ନନ୍ଦିଘୋଷ ବ୍ୟୁରୋ: ବୈତରଣୀ ଓ ସୁବର୍ଣ୍ଣରେଖାରେ କମିଛି ବନ୍ୟା ପାଣି, କିନ୍ତୁ ବଢ଼ି ଚାଲିଛି ଲୋକଙ୍କ ଦୁର୍ଦ୍ଦଶା । ରାସ୍ତାଘାଟ, ବିଲବାଡିରେ ଲହଡି ଭାଙ୍ଗୁଛି ବନ୍ୟା ପାଣି । ଭଦ୍ରକ, ଯାଜପୁର ଓ ବାଲେଶ୍ବର ଜିଲ୍ଲାର ୫୦ ହଜାରରୁ ଅଧିକ ଲୋକ ବନ୍ୟାରେ ପ୍ରଭାବିତ ହୋଇଛନ୍ତି । ସେପଟେ ରେଙ୍ଗାଲି ଡ୍ୟାମ ଖୋଲିଥିବାରୁ ବ୍ରାହ୍ମଣୀରେ ତୃତୀୟ ଥର ପାଇଁ ବନ୍ୟା ପରିସ୍ଥିତି ସୃଷ୍ଟି ହୋଇ କେନ୍ଦ୍ରାପଡାର ପଟ୍ଟାମୁଣ୍ଡାଇ ଅଞ୍ଚଳ ପ୍ରଭାବିତ ହୋଇଛି । ବନ୍ୟାରେ ଲୋକେ ନିଜର ସବୁ କିଛି ହରେଇ ସାରିଥିବା ବେଳେ, ସୁଧ ନେବାକୁ ଘର ସାମ୍ନାରେ ଛିଡା ହେଲେଣି ଘରୋଇ ଋଣଦାତା ।
ଅନ୍ୟପକ୍ଷେ ରିଲିଫକୁ ନେଇ ଗାଁ ଗାଁରେ ଦେଖିବାକୁ ମିଳୁଛି ଅସନ୍ତୋଷ । ବୈତରଣୀ ବନ୍ୟାରେ ଧୋଇ ହୋଇଗଲା ୨୦ ନମ୍ବର ଜାତୀୟ ରାଜପଥ ସାଙ୍ଗକୁ ଗାଁ ରାସ୍ତା । ସେପଟେ ହଜାର ହଜାର ହେକ୍ଟର ଜମିରେ ସାରଦ ଧାନ ତଳି ଉପରେ ଲହଡି ମାରୁଛି ବନ୍ୟା ଜଳ । ବୈତରଣୀ ବନ୍ୟାରେ ଭଦ୍ରକ ଜିଲ୍ଲାର ଭଣ୍ଡାରିପୋଖରୀ, ଧାମନଗର, ଚାନ୍ଦବାଲି, ତିହିଡି ବ୍ଲକରେ ବ୍ୟାପକ କ୍ଷୟକ୍ଷତି ହୋଇଛି। ଏପରିକି ଆଖଣ୍ଡଳମଣି-କୁଆଖିଆ ୨୦ ନମ୍ଵର ଜାତୀୟ ରାଜପଥର ବୋଡକ ନିକଟରେ ରାସ୍ତା ଧୋଇଯାଇଥିବାରୁ ଏବେ ବିପଦପୂର୍ଣ୍ଣ ଭାବେ ଯାଆଆସ କରୁଛନ୍ତି ଲୋକେ । ସେହିପରି ୪ଟି ବ୍ଲକର ୩୫ଟି ପଞ୍ଚାୟତର ହଜାର ହଜାର ହେକ୍ଟର ଚାଷ ଜମିରେ ଧାନ ତଳି ଉଜୁଡି ଯିବାକୁ ବସିଛି। ସୁବର୍ଣ୍ଣରେଖା ନଦୀର ଜଳସ୍ତର କମିଥିଲେ ବି ଦୁର୍ଦ୍ଦଶା ବଢୁଛି। ନଷ୍ଟ ହୋଇଯାଇଛି ଚାଷୀଙ୍କ ବର୍ଷର ଅମଳ। ରାଜଘାଟରେ ବିପଦ ସଙ୍କେତ ତଳକୁ ପାଣି ଖସିଥିଲେ ବି ବାଲିଆପାଳ ଓ ଭୋଗରାଇ ବ୍ଲକର ବହୁ ଗାଁ ଜଳବନ୍ଦୀ ହୋଇ ରହିଛି । ପାଣି ଘେରରେ ରହିଛି ବାଲିଆପାଳ ବ୍ଲକର ୮ରୁ ଅଧିକ ଗାଁ । ଚାଷ ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଥିବାରୁ ବର୍ଷ ଯାକ କିପରି ପରିବାର ପ୍ରତିପୋଷଣ ହେବ ଓ ଚାଷ କାମ ପାଇଁ କରିଥିବା ଋଣ କିପରି ପରିଶୋଧ କରିବେ ସେ ଚିନ୍ତାରେ ଘାରି ହେଉଛନ୍ତି ବନ୍ୟା ବିପନ୍ନ।
ସେପଟେ ବନ୍ୟା ଛାଡିବା ପରେ ଯାଜପୁର ଜିଲ୍ଲା ଦଶରଥପୁର ବ୍ଲକରେ ଜଳ ସମ୍ପଦ ବିଭାଗ ପକ୍ଷରୁ ଆରମ୍ଭ ହୋଇଛି ଘାଇ ମରାମତି କାମ । ବୈତରଣୀର ଶାଖା କାଣୀ ନଦୀରେ ଭୟଙ୍କର ବନ୍ୟା ଆସିବା ଯୋଗୁଁ ସମଗ୍ର ଦଶରଥପୁର ଅଞ୍ଚଳ ଜଳମଗ୍ନ ହୋଇଥିଲା । ଚାରି ଦିନରେ ଘାଇ ମରାମତି ସରିବ ବୋଲି ଜଳସମ୍ପଦ ବିଭାଗ କହିଛି । ଗୋଟେ ପଟେ ଋଣ ଟଙ୍କା ଶୁଝିବାକୁ ଘରୋଇ ସଂସ୍ଥାର ଅଧିକାରୀ ଚାପ ପକାଉଥିବା ବେଳେ, ଏଯାଏଁ ସରକାରୀ ସ୍ତରରେ ଆରମ୍ଭ ହୋଇନି କ୍ଷୟକ୍ଷତି ଆକଳନ । ଯାହାକୁ ନେଇ ଅସନ୍ତୋଷ ପ୍ରକାଶ କରୁଛନ୍ତି ବିପନ୍ନ ।
ବୈତରଣୀ ଓ ସୁବର୍ଣ୍ଣରେଖା ପରେ ଏବେ ବ୍ରାହ୍ମଣୀରେ ତୃତୀୟ ଥର ସୃଷ୍ଟି ହୋଇଛି ବନ୍ୟା ପରିସ୍ଥିତି। କେନ୍ଦ୍ରାପଡାର ପଟ୍ଟାମୁଣ୍ଡାଇ ଓ ରାଜନଗର ବ୍ଲକରେ ବନ୍ୟା ପରିସ୍ଥିତି ସଙ୍ଗୀନ ହୋଇଥିବା ବେଳେ, କୁମ୍ଭୀରକୁ ଭୟଭୀତ ଅବସ୍ଥାରେ ଅଛନ୍ତି ଲୋକେ । ପଟ୍ଟାମୁଣ୍ଡାଇ, ଆଳି ଓ ରାଜନଗର ବ୍ଲକର ଧୋଇଆ ଅଞ୍ଚଳରେ ଥିବା ୫୦ ଅଧିକ ଗାଁ ଜଳବନ୍ଦୀ ହୋଇ ରହିଛି । ବନ୍ୟାଠୁ ବଳି ଯାଇଛି ବନ୍ୟା ପରର ସ୍ଥିତି । ଦୁର୍ଦ୍ଦଶା ବଢ଼ି ଚାଲିଥିବା ବେଳେ, ଏବେ ଲୋକେ ଭଙ୍ଗା ଘରକୁ ସଜାଡ଼ିବାରେ ଲାଗିଛନ୍ତି ।
