ନନ୍ଦିଘୋଷ ବ୍ୟୁରୋ : ରାଜ୍ୟରେ ଶୀତଳ ଭଣ୍ଡାରର ସ୍ଥିତି ନେଇ ପ୍ରଶ୍ନକାଳରେ ସରକାରଙ୍କୁ ଘେରିଲେ ବିରୋଧୀ। ପ୍ରଶ୍ନ କାଳରେ ଏହି ପ୍ରସଙ୍ଗ ଉଠାଇଥିଲେ କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ। ସେ ଅଭିଯୋଗ କରିଥିଲେ, ବିଜେପି ସରକାର ୫୮ଟି ଶୀତଳ ଭଣ୍ଡାର କରିବାକୁ କହିଥିଲା। ହେଲେ କରିନି। କୁନ୍ଦୁଲି ହାଟରେ ଶୀତଳ ଭଣ୍ଡାର ହେବ କି ବୋଲି ସେ ପ୍ରଶ୍ନ କରିଛନ୍ତି। ଉପମୁଖ୍ୟମନ୍ତ୍ରୀଙ୍କ ପକ୍ଷରୁ ଆଇନ ମନ୍ତ୍ରୀ ପୃଥିବୀରାଜ ହରିଚନ୍ଦନ କହିଲେ ଯେ ରାଜ୍ୟରେ ବର୍ତ୍ତମାନ ୧୩୩ଟି ଶୀତଳ ଭଣ୍ଡାର ଅଛି। ସେଥିରୁ ୨୦ଟି ସରକାରୀ ଓ ୭୮ଟି ଘରୋଇ। ଏସବୁର କ୍ଷମତା ୨ ଲକ୍ଷ ୨୯ ହଜାର ୭୫୦ ମେଟ୍ରିକ ଟନ ଥିଲା। ହେଲେ ୧୩୩ ଶୀତଳ ଭଣ୍ଡାରରୁ ବର୍ତ୍ତମାନ ୩୫ଟି ଚାଲୁଛି। ସେଥିରୁ ୨୨ଟି ଘରୋଇ ଓ ଦୁଇଟି ସରକାରୀ। ସରକାରୀ ଶୀତଳ ଭଣ୍ଡାର କଟକ ଓ ପୁରୀରେ ଅଛି। ୩୫ଟି ଶୀତଳ ଭଣ୍ଡାରର କ୍ଷମତା ୧ ଲକ୍ଷ ୭୨ ହଜାର ୧୮୦ ମେଟ୍ରିକ ଟନ। ୯୮ ଶୀତଳ ଭଣ୍ଡାର ଅଚଳ। ଜାନୁଆରୀ ମାସରୁ ଶୀତଳ ଭଣ୍ଡାର ପାଇଁ ଆର୍ଥିକ ସହାୟତା କାର୍ଯ୍ୟକ୍ରମ ଆରମ୍ଭ ହୋଇଛି। ଏଥିରେ ୨୫୨ କୋଟି ବ୍ୟୟ ବରାଦ ହୋଇଛି। ଏହା 2029-30 ଯାଏଁ ଚାଲିବ। ୫୮ଟି ସବ ଡିଭିଜନରେ ଗୋଟେ ଲେଖାଏଁ ଶୀତଳ ଭଣ୍ଡାର ନିର୍ମାଣ ହେବ। ଆବଶ୍ୟକ ପଡିଲେ ବ୍ଲକ ସ୍ତରୀୟ ବି ହେବ। ୨୩୯ଟି ସୌର ଚଳିତ କୋଲଡ଼ ଷ୍ଟୋରେଜ କରାଯାଇଛି।
ସେଞ୍ଚୁରି ମାରିବ କି ଟଙ୍କା ; ଟଙ୍କାର ମୂଲ୍ୟ ଡଲାର ତୁଳନାରେ ସର୍ବନିମ୍ନ ସ୍ତରରେ ପହଞ୍ଚିଛି
ନନ୍ଦିଘୋଷ ବ୍ୟୁରୋ : ସେଞ୍ଚୁରି ମାରିବ କି ଟଙ୍କା। ରେକର୍ଡ ସ୍ତରକୁ ଖସିଲା ଟଙ୍କାର ମୂଲ୍ୟ । ଡଲାର ତୁଳନାରେ ଏହା ସର୍ବନିମ୍ନ ସ୍ତରରେ ପହଞ୍ଚିଛି। ଆଜି ଟଙ୍କାର ମୂଲ୍ୟ ଆମେରିକୀୟ ଡଲାର ତୁଳନାରେ ଅଛି ୯୦ ଟଙ୍କା ୧୩ ପଇସା । ପ୍ରଥମ ଥର ପାଇଁ ଏହା ୯୦ ପାର୍ କରିଛି। ଗତକାଲି ଏହା ୮୯.୮୭୪ ଟଙ୍କାରେ ପହଞ୍ଚିଛି। ମାର୍କେଟ ଏକ୍ସପର୍ଟଙ୍କ ଅନୁସାରେ ଦିନକୁ ଦିନ ଡଲାର ଶକ୍ତିଶାଳୀ ହେଉଛି ଏବଂ ଦୁର୍ବଳ ହେଉଛି ଟଙ୍କା। ଅକ୍ଟୋବରରେ ଟ୍ରେଡ୍ ସେଫିସିଟ୍ ହେବାରୁ ସ୍ଥିତି ଆହୁରି ସଂଗୀନ ହୋଇଛି। ଡଲାର ତୁଳନାରେ ଟଙ୍କାର ମୂଲ୍ୟରେ ହ୍ରାସ ହେବା ଯୋଗୁଁ ଭାରତୀୟ ବିଦେଶୀ ମୁଦ୍ରା ଭଣ୍ଡାର ଉପରେ ଘୋର ପ୍ରଭାବ ପଡ଼ିବାର ଆଶଙ୍କା ସୃଷ୍ଟି ହୋଇଛି । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଟାରିଫକୁ ନେଇ ବିଶ୍ଵ ବଜାରରେ ବାଣିଜ୍ୟିକ ଯୁଦ୍ଧ ଲାଗି ରହିଛି। ଅର୍ଥନୀତି ବିଶେଷଜ୍ଞ ଆକଳନ କରିଛନ୍ତି, ଏହି ଧାରା ଆଗକୁ ବି ବଜାୟ ରହିବ। ଟଙ୍କା ମୂଲ୍ୟ ଆହୁରି ହ୍ରାସ ଘଟିବ। ଏପରିକି ଆମେରିକା ଡଲାର ତୁଳନାରେ ଟଙ୍କା ମୂଲ୍ୟ ହ୍ରାସ ଘଟି ୧୦୦ ଟଙ୍କାରେ ପହଞ୍ଚିପାରେ ବୋଲି ଆଶଙ୍କା ପ୍ରକାଶ ପାଇଛି।
ବାରବାଟୀ ମ୍ୟାଚ ପାଇଁ ଆଜି ଓସିଏ ଅନୁବନ୍ଧିତ ସଂଗଠନକୁ, ସ୍କୁଲ, କଲେଜ ଓ କ୍ଲବ ପାଇଁ ଟିକେଟ ବିକ୍ରି କରାଯାଉଛି
ନନ୍ଦିଘୋଷ ବ୍ୟୁରୋ : ବାରବାଟୀ ମ୍ୟାଚ ପାଇଁ ଆଜି ଓସିଏ ଅନୁବନ୍ଧିତ ସଂଗଠନକୁ ସ୍କୁଲ, କଲେଜ ଓ କ୍ଲବ ପାଇଁ ଟିକେଟ ବିକ୍ରି କରାଯାଉଛି। ଦୁଇ ଦିନ ଧରି ଓସିଏ କନଫରେନ୍ସ ହଲରେ ଏହି ଟିକେଟ ବିକ୍ରି ହେବ। SBI ଓ ଓସିଏ ମିଳିତ ଭାବେ ଦୁଇ ଦିନରେ ୧୧ ହଜାର ଟିକଟ ବିକ୍ରି କରିବେ। ଏହା ପରେ ଆସନ୍ତା ୫ ତାରିଖରେ କାଉଣ୍ଟରରେ ସାଧାରଣ ଦର୍ଶକଙ୍କ ପାଇଁ ୧୦ ହଜାର ଟିକେଟ ବିକ୍ରି କରାଯିବ। ଡିସେମ୍ବର ୯ ରେ ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ହେବ ଟି-ଟ୍ଵେଣ୍ଚି ମ୍ୟାଚ।
କେନ୍ଦ୍ରାଞ୍ଚଳ ରେଞ୍ଜରେ ଅପରେସନ ଥଣ୍ଡର ; ୩୯ ମାମଲାରେ ୭୪ ଅପରାଧୀ ଗିରଫ
ନନ୍ଦିଘୋଷ ବ୍ୟୁରୋ : କେନ୍ଦ୍ରାଞ୍ଚଳ ରେଞ୍ଜରେ ଅପରେସନ ଥଣ୍ଡର। ୩୯ ମାମଲାରେ ୭୪ ଅପରାଧୀ ଗିରଫ। ବନ୍ଧୁକ, ଗୁଳି, ବ୍ରାଉନସୁଗର ଜବତ ହୋଇଛି। ବିଭିନ୍ନ ଅପରାଧରେ ସଂଶ୍ଲିଷ୍ଟ ଅପରାଧୀଙ୍କୁ ସାବାଡ୍ କରିବାକୁ କେନ୍ଦ୍ରାଞ୍ଚଳ ପୋଲିସ ରେଞ୍ଜ ଅଧୀନରେ ଥିବା ଖୋର୍ଦ୍ଧା, ପୁରୀ, କଟକ, ନୟାଗଡ଼, ଯାଜପୁର, କେନ୍ଦ୍ରାପଡ଼ା, ଜଗତସିଂହପୁରରେ ହୋଇଛି ସ୍ଵତନ୍ତ୍ର ଅପରେସନ। ନଭେମ୍ବର ୧୫ରୁ ୩୦ ତାରିଖ ପର୍ଯ୍ୟନ୍ତ ଚାଲିଥିଲା ଧରପଗଡ। କେନ୍ଦ୍ରାଞ୍ଚଳ ଡି ଆଇ ଜି ସତ୍ୟଜିତ ନାୟକ କହିଛନ୍ତି, ବେଆଇନ ଅସ୍ତ୍ରଶସ୍ତ୍ର ରଖିବା ଅଭିଯୋଗରେ ୮ଟି ମାମଲାରେ ୨୭ ଜଣଙ୍କୁ ଗିରଫ କରାଯାଇଛି। ଜବତ ହୋଇଛି ୧୭ ଟି ବନ୍ଧୁକ ଏବଂ ୧୦ଟି ଗୁଳି। ସେହିପରି ଡ୍ରଗ୍ସ କାରବାରରେ ୨୩ଟି ମାମଲାରେ ୩୪ ଜଣଙ୍କୁ ଗିରଫ କରାଯାଇଛି। ଜବତ ହୋଇଛି ୫୦୦ ଗ୍ରାମ ବ୍ରାଉନ ସୁଗର ଜବତ, ୫୦କେଜି ଗଞ୍ଜେଇ ଓ ୯୨ ବୋତଲ କଫ ସିରପ୍। ସେହିପରି ବିଭିନ୍ନ ମାମଲାରେ ୨୫୦ଜଣ ଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି। ବେଆଇନ ଗୋ ଚାଲାଣର ୮ଟି ମାମଲାରେ ୧୩ ଜଣଙ୍କୁ ଗିରଫ କରାଯାଇଛି। ସେହିପରି ୨୭ ୦୦୦ରୁ ଅଧିକ ଗାଡ଼ି ମଟର ଯାଞ୍ଚ କରି ୧ କୋଟି ୧୭ ଲକ୍ଷ ଟଙ୍କା ଫାଇନ କରାଯାଇଛି। ଶାନ୍ତି ଶୃଙ୍ଖଳା, ଅପରାଧ ମୁକ୍ତ ସମାଜ ପାଇଁ ପୋଲିସ ପ୍ରତିଶ୍ରୁତି ବଦ୍ଧ ବୋଲି କହିଛନ୍ତି କେନ୍ଦ୍ରାଞ୍ଚଳ ଆଇଜି।
ଭାରତ ଗସ୍ତରେ ଆସୁଛନ୍ତି ପୁଟିନ ; ଆସନ୍ତାକାଲି ସେ ନୂଆଦିଲ୍ଲୀରେ ପହଞ୍ଚିବେ
ନନ୍ଦିଘୋଷ ବ୍ୟୁରୋ : ଆସନ୍ତାକାଲି ଦୁଇ ଦିିନିଆ ଭାରତ ଗସ୍ତରେ ଆସୁଛନ୍ତି ରୁଷ ରାଷ୍ଟ୍ରପତି ପୁଟିନ। ତାଙ୍କ ଗସ୍ତ ସମୟରେ ଭାରତ ଓ ରୁଷ ମଧ୍ୟରେ ଅନେକ ଦ୍ଵିପାକ୍ଷିକ ଚୁକ୍ତି ହେବ। ବିଶେଷ କରି ପ୍ରତିରକ୍ଷା ସହଯୋଗ, ବାଣିଜ୍ୟ କାରବାର ଓ ତେଲ କିଣା ନେଇ ଆଲୋଚନା ହେବ ବୋଲି ଜଣାପଡ଼ିଛି। ପୁଟିନଙ୍କ ଗସ୍ତ ଆଗରୁ ଭାରତକୁ ଅତ୍ଯାଧୁନିକ ଅସ୍ତ୍ରଶସ୍ତ୍ର ବିକ୍ରି ପାଇଁ ଏକ ପ୍ରସ୍ତାବ ରୁଷର ସଂସଦରେ ପାରିତ ହୋଇଛି। ରୁଷ ପକ୍ଷରୁ କୁହାଯାଇଛି, ଭାରତ ସହିତ ସଂପର୍କ ସାଧାରଣ ସଂପର୍କ ନୁହେଁ। ଏହା ବହୁତ ଦିନରୁ ରହି ଆସିଛି । ଆଗାମୀ ଦିନରେ ଏହା ଆହୁରି ସୁଦୃଢ଼ ହେବ। ସାମରିକ ଓ ବାଣିଜ୍ୟିକ ସହଯୋଗ ଆହୁରି ବଢ଼ିବ ବୋଲି କୁହାଯାଉଛି। ଟ୍ରମ୍ପଙ୍କ ଟ୍ରେଡ୍ ୱାର ଓ ଭାରତ ବିରୋଧରେ ଅତ୍ୟଧିକ ଟ୍ଯାକ୍ସ ଲାଗୁ କରିବା ପରେ ଭାରତ ଓ ରୁଷ ପରସ୍ପରର ଆହୁରି ନିକଟତର ହୋଇଛନ୍ତି।
ରୁଷ ରାଷ୍ଟ୍ରପତି ପୁଟିନ ଓ ଆମେରିକା ମଧ୍ୟରେ ବୈଠକ ; ୪ ବର୍ଷର ଯୁଦ୍ଧ ବନ୍ଦ ପାଇଁ ୪ ଘଣ୍ଟା ଆଲୋଚନା
ନନ୍ଦିଘୋଷ ବ୍ୟୁରୋ : ଦୀର୍ଘ ୪ ବର୍ଷ ଧରି ଚାଲିଥିବା ୟୁକ୍ରେନ ଯୁଦ୍ଧ ଥମିବାର ସାମାନ୍ୟ ଆଶା ଦେଖା ଦେଇଛି। ଯଦିଓ ପକ୍କା ଭାବେ କିଛି ସ୍ପଷ୍ଟ ହୋଇନାହିଁ, ତେବେ ଆମେରିକା-ରୁଷିଆର ଆଲୋଚନାରୁ ସକରାତ୍ମକ ସୂଚନା ମିଳିଛି। ୟୁକ୍ରେନକୁ ନେଇ ଆମେରିକାର ପ୍ରତିନିଧି ଦଳ ଓ ରୁଷିଆର ରାଷ୍ଟ୍ରପତି ପୁଟିନଙ୍କ ମଧ୍ୟରେ ହୋଇଛି ଆଲୋଚନାଚ। ଦୀର୍ଘ ୪ ଘଣ୍ଟାରୁ ଅଧିକ ସମୟ ଧରି ଆଲୋଚନା ହୋଇଥିଲା।ବୈଠକରେ ନିଜେ ପୁଟିନ ମଧ୍ୟ ଉପସ୍ଥିତ ଥିଲେ। ତାଙ୍କ ସହିତ ଆଲୋଚନା କରିଥିଲେ ଆମେରିକା ରାଷ୍ଟ୍ରପତି ଟ୍ରମ୍ପଙ୍କ ସ୍ଵତନ୍ତ୍ର ପ୍ରତିନିଧି ଷ୍ଟିଭ ୱଟକୋଫ୍। ତେବେ ବୈଠକ ପରେ ରୁଷର ଜଣେ ଅଧିକାରୀ କହିଛନ୍ତି, ଆଲୋଚନା ସକରାତ୍ମକ ରହିଛି। କିନ୍ତୁ ରୁଷ ନିଜ ଆଭିମୁଖ୍ୟରେ କୌଣସି ସାଲିସ କରିବ ନାହିଁ। ବିଶେଷ କରି ୟୁକ୍ରେନର ଯେଉଁ ଅଞ୍ଚଳକୁ ରୁଷ ଅଧିକାର କରି ନେଇଛି, ତାହା ଫେରାଇବା ମୁଡ୍ ରେ ନାହିଁ ମସ୍କୋ। ଆହୁରି ଅନେକ କାମ ବାକିଥିବା ସେ କହିଛନ୍ତି। ୟୁକ୍ରେନ ଯୁଦ୍ଧ ଆରମ୍ଭ ହେବାର ଏହି ଫେବ୍ରୁଆରିକୁ ୪ ବର୍ଷ ପୂରିଯିବ। ଉଭୟ ପକ୍ଷ ବ୍ୟାପକ କ୍ଷତିଗ୍ରସ୍ତ ହୋଇଛନ୍ତି। ବିଶ୍ଵ ଆର୍ଥିକ ଅବସ୍ଥା ମଧ୍ୟ ପ୍ରଭାବିତ ହୋଇଛି। ତେଣୁ ଯୁଦ୍ଧ ବନ୍ଦ ପାଇଁ ଆମେରିକା ପକ୍ଷରୁ ମଧ୍ୟସ୍ଥତା କରାଯାଉଛି। ସେପଟେ ୟୁରୋପକୁ ଖୋଲାଖୋଲି ଧମକ ଦେଇଛନ୍ତି ପୁଟିନ। ସେ କହିଛନ୍ତି, ଯଦି ୟୁରୋପ ଯୁଦ୍ଧ ଚାହୁଁଛି, ତେବେ ଆମେ ବି ପ୍ରସ୍ତୁତ। ୟୁକ୍ରେନ ଶାନ୍ତି ପ୍ରକ୍ରିୟାରେ ୟୁରୋପ ବାଧା ସାଜିଥିବା ସେ ଅଭିଯୋଗ କରିଛନ୍ତି। ୟୁରୋପ ଯାହା କହୁଛି, ତାକୁ ରୁଷ ଆଦୌ ଗ୍ରହଣ କରିବ ନାହିଁ ବୋଲି କହିଛନ୍ତି ପୁଟିନ। ଏବେ ୟୁକ୍ରେନର ୨୦ ପ୍ରତିଶତ ଅଞ୍ଚଳ ରୁଷିଆ ଅକ୍ତିଆରରେ ଅଛି। ଲକ୍ଷେ ୨୦ ହଜାର ବର୍ଗ କିଲୋମିଟରକୁ ଦଖଲ କରି ନେଇଛି ମସ୍କୋ। ତଥାପି ରୁଷ ନିଜ ଲକ୍ଷ୍ୟ ହାସଲ କରିପାରିନାହିଁ ଏବଂ ୟୁକ୍ରେନ ପକ୍ଷରୁ କଡ଼ା ପ୍ରତିରୋଧର ସମ୍ମୁଖୀନ ହେଉଛି। ୟୁକ୍ରେନ ଚାହୁଁଛି, ଶାନ୍ତି ପାଇଁ ରୁଷ ଯେଉଁ ସବୁ ଅଞ୍ଚଳ ଦଖଲ କରି ନେଇଛି, ସେହି ଅଞ୍ଚଳ ଫେରାଇ ଦେଉ ରୁଷ। ୟୁକ୍ରେନ ପଛରେ କୌଣସି ଚାଲ୍ ବାଜ କାମ କରାନଯାଉ ବୋଲି ମଧ୍ୟ ଖୋଲାଖୋଲି ଆହ୍ଵାନ ଦେଇଛନ୍ତି ରାଷ୍ଟ୍ରପତି ଜେଲେନସ୍କି।
କଲ୍ୟାଣସିଂହପୁରରେ ଦନ୍ତା ହାତୀ ଆକ୍ରମଣରେ ଯୁବକ ଗୁରୁତର
ନନ୍ଦିଘୋଷ ବ୍ୟୁରୋ : ରାୟଗଡ଼ା କଲ୍ୟାଣସିଂହପୁର ନିୟମଗିରି ପାହାଡ଼ ବୁଡୁଣି ଗାଁରେ ଦନ୍ତା ଆକ୍ରମଣରେ ଜଣେ ଡଙ୍ଗରିଆ ଗୁରୁତର ହୋଇଛନ୍ତି। ଗୁରୁତର ହେଲେ ୫୦ ବର୍ଷିୟ ବାଲା ସିକକା । ହାତୀ କବଳରୁ ଗ୍ରାମବାସୀ ଉଦ୍ଧାର କରି ତାଙ୍କୁ ପ୍ରଥମେ କଲ୍ୟାଣସିଂହପୁର ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ। ପରେ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି । ଭୋରୁ ଯାଉଥିବା ସମୟରେ ଆକ୍ରମଣ କରିଥିଲା ଦନ୍ତା। ତାଙ୍କ ଛାତିର ହାଡ ଓ ଗୋଡ ଭାଙ୍ଗି ଯାଇଥିବା ଜଣାପଡିଛି । ଗତ ଦୁଇଦିନ ହେଲା ନିୟମଗିରି ରେ ପ୍ରାୟ ୩୦ ଟିକିଆ ହାତୀ ବୁଲୁଥିବା ଖବର ପ୍ରକାଶ ପାଇଥିଲା। ପୁର୍ବରୁ କଳାହାଣ୍ଡି ଲାଞ୍ଜିଗଡ଼ କନାକାଡୁ ଗାଁରେ ଜଣେ ବାଳକକୁ ହାତୀ ପାଦରେ ଦଳି ଦେଇଥିଲା। ବାରମ୍ବାର ଏଭଳି ଘଟଣା ଘଟୁଥିଲେ ମଧ୍ୟ ବନ ବିଭାଗର ଖାମଖିଆଲୀ ଯୋଗୁଁ ହାତୀର ଆକ୍ରମଣର ଶିକାର ହେଉଛନ୍ତି ବୋଲି ଗ୍ରାମବାସୀ ଅଭିଯୋଗ କରିଛନ୍ତି ।
ଜଗତସିଂହପୁର ଥାନା ତରିକୁନ୍ଦରେ ଚଢାଉ ; ସନ୍ଦିଗ୍ଧ ବାଂଲାଦେଶୀ ସନ୍ଦେହରେ ରେଡ୍
ନନ୍ଦିଘୋଷ ବ୍ୟୁରୋ : ସନ୍ଦିଗ୍ଧ ବାଂଲାଦେଶୀ ସନ୍ଦେହରେ ପ୍ରଶାସନର ରେଡ୍। ଜଗତସିଂହପୁର ଥାନା ତରିକୁନ୍ଦ ହାଇସ୍କୁଲ ପଛ ପଟ ଖେଳପଡ଼ିଆରେ ରହୁଥିବା ଦୁଇ ପରିବାରକୁ ଉଠାଇ ନେଇଛି ପୋଲିସ। ସେଠାରେ ପ୍ରାୟ ୧୦ ଜଣ ରହୁଥିଲେ। ୬ ଜଣ ମହିଳଆ, ୩ ଜଣ ଶିଶୁ ଓ ଜଣେ ବୃଦ୍ଧ। ସମସ୍ତଙ୍କୁ ବିରିଡି ବ୍ଲକ ବାଗଲପୁର ବହୁ ମୁଖୀ ବନ୍ୟା ଆଶ୍ରୟସ୍ଥଳୀରେ ରଖାଯାଇଛି। ସେମାନଙ୍କର କାଗଜପତ୍ର ଯାଞ୍ଚ କରାଯାଉଛି। ଯାହା ସୂଚନା ମିଳିଛି ଏମାନଙ୍କ ଘର ଏରସମା ବ୍ଲକ କଳାବେଦୀ ଅଞ୍ଚଳର । ଏମାନେ ଏଠାରେ ଘର ଦ୍ୱାର କରି ରହୁଛନ୍ତି । ଏହା ଆଗରୁ 37 ଜଣଙ୍କୁ ପୋଲିସ ସଂଧିଗ୍ଧ ବାଂଲାଦେଶୀ ଭାବେ ଉଠେଇ ନେଇଥିଲା। ସେମାନଙ୍କ ମଧ୍ୟରୁ ୧୩ ଜଣ ବାଂଲାଦେଶୀ ବୋଲି ଜଣାପଡ଼ିଥିଲା। ସେମାନଙ୍କୁ ବାଂଲାଦେଶ ପଠାଇ ଦିଆଯିବ। ଜଗତସିଂହପୁର ତରିକୁନ୍ଦ ବେହେରାମପୁରରେ ବାଂଲାଦେଶୀଙ୍କୁ ଘର ଭଡ଼ା ଦେଇଥିବା ସିକନ୍ଦର ଆଲାମ ଓ ତାର ସାନ ଭାଇ ଅବଦୁଲ ମୁଲତିପି ଖାଁକୁ ପୋଲିସ ଗିରଫ କରି ଆଗରୁ ଜେଲ ପଠାଇ ଦେଇଛି।
ଆଜି ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଦ୍ବିତୀୟ ଦିନିକିଆ ; ରାୟପୁରରେ ଅପରାହ୍ଣ ଗୋଟାଏ ୩୦ରେ ଖେଳାଯିବ ମ୍ୟାଚ
ନନ୍ଦିଘୋଷ ବ୍ୟୁରୋ : ଆଜି ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଦ୍ବିତୀୟ ଦିନିକିଆ । ରାୟପୁରରେ ଅପରାହ୍ଣ ଗୋଟାଏ ୩୦ରେ ଖେଳାଯିବ ମ୍ୟାଚ । ବିରାଟ କୋହଲି ଫର୍ମକୁ ଫେରିଥିବାରୁ ଏହି ମ୍ୟାଚ ଜିତି ସିରିଜ କବଜା କରିବାକୁ ଉଦ୍ୟମ କରିବ ଟିମ ଇଣ୍ଡିଆ । ପ୍ରଥମ ଦିନିକିଆରେ ଦକ୍ଷିଣ ଆଫ୍ରିକାକୁ ୧୭ ରନରେ ହରାଇ ୩ଟିକିଆ ସିରିଜରେ ୧-୦ରେ ଆଗୁଆ ରହିଛି ଭାରତ । ରାଞ୍ଚିରେ ଖେଳାଯାଇଥିବା ପ୍ରଥମ ଦିନିକିଆରେ ଶତକ ହାସଲ ସହ ଫର୍ମକୁ ଫେରିଛନ୍ତି ବିରାଟ କୋହଲି । ରୋହିତ ଶର୍ମାଙ୍କ ୫୭ ଓ ଅଧିନାୟକ କେ.ଏଲ ରାହୁଲଙ୍କ ୬୦ ରନ ବଳରେ ୩୪୯ ରନ କରିଥିଲା ଟିମ ଇଣ୍ଡିଆ । ଦକ୍ଷିଣ ଆଫ୍ରିକା ଲଢୁଆ ବ୍ୟାଟିଂ କରିବା ସତ୍ତ୍ବେ ୩୩୨ ରନ କରିବାରେ ସକ୍ଷମ ହୋଇପାରିଥିଲା । ଆହତ କାରଣରୁ ଅଧିନାୟକ ଶୁବମନ ଗିଲ ଓ ଉପ ଅଧିନାୟକ ଶ୍ରେୟସ ଆୟାରଙ୍କୁ ବିଶ୍ରାମ ଦିଆଯାଇଛି । କେଏଲ ରାହୁଲଙ୍କ ନେତୃତ୍ବରେ ଖେଳୁଛି ଭାରତ । ସିରିଜର ତୃତୀୟ ମ୍ୟାଚ ୬ ତାରିଖରେ ବିଶାଖପାଟଣାରେ ଖେଳାଯିବ । ଏହାପରେ ଟି-ଟ୍ବେଣ୍ଟି ସିରିଜର ପ୍ରଥମ ମ୍ୟାଚ ୯ ତାରିଖ ଦିନ କଟକରେ ଖେଳାଯିବ ।
ଆଜି ବି ବେଶ ସରଗରମ ହେବ ବିଧାନସଭା
ନନ୍ଦିଘୋଷ ବ୍ୟୁରୋ: ଆଜି ବି ବିଧାନସଭା ବେଶ ସରଗରମ ହେବ। ବିଭିନ୍ନ ପ୍ରସଙ୍ଗକୁ ନେଇ ଗୃହରେ ଶାସକ ଓ ବିରୋଧୀ ମୁହାଁମୁହିଁ ହେବେ । ଶକ୍ତି , କୃଷି ଓ କୃଷକ,ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ, ମତ୍ସ୍ୟ ଓ ପ୍ରାଣୀ ସମ୍ପଦ, ସମବାୟ, ବୟନ ଶିଳ୍ପ, ସୂକ୍ଷ୍ମ କ୍ଷୁଦ୍ର ଓ ମଧ୍ୟମ ଉଦ୍ୟୋଗୀ ଏବଂ ବିଜ୍ଞାନ ଓ କାରିଗରୀ ବିଭାଗର ରହିଛି ପ୍ରଶ୍ନକାଳ । ବିଧାୟକ ଚାହିଁଲେ ଭିନ୍ନ ପ୍ରଶ୍ନ ପଚାରିବେ। ଶୂନ୍ୟକାଳରେ ଉଭୟ ବିରୋଧୀ ଓ ଶାସକ ବହୁ ଗୁରୁତ୍ବପୂର୍ଣ୍ଣ ରାଜ୍ୟ ସ୍ବାର୍ଥ ସମ୍ବଳିତ ପ୍ରସଙ୍ଗ ଉଠାଇବେ । ମୁଖ୍ୟ ବିରୋଧୀ ବିଜେଡି ପକ୍ଷରୁ ଧାନ ମଣ୍ଡି ସମସ୍ୟା ନେଇ ମୁଲତବୀ ପ୍ରସ୍ତାବ ଦିଆଯିବ । ପ୍ରଶ୍ନକାଳରେ ବିଭିନ୍ନ ବିଭାଗ ଉପରେ ଘମାଘୋଟ ଆଲୋଚନା ହେବାର ସମ୍ଭାବନା ରହିଛି। ସେହିପରି ଦ୍ବିତୀୟ ଅଧ୍ୟାୟରେ ବାଣିଜ୍ୟ ଓ ପ୍ରତିଷ୍ଠାନ ଆଇନ ସଂଶୋଧନ ପ୍ରସ୍ତାବ ଉପରେ ଆଲୋଚନା ହେବ।