ଭୁବନେଶ୍ୱର: ଓଡ଼ିଆ କ୍ରିକେଟର ଶିବସୁନ୍ଦର ଦାସ ହୋଇପାରନ୍ତି ଟିମ୍ ଇଣ୍ଡିଆର ଅନ୍ତରୀଣ ମୁଖ୍ୟ ଚୟନକର୍ତ୍ତା । ଷ୍ଟିଙ୍ଗ୍ ବିବାଦରେ ଛନ୍ଦି ହୋଇ ଚେତନ ଶର୍ମା ପଦ ଛାଡ଼ିବା ପରେ ଏନେଇ ଚର୍ଚ୍ଚା ବଢ଼ିଛି । ସାମ୍ବାଦିକ ଅମିତ ଚୌବେ ଏନେଇ ଟ୍ବିଟ୍ କରିଛନ୍ତି । ଅନ୍ତରୀଣ ମୁଖ୍ୟ ଚୟନକର୍ତ୍ତା ପଦ ପାଇଁ ଶିବସୁନ୍ଦରଙ୍କ ନାଁ ଆଗରେ ରହିଥିବା ଚର୍ଚ୍ଚା ହେଉଛି । ଏବେ ଶିବସୁନ୍ଦର ଦାସ ଚୟନକର୍ତ୍ତା ସଦସ୍ୟ ଅଛନ୍ତି । ଏହି ଦକ୍ଷିଣହାତୀ ଓପନିଂ ବ୍ୟାଟ୍ସମ୍ୟାନ ଦେଶ ପାଇଁ ଶିବସୁନ୍ଦର ୨୩ ଟେଷ୍ଟ, ୪ଟି ଦିନିକିଆ ଖେଳିଛନ୍ତି ।
ଅନ୍ୟପଟେ ବିସିସିଆଇ ସମ୍ପାଦକଙ୍କ ନିକଟକୁ ଇସ୍ତଫା ପତ୍ର ପଠାଇଛନ୍ତି ଚେତନ ଶର୍ମା । ବିସିସିଆଇ ସମ୍ପାଦକ ତାଙ୍କ ଇସ୍ତଫା ପତ୍ର ଗ୍ରହଣ କରିଥିବା ଜଣାପଡ଼ିଛି । ଏକ ଘରୋଇ ଚ୍ୟାନେଲର ଷ୍ଟିଙ୍ଗ୍ ଅପରସନରେ ଭାରତୀୟ କ୍ରିକେଟ ଟିମ୍ ବିଷୟରେ ବିବାଦୀୟ ଟିପ୍ପଣୀ ରଖିଥିଲେ ଚେତନ। ଫିଟନେସ ପାଇଁ ଖେଳାଳିମାନେ ଇଞ୍ଜେକସନ ନେଉଥିବା କହିଥିଲେ। ବଡ଼ ଖେଳାଳି ଟିମରେ ସିଲେକ୍ଟ ହେବା ପୂର୍ବରୁ ପେନ କିଲର ଇଞ୍ଜେକ୍ସନ ନେଉଛନ୍ତି । ଏହାସହ ରୋହିତ ଶର୍ମା ଓ ବିରାଟ କୋହଲିଙ୍କ ମଧ୍ୟରେ ଥିବା ବିବାଦକୁ ନେଇ ବି ଚାଞ୍ଚଲ୍ୟକର ଖୁଲାସା କରିଥିଲେ ଚେତନ ଶର୍ମା ।
