ଦିଗପହଣ୍ଡି: କାଜୁ ତୋଟାରୁ ମାର୍ବଲ ମିସ୍ତ୍ରୀଙ୍କ ମୃତଦେହ ଉଦ୍ଧାର। ଦିଗପହଣ୍ଡି ଥାନା ମୌଳାଭଞ୍ଜା ନିକଟରୁ ଏକ ମୃତଦେହ ଉଦ୍ଧାର କରାଯାଇଛି । ମୃତବ୍ୟକ୍ତି ହେଉଛନ୍ତି ସାନଖେମୁଣ୍ଡି ବ୍ଲକ ଛଣମେରି ଗାଁର ୨୫ ବର୍ଷୀୟ ମାର୍ବଲ ମିସ୍ତ୍ରୀ ଲଳିତ ମୋହନ ରାଉଳ । ମୃତଦେହଟି ମୌଳାଭଞ୍ଜା ଶଙ୍ଖଠାରୁ ପ୍ରାୟ ୫୦୦ ମିଟର ଦୂର କାଜୁ ତୋଟାରେ ପଡ଼ିଥିବା ବେଳେ ନାକ ଏବଂ ପାଟିରୁ ରକ୍ତ ବାହାରୁଥିବା ଦେଖିବାକୁ ମିଲିଛି । ମୃତଦେହ ନିକଟରୁ ଏକ ହୋଣ୍ଡା ସାଇନ୍ ବାଇକ ମିଳିଥିବା ବେଳେ ବାଇକଟି ମୃତ ଯୁବକଙ୍କର ବୋଲି ଜଣାପଡିଛି । ଘଟଣାସ୍ଥଳରେ ଦିଗପହଣ୍ଡି ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ଗତକାଲି ସନ୍ଧ୍ୟାରୁ ମୃତ ଯୁବକଙ୍କ ମୋବାଇଲ ସୁଇଚ ଅଫ୍ ରହିଥିବା ପରିବାର ଲୋକେ ସୂଚନା ଦେଇଛନ୍ତି । ପ୍ରାଥମିକ ତଦନ୍ତରୁ ଏହା ଆତ୍ମହତ୍ୟା ବୋଲି ଅନୁମାନ କରାଯାଉଛି । ଘଟଣା ସ୍ଥଳରେ ସାଇଣ୍ଟିଫିକ୍ ଟିମ୍ ସହ ସନ୍ଧାନୀ କୁକୁର ପହଞ୍ଚି ଅଧିକ ତଦନ୍ତ ଜାରି ରଖିଛନ୍ତି ।
ଗୌରୀ ମିଶ୍ର ହତ୍ୟା ମାମଲା, ଆଉ ଜଣକୁ ଗିରଫ କରି କୋର୍ଟ ଚାଲାଣ କଲା ଗୁଣୁପୁର ପୋଲିସ୍
ଗୁଣୁପୁର: ବହୁଚର୍ଚ୍ଚିତ ଏନଜିଓ ନିର୍ଦ୍ଦେଶକ ଗୌରି ମିଶ୍ର ହତ୍ୟାକାଣ୍ଡ ମାମଲା । ଆଉ ଜଣକୁ ଗିରଫ କରି କୋର୍ଟ ଚାଲାଣ କଲା ଗୁଣୁପୁର ପୋଲିସ୍ । ଗିରଫ ଅଭିଯୁକ୍ତ ହେଲେ ମୁନା ଲିମା। ଅଭିଯୁକ୍ତର ଘର ଗୁଣପୁର ଆମ୍ବେଦନଗର ବୋଲି ଜଣାପଡ଼ିଛି । ମୁନା ଲିମା ଫେରାର୍ ଥିବାବେଳେ ଗୁଣୁପୁର ପୋଲିସ୍ ମୁନାକୁ ଆର୍.ଉଦୟଗିରିଠାରୁ ଉଠାଇ ଆଣିଥିଲା । ଗୌରୀ ମିଶ୍ର ଓ ସୁପାରି କିଲର ଭି.ରାଜେସ୍ ହତ୍ୟାକାଣ୍ଡ ଘଟଣାରେ ପୂର୍ବରୁ ୯ ଜଣ ଅଭିଯୁକ୍ତ ଗିରଫ ହୋଇଥିଲେ । ବର୍ତ୍ତମାନ ସୁଦ୍ଧା ମୁନା ସମେତ ୧୦ ଜଣ ଅଭିଯୁକ୍ତକୁ ଗିରଫ କରିଛି ପୋଲିସ୍ । ଏହି ହତ୍ୟାକାଣ୍ଡ ଘଟଣାରେ ଗଞ୍ଜାମ ଅଞ୍ଚଳର କାହ୍ନୁ ପ୍ରଧାନ ନାମକ ଆଉ ଜଣେ ଅଭିଯୁକ୍ତ ଫେରାର୍ ରହିଛି । ପୋଲିସ୍ ମୁନାକୁ ଗିରଫ କରି ଗୌରି ମିଶ୍ର ହତ୍ୟାକାଣ୍ଡ ଘଟଣାର ଅନେକ ରହସ୍ୟ ହାସଲ କରିପାରିଛି ।
ସୂଚନା ଅନୁସାରେ ଗତ ମେ ୧୩ ତାରିଖରେ ଗୌରି ମିଶ୍ରକୁ ଗୁଣପୁର ବଂଶଧାରା ବ୍ରିଜ ଉପରେ ଗୁଳି କରି ହତ୍ୟା କରାଯାଇଥିଲା । ଜମି ଜମା ବିବାଦକୁ ନେଇ ହତ୍ୟା ହୋଇଥିବା ବେଳେ ହତ୍ୟାକାଣ୍ଡ ପାଇିଁ ଭି.ରାଜେସକୁ ସୁପାରି ଦେଇଥିଲେ। ଭି. ରାଜେସ୍ ଓ ତା’ର ସହଯୋଗୀ ସୁପାରକିଲର ନେଇ ହତ୍ୟା କରିବା ପରେ ବକେୟା ଟଙ୍କା ସୁପାରି କିଲର ମାଗିବା ପରେ ଭି ରାଜେଶକୁ ପ୍ରମାଣ ନଷ୍ଟ ପାଇିଁ ସୁପାରି ଦେଇଥିବା ଯୁବକ ଆର୍ କ୍ରିଷ୍ଣା ଓ କିଛି ସହଯୋଗି ମିଶି ବିଶାଖପାଟଣାରେ ହତ୍ୟା କରି ପୋତି ଦେଇଥିଲେ ।
ତିରୁପତି ମନ୍ଦିରରେ ପୂଜାର୍ଚ୍ଚନା କଲେ ଇସ୍ରୋ ବୈଜ୍ଞାନିକ, ଚନ୍ଦ୍ରୟାନର ସଫଳତା ନେଇ କଲେ ପ୍ରାର୍ଥନା
ତିରୁପତି: ଆସନ୍ତାକାଲି ଲଞ୍ଚ ହେବ ବହୁ ପ୍ରତୀକ୍ଷିତ ଚନ୍ଦ୍ରୟାନ-୩ । ତାପୂର୍ବରୁ ଆନ୍ଧ୍ରପ୍ରଦେଶର ତିରୁପତି ଭେଙ୍କଟଚଲାପାଥି ମନ୍ଦିର ପୂଜାର୍ଚ୍ଚନା କରିଛନ୍ତି ଇସ୍ରୋର ବୈଜ୍ଞାନିକ । ଚନ୍ଦ୍ରୟାନ-୩ ମିଶନର ସଫଳତା ନେଇ କାମ କରିଛନ୍ତି । ଆଜି ଦିନ ଗୋଟାଏରୁ କାଉଣ୍ଟଡାଉନ ଆରମ୍ଭ ହେବ । ଆସନ୍ତାକାଲି ଦିନ ୨ଟା ୩୫ ଉତକ୍ଷେପଣ ହେବ ଚନ୍ଦ୍ରୟାନ-୩ । ସେପଟେ ଇସ୍ରୋର ପ୍ରସ୍ତୁତି ଚୁଡାନ୍ତ ହୋଇଛି । ଏଥରକ ଚନ୍ଦ୍ର ପୃଷ୍ଠରେ ସଫଳ ଲ୍ୟାଣ୍ଡିଂକୁ ଫୋକସ କରାଯାଇଥିବାବେଳେ ଏନେଇ ପୂର୍ବାପେକ୍ଷା ଅଧିକ ଇନ୍ଧନ, ବିଫଳ ନହେବା ପାଇଁ ଅଧିକ ପଦକ୍ଷେପ ଏବଂ ଏକ ବିଶାଳ ଲ୍ୟାଣ୍ଡିଂ ସାଇଟ ପ୍ରସ୍ତୁତ କରାଯାଇଛି । ଲଞ୍ଚର ମାସକ ପରେ ଚନ୍ଦ୍ରୟାନ-୩ ତା’ର କକ୍ଷ ପଥରେ ଅବସ୍ଥାପିତ ହେବ । ତେବେ ଲ୍ୟାଣ୍ଡର ବିକ୍ରମ, ରୋଭର ପ୍ରଜ୍ଞାନ ଅଗଷ୍ଟ ୨୩ରେ ଚନ୍ଦ୍ରରେ ଚନ୍ଦ୍ରୟାନ-୩କୁ ଲ୍ୟାଣ୍ଡ କରିବେ ବୋଲି ଅନୁମାନ କରାଯାଉଛି ।
ଆନ୍ଧ୍ର ପ୍ରଦେଶର ଶ୍ରୀହରିକୋଟାସ୍ଥିତ ସତୀଶ ଧାଓ୍ବନ ସ୍ପେସ୍ ଷ୍ଟେସନ ଲଞ୍ଚ ପ୍ୟାଡରେ ଚନ୍ଦ୍ରାୟନ ପହଞ୍ଚି ଇତିମଧ୍ୟରେ ରିହର୍ସାଲ ଶେଷ ହୋଇଛି । LVM-3 ରକେଟ ଯୋଗେ ଚନ୍ଦ୍ରୟାନ-୩ ଉତକ୍ଷେପଣ କରାଯିବ । ଏହି ଅଭିଯାନ ଲାଗି ସ୍ବଦେଶୀ ଜ୍ଞାନକୌଶଳରେ ନିର୍ମିତ ଲ୍ୟାଣ୍ଡର ମଡ୍ୟୁଲ ଯାହାର ନାମ ବିକ୍ରମ, ଏକ ପ୍ରପଲସନ ମଡ୍ୟୁଲ ଓ ଏକ ରୋଭର ଯାହାର ନାମ ପ୍ରଜ୍ଞାନ ପ୍ରସ୍ତୁତ ହୋଇଛି । ଚନ୍ଦ୍ରପୃଷ୍ଠରେ ସେଫ ଓ ସଫ୍ଟ ଲ୍ୟାଣ୍ଡିଂ ସହ ରୋଭିଂକୁ ଅଧିକ ସୁଗମ କରିବା ଚନ୍ଦ୍ରୟାନ-୩ର ଲକ୍ଷ୍ୟ । ଏହା ସହ ଚନ୍ଦ୍ର ପୃଷ୍ଠରେ ରୋଭରର ପ୍ରଦିକ୍ଷଣ, ବିଭିନ୍ନ ବୈଜ୍ଞାନିକ ଗବେଷଣା ଆଦି ଲାଗି ଏହି ଅଭିଯାନ ଉଦ୍ଦିଷ୍ଟ । ୨୦୦୮-୦୯ରେ ହୋଇଥିବା ଚନ୍ଦ୍ରୟାନ-୧ ମିଶନ ଦ୍ବାରା ଚନ୍ଦ୍ର ପୃଷ୍ଠରେ ଜଳର ସନ୍ଧାନ ମିଳିଥିଲା । ମାତ୍ର ୨୦୧୯ ଅଗଷ୍ଟରେ ହୋଇଥିବା ଚନ୍ଦ୍ରୟାନ-୨ ବିଫଳ ହୋଇଥିଲା । କିନ୍ତୁ ଚନ୍ଦ୍ରୟାନ-୨ରେ ଚନ୍ଦ୍ର ପୃଷ୍ଠକୁ ପଠାଯାଇଥିବା ଅର୍ବିଟର ଏବେ ବି ସଫଳତାର ସହ କାର୍ଯ୍ୟ କରୁଛି । ତେବେ ଚନ୍ଦ୍ରପୃଷ୍ଠରେ ଚନ୍ଦ୍ରୟାନ-୩ ସଫ୍ଟ ଲ୍ୟାଣ୍ଡିଂ କରିବ ବୋଲି ଆଶା ପ୍ରକାଶ କରିଛନ୍ତି ଇସ୍ରୋ ମୁଖ୍ୟ ଏସ. ସୋମନାଥ । ଚନ୍ଦ୍ର ପୃଷ୍ଠରେ ଚନ୍ଦ୍ରୟାନ-୩ ସୁରକ୍ଷିତ ଲ୍ୟାଣ୍ଡିଂ କଲେ ଏଭଳି କରିବାରେ ଆମେରିକା, ରୁଷ, ଚୀନ ପରେ ଚତୁର୍ଥ ଦେଶ ହେବ ଭାରତ ।
ଜୁଲାଇ ୨୬ରେ ଓଡ଼ିଶା ଆସିବେ ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁ
କଟକ: ଜୁଲାଇ ୨୬ରେ ଓଡ଼ିଶା ଆସିବେ ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁ। ହାଇକୋର୍ଟର ୭୫ ବର୍ଷ ପୂର୍ତ୍ତି ଉଦଯାପନୀ ଉତ୍ସବରେ ମୁଖ୍ଯ ଅତିଥି ଭାବେ ଯୋଗଦେବେ। ଏହାସହ କଟକର ୬ଟି ସ୍ଥାନ ପରିଦର୍ଶନ କରିବା କାର୍ଯ୍ୟକ୍ରମ ରହିଛି । ମହାମହିମ ମା’ କଟକ ଚଣ୍ଡୀଙ୍କ ଦର୍ଶନ ସହିତ ଗୋରାକବର, ଏସସିବି ମେଡିକାଲ, ନେତାଜୀ ସୁବାସ ବୋଷଙ୍କ ଜନ୍ମ ସ୍ଥାନ ଓ ନ୍ୟାସନାଲ ଆଇନ ବିଶ୍ଵବିଦ୍ୟାଳୟ ଯିବାର କାଯ୍ୟକ୍ରମ ରହିଥିବା ସୂଚନା ମିଳିଛି । ମ୍ୟାଡାମ ପ୍ରେସିଡେଣ୍ଟଙ୍କ ଗସ୍ତକୁ ନେଇ ପ୍ରଶାସନ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଛି । ଏହାପରେ ୨୭ ତାରିଖରେ ଭଦ୍ରକ ସ୍ବୟଂ ଶାସିତ ମହାବିଦ୍ୟାଳୟର ହିରକ ଜୟନ୍ତୀରେ ଯୋଗଦେବା କାର୍ଯ୍ୟକ୍ରମ ରହିଛି ।
ମେଟ୍ରୋ ଟ୍ରେନ୍ ପାଇଁ ବାରଙ୍ଗରେ ତିଆରି ହେବ ଷ୍ଟକୟାର୍ଡ ଓ ରିପ୍ୟାରିଂ ୟାର୍ଡ
କଟକ: ମେଟ୍ରୋ ଟ୍ରେନ୍ ପାଇଁ ବାରଙ୍ଗରେ ତିଆରି ହେବ ଷ୍ଟକୟାର୍ଡ ଓ ରିପ୍ୟାରିଂ ୟାର୍ଡ । ଭୁବନେଶ୍ୱର ଏୟାରପୋର୍ଟରୁ ତ୍ରିଶୂଳିଆ ଯାତାୟତ କରିବ ଏହି ମେଟ୍ରୋ ଟ୍ରେନ୍ । ତେବେ ସେହି ସମୟରେ ଯଦି କୌଣସି ଯାନ୍ତ୍ରିକ ତ୍ରୁଟି ହୁଏ କିମ୍ବା କୌଣସି ଅସୁବିଧା ତା’ର ତୁରନ୍ତ ସମାଧାନ ପାଇଁ ଏହି ୱାର୍କସପ୍ କରାଯିବ । ଏନେଇ କଟକ ଜିଲ୍ଲା ପ୍ରଶାସନ ପକ୍ଷରୁ ବାରଙ୍ଗ ଅଞ୍ଚଳରୁ ୫୦ ଏକର ଜମିର ସ୍ଥାନ ନିରୂପଣ କରାଯାଇଛି । ଖୁବଶୀଘ୍ର ଏହି ସ୍ଥାନ ନିରୂପଣ କରାଯାଇ କାର୍ଯ୍ୟ ଆରମ୍ଭ ହେବ ବୋଲି କଟକ ଜିଲ୍ଲାପାଳ ଭବାନୀ ଶଙ୍କର ଚୟିନୀ ସୂଚନା ଦେଇଛନ୍ତି ।
ବିବାଦରେ ଅକ୍ଷୟ କୁମାରଙ୍କ ଫିଲ୍ମ ଓଏମଜି-୨, ରିଲିଜ ଉପରେ ସେନ୍ସର ବୋର୍ଡ ଲଗାଇଲେ ରୋକ୍
ନୂଆଦିଲ୍ଲୀ: ପୁଣି ଚର୍ଚ୍ଚାରେ ଅକ୍ଷୟ କୁମାର । ତାଙ୍କର ଆଗାମୀ ଫିଲ୍ମ ଓଃ ମାଇ ଗଡ୍ ଫିଲ୍ମର ରିଲିଜ ଉପରେ ରୋକ ଲଗାଇଛନ୍ତି ସେନସର ବୋର୍ଡ । ଫିଲ୍ମକୁ ଆଉଥରେ ରିଭିଜନ୍ କମିଟି ନିକଟରେ ପ୍ରଦର୍ଶନ କରିବାକୁ ନିର୍ଦ୍ଦେଶ ଦେଇଛନ୍ତି । ଫିଲ୍ମର ଟିଜର ରିଲିଜ ହୋଇଥିବା ବେଳେ ଅଗଷ୍ଟରେ ୧୧ରେ ରିଲିଜ ହେବାକୁ ଯାଉଛି ଏହି ଫିଲ୍ମ । ତାପୂର୍ବରୁ ଫିଲ୍ମକୁ ସେନସର ବୋର୍ଡ ବଡ଼ ଝଟକା ଦେଇଛି । ଫିଲ୍ମରେ ଡାଏଲଗକୁ ନେଇ ଆପତ୍ତି ଜଣାଇଛନ୍ତି ସେନସର ବୋର୍ଡ । ଓଏମଜି-୨ରେ ଅକ୍ଷୟ ଓ ପଙ୍କଜଙ୍କ ସହ ଅଭିନେତ୍ରୀ ୟାମି ଗୌତମ ବି ଅଭିନୟ କରିଛନ୍ତି । ଏଥର କାହାଣୀରେ ଈଶ୍ବରଙ୍କ ଅସ୍ତିତ୍ବ ନୁହେଁ, ଈଶ୍ବରଙ୍କ ଉପରେ ଥିବା ଭକ୍ତର ବିଶ୍ବାସକୁ ଗୁରୁତ୍ବ ଦିଅଯାଇଛି । ଟିଜରରେ ପଙ୍କଜ ତ୍ରିପାଠୀଙ୍କୁ ଶିବଙ୍କ ବଡ଼ ଭକ୍ତ ଭାବେ ଦେଖିବାକୁ ମିଳିଛି । ତାଙ୍କ ଆସ୍ଥାକୁ ଦେଖି ଅକ୍ଷୟ ଭଗବାନ ଶିବଙ୍କ ରୂପରେ ତାଙ୍କୁ ସାହାଯ୍ୟ କରିବାକୁ ଆସିଛନ୍ତି ।
ମଳ ପରିଚାଳନାକୁ ବିଏମସିର ଗୁରୁତ୍ବ, ନିୟମ ଖିଲାପକାରୀଙ୍କ ବିରୋଧରେ ହେବ କାର୍ଯ୍ୟାନୁଷ୍ଠାନ
ଭୁବନେଶ୍ୱର: ମଳ ପରିଚାଳନାକୁ ବିଏମସିର ଗୁରୁତ୍ବ । ସରକାରଙ୍କ ଗରିମା ଯୋଜନା ଅଧିନରେ ସେସପୁଲ୍ ଗାଡିର ସମସ୍ତ ନିୟମ ବିଧିବଦ୍ଧ ଭାବେ ରହିଥିବା ବେଳେ ଏହାର ଖିଲାପ ବେଳେବେଳେ ଦେଖିବାକୁ ମିଳୁଛି । ଦଣ୍ଡ ବିଧାନ ମଧ୍ୟ କରାଯାଉଛି । ଏନେଇ ବିଏମସିର ଏକ ବୈଠକରେ ଆଲୋଚନା ହୋଇଛି। ତେବେ ଏଥିପାଇଁ ସଂପୃକ୍ତ ବିଭାଗର ସମ୍ମିଳିତ କାର୍ଯ୍ୟାନୁଷ୍ଠାନ ଏହି ସେବାକୁ ଆହୁରି ଗୁଣାତ୍ମକ କରିପାରିବ । ମଳ ପରିଚାଳନା ନିୟମ ଅନୁଯାୟୀ ଯେତେବଡ଼ ମଳଟାଙ୍କି ହେଉନା କାହିଁକି, ଅଢ଼େଇବର୍ଷରୁ ତିନିବର୍ଷ ମଧ୍ୟରେ ଏହାକୁ ଖାଲି କରାଯିବା ଆବଶ୍ୟକ । ଏଥିପାଇଁ ପୌରସଂସ୍ଥା କିମ୍ବା ପଞ୍ଜିକୃତ ଘରୋଇସେବା ପ୍ରଦାନକାରୀଙ୍କ ସହଯୋଗରେ କରିବାକୁ ହେବ । ଏହି କାର୍ଯ୍ୟର ବିଜ୍ଞାନ ସମ୍ମତ ପରିଚାଳନାରେ କୌଣସି ପ୍ରକାରର ସାଲିସ୍ କରାଯିବନାହିଁ । ଟାଙ୍କିରୁ ନିୟମିତ ମଳ ଖାଲି କରାଯିବା, ଏହାକୁ ସେସ୍ପୁଲରେ ନେବା, ନେବା ବେଳେ ଆବଶ୍ୟକୀୟ ଯତ୍ନନେବା, ମଳ ଉପଚାର କେନ୍ଦ୍ରରେ ଏହି ସଂଗୃହିତ ମଳକୁ ପକାଇବା ଉପରେ ଗୁରୁତ୍ବ ଦିଆଯିବା ଆବଶ୍ୟକ ।
ସମସ୍ତ ଗାଡିରେ ଜିପିଏସ୍ ମଧ୍ୟ ରହିବ । ଯେଉଁ ଗାଡ଼ି ପଞ୍ଜୀକୃତ ହୋଇନାହାନ୍ତି ଶୀଘ୍ର ସେମାନେ ଆରଟିଓଙ୍କ ସହିତ ଯୋଗାଯୋଗ କରି ଗାଡି ଗୁଡିକର ଫିଟନେସ୍ କରି ପଞ୍ଜୀକୃତ କରିବାକୁ ନିର୍ଦ୍ଦେଶ । ବର୍ତ୍ତମାନ ସୁଦ୍ଧା ବିଏମସି ଅଧିନରେ ୨୬ ଗୋଟି ସେସପୁଲ୍ଗାଡି ପଞ୍ଜିକୃତ ହୋଇଥିବା ବେଳେ ବିଏମ୍ସିର ୯ଟି ଗାଡ଼ି ରହିଛି ।
ମୁଖ୍ୟ ଶାସନ ସଚିବଙ୍କ ମୌସୁମୀ ପ୍ରସ୍ତୁତି ସମୀକ୍ଷା, ଇସ୍କନ ସମ୍ମୁଖ ଜଳବନ୍ଦୀ ଉପରେ ଗୁରୁତ୍ୱ
ଭୁବନେଶ୍ୱର: ରାଜଧାନୀରେ ଜଳବନ୍ଦୀ ସମସ୍ୟାର ସମାଧାନ ନେଇ ମୁଖ୍ୟ ଶାସନ ସଚିବ ପ୍ରଦୀପ ଜେନାଙ୍କ ଅଧ୍ୟକ୍ଷତାରେ ଉଚ୍ଚସ୍ତରୀୟ ସମୀକ୍ଷା ବୈଠକ ଅନୁଷ୍ଠିତ ହୋଇଛି । ସମ୍ଭାବ୍ୟ ଜଳବନ୍ଦୀ ଏବଂ ଆବଶ୍ୟକୀୟ ପଙ୍କୋଦ୍ଧାର ତଥା ସଠିକ ସମୟରେ ଡ୍ରେନ୍ ପଙ୍କକୁ ସ୍ଥାନାନ୍ତର କରିବାକୁ ବୈଠକରେ ଗୁରୁତ୍ୱ ଦିଆଯାଇଛି । ଗତବର୍ଷ ମହାନଗର ନିଗମ ଅଂଚଳରେ ୭୫ଟି ସମ୍ବେଦନଶୀଳ ସ୍ଥାନ ଚିହ୍ନଟ ହୋଇଥିଲା । ଏ ଦିଗରେ ପଦକ୍ଷେପ ନିଆଯାଇଛି ଏବଂ ଏହି ଅସୁବିଧାକୁ କମ୍ କରାଯାଇପାରିଛି । ସମ୍ବେଦନଶୀଳ ଅଂଚଳ ଗୁଡିକରେ ଆବଶ୍ୟକ ମୁତାବକ ପମ୍ପସେଟ୍, ଜରୁରୀକାଳୀନ ଜଳ ନିଷ୍କାସନ ବ୍ୟବସ୍ଥା କରାଯିବା ସହ ସ୍ଥାନୀୟବାସୀ କିପରି ବର୍ଷା ବିତ୍ପାତରେ ହଇରାଣ ନହେବେ ସେଥିପାଇଁ ବ୍ୟବସ୍ତା ହୋଇଛି ।
ଏହାସହ ଜାତୀୟ ରାଜପଥ ବିଭାଗ ଇସ୍କନଠାରେ ହେଉଥିବା ଜଳବନ୍ଦୀରୁ ରକ୍ଷା ପାଇଁ ସ୍ୱତନ୍ତ୍ର ବ୍ୟବସ୍ଥା କରନ୍ତୁ ବୋଲି କହିଛନ୍ତି ସିଏସ୍ । ଇସ୍କନ ମନ୍ଦିର ବିପରୀତ ପାଶ୍ୱର୍ରେ ଥିବା କ୍ରିଷ୍ଣା ଟାୱାରରୁ ଭୋଇସାହି ପର୍ଯ୍ୟନ୍ତ ଏକ ସମାନ୍ତରାଳ ଡ୍ରେନ୍ ନିର୍ମାଣ କରି ଜଳବନ୍ଦୀ ସ୍ଥିତି ସୁଧୁରିପାରିବ ବୋଲି ମୁଖ୍ୟ ଶାସନ ସଚିବ କହିଛନ୍ତି ।
ପାକିସ୍ତାନର ସୁଧୁରିବ ଆର୍ଥିକ ସ୍ଥିତି, ୩ ବିଲିୟନ ଡଲାରର ଆର୍ଥିକ ସହାୟତା ଘୋଷଣା କଲା IMF
ଇସଲାମାବାଦ: ସୁଧୁରିବ ପାକିସ୍ତାନର ଆର୍ଥିକ ସ୍ଥିତି । ଆଇଏମଏଫ ପକ୍ଷରୁ ପାକିସ୍ତାନକୁ ୩ ବିଲିୟନ ଡଲାରର ଋଣ ସହାୟତା ନେଇ ଘୋଷଣା । ଗତ ୯ ମାସ ଧରି ପାକିସ୍ତାନ ସହ ଆଲୋଚନା ପରେ ଶେଷରେ ପାକିସ୍ତାନକୁ ସହାୟତା ପାଇଁ ଆଗେଇ ଆସିଛି ଆନ୍ତର୍ଜାତୀୟ ମୁଦ୍ରା ପାଣ୍ଠି । ଏହି ଆର୍ଥିକ ସହାୟତା ପରେ ଋଣ ଭାରରେ ବୁଡ଼ି ରହିଥିବା ପାକିସ୍ତାନକୁ ବଡ଼ ଆଶ୍ବସ୍ତି ମିଳିବ । ଦରବୃଦ୍ଧିକୁ ନିୟନ୍ତ୍ରଣ କରିପାରିବେ । ୩ ବିଲିୟନ ଡଲାର ମଧ୍ୟରୁ ୧.୨ ବିଲିୟନ ଡଲାର ତୁରନ୍ତ ପାକିସ୍ତାନକୁ ଦିଆଯିବ । ଆଇଏମଏଫର ଆର୍ଥିକ ସହାୟତା ପରେ ପାକିସ୍ତାନର ମୁଦ୍ରା ବିନିମୟ ମୁଲ୍ୟ ମଧ୍ୟ ବୃଦ୍ଧି ପାଇଛି । ଆଇଏମଏଫ ପୂର୍ବରୁ ସାଉଦି ଆରବ ମଧ୍ୟ ପାକିସ୍ତାନକୁ ଦୁଇ ବିଲିୟନ ଡଲାରର ସହାୟତା ଘୋଷଣା କରିଛି । ଏହାକୁ ନେଇ ପାକିସ୍ତାନ ପ୍ରଧାନମନ୍ତ୍ରୀ ସେହେବାଜ ସରିଫ ସାଉଦି ଆରବ ସରକାରଙ୍କୁ କୃତଜ୍ଞତା ଜଣାଇଛନ୍ତି ।
ପାକିସ୍ତାନରେ ଭୟଙ୍କର ବନ୍ୟା ଓ ବାତ୍ୟା ହେବା ଯୋଗୁଁ ବ୍ୟାପକ ପରିମାଣରେ କ୍ଷତି ସହିଥିଲା । ଏହାପରେ ଖାଦ୍ୟ ସାମଗ୍ରୀ ଦର ସହ ଡଲାର ତୁଳନାରେ ପାକିସ୍ତାନ ମୁଦ୍ରାର ସ୍ଥିତି ଅତି ଭୟଙ୍କର ସ୍ଥିତିରେ ପହଞ୍ଚିଥିଲା । ସ୍ଥିତିର ସୁଧାର ନେଇ ଆଇଏମଏଫର ସହାୟତା ଲୋଡିଥିଲା ପାକିସ୍ତାନ । ବିଭିନ୍ନ ସର୍ତ୍ତ କାରଣରୁ ଆର୍ଥିକ ସହାୟତାରେ ବିଳମ୍ଭ ହୋଇଥିଲା ।
ଆଜିଠୁ ଯୁକ୍ତ ଦୁଇ ଇନଷ୍ଟାଣ୍ଟ ପରୀକ୍ଷା, ୩୨ଟି କେନ୍ଦ୍ରରେ ପରୀକ୍ଷା ଦେବେ ଛାତ୍ରଛାତ୍ରୀ
ଭୁବନେଶ୍ୱର: ଆଜିଠୁ ଯୁକ୍ତ ଦୁଇ ଇନଷ୍ଟାଣ୍ଟ ପରୀକ୍ଷା । ଦିନ ୧୦ଟାରୁ ଗୋଟାଏ ଯାଏ ପରୀକ୍ଷା ଦେବେ ଛାତ୍ରଛାତ୍ରୀ । ଆଜି ପରୀକ୍ଷାର୍ଥୀମାନେ ଥିଓରି ପେପରରେ ପରୀକ୍ଷା ଦେବେ । ଆସନ୍ତାକାଲି ସମସ୍ତ ବିଷୟର ପ୍ରାକ୍ଟିକାଲ ଓ ପ୍ରୋଜେକ୍ଟ ଆଦି ପରୀକ୍ଷା କରାଯିବ । ଯେଉଁମାନେ ଥିଓରିରେ ପାସ୍ କରି ପ୍ରାକ୍ଟିକାଲ କିମ୍ବା ପ୍ରୋଜେକ୍ଟରେ ଫେଲ ହୋଇଥିବେ ତାଙ୍କୁ ଉଭୟ ଥିଓରି ଓ ପ୍ରାକ୍ଟିକାଲ ଦେବାକୁ ପଡ଼ିବ । ତେବେ ଥିଓରିରେ ଫେଲ ହୋଇ ପ୍ରାକ୍ଟିକାଲରେ ପାସ୍ କରିଥିଲେ କେବଳ ଥିଓରୀ ଦେବାକୁ ପଡ଼ିବ । ରାଜ୍ୟରେ ୩୨ଟି କେନ୍ଦ୍ରରେ ପରୀକ୍ଷା ହେଉଥିବାବେଳେ ସମସ୍ତ କେନ୍ଦ୍ରରେ ପ୍ରଶ୍ନପତ୍ର ପହଞ୍ଚିସାରିଛି । ପରୀକ୍ଷା କେନ୍ଦ୍ର ଷ୍ଟ୍ରଙ୍ଗ ରୁମରେ ରହିଛି ପ୍ରଶ୍ନପତ୍ର ।