ନନ୍ଦିଘୋଷ ବ୍ୟୁରୋ : ବିହାର ବିଧାନସଭା ନିର୍ବାଚନ ମୁଣ୍ଡ ଉପରେ । ସେପଟେ ଆଜି ପାଟନାରେ କଂଗ୍ରେସର ମେଗାସମାବେଶ। ଭୋଟ ଚୋରି ବିରୋଧରେ ଅଭିଯାନ ପରିପ୍ରେକ୍ଷୀରେ ଏହି ରାଲିର ଆୟୋଜନ କରାଯାଇଛି। ଗାନ୍ଧି ମଇଦାନରେ ହେବାକୁ ଥିବା ସମାବେଶରେ ସାମିଲ ହେବେ ବିରୋଧୀ ଦଳ ନେତା ରାହୁଲ ଗାନ୍ଧି, ଆରଜେଡି ନେତା ତେଜସ୍ବୀ ଯାଦବଙ୍କ ସମେତ ବିଭିନ୍ନ ଦଳର ବହୁ ନେତା । ଏହି ରାଲି ଗତ ଅଗଷ୍ଟ ୧୭ରୁ ସାସାରାମରୁ ଆରମ୍ଭ ହୋଇଥିଲା। ପରେ ଏହା କୁଟୁମ୍ବା, ଔରାଙ୍ଗାବାଦ, ପୁନାମା ନବାଦା, ସିକନ୍ଦର, ଜାମୁଇ, ମୁଙ୍ଗେର, ସୁଲତାନଗଞ୍ଜ, ଭାଗଲପୁର, ପୂର୍ଣ୍ଣିଆ, ଦରଭଙ୍ଗା, ସୀତାମଢ଼ି, ପଶ୍ଚିମ ଚମ୍ପାରନ, ଆରା ଦେଇ ପାଟନାରେ ପହଞ୍ଚିଥିଲା। ୧୬ ଦିନର ଏହି ଯାତ୍ରା ୨୦ ଜିଲ୍ଲା ଦେଇ ୧୩ଶହ କିଲୋମିଟର ରାସ୍ତା ଅତିକ୍ରମ କରିଥିଲା। ପ୍ରାୟ ୧୧୦ ବିଧାନସଭା ନିର୍ବାଚନ ମଣ୍ଡଳୀ ଦେଇ ଏହି ଯାତ୍ରା ଯାଇଥିଲା। ସ୍ବଚ୍ଛ ଭୋଟର ତାଲିକା ଓ ଅବାଧ ନିର୍ବାଚନ ଲାଗି ଜନସାଧାରଣଙ୍କୁ ସାମିଲ କରିବା ନିମନ୍ତେ କଂଗ୍ରେସ votechori.in ପୋର୍ଟାଲ ଲଞ୍ଚ କରିଥିଲା। ଏହି ପୋର୍ଟାଲରେ ନିଜର ମତ ଉପସ୍ଥାପନ କରିବା ଲାଗି ଆହ୍ବାନ ଦିଆଯାଇଥିଲା ।
ଆଜି ପୁଟିନଙ୍କୁ ଚୀନ ତିଆନଜିନରେ ଭେଟିବେ ମୋଦି
ନନ୍ଦିଘୋଷ ବ୍ୟୁରୋ : ଆଜି ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଚୀନ ତିଆନଜିନରେ ଭେଟିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ରୁଷରୁ ତୈଳ ଆମଦାନୀକୁ କେନ୍ଦ୍ର କରି ଭାରତ ଉପରେ ଆମେରିକାର ୫୦ ପ୍ରତିଶତ ଟାରିଫ ଲାଗୁ ପରେ ପ୍ରଥମ ଥର ଲାଗି ପୁଟିନଙ୍କ ସହ ମୋଦିଙ୍କ ହେବ ଭେଟଘାଟ। ପୂର୍ବରୁ ଗତ ଶନିବାର ଯୁଦ୍ଧ ପ୍ରସଙ୍ଗରେ ୟୁକ୍ରେନ ରାଷ୍ଟ୍ରପତି ଭୋଲୋଦିମିର ଜେଲେନସ୍କିଙ୍କ ସହ ଆଲୋଚନା କରିଥିଲେ ମୋଦି। ଗତକାଲି ସାଂଘାଇ ସହଯୋଗ ସମ୍ମିଳନୀ ଅବସରରେ ତିଆନଜିନରେ ଚୀନ ରାଷ୍ଟ୍ରପତି ସି ଜିନପିଙ୍ଗ ଓ ପ୍ରଧାନମନ୍ତ୍ରୀ ମୋଦିଙ୍କ ମଧ୍ୟରେ ବିଭିନ୍ନ ପ୍ରସଙ୍ଗରେ ହୋଇଥିଲା ସହମତି। ସୀମାଗତ ସଂହତି, ଆକ୍ରମଣଠାରୁ ଦୂରରେ ରହିବା, ସମାନତା, ପାରସ୍ପରିକ ସହଭାଗିତା ଓ ଶାନ୍ତିପୂର୍ଣ୍ଣ ସହାବସ୍ଥାନ ଉପରେ ଦୁଇ ନେତା ଗୁରୁତ୍ବ ଦେଇଥିଲେ। ସୀମାରେ ଶାନ୍ତିଠାରୁ ଆରମ୍ଭ କରି କୈଳାସ ମାନସରୋବର ଯାତ୍ରା ଆଦି ଅନେକ ପ୍ରସଙ୍ଗରେ ଆଲୋଚନା ହୋଇଥିଲା।
ମହାପ୍ରଭୁଙ୍କ ଦିବ୍ୟ ଦର୍ଶନ କରାଇବା ନାଁରେ ମାତିଛନ୍ତି ଠକ, ଇଣ୍ଡିଆ ଥ୍ରୀଲ୍ସ ୱେବସାଇଟରେ ବିଜ୍ଞାପନ
ନନ୍ଦିଘୋଷ ବ୍ୟୁରୋ: ମହାପ୍ରଭୁ ଜଗନ୍ନାଥଙ୍କୁ ନେଇ ସାଇବର ଆରେଷ୍ଟ କରିବାକୁ ମାତିଲେଣି ଠକ । ଅନଲାଇନ ମାଧ୍ୟମରେ ଟଙ୍କା ଦେଇ ଶ୍ରୀମନ୍ଦିରରେ କରାଇ ଦେବେ ଦର୍ଶନ । ଇଣ୍ଡିଆ ଥ୍ରୀଲସ ନାମକ ଏକ ଓ୍ବେବସାଇଟ ଓ ପୂଜା ଆପ ନାଁରେ ଦର୍ଶନ ସହ ପ୍ରସାଦ ପ୍ରଦାନ ନେଇ ଭକ୍ତଙ୍କୁ ଲୁଟିବାକୁ କରାଯାଉଛି ଉଦ୍ୟମ । ଏ ନେଇ ବିଧିବଦ୍ଧ ଗୁଗୁଲ ସର୍ଚ୍ଚ ଇଞ୍ଜିନରେ ଦେଖିବାକୁ ମିଳୁଛି ବିଜ୍ଞାପନ । ଯାହାକୁ ନେଇ ସେବାୟତ ଓ ବୁଦ୍ଧିଜୀବୀ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ଏଭଳି ଠକ ସଂସ୍ଥାଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନେବାକୁ ଦାବି ଉଠିଛି । ଘଟଣାକୁ ପୁରୀ ପୋଲିସ ଗମ୍ଭୀରତା ସହ ଅନୁଧ୍ୟାନ କରୁଥିବା କହିଛି ଜିଲ୍ଲା ପୋଲିସ ପ୍ରଶାସନ ।
ପୁରୀରେ ଜଗନ୍ନାଥଙ୍କ ଦର୍ଶନ କରିବାକୁ ଚାହୁଁଛନ୍ତି । ଅନଲାଇନ୍ରେ ୫୦ ଟଙ୍କା ଦେଇ ବୁକିଂ କରନ୍ତୁ । ବିନା ଭିଡ଼ରେ ଭିଆଇପିଙ୍କ ଭଳି ଦର୍ଶନ ପାଇବେ ଓ ଆଉ ପ୍ରସାଦ ବି ମିଳିବ । ଆପଣ ଇଣ୍ଟରନେଟ ଗୁଗୁଲ ସର୍ଚ୍ଚ କଲା ବେଳେ ଏପରି କିଛି ବିଜ୍ଞାପନ ଦେଖୁଛନ୍ତି କି ? ତା’ହେଲେ ହୋଇଯାନ୍ତୁ ସାବଧାନ । ଜଗନ୍ନାଥଙ୍କୁ ନେଇ ଶ୍ରଦ୍ଧାଳୁଙ୍କ ଭାବାବେଗ ସହ ଜାଲିଆତି କରି ଏବେ ଠକ ମାତିଛନ୍ତି । ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନ ସମ୍ପୂର୍ଣ୍ଣ ନିଃଶୁଳ୍କ ବା ମାଗଣା । କିନ୍ତୁ ଆଜିକାଲି ଗୁଗୁଲ ଖୋଲିଲେ ଦେଖିବାକୁ ମିଳୁଛି ଇଣ୍ଡିଆ ଥ୍ରିଲସ ଓ୍ବେବସାଇଟ । ଭକ୍ତଙ୍କୁ ସୁବିଧାରେ ଦର୍ଶନ କରାଇଦେବା ପ୍ରଲୋଭନ ଦେଖାଇ ଠକ ଓ୍ବେବସାଇଟରେ ଦର୍ଶନ ପାଇଁ ଅନଲାଇନରେ ୫୦ ଟଙ୍କାରୁ ୫୦୦ ଟଙ୍କା ପର୍ଯ୍ୟନ୍ତ ରେଟ ଚାର୍ଟ ଦିଆଯାଇଛି । ଯିଏ ଅନଲାଇନରେ ଟଙ୍କା ଦେଲା ଫସିଲା । ଆଉ ଡିଜିଟାଲ ଆରେଷ୍ଟର ଶିକାର ହେଲା । ଏପରିକି ଜାଲ ଓ୍ବେବସାଇଟରେ ତଥ୍ୟ ଦିଆଯାଇଛି ସକାଳ ୭ଟାରୁ ଦିନ ୧୨ଟା । ଅପରାହ୍ନ ୪ଟାରୁ ରାତି ୮ଟା ମଧ୍ୟରେ ରହିଛି ଶ୍ରୀଜିଉଙ୍କ ସ୍ବତନ୍ତ୍ର ଦର୍ଶନ ବ୍ୟବସ୍ଥା । ଫେକ ଓ୍ବେବସାଇଟରେ ଜଗନ୍ନାଥ ମନ୍ଦିର,ଏହାର ଇତିହାସ ଓ ଦର୍ଶନକୁ ନେଇ ତଥ୍ୟ ରହିଛି । ଏପରିକି ଶୀଘ୍ର ଦର୍ଶନ ପାଇଁ ୧୦୦ ଟଙ୍କା, ଭିଆଇପି ଦର୍ଶନ ପାଇଁ ୫୦୦ ଟଙ୍କା, ରାତ୍ରି ଦର୍ଶନ ପାଇଁ ୫୦ ଟଙ୍କା ଦର୍ଶାଯାଇଛି । ଯାହାକୁ ନେଇ ସେବାୟତମାନେ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି ।
କେବଳ ସେତିକି ନୁହେଁ, ଅନଲାଇନରେ ମଧ୍ୟ ମହାପ୍ରଭୁଙ୍କ ପୂଜା ଓ ପ୍ରସାଦ ପ୍ରଦାନ ନେଇ ବିଜ୍ଞାପନ ପ୍ରକାଶ ପାଇଥିବା ଦେଖିବାକୁ ମିଳିଛି । ପୂଜା ପରି ସେବା ନାମକ ଏକ ଆପ୍ ମାଧ୍ୟମରେ ବିଜ୍ଞାପନ ଦିଆଯାଇଥିବା ଦେଖିବାକୁ ମିଳିଛି । ଚାରି ପ୍ରକାରର ପୂଜା ପାଇଁ ଅଲଗା ଅଲଗା ପ୍ରକାର ମୂଲ୍ୟ ରହିଥିବା ବେଳେ ଏହି ଘଟଣାକୁ ନେଇ ବୁଦ୍ଧିଜୀବୀ ମହାଲରେ ଅସନ୍ତୋଷ ପ୍ରକାଶ ପାଇଛି । ଅନଲାଇନ ମାଧ୍ୟମରେ ବାରମ୍ବାର ଭକ୍ତଙ୍କୁ ଠକେଇ ଘଟଣାକୁ ନେଇ ପୋଲିସ ଗୁରୁତର ସହ ନେଇଥିବା ବେଳେ ସାଇବର ବିଶେଷଜ୍ଞଙ୍କ ଦ୍ଵାରା ଘଟଣାର ପୁଙ୍ଖାନୁପୁଙ୍ଖ ତଦନ୍ତ କରାଯିବ ବୋଲି ଏସପି ସୂଚନା ଦେଇଛନ୍ତି ।
ପୁରୀ ଶ୍ରୀମନ୍ଦିର ସମସ୍ତ ଭକ୍ତଙ୍କ ପାଇଁ ଖୋଲା । ଦର୍ଶନ ପାଇଁ କେବେ ବି ଅର୍ଥ ନିଆଯାଏନି । ଦେଶର ଅନ୍ୟସବୁ ମନ୍ଦିରଠାରୁ ଅନନ୍ୟ ପୁରୀ ଶ୍ରୀମନ୍ଦିରକୁ ନେଇ ଯେପରି ଭାବେ ଠକ ସଂସ୍ଥା ମାତିଲେଣି ସେମାନଙ୍କୁ ସାବାଡ଼ କରିବାକୁ ରାଜ୍ୟ ସରକାର, ଶ୍ରୀମନ୍ଦିର ପ୍ରଶାସନ ଓ ପୋଲିସ ତୁରନ୍ତ ପଦକ୍ଷେପ ନ ନେଲେ କୋଟି କୋଟି ଭକ୍ତ ନିରାଶ ହେବେ ତାହା ଏବେଠୁ ଜଳ ଜଳ ଦିଶିଲାଣି ।
ଟ୍ରିବ୍ୟୁନାଲ ନୁହେଁ, ଆପୋସ ଆଲୋଚନାରେ ହେବ ମହାନଦୀ ବିବାଦର ସମାଧାନ । ବିରୋଧୀଙ୍କ ସ୍ଵାଗତ, ଏଜେଣ୍ଡା ଉପରେ ବିଜେଡିର ନଜର
ନନ୍ଦିଘୋଷ ବ୍ୟୁରୋ: ମହାନଦୀ ବିବାଦର ସମାଧାନ ଆପୋଷ ଆଲେଚନା ମାଧ୍ୟମରେ ହେବ । ଓଡ଼ିଶା ଓ ଛତିଶଗଡ଼ ମଧ୍ୟରେ ମହାନଦୀକୁ ନେଇ ଲାଗି ରହିଥିବା ବିବାଦର ସମାଧାନ ପାଇଁ ଦୁଇ ରାଜ୍ୟର ମୁଖ୍ୟମନ୍ତ୍ରୀ ଡିସେମ୍ବର ମାସରେ ଏକାଠି ବସିବେ । ଏହା ପୂର୍ବରୁ ଅକ୍ଟୋବର ମାସରେ ଦୁଇ ରାଜ୍ୟ ମୁଖ୍ୟ ସଚିବମାନଙ୍କ ବୈଠକ ହେବାର ଅଛି । ଏଭଳି ଏକ ସମ୍ଭାବନା ଦେଖା ଦେଇଥିବା ବେଳେ ଏହାକୁ ସବୁ ଦଳ ସ୍ବାଗତ କରିଛନ୍ତି । ସବୁ ଦଳ ଏକାଠି ହୋଇ ମହାନଦୀ ବିବାଦର ସମାଧାନ ପାଇଁ ଅଣ୍ଟା ଭିଡ଼ିବାକୁ ବିଜେପି ରାଜ୍ୟ ସଭାପତି ଆହ୍ବାନ ଦେଇଛନ୍ତି । ବିଜେଡ଼ି ଓ କଂଗ୍ରେସ ଆଲୋଚନାକୁ ସ୍ବାଗତ କରିଥିଲେ ମଧ୍ୟ ଏହାର ସଫଳତାକୁ ନେଇ ପ୍ରଶ୍ନ ଉଠାଇଛନ୍ତି । ମହାନଦୀ ବଞ୍ଚାଅ ଅଭିଯାନ ଆପୋଷ ଆଲୋଚନାରେ ବିଭିନ୍ନ ସଙ୍ଗଠନକୁ ସାମିଲ କରିବାକୁ ଦାବି ରଖିଛି ।
ଓଡ଼ିଶା ଓ ଛତିଶଗଡ଼ର ମୁଖ୍ୟମନ୍ତ୍ରୀ-ମୁଖ୍ୟସଚିବ ଏକାଠି ବସିବେ । କାହାର ସମସ୍ୟା କେତେ ଗୁରୁତର ଆଲୋଚନା ହେବ ଓ ସମାଧାନ ବାଟ ବାହରିବ । ମୁଖ୍ୟମନ୍ତ୍ରୀ ସ୍ତରୀୟ ଆଲୋଚନା ପୂର୍ବରୁ ରାଜ୍ୟର ସବୁ ଦଳ ଏକାଠି ହୋଇ ସମାଧାନର ବାଟ ବାହର କରିବାକୁ ବିଜେପି ରାଜ୍ୟ ସଭାପତି କହିଛନ୍ତି । କେନ୍ଦ୍ର ଗୃହମନ୍ତ୍ରୀଙ୍କ ଉଦ୍ୟମରେ ମହାନଦୀ ବିବାଦର ଆପୋଷ ସମାଧାନ ପାଇଁ ପ୍ରକ୍ରିୟା ଆରମ୍ଭ ହୋଇଛି । ସମାଧାନର ବାଟ ଶୀଘ୍ର ବାହାରିବ ବୋଲି ମନମୋହନ ସାମଲ କହିଛନ୍ତି । ଆପୋଷ ଆଲୋଚନାକୁ ମହାନଦୀ ବଞ୍ଚାଅ ଅଭିଯାନ ସ୍ବାଗତ୍ କରିଥିବା ବେଳେ ଏଥିରେ ମହାନଦୀ ଉପରେ ନିର୍ଭରଶୀଳ ସମସ୍ତ ପକ୍ଷ ଓ ମହାନଦୀ ପାଇଁ କାମ କରୁଥିବା ବିଭିନ୍ନ ସଙ୍ଗଠନକୁ ସାମିଲ କରିବାକୁ ଦାବି କରିଛି ।
ଆପୋଷ ଆଲୋଚନାକୁ କଂଗ୍ରେସ ଓ ବିଜେଡ଼ି ସ୍ବାଗତ କରିଥିଲେ ମଧ୍ୟ ଏହାର କାର୍ଯ୍ୟକାରିତାକୁ ନେଇ ପ୍ରଶ୍ନ ଉଠାଇଛନ୍ତି । କେବଳ ଆଲୋଚନାରେ କାର୍ଯ୍ୟକ୍ରମ ପରିସମାପ୍ତି ହେଇ ନଯାଉ । ମହାନଦୀ ସମସ୍ୟାର ସମାଧାନ ପାଇଁ କେନ୍ଦ୍ର ଓ ରାଜ୍ୟ ସରକାରଙ୍କ ଆନ୍ତରିକତା ନାହିଁ । ଯଦି ମହାନଦୀ ସମସ୍ୟାର ସମାଧାନ ନ ହୁଏ ତେବେ ଆଗାମୀ ଦିନରେ କଂଗ୍ରେସ ମଧ୍ୟ ଆନ୍ଦୋଳନକୁ ଓହ୍ଲାଇବ ବୋଲି ପିସିସି ସଭାପତି ଭକ୍ତଚରଣ ଦାସ କହିଛନ୍ତି । ବିଜେଡ଼ି କହିଛି ନବୀନ ସରକାରରେ ଏହାର ସମାଧାନ ପାଇଁ ଅନେକ ଉଦ୍ୟମ ହୋଇଥିଲା । କେନ୍ଦ୍ର ସରକାରଙ୍କ ହସ୍ତକ୍ଷେପ ପାଇଁ ବାରମ୍ବାର ଚିଠି ଲେଖାଯାଇଥିଲା, ଆନ୍ଦୋଳନ ବି ହୋଇଥିଲା । କିଛି ସୁଫଳ ନ ମିଳିବାରୁ ଆଇନର ସହାୟତା ନିଆଯାଇଥିଲା । ଆଲୋଚନାକୁ ବିଜେଡ଼ି ସ୍ବାଗତ କରିଥିବା ବେଳେ ଏହାର ଏଜେଣ୍ଡା ଓ ସମାଧାନର ବାଟ ଉପରେ ନଜର ରହିବ ବୋଲି କହିଛି ।
ମହାନଦୀ ଉପରମୁଣ୍ଡରେ ଛତିଶଗଡ଼ ବେଆଇନ ଭାବେ ୩୦ଟି ବ୍ୟାରେଜ ଏବଂ ଶତାଧିକ ଆନିକଟ କରିଥିବାରୁ ଓଡ଼ିଶାକୁ ଖରାଦିନେ ଜଳ ପ୍ରବାହରେ ସମସ୍ୟା ହେଉଛି । ୨୦୧୮ରେ ଆନ୍ତଃ-ରାଜ୍ୟ ଜଳ ବିବାଦର ସମାଧାନ ପାଇଁ ମହାନଦୀ ଟ୍ରିବ୍ୟୁନାଲରେ ମାମଲା ଶୁଣାଣୀ ଚାଲିଛି । ସେପ୍ଟେମ୍ବର ୯ରେ ପରବର୍ତ୍ତୀ ଶୁଣାଣୀ ଥିବା ବେଳେ ଆପୋଷ ଆଲୋଚନା ମାଧ୍ୟମରେ ସମାଧାନ ପାଇଁ ଟ୍ରିବ୍ୟୁନାଲ ସବୁଜ ସଙ୍କେତ ଦେଇଥିବା ଜଣାପଡ଼ିଛି ।
ସେପଟେ ନ୍ୟାସନାଲ ୱାଟର ଡେଭଲପମେଣ୍ଟ ଏଜେନ୍ସି NWDA ବୈଠକରେ ଆନ୍ଧ୍ରର ପୋଲଭରମ ବନକଚେର୍ଲା ପ୍ରକଳ୍ପକୁ ତେଲଙ୍ଗାନାର ବିରୋଧ । ତା’ ବଦଳରେ ଇଞ୍ଚମପଲ୍ଲୀ ଗୋଦାବରୀ ଲିଙ୍କ ପ୍ରକଳ୍ପ ପାଇଁ ପ୍ରସ୍ତାବ ଦିଆଯାଇଛି । NWDAର ଷଷ୍ଠ କନସଲଟେଟିଭ ବୈଠକରେ ଏ ପ୍ରସଙ୍ଗରେ ଆଲୋଚନା ବେଳେ ଆନ୍ଧ୍ରକୁ ଚେକ୍ ଦେଇଛି ତେଲେଙ୍ଗାନା । କିନ୍ତୁ ଚୁପ ରହିଛନ୍ତି ଓଡିଶା ସରକାର । ପୋଲଭରମ ସମ୍ପର୍କରେ କୌଣସି ଦାବି କିମ୍ବା ତଥ୍ୟ ଉପସ୍ଥାପିତ କରୁ ନଥିବା ଅଭିଯୋଗ ହୋଇଛି । ପୋଲାଭରମରେ ମାଲକାନଗିରି ଜିଲ୍ଲାର ବହୁ ଆଦିବାସୀ ଜମି, ଭିଟାମାଟି ବୁଡିବା ସହ ଆଦିବାସୀଙ୍କ ଜୀବନ ବିପନ୍ନ ହେବ । କିନ୍ତୁ ଏହାକୁ ନେଇ ସରକାର ଲୋକଙ୍କୁ ଅନ୍ଧକାରରେ ରଖୁଛନ୍ତି । ଏହାକୁ ନେଇ ତେଜିବାରେ ଲାଗିଛି ଅସନ୍ତୋଷ । ଆମ ଜନତା ଅଧିକାର ସଂଗଠନ ମଧ୍ୟ ଆଗକୁ ବଡ଼ ଲଢେଇ ପାଇଁ ପ୍ରସ୍ତୁତ ହେଉଛି । ଆଗକୁ ଆଇନଗତ ପଦକ୍ଷେପ ନିଆଯିବା ସହ ବ୍ୟାପକ ଆନ୍ଦୋଳନ ହେବ ବୋଲି ଚେତାବନୀ ଦିଆଯାଇଛି ।
ନୂଆ NAC, ମ୍ୟୁନସିପାଲଟି ଘୋଷଣାକୁ ବିଜେଡିର କଟାକ୍ଷ, କହିଲା ବିଜେପିର କପି-ପେଷ୍ଟ ଶାସନ
ନନ୍ଦିଘୋଷ ବ୍ୟୁରୋ: ରାଜ୍ୟ ସରକାର ଆଜି ୭ଟି ନୂଆ ମ୍ୟୁନସିପାଲଟି ଓ ୧୬ଟି ନୂଆ ଏନଏସି ଘୋଷଣା କରିଥିବା ବେଳେ ଏହାକୁ କଡ଼ା ସମାଲୋଚନା କରିଛି ବିଜେଡି । ଦଳ ପକ୍ଷରୁ କୁହାଯାଇଛି, ଏହା ହେଉଛି ବିଜେପିର ‘କପି-ପେଷ୍ଟ’ ଶାସନ ।
ସହରୀକରଣର ନୂଆ ଅଭିଯାନ ଅନ୍ତର୍ଗତ ଏନଏସି ଓ ମ୍ୟୁନିସିପାଲିଟି ଘୋଷଣା କଥା ମୁଖ୍ୟମନ୍ତ୍ରୀ ମୋହନ ମାଝୀ କହୁଥିବା ବେଳେ ବାସ୍ତବରେ ଏଥିରେ କୌଣସି ନୂତନତା ନାହିଁ । ଏଥିରୁ ଅଧିକାଂଶ ଘୋଷଣା ପୂର୍ବରୁ ନବୀନ ପଟ୍ଟନାୟକଙ୍କ ନେତୃତ୍ବାଧୀନ ବିଜେଡି ସରକାର ସମୟରେ ହୋଇଥିଲା । ଘୋଷଣା ହୋଇଥିବା ୭ଟି ନୂଆ ମ୍ୟୁନିସିପାଲିଟି ମଧ୍ୟରୁ ୪ଟି ବୌଦ୍ଧ, କରଞ୍ଜିଆ, ଆସ୍କା ଏବଂ ଛତ୍ରପୁରକୁ ନବୀନ ପଟ୍ଟନାୟକ ଫେବୃଆରୀ ୨୦୨୪ରେ ମାନ୍ୟତା ପ୍ରଦାନ ନେଇ ଘୋଷଣା କରିଥିଲେ । ସେହିପରି ଘୋଷଣା ହୋଇଥିବା ୧୬ଟି ନୂଆ ଏନଏସି ମଧ୍ୟରୁ ୭ଟି ନବୀନଙ୍କ ୨୦୨୪ରେ ଘୋଷିତ ତାଲିକା ସହିତ ସମାନ । ଏହା ସ୍ପଷ୍ଟ ଦର୍ଶାଉଛି ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଘୋଷଣାର ଅଧିକାଂଶ କଥା ନୂଆ ନୁହେଁ, ବରଂ ବିଜେଡି ସରକାର ପ୍ରସ୍ତୁତ କରିଥିବା ବିକାଶ ନକ୍ସାର ‘କପି-ପେଷ୍ଟ’ ।
କିଛି ନୂଆ କରିବାକୁ ସମ୍ପୂର୍ଣ୍ଣ ଅକ୍ଷମ ବିଜେପି ସରକାର । ଏଥିପାଇଁ ନା ଦୂରଦୃଷ୍ଟି ଅଛି, ନା ଦୃଢ଼ ସଂକଳ୍ପ । ବିଜେପି ସରକାରର ‘କପି-ପେଷ୍ଟ’ ନୀତିକୁ ଓଡ଼ିଶାବାସୀ ଭଲ ଭାବେ ବୁଝି ସାରିଲେଣି । ଓଡ଼ିଶାର ଦ୍ରୁତ ସହରୀକରଣ ଜରୁରୀ ହେଲେ ଆଜିର ଘୋଷଣାରେ ସେଭଳି କୌଣସି ଗୁରୁତ୍ୱପୂର୍ଣ ଦିଗ ଥିଲା ଭଳି ଜଣାପଡୁନାହିଁ । ୨୦୨୪ରେ ଘୋଷିତ ତାଲିକାରୁ ଏକାଧିକ ନାଁକୁ ଧାର ଆକାରରେ ଆଣି ନୂଆ ତାଲିକାରେ ସାମିଲ କରିବା ସ୍ପଷ୍ଟ ଭାବେ ଦର୍ଶାଉଛି ବିଜେପି ସରକାର ‘ରି-ବ୍ରାଣ୍ଡିଙ୍ଗ‘ରେ ବିଶ୍ଵାସ କରୁଛି । ପ୍ରଶ୍ନ ଉଠୁଛି, ପ୍ରକୃତ କାର୍ଯ୍ୟ କରିବା ଛାଡି କିଭଳି ଶ୍ରେୟ ନିଆଯାଇ ପାରିବ ସେଥିପ୍ରତି ବିଜେପି ସରକାର ଅଧିକ ଧ୍ୟାନ ଦେଉଛି କି ? ଆଜିର ଘୋଷଣାରେ କିଛି ନୂତନତା ନାହିଁ । ଅଧିକାଂଶ ନାଁ ପୂର୍ବ ବିଜେଡି ସରକାର ସମୟରେ ଅନୁମୋଦନ ଲାଭ କରିଥିଲା । ଯାହାକୁ ରାଜନୈତିକ ସ୍ୱାର୍ଥ ପାଇଁ ବିଜେପି ସରକାର ପୁଣି ଥରେ ଘୋଷଣା କରିଛି । ମର୍ମ କଥା ହେଲା, ଓଡ଼ିଶାବାସୀ ପୁଣି ଏକ ‘କପି ପେଷ୍ଟ’ ଅଭିଯାନର ସାକ୍ଷୀ ହୋଇଛନ୍ତି, କୌଣସି ନୂଆ ସହରୀକରଣ ଅଭିଯାନର ନୁହେଁ ।
ରାଜ୍ୟ ସ୍ଵାୟତ୍ତ ଶାସନ ଦିବସରରେ ୭ ସହରକୁ ମ୍ୟୁନିସିପାଲିଟି ମାନ୍ୟତା, ୧୬ ନୂଆ ଏନଏସି ଘୋଷଣା କଲେ ସରକାର
ନନ୍ଦିଘୋଷ ବ୍ୟୁରୋ: ରାଜ୍ୟସ୍ତରୀୟ ସ୍ୱାୟତ୍ତ ଶାସନ ଦିବସରେ ବଡ଼ ଘୋଷଣା । ୭ ସହରକୁ ମ୍ୟୁନିସିପାଲିଟି ଭାବେ ଘୋଷଣା କରାଯାଇଛି । ସେହିପରି ୧୬ ନୂଆ ଏନଏସି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ । ଆରମ୍ଭ ହୋଇଛି ମୁଖ୍ୟମନ୍ତ୍ରୀ ସହରୀ ବିକାଶ ଯୋଜନା । ଓଡ଼ିଶା ସହରାଞ୍ଚଳ ମିଶନକୁ ଅଧିକ ପ୍ରୋତ୍ସାହନ । କ୍ୟାପିଟାଲ ରିଜିଅନ ରିଂ ରୋଡ଼ ମାଧ୍ୟମରେ ଖୋର୍ଦ୍ଧା-ଭୁବନେଶ୍ବର-କଟକ-ଚୌଦ୍ବାର ଅଞ୍ଚଳର ବିକାଶ କରାଯିବ । ସହରାଞ୍ଚଳରେ ହ୍ଵାଟ୍ସଆପ୍ ମାଧ୍ୟମରେ ଆମ ବସ ସେବାର ଟିକେଟ ବୁକିଂ କରି ହେବ । ସହରରେ ଖାଲଖମା ରାସ୍ତା ସମସ୍ୟା ଦୂର କରିବାକୁ ଟୋଲ ଫ୍ରି ନମ୍ବର ଜାରି ହୋଇଛି । ଅଭିଯୋଗ ଆଧାରରେ ପଦକ୍ଷେପ ନନେଲେ ଅଧିକାରୀଙ୍କ ବିରୋଧରେ ଆକ୍ସନ ହେବ ବୋଲି କହିଛନ୍ତି ମୁଖ୍ୟମନ୍ତ୍ରୀ ।
କରଞ୍ଜିଆ, ବୌଦ୍ଧ, ଆସିକା, ଭଞ୍ଜନଗର, ଛତ୍ରପୁର, ପୋଲସରା ଓ କବିସୂର୍ଯ୍ୟନଗରକୁ ମ୍ୟୁନିସିପାଲିଟି କରାଯିବାକୁ ଘୋଷଣା ହୋଇଛି । ସେହିପରି ୧୬ ନୂଆ NAC ଘୋଷଣା କରିଛନ୍ତି ସରକାର । ଲୋଇସିଂହା, ସୋହେଲା, ସାଲେପୁର, ବଡମ୍ବା, ନରସିଂହପୁର, ଗଁଦିଆ, ଜଗନ୍ନାଥପ୍ରସାଦ, ପାତ୍ରପୁର, ଚଣ୍ଡିଖୋଲ, ନର୍ଲା, ଟାଙ୍ଗୀ, ବୋରିଗୁମ୍ମା, କପ୍ତିପଦା, ଯଶୀପୁର, ଜୟପାଟଣା, ରାସଗୋବିନ୍ଦପୁରକୁ ମିଳିଛି NAC ମାନ୍ୟତା । ସହରରେ ରହୁଥିବା ଲୋକଙ୍କ ପାଇଁ ପାଣି, ଡ୍ରେନ, ବିଦ୍ୟୁତ, ପାର୍କ, ରାସ୍ତା, ବହୁମୁଖୀ କେନ୍ଦ୍ର ସୁବିଧା ମିଳିବ । ମୁଖ୍ୟମନ୍ତ୍ରୀ ସହରୀକରଣ ଯୋଜନାରେ ୬ ହଜାର କୋଟିର ବଜେଟ ରହିଛି । କ୍ୟାପିଟାଲ ରିଜିଅନ ରିଂରୋଡ଼ ହେଲେ ଖୋର୍ଦ୍ଧା, ଭୁବନେଶ୍ବର, କଟକ ଓ ଚୌଦ୍ବାରର ବହୁମୁଖୀ ବିକାଶ ହେବ । ରାସ୍ତା ସମସ୍ୟା ପାଇଁ ୧୯୨୯ ଟୋଲ ଫ୍ରି ନମ୍ବରରେ ଯୋଗଯୋଗ କରି ସମାଧାନ କରାଯିବ । ସହଯୋଗ ସେବାର ସଂପ୍ରସାରଣ ପାଇଁ ନଗର ଉନ୍ନୟନ ବିଭାଗ ଓ ଟାଟା ଷ୍ଟିଲ ମଧ୍ୟରେ MOU ହୋଇଛି । ଆମ ବସ୍ ପାଇଁ ହ୍ଵାଟସ୍ ଆପ୍ ଆଧାରିତ ଟିକେଟ୍ ବୁକିଂର ଶୁଭାରମ୍ଭ ଏବଂ ଡିଜିଟାଲ୍ ଟିକେଟ୍ କ୍ରେତାଙ୍କୁ ରିହାତି ପ୍ରଦାନ ସେବା ଆରମ୍ଭ ହୋଇଛି । ଏହି ଅବସରରେ ଗୋଶାଳା ଓ ବହୁମୁଖୀ ହଲର ଉଦଘାଟନ ହୋଇଛି । ରାଜ୍ୟରେ ରାଜସ୍ବ ସଂଗ୍ରହ ଅଭିବୃଦ୍ଧି ପାଇଁ ପ୍ରଥମ ସ୍ଥାନ ଅଧିକାର କରିଛି ଧାମନଗର NAC । ରେମୁଣା ଏନଏସି ଓ କୋରାପୁଟ ମ୍ୟୁନିସିପାଲିଟିକୁ ପୁରସ୍କୃତ କରାଯିବା ସହ ୩ କୋଟି ଟଙ୍କାର ସହାୟତା ରାଶି ଦିଆଯାଇଛି ।
ଭୁବନେଶ୍ଵର ପଳାଶୁଣୀରେ ବର୍ଜ୍ୟବସ୍ତୁ ଉଦ୍ଧାର କେନ୍ଦ୍ର, ଗାଡକଣରେ ଥିବା ପ୍ଳାଜମା ଦହନ କେନ୍ଦ୍ର ଓ ବିଏମସି ହ୍ବାଟସଅପ ବଟ୍ ସୁବିଧାର ଶୁଭାରମ୍ଭ ହୋଇଛି । ସ୍ୱାୟତ୍ତ ଶାସନ ଦିବସ ଅବସରରେ ମେୟର ଏବଂ କମିଶନର ୨୮ ପ୍ରକଳ୍ପର ଉଦଘାଟନ କରିଛନ୍ତି । ଏଥିରେ ୧୨ଟି ୱାର୍ଡ ଅଫିସ, ବିଭିନ୍ନ ୱାର୍ଡରେ ପାର୍କ ଓ ମିନି ପାର୍କ, ମିଶନ ଶକ୍ତି ଗୃହ, କମ୍ୟୁନିଟି ସେଣ୍ଟର, ଶୌଚାଳୟ ଏବଂ କିଛି ଆରସିସି ଡ୍ରେନର ଉଦଘାଟନ ହୋଇଛି । ୩୫୦ ବସ୍ତିବାସିନ୍ଦାଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ପ୍ରଦାନ କରାଯାଇଛି । ଯେଉଁଥିରେ ୨୦ରୁ ଅଧିକ କିନ୍ନର ଓ ଦିବ୍ୟାଙ୍ଗଙ୍କୁ ସାମିଲ କରାଯାଇଛି ।
ରାଜ୍ୟବ୍ୟାପୀ ବିଭିନ୍ନ ସହରାଞ୍ଚଳରେ ସ୍ବାୟତ୍ତ ଶାସନ ଦିବସ ପାଳନ ହୋଇଥିବା ବେଳେ ରାଜ୍ୟସ୍ତରୀୟ ଉତ୍ସବରେ ମୁଖ୍ୟମନ୍ତ୍ରୀ, ନଗର ଉନ୍ନୟନ ମନ୍ତ୍ରୀ, ମେୟର, ବିଭାଗୀୟ ସଚିବ ପ୍ରମୁଖ ଉପସ୍ଥିତ ଥିବା ବେଳେ ପରିମଳ ସେବାରେ ଉତ୍କୃଷ୍ଟତା ପାଇଁ କର୍ମଚାରୀଙ୍କୁ ସମ୍ମାନିତ କରାଯାଇଛି ।
ଅତିଥି ଅଧ୍ୟାପକରେ ଚାଲିଛି କୃଷ୍ଣଚନ୍ଦ୍ର ଗଜପତି ସ୍ବୟଂ ଶାସିତ ମହାବିଦ୍ୟାଳୟ, ସମସ୍ୟାର ଅନ୍ତ କେବେ ?
ନନ୍ଦିଘୋଷ ବ୍ୟୁରୋ: ଅତିଥି ଅଧ୍ୟାପକରେ ଚାଲିଛି କୃଷ୍ଣଚନ୍ଦ୍ର ଗଜପତି ସ୍ବୟଂ ଶାସିତ ମହାବିଦ୍ୟାଳୟ । ନିଯୁକ୍ତି ହୋଇନାହାନ୍ତି ସ୍ଥାୟୀ ପିଜିଟି ଶିକ୍ଷକ । ଲାଗି ରହିଛି ଅଧ୍ୟାପକ ଓ କର୍ମଚାରୀଙ୍କ ଅଭାବ । ଏହା ସାଙ୍ଗକୁ ପର୍ଯ୍ୟାପ୍ତ ନାହିଁ ଛାତ୍ରଛାତ୍ରୀଙ୍କ ପାଇଁ ଆନୁଷଙ୍ଗିକ ବ୍ୟବସ୍ଥା, କମୁଛି ଶିକ୍ଷାର ମାନ । ଫଳରେ ଗାରିମା ହରାଇବାକୁ ବସିଛି ମହାରାଜା କୃଷ୍ଣଚନ୍ଦ୍ର ଗଜପତିଙ୍କ ଅବଦାନ ।
ଅବ୍ୟବସ୍ଥା ଘେରରେ ଗଜପତି ଜିଲ୍ଲାର ଶ୍ରୀ କୃଷ୍ଣଚନ୍ଦ୍ର ଗଜପତି ସ୍ବୟଂ ଶାସିତ ମହାବିଦ୍ୟାଳୟ । ରାଜ୍ୟର ସର୍ବ ପୁରାତନ ମହାବିଦ୍ୟାଳୟ ହୋଇଥିବା ସତ୍ତ୍ଵେ ଅବହେଳିତ ଅବସ୍ଥାରେ ରହିଛି ଏହି ମହାବିଦ୍ୟାଳୟ । ୧୮୯୭ରେ ପ୍ରତିଷ୍ଠା ହୋଇଥିବା ଏହି ମହାବିଦ୍ୟାଳୟ ବେଶ କିଛିବର୍ଷ ଧରି ରାଜ୍ୟରେ ଉନ୍ନତମାନର ଶିକ୍ଷା ପାଇଁ ସ୍ବତନ୍ତ୍ର ପରିଚୟ ସୃଷ୍ଟି କରିଥିଲା । ଏହାର ଭିତ୍ତିଭୂମି ତଥା ଶ୍ରେଣୀ କୋଠା ଆକର୍ଷଣୀୟ ଓ ଶିକ୍ଷା ପାଇଁ ରହିଛି ଅନୁକୂଳ ପରିବେଶ । କଲେଜ ପରିସରରେ ରହିଛି ଯୁକ୍ତ ଦୁଇ, ଡିଗ୍ରୀ ସହ ସ୍ନାତକୋତ୍ତର ବିଭାଗ । ମୋଟ ୩୪୦୦ ବିଦ୍ୟାର୍ଥୀ ଅଧ୍ୟୟନ କରୁଥିବା ବେଳେ ୧୭ଟି ୟୁଜି ଓ ୧୩ଟି ପିଜି ପାଠ୍ୟକ୍ରମ ରହିଛି । ଆବଶ୍ୟକ ଅନୁଯାୟୀ ମୋଟ ୬୩ ଜଣ ଅଧ୍ୟାପକ ପଦବୀ ଅନୁମୋଦନ ଥିବା ବେଳେ କାର୍ଯ୍ୟରତ ଅଛନ୍ତି ମାତ୍ର ୪୪ । ସେହିଭଳି ୬୮ଟି ସହଯୋଗୀ କର୍ମଚାରୀ ଅନୁମୋଦିତ ଥିବା ବେଳେ ଅଛନ୍ତି ମାତ୍ର ୨୧ ଜଣ । ଏକ ବୃହତମ ଲାଇବ୍ରେରୀ ଥିବା ବେଳେ ଦୀର୍ଘ ବର୍ଷ ହେଲା ଲାଇବ୍ରେରୀଆନ ପଦବୀ ଖାଲି ପଡ଼ିଛି । ଏହାଛଡା ପାନୀୟ ଜଳ ଓ ଆବଶ୍ୟକ ଶୈଚାଳୟ ନଥିବାରୁ ବହୁ ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ କରିଛନ୍ତି ବିଦ୍ୟାର୍ଥୀ ।
ଗତ କିଛିଦିନ ମଧ୍ୟରେ ଏଠାରୁ ୭ ଅଧ୍ୟାପକ ଅନ୍ୟତ୍ର ବଦଳି ହୋଇ ଚାଲିଯାଇଛନ୍ତି । କଲେଜରେ ଯୁକ୍ତ ଦୁଇ ସଂଲଗ୍ନ ହୋଇ ରହିଥିବା ବେଳେ ଯୁକ୍ତ ଦୁଇ ଶିକ୍ଷାଦାନ କରିବାକୁ ଏଯାଏଁ ଗୋଟିଏ ବି ସ୍ଥାୟୀ ପିଜିଟି ଶିକ୍ଷକଙ୍କୁ ନିଯୁକ୍ତି ଦିଆଯାଇ ନାହିଁ । ଅଭିଜ୍ଞ ଅଧ୍ୟାପକ ନିଯୁକ୍ତି ନ ହେବା ଯୋଗୁଁ ଶିକ୍ଷାର ମାନ ଓ କଲେଜ ପରିଚାଳନାରେ ଅନେକ ସମସ୍ୟା ଉପୁଜଛି ବୋଲି ମହାବିଦ୍ୟାଳୟର ଅଧ୍ୟକ୍ଷ କହିଛନ୍ତି । ସମସ୍ୟା ନେଇ ଉଚ୍ଚ ଶିକ୍ଷା ବିଭାଗକୁ ବାରମ୍ବାର ଅବଗତ କରା ଯାଉଥିଲେ ସୁଦ୍ଧା କଲେଜର ବିକାଶ ପାଇଁ ସେଭଳି ତତ୍ପରତା ପ୍ରକାଶ ପାଉ ନଥିବା ଅଭିଯୋଗ ହୋଇଛି ।
ସିଜ-ଫାୟାର, ନୋବେଲ ଓ କାଶ୍ମୀର: ଭାରତ ସହ ଟ୍ରମ୍ପ ସମ୍ପର୍କ ଖରାପ କରିବାର ୭ଟି କାରଣ
ନନ୍ଦିଘୋଷ ବ୍ୟୁରୋ: ଭାରତ ସହ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସମ୍ପର୍କ ବର୍ତ୍ତମାନ ସବୁଠାରୁ ଖରାପ ରହିଛି । ହେଲେ ପୂର୍ବରୁ ଏମିତି ନଥିଲା । ଟ୍ରମ୍ପଙ୍କ ପ୍ରଥମ ପାଳିରେ ଟେକ୍ସାସରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରବାସୀ ଭାରତୀୟଙ୍କ ହାଉଡି ମୋଦି ରାଲିରେ ସାମିଲ ହୋଇଥିଲେ । ଏହାର କିଛି ମାସ ପରେ ଗୁଜରାଟରେ ନମସ୍ତେ ଟ୍ରମ୍ପ କାର୍ଯ୍ୟକ୍ରମ ହୋଇଥିଲା । ଯେଉଁଠି ତାଙ୍କୁ ଭବ୍ୟ ସ୍ବାଗତ କରାଯାଇଥିଲା । ଭାରତ ଓ ଆମେରିକା ସମ୍ପର୍କରେ ଏମିତି ବି ଦିନ ଆସିଥିଲା, ଯେତେବେଳେ ମୋଦି ଏବଂ ଟ୍ରମ୍ପଙ୍କ ବନ୍ଧୁତ୍ବର ମିସାଲ ଦେବା ଆରମ୍ଭ ହୋଇଯାଇଥିଲା ।
ସମୟ ବଦଳିଛି ଆଉ ଟ୍ରମ୍ପଙ୍କ ନୀତି ବି । ଦ୍ବିତୀୟ ଥର ରାଷ୍ଟ୍ରପତି ହେବା ପରେ ଆମେରିକାକୁ ପୁଣି ଥରେ ଶ୍ରେଷ୍ଠ କରିବା ନାଁରେ ଟ୍ରମ୍ପ ଯେଉଁ ଟାରିଫ ଯୁଦ୍ଧ ଆରମ୍ଭ କରିଛନ୍ତି ଏଥିରେ ନା କେବଳ ଶତ୍ରୁ, ବରଂ ମିତ୍ର ରାଷ୍ଟ୍ର ବି ଫସିଛନ୍ତି । ଏପରିକି ଭାରତକୁ ରଣନୈତିକ ସହଯୋଗୀ ଓ ମୋଦିଙ୍କୁ ବନ୍ଧୁ କହୁଥିବା ଟ୍ରମ୍ପ ଭାରତ ଉପରେ ସବୁଠାରୁ ଅଧିକ ୫୦ ପ୍ରତିଶତ ଟାରିଫ ଲଗାଇଛନ୍ତି । ଯାହା ଫଳରେ ଦୁଇ ଦେଶ ମଧ୍ୟରେ ସମ୍ପର୍କ ସବୁଠାରୁ ଖରାପ ସ୍ଥିତିକୁ ଚାଲିଯାଇଛି ।
ଭାରତକୁ ବନ୍ଧୁ କହୁଥିବା ଟ୍ରମ୍ପ କାହିଁକି ୫୦ ପ୍ରତିଶତ ଟାରିଫ ଲଗାଇଲେ ତାକୁ ନେଇ ଭିନ୍ନ ଭିନ୍ନ କଥା କହୁଯାଉଛି । ତେବେ ୭ଟି ଏମିତି କାରଣ ସମ୍ପର୍କରେ ଆମେ କହିବାକୁ ଯାଉଛୁ, ଯେଉଁଥିପାଇଁ ଟ୍ରମ୍ପଙ୍କ ଇଗୋ ହଟ୍ ହୋଇଗଲା ଓ ଯେଉଁ ଭୁଲ, ଭୁଲରେ ବି କୌଣସି ଆମେରିକୀୟ କରିବାକୁ ଚାହିଁବେ ନାହିଁ ସେହି ଭୁଲ ଟ୍ରମ୍ପ କରି ବସିଲେ ।
କାରଣ ନମ୍ବର ୧
ନ୍ୟୁୟର୍କ ଟାଇମ୍ସ ଅନୁସାରେ ୧୭ ଜୁନକୁ ଟ୍ରମ୍ପ G7 ସମ୍ମିଳନୀରୁ ଫେରିବା ବେଳେ ମୋଦିଙ୍କ ସହ ୩୫ ମିନିଟ ଫୋନରେ କଥା ହୋଇଥିଲେ । ଏହି ସମୟରେ ବି ଟ୍ରମ୍ପ ଭାରତ ଓ ପାକିସ୍ତାନ ମଧ୍ୟରେ ଅସ୍ତ୍ରବିରତି କରାଇଥିବାର କ୍ରେଡିଟ୍ ନେବାକୁ ଚାହିଁଥିଲେ । ହେଲେ ମୋଦି ସ୍ବଷ୍ଟ କରି ଦେଇଥିଲେ କି ଦୁଇ ଦେଶ ମଧ୍ୟରେ ହୋଇଥିବା ଅସ୍ତ୍ରବିରତିରେ ଆମେରିକାର କୌଣସି ଲେଣଦେଣ ନାହିଁ । ଏହାପରେ ବି ଟ୍ରମ୍ପ ମାନି ନଥିଲେ । ବର୍ତ୍ତମାନ ସୁଦ୍ଧା ୪୦ରୁ ଅଧିକ ଥର ସେ ଏହି କଥା କହି ସାରିଛନ୍ତି ।
କାରଣ ନମ୍ବର ୨
ଏହି ଫୋନ କଲ ସମୟରେ ଟ୍ରମ୍ପ, ମୋଦିଙ୍କୁ କହିଥିଲେ ପାକିସ୍ତାନ ନୋବେଲ ଶାନ୍ତି ପୁରସ୍କାର ପାଇଁ ତାଙ୍କ ନାଁ ନୋମିନେଟ କରିବାକୁ ଯାଉଛି । ଏପରି କହି ଟ୍ରମ୍ପ ସଙ୍କେତ ଦେଇଥିଲେ କି ଭାରତ ବି ସମାନ ପ୍ରକାର ତାଙ୍କ ନାଁ ନୋମିନେଟ କରିବା ଉଚିତ । ହେଲେ ଭାରତ ଏମିତି କରି ନଥିଲା । ଯେଉଁଥି ପାଇଁ ଟ୍ରମ୍ପଙ୍କ ରାଗ ହୋଇଯାଇଥିଲା । ଇସ୍ରାଏଲ, କମ୍ବୋଡିଆ ପରେ ଅଜରବାଇଜାନ ଓ ଆର୍ମେନିଆ ମଧ୍ୟ ନୋବେଲ ପୁରସ୍କାର ପାଇଁ ଟ୍ରମ୍ପଙ୍କ ନାଁ ନୋମିନେଟ କରିଛନ୍ତି ।
କାରଣ ନମ୍ବର ୩
କାନାଡାରେ ଜୁନ ୧୬ରୁ ୧୭ ପର୍ଯ୍ୟନ୍ତ ହୋଇଥିବା G7 ସମ୍ମିଳନୀର ପ୍ରଥମ ଦିନରେ ଟ୍ରମ୍ପ ସାମିଲ ହୋଇ ଫେରି ଆସିଥିଲେ । ସେଠାରେ ଟ୍ରମ୍ପ ଓ ମୋଦିଙ୍କ ମଧ୍ୟରେ ଆଲୋଚନା ହେବାର ଥିଲା । ଏହାପରେ ଦୁଇ ନେତା ଫୋନରେ କଥା ହୋଇଥିଲେ । ଟ୍ରମ୍ପ ମୋଦିଙ୍କୁ କହିଥିଲେ, ଆମେରିକା ହୋଇ ଭାରତ ଯିବାକୁ । ହେଲେ ମୋଦି ମନା କରି ଦେଇଥିଲେ । ଏହି ସମୟରେ ପାକିସ୍ତାନ ଆର୍ମି ଚିଫ୍ ଅସିମ ମୁନିର ଓ୍ବାସିଂଟନରେ ଥିଲେ । ବ୍ଲୁମବର୍ଗ ରିପୋର୍ଟ ଅନୁସାରେ, ମୋଦି ଚିନ୍ତା କରିଥିଲେ ଯେ ସେ ଆମେରିକା ଗଲେ ଟ୍ରମ୍ପ ମୁନିରଙ୍କ ସହ ତାଙ୍କ ବୈଠକ କରାଇବାକୁ ଚେଷ୍ଟା କରିବେ । କ୍ରୋଏସିଆକୁ ଯିବାକୁ ଥିବା କହି ମୋଦି ଟ୍ରମ୍ପଙ୍କ ଅଫରକୁ ଟାଳି ଦେଇଥିଲେ ।
କାରଣ ନମ୍ବର ୪
ଏହି ଫୋନ କଲ ସମୟରେ ମୋଦି ସ୍ପଷ୍ଟ କରି ଦେଇଥିଲେ ଯେ, କାଶ୍ମୀର ପ୍ରସଙ୍ଗରେ କୌଣସି ତୃତୀୟ ପକ୍ଷଙ୍କ ମଧ୍ୟସ୍ଥତା ସ୍ବୀକାର କରାଯିବନି । ଯାହାର ସୂଚନା ଦେଇ ବୈଦେଶିକ ସଚିବ କହିଥିଲେ, ପାକିସ୍ତାନ ବିବାଦ ସମାଧାନ ପାଇଁ ଟ୍ରମ୍ପ ମଧ୍ୟସ୍ଥତା କରିବାକୁ ପ୍ରସ୍ତାବ ଦେଇଥିଲେ । ସୂଚନାଯୋଗ୍ୟ, ଭାରତ-ପାକିସ୍ତାନ ଅସ୍ତ୍ରବିରତି ପରେ ଟ୍ରମ୍ପ କହିଥିଲେ, ମୁଁ ଦୁଇ ଦେଶ ସହ ମିଶି ଏହା ଦେଖିବି ଯେ, ଯେମିତି ଦୁଇ ପକ୍ଷ କାଶ୍ମୀର ସମସ୍ୟାର ସମାଧାନ ବାହାର କରିପାରିବେ ।
କାରଣ ନମ୍ବର ୫
ଏହି ଫୋନ କଲରୁ ନିରାଶ ହେବା ପରେ ଟ୍ରମ୍ପ ଭାରତ ବିରୋଧରେ କହିବା ଆରମ୍ଭ କରିଦେଇଥିଲେ । ସେ ଭାରତକୁ ଡେଡ ଇକୋନମି (ମୃତ ଅର୍ଥବ୍ୟବସ୍ଥା ) କହିବା ସହ ଭାରତୀୟ ବ୍ୟବସାୟ ନୀତିକୁ ଖରାପ କହିଥିଲେ । ଏହାପରେ ଟ୍ରମ୍ପ ଭାରତୀୟ ଦ୍ରବ୍ୟ ଉପରେ ୫୦ ପ୍ରତିଶତ ଟାରିଫ ଲଗାଇବାକୁ ଘୋଷଣା କଲେ । ବ୍ଲୁମବର୍ଗ ଅନୁସାରେ ଜୁନରେ ହୋଇଥିବା ଫୋନ୍ କଲ୍ ପରେ ଦୁଇ ନେତାଙ୍କ ମଧ୍ୟରେ ଆଉ କୌଣସି ଆଲୋଚନା ହୋଇନି ।
କାରଣ ନମ୍ବର ୬
ଦୀର୍ଘଦିନରୁ ଆମେରିକା ନିଜର କୃଷିଦ୍ରବ୍ୟ ଓ ଡାଏରୀ ପ୍ରଡକ୍ଟ ପାଇଁ ଭାରତୀୟ ବଜାର ଖୋଲିବାକୁ ଦାବି କରି ଆସୁଛି । ହେଲେ, ଭାରତ ଆମେରିକୀୟ କୃଷି ଉତ୍ପାଦ ଉପରେ ଟାରିଫ କମ କରିବା ଦାବିକୁ ଅସ୍ବୀକାର କରିଦେଲା ଓ ଘରୋଇ ଚାଷୀଙ୍କ ହିତକୁ ସର୍ବାଗ୍ରେ ରଖିଲା । ଜର୍ମାନ ଖବରକାଗଜ FAZ ଅନୁସାରେ, ଭାରତ ଆମେରିକା ସହ ହେବାକୁ ଥିବା ବେପାର ସମ୍ବନ୍ଧିୟ ଆଲୋଚନାକୁ ବାତିଲ କରିଦେବା ସହ ଆମେରିକୀୟ ପ୍ରତିନିଧି ମଣ୍ଡଳିଙ୍କୁ ଦିଲ୍ଲୀ ଆସିବାକୁ ମନା କରାଗଲା । ଦୁଇ ଦେଶ ମଧ୍ୟରେ ଦ୍ବିପେକ୍ଷିକ ବ୍ୟାପାର ବୁଝାମଣା (BAT) ଅନୁସାରେ ଅଗଷ୍ଟ ୨୫ରୁ ୨୯ ତାରିଖ ମଧ୍ୟରେ ଷଷ୍ଠ ପର୍ଯ୍ୟାୟ ଆଲୋଚନା ହେବାର ଥିଲା । ଆମେରିକୀୟ ଡାଏରୀ ଉତ୍ପାଦ ଓ GM ଫସଲ ଆମଦାନୀ ଉପରେ ଅସହମତି କାରଣରୁ ଜୁଲାଇରେ ପଞ୍ଚମ ପର୍ଯ୍ୟାୟ ଆଲୋଚନା ବିଫଳ ହୋଇଥିଲା ।
କାରଣ ନମ୍ବର ୭
ଅଗଷ୍ଟ ୨୭ ତାରିଖରେ ଆମେରିକା ଭାରତ ଉପରେ ୫୦ ପ୍ରତିଶତ ଟାରିଫ ଲଗାଇଲା । ଏଥିରେ ୨୫ ପ୍ରତିଶତ ଟାରିଫ ପେନାଲ୍ଟି ଭାବେ ଲଗାଯାଇଛି । କାରଣ ଭାରତ ଋଷ ପାଖରୁ ତେଲ କିଣୁଥିବାରୁ ଏହି ପେନାଲ୍ଟି ଆମେରିକା ଲଗାଇଛି । ଆମେରିକା କହୁଛି, ଭାରତ ତେଲ କିଣି ଋଷକୁ ଯୁଦ୍ଧରେ ସାହାଯ୍ୟ କରୁଛି । ହେଲେ ଭାରତ ଋଷରୁ ତେଲ କିଣିବା ବନ୍ଦ କରିଲାନି । ଏହାକୁ ରାଷ୍ଟ୍ରୀୟ ହିତ କହି ଏବେ ବି ତେଲ କିଣିବା ଜାରି ରଖିଛି । ଆମେରିକା ଚାହୁଁଛି ୟୁରୋପୀୟ ଦେଶ ବି ଭାରତ ଉପରେ ଟାରିଫ ଲଗାନ୍ତୁ । କିନ୍ତୁ ୟୁରୋପୀୟ ୟୁନିୟନ ଏହି ଘଟଣାରେ ନିରବତା ଅବଲମ୍ବନ କରିଛି ।
ମହାପ୍ରଭୁଙ୍କ ଦର୍ଶନ ନାଁରେ ଲୋକଙ୍କୁ ଭ୍ରମିତ କରୁଛି ଇଣ୍ଡିଆ ଥ୍ରିଲସ ୱେବସାଇଟ…
ପୁରୀ : ଶ୍ରୀମନ୍ଦିରରେ ଦର୍ଶନ ପାଇଁ ଟଙ୍କା କାରବାର। ମହାପ୍ରଭୁଙ୍କ ଦର୍ଶନ ନାଁରେ ଲୋକଙ୍କୁ ଭ୍ରମିତ କରୁଛି ଇଣ୍ଡିଆ ଥ୍ରିଲସ ୱେବସାଇଟ । ୱେବସାଇଟରେ ଜଗନ୍ନାଥ ଦର୍ଶନ ନେଇ ଦିଆଯାଇଛି ଫେକ୍ ତଥ୍ୟ । ଦର୍ଶନ ସମୟ ଅନୁସାରେ ଟଙ୍କା ନିର୍ଦ୍ଧାରିତ ନେଇ ୱେବସାଇଟରେ ତଥ୍ୟ ରହିଛି । ଶ୍ରୀମନ୍ଦିରରେ ଦର୍ଶନ ନିଶୁଳ୍କ ରହିଥିବା ବେଳେ ୱେବସାଇଟରେ ରହିଛି ବିଭିନ୍ନ ବର୍ଗର ଦେୟ ଯୁକ୍ତ ଦର୍ଶନ ନେଇ ତଥ୍ୟ । ଲୋକଙ୍କ ପାଇଁ ଗଳାବାଟ ଦର୍ଶନକୁ ଇଣ୍ଡିଆ ଥ୍ରିଲସ୍ ତଥ୍ୟ ଆହୁରି ପ୍ରୋତ୍ସାହିତ କରିବା ଭଳି । ଜଗନ୍ନାଥ ଦର୍ଶନ ପାଇଁ ୫୦ ଟଙ୍କା, ୧୦୦ ଟଙ୍କା, ୫୦୦ ଟଙ୍କାର ରେଟ ଚାର୍ଟ ଦେଇଛି ଉକ୍ତ ୱେବସାଇଟ । ଇଣ୍ଡିଆ ଥ୍ରିଲ୍ସ ୱେବସାଇଟରେ ଜଗନ୍ନାଥ ମନ୍ଦିର, ଏହାର ଇତିହାସ ଓ ଦର୍ଶନକୁ ନେଇ ତଥ୍ୟ ରହିଛି । ଶ୍ରୀମନ୍ଦିରରେ ଦର୍ଶନ ସମ୍ପୂର୍ଣ୍ଣ ମାଗଣା ହୋଇଥିବା ବେଳେ ଉକ୍ତ ୱେବ୍ ସାଇଟ୍ ଭକ୍ତଙ୍କ ଭାବାବେଗ ସହ ଖେଳିଛି ଖେଳ । ବାହାରୁ ଆସୁଥିବା ସାଧାରଣ ଭକ୍ତ ଏହି ତଥ୍ୟ ଦେଖିଲେ ଭ୍ରମିତ ହେବା ସ୍ବାଭାବିକ । ୱେବସାଇଟ ତଥ୍ୟ ଅନୁସାରେ ସକାଳ ୭ଟାରୁ ରାତି ୧୨। ଅପରାହ୍ନ ୪ଟାରୁ ରାତି ୮ ମଧ୍ୟରେ ସ୍ଵତନ୍ତ୍ର ଦର୍ଶନ ନେଇ ତଥ୍ୟ ରହିଛି । ଯାହାର ମୂଲ୍ୟ ୫୦ ଟଙ୍କା ବୋଲି ଦର୍ଶାଯାଇଛି। ଶୀଘ୍ର ଦର୍ଶନ ପାଇଁ ୧୦୦ ଟଙ୍କା, ଭିଆଇପି ଦର୍ଶନ ପାଇଁ ୫୦୦ ଟଙ୍କା, ରାତ୍ରି ଦର୍ଶନ ପାଇଁ ୫୦ ଟଙ୍କା ଦର୍ଶାଯାଇଛି ।
ଜୀବନ ହାରିଲେ ୟୁଟ୍ୟୁବ ବ୍ଲଗରଙ୍କ ସାନଭାଇ
ଭୁବନେଶ୍ବର : ଜୀବନ ହାରିଲେ ୟୁଟ୍ୟୁବ ବ୍ଲଗରଙ୍କ ସାନଭାଇ । ବାଇକ ରାଇଡିଂକୁ ନିଜ ନିଶା ବନାଇଥିବା ସନ୍ଦୀପ କୁମାର ଦାସ ସାନ ଭାଇ ସନ୍ଦେଶ ଦାସଙ୍କ ମୃତ୍ୟୁ ହୋଇଛି । ଭୁବନେଶ୍ବର ପୁନାମା ଗେଟ ନିକଟ ରେଲୱେ କ୍ରସିଂ ଉପରୁ ମିଳିଛି ସନ୍ଦେଶଙ୍କ କ୍ଷତବିକ୍ଷତ ମୃତଦେହ । ଖବର ପାଇ GRP ଘଟଣାସ୍ଥଳରେ ପହଞ୍ଚିଛି। ପୋଲିସ ଆତ୍ମହତ୍ୟା ନେଇ ସନ୍ଦେହ କରୁଥିବା ବେଳେ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଚଳାଇଛି । ସେପଟେ ଇନଷ୍ଟାଗ୍ରାମରେ ଭିଡିଓ ବନାଇ ଲୋକଙ୍କ ମନୋରଞ୍ଜନ କରୁଥିବା ସନ୍ଦୀପଙ୍କ ସାନ ଭାଇଙ୍କ ମୃତ୍ୟୁକୁ ନେଇ ସୃଷ୍ଟି ହୋଇଛି ଅନେକ ପ୍ରଶ୍ନ । ପାରିବାରିକ ଝଗଡା ନା ଆର୍ଥିକ ସମସ୍ୟା କିମ୍ବା ପ୍ରେମ ରେ ଧୋକା ? ଏସବୁକୁ ନେଇ ଚାଲିଛି ଖୋଳତାଡ଼ । ସନ୍ଦେଶ କରିଥିବା ଶେଷ କଲକୁ ମଧ୍ୟ ଯାଞ୍ଚ କରୁଛି ପୋଲିସ । କିନ୍ତୁ ସନ୍ଦୀପଙ୍କ ବାଇକକୁ ବ୍ୟବହାର କରୁଥିବାରୁ ପ୍ରଥମେ ସନ୍ଦୀପଙ୍କ ମୃତ୍ୟୁ ହୋଇଥିବା ସନ୍ଦେହ କରୁଥିଲା ପୋଲିସ । କିନ୍ତୁ ସେ ସନ୍ଦୀପ ନୁହଁନ୍ତି, ବରଂ ସନ୍ଦୀପଙ୍କ ସାନ ଭାଇ ସନ୍ଦେଶ ବୋଲି ସ୍ପଷ୍ଟ କରିଛି ପୋଲିସ ।