କୋଲକାତା ସଲ୍ଟ ଲେକ୍ ଷ୍ଟାଡିଅମରେ ହଙ୍ଗାମା । ମେସିଙ୍କ ଗସ୍ତକୁ ନେଇ ହଙ୍ଗାମା । ଚେୟାର ଫିଙ୍ଗା ଫୋପଡ଼ା କଲେ ଦର୍ଶକ । ମାତ୍ର ୧୦ ମିନିଟରେ ପଳାଇଲେ ମେସି । ଏହାକୁ ନେଇ କ୍ଷୁବ୍ଧ ହେଲେ ଦର୍ଶକ । ଆୟୋଜନକୁ ନେଇ ବର୍ଷିଲେ ଦର୍ଶକ । ଠିକରେ ମେସିଙ୍କୁ ଦେଖି ନ ପାରି କ୍ଷୁବ୍ଧ । ବୋତଲି ଫିଙ୍ଗା ଫୋପଡ଼ା କଲେ ।
ବିଳମ୍ୱିତ ରାତିରେ ଦମ୍ପତିଙ୍କୁ ତାଲା ପକାଇ ଦେଢ଼ଲକ୍ଷ ଟଙ୍କା ଲୁଟ୍
ବିଳମ୍ୱିତ ରାତିରେ ଦମ୍ପତିଙ୍କୁ ତାଲା ପକାଇ ଦେଢ଼ଲକ୍ଷ ଟଙ୍କା ଲୁଟି ନେଲେ ଲୁଟେରା । ଅନୁଗୋଳ ଜିଲ୍ଲା ବାଗଡିଆ ଥାନା ସାପୋଇନାଳି ଗ୍ରାମ ବେହେରା ସାହିରେ ଏଭଳି ଦୃଶ୍ୟ ଦେଖିବାକୁ ମିଳିଛି । ଏହି ଗାଁର କଲ୍ୟାଣ ବେହେରା ଏବଂ ତାଙ୍କ ସ୍ତ୍ରୀ ଛବି ବେହେରା ଖାଇ ପିଇ ଶୋଇଥିଲେ । ବିଳମ୍ବିତ ରାତିରେ ଘରର ଲାଇଟ ଜଳିବା ଏବଂ ବନ୍ଦ ହେବାରୁ ଛବିଙ୍କ ନିଦ ଭାଙ୍ଗି ଯାଇଥିଲା l ତାଙ୍କ ସ୍ବାମୀଙ୍କୁ ଉଠାଇ କବାଟ ଖୋଲିବାରୁ କବାଟ ବାହାରୁ ବନ୍ଦ ଥିବା ଦେଖି ପଡିଶା ଘର ଲୋକଙ୍କୁ ଡାକ ପକାଇଥିଲେ l ପଡୋଶୀ କବାଟ ଖୋଲିବା ପରେ ଅନ୍ୟ ଏକ ରୁମର ତାଳ ଭଙ୍ଗା ଯାଇ ଘର ଭିତରେ ଥିବା ୪ଟି ଆଟାଚ ଏବଂ ୨ଟି ବାକ୍ସ ନଥିବା ଦେଖିବାକୁ ପାଇଥିଲେ । ଏକ ଆଟାଚରେ ଦେଢ଼ ଲକ୍ଷଟଙ୍କା ଥିଲା । ଲୁଟେରା ମାନେ ବାକ୍ସ ଏବଂ ଆଟାଚକୁ ଭାଙ୍ଗି ଘର ଠାରୁ ୫ଶହ ମିଟର ଦୂରରେ ଫିଙ୍ଗି ଚମ୍ପଟ ମାରିଛନ୍ତି । ଏନେଇ ନେଇ କଲ୍ୟାଣ ବାଗଡିଆ ଥାନାରେ ଲିଖିତ ଅଭିଯୋଗ କରିବା ପରେ ପୋଲିସ ଘଟଣାସ୍ଥଳରେ ପହଁଚି ଛାନବିନ କରୁଛି ।
ଶିକାରୀଙ୍କୁ ଧରାଇଦେଲା AI କ୍ୟାମେରା: ୩ ଜଣ ଶିକାରୀ ଓ ୫ ଦେଶୀ ବନ୍ଧୁକ ଜବତ
ଶିକାରୀଙ୍କୁ ଧରାଇଦେଲା AI କ୍ୟାମେରା । ୩ ଜଣ ଶିକାରୀ ଓ ୫ ଦେଶୀ ବନ୍ଧୁକ ଜବତ l କିଛି ଦିନ ତଳେ ବାଘ ଗଣନା ପାଇଁ କୁଳଡିହା ଅଭାୟରଣ୍ୟ ଅଧୀନ ବେତେଇ ଜଙ୍ଗଲରେ ବନବିଭାଗ ପକ୍ଷରୁ ଗଛ ଉପରେ AI କ୍ୟାମେରା ଲଗାଯାଇଥିଲା । କ୍ୟାମେରାରେ ୩ ଜଣ ଶିକାରୀ ବନ୍ଧୁକ ଧରି ଜଙ୍ଗଲରେ ବୁଲୁଥିବା ନେଇ କଏଦ ହୋଇଥିଲା । ସୋର ବନାଞ୍ଚଳ ଅଧିକାରୀ ହରିହର ମାଝୀ ଓ କୁଲଡିହା ରେଞ୍ଜ ଅଧିକାରୀ ମିଳିତ ଭାବେ ଉକ୍ତ ଫଟୋକୁ ଆଧାର କରି ଔପଦା ବ୍ଲକ ବେତେଇ ଗାଁରୁ ଜଣେ ଓ ନରସିଂସିଲା ଗାଁରୁ ଦୁଇ ଜଣଙ୍କ ଘରେ ଚଢ଼ାଉ କରି ସେମାନଙ୍କୁ ଗିରଫ କରିଛନ୍ତି । ଏଥିସହ ସେମାନେ ଜଙ୍ଗଲରେ ଲୁଚାଇ ରଖିଥିବା ୫ଗୋଟି ବନ୍ଧୁକକୁ ଜବତ କରିଛନ୍ତି । ଆଜି ୩ ଶିକାରୀଙ୍କୁ କୋର୍ଟ ଚାଲାଣ କରାଯିବ ।
ନବମ ଶ୍ରେଣୀ ଛାତ୍ରର ପକେଟରୁ ବାହାରିଲା ବନ୍ଧୁକ
ନବମ ଶ୍ରେଣୀ ଛାତ୍ରର ପକେଟରୁ ବାହାରିଲା ବନ୍ଧୁକ । କେନ୍ଦ୍ରାପଡ଼ା ଜିଲ୍ଲା କୁଦାନଗରି ଥାନା କୋରୁଆ ସରକାରୀ ଉଚ୍ଚ ବିଦ୍ୟାଳୟରେ ଏଭଳି ଘଟଣା ଦେଖିବାକୁ ମିଳିଛି । ସ୍କୁଲରେ ଗଣିତ କ୍ଲାସ ଚାଲିଥିବା ସମୟରେ ଶ୍ରେଣୀ ଗୃହରେ ଛାତ୍ରର ପକେଟ ଉଚା ଦେଖାଯିବାରୁ ଗଣିତ ସାର ନୃସିଂହ ସ୍ବାଇ ଚେକିଂ କରିଥିଲେ । ଚେକିଂ ସମୟରେ ଛାତ୍ର ପକେଟରୁ ଏକ ବନ୍ଧୁକ ବାହାରିଥିଲା । ପ୍ରଧାନ ଶିକ୍ଷକ ଥାନାରେ ଅଭିଯୋଗ କରିବା ପରେ ବନ୍ଧୁକ ଜବତ ସହ ଛାତ୍ରକୁ କୋରୁଆ ସ୍ବଧାର ଗୃହରେ ରଖି ଅଧିକ ତଦନ୍ତ କରୁଛି ପୋଲିସ ।
ଭାରତୀୟ କ୍ରିକେଟରେ ମ୍ୟାଚ ଫିକ୍ସିଂ ! ୪ ଜଣ ଖେଳାଳି ସସପେଣ୍ଡ
କ୍ରୀଡ଼ା ଜଗତରୁ ଆସିଛି ଏକ ବଡ଼ ଖବର । ଭାରତୀୟ କ୍ରିକେଟରେ ମ୍ୟାଚ ଫିକ୍ସିଂ ନେଇ ଏକ ଖବର ସାମ୍ନାକୁ ଆସିଛି । ଏହି ଅଭିଯୋଗରେ ୪ ଜଣ ଖେଳାଳିଙ୍କୁ ସସପେଣ୍ଡ କରାଯାଇଛି । ସୟଦ ମୁସ୍ତାକ ଅଲୀ ଟ୍ରଫିର ଚଳିତ ସିଜିନ ମଧ୍ୟରେ ଏହି ଖବର ଏବେ ଘରୋଇ କ୍ରିକେଟକୁ ହଲଚଲ କରିଦେଇଛି । ଆସାମର ୪ ଜଣ ଖେଳାଳିଙ୍କୁ ଭ୍ରଷ୍ଟାଚାର କାର୍ଯ୍ୟକଳାପ ଅଭିଯୋଗରେ ନିଲମ୍ବନ କରାଯାଇଛି । ଆସାମ କ୍ରିକେଟ ଆସୋସିଏସନ (ACA) ପକ୍ଷରୁ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ।
ନିଲମ୍ବିତ ହୋଇଥିବା ଖେଳାଳିଙ୍କ ମଧ୍ୟରେ ଅମିତ ସିହ୍ନା, ଈଶାନ ଅହମଦ, ଅମନ ତ୍ରିପାଠୀ ଓ ଅଭିଷେକ ଠକୁରୀ ରହିଛନ୍ତି । ଆସାମ ଖେଳାଳିଙ୍କୁ ପ୍ରଭାବିତ କରିବା ଓ ଖଳାପ କାର୍ଯ୍ୟ ନେଇ ଉସୁକାଇବା ନେଇ ଏହି ଖେଳାଳିଙ୍କ ବିରୋଧରେ ଅଭିଯୋଗ ଆସିଛି । ଏନେଇ ACA ପକ୍ଷର ଏ ଅଫିସିଆଲ ବୟାନ ଜାରି କରାଯାଇଛି । ମାମଲାର ଗମ୍ଭୀରତାକୁ ଦୃଷ୍ଟିରେ ରଖି ଗ୍ବାହାଟୀ କ୍ରାଇମବ୍ରାଞ୍ଚରେ ଏଆଆଇଆର ଦାୟର କରାଯାଇଛି ।
ପୁଣି ମନ୍ଦିରକୁ ଟାର୍ଗେଟ କଲେ ଲୁଟେରା
କିଛି ଦିନ ବ୍ୟବଧାନ ପରେ ପୁଣି ମନ୍ଦିରକୁ ଟାର୍ଗେଟ କଲେ ଲୁଟେରା । ସିମୁଳିଆ ଥାନା ଅନ୍ତର୍ଗତ ମଇତାପୁର ଗାଁ ରାଧାକାହ୍ନୁ ମନ୍ଦିରରୁ ଗତକାଲି ବିଳମ୍ବିତ ରାତିରେ ଲୁଟ ହୋଇଛି । ରାଧାକାହ୍ନୁଙ୍କ ରୂପାସୁନା ଅଳଙ୍କାର ସମତେ ହୁଣ୍ଡି ବାକ୍ସ ଲୁଟି ନେଇଛନ୍ତି ଲୁଟେରା । ଲୁଟ ବେଳର ଦୃଶ୍ୟ ସିସିଟିଭିରେ କଏଦ ହୋଇଛି । ଆଜି ମଇତାପୁର ମହୋତ୍ସବ ଧୁମଧାମରେ ହେବାକୁ ଥିବା ବେଳେ ପାର୍ଶ୍ଵରେ ଥିବା ମନ୍ଦିରରେ କଳାକନା ବୁଲାଇଛନ୍ତି ଲୁଟେରା । ସିମୁଳିଆ ବ୍ଲକରେ ଚୋରି ଲାଗି ରହିଥିବା ବେଳେ ପୋଲିସର ନିଷ୍କ୍ରିୟତା ସମସ୍ତଙ୍କୁ ଚକିତ କରିଛି l
ବିଜେପି ସରକାରରେ ନାରୀ ଅସୁରକ୍ଷିତ: ରାଜ୍ୟପାଳଙ୍କୁ ଭେଟିଲା ବିଜେଡି
ବିଜେପି ସରକାରରେ ନାରୀ ଅସୁରକ୍ଷିତ । ମାଲକାନଗିରି ଜିଲ୍ଲା ଏବେ ମହିଳାଙ୍କ ହତ୍ଯାକୁ ନେଇ ଅଶାନ୍ତ। ଆଇନଶୃଙ୍ଖଳା ସ୍ଥିତି ବିପର୍ଯ୍ୟସ୍ତ। ଶାସକ ଦଳର ନୀଳଗିରି ବିଧାୟକ ସନ୍ତୋଷ ଖଟୁଆ ବିଧାନସଭା ଗୃହ ଭିତରେ ଜାତିର ପିତା ମହାତ୍ମା ଗାନ୍ଧୀଙ୍କ ପ୍ରତି ଅଶୋଭନୀୟ ମନ୍ତବ୍ୟ ଦେଲେ। ହେଲେ ଏ ପର୍ଯ୍ଯନ୍ତ ତାଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ହେଲାନି। ଆଜି ରାଜ୍ଯପାଳଙ୍କୁ ଭେଟି ସ୍ମାରକ ପତ୍ର ଦେଇଛି ବିଜେଡି। ପୂର୍ବରୁ ବିଜେଡି ନାରି ନେତ୍ରୀଙ୍କ ପ୍ରତି ଆପତ୍ତିଜନକ ମନ୍ତବ୍ୟ ଦେଇଥିଲେ ନୀଳଗିରି ବିଧାୟକ। ଅନ୍ୟ ରାଜ୍ୟରେ ଏଭଳି ଅପରାଧ ପାଇଁ ତୁରନ୍ତ କାର୍ଯ୍ୟାନୁଷ୍ଠାନ ନିଆଯାଇଛି। ସନ୍ତୋଷ ଖଟୁଆଙ୍କ ବିରୋଧରେ ଓଡ଼ିଶା ବିଧାନସଭାରେ ଏଥିକ୍ସ କମିଟି ନିକଟରେ ଅଭିଯୋଗ କରାଯାଇଥିଲା। ହେଲେ କୌଣସି ଉତ୍ତର ମିଳିନି। ରାଜ୍ୟରେ ଗମ୍ଭୀର ସ୍ଥିତି ସୃଷ୍ଟି ହୋଇଛି। ହେଲେ ସରକାର ବେଫିକର ରହିଛନ୍ତି। ସରକାରଙ୍କ ମାଳ ମାଳ ବିଫଳତା ଦର୍ଶାଇ ରାଜ୍ୟପାଳଙ୍କୁ ଫେରାଦ କରିଛି ବିଜେଡି।
ବିଜେପି କ୍ଷମତାକୁ ଆସିବା ପରେ ଆଇନଶୃଙ୍ଖଳା ବିପର୍ଯ୍ୟସ୍ତ ହେବାରେ ଲାଗିଛି। ମହିଳା ବିରୋଧୀ ହିଂସା ବୃଦ୍ଧି ପାଇଥିବା ନେଇ ବିଧାନସଭାରେ ତଥ୍ୟ ରଖିଛନ୍ତି ସରକାର। ୨୦୨୪ ଜୁଲାଇରୁ ୨୦୨୫ ସେପ୍ଟେମ୍ବର ପର୍ଯ୍ୟନ୍ତ ବିଭିନ୍ନ ଅପରାଧରେ ଶିକାର ହୋଇଛନ୍ତି ମହିଳା । ୩ ହଜାର ୨୦୫ଟି ଦୁଷ୍କର୍ମ ମାମଲା, ୨୦୨ ଦୁଷ୍କର୍ମ ଉଦ୍ୟମ, ୪୪୦ଟି ମାମଲାରେ ବିବାହ ପ୍ରତିଶୃତି ଦେଇ ଯୌନ ଶୋଷଣ କରାଯାଇଛି। ସେହିପରି ମହିଳାଙ୍କ ପ୍ରତି ଅସଦାଚରଣ ଶିକାରରେ ୯ ହଜାର ୮୫୧ଟି ମାମଲା। ୧୪୭୬ ଯୌନ ନିର୍ଯାତନା ମାମଲା, ସର୍ବସାଧାରଣରେ ମହିଳା ଅସଦାଚରଣରେ ୨୩୧୦ଟି ମାମଲଲା ପଞ୍ଜୀକୃତ ହୋଇଛି। ରାଜ୍ୟରେ ଅପହରଣ ଓ ରାହଜାନୀ ମଧ୍ୟ ବଢି ଚାଲିଛି। ୮ ହଜାର ୮୬୩ ମହିଲା ଅପହରଣ, ୫୮୬୧ଟି ଯୌତୁକ ନିର୍ଯାତନା, ଯୌତୁକ ଜନିତ ଆତ୍ମହତ୍ୟା ମାମଲା ୪୯ ଥିବା ବେଳେ, ୬ ହଜାର ୭୭୩ ଶୋଷଣ ମାମଲା ଦରଜ ହୋଇଛି। ଏସିଡ ଆକ୍ରମଣରେ ମହିଳା ଶିକାର ହୋଇଥିବା ୪ଟି ମାମଲା ରୁଜୁ ହୋଇଛି।
ବିଜେପି ସରକାର ଆସିବାର କିଛି ଦିନରେ ତତ୍କାଳୀନ ରାଜ୍ୟପାଳ ରଘୁବର ଦାସଙ୍କ ପୁଅ ଓଡ଼ିଆ ଏଏସଓଙ୍କୁ ମାଡ଼ ମାରିଥିଲେ। ଏହି ଘଟଣାରେ ପୁରୀ ଜିଲ୍ଲାପାଳ ତଦନ୍ତ କରି ରିପୋର୍ଟ ଦେବା ପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସରକାର ଘୋଷଣା କରିଥିଲେ। ହେଲେ ତଦନ୍ତ ରିପୋର୍ଟ ଆଧାରରେ କାର୍ଯ୍ୟାନୁଷ୍ଠାନ ଶୂନ।
ମୋକିମ-ଭକ୍ତ ବିବାଦ: ଦିଲ୍ଲୀରେ ହେବ କି ସମାଧାନ ?
କଂଗ୍ରେସ କଳି ଏବେ ଦିଲ୍ଲୀରେ । ହାଇକମାଣ୍ଡ ପାଖରେ ଫେରାଦ କରିବେ ଦଳୀୟ ନେତା । ତୁଟିବ ତ ମୋକିମ-ଭକ୍ତ ବିବାଦ ? ଏଆଇସିସି ଶୁଣିବ ତ ଓଡ଼ିଶା କଂଗ୍ରେସ ଦୁଃଖ । ମୋକିମ-ଭକ୍ତ ବିବାଦରେ ଭାଗ ଭାଗ ଓଡ଼ିଶା କଂଗ୍ରେସ । ଗୋଷ୍ଠୀ ବିବାଦର ଉଗ୍ରରୂପ ହାତରେ ସୃଷ୍ଟି କରିଛି ଫାଟ । ଏପରି ସ୍ଥିତିରେ ପୂର୍ବତନ ବିଧାୟକ ମହମ୍ମଦ ମୋକିମଙ୍କ ପିସିସି ସଭାପତି ଓ କଂଗ୍ରେସ ସଙ୍ଗଠନ ନେଇ ହାଇକମାଣ୍ଡ ସୋନିଆ ଗାନ୍ଧିଙ୍କୁ ଚିଠି ଲେଖିବା ଅଣାୟତ୍ତ ରୂପ ନେଇଛି । ଏପରି ସମୟରେ SIR କୁ ଏଆଇସିସି ଜାତୀୟ ପ୍ରସଙ୍ଗ କରି ଦିଲ୍ଲୀରେ ଆନ୍ଦୋଳନ ଡାକରାରେ ସାମିଲ ହେବାକୁ ଓଡ଼ିଶାର ମଙ୍ଗୁଆଳମାନେ ଦିଲ୍ଲୀ ଗସ୍ତ କରିଛନ୍ତି । ବରିଷ୍ଠ କଂଗ୍ରେସ ନେତା ଅନନ୍ତ ସେଠୀ କହିଛନ୍ତି ଓଡ଼ିଶା କଂଗ୍ରେସର ସଙ୍ଗଠନ ନେଇ ଦିଲ୍ଲୀରେ ହାଇକମାଣ୍ଡଙ୍କ ସହ ଆଲୋଚନା କରିବୁ । ସେହିପରି କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡ଼ାମ କହିଛନ୍ତି ଦିଲ୍ଲୀରେ ହାଇକମାଣ୍ଡ ଓଡ଼ିଶାର ନେତାଙ୍କ ସହ ବୈଠକ କରି ଦଳୀୟ ସଙ୍ଗଠନ ଉପରେ ଆଲୋଚନା କରି ସବୁ ସମସ୍ୟାର ସମାଧାନ କରିବେ । ଏହାସହ ନେତାଙ୍କ ମନୋମାଳିନ୍ୟକୁ ଦୂର କରିବେ ।
ପିସିସି ସଭାପତିଙ୍କ ବିରୋଧରେ ପୂର୍ବତନ ବିଧାୟକ ମହମ୍ମଦ ମୋକିମ ଯୁଦ୍ଧଂଦେହି ଡାକରା ଦେବା ପରେ ଓଡିଶା କଂଗ୍ରେସରେ ଚୌକିକୁ ନେଇ ବିବାଦ ମୁଣ୍ଡ ଟେକିଛି । କାହିଁକି ମହମ୍ମଦ ମୋକିମ ଚିଠି ଲେଖିଲେ ତାହା ଦଳୀୟ ଫୋରମରେ ଆଲୋଚନା ହେବ ବୋଲି ଦଳୀୟ ନେତାମାନେ କହୁଛନ୍ତି । ତେବେ ଜାତୀୟ ସ୍ତରରେ ଯେଉଁ ପ୍ରସଂଗକୁ ନେଇ ଆଲୋଚନା ଚାଲିଛି ସେ ସମୟରେ ହାଇକମାଣ୍ଡ ଓଡ଼ିଶା ସଙ୍ଗଠନ ଉପରେ ସମୟ ଦେବେ କି ନାହିଁ ସେନେଇ ସନ୍ଦେହ ପ୍ରକାଶ ପାଇଛି । ପଦ ପଦବୀ ପାଇଁ ଓଡ଼ିଶାରେ କଂଗ୍ରେସ ନେତାଙ୍କ ମଧ୍ୟରେ କଳି ଲାଗିବା କିଛି ନୂଆ କଥା ନୁହେଁ ବୋଲି ବରିଷ୍ଠ କଂଗ୍ରେସ ନେତା ଅମର ପ୍ରଧାନ କହିଛନ୍ତି । ସେହିପରି ମୋକିମ ଓ ଭକ୍ତଙ୍କ ଲଢେଇ ନେଇ ଦଳର ଯୁବ ବିଧାୟକ ମାପିଚୁପି ବୟାନ ଦେଇଛନ୍ତି ।
ଦିଲ୍ଲୀ ମୁହାଁ ଓଡ଼ିଶା କଂଗ୍ରେସ ନେତା । ଏସଆଇଆର ପ୍ରତିବାଦ ସଭା ପରେ ଓଡ଼ିଶା କଂଗ୍ରେସ କଳି ନେଇ ସମଧାନର ବାଟ କାଢିବାକୁ ନେତାମାନେ ଏକାଠି ହୋଇଛନ୍ତି । ତେବେ କଂଗ୍ରେସ ଗୋଷ୍ଠୀ ବିବାଦର ପୁରୁଣା ରୋଗକୁ ଦିଲ୍ଲୀ ଔଷଧ କାମ ଦେଉଛି କି ନାହିଁ ତାହା ଏବେ ଚର୍ଚ୍ଚାର ବିଷୟ ପାଲଟିଛି । ମୋକିମ ଓ ଭକ୍ତ କଳିରେ ହାଇକମାଣ୍ଡ କି ପଦକ୍ଷେପ ନେଉଛନ୍ତି ତାହାକୁ ନେଇ କଂଗ୍ରେସ ଅନ୍ଦର ମହଲରେ ନାନା ଚର୍ଚ୍ଚା ଆରମ୍ଭ ହୋଇଯାଇଛି ।
ତିନି ଦିନିଆ ଭାରତ ଗସ୍ତରେ ଆସି କୋଲକାତାରେ ପହଞ୍ଚିଲେ ଫୁଟବଲ ଷ୍ଟାର ମେସି
ତିନି ଦିନିଆ ଭାରତ ଗସ୍ତରେ ଆସି କୋଲକାତାରେ ପହଞ୍ଚିଲେ ଫୁଟବଲ ଷ୍ଟାର ମେସି । ମେସିଙ୍କୁ ନେଇ ଫୁଟବଲର ସହର କୋଲକାତା ସମେତ ବିଭିନ୍ନ ସହରରେ ପ୍ରବଳ ଉତ୍ସାହ । କୋଲକାତା, ହାଇଦ୍ରାବାଦ, ଦିଲ୍ଲୀ ଓ ମୁମ୍ଵାଇ ଏପରି ୪ଟି ସହର ବୁଲିବେ ମେସି । ଗୋଟ ଇଣ୍ଡିଆ ଟୁର ୨୦୨୫ କାର୍ଯ୍ଯକ୍ରମରେ ଯୋଗ ଦେବାକୁ ଆସିଛନ୍ତି ଆର୍ଜେଣ୍ଟିନା ସୁପରଷ୍ଟର ମେସି। ହଜାର ହଜାର ସମର୍ଥକ ମେସିଙ୍କୁ ସ୍ବାଗତ କରିଛନ୍ତି। ଦୁବାଇରୁ ମିଆମି ଦେଇ ଭାରତ ଆସିଥିବା ମେସିଙ୍କ ଗସ୍ତକୁ ଦୃଷ୍ଟିରେ ରଖି କୋଲକାତାରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି। ପ୍ରାୟ ୧୪ ବର୍ଷ ପରେ ପୁଣି ଥରେ ଭାରତ ଆସିଛନ୍ତି ମେସି। ତିନିଦିନିଆ ଭାରତ ଗସ୍ତରେ ଆସିଥିବା ମେସି କୋଲକାତା, ହାଇଦ୍ରାବାଦ, ମୁମ୍ବାଇ, ନୂଆଦିଲ୍ଲୀରେ ବିଭିନ୍ନ କାର୍ଯ୍ୟକ୍ରମରେ ସାମିଲ ହେବେ। କୋଲକାତାରେ ଯୁବଭାରତୀ ଷ୍ଟାଡିୟମରେ ଆୟୋଜିତ କାର୍ଯ୍ଯକ୍ରମରେ ସେ ଯୋଗ ଦେଇଛନ୍ତି।
ବାଲି ବ୍ୟବସାୟକୁ କେନ୍ଦ୍ର କରି ଗଣ୍ତଗୋଳ: ଦୁର୍ବୃତ୍ତଙ୍କ ଫାଙ୍କା ଗୁଳି ଚାଳନା ଅଭିଯୋଗ
ବାଲେଶ୍ବର ଜିଲ୍ଲା ସିଂଲା ଥାନା ଗିଲାଯୋଡ଼ି ଗାଁରେ ପୂର୍ବ ଶତ୍ରୁତା ଓ ବାଲି ବ୍ୟବସାୟକୁ କେନ୍ଦ୍ର କରି ଗଣ୍ତଗୋଳ । ଦୁର୍ବୃତ୍ତଙ୍କ ଫାଙ୍କା ଗୁଳି ଚାଳନା ଅଭିଯୋଗ । ଘଟଣାସ୍ଥଳରେ ତୀବ୍ର ଉତ୍ତେଜନା ପ୍ରକାଶ ପାଇଥିବା ବେଳେ ୪ ଜଣ ଦୁର୍ବୃତ୍ତଙ୍କୁ ଗ୍ରାମବାସୀ କାବୁ କରି ପୋଲିସର ଜିମା ଦେଇଛନ୍ତି । ଗତ ବିଳମ୍ବିତ ରାତିରେ ୮ ଜଣ ଦୁର୍ବୃତ୍ତ ଦୁଇଟି କାରରେ ଆସି ଗ୍ରାମବାସୀଙ୍କୁ ଭୟଭୀତ କରିବା ପାଇଁ ଫାଙ୍କା ଗୁଳି ଚାଳନା କରିଥିଲେ । ଗ୍ରାମବାସୀ ଏକତ୍ରିତ ହୋଇ ଗୋଡାଇବାରୁ କାର ଛାଡି ଦୌଡି ପଳାଉଥିବା ବେଳେ ୪ ଜଣଙ୍କୁ କାବୁ କରିଥିଲେ ଗ୍ରାମବାସୀ । ସୂଚନା ମୁତାବକ ସୁବର୍ଣ୍ଣରେଖା ନଦୀରୁ ବାଲି ଉତ୍ତୋଳନକୁ କେନ୍ଦ୍ର କରି ଗତ ନଭେମ୍ବର ୨୮ ତାରିଖରେ ଦୁଇ ଗୋଷ୍ଠୀ ମଧ୍ୟରେ ଗଣ୍ତଗୋଳ ହୋଇଥିଲା । ପରସ୍ପରକୁ ବିଭିନ୍ନ ମାରଣାସ୍ତ୍ରରେ ଆକ୍ରମଣ କରିଥିବା ବେଳେ ଜଣଙ୍କ ଅବସ୍ଥା ସଙ୍କଟାପନ୍ନ ହୋଇଥିଲା । ଏକାଧିକ ବ୍ୟକ୍ତି ଗୁରୁତର ହୋଇଥିଲେ ।