ଗୁଜରାଟ: ଆଇପିଏଲ ୨୦୨୩ର ଦ୍ୱିତୀୟ କ୍ୱାଲିଫାୟର ମ୍ୟାଚ୍ ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଗୁଜରାଟ ଟାଇଟନ୍ସ ଏବଂ ମୁମ୍ବାଇ ଇଣ୍ଡିଆନ୍ସ ମଧ୍ୟରେ ଚାଲିଛି । ମୁମ୍ବାଇ ଟସ୍ ଜିତି ବୋଲିଂ କରୁଛି । ସେହିପରି ଗୁଜରାଟ ବ୍ୟାଟିଂ କରୁଛି । ଗୁଜରାଟର ପ୍ରାରମ୍ଭିକ ବ୍ୟାଟମ୍ସମ୍ୟାନ ଶୁବମନ ଗିଲ୍ ଦମଦାର ଶତକ ହାସଲ କରିଛନ୍ତି । ସେ ୪୯ ଟି ବଲରୁ ଏହି ଶତକ ହାସଲ କରିଛନ୍ତି । ଚଳିତ ଆଇପିଏଲ ସିଜିନରେ ଏହା ତାଙ୍କର ତୃତୀୟ ଶତକ ଅଟେ । ଗୁଜରାଟ ପକ୍ଷରୁ ରିଦ୍ଧିମାନ ଶାହ ଏବଂ ଶୁଭମନ ଗିଲ୍ ପ୍ରାରମ୍ଭିକ ବ୍ୟାଟ୍ସମ୍ୟାନ ଭାବେ କ୍ରୀଜକୁ ଓହ୍ଲାଇଥିଲେ । ରିଦ୍ଧମାସ ଶାହ ୧୬ ଟି ବଲରେ ୧୮ ରନ୍ କରି ଆଉଟ୍ ହୋଇଯାଇଥିଲେ । ତାଙ୍କ ସ୍ଥାନରେ ସାଇ ସୁଦର୍ଶନ ଆସି ଗିଲଙ୍କୁ ସାଥ୍ ଦେଇଥିଲେ । ଦଳ ୧୬ ଓଭର ଚାଲୁଥିବାବେଳେ ୧୮୩ରନ୍ ସଂଗ୍ରହ କରିଛି । ଶୁବମନ ଗିଲ୍ ବ୍ୟକ୍ତିଗତ ୫୬ ଟି ବଲରେ ୧୨୩ ରନ୍ କରି ବ୍ୟାଟିଂ କରୁଥିବା ବେଳେ ସାଇ ସୁଦର୍ଶନ ୨୪ ଟି ବଲରେ ୩୬ ରନ୍ କରି ବ୍ୟାଟିଂ ଜାରି ରଖିଛନ୍ତି । ଆଜିର ମ୍ୟାଚ୍ ଯିଏ ଜିତିବ ଆସନ୍ତା ୨୮ ତାରିଖରେ ଫାଇନାଲରେ ଚେନ୍ନାଇ ସୁପରକିଙ୍ଗସକୁ ଭେଟିବ ।
ବାଇକରେ ଆସିଲେ ଦମ୍ପତିଙ୍କଠୁ ୪ ଲକ୍ଷ ୫୦ ହଜାର ଟଙ୍କା ଝାମ୍ପିନେଲେ ଦୁର୍ବୃତ୍ତ
ବ୍ରହ୍ମପୁର: ଦମ୍ପତିଙ୍କ ଠାରୁ ଝାମ୍ପି ନେଲେ ୪ଲକ୍ଷ ୫୦ହଜାର ଟଙ୍କା । ବ୍ରହ୍ମପୁର ଲାଞ୍ଜିପଲ୍ଲୀ ଅଞ୍ଚଳରୁ ଲୁଟ୍ । ଦମ୍ପତିଙ୍କ ଘର ରଙ୍ଗେଇଲୁଣ୍ଡା ବ୍ଲକ ଆରୁଆପଲି ଅଞ୍ଚଳରେ । ଆଜି ୧୧ଟା ରେ ଉଭୟ ସ୍ବାମୀ ସ୍ତ୍ରୀ ବାଇକ୍ ରେ ଲାଞ୍ଜିପଲୀ ଷ୍ଟେଟ ବ୍ୟାଙ୍କକୁ ଆସିଥିଲେ । ସେଠାରେ ୫ଲକ୍ଷ ୩୦ ହଜାର ଟଙ୍କା ଉଠାଇଥିଲେ । ସ୍ତ୍ରୀଙ୍କ ଭ୍ୟାନିଟିରେ ୪ ଲକ୍ଷ ୫୦ହଜାର ଟଙ୍କା ରଖିଥିବା ବେଳେ ଅନ୍ୟ ଏକ ବ୍ୟାଗ୍ ରେ ୭୦ହଜାର ଟଙ୍କା ରଖି ବଳକା ୧୦ହଜାର ଟଙ୍କା ନିଜ ଝିଅ ଆକାଉଣ୍ଟରେ ଜମା କରିଥିଲେ ।
ସେଠାରୁ ବାଇକ୍ ଯୋଗେ ଆଙ୍କୁଲି ଓଭର ବ୍ରିଜ ଦେଇ ଘରକୁ ଫେରୁଥିଲେ । ଏହି ସମୟରେ ଦୁଇ ଜଣ ଯୁବକ ବ୍ୟାଙ୍କ୍ ନିକଟରୁ ଉଭୟଙ୍କୁ ବାଇକ୍ ରେ ପିଛା କରି ଆଙ୍କୁଳି ଓଭର ବ୍ରିଜ ନିକଟରେ ବାଇକ୍ କୁ ଧକ୍କା ଦେଇ ଭ୍ୟାନିଟି ଝାମ୍ପି ନେଇ ଥିଲେ । ଏନେଇ ବୈଦ୍ୟନାଥ ପୁର ଥାନାରେ ଅଭିଯୋଗ ପରେ ପୋଲିସ ବ୍ୟାଙ୍କ୍ ଓ ରାସ୍ତାରେ ଥିବା ସିସିଟିଭି ଫୁଟେଜ ଯାଞ୍ଚ କରି ତଦନ୍ତ କରୁଛି ।
ବିଶ୍ୱ ଟେଷ୍ଟ ଚମ୍ପିଆନସିପ୍-୨୦୨୩ ଫାଇନାଲ୍ ପାଇଁ ପୁରସ୍କାର ରାଶି ଘୋଷିତ, ବିଜେତା ଟିମକୁ ମିଳିବ ଏତିକି ଟଙ୍କା….
ନୂଆଦିଲ୍ଲୀ: ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ୭ ଜୁନରୁ ଇଂଲଣ୍ଡର ଓଭାଲରେ ବିଶ୍ୱ ଟେଷ୍ଟ ଚମ୍ପିଆନସିପର ଫାଇନାଲ୍ ଖେଳାଯିବ । ଆଇସିସି ଏହି ମହାମୁକାବିଲାର ପ୍ରାଇଜ ମନିର ଘୋଷଣା କରିଛି । ଡବ୍ଲୁଟିସି ଫାଇନାଲ ଜିତିବା ଟିମକୁ ୧.୬ ମିଲିୟନ ଡଲାର (ପ୍ରାୟ ୧୩.୨୧ କୋଟି ଟଙ୍କା) ମିଳିବ । ସେହିପରି ରନରଅପ୍ ଟିମକୁ ୮ ଲକ୍ଷ ଡଲାର (ପ୍ରାୟ ୬.୬ କୋଟି ଟଙ୍କା) ମିଳିବ । ସେହିପରି ଟୁର୍ଣ୍ଣାମେଣ୍ଟର ମୋଟ ପ୍ରାଇଜ ମନି ଗତ ସାଇକିଲ (୨୦୧୯-୨୧) ବରାବର ୩.୮ ମିଲିୟନ ଡଲାର (ପ୍ରାୟ ୩୧.୩୯ କୋଟି ଟଙ୍କା) ହିଁ ରହିବ ।
ପ୍ରକାଶ ଥାଉକି, ଡବ୍ଲୁଟିସି ଫାଇନାଲ୍ ୭ରୁ ୧୧ ଜୁନ ପର୍ଯ୍ୟନ୍ତ ଚାଲିବ ଏବଂ ୧୨ ଜୁନ ରିଜର୍ଭ ଡେ ଭାବରେ ରହିବ । ପାକିସ୍ତାନ ବିଶ୍ୱ ଟେଷ୍ଟ ଚମ୍ପିଆନସିପର ଦ୍ୱିତୀୟ ସାଇକିଲରେ ସପ୍ତମ ସ୍ଥାନରେ ରହିଚି, ତାକୁ ପ୍ରାଇଜ ମନି ଆଧାରରେ ୧ ଲକ୍ଷ ଡଲାର (ପ୍ରାୟ ୮୨ ଲକ୍ଷ ଟଙ୍କା) ମିଳିବ । ଟିମ ଇଣ୍ଡିଆକୁ ଫାଇନାଲ ହାରିବା ସତ୍ତ୍ୱେ ପାକିସ୍ତାନଠୁ ୮ ଗୁଣା ଅଧିକ ପ୍ରାଇଜ ମନି ମିଳିବ । ବିଶ୍ୱ ଟେଷ୍ଟ ଚମ୍ପିଆନସିପର ପ୍ରଥମ ସାଇକିଲର ଫାଇନାଲ୍ ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ସାଉଥମ୍ପଟନରେ ଖେଳାଯାଇଥିଲା । କେନ୍ ୱିଲିୟମସନଙ୍କ ନେତୃତ୍ୱାଧୀନ ନ୍ୟୁଜିଲାଣ୍ଡ ଭାରତକୁ ହରାଇଥିଲା ।
ଫାଇନାଲ ଜିତିଥିବା ନ୍ୟୁଜିଲାଣ୍ଡକୁ ୧୩.୨୧ କୋଟି ଟଙ୍କାର ପୁରସ୍କାର ରାଶି ମିଳିଥିଲା । ଡବ୍ଲୁଟିସିର ଦ୍ୱିତୀୟ ସାଇକିଲରେ ଦକ୍ଷିଣ ଆଫ୍ରିକା ତୃତୀୟ ସ୍ଥାନରେ ରହିଛି । ତାକୁ ପ୍ରାଇଜ ମନି ଆଧାରରେ ୪.୫ ଲକ୍ଷ ଡଲାର ମିଳିବ । ସେହିପରି ଚତୁର୍ଥ ସ୍ଥାନରେ ଥିବା ଇଂଲଣ୍ଡକୁ ୩.୫ ଲକ୍ଷ ଡଲାରର ପୁରସ୍କାର ରାଶି ମିଳିବ । ୫ମ ସ୍ଥାନରେ ଥିବା ଶ୍ରୀଲଙ୍କାକୁ ୨ ଲକ୍ଷ ଡଲାର (୧.୬୫ କୋଟି ଟଙ୍କା) ପୁରସ୍କାର ରାଶି ମିଳିବ । ସେହିପରି ଷଷ୍ଠ ସ୍ଥାନରେ ଥିବା ନ୍ୟୁଜିଲାଣ୍ଡ, ସପ୍ତମ ସ୍ଥାନରେ ଥିବା ପାକିସ୍ତାନ, ଅଷ୍ଟମ ସ୍ଥାନରେ ଥିବା ୱେଷ୍ଟଇଣ୍ଡିଜକୁ ପ୍ରାଇଜ ମନି ଆଧାରରେ ଏକ ଲକ୍ଷ ଡଲାର ଲେଖାଏଁ ଦିଆଯିବ ।
ମଦ ପିଇବାକୁ ଓ ଜୁଆ ଖେଳିବାକୁ ମଙ୍ଗଳସୂତ୍ର ନଦେବାରୁ ସ୍ତ୍ରୀକୁ ପିଟିପିଟି ମାରିଦେଲା ସ୍ୱାମୀ !
କେନ୍ଦ୍ରାପଡ଼ା: ମଦ ପିଇବାକୁ ଏବଂ ଜୁଆ ଖେଳିବାକୁ ମଙ୍ଗଳ ସୁତ୍ର ନଦେବାରୁ ସ୍ତ୍ରୀକୁ ପିଟି ପଟି ମାରିଦେଲା ସ୍ବାମୀ । କେନ୍ଦ୍ରାପଡା ଜିଲ୍ଲା ମହାକାଳପଡା ଜମ୍ବୁ ସାମୁଦ୍ରିକ ଥାନା ମଧ୍ୟମ ଜମ୍ବୁ ଗାଁରେ ଘଟିଛି ଏଭଳି ଅଭାବନୀୟ ଘଟଣା । ମାନସ ସୁର ନାମକ ଜଣେ ଯୁବକ ତାଙ୍କର ସ୍ତ୍ରୀ କଳ୍ପନା ଗିରିକୁ ପିଟିପଟି ମାରିଦେଇଥିବା ଅଭିଯୋଗ କରିଛନ୍ତି ମୃତ ମହିଳାଙ୍କ ବାପା। ଉମାକାନ୍ତ ଗିରିଙ୍କ ଝିଅ କଳ୍ପନା ଗିରିଙ୍କୁ ପ୍ରାୟ ଚାରିବର୍ଷ ତଳେ ଜମ୍ବୁ ଗାଁର ଅନିଲ ସୁରଙ୍କ ପୁଅ ମାନସ ଗିରି ବିବାହ କରିଥିଲେ ।
ଆଗରୁ କଳ୍ପନାଙ୍କ ସ୍ବାମି ମାନସ ଜୁଆ ଓ ମଦ ପିଇ ବାରମ୍ବାର ସ୍ତ୍ରୀ କଳ୍ପନାଙ୍କୁ ମାର ଧର କରୁଥିଲେ । ଗତକାଲି କଳ୍ପନାକୁ ସ୍ବାମୀ ବାଡେଇ ବାଡେଇ ମାରିଦେଇଥିବା ସାମୁଦ୍ରିକ ଥାନା ଜମ୍ବୁରେ ଲିଖିତ ଅଭିଯୋଗ କରିଛନ୍ତି ମୃତ କଳ୍ପନାଙ୍କ ବାପା । କଳ୍ପନାଙ୍କୁ ମଦ ଓ ଜୁଆ ଖେଳିବା ପାଇଁ ମଙ୍ଗଳସୁତ୍ର ମାଗିଥିଲେ । କଳ୍ପନା ମଙ୍ଗଳସୁତ୍ର ନଦେବାରୁ କଳ୍ପନାକୁ ପିଟି ପିଟି ମାରିଦେଇଥିବା ପ୍ରତିକ୍ରିୟା ଦେଇଛନ୍ତି କଳ୍ପନାଙ୍କ ଭାଇ ଗୌତମ । ଘଟଣା ସ୍ଥଳରେ ଜମ୍ବୁ ପୋଲିସ ସହିତ ସାଇଣ୍ଟିଫିକ ଟିମ ପହଁଚି ତଦନ୍ତ କରିବା ସହିତ ମୃତ ମହିଳାଙ୍କ ସ୍ବାମୀ ଓ ଶଶୁରକୁ ଅଟକ ରଖିଛି ।
ଢେଙ୍କାନାଳରେ ମାଟି ମାଫିଆଙ୍କ ଦୌରାତ୍ମ୍ୟ, ରେଡ୍ କରିବାରୁ ତହସିଲଦାରଙ୍କୁ ଆକ୍ରମଣ
ଢେଙ୍କାନାଳ: ଢେଙ୍କାନାଳ ଜିଲ୍ଲା ପରଜଙ୍ଗରେ ମାଟି ମାଫିଆଙ୍କ ଦୌରାତ୍ମ୍ୟ । ରେଡ କରିବାରୁ ତହସିଲଦାରଙ୍କୁ ଦୁର୍ବୃତ୍ତଙ୍କ ମରଣାନ୍ତକ ଆକ୍ରମଣ । ଦୁଇଜଣଙ୍କ ଆକ୍ରମଣରେ ତହସିଲଦାର ସିରିୟାଲ ଶୁଭ୍ର ପଟେଲ ଗୁରୁତର ହୋଇଛନ୍ତି । ତାଙ୍କୁ କାମାକ୍ଷାନଗର ଡାକ୍ତରଖାନାରେ ଭର୍ତ୍ତି କରାଯାଇଛି । ପଥରଖମ୍ବ ଗାଁ ନିକଟରେ ବେଆଇନ ଭାବେ ଜେସିବି ଲଗାଇ ମାଟି ଖୋଳୁଥିବା ସମୟରେ ରେଡ୍ କରିଥିଲେ ତହସିଲଦାର । ଏହି ସମୟରେ ତହସିଲଦାରଙ୍କ ଗାଡ଼ି ଚଢାଇ ଦେଇଥିଲେ ଅଭିଯୁକ୍ତ । ପରଜଙ୍ଗ ଆରଆଇ ଆଲୋକ ଲେଙ୍କା ଓ ତହସିଲର କନିଷ୍ଠ କିରାଣୀଙ୍କୁ ମଧ୍ୟ ଆକ୍ରମଣ କରିଥିଲେ ଅଭିଯୁକ୍ତ ।
ରାଜ୍ୟ ପାଠାଗାର ପରିଦର୍ଶନ କଲେ 5T ସଚିବ, ପିଲାଙ୍କ ଫିଡବ୍ୟାକ୍ ନେଇ ସମସ୍ୟାର କଲେ ସମାଧାନ
ଭୁବନେଶ୍ୱର: ୫-ଟି ଉପକ୍ରମରେ ହରେକୃଷ୍ଣ ମହତାବ ରାଜ୍ୟ ପାଠାଗାରର ହେବ ରୂପାନ୍ତରଣ । ଓ୍ବାଇଫାଇ ସହିତ ମିଳିବ ଫୁଡ୍କୋଟ ସୁବିଧା । କୃତୀତ୍ବ ଅର୍ଜନ କରିଥିବା ବ୍ୟକ୍ତିତ୍ବ ମାନଙ୍କ ଦ୍ବାରା ଆୟୋଜନ କରାଯିବ କ୍ୟାରିଅର କାଉନସେଲିଂ ଓ ମୋଟିଭେସନାଲ ଟକ । ପାଠାଗାର ପରିଦର୍ଶନ କରି ଛାତ୍ରଛାତ୍ରୀମାନଙ୍କ ସହିତ ସୁବିଧା ଅସୁବିଧା ସଂପର୍କରେ ଆଲୋଚନା କରି ଏହି ପ୍ରତିଶ୍ରୁତି ଦେଇଛନ୍ତି ଫାଇଭ-ଟି ସଚିବ ଭିକେ ପାଣ୍ଡିଆନ ।
ହରେକୃଷ୍ଣ ମହତାବ ରାଜ୍ୟ ପାଠାଗାର ରାଜ୍ୟର ଏକ ପ୍ରମୁଖ ପାଠାଗାର ଏବଂ ପ୍ରତିଦିନ ଏଠାକୁ ଶହ ଶହ ଛାତ୍ରଛାତ୍ରୀ ତଥା ବିଭିନ୍ନ ପ୍ରତିଯୋଗିତାମୂଳକ ପରୀକ୍ଷା ପାଇଁ ପ୍ରସ୍ତୁତ ହେଉଥିବା ଯୁବ ବର୍ଗ ଓ ସାଧାରଣ ଲୋକ ଅଧ୍ୟୟନ ପାଇଁ ଆସିଥାନ୍ତି । ଏଣୁ ଏହାର ପୁନରୁଦ୍ଧାର କରାଯାଇ ଚୌକି, ଟେବୁଲ ଓ ଅନ୍ୟ ଆସବାବପତ୍ରର ନବୀକରଣ ସହ ଚଟାଣ ଓ ବିଭିନ୍ନ ସିଭିଲ ଷ୍ଟ୍ରକଚରର ମଧ୍ୟ ଉନ୍ନତି କରାଯିବ । ପୁସ୍ତକ ଗୁଡିକ ଅତ୍ୟାଧୁନିକ ପଦ୍ଧତିରେ ସଂରକ୍ଷଣ କରି ସଂପୂର୍ଣ୍ଣ ପାଠାଗାରକୁ ବାତାନୁକୂଳିତ କରାଯିବ । ଲାଇବ୍ରେରୀ ପ୍ରାଙ୍ଗଣର କରାଯିବ ଲ୍ୟାଣ୍ଡ ସ୍କେପିଂ ।
ତା ସହିତ ଲାଇବ୍ରେରୀକୁ ଆସୁଥିବା ଛାତ୍ରଛାତ୍ରୀ ଓ ଜନସାଧାରଣଙ୍କ ପାଇଁ ଫୁଡକୋର୍ଟ ଓ ମିଶନ ଶକ୍ତି ପକ୍ଷରୁ କାଫେଟେରିଆ ମଧ୍ୟ କରାଯିବ । ଏତଦବ୍ୟତୀତ ଛାତ୍ରଛାତ୍ରୀ ମାନଙ୍କ ସୁବିଧା ପାଇଁ ଆହାର କେନ୍ଦ୍ର ମଧ୍ୟ ଖୋଲାଯିବ। ଲାଇବ୍ରେରୀରେ ପର୍ଯ୍ୟାପ୍ତ କମ୍ପେଟେଟିଭ୍ ମାଗାଜିନ ରଖାଯିବ । ସଂପୂର୍ଣ୍ଣ ଲାଇବ୍ରେରୀକୁ ଅତ୍ୟାଧୁନିକ ଜ୍ଞାନକୌଶଳ ଦ୍ବାରା ପରିଚାଳିତ କରାଯିବ। ଅନ୍ୟପଟେ ରାଜ୍ୟ ପାଠାଗାରରେ ଭିଡ କମାଇବା ପାଇଁ ବାପୁଜୀ ନଗରରେ ଜନ ଲାଇବ୍ରେରୀ ଖୋଲାଯିବ । ସେଠାରେ ଅତ୍ୟାଧୁନିକ ସୁବିଧା ସୁଯୋଗର ବିକାଶ କରାଯିବ। ସେଠାରେ ମଧ୍ୟ ଫୁଡକୋର୍ଟର ବ୍ୟବସ୍ଥା ରଖାଯିବ।
ରାହୁଲଙ୍କ ପାସପୋର୍ଟ ବିବାଦ; ୩ ବର୍ଷ ପାଇଁ NOC ପ୍ରଦାନ କଲେ କୋର୍ଟ
ନୂଆଦିଲ୍ଲୀ: ରାହୁଲଙ୍କ ପାସପୋର୍ଟ ବିବାଦ। ତିନି ବର୍ଷ ପାଇଁ NOC ପ୍ରଦାନ କଲେ ଦିଲ୍ଲୀର ରାଉଜ ଆଭେନ୍ୟୁ କୋର୍ଟ । ରାହୁଲ ଗାନ୍ଧୀ ନୂଆ ପାସପୋର୍ଟ ପାଇଁ ଆବେଦନ କରିଥିବା ବେଳେ ବିଜେପି ନେତା ସୁବ୍ରମଣ୍ୟମ ସ୍ୱାମୀ କୋର୍ଟରେ ଏହାକୁ ବିରୋଧ କରିଥିଲେ। ନୂଆ ପାସପୋର୍ଟ ପାଇଁ ରାହୁଲଙ୍କୁ ଏନଓସି ନ ଦେବାକୁ ସେ ବିରୋଧ କରିଥିଲେ। ଯଦି ରାହୁଲ ଗାନ୍ଧୀଙ୍କୁ ବିଦେଶ ଯିବାକୁ ଦିଆଯାଏ ତାହେଲେ ଏହା ନ୍ୟାସନାଲ ହେରାଲଡ଼ ମାମଲାର ତଦନ୍ତ ଉପରେ ପ୍ରଭାବ ପକାଇପାରନ୍ତି ବୋଲି ସେ ଯୁକ୍ତି ରଖିଥିଲେ।
ନ୍ୟାସନାଲ ହେରାଲଡ ମାମଲାରେ ୨୦୧୫ ମସିହାରେ ରାହୁଲଙ୍କୁ ବେଲ ମିଳିଥିବା ବେଳେ ତାଙ୍କ ଉପରେ ନୋ ଟ୍ରାଭେଲ କଟକଣା ଜାରି ହୋଇଥିଲା । ମୋଦି ସାଙ୍ଗିଆ ପ୍ରସଙ୍ଗକୁ ନେଇ ତାଙ୍କ ଉପରେ କାର୍ଯ୍ୟାନୁଷ୍ଠାନ ଓ ଲୋକସଭା ସଦସ୍ୟ ପଦ ରଦ୍ଦ ହେବା ପରେ ସେ ତାଙ୍କ ଡିପ୍ଲୋମାଟିକ ପାସପୋର୍ଟ ଜମା ଦେଇଥିଲେ। ରାହୁଲ ବିଦେଶ ଗଲେ କେନ୍ଦ୍ରର ପୋଲ୍ ଖୋଲୁଥିବାରୁ ତାଙ୍କ ପାସପୋର୍ଟ ପାଇଁ ଏନଓସି ଦେବାକୁ ବିଜେପି ନେତା ବିରୋଧ କରୁଛନ୍ତି କଂଗ୍ରେସ କହିଛି ।
ସରକାରଙ୍କ ପ୍ରତିନିଧି, ବରିଷ୍ଠ ଅଫସରଙ୍କ ଡିପ୍ଲୋମାଟିକ ପାସପୋର୍ଟ ଦିଆଯାଇଥାଏ । ଏହି ପାସପୋର୍ଟଧାରୀଙ୍କ ପାଇଁ ଏମବାସିଠାରୁ ଆରମ୍ଭ କରି ବିଦେଶରେ ଯାତ୍ରା ବେଳେ ଅନେକ ସୁବିଧା ଦିଆଯାଇଥାଏ । ଏହାସହ ଇମିଗ୍ରେସନ ମଧ୍ୟ ସାଧାରଣ ଲୋକଙ୍କ ତୁଳନାରେ ଶୀଘ୍ର ହୋଇଯାଇଥାଏ । ରାହୁଲଙ୍କ ସଂସଦ ପଦ ଯିବା ପରେ ସେ ଏହି ପାସପୋର୍ଟ ଜମା ଦେଇ ନୂଆ ପାସପୋର୍ଟ ପାଇଁ ଆବେଦନ କରିଥିଲେ ।
ଜୁନ୍ ୪ ସୁଦ୍ଧା କେରଳ ଛୁଇଁବ ମୌସୁମୀ: IMD
ନୂଆଦିଲ୍ଲୀ: ଚଳିତ ବର୍ଷ ସ୍ବାଭାବିକ ହେବ ମୌସୁମୀ । ତେବେ ଆସନ୍ତା ୪ ଜୁନ ସୁଦ୍ଧା ମୌସୁମୀ କେରଳ ଛୁଇଁବ । ଏନେଇ ସୂଚନା ଦେଇଛି ଭାରତୀୟ ପାଣିପାଗ ବିଭାଗ । ଜୁନ୍ ପହିଲା ସୁଦ୍ଧା ମୌସୁମୀ ପହଞ୍ଚିବାର ସମ୍ଭାବନା ନାହିଁ । ତେବେ ଜୁନରେ ନିଅଣ୍ଟିଆ ବର୍ଷା ସମ୍ଭାବନା ରହିଛି । ଆଇଏମଡି ସୂଚନା ଅନୁସାରେ ଆସନ୍ତା ୩ ସପ୍ତାହ ଯାଏ ଆରବ ସାଗରରେ କୌଣସି ସାଇକ୍ଲୋନ ହେବାର ସମ୍ଭାବନା ନାହିଁ ।
ସୁପ୍ରିମକୋର୍ଟରେ ନୂଆ ସଂସଦ ଭବନ ଉଦଘାଟନ ମାମଲା, ପିଆଇଏଲ ଖାରଜ କଲେ ସୁପ୍ରିମକୋର୍ଟ
ନୂଆଦିଲ୍ଲୀ: ସୁପ୍ରିମକୋର୍ଟରେ ନୂଆ ସଂସଦ ଭବନ ଉଦଘାଟନ ମାମଲା । ପିଆଇଏଲ ଖାରଜ କଲେ ସୁପ୍ରିମକୋର୍ଟ । ନୂଆ ସଂସଦ ଭବନ ସେଣ୍ଟ୍ରାଲ ଭିଷ୍ଚାକୁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଉଦଘାଟନ କରନ୍ତୁ ବୋଲି ଏକ ଜନସ୍ବାର୍ଥ ମାମଲା ରୁଜୁ ହୋଇଥିଲା । ଜଷ୍ଟିସ ଜେ.କେ. ମାହେଶ୍ବରୀ ଓ ଜଷ୍ଟିସ ପିଏସ ନରସିହ୍ମାଙ୍କୁ ନେଇ ଗଠିତ ଖଣ୍ଡପୀଠ ଶୁଣାଣି କରିବାକୁ ମନା କରିବା ସହ ପିଟିସନକୁ ଖାରଜ କରିଦେଇଛନ୍ତି ।
କେନ୍ଦ୍ର ସରକାର ସମ୍ବିଧାନ ଉଲ୍ଲଂଘନ କରିଛନ୍ତି ବୋଲି ସୁପ୍ରିମକୋର୍ଟର ଜଣେ ଆଇନଜୀବୀ ସି.ଆର. ଜୟ ସୁକିନ ଜନସ୍ବାର୍ଥ ମାମଲା ଦାୟର କରିଥିଲେ । ଉଦଘାଟନୀ ଉତ୍ସବକୁ ରାଷ୍ଟ୍ରପତିଙ୍କୁ ନିମନ୍ତ୍ରଣ ନକରି ସଂସଦର ଲୋକସଭା ସଚିବ ସାମ୍ବିଧାନିକ ନିୟମ ଭଙ୍ଗ କରିଛନ୍ତି ବୋଲି ପିଟିସନରେ ଉଲ୍ଲେଖ କରାଯାଇଥିଲା । ଆସନ୍ତା ୨୮ରେ ନୂଆ ସଂସଦ ଭବନକୁ ଉଦଘାଟନ କରିବେ ପ୍ରଧାନମନ୍ତ୍ରୀ ।
ଜୁନରେ ମେଟ୍ରୋ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିବେ ମୁଖ୍ୟମନ୍ତ୍ରୀ, ଡିପିଆର ପ୍ରସ୍ତୁତ କରିଛି ଦିଲ୍ଲୀ ମେଟ୍ରୋ ରେଳ ନିଗମ
ଭୁବନେଶ୍ୱର: ମେଟ୍ରୋ ଟ୍ରେନ ଚଳାଚଳ ନେଇ ନଗର ଉନ୍ନୟନ ବିଭାଗ ସଚିବଙ୍କ ସୂଚନା । ଜୁନ ମାସରେ ମେଟ୍ରୋ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ ହେବ । ଭିତ୍ତିପ୍ରସ୍ତରର ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ମେଟ୍ରୋ ଟ୍ରେନ ପାଇଁ ସର୍ଭେ ସରି ଯାଇଛି । ଦିଲ୍ଲୀ ମେଟ୍ରୋ ରେଳ ନିଗମ ଏହାର ଡିପିଆର ପ୍ରସ୍ତୁତ କରୁଛି । ଏହା ଏବେ ଅନ୍ତିମ ପର୍ଯ୍ୟାୟରେ ପହଞ୍ଚିଛି । କେଉଁ ରୁଟରେ ମେଟ୍ରୋ ଟ୍ରେନ୍ ଯିବ ତାହା ଚିହ୍ନଟ ହୋଇଛି । ପ୍ରଥମ ପର୍ଯ୍ୟାୟରେ ଭୁବନେଶ୍ୱରରୁ କଟକ ପର୍ଯ୍ୟନ୍ତ ମେଟ୍ରୋ ଟ୍ରେନ୍ ଚାଲିବ । ପରବର୍ତ୍ତୀ ସମୟରେ ଜଟଣୀ ଓ ପୁରୀକୁ ମେଟ୍ରୋ ଟ୍ରେନ୍ ଯିବା ପାଇଁ ଯୋଜନା କରାଯାଉଛି। ମୁଖ୍ୟମନ୍ତ୍ରୀଙ୍କ ସମୀକ୍ଷା ପରେ ସାମ୍ବାଦିକ ସମ୍ମିଳନୀ ଏହି ସୂଚନା ଦେଇଛନ୍ତି ଗୃହ ଓ ନଗର ଉନ୍ନୟନ ସଚିବ ଜି.ମାଥିଭାଥନନ ।