କିଛି ଦିନର ବ୍ୟବଧାନ ପରେ ପୁଣି ମଇଦାନକୁ ଓହ୍ଲାଇଲେ ତାମିଲଗା ଭେଟ୍ରି କାଜାଗମ ବି ଟିଭିକେ ସୁପ୍ରିମୋ ବିଜୟ। କରୁର ଦଳାଚକଟା ଘଟଣାରେ ୪୧ ଜୀବନ ଯିବା ଘଟଣାର ପ୍ରାୟ ୨ ମାସ ପରେ ଦଳକୁ ପୁଣି ଆକ୍ଟିଭ ମୋଡକୁ ଆଣିଛନ୍ତି ବିଜୟ। କାଞ୍ଚିପୁରମର ସୁଙ୍ଗୁଭାର୍ଚାତିରମର ଏକ ଇଣ୍ଡୋର ଷ୍ଟାଡିୟମରେ ସଭା କରିଛନ୍ତି ବିଜୟ। ଏଥିରେ ଦଳର କ୍ୟାଡର, ନେତା ଓ କିଛି ସମର୍ଥକ ଯୋଗଦେଇଛନ୍ତି। ସଭାସ୍ଥଳୀକୁ ଯିବା ଲାଗି କୋଡଭିତ୍ତିକ ପାସ୍ ପ୍ରଦାନ କରାଯାଇଛି। ସମସ୍ତଙ୍କ ପ୍ରବେଶ ଉପରେ କଟକଣା ଲଗାଯାଇଛି। ଏହି ସମାବେଶରେ ସେ ଶାସକ ଡିଏମକେକୁ ତୀବ୍ର ସମାଲୋଚନା କରିବା ସହ ପାରିବାରିକ ରାଜନୀତିକୁ ତୀବ୍ର ବିରୋଧ କରିଥିଲେ। ରାଜ୍ଯରେ ରାଜନୈତିକ ପରିବର୍ତ୍ତନ ଲାଗି ସେ ଆହ୍ବାନ ଦେବା ସହ ଆଗାମୀ ଦିନରେ ଦଳକୁ ଶକ୍ତିଶାଳୀ କରିବା ଲାଗି ଆହ୍ବାନ ଦେଇଛନ୍ତି। ରାଜ୍ୟରେ ଜାତିଗତ ଜନଗଣନା ଓ ସମାନତାଭିତ୍ତିକ ନୀତି ପ୍ରଚଳନ ଲାଗି ସେ ଦାବି କରିଛନ୍ତି। ଏହି ସମାବେଶ ଲାଗି ଦଳ ପକ୍ଷରୁ ଅନେକ କଟକଣା ଲାଗୁ କରାଯାଇଥିଲା। କାର୍ଯ୍ଯକ୍ରମ ଲାଗି ପୋଲିସ ଅନୁମତି ବି ନିଆଯାଇଥିଲା। ସେପଟେ ତାମିଲନାଡୁରେ ସ୍ବତନ୍ତ୍ର ଭୋଟର ତାଲିକା ସଂଶୋଧନ ବା ଏସଆଇଆର ପ୍ରସ୍ତାବକୁ ବିରୋଧ କରିଛନ୍ତି ବିଜୟ। ଏସଆଇଆରକୁ ବିରୋଧ କରି ଦଳ ସୁପ୍ରିମକୋର୍ଟରେ ଆବେଦନ କରିଛି। ଗତ ସେପ୍ଟେମ୍ବର ୨୭ରେ କରୁରରେ ଘଟିଥିଲା ଦଳାଚକଟା ଘଟଣା।
କୋଏମ୍ବାଟୁରରେ ପହଞ୍ଚିଲା ୱିଙ୍ଗ କମାଣ୍ଡର ନମାଂଶ ସିଆଲଙ୍କ ମରଶରୀର
ତାମିଲନାଡୁ କୋଏମ୍ବାଟୁରରେ ପହଞ୍ଚିଲା ୱିଙ୍ଗ କମାଣ୍ଡର ନମାଂଶ ସିଆଲଙ୍କ ମରଶରୀର। ଦୁବାଇ ଏୟାର ସୋ ବେଳେ କ୍ରାସରେ ପ୍ରାଣ ହରାଇଥିଲେ ନମାଂଶ। ବାୟୁସେନାର ଏକ ସ୍ବତନ୍ତ୍ର ବିମାନରେ ତାଙ୍କ ମରଶରୀର କୋଏମ୍ବାଟୁର ନିକଟସ୍ଥ ସୁଲୁରକୁ ଅଣାଯାଇଛି। ସୁଲର ଏୟାରଫୋର୍ସ ଷ୍ଟେସନର ବାୟୁସେନାର ନମ୍ବର ୪୫ ସ୍କ୍ବାଡ୍ରନର ୱିଙ୍ଗ କମାଣ୍ଡର ଥିଲେ ନମାଂଶ। ସେ ଲାଇଟ କମ୍ପାକ୍ଟ ଏୟାରକ୍ରାଫ୍ଟ ଏଲସିଏ ଏଚଏଲ ତେଜସକୁ ଅପରେଟ କରୁଥିଲେ। ସେଠାରୁ ତାଙ୍କ ମରଶରୀର ଜନ୍ମସ୍ଥଳୀ ହିମାଚଳ ପ୍ରଦେଶର ପତିଆଲକାରକୁ ନିଆଯିବ। ସେଠାରେ ରାଷ୍ଟ୍ରୀୟ ମର୍ଯ୍ଯାଦା ସହ ତାଙ୍କର ଶେଷକୃତ୍ୟ କରାଯିବ। ଗତ ୨୧ ତାରିଖରେ ଘଟିଥିଲା ଏହି ମର୍ମନ୍ତୁଦ ଦୁର୍ଘଟଣା। ଆକାଶରେ ତେଜସ ଯୁଦ୍ଧ ବିମାନ ନିଜର ରଣକୌଶଳ ଦେଖାଉଥିବା ବେଳେ ଦୁର୍ଘଟଣା ହୋଇଥିଲା। ବିମାନଟି ନିୟନ୍ତ୍ରଣ ହରାଇ ସିଧା ତଳକୁ ଖସିବା ସହ ଆଖି ପିଛୁଳାକେ ଜଳି ପାଉଁଶ ହୋଇଯାଇଥିଲା। ଦୁର୍ଘଟଣାର କାରଣ ଜାଣିବା ପାଇଁ କୋର୍ଟ ଅଫ ଇନକ୍ୱାରୀ ନିର୍ଦ୍ଦେଶ ଦିଆଯାଇଥିବା ନେଇ ବାୟୁସେନା କହିଛି। ପୂରା କ୍ରାସର ଦୃଶ୍ୟ କ୍ୟାମେରାରେ କଏଦ ହୋଇଛି। ହାଲ ତିଆରି କରିଥିବା ତେଜସ ହେଉଛି ଭାରତୀୟ ବାୟୁସେନାର ପ୍ରମୁଖ ଯୁଦ୍ଧ ବିମାନ।
ବିଜେଡିର ପିଏସି ବୈଠକରେ ନୂଆପଡ଼ା ଉପନିର୍ବାଚନ ନେଇ ଆଲୋଚନା
ବିଜେଡିର ପିଏସି ବୈଠକରେ ନୂଆପଡ଼ା ଉପନିର୍ବାଚନ ନେଇ ଆଲୋଚନା। ଏହି ଆଲୋଚନା ଅନ୍ତରୀଣ ଆଲୋଚନା ଥିବା ବୋଲି କହିଛନ୍ତି ବିଜେଡି ଉପସଭାପତି ଦେବୀ ମିଶ୍ର। ହାରିବା ଜିତିବା ଅଲଗା କଥା। ହେଲେ ଲୋକ ବିଜେଡିକୁ ଭଲ ପାଉଥିଲେ ସେଥିଲାଗି ନବୀନ ପଟ୍ଟନାୟକ ଗଲେ। ତାଙ୍କ ପ୍ରତି ଲୋକଙ୍କ ଉଦ୍ଦୀପନାକୁ ସମସ୍ତେ ଅନୁଭବ କରିଥିଲେ। ଏହା ଏତି ନିକଟତର ଲଢେଇ ହେବ ବୋଲି ସମସ୍ତେ ଜାଣିଥିଲେ। ସାଇଲେନ୍ସ ପିରିୟଡରେ ବିରୋଧୀଙ୍କୁ ତଡା ଗଲା ହେଲେ ଶାସକ ଦଳ ରହିଲା। ୪୧ ବୁଥରେ ୯୧% ରୁ ଅଧିକ ଭୋଟ ହେଲା। ସମୁଦାୟ ୮୩% ଭୋଟ ହେଲା। ବୁଥର ଫଳାଫଳ ଯାହା ଆସିଛି ସ୍ଥାନୀୟ ଲୋକ ହିଁ ଅଭିଯୋଗ କଲେ।
ଏହାର ରିପୋର୍ଟ ଦେବାକୁ ବିଜେଡି ସଭାପତି ନବୀନ ପଟ୍ଟନାୟକ ନିର୍ଦ୍ଦେଶ ଦେଇଛନ୍ତି। ଗଣତାନ୍ତ୍ରିକ ପଦ୍ଧତିରେ ଭୋଟ ହେଉ। ନବୀନ ପଟ୍ଟନାୟକଙ୍କୁ ଏ ସବୁ ନେଇ ଅବଗତ କରାଯାଇଛି। ୨୦୨୪ ନିର୍ବାଚନ ବି ଅନେକ ସ୍ଥାନରେ ଭୋଟ ବିଚ୍ୟୁତି ହୋଇଛି। ଆଜି ବିଜେପିରେ ଅମର ପଟ୍ଟନାୟକ ମିଶିଛନ୍ତି। ହେଲେ ସେ ବିଜେଡିରେ ଥାଇ ଏହି ଭୋଟ ଅନିୟମିତତା ଦେଖାଇ ନିର୍ବାଚନ କମିସନଙ୍କୁ ଜଣାଇଥିଲେ। ୯୪ ନିର୍ବାଚନମଣ୍ଡଳୀରେ ନଗର, ବ୍ଲକ ସଭାପତି ଚୂଡାନ୍ତ ହୋଇଛି। ବାକି ୭ ଦିନ ଭିତରେ ଚୂଡାନ୍ତ ହେବ। ଜିଲ୍ଲା କମିଟି ପାଇଁ ନବୀନ ପଟ୍ଟନାୟକଙ୍କ ଅନୁମୋଦନ ନିଆଯିବ। ବିଜେଡି ବିଜୁ ପଟ୍ଟନାୟକଙ୍କ ନାଁରେ ଗଠନ ହୋଇଛି। ୧୯୯୭ରେ ଆଞ୍ଚଳିକ ଦଳ ଭାବେ ନବୀନ ପଟ୍ଟନାୟକଙ୍କ ନେତୃତ୍ୱରେ ବିଜେଡି ଗଠନ ହୋଇଥିଲା। ବିକାଶ କାର୍ଯ୍ୟକ୍ରମ ବିଜେଡି କରିଥିଲା ଲୋକଙ୍କ ସ୍ୱର ହୋଇ ବିଧାନସଭା ଭିତରେ ଓ ବାହାରେ ଲୋକଙ୍କ ସମସ୍ୟା ଉପସ୍ଥାପନ କରିବାକୁ ନବୀନ ପଟ୍ଟନାୟକ ନିର୍ଦ୍ଦେଶ ଦେଇଛନ୍ତି ବୋଲି କହିଛନ୍ତି ବିଜେଡି ବରିଷ୍ଠ ଉପସଭାପତି ଶ୍ରୀ ମିଶ୍ର ।
ସାମାନ୍ୟ ବଚସାକୁ କେନ୍ଦ୍ର କରି ରକ୍ତର ହୋଲି ଖେଳିଲା ସମ୍ପର୍କୀୟ ଭାଇ
ସାମାନ୍ୟ ବଚସାକୁ କେନ୍ଦ୍ର କରି ରକ୍ତର ହୋଲି ଖେଳିଲା ସମ୍ପର୍କୀୟ ଭାଇ । ଭାଇ ଓ ଭଉଣୀର କଳହ ମେଣ୍ଟାଇବାକୁ ଯାଇ ମଦ ନିଶାରେ ନିଜ ପିଉସୀ ପୁଅ ଭାଇକୁ ହତ୍ୟା କରିଛି ମାମୁ ପୁଅ ଭାଇ । ଏହି ଭଳି ଏକ ଅଭାବନୀୟ ଘଟଣା ଘଟିଛି ନବରଙ୍ଗପୁର ଜିଲ୍ଲା ରାଇଘର ଥାନା ଯୋଡ଼େଙ୍ଗାର ନୂଆଗାଁରେ । ଏହି ହତ୍ୟା ଘଟଣା ସମ୍ପର୍କରେ ମୃତ ସଫସିଂ ଗଣ୍ଡଙ୍କ ଭାଇ ବିଜୟ ଗଣ୍ଡ ରାଇଘର ଥାନାରେ ଅଭିଯୋଗ କରିଛନ୍ତି । ଅଭିଯୁକ୍ତ ରାଜେଶ ଗଣ୍ଡଙ୍କୁ ଅଟକ ରଖିଛି ପୋଲିସ । ନବରଙ୍ଗପୁରରୁ ସାଇଣ୍ଟିଫିକ ଟିମ ସହ ରାଇଘର ପୋଲିସ ଘଟଣାସ୍ଥଳରେ ପହଂଚି ଅଧିକ ତଦନ୍ତ କରୁଛନ୍ତି ।
ମୁମ୍ବାଇ ପୌର ନିର୍ବାଚନ ପୂର୍ବରୁ ମହାବିକାଶ ଅଘାଡିରେ ବିବାଦ
ମୁମ୍ବାଇ ପୌର ନିର୍ବାଚନ ପୂର୍ବରୁ ମହାବିକାଶ ଅଘାଡିରେ ବିବାଦ l ରାଜ ଠାକରେ ନେତୃତ୍ବାଧୀନ ମହାରାଷ୍ଟ୍ର ନବନିର୍ମାଣ ସେନା ସହ ଉଦ୍ଧବ ଠାକରେ ନେତୃତ୍ବାଧୀନ ଶିବସେନା(ୟୁବିଟି) ହାତ ମିଳାଇବା ନିଶ୍ଚିତ ହୋଇଥିବାବେଳେ କଂଗ୍ରେସର ଦାବିକୁ ଅଗ୍ରାହ୍ୟ କରାଯାଇଛି l ଶିବସେନା(ୟୁବିଟି) ସାଂସଦ ସଞ୍ଜୟ ରାଓତ କହିଛନ୍ତି- କାହାର ନିର୍ଦ୍ଦେଶ ଉପରେ ଏହି ମେଣ୍ଟ ନିର୍ଭର କରୁନାହିଁ l ମେଣ୍ଟରେ ଏମଏନଏସକୁ ସାମିଲ କରାଯିବ କି ନାହିଁ ସେସମ୍ପର୍କରେ ଦିଲ୍ଲୀରୁ ନିର୍ଦ୍ଦେଶ ଆସିଲେ ହିଁ କାର୍ଯ୍ୟକାରୀ କରାଯିବ ବୋଲି କଂଗ୍ରେସର ଯୁକ୍ତିକୁ ଅଗ୍ରାହ୍ୟ କରିଛନ୍ତି ସଞ୍ଜୟ l କିଛି ଦିନ ତଳେ ମହାରାଷ୍ଟ୍ର କଂଗ୍ରେସ ପକ୍ଷରୁ କୁହାଯାଇଥିଲା ଯେ, ଦିଲ୍ଲୀରୁ ନିର୍ଦ୍ଦେଶ ନ ଆସିଲେ ମେଣ୍ଟରେ ଏମଏନଏସକୁ ସାମିଲ କରାଯିବ ନାହିଁ l ସଞ୍ଜୟ କହିଛନ୍ତି- ଏ ସଂକ୍ରାନ୍ତ ନିଷ୍ପତ୍ତି କଂଗ୍ରେସର ବ୍ୟକ୍ତିଗତ ହୋଇପାରେ l ମେଣ୍ଟ ନେଇ ଶିବସେନା ଓ ଏମଏନଏସ ଆଗକୁ ଆସିଗଲେଣି l ଏନେଇ କାହାର ନିର୍ଦ୍ଦେଶ ଜରୁରୀ ନୁହେଁ l ମେଣ୍ଟ ନିଷ୍ପତ୍ତିକୁ ଶରଦ ପାଓ୍ବାର ନେତୃତ୍ବାଧୀନ ଏନସିପି(ଏସପି) ଓ ବାମପନ୍ଥୀ ସମ୍ମତି ପ୍ରକାଶ କରିଛନ୍ତି l
ମହାରାଷ୍ଟ୍ର ପିସିସି ସଭାପତି ହର୍ଷବର୍ଦ୍ଧନ ସପକାଲଙ୍କ ନେତୃତ୍ବରେ ବସିଥିବା ବୈଠକରେ ମୁମ୍ବାଇ ନିର୍ବାଚନରେ କେବଳ ଇଣ୍ଡି ମେଣ୍ଟ ସଦସ୍ୟଙ୍କୁ ନେଇ ମେଣ୍ଟ ଗଠନ କରାଯାଉ ବୋଲି ଦଳର ନେତାମାନେ କହିଥିଲେ l ଉତ୍ତର ଭାରତୀୟ ବିରୋଧୀ ମାନସିକତା ଓ ସଂଖ୍ୟାଲଘୁ ବିରୋଧୀ ମନୋଭାବ ଯୋଗୁ ଏମଏନଏସକୁ ମେଣ୍ଟରେ ସାମିଲ କରାଗଲେ ତାହା ଜାତୀୟ ଦଳ କଂଗ୍ରେସ ପ୍ରତି ବିପଦ ସୃଷ୍ଟି କରିବ ବୋଲି ଦଳର ନେତାମାନେ ବିଚାର କରୁଛନ୍ତି l ଯଦି ଏମଏନଏସ ସହ ମେଣ୍ଟ କରାଯାଏ ତେବେ କଂଗ୍ରେସକୁ ଏହାର ମୂଲ୍ୟ ଅଧିକ ଦେବାକୁ ପଡିବ ବୋଲି ବିଚାର କରାଯାଉଛି l ସେପଟେ ଏନସିପି(ଏସପି) କହିଛି ଏମଏନଏସ ସହ ମେଣ୍ଟ ବିଜେପି ଲାଗି କ୍ଷତିର କାରଣ ହେବ l ଆସନ୍ତା ବର୍ଷ ପ୍ରାରମ୍ଭରେ ଦେଶର ସବୁଠାରୁ ଧନୀ ମହାନଗର ନିଗମ କୁହାଯାଉଥିବା ବୃହନ ମୁମ୍ବାଇ ମ୍ୟୁନିସପାଲ କର୍ପୋରେସନର ନିର୍ବାଚନ ଅନୁଷ୍ଠିତ ହେବ l
ଏକ ତରଫା ପ୍ରେମ ପାଇଁ ଜଘନ୍ୟ କାଣ୍ଡ: ଲିଫ୍ଟ ଦେବା ଆଳରେ ଯୁବତୀଙ୍କୁ ଅପହରଣ କଲା ଯୁବକ
ଏକ ତରଫା ପ୍ରେମ ପାଇଁ ଜଘନ୍ୟ କାଣ୍ଡ। ଲିଫ୍ଟ ଦେବା ଆଳରେ ଯୁବତୀଙ୍କୁ ଅପହରଣ କଲା ଯୁବକ। ଅପହରଣ ପରେ ମାରଣାସ୍ତ୍ର ଦେଖାଇ ଜବରଦସ୍ତି କଲେ ବିବାହ। ୧୫ ଦିନ ହେବ ବନ୍ଦୀ କରି ଘରେ ରଖିଥିଲେ । ସୁଯୋଗ ଦେଖି ଖସି ଆସିଥିଲେ ଯୁବତୀ। ଖସି ଆସି ମହିଳା ଥାନାରେ ଅଭିଯୋଗ କଲେ। ଅଭିଯୋଗ ଆଧାରରେ ଯୁବକଙ୍କୁ ବାନ୍ଧିଲା ମହିଳା ଥାନା ପୋଲିସ। ଗିରଫ ଅଭିଯୁକ୍ତ ଜଣକ ହେଲେ ରିତିକ୍ ନାୟକ। ଅଭିଯୁକ୍ତକୁ କଟକରୁ ଗିରଫ କଲା କମିଶନରେଟ୍ ପୋଲିସ। ଅଭିଯୁକ୍ତ ଜଣଙ୍କ ପୀଡିତାଙ୍କ ସହ ପୂର୍ବରୁ ପରିଚିତ ଥିବାର ସୁଯୋଗ ନେଇ ଅପହରଣ କରିଥିବା କହିଛି ପୋଲିସ।
କଟକ ଜିଲ୍ଲାରେ ଲକ୍ଷାଧିକ ଟଙ୍କାର ସୁନାଗହଣା ଲୁଟ
କଟକ ଜିଲ୍ଲା କାନପୁର ଥାନା ଅଧୀନ ହଟିଆପଲ୍ଲୀରୁ ଲକ୍ଷାଧିକ ଟଙ୍କାର ସୁନାଗହଣା ଲୁଟ । ହଟିଆପଲ୍ଲୀ ଛକରେ ଅଳଙ୍କାର ଦୋକାନ କରିଥିବା କୈଳାସ ଚନ୍ଦ୍ର ପୃଷ୍ଟିଙ୍କ ଘରୁ ଲୁଟ ହୋଇଛି । ଗତକାଲି ବିଳମ୍ବିତ ରାତିରେ ୭ ଜଣ ଦୁର୍ବୃତ୍ତ ୩୫ ଲକ୍ଷ ଟଙ୍କାର ସୁନା ଗହଣା ଓ ନଗଦ ୧୮ ଲକ୍ଷ ଟଙ୍କାର ବ୍ୟାଗ ଚୋରି କରି ନେଇଥିବା କାନପୁର ଥାନାରେ ଅଭିଯୋଗ ହୋଇଛି । ଅଭିଯୋଗ ଅନୁଯାୟୀ କୈଳାଶ ପୃଷ୍ଟିଙ୍କ ଝିଅ ପାଠ ପଢ଼ୁଥିବା ସମୟରେ ହଠାତ ଦୁର୍ବୃତ୍ତ ମାନେ ଘର ଭିତରେ ପଶିଯାଇ ମାରଣାସ୍ତ୍ର ଦେଖାଇ ସୁନା ଅଳଙ୍କାର ଲୁଟିଥିଲେ। ଚୋରି ବେଳର ସିସିଟିଭି ଫୁଟେଜ ମଧ୍ୟ ପୋଲିସର ହସ୍ତଗତ ହୋଇଛି । କାନପୁର ପୋଲିସ ଘଟଣାସ୍ଥଳରେ ପହଂଚି ପ୍ରାଥମିକ ତଦନ୍ତ କରୁଛି । ଏହା ସହ ଡଗ ସ୍କ୍ୱାଡ ଆଣି ଅଧିକ ତଦନ୍ତ କରାଯିବ ବୋଲି କହିଛନ୍ତି କାନପୁର ଥାନା ଅଧିକାରୀ ତପନ ନାୟକ ।
ରାଜଧାନୀରେ ବଡ଼ ଅଘଟଣ: ପ୍ରେମିକାର ତଣ୍ଟି କାଟିଦେଲା ପ୍ରେମିକ
ପ୍ରେମିକାର ତଣ୍ଟି କାଟିଦେଲା ପ୍ରେମିକ । ଭୁବନେଶ୍ବର ଚନ୍ଦ୍ରଶେଖରପୁର ଥାନା ବୁଦ୍ଧ ପାର୍କ ନିକଟରେ ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି । ଯୁବତୀ ଜଣଙ୍କ ଆଉ ଜଣଙ୍କୁ ପ୍ରେମ କରୁଥିବା ନେଇ ସନ୍ଦେହ କରୁଥିଲା ପ୍ରେମିକ । ଆଜି ସକାଳୁ ଏନେଇ ବୁଦ୍ଧ ପାର୍କ ନିକଟରେ ଦୁହିଁଙ୍କ ଭିତରେ ଝଗଡ଼ା ହୋଇଥିଲା । ପରେ ଉତକ୍ଷିପ୍ତ ହୋଇ ପ୍ରେମିକାର ତଣ୍ଟି କାଟିଦେଇଥିଲା ଅଭିଯୁକ୍ତ ଯୁବକ। ଗୁରୁତର ଅବସ୍ଥାରେ ଯୁବତୀ ଜଣଙ୍କ ହସ୍ପିଟାଲରେ ଭର୍ତ୍ତି ହୋଇଛନ୍ତି । ଅଭିଯୁକ୍ତ ପ୍ରେମିକ ଜଣଙ୍କୁ ଲୋକେ କାବୁ କରି ପୋଲିସ ଜିମା ଦେଇଛନ୍ତି । ପ୍ରେମିକ ଓ ପ୍ରେମିକା ଉଭୟଙ୍କ ଘର ଦାର୍ଜିଲିଂ ବୋଲି ଜଣାପଡିଛି । ବୁଦ୍ଧ ପାର୍କ ନିକଟରେ ଉଭୟ ମୋମୋ ଦୋକାନ କରିଥିଲେ । ଅଭିଯୁକ୍ତ ପ୍ରେମିକର ନାଁ ଟିଙ୍କୁ ଗୁରୁମ । ଅଭିଯୁକ୍ତକୁ ଗିରଫ ପରେ କୋର୍ଟଚାଲାଣ କରିବ ପୋଲିସ ।
ଆଜି ୫ ଲକ୍ଷ ଟଙ୍କାର ସୁନା କିଣିଲେ ୨୦୩୦ ବେଳକୁ ତାହା କେତେ ବଢ଼ିଯିବ ?
ସୁନାର ଦର ବୃଦ୍ଧି ଗତ କିଛି ବର୍ଷ ହେଲା ନିବେଶକଙ୍କୁ ନିଜ ଆଡ଼କୁ ଆକୃଷ୍ଟ କରୁଛି । ଗତ ୪-୫ ବର୍ଷର ଟ୍ରାକ ରେକର୍ଡ ଯଦି ଦେଖିବ, ତେବେ ସୁନାର ଦାମ ୧.୫୦ ଲକ୍ଷ ପାଖାପାଖି ପହଞ୍ଚି ସାରିଛି । ଏହାର ଦାମରେ ରେକର୍ଡ ବୃଦ୍ଧି ଏବେ ବି ଜାରି ରହିଛି । ଆଜି ଦିଲ୍ଲୀରେ ୨୪ କ୍ୟାରେଟ ସୁନା ଦର ପ୍ରତି ୧୦ ଗ୍ରାମ ପିଛା ୧,୨୫,୯୯୦ ଟଙ୍କା ରହିଛି । ଗୋଟିଏ ଦିନରେ ସୁନା ଦର ୧୮୭୦ ଟଙ୍କା ବୃଦ୍ଧି ଘଟିଛି । ଏପରି ସ୍ଥିତିରେ ଏକ ପ୍ରଶ୍ନ ଉଠୁଛି ଆଗାମୀ ୪-୫ ବର୍ଷ ପାଇଁ ଯଦି ସୁନାରେ ନିବେଶ କରାଯିବ, ତେବେ ତାହା କେତେ ରିଟର୍ଣ୍ଣ ଦେବ ?
୨୦୦୦ରୁ ୨୦୨୫ ମଧ୍ୟରେ ସୁନାର ଟ୍ରାକ ରେକର୍ଡ ମୁତାବକ, ଏହି ଅବଧିରେ ଚକ୍ରବୃଦ୍ଧି ବାର୍ଷିକ ବୃଦଧି ଦର (CAGR) ୧୪ ପ୍ରତିଶତ ରହିଛି । ୨୫ ବର୍ଷ ମଧ୍ୟରେ କେବଳ ୨୦୧୩, ୨୦୧୫ ଓ ୨୦୨୧ରେ ସୁନା ନେଗେଟିଭ ରିଟର୍ଣ୍ଣ ଦେଇଥିଲା । ୨୦୦୦ରେ ୨୪ କ୍ୟାରେଟ ସୁନା ୧୦ ଗ୍ରାମ ପିଛ ୪,୪୦୦ ଟଙ୍କା ରହିଥିଲା । ମାତ୍ର ଏବେ ତାହା ୧.୨୫ ଲକ୍ଷ ଟଙ୍କା ରହିଛି । ପ୍ରତିବର୍ଷ ସୁନାରେ ଆଭରେଜ ୨୫-୩୫ ପ୍ରତିଶତ ପାଖାପାଖି ରିଟର୍ଣ୍ଣ ଦେଉଛି । ଆଗାମୀ ଦିନରେ ମଧ୍ୟ ସୁନାରେ ବମ୍ପର ରିଟର୍ଣ୍ଣ ମିଳିବ । ୨୦୩୦ ବେଳକୁ ୧୦ ଗ୍ରାମ ସୁନା ଦର ୨.୫୦ ଲକ୍ଷ ପର୍ଯ୍ୟନ୍ତ ପହଞ୍ଚିପାରେ । ଏପରିକି ୭-୭.୫୦ ଲକ୍ଷ ପର୍ଯ୍ୟନ୍ତ ପହଞ୍ଚିପାରେ ବୋଲି ମଧ୍ୟ କିଛି ରିପୋର୍ଟରେ କୁହାଯାଇଛି ।
କେଉଁ ସବୁ କାରଣରୁ କିଡନୀ ଷ୍ଟୋନ ହୋଇଥାଏ: ଏହି ରୋଗରୁ ମୁକ୍ତି ପାଇବେ କିପରି ?
କିଡନୀ ଷ୍ଟୋନ ଏକ ସାଧାରଣ କିନ୍ତୁ ଗମ୍ଭୀର ସ୍ବାସ୍ଥ୍ୟ ସମସ୍ୟା । ଏହାକୁ ମେଡିକାଲ ଭାଷାରେ ରୀନଲ କ୍ୟାଲକୁଲୀ ମଧ୍ୟ କୁହାଯାଇଥାଏ । ଯଦି ଏହାକୁ ଶୀଘ୍ର ଠିକ କରାନଯାଏ, ତେବେ ବହୁତ ସମସ୍ୟା ସୃଷ୍ଟି ହୋଇଥାଏ । ମିନେରାଲ୍ସ ଓ ଲୁଣ ପରସ୍ପର ସହ ମିଶି କ୍ରିଷ୍ଟଲ ରୂପ ଧାରଣ କରିବା ଦ୍ବାରା କିଡନୀ ଷ୍ଟୋର ହୋଇଥାଏ । ଏହି କାରଣରୁ ଯନ୍ତ୍ରଣା, ପରିସ୍ରାରେ ରକ୍ତ, ସଂକ୍ରମଣ ଓ ବାନ୍ତି ପରି ଅନେକ ସମସ୍ୟା ହୋଇପାରେ । ଥଣ୍ଡାରେ କିଡନୀ ଷ୍ଟୋନ ମାମଲା ଅତ୍ୟଧିକ ବଢ଼ିଯାଇାଏ । ସେଥିପାଇଁ ଆପଣଙ୍କୁ ଏହା ପଛର କାରଣ ଓ ନିରାକରଣ ବିଷୟରେ ଜାଣିବା ଉଚିତ ।
ସାଧାରଣ ଭାବେ କିଡନୀ ଷ୍ଟୋନର ଆଶଙ୍କା ଗରମ ଦିନେ ଅଧିକ ହୋଇଥାଏ । କାରଣ ଗରମରେ ଅଧିକ ଝାଳ ବୋହିବା ଓ ଡିହାଇଡ୍ରେସନ କାରଣରୁ ପଥର ସମସ୍ୟା ଦେଖାଦେଇଥାଏ । ଲାଇଫଷ୍ଟାଇନ ପରିବର୍ତ୍ତନ ଓ ଫିଜିଓଲୋଜିକାଲ ପରିବର୍ତ୍ତନ କାରଣରୁ ଥଣ୍ଡାଦିନେ କିଡନୀ ଷ୍ଟୋନ ହୋଇଥାଏ । ଥଣ୍ଡାଦିନେ କମ୍ ଶୋଷ ଲାଗିବା କାରଣରୁ ଆମେମାନେ କମ୍ ପାଣି ପିଇଥାଉ । ଏହା ଶରୀରର ଡିହାଇଡ୍ରାସନର ଆବଶ୍ୟକତାକୁ ପୂରଣ କରିପାରିନଥାଏ । ଏହାଦ୍ବାରା ପରିସ୍ରା ମଧ୍ୟ ଗାଢ଼ ହୋଇଥାଏ ଓ କିଡନୀ ଷ୍ଟୋନ ହେବାର ଆଶଙ୍କା ବଢ଼ିଯାଇଥାଏ ।
ଥଣ୍ଡା ପାଣିପାଗରେ ଅଧିକାଂଶ ଲୋକ ଆଳସ୍ୟ କାରଣରୁ ଶାରୀରିକ କାର୍ଯ୍ୟ କରନ୍ତି ନାହିଁ । ଗୋଟିଏ ସ୍ଥାନରେ ଅଧିକ ସମୟ ଧରି ବସି ରହିଥାନ୍ତି । ଏହାଦ୍ବାରା ଶରୀରରେ କ୍ୟାଲସିୟମର ସ୍ତର ପ୍ରଭାବିତ ହେବା ସହ କିଡନୀରେ ଜମା ହୋଇଥାଏ । ଏହି ସିଜିନରେ ଅଧିକାଂଶ ଲୋକଙ୍କର ଖାଦ୍ୟପେୟ ଅତ୍ୟଧିକ ହୋଇଥାଏ । ଏହା ଶରୀର ଓ କିଡନୀ ପାଇଁ ଠିକ୍ ନୁହେଁ । କିଡନୀକୁ ହେଲଦୀ ରଖିବା ପାଇଁ ଦୈନିକ ସୁସ୍ଥ ଓ ସନ୍ତୁଳିତ ଭୋଜନ କରିବା ଉଚିତ । ଅଧିକ ଫ୍ୟାଟି, ତେଳ, ଚିନୀ ଓ କାର୍ବସ ଭରପୂର ଭୋଜନ ଠାରୁ ଦୂରେଇ ରହିବା ଉଚିତ ।
କିଡନୀ ଷ୍ଟୋନରୁ ବର୍ତ୍ତିବେ କିପରି ?
ଗରମ ହେଉ କି ଥଣ୍ଡା ହେଉ, କିଡନୀ ଷ୍ଟୋନରୁ ବର୍ତ୍ତିବା ପାଇଁ ଶରୀରକୁ କେବେ ବି ପାଣିର ଅଭାବ ହେବାକୁ ଦିଅନ୍ତୁ ନାହିଁ । ଦିନ ସାରା ଅଧିକ ପାଣି ପିଇବା ଫଳରେ ପରିସ୍ରା ପତଳା ହୁଏ ଓ ଷ୍ଟୋନ ହେବାର ଆଶଙ୍କା କମି ଯାଇଥାଏ । ସେଥିପାଇଁ ଦିନକୁ ଅତିକମରେ ୨-୩ ଲିଟର ପାଣି ପିଇବାକୁ ଲକ୍ଷ୍ୟ ସ୍ଥିର କରନ୍ତୁ । ଯଦି କାହାର ପୂର୍ବରୁ କିଡନୀ ସମସ୍ୟା ଥିବ, ତେବେ ନଟସ, ବାଦାମ, ପାଲକ, ରେଡ ମିଟ, ଚିକେନ, ଦୁଗ୍ଧଜାତ ସାମଗ୍ରୀ ଅଧିକ ମାତ୍ରାରେ ଖାଇବା ଉଚିତ । ବ୍ୟାୟାମ କେବଳ ଶରୀରକୁ ଫିଟ୍ ରଖେ ନାହିଁ, ଏହା କିଡନୀକୁ ମଧ୍ୟ ହେଲଦୀ ରଖିଥାଏ । ୟୁରିନାରୀ ଫ୍ଲୋ ଠିକରେ ହେବାରେ ବ୍ୟାୟାମ ସହାୟକ ହୋଇଥାଏ ଓ କିଡନୀ ଷ୍ଟୋନ ହେବା ଆଶଙ୍କା କମ୍ ହୋଇଥାଏ । କ୍ୟାଲସିୟମ ଶରୀର ପାଇଁ ବହୁତ ଜରୁରୀ କିନ୍ତୁ ଏହାକୁ ସପ୍ଲିମେଣ୍ଟ ମାଧ୍ୟମରେ ଅଧିକ ନେବା କିଡନୀ ଷ୍ଟୋନର ଆଶଙ୍କା ବଢ଼ାଇଥାଏ । ମୋଟାପା କିଡନୀ ଷ୍ଟୋନର ଏକ ବଡ଼ ରିସ୍କ ଫ୍ୟାକ୍ଟର । ତେଣୁ ଶରୀରର ଓଜନକୁ ସର୍ବଦା ସନ୍ତୁଳିତ ରଖନ୍ତୁ ।