ପୁରୀ: ଅଣସରରେ ମହାପ୍ରଭୁଙ୍କର ଚାଲିଛି ଗୁପ୍ତସେବା  । ମହାପ୍ରଭୁଙ୍କ ସ୍ଥାନରେ ଶ୍ରୀମନ୍ଦିରରେ ଭକ୍ତମାନେ ପଟିଦିଅଁଙ୍କୁ ଦର୍ଶନ କରୁଛନ୍ତି  । ଆଜି ଭୋର ୪ଟାରେ ମନ୍ଦିର ଖୋଲିବା ପରେ ମଙ୍ଗଳ ଆଳତୀ, ତଡ଼ପ ଲାଗି, ଅବକାଶ,  ଅନବସର ବେଶ , ହୋଇଥିଲେ ।  ୫ ଟାରେ ଗୋପାଳ ବଲ୍ଲଭ ପରେ ଏବେ ସର୍ବସାଧାରଣ ଦର୍ଶନ ଆରମ୍ଭ ହୋଇଛି । ଶ୍ରୀବଳଭଦ୍ରଙ୍କ ସ୍ଥାନରେ ଅନନ୍ତ ବାସୁଦେବ, ଦେବୀ ସୁଭଦ୍ରାଙ୍କ ସ୍ଥାନରେ ମା’ ଭୂବନେଶ୍ବରୀ, ଜଗନ୍ନାଥଙ୍କ ସ୍ଥାନରେ ଅନନ୍ତ ନାରାୟଣ ଏବଂ ସୁଦର୍ଶନଙ୍କ ସ୍ଥାନରେ ପତିତପାବନ ପୂଜା ପାଉଛନ୍ତି ।

ସେପଟେ ଶ୍ରୀଜୀଉଙ୍କ ଅଣସର ସମୟରେ ଦୁର୍ଲ୍ଲଭ ଦର୍ଶନ ଦେଉଛନ୍ତି ଅଲାରନାଥ । ଶିଳାବ୍ରହ୍ମଙ୍କୁ ଦର୍ଶନ କରି ଶ୍ରୀଜଗନ୍ନାଥ ଦର୍ଶନର ପୁଣ୍ୟ ଅର୍ଜନ କରୁଛନ୍ତି ଶ୍ରଦ୍ଧାଳୁ । ବ୍ରହ୍ମଗିରି ଅଲାରନାଥଙ୍କ କ୍ଷୀରି ଭୋଗର ରହିଛି ସ୍ବତନ୍ତ୍ରତା । ଶ୍ରୀଅଲାରନାଥଙ୍କ ଦର୍ଶନ ପାଇଁ ହଜାରହଜାର ଭକ୍ତଙ୍କ ଗହଳି ଲାଗୁଛି । ଏଥିପାଇଁ ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଛି। ଭିଡ ନିୟନ୍ତ୍ରଣ ପାଇଁ ୬ ପ୍ଳାଟୁନ ପୋଲିସ ଫୋର୍ସ ନିୟୋଜିତ ହୋଇଛନ୍ତି । ୬ ଜଣ ଆଇଆଇସିଙ୍କ ନେତୃତ୍ବରେ ଭକ୍ତଙ୍କ ଶୃଙ୍ଖଳିତ ଦର୍ଶନ ଜାରି ରହିଛି ।

ବାହାନଗା: ଟ୍ରେନ ଟ୍ରାଜେଡି ପରେ ସୁଧୁରୁଛି ସ୍ଥିତି। ବାହାନଗା ଷ୍ଟେସନର ଦୁଇଟି ମେନ ଲାଇନରେ ଟ୍ରେନ ଚଳାଚଳ ସ୍ବାଭାବିକ ହୋଇଛି। ଦିନ ୧୧ଟା ସୁଦ୍ଧା ଡାଉନ ଲାଇନରେ ୧୦ଟି ମାଲବାହୀ ଟ୍ରେନ ଓ ୬ଟି କୋଚିଂ ଟ୍ରେନ ଯାତାୟାତ କରିଛି। ସେହିପରି ଅପ ଲାଇନରେ ୪ ମାଲବାହୀ ଟ୍ରେନ ଓ ୯ଟି କୋଚିଂ ଟ୍ରେନ ଯାଇଛି। ଏବେ ୧୦ କିଲୋମିଟର ପ୍ରତିଘଣ୍ଟା ସ୍ପିଡରେ ଟ୍ରେନ ଯାତାୟାତ କରୁଛି ।

ଦୁର୍ଘଟଣାସ୍ଥଳରେ ଟ୍ରେନ ସ୍ପିଡ ଉପରେ କଟକଣା ଲାଗୁ କରାଯାଇଛି । ସନ୍ଧ୍ୟା ସୁଦ୍ଧା ରିଷ୍ଟୋରେସନ କାର୍ଯ୍ୟ ଶେଷ ହେବା ପରେ ଟ୍ରେନର ସ୍ପିଡ ବଢ଼ାଯିବ ବୋଲି ଦକ୍ଷିଣ ପୂର୍ବ ରେଳବାଇର ମୁଖ୍ୟ ଲୋକସମ୍ପର୍କ ଅଧିକାରୀ ଆଦିତ୍ୟ ଚୌଧୁରୀ କହିଛନ୍ତି। ଫେକ୍ ନ୍ୟୁଜ ଉପରେ ବିଶ୍ବାସ ନକରିବାକୁ ରେଳବାଇ ପକ୍ଷରୁ ଅପିଲ କରାଯାଇଛି। କେତେଜଣ ଏସଏମଆରଙ୍କୁ ସସପେଣ୍ଡ ଓ ଜଣେ ଏସଏମଆର ଫେରାର ଥିବା ଖବର ସମ୍ପୂର୍ଣ୍ଣ ମିଛ।

ଦୁର୍ଘଟଣା ସମୟରେ ଡ୍ୟୁଟିରେ ଥିବା ଏସଏମଆର ରେସ୍କ୍ୟୁ ଓ ତଦନ୍ତରେ ସକ୍ରିୟ ଭାବେ ସାମିଲ ହୋଇଛନ୍ତି। ଏଭଳି ମିଛ ଖବର ଉପରେ ବିଶ୍ବାସ ନକରିବାକୁ ଦକ୍ଷିଣ ପୂର୍ବ ରେଳବାଇର ମୁଖ୍ୟ ଲୋକସମ୍ପର୍କ ଅଧିକାରୀ ଆଦିତ୍ୟ ଚୌଧୁରୀ କହିଛନ୍ତି। ଦୁଇ ଲୋକୋ ପାଇଲଟଙ୍କ ସ୍ବାସ୍ଥ୍ୟାବସ୍ଥା ସ୍ଥିର ରହିଛି । ସେମାନେ ଭୁବନେଶ୍ବର ଏମ୍ସରେ ଚିକିତ୍ସିତ ହେଉଛନ୍ତି ବୋଲି ଦକ୍ଷିଣ-ପୂର୍ବ ରେଳବାଇର ମୁଖ୍ୟ ଲୋକସମ୍ପର୍କ ଅଧିକାରୀ ସୂଚନା ଦେଇଛନ୍ତି।