ଚିଲିକା: ଘନକୁହୁଡ଼ି ଯୋଗୁ ଚିଲିକାରେ ଫସିଲା ଡଙ୍ଗା । ମଝି ଚିଲିକାରେ ଫସି ରହିଲେ ୨୦ରୁ ଅଧିକ ଯାତ୍ରୀ । ପୁରୀ ଜିଲ୍ଲାର କୃଷ୍ଣପ୍ରସାଦଗଡ଼ରୁ ଆଜି ମକର ଯାତ୍ରା ଦେଖିବାକୁ ଓ ମା’ କାଳିଜାଇଙ୍କ ଦର୍ଶନ ପାଇଁ ଯାଉଥିଲେ ଯାତ୍ରୀ । ଅତ୍ୟଧିକ ଘନ କୁହୁଡ଼ି ପାଇଁ ଡଙ୍ଗା ଦିଗ ହରା ହୋଇ ଫସିଯାଇଥିଲା । ଏବେ କୁହୁଡ଼ି କମିବାରୁ ଯାତ୍ରୀମାନେ ସୁରକ୍ଷିତ ଭାବେ କୂଳରେ ପହଞ୍ଚିଛନ୍ତି । ମକର ସଂକ୍ରାନ୍ତି ଥିବାରୁ ମାଆଙ୍କୁ କୃଷ୍ଣପ୍ରସାଦର ରାଜା ସାହେବ ପୂଜାର୍ଚ୍ଚନା କରିଥାନ୍ତି ।
ଅସ୍ତବ୍ୟସ୍ତ କରୁଛି ଘନ କୁହୁଡ଼ି, ସତର୍କ ରହିବାକୁ ଜିଲ୍ଲାପାଳଙ୍କୁ ଏସଆରସିଙ୍କ ଚିଠି
ଭୁବନେଶ୍ୱର: ରାଜ୍ୟକୁ କମୁଛି ଉତ୍ତରା ଥଣ୍ଡା ଶୁଷ୍କ ବାୟୁ ପ୍ରବାହ । ଫଳରେ ଦିନକୁ ଦିନ ତାପମାତ୍ରା ବଢ଼ିବା ସହ ଶୀତ କମିବାରେ ଲାଗିଛି । ରାତିର ତାପମାତ୍ରା ସ୍ବାଭାବିକଠାରୁ ୨ ରୁ ୩ ଡିଗ୍ରୀ ପର୍ଯ୍ୟନ୍ତ ବୃଦ୍ଧି ପାଇଛି । ଅନ୍ୟପଟେ ଗୁରୁଚାପ ବଳୟ ପ୍ରଭାବରେ ସାରା ରାଜ୍ୟକୁ ଅସ୍ତବ୍ୟସ୍ତ କରୁଛି ଘନ କୁହୁଡ଼ି । ଅନୁଗୁଳ, ଢେଙ୍କାନାଳ, କଟକ, କେନ୍ଦୁଝର, ଯାଜପୁର, ଖୋର୍ଦ୍ଧା, ଭଦ୍ରକ, ନୟାଗଡ଼ ଏବଂ କନ୍ଧମାଳରେ ଘନ କୁହୁଡ଼ି ଦେଖାଯାଉଛି ।
ଆସନ୍ତାକାଲି ଯାଏ ଏପରି ସ୍ଥିତି ଜାରି ରହିବ ବୋଲି ଆଲର୍ଟ କରିଛି ପାଣିପାଗ କେନ୍ଦ୍ର । ଏଥିପାଇଁ ଜିଲ୍ଲାପାଳଙ୍କୁ ଚିଠି ଲେଖି ସତର୍କ କରିଛନ୍ତି ଏସଆରସି । କୁହୁଡ଼ି ପାଇଁ ଦୁର୍ଘଟଣା ଘଟୁଥିବାରୁ ସତର୍କତା ମୂଳକ ପଦକ୍ଷେପ ନେବାକୁ ଏସପି ଓ ପରିବହନ ବିଭାଗକୁ ନିର୍ଦ୍ଦେଶ ଦିଆଯାଇଛି । ଅନ୍ୟପଟେ ଆସନ୍ତା ୧୭ ତାରିଖରୁ ବଦଳିଯିବ ପାଗ । ଉତ୍ତର ଓଡ଼ିଶାରେ ବର୍ଷା ହେବାନେଇ ଆକଳନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ପଶ୍ଚିମା ଝଡ଼ ପ୍ରଭାବରେ କିଛି ଜିଲ୍ଲାରେ ହାଲୁକାରୁ ମଧ୍ୟମ ଧରଣର ବର୍ଷା ହୋଇପାରେ । ସୁନ୍ଦରଗଡ଼, କେନ୍ଦୁଝର, ମୟୁରଭଞ୍ଜ, ବାଲେଶ୍ବର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, କଟକ ଏବଂ ଢେଙ୍କାନାଳରେ ହାଲୁକା ବର୍ଷା ହୋଇପାରେ ।
ଆକ୍ସନ ମୋଡ଼ରେ ବିଏମସି, ଗ୍ରାଉଣ୍ଡ ଜିରୋରେ ବିଏମସି କମିଶନର
ଭୁବନେଶ୍ୱର: ଆକ୍ସନ ମୋଡ଼ରେ ବିଏମସି । ଦିନ ରାତି ସବୁବେଳେ ସବୁ ଦିଗ ଉପରେ ରହିଛି ନଜର । ସକାଳେ ସହରର ସୌନ୍ଦର୍ଯ୍ୟକରଣ କାର୍ଯ୍ୟର ଅଗ୍ରଗତି ସମୀକ୍ଷା ପରେ ରାତିରେ ପରିଷ୍କାର ଓ ପରିଛନ୍ନତାକୁ ନେଇ ଗ୍ରାଉଣ୍ଡ ଜିରୋରେ ବିଏମସି କମିଶନର । ଶ୍ରୀୟା ଛକ ଅଞ୍ଚଳରେ ରୋଡ ସାଇଡ ବାର ଓ ବେନିୟମ ଫାଷ୍ଟ ଫୁଡ ଉପରେ ପଡ଼ିଛି କମିଶନରଙ୍କ ନଜର । ପାର୍କିଂ ସ୍ଥଳରେ ମଦ୍ୟପଙ୍କ ଆଡ୍ଡା ଓ ଫାଷ୍ଟ ଫୁଡ ଦୋକାନୀଙ୍କ ପସରାକୁ ତାଗିଦ କରିଛନ୍ତି କମିଶନର ବିଜୟ ଅମୃତା କୁଲାଙ୍ଗେ। ଫାଷ୍ଟ ଫୁଡ ଦୋକାନ ନଖୋଲିବାକୁ ନିର୍ଦ୍ଦେଶ ଦେଇଥିବା ବେଳେ ନିୟମିତ ପାଟ୍ରୋଲିଂକୁ କଡ଼ାକଡ଼ି କରିବାକୁ ପୋଲିସକୁ ନିର୍ଦ୍ଦେଶ ।
ଆଜି ଶରଦ ଯାଦବଙ୍କର ଶେଷକୃତ୍ୟ, ମଧ୍ୟପ୍ରଦେଶର ପୈତୃକ ଗାଁରେ ହେବ ଅନ୍ତିମ ସଂସ୍କାର
ଭୋପାଳ: ଜେଡିୟୁର ପୂର୍ବତନ ଅଧ୍ୟକ୍ଷ ଶରଦ ଯାଦବଙ୍କର ଆଜି ହେବ ଶେଷକୃତ୍ୟ । ମଧ୍ୟପ୍ରଦେଶର ପୈତୃକ ଗାଁ ହୋସଙ୍ଗାବାଦରେ ଅନ୍ତିମ ସଂସ୍କାର କରାଯିବ । ଏହାପୂର୍ବରୁ ଦିଲ୍ଲୀ ସ୍ଥିତ ଘରେ ଶରଦଙ୍କର ଶେଷ ଦର୍ଶନ କରିଛନ୍ତି ବରିଷ୍ଠ ନେତା ଓ ବ୍ୟକ୍ତିବିଶେଷ । ଗତ ୧୨ ତାରିଖରେ ଗୁରୁଗ୍ରାମର ଫର୍ଟିସ ହସ୍ପିଟାଲରେ ୭୫ ବର୍ଷ ବୟସରେ ଶରଦ ଯାଦବଙ୍କ ପରଲୋକ ହୋଇଥିଲା । ବିୟୋଗ ନେଇ ଝିଅ ଶୁଭାଷିନୀ ସୂଚନା ଦେଇଥିଲେ । ୭ ଥର ଲୋକସଭା ଓ ୩ ଥର ରାଜ୍ୟସଭାକୁ ଯାଇଥିଲେ ଶରଦ ଯାଦବ ।
ଜେଡିୟୁର ପ୍ରଥମ ଜାତୀୟ ସଭାପତି ଥିଲେ ଶରଦ ଯାଦବ । ବିହାର ରାଜନୀତିରେ ଏକ ଅଲଗା ଚେହେରା ସୃଷ୍ଟି କରିଥିଲେ ଶରଦ ଯାଦବ । ୧୯୭୪ ମସିହାରେ ମଧ୍ୟପ୍ରଦେଶର ଜବଲପୁରରୁ ପ୍ରଥମ ଥର ପାଇଁ ଲୋକସଭାକୁ ହୋଇଥିଲେ ନିର୍ବାଚିତ । ଜେପି ମୁଭମେଣ୍ଟ ସମୟରେ ଚର୍ଚ୍ଚାକୁ ଆସିଥିଲେ ଶରଦ ଯାଦବ । ଅଟଳ ବିହାରୀ ବାଜପେୟୀ ଓ ଭିପି ସିଂହଙ୍କ ସରକାର ସମୟରେ କ୍ୟାବିନେଟ୍ ମନ୍ତ୍ରୀ ଥିଲେ । ୧୯୯୭ରେ ଜନତା ଦଳ ୟୁନାଇଟେଡର ସଭାପତି ଥିଲେ । ଶରଦ ଯାଦବଙ୍କ ବିୟୋଗରେ ରାଜନୈତିକ ମହଲରେ ଶୋକ ପ୍ରକାଶ ପାଇଛି ।
ଆଜି ପବିତ୍ର ମକର ସଂକ୍ରାନ୍ତି ଓ ପୋଙ୍ଗଲ୍, ଉତ୍ତରାୟଣକୁ ଗତି କରିବେ ସୂର୍ଯ୍ୟ
ଭୁବନେଶ୍ୱର: ଆଜି ମକର ସଂକ୍ରାନ୍ତି । ଭାରତର ସବୁ ପ୍ରାନ୍ତରେ ଏହାକୁ ଭିନ୍ନ ଭିନ୍ନ ନାମରେ ପାଳନ କରାଯାଏ । ଦକ୍ଷିଣ ଭାରତରେ ଏହାକୁ ପୋଙ୍ଗଲ ବୋଲି କୁହାଯାଏ । ମକର ସଂକ୍ରାନ୍ତିରେ ସୂର୍ଯ୍ୟ ଉତ୍ତରାୟଣ ଗତି କରିଥାନ୍ତି । ପୃଥିବୀର ଉତ୍ତର ଗୋଲାର୍ଦ୍ଧ ସୂର୍ଯ୍ୟଙ୍କ ଆଡ଼କୁ ଢଳିଥାଏ । ପରମ୍ପରା ଅନୁସାରେ ଏହି ଦିନ ସୂର୍ଯ୍ୟ ମକର ରାଶିରେ ପ୍ରବେଶ କରିଥାନ୍ତି । ଆଜି ଶ୍ରୀମନ୍ଦିରରେ ଅନୁଷ୍ଠିତ ହେଉଛି ସ୍ବତନ୍ତ୍ର ନୀତିକାନ୍ତି । ଶ୍ରୀଜିଉଙ୍କ ମଙ୍ଗଳ ଆଳତି ଓ ଅବକାଶ ନୀତି ବଢ଼ିବା ପରେ ଶ୍ରୀଜିଉମାନଙ୍କର ପଟା ପହରଣ ଲାଗି କରାଯିବା ପରେ ତ୍ରିମୁଣ୍ଡିରେ ମକରଚୂଳ ଲାଗି ହୋଇଥାଏ । ଏହାପରେ କର୍ପୂର ଲାଗି ହୋଇ ଶ୍ରୀବିଗ୍ରହମାନଙ୍କର ବେଶ ବଢ଼ିଥାଏ । ଗୋପାଳବଲ୍ଲଭ ଓ ସକାଳ ଧୂପ ନୀତି ବଢ଼ିବା ପରେ ମଇଲମ, ମହାସ୍ନାନ, ସର୍ବାଙ୍ଗ ଲାଗି, ନୂଆଲୁଗା ଲାଗି, ମାଳଚୂଳ ଲାଗି ହେବା ପରେ ୬ ମୂର୍ତ୍ତି ଅଳଙ୍କାର ଲାଗି ହୋଇ ମକରବେଶ ବଢ଼ିଥାଏ ।
ଏପଟେ ଦୁଇବର୍ଷ ପରେ ଚଳଚଞ୍ଚଳ ହୋଇଉଠିଛି ଖୋର୍ଦ୍ଧା ଅଟ୍ରିର ହଟକେଶ୍ବର ପୀଠ । ବିଶ୍ବାସ ରହିଛି ବନ୍ଧ୍ୟା ନାରୀ ମହାଦେବଙ୍କ ପାଖରେ ଗୁହାରି ପଡ଼ି ମାନସିକ କୁଣ୍ଡରେ ଗାଧୋଇ ଗୁଆ ପାଇଲେ ପୁତ୍ରସନ୍ତାନ ଲାଭ କରନ୍ତି । ପୀଠରେ ମକର ସଂକ୍ରାନ୍ତିଠାରୁ ମାଘ ସପ୍ତମୀ ପର୍ଯ୍ୟନ୍ତ ମେଳା ଚାଲିବ ।
ହକି ବିଶ୍ବକପର ଦ୍ବିତୀୟ ଦିନ, ଆଜି ଖେଳାଯିବ ୪ଟି ମ୍ୟାଚ୍
ଭୁବନେଶ୍ୱର: ହକି ବିଶ୍ବକପର ଦ୍ବିତୀୟ ଦିନରେ ପ୍ରଥମେ ମୁହାଁମୁହିଁ ହେବେ ନ୍ୟୁଜିଲାଣ୍ଡ ଓ ଚିଲି । ଦିନ ଗୋଟାଏରେ ରାଉରକେଲାର ବିର୍ସା ମୁଣ୍ଡା ଷ୍ଟାଡିୟମରେ ମ୍ୟାଚ ହେବ । ଏହି ମ୍ୟାଚ ପରେ ଦିନ ୩ଟାରେ ନେଦରଲ୍ୟାଣ୍ଡ୍ସ ଓ ମାଲେସିଆ ମଧ୍ୟରେ ମ୍ୟାଚ ହେବ । ଏହି ମ୍ୟାଚଟି ମଧ୍ୟ ରାଉରକେଲାର ବିର୍ସା ମୁଣ୍ଡା ହକି ଷ୍ଟାଡିୟମରେ ଖେଳାଯିବ ।
ଆଜି ରାଉରକେଲାରେ ଏହି ଦୁଇଟି ମ୍ୟାଚ ପରେ ସଂଧ୍ୟା ୫ଟାରେ ବେଲଜିୟମ ଓ କୋରିଆ ମଧ୍ୟରେ ଟକ୍କର ହେବ । ସେହିପରି ସଂଧ୍ୟା ୭ଟାରେ ଜର୍ମାନୀ ଓ ଜାପାନ ମଧ୍ୟରେ ଟକ୍କର ହେବ । ଏହି ଦୁଇଟି ମ୍ୟାଚ କଳିଙ୍ଗ ଷ୍ଟାଡିୟମରେ ଖେଳାଯିବ । ବେଲଜିୟମ, କୋରିଆ, ଜର୍ମାନୀ ଓ ଜାପାନ ପୁଲ `ବି’ରେ ଥିବା ବେଳେ ନ୍ୟୁଜିଲାଣ୍ଡ, ଚିଲି, ନେଦରଲ୍ୟାଣ୍ଡ୍ସ, ମାଲେସିଆ ପୁଲ୍ `ସି’ରେ ଅଛନ୍ତି ।
ନିଜକୁ କ୍ରାଇମବ୍ରାଞ୍ଚ ଅଫିସର ପରିଚୟ ଦେଇ ଯୁବତୀଙ୍କୁ ଅସଦାଚରଣ
ଭୁବନେଶ୍ୱର: ନିଜକୁ କ୍ରାଇମବ୍ରାଞ୍ଚ ଅଫିସର ପରିଚୟ ଦେଇ ଯୁବତୀଙ୍କୁ ଅସଦାଚରଣ । ଯୁବକଙ୍କୁ ବାନ୍ଧିଲା ଖଣ୍ଡଗିରି ପୋଲିସ୍ । ଅଭିଯୁକ୍ତ ନୟାଗଡ଼ର ରମାକାନ୍ତ ନାୟକ । ଗିରଫ ପରେ କୋର୍ଟ ଚାଲାଣ କଲା ଖଣ୍ଡଗିରି ପୋଲିସ୍ । ଗତ ୧୧ ତାରିଖରେ ଜଣେ ଯୁକ୍ତ ୩ ଛାତ୍ରୀ ସାଇକେଲ ଯୋଗେ କଲେଜକୁ ଯାଉଥିବାବେଳେ ତାଙ୍କୁ କ୍ରାଇମବ୍ରାଞ୍ଚ ଅଫିସର ପରିଚୟ ଦେଇ ଅଟକାଇଥିଲେ ରମାକାନ୍ତ । ସାଇକେଲ ଓ ଯୁବତୀଙ୍କ ପ୍ରଶଂସା କରି ତାଙ୍କୁ ଖରାପ ବ୍ୟବହାର ପ୍ରଦର୍ଶନ କରିଥିଲେ ।
ଏନେଇ ଯୁବତୀ ଜଣକ ଖଣ୍ଡଗିରି ଥାନାରେ ଅଭିଯୋଗ କରିଥିଲେ । ଏପରିକି ଯୁବକଙ୍କ ଗାଡ଼ି ନମ୍ବର ପୋଲିସକୁ ଦେଇଥିଲେ ଯୁବତୀ । ଅଭିଯୋଗ ଆଧାରରେ ଖାରବେଳ ନଗର ଅଞ୍ଚଳରେ ରହୁଥିବା ରମାକାନ୍ତଙ୍କୁ ଅଟକ ରଖିଥିଲା ପୋଲିସ୍ । ପଚରାଉଚରା ପରେ ଅଭିଯୁକ୍ତ ନିଜର ଦୋଷ ମାନିଥିଲା । ତାଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ୍ ।
ମହାନଦୀରେ ଯୁବ ଚାର୍ଟାର୍ଡ ଆକାଉଟାଣ୍ଟଙ୍କ ଗଳିତ ମୃତଦେହ
କଟକ: ଜଗତପୁର ଅଞ୍ଚଳରୁ ଗଳିତ ମୃତଦେହ ଉଦ୍ଧାର । ମହାନଦୀରୁ ମୃତଦେହ ଉଦ୍ଧାର କଲା ପୋଲିସ୍ । ମୃତକ ଯୁବ ଚାର୍ଟାର୍ଡ ଆକାଉଟାଣ୍ଟ ରବୀନ୍ଦ୍ର ଗୁପ୍ତାଙ୍କ ବୋଲି ଜଣା ପଡ଼ିଛି । ସେ ଡ଼ିସେମ୍ବର 15 ରୁ ନିଖୋଜ ଥିଲେ । ତେବେ ଏହା ଆତ୍ମହତ୍ୟା ନା ହତ୍ୟା, ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ ।
ଆସନ୍ତାକାଲି ପରିବାର ଲୋକଙ୍କ ଉପସ୍ଥିତି ରେ ଏସସିବି ରେ ଶବ ବ୍ୟବଚ୍ଛେଦ କରାଯିବ । ରବୀନ୍ଦ୍ରଙ୍କ ନିଜର ଏକ ଚାଟାର୍ଡ଼ ଫାର୍ମ କଟକ ଲିଙ୍କରୋଡ୍ ଅଞ୍ଚଳରେ ରହିଛି । ତେବେ କିପରି ଓ କେଉଁ ପରିସ୍ଥିତିରେ ତାଙ୍କର ମୃତଦେହ ମହନଦୀକୁ ଆସିଲା ସେନେଇ ଖୋଳତାଡ଼ ଆରମ୍ଭ କରିଛି ପୋଲିସ୍ ।
ମାଡ଼ମାରି ସ୍ତ୍ରୀଙ୍କ ଗର୍ଭ ନଷ୍ଟ କରିଦେଲେ ସାମ୍ବାଦିକ
କେନ୍ଦୁଝର: ମାଡ଼ମାରି ସ୍ତ୍ରୀଙ୍କ ଗର୍ଭ ନଷ୍ଟ କରିଦେଲା ସ୍ବାମୀ । ଜଣେ ଗଣମାଧ୍ୟମ ପ୍ରତିନିଧିଙ୍କ ବିରୋଧରେ ଆସିଛି ଏପରି ସଂଗୀନ ଅଭିଯୋଗ । ଏକ ନିର୍ଦ୍ଦିଷ୍ଟ ଗଣମାଧ୍ୟମର ଯୋଡ଼ା ପ୍ରତିନିଧି ସଞ୍ଜିତ୍ ବାରିକଙ୍କୁ ଗିରଫ କରିଛି ପୋଲିସ । ସ୍ତ୍ରୀଙ୍କୁ ଶାରୀରିକ ଓ ମାନସିକ ନିର୍ଯାତନା ଦେବାସହ ଠକେଇ ଅଭିଯୋଗରେ ତାଙ୍କୁ ଗିରଫ କରାଯାଇଛି । ଅଭିଯୋଗ ଅନୁସାରେ ବିବାହ ପରେ ମାଆ ଓ ଭଉଣୀଙ୍କ ସହିତ ମିଶି ସ୍ତ୍ରୀଙ୍କୁ ନିର୍ଯାତନା ଦେଉଥିଲେ ସାମ୍ବାଦିକ ସ୍ବାମୀ ସଞ୍ଜିତ ।
ସ୍ତ୍ରୀଙ୍କୁ ସନ୍ଦେହ କରି ନିର୍ଯାତନା ଦେଉଥିଲେ । ଏପରିକି ମାଡ଼ ମାରି ଗର୍ଭ ନଷ୍ଟ କରିଦେଇଥିବା ଅଭିଯୋଗ ହୋଇଛି । ବିଭିନ୍ନ ସମୟରେ ଶ୍ବଶୂର ଘରୁ ୧୯ଲକ୍ଷ ଟଙ୍କା ମଧ୍ୟ ଠକି ନେଇଥିବା ଜଣାପଡ଼ିଛି । ଏନେଇ ଥାନାରେ ଏତଲା ପରେ ସଞ୍ଜିତଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ ।
ବିଜୟରୁ ଭାରତର ହକି ବିଶ୍ୱକପ୍ ଅଭିଯାନ; ସ୍ପେନକୁ ୨-୦ ଗୋଲରେ ହରାଇଲା ଟିମ୍ ଇଣ୍ଡିଆ
ରାଉରକେଲା: ପୁରୁଷ ହକି ବିଶ୍ବକପ୍-୨୦୨୩ରେ ବିଜୟରୁ ନିଜର ଅଭିଯାନ ଆରମ୍ଭ କରିଛି ଭାରତ । ଉଦ୍ଘାଟନୀ ଦିବସର ଚତୁର୍ଥ ମ୍ୟାଚ୍ରେ ଟିମ୍ ଇଣ୍ଡିଆ ୨-୦ରେ ସ୍ପେନ୍କୁ ପରାସ୍ତ କରିଛି । ରାଉରକେଲାରେ ନବନିର୍ମିତ ବିର୍ସା ମୁଣ୍ଡା ଷ୍ଟାଡିୟମ୍ରେ ଭାରତୀୟ ଟିମ୍ରେ ଖେଳାଳିମାନେ ଆରମ୍ଭରୁ ସ୍ପେନ୍ ଉପରେ ଦବଦବା ଜାରି କରିଥିଲେ । ଓଡ଼ିଆ ପୁଅ ଅମିତ ରୋହିଦାସ ପ୍ରଥମ ଗୋଲ୍ ଦେଇ ଭାରତକୁ ଆଗୁଆ ରଖିଥିଲେ । ରୋହିଦାସ ଖେଳର ୧୨ତମ ମିନିଟରେ ଏକ ପେନାଲ୍ଟି ଗୋଲ୍ ଦେଇଥିଲେ ।
ପରେ ୨୬ ମିନିଟରେ ହାର୍ଦ୍ଦିକ ସିଂହ ଅନ୍ୟ ଏକ ଗୋଲ୍ ଦେଇ ଭାରତକୁ ୨ ଗୋଲରେ ଆଗୁଆ କରିଥିଲେ । ଏହାପରେ ସ୍ପେନ୍ ଏକାଧିକ ସୁଯୋଗ ପାଇଥିଲେ ମଧ୍ୟ ଗୋଲରେ ରୂପାନ୍ତରିତ କରିପାରି ନଥିଲେ । ଅମିତ ରୋହିଦାସ ମ୍ୟାନ ଅଫ ଦ ମ୍ୟାଚ ହୋଇଛନ୍ତି । ପ୍ରଥମ ଦିନରେ କଳିଙ୍ଗ ଷ୍ଟାଡିୟମ ଓ ବିର୍ସା ମୁଣ୍ଡା ଷ୍ଟାଡିୟମରେ ମୋଟ ୪ଟି ମ୍ୟାଚ ଖେଳାଯାଇଥିଲା । ଉଭୟ ସ୍ଥାନରେ ହଜାର ହଜାର ଦର୍ଶକଙ୍କ ଭିଡ ପରିଲକ୍ଷିତ ହୋଇଥିଲା । ରାଉରକେଲାରେ ପ୍ରଥମ ଥର ବିଶ୍ବକପର ମ୍ୟାଚଗୁଡ଼ିକ ଖେଳାଯାଉଥିବାରୁ ସ୍ଥାନୀୟ ଲୋକେ ଅଧିକ ଉତ୍ସାହିତ ଥିଲେ ।
ଆଜି ପ୍ରଥମ ତିନୋଟି ମ୍ୟାଚରେ ଆର୍ଜେଣ୍ଟିନା ଓ ସାଉଥ ଆଫ୍ରିକା ମଧ୍ୟରେ କାଣ୍ଟେ କି ଟକ୍କରରେ ଆର୍ଜେଣ୍ଟିନା ବିଜୟୀ । ସାଉଥ ଆଫ୍ରିକା ବିରୋଧରେ ଆର୍ଜେଣ୍ଟିନା ୧-୦ଗୋଲରେ ବିଜୟୀ ହୋଇଥିଲା । ଅନ୍ୟ ଏକ ଦମଦାର ପ୍ରଦର୍ଶନରେ ଫ୍ରାନ୍ସକୁ ୮ ଗୋଲରେ ପରାସ୍ତ କରିଛି ଅଷ୍ଟ୍ରେଲିଆ । ଇଂଲଣ୍ଡ ଓ ଓ୍ବେଲସ ମଧ୍ୟରେ ଟକ୍କର ଆରମ୍ଭ ହୋଇଥିଲା । ଏଥିରେ ଇଂଲଣ୍ଡ ଓ୍ବେଲସକୁ 5-0 ଗୋଲରେ ହରାଇଦେଇଛି । ରାଉରକେଲା ବିର୍ସା ମୁଣ୍ଡା ଷ୍ଟାଡିୟମକୁ ଭାରତ ମ୍ୟାଚ ଦେଖିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ହକି ଇଣ୍ଡିଆର ସଭାପତି ଦିଲୀପ ତିର୍କୀ, ୫ଟି ସଚିବ ଭିକେ ପାଣ୍ଡିଆନଙ୍କ ସମେତ ପ୍ରଶାସନିକ ଅଧିକାରୀ ମଧ୍ୟ ମ୍ୟାଚ ଦେଖିବାକୁ ପହଞ୍ଚି ଥିଲେ ।