ଚିଲିକା: ନାଚୁଣୀ ମହାବିଦ୍ୟାଳୟରେ ଓଡ଼ିଆ ସାହିତ୍ୟ ସଂସଦ ତରଫରୁ ୪୨ତମ ବାର୍ଷିକ ଉତ୍ସବ ଅନୁଷ୍ଠିତ ହୋଇଛି। ଏଥିରେ ମୁଖ୍ୟ ଅତିଥି ଭାବେ ରାଜ୍ୟସଭା ସାଂସଦ ମାନସ ମଙ୍ଗରାଜ ଯୋଗଦେଇଥିଲେ। ପରେ ସାଂସଦ ମହାବିଦ୍ୟାଳୟ ପରିସରରେ ବିଜ୍ଞାନ ଭବନକୁ ଉଦଘାଟନ କରିଥିଲେ। ଏହି ଅବସରରେ ଅନ୍ୟମାନଙ୍କ ମଧ୍ୟରେ ମନ୍ତ୍ରୀ ରୋହିତ ପୂଜାରୀ, ବିଷ୍ଣୁପଦ ସେଠି, ଚିଲିକା ପୂର୍ବତନ ବିଧାୟକ ବିଭୂତିଭୂଷଣ ହରିଚନ୍ଦନ ପ୍ରମୁଖ ଯୋଗଦେଇଥିଲେ। ନାଚୁଣୀ ଗସ୍ତବେଳେ ଲୋକମାନେ ସାଂସଦଙ୍କୁ ସ୍ବାଗତ କରିଥିଲେ ।
ମାଙ୍କଡ଼ ଡିଆଁ ଘାଟିରେ ଅଘଟଣ, ଓଲଟିପଡ଼ିଲା ଯାତ୍ରୀବାହୀ ବସ୍
ଗଞ୍ଜାମ: ଯାତ୍ରୀବାହୀ ବସ୍ ଓଲଟି ଦୁଇ ଯାତ୍ରୀ ମୃତ । ଗଞ୍ଜାମ ଜିଲ୍ଲା ପାତ୍ରପୁର ଜରଡ଼ା ଥାନା ଝଗଡା ପଲ୍ଲୀରେ ଅଘଟଣ । ମାଙ୍କଡ଼ ଡିଆଁ ଘାଟି ପାର ହେବା ପରେ ଘରୋଇ ବସ୍ ଓଲଟି ପଡ଼ିବା ଯୋଗୁ ଦୁଇ ଯାତ୍ରୀଙ୍କର ମୃତ୍ୟୁ ହୋଇଛି । ୧୦ରୁ ଊର୍ଦ୍ଧ୍ୱ ଯାତ୍ରୀ ଗୁରୁତର ହୋଇଛନ୍ତି । ଗଜପତି ଜିଲ୍ଲା ରାୟଗଡ଼ରୁ ପାତ୍ରପୁର ଆସୁଥିବା ବେଳେ ଯାତୀବସ୍ ଭାରସାମ୍ୟ ହାଇ ଓଲଟି ପଡ଼ିଥିଲା ।
ଘଟଣାରେ ଦୁଇ ମହିଳା ଯାତ୍ରୀଙ୍କର ମୃତ୍ୟୁ ହୋଇଛି । ସେମାନେ ହେଲେ ସରସ୍ୱତୀ ଶବର ଓ ସୁମତି ରଇତ। ଖବରପାଇ ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଚଳାଇଛି । ଗୁରୁତରମାନଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି ।
କୁଖ୍ୟାତ ମାଓବାଦୀଙ୍କ ନାଁରେ ଲାଗିଲା ପୋଷ୍ଟର
କୋରାପୁଟ: କୁଖ୍ୟାତ ମାଓବାଦୀଙ୍କ ନାଁରେ ଲାଗିଲା ପୋଷ୍ଟର । ଧରାଇ ଦେବା ଲୋକଙ୍କୁ ପୁରସ୍କାର ଦେବାକୁ ଘୋଷଣା କରାଯାଇଛି । କୋରାପୁଟ ସହରର ବିଭିନ୍ନ ସ୍ଥାନରେ ମାଓବାଦୀଙ୍କ ନାଁରେ ଲାଗିଛି ପୋଷ୍ଟର । NIA ଦ୍ବାରା ମୋଷ୍ଟ ୱ୍ବାଣ୍ଟେଡ ମାଓବାଦୀଙ୍କ ବିରୋଧରେ ପୋଷ୍ଟରରେ ଉଲ୍ଲଖ ରହିଛି । ୪ ଜଣ ମାଓବାଦୀଙ୍କ ଉପରେ ୧୦ଲକ୍ଷରୁ ୩ ଲକ୍ଷ ଟଙ୍କା ପର୍ଯ୍ୟନ୍ତ ପୁରସ୍କାର ରାଶି ଘୋଷଣା କରାଯାଇଛି ।
ସୂଚନାଦାତାଙ୍କୁ ପୁରସ୍କାର ଦିଆଯିବ । NIAର ଏକ ଟିମ୍ ଦୁଇ ଦିନ ଧରି କୋରାପୁଟ ଜିଲ୍ଲା ଗସ୍ତ କରି ମାଓ ଗତିବିଧି ଉପରେ ନଜର ରଖିଛନ୍ତି ବୋଲି କୋରାପୁଟ ଏସପି ଅଭିନବ ସୋନକର କହିଛନ୍ତି । ମୋଷ୍ଟ ୱାଣ୍ଟେଡ ମାଓବାଦୀଙ୍କ ଏକ ଚିଠା ପ୍ରସ୍ତୁତ କରାଯାଇଛି ।
ମାଲକାନଗିରି କ୍ୟାଡରର ଖିଲ ରଞ୍ଜୁଙ୍କ ପାଇଁ ୩ ଲକ୍ଷ ମୁଣ୍ଡ ଜାମିନ ରଖାଯାଇଥିବା ବେଳେ ଆନ୍ଧ୍ରର ଜାଲମୁରି ଶ୍ରୀନୁ ବାବୁଙ୍କ ପାଇଁ ୫ଲକ୍ଷ, ତେଲେଙ୍ଗାନାର ଗଜରଲା ରବିଙ୍କ ପାଇଁ ୧୦ଲକ୍ଷ , ଆନ୍ଧ୍ର ପ୍ରଦେଶର ମେଟରୁ ଜଗାରାଓଙ୍କ ପାଇଁ ୫ ଲକ୍ଷ ଟଙ୍କାର ମୁଣ୍ଡ ଜାମିନ ରଖାଯାଇଛି। ଏ ନେଇ NIA ପକ୍ଷରୁ କୋରାପୁଟ ବସଷ୍ଟାଣ୍ଡରେ ପୋଷ୍ଟର ମରାଯାଇଥିବା ଏସପି ସୂଚନା ଦେଇଛନ୍ତି ।
ବିମାନରେ ଯାତ୍ରୀ ପରିସ୍ରା କରିବା ଘଟଣା, ଏୟାର ଇଣ୍ଡିଆକୁ ୩୦ ଲକ୍ଷ ଟଙ୍କା ଫାଇନ
ନୂଆଦିଲ୍ଲୀ: ବିମାନରେ ଯାତ୍ରୀ ପରିସ୍ରା କରିବା ଘଟଣା । ଏୟାର ଇଣ୍ଡିଆକୁ ୩୦ ଲକ୍ଷ ଟଙ୍କା ଫାଇନ । ଜରିମାନା ନିର୍ଦ୍ଦେଶ ଦେଲେ ଡିଜିସିଏ । ଫାଇନ ସହ ବିମାନ ନିର୍ଦ୍ଦେଶକଙ୍କୁ କାରଣ ଦର୍ଶାଅ ନୋଟିସ ଜାରି ହୋଇଛି । ଏହା ସହ ପାଇଲଟ ଇନ କମାଣ୍ଡ ତିନି ମାସ ଯାଏ ନିଲମ୍ବିତ କରିଛନ୍ତି ଡିଜିସିଏ । ନ୍ୟୁୟର୍କରୁ ଦିଲ୍ଲୀ ଆସୁଥିବା ବିମାନରେ ବୃଦ୍ଧାଙ୍କ ଉପରେ ପରିସ୍ରା କରିଥିଲେ ଯୁବକ । ଏହି ଘଟଣାର ୪୧ ଦିନ ପରେ ଉକ୍ତ ଯୁବକଙ୍କୁ ଗିରଫ କରିଥିଲା ଦିଲ୍ଲୀ ପୋଲିସ ।
ଭୁବନେଶ୍ୱର ବୁଲିଲେ ତାମିଲନାଡ଼ୁ କ୍ରୀଡ଼ା ମନ୍ତ୍ରୀ ଉଦୟନିଧି ଷ୍ଟାଲିନ ଓ ଟିମ୍
ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିମନ୍ତ୍ରଣ ରକ୍ଷା କରି ବିଶ୍ୱକପ ହକି ଦେଖିବାକୁ ଓଡିଶା ଗସ୍ତରେ ତାମିଲନାଡ଼ୁ କ୍ରୀଡା ଓ ଯୁବ ବ୍ୟାପାର ମନ୍ତ୍ରୀ ଉଦୟ ନିଧି ଷ୍ଟାଲିନ । ଉଦୟ ନିଧି ଷ୍ଟାଲିନ୍ ଗତକାଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହ ଭାରତ ବନାମ ୱେଲ୍ସ ମ୍ୟାଚ୍ ଦେଖିଥିଲେ । ତେବେ ଗତକାଲି ମ୍ୟାଚ୍ ଦେଖିବା ପରେ ଆଜି ଉଦୟନିଧି ଷ୍ଟାଲିନ ନିଜ ଟିମ୍ ସହ ଭୁବନେଶ୍ୱର ମହାନଗର ନିଗମର ବିଭିନ୍ନ ସ୍ଥାନ ପରିଦର୍ଶନ କରିଛନ୍ତି । ଏହି ଅବସରରେ ସେ ନିଳାଦ୍ରୀବିହାର ସ୍ଥିତ ଇଶାଣେଶ୍ୱର ବିଜୁ ଆଦର୍ଶ କଲୋନୀ ଗସ୍ତ କରିଥିଲେ। ସ୍ଥାନୀୟ ଲୋକଙ୍କ ସହ ଆଲୋଚନା କରିବା ସହ ରାଜ୍ୟ ସରକାରଙ୍କ ‘ଡ୍ରିଙ୍କ ଫ୍ରମ ଟ୍ୟାପ’ ଜରିଆରେ ପାଣି ପିଇଥିଲେ ।
ଏହା ପରେ ବିଏମସିର ବର୍ଜ୍ୟ ପରିଚାଳନା ଓ କମ୍ୟୁନିଟି ପାର୍ଟିସିପେସନ ଆଦି ପରିଦର୍ଶନ କରି ସନ୍ତୋଷ ପ୍ରକାଶ କରିଥିଲେ। ଏହି ଅବସରରେ ରାଜ୍ୟ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ପ୍ରମୁଖ ସଚିବ ଜି ମାଥିଭାଥନାନ ଓ ବିଏମସି କମିଶନର ବିଜୟ ଅମୃତା କୁଲାଙ୍ଗେଙ୍କ ସମେତ ବହୁ ଅଧିକାରୀ ଉପସ୍ଥିତ ଥିଲେ। ଗସ୍ତ ଶେଷ କରି ମନ୍ତ୍ରୀ ଉଦୟନିଧି ଷ୍ଟାଲିନ ଓ ଟିମ୍ ରାଉରକେଲା ଅଭିମୁଖେ ଯାତ୍ରା କରିଛନ୍ତି । ସେଠାରେ ବିଶ୍ୱସ୍ତରୀୟ ବିର୍ସା ମୁଣ୍ଡା ହକି ଷ୍ଟାଡିୟମରେ ହକି ମ୍ୟାଚ ଦେଖିବାର କାର୍ଯ୍ୟକ୍ରମ ଥିବା ଜଣାପଡ଼ିଛି ।
ଖଣି ଓ ଖଣିଜ କ୍ଷେତ୍ରରେ ଓଡ଼ିଶାକୁ ପ୍ରଶଂସା
ଭୁବନେଶ୍ୱର: ଖଣି ଓ ଖଣିଜ କ୍ଷେତ୍ରରେ ଓଡିଶା ହେଉଛି ସଂଘୀୟ ବ୍ୟବସ୍ଥାର ସର୍ବଶ୍ରେଷ୍ଠ ଉଦାହରଣ। ସାରା ଦେଶରେ ଉତ୍ପାଦନ ହେଉଥିବା କ୍ରୋମାଇଟ ଶତ ପ୍ରତିଶତ ଓଡ଼ିଶାର। ଦେଶର ୭୫ ପ୍ରତିଶତ ବକ୍ସାଇଟ, ୫୦ ପ୍ରତିଶତ ଲୁହାପଥର ଓ ୨୫ ପ୍ରତିଶତ କୋଇଲା ଓଡିଶାରୁ ଉତ୍ପାଦନ ହେଉଛି। ଖଣି କ୍ଷେତ୍ରରେ ପରିଚାଳନା ପାଇଁ ଓଡ଼ିଶା ଅନ୍ୟ ରାଜ୍ୟମାନଙ୍କ ପାଇଁ ଉଦାହରଣ ସାଜିଛି ବୋଲି କେନ୍ଦ୍ର ଖଣି ସଚିବ ବିବେକ ଭରଦ୍ୱାଜ କହିଛନ୍ତି।
ଖଣି ଉତ୍ପାଦନ ସହ ଖଣିଜ ଶିଳ୍ପରେ ପୁଞ୍ଜିନିବେଶ ଏବଂ ଖଣି ଅଞ୍ଚଳରେ ଶିକ୍ଷା, ସ୍ୱାସ୍ଥ୍ୟ ଓ ଯୋଗାଯୋଗ ଭିତ୍ତିଭୂମି କରିବାରେ ଓଡ଼ିଶା ଆଗରେ ରହିଛି। ଖଣି ନିଲାମୀ, ଖଣିର ସର୍ଭେ, ଖଣିଜ ପଦାର୍ଥ ଉତ୍ତୋଳନ ଏବଂ ଖଣିଜ ପାଣ୍ଠିର ବ୍ୟବହାର ପାଇଁ କେନ୍ଦ୍ରର ପରିବର୍ତ୍ତିତ ଖଣି ଆଇନ କାର୍ଯ୍ୟକାରୀ କରିବାରେ ଓଡିଶା ଅନ୍ୟ ରାଜ୍ୟଙ୍କ ଠାରୁ ଖୁବ ଆଗରେ ରହିଛି ବୋଲି ଖଣି ମନ୍ତ୍ରୀ କହିଛନ୍ତି। ତେବେ ବେଙ୍ଗଲ କର୍ମସ ଅଫ ଚାମ୍ବରସ ପକ୍ଷରୁ ମିନେରାଲ ମାଇନିଙ୍ଗ, ମେଟାଲସ କନକ୍ଲେଭରେ ଓଡ଼ିଶାର ସ୍ୱଚ୍ଛ ଖଣି ପରିଚାଳନା ପ୍ରକ୍ରିୟାକୁ ସବୁ ମହଲରେ ପ୍ରଶଂସା କରାଯାଇଛି।
ବିଜେପିର ଦବଙ୍ଗ ନେତା ବ୍ରିଜଭୂଷଣ, ବିବାଦୀୟ ବୟାନ ଓ ଦବଙ୍ଗଗିରି ପାଇଁ ସବୁବେଳେ ଚର୍ଚ୍ଚାରେ
ନୂଆଦିଲ୍ଲୀ: ବିଜେପିର ଦବଙ୍ଗ ନେତା ବ୍ରିଜଭୂଷଣ ଶରଣ ସିଂ । ବିବାଦୀୟ ବୟାନ, ଦବଙ୍ଗଗିରି ପାଇଁ ସବୁବେଳେ ଚର୍ଚ୍ଚାରେ ରହିଛନ୍ତି ବ୍ରିଜଭୂଷଣ । ୟୁପିର ବାହୁବଳି ନେତା ଭାବେ ଜଣାଶୁଣା ବ୍ରିଜଭୂଷଣଙ୍କ ବିରୋଧରେ ସଙ୍ଗୀନ ଅଭିଯୋଗ ଆଣି ରାଜଧାନୀ ରାଜରାସ୍ତାରେ ଧାରଣାରେ ବସିଛନ୍ତି କୁସ୍ତିଯୋଦ୍ଧା । ଭାରତୀୟ ଜନତା ପାର୍ଟିର ଦବଙ୍ଗ ନେତା ବ୍ରିଜଭୂଷଣଙ୍କର ପୂର୍ବରୁ ଅନେକ ବିବାଦୀୟ ପ୍ରସଙ୍ଗରେ ସମ୍ପୃକ୍ତି ରହିଛି । ବାବରୀ ମସଜିଦ ଢାଞ୍ଚା ବିଗାଡ଼ିବା ମାମଲାରେ ଅନ୍ୟତମ ମୁଖ୍ୟ ଅଭିଯୁକ୍ତ ଥିଲେ ବ୍ରିଜଭୂଷଣ । ବ୍ରିଜଭୂଷଣଙ୍କର ଅଣ୍ଡରଓ୍ବାଲଡ କନେକ୍ସନ ମଧ୍ୟ ସାମ୍ନାକୁ ଆସିଥିଲା ।
ଟାଡା ଆକ୍ଟରେ ସେ ଜେଲ ମଧ୍ୟ ଯାଇଥିଲେ । ସମାଜବାଦୀ ପାର୍ଟିର ବରିଷ୍ଠ ନେତା ବିନୋଦ ସିଂଙ୍କ ମରଣାନ୍ତକ ଆକ୍ରମଣ ମାମଲା ମୁଖ୍ୟ ଅଭିଯୁକ୍ତ ଥିଲେ ବ୍ରିଜଭୂଷଣ । ୨୦୧୪ରେ ବି ଅଯୋଦ୍ଧାରେ ସରକାରୀ କାର୍ଯ୍ୟରେ ଅବହେଳାକୁ ନେଇ ବ୍ରିଜଭୂଷଣଙ୍କ ନାଁରେ ମାମଲା ରୁଜୁ ହୋଇଥିଲା । ୪ଟି ବଡ଼ ବଡ଼ ମାମଲାରେ ବ୍ରିଜଭୂଷଣଙ୍କ ନାଁ ରହିଥିଲେ ବି କୌଣସି ମାମଲାରେ ତାଙ୍କୁ ଦୋଷୀ ସାବ୍ୟସ୍ତ କରାଯାଇନି । ଜଣେ ସରକାରୀ ଅଧିକାରୀଙ୍କୁ ବନ୍ଦୀ ରଖିବା ଅଭିଯୋଗରେ ତାଙ୍କ ନାଁରେ ଏବେ ବି ମାମଲା କୋର୍ଟରେ ରହିଛି । ଏହାସହ ରାଷ୍ଟ୍ରୀୟ କୁସ୍ତିଯୋଦ୍ଧା ଚାମ୍ପିୟନସିପ୍ ସମାରୋହରେ ମଞ୍ଚ ଉପରେ ଜଣେ କୁସ୍ତିଯୋଦ୍ଧାଙ୍କୁ ଚାପୁଡ଼ା ମାରି ଚର୍ଚ୍ଚାରୁ ଆସିଥିଲେ ବ୍ରିଜଭୂଷଣ ।
ବାରିପଦାରେ ବିଜୁ ଜନତା ଦଳ ପକ୍ଷରୁ ବନ୍ଧୁମିଳନ କାର୍ଯ୍ୟକ୍ରମ
ବାରିପଦା: ମକର ପର୍ବ ଅବସରରେ ବାରିପଦାରେ ବିଜୁ ଜନତା ଦଳ ପକ୍ଷରୁ ବନ୍ଧୁମିଳନ କାର୍ଯ୍ୟକ୍ରମ। ରାଜ୍ୟ ବିଜେଡିର ସାଂଗଠନିକ ସମ୍ପାଦକ ତଥା ବିଧାୟକ ପ୍ରଣବ ପ୍ରକାଶ ଦାସ ମୁଖ୍ୟ ଅତିଥି ଭାବେ ଅଂଶଗ୍ରହଣ କରିଥିଲେ। ମୟୂରଭଞ୍ଜ ଜିଲ୍ଲା ବିଜେଡ଼ିର ପ୍ରମୁଖ ନେତାମାନେ ଏଥିରେ ସାମିଲ ହୋଇଥିଲେ । ଏହାକୁ ନେଇ ସେଠାରେ ଉତ୍ସବମୁଖର ପରିବେଶ ସୃଷ୍ଟି ହୋଇଥିଲା ।
ସାଧାରଣତନ୍ତ୍ର ଦିବସରେ ପତାକା ଉତ୍ତୋଳନ କରିବେ ୨୦ ମନ୍ତ୍ରୀ, ଜାଣନ୍ତୁ କେଉଁଠି, କିଏ…
ଭୁବନେଶ୍ୱର: ଆଉ ଦିନକେଇଟା ପରେ ସାଧାରଣତନ୍ତ୍ର ଦିବସ । ରାଜ୍ୟସ୍ତରୀୟ ପରେଡ୍ ଆୟୋଜିତ ହେବ । ୨୦ଜିଲ୍ଲାରେ ମନ୍ତ୍ରୀମାନେ କରିବେ ପତାକା ଉତ୍ତୋଳନ। ଏନେଇ ପ୍ରକାଶ ପାଇଛି ତାଲିକା । ଜାଣନ୍ତୁ, ସାଧାରଣତନ୍ତ୍ର ଦିବସରେ କେଉଁଠି କିଏ କରିବେ ପତାକା ଉତ୍ତୋଳନ।…
ମନ୍ତ୍ରୀ ଜଗନ୍ନାଥ ସାରକା ଗଜପତିରେ ପତାକା ଉତ୍ତୋଳନ କରିବାକୁ ଥିବା ବେଳେ ମନ୍ତ୍ରୀ ନିରଞ୍ଜନ ପୂଜାରି ଯିବେ କଟକ । ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ଗଞ୍ଜାମରେ କରିବେ ପତାକା ଉତ୍ତୋଳନ । ପ୍ରଦୀପ କୁମାର ଅମାତ ସୁବର୍ଣ୍ଣପୁର । ପ୍ରମିଳା ମଲ୍ଲିକ ଜଗତସିଂହପୁର ଯିବେ। କେନ୍ଦୁଝରରେ ମନ୍ତ୍ରୀ ଉଷା ଦେବୀ । କେନ୍ଦ୍ରାପଡାରେ ପ୍ରଫୁଲ୍ଲ କୁମାର ମଲ୍ଲିକ କରିବେ ଫ୍ଲାଗ୍ ହୋଷ୍ଟିଂ । ମନ୍ତ୍ରୀ ପ୍ରତାପ କେଶରୀ ଦେବ ପୁରୀରେ ପତାକା ଉତ୍ତୋଳନ କରିବାକୁ ଥିବା ବେଳେ ଢେଙ୍କାନାଳରେ ଅତନୁ ସବ୍ୟସାଚୀ ନାୟକ ପତାକା ଉତ୍ତୋଳନ କରିବେ । କଳାହାଣ୍ଡି ଗସ୍ତ କରିବେ ମନ୍ତ୍ରୀ ନବ କିଶୋର ଦାସ । ମନ୍ତ୍ରୀ ଟୁକୁନି ସାହୁ ମାଲକାନାଗିରିରେ କରିବେ ପତାକା ଉତ୍ତୋଳନ । ଅଶୋକ ଚନ୍ଦ୍ର ପଣ୍ଡା ମୟୁରଭଞ୍ଜ, ମନ୍ତ୍ରୀ ରାଜେନ୍ଦ୍ର ଢୋଲକିଆ ଯିବେ ବରଗଡ଼ । ମନ୍ତ୍ରୀ ସମୀର ରଞ୍ଜନ ଦାସ ଯିବେ ବାଲେଶ୍ୱର ।
ସୁନ୍ଦରଗଡ଼ରେ ମନ୍ତ୍ରୀ ପ୍ରୀତି ରଞ୍ଜନ ଘଡେଇ, କନ୍ଧମାଳରେ ମନ୍ତ୍ରୀ ଶ୍ରୀକାନ୍ତ ସାହୁ, କୋରାପୁଟରେ ମନ୍ତ୍ରୀ ତୁଷାରକାନ୍ତି ବେହେରା, ବଲାଙ୍ଗୀରରେ ମନ୍ତ୍ରୀ ରୋହିତ ପୂଜାରୀ, ସମ୍ୱଲପୁରରେ ମନ୍ତ୍ରୀ ରୀତା ସାହୁ, ଦେଓଗଡ଼ରେ ମନ୍ତ୍ରୀ ବାସନ୍ତୀ ହେମ୍ୱ୍ରମ କରିବେ ପତାକା ଉତ୍ତୋଳନ।
ଅନୁଗୁଳ, ଭଦ୍ରକ, ବୌଦ୍ଧ, ଯାଜପୁର ଝାରସୁଗୁଡ଼ା, ଖୋର୍ଦ୍ଧା, ନୂଆପଡ଼ା, ନବରଙ୍ଗପୁର, ନୟାଗଡ଼ ଓ ରାୟଗଡ଼ା ଜିଲ୍ଲାପାଳ କରିବେ ପତାକା ଉତ୍ତୋଳନ । ସେହିପରି ବ୍ରହ୍ମପୁରରେ ଦକ୍ଷିଣାଞ୍ଚଳ ଆରଡିସି ପତାକା ଉତ୍ତୋଳନ କରିବାକୁ ସ୍ଥିର ହୋଇଥିବା ବେଳେ ରାଉରକେଲାରେ ପରେଡ୍ ଅଭିବାଦନ ଗ୍ରହଣ କରିବେ ଉତ୍ତରାଞ୍ଚଳ ଆରଡିସି ।
ବୋହୂକୁ ଧର୍ମ ପରିବର୍ତ୍ତନ ପାଇଁ ବାଧ୍ୟ କରାଯାଇନାହିଁ, ସେ ଘରେ ଜଗନ୍ନାଥ ଓ ଗଣେଶଙ୍କୁ ପୂଜା କରେ; ହ୍ୟୁମାନ ସାଗରଙ୍କ ମା’
ଭୁବନେଶ୍ୱର: ସିଙ୍ଗି ସେନସେସନ ହ୍ୟୁମାନ ସାଗର ଓ ଶ୍ରୀୟା ମିଶ୍ରଙ୍କ ଦାମ୍ପତ୍ୟ କଳିରେ ସମାଧାନର ଦିଗ ବାହାରିବ ବୋଲି ଆଶା ସୃଷ୍ଟି ହୋଇଛି। ମହିଳା ଥାନା ପୋଲିସ ଉଭୟଙ୍କୁ କାଉନସେଲିଂ କରି ସମାଧାନ ଲାଗି ଦୁଇ ଦିନ ସମୟ ଦେଇଛି। ଆଜି ଏଥିରେ ନୂଆ ମୋଡ ଦେଖିବାକୁ ମିଳିଛି। ବୋହୂ ଶ୍ରୀୟାଙ୍କୁ ଘରକୁ ଫେରାଇ ଆଣିବାକୁ ଚାହୁଁଛନ୍ତି ହ୍ୟୁମାନଙ୍କ ମାଆ ଶେଫାଳି ସୁନା ।
ନାତୁଣୀ ଓ ବୋହୂ ଶ୍ରୀୟାଙ୍କୁ ବେଶ ମନ ପକାଉଛନ୍ତି ମାଆ ଶେଫାଳି ଓ ହ୍ୟୁମାନ । ବୋହୂକୁ କୌଣସି ଭାବେ ଧର୍ମ ପରିବର୍ତ୍ତନ ନେଇ ବାଧ୍ୟ କରାଯାଇ ନାହିଁ । ତାଙ୍କୁ ଘରେ ଜଗନ୍ନାଥ, ଗଣେଶ ମୂର୍ତ୍ତି ରଖି ଠାକୁର ପୂଜା କରିବାକୁ କେହି ବାଧା ଦେଇନାହାଁନ୍ତି। ବୋହୂକୁ କୌଣସି କାମ ପାଇ ବାଧ୍ୟ ମଧ୍ୟ କରାଯାଇ ନାହିଁ । ନିଜ ଇଚ୍ଛାରେ ବୋହୂ ଘରେ ପୂଜା କରିଥାଏ । ଏହା ସହ ବୋହୂର ବାପା ମାଆ ମଧ୍ୟ ଆସିଲେ ପୂଜା କରିଥାନ୍ତି । ପୁଅ ବୋହୂ ଏକାଠି ରୁହନ୍ତୁ ଏତିକି ଚାହୁଁଥିବା କହିଛନ୍ତି ହ୍ୟୁମାନଙ୍କ ମାଆ ଶେଫାଳି ସୁନା |
ଅନ୍ୟପଟେ ଭଗବାନ ଅଛନ୍ତି ସବୁ ଦେଖୁଛନ୍ତି ସେଥିପାଇଁ ମନରେ ଭୟ ନାହିଁ । ପତ୍ନୀ ଓ ଝିଅ ମୋ ପାଖକୁ ଫେରି ଆସନ୍ତୁ ବୋଲି ମହିଳା ଥାନାରେ କହିଛନ୍ତି ହ୍ୟୁମାନ। ଦୁଇଦିନ ସମୟ ନେଇ ଶ୍ରୀୟା ଠିକ ନିଷ୍ପତ୍ତି ନେବେ ବୋଲି ଆଶା କରିଛନ୍ତି କଣ୍ଠ ଶିଳ୍ପୀ ହ୍ୟୁମାନ ସାଗର ।