ନନ୍ଦିଘୋଷ ବ୍ୟୁରୋ : ଦୀର୍ଘ ୪ ବର୍ଷ ଧରି ଚାଲିଥିବା ୟୁକ୍ରେନ ଯୁଦ୍ଧ ଥମିବାର ସାମାନ୍ୟ ଆଶା ଦେଖା ଦେଇଛି। ଯଦିଓ ପକ୍କା ଭାବେ କିଛି ସ୍ପଷ୍ଟ ହୋଇନାହିଁ, ତେବେ ଆମେରିକା-ରୁଷିଆର ଆଲୋଚନାରୁ ସକରାତ୍ମକ ସୂଚନା ମିଳିଛି। ୟୁକ୍ରେନକୁ ନେଇ ଆମେରିକାର ପ୍ରତିନିଧି ଦଳ ଓ ରୁଷିଆର ରାଷ୍ଟ୍ରପତି ପୁଟିନଙ୍କ ମଧ୍ୟରେ ହୋଇଛି ଆଲୋଚନାଚ। ଦୀର୍ଘ ୪ ଘଣ୍ଟାରୁ ଅଧିକ ସମୟ ଧରି ଆଲୋଚନା ହୋଇଥିଲା।ବୈଠକରେ ନିଜେ ପୁଟିନ ମଧ୍ୟ ଉପସ୍ଥିତ ଥିଲେ। ତାଙ୍କ ସହିତ ଆଲୋଚନା କରିଥିଲେ ଆମେରିକା ରାଷ୍ଟ୍ରପତି ଟ୍ରମ୍ପଙ୍କ ସ୍ଵତନ୍ତ୍ର ପ୍ରତିନିଧି ଷ୍ଟିଭ ୱଟକୋଫ୍। ତେବେ ବୈଠକ ପରେ ରୁଷର ଜଣେ ଅଧିକାରୀ କହିଛନ୍ତି, ଆଲୋଚନା ସକରାତ୍ମକ ରହିଛି। କିନ୍ତୁ ରୁଷ ନିଜ ଆଭିମୁଖ୍ୟରେ କୌଣସି ସାଲିସ କରିବ ନାହିଁ। ବିଶେଷ କରି ୟୁକ୍ରେନର ଯେଉଁ ଅଞ୍ଚଳକୁ ରୁଷ ଅଧିକାର କରି ନେଇଛି, ତାହା ଫେରାଇବା ମୁଡ୍ ରେ ନାହିଁ ମସ୍କୋ। ଆହୁରି ଅନେକ କାମ ବାକିଥିବା ସେ କହିଛନ୍ତି। ୟୁକ୍ରେନ ଯୁଦ୍ଧ ଆରମ୍ଭ ହେବାର ଏହି ଫେବ୍ରୁଆରିକୁ ୪ ବର୍ଷ ପୂରିଯିବ। ଉଭୟ ପକ୍ଷ ବ୍ୟାପକ କ୍ଷତିଗ୍ରସ୍ତ ହୋଇଛନ୍ତି। ବିଶ୍ଵ ଆର୍ଥିକ ଅବସ୍ଥା ମଧ୍ୟ ପ୍ରଭାବିତ ହୋଇଛି। ତେଣୁ ଯୁଦ୍ଧ ବନ୍ଦ ପାଇଁ ଆମେରିକା ପକ୍ଷରୁ ମଧ୍ୟସ୍ଥତା କରାଯାଉଛି। ସେପଟେ ୟୁରୋପକୁ ଖୋଲାଖୋଲି ଧମକ ଦେଇଛନ୍ତି ପୁଟିନ। ସେ କହିଛନ୍ତି, ଯଦି ୟୁରୋପ ଯୁଦ୍ଧ ଚାହୁଁଛି, ତେବେ ଆମେ ବି ପ୍ରସ୍ତୁତ। ୟୁକ୍ରେନ ଶାନ୍ତି ପ୍ରକ୍ରିୟାରେ ୟୁରୋପ ବାଧା ସାଜିଥିବା ସେ ଅଭିଯୋଗ କରିଛନ୍ତି। ୟୁରୋପ ଯାହା କହୁଛି, ତାକୁ ରୁଷ ଆଦୌ ଗ୍ରହଣ କରିବ ନାହିଁ ବୋଲି କହିଛନ୍ତି ପୁଟିନ। ଏବେ ୟୁକ୍ରେନର ୨୦ ପ୍ରତିଶତ ଅଞ୍ଚଳ ରୁଷିଆ ଅକ୍ତିଆରରେ ଅଛି। ଲକ୍ଷେ ୨୦ ହଜାର ବର୍ଗ କିଲୋମିଟରକୁ ଦଖଲ କରି ନେଇଛି ମସ୍କୋ। ତଥାପି ରୁଷ ନିଜ ଲକ୍ଷ୍ୟ ହାସଲ କରିପାରିନାହିଁ ଏବଂ ୟୁକ୍ରେନ ପକ୍ଷରୁ କଡ଼ା ପ୍ରତିରୋଧର ସମ୍ମୁଖୀନ ହେଉଛି। ୟୁକ୍ରେନ ଚାହୁଁଛି, ଶାନ୍ତି ପାଇଁ ରୁଷ ଯେଉଁ ସବୁ ଅଞ୍ଚଳ ଦଖଲ କରି ନେଇଛି, ସେହି ଅଞ୍ଚଳ ଫେରାଇ ଦେଉ ରୁଷ। ୟୁକ୍ରେନ ପଛରେ କୌଣସି ଚାଲ୍ ବାଜ କାମ କରାନଯାଉ ବୋଲି ମଧ୍ୟ ଖୋଲାଖୋଲି ଆହ୍ଵାନ ଦେଇଛନ୍ତି ରାଷ୍ଟ୍ରପତି ଜେଲେନସ୍କି।
କଲ୍ୟାଣସିଂହପୁରରେ ଦନ୍ତା ହାତୀ ଆକ୍ରମଣରେ ଯୁବକ ଗୁରୁତର
ନନ୍ଦିଘୋଷ ବ୍ୟୁରୋ : ରାୟଗଡ଼ା କଲ୍ୟାଣସିଂହପୁର ନିୟମଗିରି ପାହାଡ଼ ବୁଡୁଣି ଗାଁରେ ଦନ୍ତା ଆକ୍ରମଣରେ ଜଣେ ଡଙ୍ଗରିଆ ଗୁରୁତର ହୋଇଛନ୍ତି। ଗୁରୁତର ହେଲେ ୫୦ ବର୍ଷିୟ ବାଲା ସିକକା । ହାତୀ କବଳରୁ ଗ୍ରାମବାସୀ ଉଦ୍ଧାର କରି ତାଙ୍କୁ ପ୍ରଥମେ କଲ୍ୟାଣସିଂହପୁର ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ। ପରେ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି । ଭୋରୁ ଯାଉଥିବା ସମୟରେ ଆକ୍ରମଣ କରିଥିଲା ଦନ୍ତା। ତାଙ୍କ ଛାତିର ହାଡ ଓ ଗୋଡ ଭାଙ୍ଗି ଯାଇଥିବା ଜଣାପଡିଛି । ଗତ ଦୁଇଦିନ ହେଲା ନିୟମଗିରି ରେ ପ୍ରାୟ ୩୦ ଟିକିଆ ହାତୀ ବୁଲୁଥିବା ଖବର ପ୍ରକାଶ ପାଇଥିଲା। ପୁର୍ବରୁ କଳାହାଣ୍ଡି ଲାଞ୍ଜିଗଡ଼ କନାକାଡୁ ଗାଁରେ ଜଣେ ବାଳକକୁ ହାତୀ ପାଦରେ ଦଳି ଦେଇଥିଲା। ବାରମ୍ବାର ଏଭଳି ଘଟଣା ଘଟୁଥିଲେ ମଧ୍ୟ ବନ ବିଭାଗର ଖାମଖିଆଲୀ ଯୋଗୁଁ ହାତୀର ଆକ୍ରମଣର ଶିକାର ହେଉଛନ୍ତି ବୋଲି ଗ୍ରାମବାସୀ ଅଭିଯୋଗ କରିଛନ୍ତି ।
ଜଗତସିଂହପୁର ଥାନା ତରିକୁନ୍ଦରେ ଚଢାଉ ; ସନ୍ଦିଗ୍ଧ ବାଂଲାଦେଶୀ ସନ୍ଦେହରେ ରେଡ୍
ନନ୍ଦିଘୋଷ ବ୍ୟୁରୋ : ସନ୍ଦିଗ୍ଧ ବାଂଲାଦେଶୀ ସନ୍ଦେହରେ ପ୍ରଶାସନର ରେଡ୍। ଜଗତସିଂହପୁର ଥାନା ତରିକୁନ୍ଦ ହାଇସ୍କୁଲ ପଛ ପଟ ଖେଳପଡ଼ିଆରେ ରହୁଥିବା ଦୁଇ ପରିବାରକୁ ଉଠାଇ ନେଇଛି ପୋଲିସ। ସେଠାରେ ପ୍ରାୟ ୧୦ ଜଣ ରହୁଥିଲେ। ୬ ଜଣ ମହିଳଆ, ୩ ଜଣ ଶିଶୁ ଓ ଜଣେ ବୃଦ୍ଧ। ସମସ୍ତଙ୍କୁ ବିରିଡି ବ୍ଲକ ବାଗଲପୁର ବହୁ ମୁଖୀ ବନ୍ୟା ଆଶ୍ରୟସ୍ଥଳୀରେ ରଖାଯାଇଛି। ସେମାନଙ୍କର କାଗଜପତ୍ର ଯାଞ୍ଚ କରାଯାଉଛି। ଯାହା ସୂଚନା ମିଳିଛି ଏମାନଙ୍କ ଘର ଏରସମା ବ୍ଲକ କଳାବେଦୀ ଅଞ୍ଚଳର । ଏମାନେ ଏଠାରେ ଘର ଦ୍ୱାର କରି ରହୁଛନ୍ତି । ଏହା ଆଗରୁ 37 ଜଣଙ୍କୁ ପୋଲିସ ସଂଧିଗ୍ଧ ବାଂଲାଦେଶୀ ଭାବେ ଉଠେଇ ନେଇଥିଲା। ସେମାନଙ୍କ ମଧ୍ୟରୁ ୧୩ ଜଣ ବାଂଲାଦେଶୀ ବୋଲି ଜଣାପଡ଼ିଥିଲା। ସେମାନଙ୍କୁ ବାଂଲାଦେଶ ପଠାଇ ଦିଆଯିବ। ଜଗତସିଂହପୁର ତରିକୁନ୍ଦ ବେହେରାମପୁରରେ ବାଂଲାଦେଶୀଙ୍କୁ ଘର ଭଡ଼ା ଦେଇଥିବା ସିକନ୍ଦର ଆଲାମ ଓ ତାର ସାନ ଭାଇ ଅବଦୁଲ ମୁଲତିପି ଖାଁକୁ ପୋଲିସ ଗିରଫ କରି ଆଗରୁ ଜେଲ ପଠାଇ ଦେଇଛି।
ଆଜି ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଦ୍ବିତୀୟ ଦିନିକିଆ ; ରାୟପୁରରେ ଅପରାହ୍ଣ ଗୋଟାଏ ୩୦ରେ ଖେଳାଯିବ ମ୍ୟାଚ
ନନ୍ଦିଘୋଷ ବ୍ୟୁରୋ : ଆଜି ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଦ୍ବିତୀୟ ଦିନିକିଆ । ରାୟପୁରରେ ଅପରାହ୍ଣ ଗୋଟାଏ ୩୦ରେ ଖେଳାଯିବ ମ୍ୟାଚ । ବିରାଟ କୋହଲି ଫର୍ମକୁ ଫେରିଥିବାରୁ ଏହି ମ୍ୟାଚ ଜିତି ସିରିଜ କବଜା କରିବାକୁ ଉଦ୍ୟମ କରିବ ଟିମ ଇଣ୍ଡିଆ । ପ୍ରଥମ ଦିନିକିଆରେ ଦକ୍ଷିଣ ଆଫ୍ରିକାକୁ ୧୭ ରନରେ ହରାଇ ୩ଟିକିଆ ସିରିଜରେ ୧-୦ରେ ଆଗୁଆ ରହିଛି ଭାରତ । ରାଞ୍ଚିରେ ଖେଳାଯାଇଥିବା ପ୍ରଥମ ଦିନିକିଆରେ ଶତକ ହାସଲ ସହ ଫର୍ମକୁ ଫେରିଛନ୍ତି ବିରାଟ କୋହଲି । ରୋହିତ ଶର୍ମାଙ୍କ ୫୭ ଓ ଅଧିନାୟକ କେ.ଏଲ ରାହୁଲଙ୍କ ୬୦ ରନ ବଳରେ ୩୪୯ ରନ କରିଥିଲା ଟିମ ଇଣ୍ଡିଆ । ଦକ୍ଷିଣ ଆଫ୍ରିକା ଲଢୁଆ ବ୍ୟାଟିଂ କରିବା ସତ୍ତ୍ବେ ୩୩୨ ରନ କରିବାରେ ସକ୍ଷମ ହୋଇପାରିଥିଲା । ଆହତ କାରଣରୁ ଅଧିନାୟକ ଶୁବମନ ଗିଲ ଓ ଉପ ଅଧିନାୟକ ଶ୍ରେୟସ ଆୟାରଙ୍କୁ ବିଶ୍ରାମ ଦିଆଯାଇଛି । କେଏଲ ରାହୁଲଙ୍କ ନେତୃତ୍ବରେ ଖେଳୁଛି ଭାରତ । ସିରିଜର ତୃତୀୟ ମ୍ୟାଚ ୬ ତାରିଖରେ ବିଶାଖପାଟଣାରେ ଖେଳାଯିବ । ଏହାପରେ ଟି-ଟ୍ବେଣ୍ଟି ସିରିଜର ପ୍ରଥମ ମ୍ୟାଚ ୯ ତାରିଖ ଦିନ କଟକରେ ଖେଳାଯିବ ।
ଆଜି ବି ବେଶ ସରଗରମ ହେବ ବିଧାନସଭା
ନନ୍ଦିଘୋଷ ବ୍ୟୁରୋ: ଆଜି ବି ବିଧାନସଭା ବେଶ ସରଗରମ ହେବ। ବିଭିନ୍ନ ପ୍ରସଙ୍ଗକୁ ନେଇ ଗୃହରେ ଶାସକ ଓ ବିରୋଧୀ ମୁହାଁମୁହିଁ ହେବେ । ଶକ୍ତି , କୃଷି ଓ କୃଷକ,ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ, ମତ୍ସ୍ୟ ଓ ପ୍ରାଣୀ ସମ୍ପଦ, ସମବାୟ, ବୟନ ଶିଳ୍ପ, ସୂକ୍ଷ୍ମ କ୍ଷୁଦ୍ର ଓ ମଧ୍ୟମ ଉଦ୍ୟୋଗୀ ଏବଂ ବିଜ୍ଞାନ ଓ କାରିଗରୀ ବିଭାଗର ରହିଛି ପ୍ରଶ୍ନକାଳ । ବିଧାୟକ ଚାହିଁଲେ ଭିନ୍ନ ପ୍ରଶ୍ନ ପଚାରିବେ। ଶୂନ୍ୟକାଳରେ ଉଭୟ ବିରୋଧୀ ଓ ଶାସକ ବହୁ ଗୁରୁତ୍ବପୂର୍ଣ୍ଣ ରାଜ୍ୟ ସ୍ବାର୍ଥ ସମ୍ବଳିତ ପ୍ରସଙ୍ଗ ଉଠାଇବେ । ମୁଖ୍ୟ ବିରୋଧୀ ବିଜେଡି ପକ୍ଷରୁ ଧାନ ମଣ୍ଡି ସମସ୍ୟା ନେଇ ମୁଲତବୀ ପ୍ରସ୍ତାବ ଦିଆଯିବ । ପ୍ରଶ୍ନକାଳରେ ବିଭିନ୍ନ ବିଭାଗ ଉପରେ ଘମାଘୋଟ ଆଲୋଚନା ହେବାର ସମ୍ଭାବନା ରହିଛି। ସେହିପରି ଦ୍ବିତୀୟ ଅଧ୍ୟାୟରେ ବାଣିଜ୍ୟ ଓ ପ୍ରତିଷ୍ଠାନ ଆଇନ ସଂଶୋଧନ ପ୍ରସ୍ତାବ ଉପରେ ଆଲୋଚନା ହେବ।
ଭୁଲ ମାନିଲେ ସୋସିଆଲ ମିଡିଆ ଇନଫ୍ଲୁଏନସର ଶୁଭଙ୍କର ମିଶ୍ରା
ନନ୍ଦିଘୋଷ ବ୍ୟୁରୋ : ଭୁଲ ମାନିଲେ ସୋସିଆଲ ମିଡିଆ ଇନଫ୍ଲୁଏନସର ଶୁଭଙ୍କର ମିଶ୍ରା । ନିଜର ୟୁଟ୍ୟୁବ ଚ୍ଯାନଲରେ ଶ୍ରୀମନ୍ଦିରକୁ ନେଇ ଦେଇଥିବା ବିବାଦୀୟ ମନ୍ତବ୍ଯ ପାଇଁ ଭୁଲ ମାଗିବା ସହ ବିବାଦୀୟ ପୋଷ୍ଟକୁ ହଟାଇଛନ୍ତି ଶୁଭଙ୍କର । ତେବେ ଏହା ତାଙ୍କର ନିଜସ୍ବ ମନ୍ତବ୍ଯ ନଥିଲା ବୋଲି କହିଛନ୍ତି ଶୁଭଙ୍କର ମିଶ୍ରା । ଆଧ୍ଯାତ୍ମିକ ମାର୍ଗରେ ସେ ଅନେକ ସାଧୁ ସନ୍ଥଙ୍କ ସଂସ୍ପର୍ଶରେ ଆସିଛନ୍ତି । ସେମାନଙ୍କ ଠାରୁ ବହୁ ଜଣା ଅଜଣା ଜ୍ଞାନ ପ୍ରାପ୍ତି କରିଛନ୍ତି । ତେବେ ଶ୍ରୀମନ୍ଦିର ପରି ଧାର୍ମିକ ଅନୁଷ୍ଠାନକୁ ସେ ସମ୍ମାନ ଜଣାନ୍ତି ।
ଏଠାର ଆଧ୍ଯାତ୍ମିକ ପରିବେଶ ତାଙ୍କୁ ସବୁବେଳେ ଆକର୍ଷିତ କରି ଆସିଛି । ଏହି ଆକର୍ଷଣ ଯୋଗୁଁ ସେ ଜଗତଗୁରୁ ଶଙ୍କରାଚାର୍ଯ୍ଯଙ୍କ ସଂସ୍ପର୍ଷରେ ମଧ୍ଯ ଆସିଥିଲେ । ତେବେ କିଛି ଲୋକ ତାଙ୍କୁ ତାଙ୍କର ଏହି ମନ୍ତବ୍ଯ ନେଇ ସିଧାସଳଖ ପ୍ରଶ୍ନ କରିଥିବାରୁ ସେ ଧନ୍ଯବାଦ ଜଣାଇଛନ୍ତି । ପ୍ରେମୀଯୁଗଳ ଶ୍ରୀମନ୍ଦିରକୁ ଯିବା ଦ୍ବାରା ପ୍ରେମ ସଫଳ ହୁଏନି ବୋଲି ନିଜ ସୋସିଆଲ ମିଡ଼ିଆରେ ମନ୍ତବ୍ଯ ଦେଇଥିଲେ ଶୁଭଙ୍କର ।
ଶ୍ରୀମନ୍ଦିର ଉପରେ ରାଧାରାଣୀଙ୍କ ଅଭିଶାପ ରହିଛି । ରାଧାରାଣୀ ଶ୍ରୀକୃଷ୍ଣଙ୍କୁ ଜଗନ୍ନାଥଙ୍କ ରୂପରେ ଦର୍ଶନ କରିବାକୁ ଯାଉଥିବା ବେଳେ ସେବାୟତ ମାନେ ତାଙ୍କୁ ଅଟକାଇଥିଲେ । ଏହା ମଧ୍ୟ କହିଥିଲେ, ଶ୍ରୀମନ୍ଦିର ଭିତରକୁ ଭଗବାନଙ୍କ ଧର୍ମପତ୍ନୀଙ୍କ ପ୍ରବେଶ ଉପରେ ବାରଣ ରହିଛି । ଆପଣ କିଭଳି ଭିତରକୁ ଆସିଲେ । ଏକଥା ଶୁଣି ରାଧାରାଣୀ ରାଗିଯାଇ ଶ୍ରୀମନ୍ଦିରକୁ ଅଭିଶାପ ଦେଇଥିଲେ ବୋଲି କହିଥିଲେ । ପ୍ରେମୀ ଯୁଗଳ ଶ୍ରୀମନ୍ଦିରକୁ ଯିବାଦ୍ବାରା ସେମାନେ ଭବିଷ୍ଯତରେ ବିବାହ କରିବାରେ ସଫଳ ହେବେ ନାହିଁ ବୋଲି କହିଥିଲେ ଶୁଭଙ୍କର । ଶୁଭଙ୍କର ମିଶ୍ରାଙ୍କ ଶ୍ରୀମନ୍ଦିର ଓ ମହାପ୍ରଭୁଙ୍କ ପ୍ରତି ଏଭଳି ଭୁଲ୍ ଉପସ୍ଥାପନକୁ ନେଇ ଜଗନ୍ନାଥ ପ୍ରେମୀ, ଗବେଷକ ଓ ସେବାୟତଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା । ସିଂହଦ୍ବାର ଥାନାରେ ଏତଲା ମଧ୍ଯ ଦିଆଯାଇଥିଲା । ଏହାପରେ ନିଜ ପୋଷ୍ଟଙ୍କୁ ନେଇ କ୍ଷମା ମାଗିଛନ୍ତି ଶୁଭଙ୍କର ମିଶ୍ରା।
ବିଜୟ ହଜାରେ ଟ୍ରଫି ଖେଳିବାକୁ ମନା କଲେ ବିରାଟ, ଏବେ ବିସିସିଆଇ କରିବ କ’ଣ ?
ବିଜୟ ହଜାରେ ଟ୍ରଫି ଖେଳିବାକୁ ମନା କଲେ ବିରାଟ, ଏବେ ବିସିସିଆଇ କରିବ କ’ଣ ?
ନନ୍ଦିଘୋଷ ବ୍ୟୁରୋ: ଟିମ୍ ଇଣ୍ଡିଆର ଷ୍ଟାର ବ୍ୟାଟର କିଙ୍ଗ କୋହଲିଙ୍କୁ ନେଇ ଆସିଛି ବଡ଼ ଖବର । ଦକ୍ଷିଣ ଆଫ୍ରିକା ବିପକ୍ଷ ପ୍ରଥମ ଦିନିକିଆରେ ଶତକ ଲଗାଇ ତାଙ୍କ ଅବସରକୁ ନେଇ ସମାଲୋଚନା କରୁଥିବା ଲୋକଙ୍କ ମୁହଁ ବନ୍ଦ କରି ଦେଇଥିବା କୋହଲି ଏବେ ବିଜୟ ହଜାରେ ଟ୍ରଫିକୁ ନେଇ ମୁହଁ ଖୋଲିଛନ୍ତି । ଡିସେମ୍ବର ୨୪ ତାରିଖରୁ ଆରମ୍ଭ ହେଉଥିବା ବିଜୟ ହଜାରେ ଟ୍ରଫିରେ ଖେଳିବାକୁ ମନା କରି ଦେଇଛନ୍ତି କିଙ୍ଗ କୋହଲି । ଏହି ଟୁର୍ଣ୍ଣାମେଣ୍ଟରେ ଖେଳିବାକୁ ତାଙ୍କୁ ଏବଂ ହିଟ୍ ମ୍ୟାନ ରୋହିତ ଶର୍ମାଙ୍କୁ କୁହାଯାଇଥିଲା । ଶୁଣିବାକୁ ମିଳୁଥିଲା ୧୬ ବର୍ଷ ପରେ କୋହଲି ଘରୋଇ ଟୁର୍ଣ୍ଣାମେଣ୍ଟକୁ ଫେରିବା ସହ କିଛି ମ୍ୟାଚ୍ ଖଳି ପାରନ୍ତି ।
କୋହଲିଙ୍କ ନିଷ୍ପତ୍ତି, ବିସିସିଆଇ ପାଇଁ ଚ୍ୟାଲେଞ୍ଜ
ଘରୋଇ କ୍ରିକେଟକୁ ନେଇ କୋହଲିଙ୍କ ଷ୍ଟାଣ୍ଡ ବିସିସିଆଇ ପାଇଁ ନୂଆ ଚ୍ୟାଲେଞ୍ଜ ସୃଷ୍ଟି କରିଛି । ରିପୋର୍ଟ ଅନୁସାରେ, ବିଜୟ ହଜାରେ ଟ୍ରଫି ଖେଳିବା ମୁଡ଼ରେ ନାହାନ୍ତି ବିରାଟ । ଏହି ଟୁର୍ଣ୍ଣାମେଣ୍ଟ ସମସ୍ତ ଭାରତୀୟ ଖେଳାଳିଙ୍କୁ ଖେଳିବା ଅନିବାର୍ଯ୍ୟ । ହେଲେ କୋହଲି ଏଥିରେ ଅଂଶଗ୍ରହଣ କରିବାକୁ ମନା କରିଦେଇଛନ୍ତି । ବିସିସିଆଇ ଚାହୁଁଛି, ବିରାଟ ଓ ରୋହିତ ଏହି ଟୁର୍ଣ୍ଣାମେଣ୍ଟ ଖଳନ୍ତୁ ।
ରୋହିତ ଏଥିରେ ଖେଳିବାକୁ ପୂର୍ବରୁ ହଁ ଭରି ସାରିଛନ୍ତି । ଏମିତି ସ୍ଥିତିରେ କୋହଲି ଖେଳିବାକୁ ମନା କରିବା ପରେ ତାଙ୍କୁ ବିଶେଷ କରି ଏଥିରୁ ବାଦ ଦେବା ବିସିସିଆଇ ପାଇଁ ଆହୁରି ଚ୍ୟାଲେଞ୍ଜ ଭରା ହୋଇଯାଇଛି । ମିଳିଥିବା ତଥ୍ୟ ଅନୁସାରେ, ବିରାଟ ଏହି ଟୁର୍ଣ୍ଣାମେଣ୍ଟ ଖେଳିବାକୁ ହିଁ ଚାହୁଁ ନାହାନ୍ତି । ରୋହିତ ଖେଳିବାକୁ ସହମତି ଦେବା ଓ ବିରାଟ ମନା କରିବା ସ୍ଥିତିକୁ ଜଟିଳ କରିଦେଇଛି । ଏବେ ବିସିସିଆଇ ଅନ୍ୟ ଖେଳାଳିଙ୍କୁ କି ଜବାବ ଦେବ ତାକୁ ନେଇ ଚିନ୍ତାରେ ପଡ଼ିଛି ।
୧୬ ବର୍ଷ ପୂର୍ବେ ଖେଳିଥିଲେ ଘରୋଇ ମ୍ୟାଚ୍
ବିରାଟ ଶେଷ ବିଜୟ ହଜାରେ ଟ୍ରଫି ୧୬ ବର୍ଷ ପୂର୍ବେ ୨୦୧୦ରେ ଖେଳିଥିଲେ । ୨୦୦୮ରୁ ୨୦୧୦ ପର୍ଯ୍ୟନ୍ତ ଦିଲ୍ଲୀ ପାଇଁ ବିଜୟ ହଜାରେ ଟ୍ରଫି ଖେଳିଥିଲେ ବିରାଟ । ଏହି ସମୟରେ ସେ ୧୩ ମ୍ୟାଚ୍ ଖେଳି ୮୧୯ ରନ୍ କରିଛନ୍ତି । ଏଥିରେ ୪ଟି ଶତକ ରହିଛି । ତେବେ ଗତବର୍ଷ ତାଙ୍କୁ ରଣଜୀ ଟ୍ରଫିରେ ଦେଖିବାକୁ ମିଳିଥିଲା । ଦିଲ୍ଲୀ ପାଇଁ ସେ ଗୋଟିଏ ମ୍ୟାଚ୍ ଖେଳିଥିଲେ ।
ରାଜସ୍ଥାନର ଶ୍ରୀଗଙ୍ଗା ନଗରରୁ ଧରାପଡ଼ିଲା ପାକିସ୍ତାନୀ ଗୁପ୍ତଚର
ନନ୍ଦିଘୋଷ ବ୍ୟୁରୋ : ରାଜସ୍ଥାନର ଶ୍ରୀଗଙ୍ଗା ନଗରରୁ ଧରାପଡ଼ିଛି ଜଣେ ପାକିସ୍ତାନୀ ଗୁପ୍ତଚର । ତା ନାଁ ହେଲା ପ୍ରକାଶ ସିଂହ ଓରଫ ବାଦଲ। ରାଜସ୍ଥାନ ସିଆଇଡି ତାକୁ ଗିରଫ କରିଛି। ତାକୁ ଜୟପୁରର ସିନିୟର ସିଭିଲ ଜଜ୍ ଓ ଚିଫ୍ ଜୁଡ଼ିସିଆଲ ମାଜିଷ୍ଟ୍ରେଟଙ୍କ କୋର୍ଟରେ ହାଜର କରାଯାଇଥିଲା। ପ୍ରକାଶ ନାଁରେ ଲାଗିଛି ଦେଶଦ୍ରୋହ ପରି ସଂଗୀନ ମାମଲା। ସେ ଏୟାରଟେଲ୍ ପେମେଣ୍ଟ ବ୍ୟାଙ୍କରେ କାମ କରୁଥିଲା। ସେନା, ଟ୍ୟାଙ୍କ, ଗାଡ଼ି ସଂପର୍କିତ ତଥ୍ୟ ତା ଫୋନରୁ ମିଳିଛି। ଆଉ କେତେକ ଗୁରୁତ୍ଵପୂର୍ଣ୍ଣ ତଥ୍ୟ ମଧ୍ୟ ମିଳିଛି। ପାକିସ୍ତାନକୁ ସେ କେଉଁ ତଥ୍ୟ ଦେଇଛି, ତାର ଖୋଳତାଡ଼ ଚାଲିଛି। ଅଧିକ ପଚରା ଉଚରା ପାଇଁ ସିଆଇଡି ୧୦ ଦିନିଆ ରିମାଣ୍ଡରେ ନେଇଛି । ୧୧ ତାରିଖରେ ରିମାଣ୍ଡ ସରିବ। ସେତେ ଦିନ ଯାଏ ତାକୁ ଘନ ଘନ ଜେରା କରି ତଥ୍ୟ ବାହାର କରିବ ସିଆଇଡି।
ବିରୋଧୀଙ୍କ ଚାପରେ ମୁଣ୍ଡ ନୋଇଁଲେ କେନ୍ଦ୍ର ସରକାର ; ୯ରେ SIR ଆଲୋଚନା
ନନ୍ଦିଘୋଷ ବ୍ୟୁରୋ : ବିରୋଧୀ ଦଳର ଚାପରେ ମୁଣ୍ଡ ନୋଇଁଲେ କେନ୍ଦ୍ର ସରକାର। ଆସନ୍ତା ୯ରେ ଲୋକସଭାରେ ହେବ ଏସଆଇଆର ପ୍ରସଙ୍ଗରେ ଆଲୋଚନା। ଅନୁଷ୍ଠିତ ସର୍ବଦଳୀୟ ବୈଠକରେ ଏନେଇ ହୋଇଛି ନିଷ୍ପତ୍ତି। ଲୋକସଭାରେ ୧୦ ଘଣ୍ଟା ଧରି ଚାଲିବ ଆଲୋଚନା। ହରିଆଣା, ବିହାର ସମେତ ବିଭିନ୍ନ ରାଜ୍ୟରେ ବିଧାନସଭା ନିର୍ବାଚନ ଭୋଟ ଗଡ଼ବଡ଼ି ନେଇ ବିରୋଧୀ ଅଭିଯୋଗ ଆଣୁଛନ୍ତି। ଏସଆଇଆର ପ୍ରସଙ୍ଗରେ ସଂସଦରେ ତୀବ୍ର ହଟ୍ଟଗୋଳ ସୃଷ୍ଟି ହେଉଛି। ଯଦି ବିରୋଧୀ ଦଳ ହଟ୍ଟଗୋଳ ଜାରି ରଖିବେ ତେବେ ଆଲୋଚନା ସମ୍ଭବ ନୁହେଁ ବୋଲି କହିଛନ୍ତି ସରକାର। ସେପଟେ ଆସନ୍ତା ୮ରେ ବନ୍ଦେ ମାତରଂ ସଂଗୀତର ୧୫୦ତମ ବାର୍ଷିକୀ ପାଳନ ପରେ ଏସଆଇଆର ପ୍ରସଙ୍ଗରେ ଆଲୋଚନା ହେବ। ଏହା ସହ ବିଏଲଓ ଆତ୍ମହତ୍ଯା ପ୍ରସଙ୍ଗକୁ ବି ବିରୋଧୀ ଉଠାଇବେ ବୋଲି ସୂଚନା ମିଳିଛି।
୧ରୁ ସଂସଦ ଅଧିବେଶନ ଆରମ୍ଭ ଦିନଠାରୁ ଏସଆଇଆର ପ୍ରସଙ୍ଗରେ ଉଭୟ ଲୋକସଭା ଓ ରାଜ୍ୟସଭାରେ ହଙ୍ଗାମା ଜାରି ରହିଛି। ଏହି ପ୍ରସଙ୍ଗରେ ସରକାରଙ୍କୁ ଘେରିଛନ୍ତି ବିରୋଧୀ। ଆଣ୍ଡାମାନ ନିକୋବର ଦ୍ବୀପପୁଞ୍ଜ, ଛତିଶଗଡ଼, ଗୋଆ, ଗୁଜରାଟ, କେରଳ, ଲାକ୍ଷାଦ୍ବୀପ, ମଧ୍ୟପ୍ରଦେଶ, ପୁଡୁଚେରୀ, ରାଜସ୍ଥାନ, ତାମିଲନାଡୁ, ଉତ୍ତରପ୍ରଦେଶ ଓ ପଶ୍ଚିମବଙ୍ଗରେ ଏସଆଇଆର ପ୍ରକ୍ରିୟା ଜାରି ରହିଛି। ଏହି ପ୍ରକ୍ରିୟାରେ ସ୍ବଚ୍ଛତା ଆଣିବା ସହ ସ୍ବତନ୍ତ୍ର ଆଲୋଚନା ଲାଗି ଦାବି କରିଆସୁଛନ୍ତି ବିରୋଧୀ।
ଇମ୍ରାନଙ୍କୁ ନେଇ ବଡ଼ ଖବର: ଜେଲରେ ଭେଟିଲେ ଭଉଣୀ, କହିଲେ- ସୁସ୍ଥ ଅଛନ୍ତି
ଇମ୍ରାନଙ୍କୁ ନେଇ ବଡ଼ ଖବର: ଜେଲରେ ଭେଟିଲେ ଭଉଣୀ, କହିଲେ- ସୁସ୍ଥ ଅଛନ୍ତି
ନନ୍ଦିଘୋଷ ବ୍ୟୁରୋ: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ନେଇ ଆସିଛି ବଡ଼ ଖବର । ଆଦିୟାଲା ଜେଲରେ ଇମ୍ରାନ ସୁସ୍ଥ ଥିବା ଜଣାପଡିଛି । ଜେଲରେ ତାଙ୍କୁ ଆଜି ଭଉଣୀ ଉଜମା ଭେଟିବା ପରେ ଏହା କହିଛନ୍ତି । ତେବେ ତାଙ୍କୁ ଜେଲରେ ମାନସିକ ସ୍ତରରେ ନିର୍ଯାତନା ଦିଆଯାଉଥିବା ସେ କହିଛନ୍ତି । ଏହାସହ ପାକିସ୍ତାନ ସେନା ମୁଖ୍ୟ ଅସୀମ ମୁନିରଙ୍କ ନିର୍ଦ୍ଦେଶରେ ତାଙ୍କୁ ନିର୍ଯାତନା ଦିଆଯାଉଥିବା ସେ ଅଭିଯୋଗ କରିଛନ୍ତି ।
ସୂଚନାଯୋଗ୍ୟ, ଜେଲରେ ଇମ୍ରାନଙ୍କୁ ହତ୍ୟା କରାଯାଇଥିବା ନେଇ ଆଫଗାନିସ୍ତାନ ମିଡ଼ିଆ ଦାବି କରିବା ପରେ ପାକିସ୍ତାନରେ ଭୟଙ୍କର ପରିସ୍ଥିତି ସୃଷ୍ଟି ହୋଇଥିଲା । ସାରା ବିଶ୍ବର ନଜର ପାକିସ୍ତାନ ଉପରେ ଥିଲା । ଇମ୍ରାନଙ୍କ ସମର୍ଥକ ତଥା ପିଟିଆଇ ସଦସ୍ୟମାନେ ରାସ୍ତାକୁ ଓହ୍ଲାଇ ଥିଲେ । ସେମାନଙ୍କ ସହ ଇମ୍ରାନଙ୍କ ତିନି ଭଉଣୀ ମଧ୍ୟ ସାମିଲ ହୋଇଥିଲେ । ଆଦିୟାଲା ଜେଲ ଆଗରେ ଇମ୍ରାନଙ୍କୁ ଭେଟିବା ଦାବିରେ ଆନ୍ଦୋଳନ ବେଳେ ତାଙ୍କ ଉଭଣୀ ଓ ସମର୍ଥକ ଆକ୍ରମଣର ବି ଶିକାର ହୋଇଥିଲେ । ଏପରିକି ବିଦେଶରେ ଥିବା ଇମ୍ରାନଙ୍କ ସାନ ପୁଅ ବାପା ଜୀବିତ ଥିବାର ପ୍ରମାଣ ମାଗିବା ସହ ଅନ୍ୟ ଦେଶର ରାଷ୍ଟ୍ରନେତାଙ୍କୁ ଏଥିରେ ହସ୍ତକ୍ଷେପ ପାଇଁ ଅନୁରୋଧ କରିଥିଲେ ।
ଇମ୍ରାନଙ୍କ ସ୍ବାସ୍ଥ୍ୟ ଠିକ୍ ଅଛି
ଜେଲରେ ଉଜମା ଇମ୍ରାନଙ୍କୁ ଭେଟିବା ସହ ତାଙ୍କ ସହ ପ୍ରାୟ ୨୦ ମିନିଟ କଥା ହୋଇଥିଲେ । ଏହାପରେ ସେ ବାହାରକୁ ଆସି ଇମ୍ରାନଙ୍କୁ ନେଇ ସୂଚନା ଦେଇଥିଲେ । ସେ କହିଥିଲେ, ଇମ୍ରାନଙ୍କ ସ୍ବାସ୍ଥ୍ୟ ଠିକ୍ ଅଛି । ହେଲେ ତାଙ୍କୁ ଏକୁଟିଆ ରଖାଯାଇଛି । ଜେଲରେ ତାଙ୍କୁ ମାନସିକ ସ୍ତରରେ ହଇରାଣ କରାଯାଉଛି । ସୂଚନାଯୋଗ୍ୟ, ଶେଷ ଥର ଇମ୍ରାନଙ୍କୁ ନେଇ ୪ ନଭେମ୍ବରରେ ସୂଚନା ଆସିଥିଲା । ସେତେବେଳେ ତାଙ୍କୁ ତାଙ୍କ ଭଉଣୀ ଅଲିମା ଭେଟିଥିଲେ । ଏହାପରେ ତାଙ୍କ ସ୍ବାସ୍ଥ୍ୟକୁ ନେଇ ନାନା କଥା ଶୁଣିବାକୁ ମିଳୁଥିଲା ।
ମାନସିକ ନିର୍ଯାତନା ଦିଆଯାଉଛି
ଉଜମା କହିଛନ୍ତି, ଇମ୍ରାନ ବହୁତ ରାଗରେ ଥିଲେ । ତାଙ୍କୁ ଜେଲରେ ମାନସିକ ନିର୍ଯାତନା ଦିଆଯାଉଛି । ପୂରା ଦିନ ଗୋଟିଏ କୋଠରୀରେ ତାଙ୍କୁ ବନ୍ଦ କରି ରଖାଯାଉଛି । ତାଙ୍କ ସହ କାହାରିଙ୍କୁ କଥା ହେବାକୁ ଦିଆଯାଉନି । ଏ ସବୁ ସେନା ମୁଖ୍ୟ ମୁନିର ନିର୍ଦ୍ଦେଶରେ ହେଉଥିବା ସେ ଅଭିଯୋଗ କରିଛନ୍ତି ।