ଲଣ୍ଡନ: ବ୍ରିଟେନ ରାଜନୈତିକ ସଙ୍କଟ । ପ୍ରଧାନମନ୍ତ୍ରୀ ପଦ ପାଇଁ ରନର ଅପ୍ ରୁ ଫ୍ରଣ୍ଟ ରନର ହୋଇଛନ୍ତି ଭାରତୀୟ ବଂଶୋଦ୍ଭବ ଋଷି ସୁନକ । ପିଏମ ପଦକୁ ନେଇ ଛକାପଞ୍ଝା ଜାରି ରହିଥିବା ବେଳେ ରେସରୁ ଓହରି ଯାଇଛନ୍ତି ପୂର୍ବତନ ପ୍ରଧାନମନ୍ତ୍ରୀ ବୋରିସ ଜନସନ । କଞ୍ଜରଭେଟିଭ ପାର୍ଟିର ଦୁଇ ନେତା ବୋରିସ ଓ ଋଷି ପିଏମ ପଦ ପାଇଁ ଦାବିଦାର ହୋଇପାରନ୍ତି ବୋଲି ଚର୍ଚ୍ଚା ଜାରି ରହିଥିଲା ।
ତମାମ ଚର୍ଚ୍ଚା ଉପରେ ପୂର୍ଣ୍ଣଛେଦ ପକାଇଛନ୍ତି ବୋରିସ । ବୋରିସଙ୍କ ଏହି ସରପ୍ରାଇଜ ଘୋଷଣା ପରେ ସୁନକଙ୍କ ରାସ୍ତା ସଫା ହୋଇଯାଇଛି । ହାଉସ ଅଫ କମନ୍ସର ଲିଡର ପେନୀ ମରଡୋଣ୍ଟଙ୍କୁ ଯଦି ୧୦୦ ସାଂସଦଙ୍କ ସମର୍ଥନ ନମିଳେ, ତେବେ ପ୍ରଥମ ଥର ପାଇଁ ବ୍ରିଟେନ ପ୍ରଧାନମନ୍ତ୍ରୀ ଭାବେ ଜଣେ ଭାରତୀୟ ଶପଥ ନେବେ । ଏବେ ସୁଦ୍ଧା ପେନ୍ନୀଙ୍କ ପାଖରେ ପାଖରେ ୨୫ ସାଂସଦଙ୍କ ସମର୍ଥନ ରହିଛି । ଯେତବେଳେ କି ସୁନକଙ୍କ ପାଖରେ ୧୮୫ ସାଂସଦଙ୍କ ସମର୍ଥନ ରହିଛି ।
ସନ୍ଧ୍ୟା ୬ଟା ୩୦ରେ ସ୍ଥିତି ସ୍ପଷ୍ଟ ହେବ ବୋଲି ଆଶା କରାଯାଉଛି । ସୂଚନା ଥାଉକି ବ୍ରିଟେନର ସଂସଦରେ କଞ୍ଜରଭେଟିବ ଦଳର ୩୫୭ ସାସଂଦ ରହିଛନ୍ତି । ଏମାନେ ଅନଲାଇନ ଭୋଟିଂ କରି ଦଳ ଲିଡର ଏବଂ ପ୍ରଧାନମନ୍ତ୍ରୀ ବାଛିବେ । ନିର୍ବାଚନର ନୂଆ ନିୟମ ଅନୁଯାୟୀ ପ୍ରଧାନମନ୍ତ୍ରୀ ହେବା ପାଇଁ ୧୦୦ରୁ ଅଧିକ ସାଂସଦଙ୍କ ସମର୍ଥନ ରହିବା ଆବଶ୍ୟକ ।
ପିଏମ ରେସରୁ ଓହରିବା ପରେ ଜନସନ କହିଛନ୍ତି, ସାଧାରଣ ନିର୍ବାଚନ ଜିତିବା ପାଇଁ ସେ ସକ୍ଷମ । ତାଙ୍କ ପାଖରେ ଆବଶ୍ୟକ ସାଂସଦଙ୍କ ସମର୍ଥନ ମଧ୍ୟ ରହିଛି । ମାତ୍ର ସେ ଋଷି ସୁନକଙ୍କ ଠାରୁ ଢେର ପଛରେ ରହିଛନ୍ତି । ଦଳ ଭିତରେ ଏକତା ନରହିଲେ ପ୍ରଭାବିତ ଢଙ୍ଗରେ ସରକାର ଚଳାଇ ହେବ ନାହିଁ । ତେଣୁ ଯିଏ ଜିତିବ ତାକୁ ସମର୍ଥନ ଦେବେ ବେଲି ଜନସନ କହିଛନ୍ତି । ଲିଜ୍ଙ୍କ ସରକାରରେ ଗୃହମନ୍ତ୍ରୀ ଥିବା ସୁଏଲା ବ୍ରାଭରମନ ମଧ୍ୟ ସୁନକଙ୍କ ସମର୍ଥନରେ ଓହ୍ଲାଇଛନ୍ତି ।
