ ଏକ ପୋଲ ନିର୍ମାଣ କରିବା ସହ ଏହି ଐତିହାସିକ ପୋଲକୁ ପର୍ଯ୍ୟଟନ ସ୍ଥଳର ମାନ୍ୟତା ହେବାକୁ ଦାବୀ କରିଛି କୋଲାବ ବ୍ରିଜ୍ ସୁରକ୍ଷା ସମିତି ।
ଛତିଶଗଡ, ଆନ୍ଧ୍ର ପ୍ରଦେଶ ସମେତ ମାଲକାନଗିରି ଜିଲ୍ଲାକୁ ଯିବାପାଇଁ ଏହା ଯାତାୟାତର ମାଧ୍ଯମ । ହେଲେ ଏହି ଐତିହାସିକ ପୋଲ ଏବେ ବିପଦଶଙ୍କୁଳ ଅବସ୍ଥାରେ ଥିବାରୁ ଦୁର୍ଘଟଣା ଘଟିବା ଆଶଂକା ସୃଷ୍ଟି ହୋଇଛି । ତେଣୁ ଏହାର ଶୀଘ୍ର ଏକ ବିକଳ୍ପ ବ୍ରିଜ୍ ନିର୍ମାଣ କରିବାକୁ ବହୁବାର ଜିଲ୍ଲା ପରିଷଦ ବୈଠକରେ ମଧ୍ଯ ଦାବି ଉଠିଛି । ସେପଟେ ଜାତିୟ ରଜପଥ ବିଭାଗ ଅଧିକ୍ଷଣ ଯନ୍ତ୍ରୀ କହିଛନ୍ତି, ଏହାର ମରାମତି କରାଯିବା ସହ ନୁତନ ପୋଲ ପାଇଁ ଖୁବଶୀଘ୍ର ଟେଣ୍ଡେର ଆହ୍ବାନ କରାଯିବ ।