ମୋନ୍ଥା ପାଇଁ ଖୋର୍ଦ୍ଧା ଜିଲାରେ ବନ୍ଦ ରହିବ ସ୍କୁଲ ଓ ଅଙ୍ଗନବାଡ଼ି । ୨୮ ଓ ୨୯ ତାରିଖରେ ବନ୍ଦ ରହିବ । ଜିଲା ପ୍ରଶାସନ ପକ୍ଷରୁ ନିର୍ଦ୍ଦେଶନାମା ଜାରି ।
ବେଦାନ୍ତ ଆଲୁମିନିୟମ ପକ୍ଷରୁ ଶିଶୁ ମହୋତ୍ସବ ‘ସୁରଭି’ କୁ ସମର୍ଥନ: ଗ୍ରାମାଞ୍ଚଳରେ ଯୁବ ପ୍ରତିଭାର ବିକାଶ
ଭୁବନେଶ୍ୱର: : ଭାରତର ସର୍ବବୃହତ ଆଲୁମିନିୟମ ଉତ୍ପାଦନକାରୀ ବେଦାନ୍ତ ଆଲୁମିନିୟମ, ସୁନ୍ଦରଗଡ଼ ଜିଲ୍ଲାରେ ‘ସୁରଭି’ ଶିଶୁ ମହୋତ୍ସବକୁ ସମର୍ଥନ କରିଛି । ଓଡ଼ିଶା ସରକାରଙ୍କ ବିଦ୍ୟାଳୟ ଏବଂ ଗଣ ଶିକ୍ଷା ବିଭାଗ ଦ୍ୱାରା ଆୟୋଜିତ ଏହି କାର୍ଯ୍ୟକ୍ରମ ସ୍ଥାନୀୟ ଲୋକଙ୍କ ମଧ୍ୟରେ ସୃଜନଶୀଳତା ଏବଂ ପ୍ରତିଭା ଚିହ୍ନଟ କରିବା ପାଇଁ ଏକ ପୋଷଣ ପ୍ଲାଟଫର୍ମ ଭାବରେ ପରିକଳ୍ପନା କରାଯାଇଛି। ହେମଗିରି ଏବଂ ଲଖନପୁର ବ୍ଲକ ଅନ୍ତର୍ଗତ ଛଅଟି ଗ୍ରାମ ପଞ୍ଚାୟତକୁ ପ୍ରତିନିଧିତ୍ୱ କରୁଥିବା ୪୨ଟି ବିଦ୍ୟାଳୟର ୧୫୦୦ରୁ ଅଧିକ ଛାତ୍ରଛାତ୍ରୀ ଏହି ଉତ୍ସବରେ ଅଂଶଗ୍ରହଣ କରିଥିଲେ।
ଏହି କାର୍ଯ୍ୟକ୍ରମ ସୃଜନଶୀଳତା, କଳ୍ପନା ଏବଂ ଶିକ୍ଷଣର ଏକ ଉତ୍ସବ ଭାବରେ କାର୍ଯ୍ୟ କରିଥିଲା, ଯେଉଁଥିରେ କଳା ଏବଂ ଶିଳ୍ପ, ସଂଗୀତ ଏବଂ ନୃତ୍ୟ, ବିତର୍କ, ବକ୍ତବ୍ୟ ଏବଂ ସୃଜନଶୀଳ ଲେଖାକୁ ଅନ୍ତର୍ଭୁକ୍ତ କରି ୩୦ ଟି ବିବିଧ ପ୍ରତିଯୋଗିତା ପ୍ରଦର୍ଶିତ ହୋଇଥିଲା । ଏହି ସ୍ତରର ବିଜେତାମାନେ ଏବେ ବ୍ଲକ ସ୍ତରୀୟ ପ୍ରତିଯୋଗିତାରେ ସେମାନଙ୍କ ବିଦ୍ୟାଳୟଗୁଡ଼ିକର ପ୍ରତିନିଧିତ୍ୱ କରିବେ। ‘ସୁରଭି’ କୁ ବେଦାନ୍ତର ସମର୍ଥନ ଗୋଷ୍ଠୀ ବିକାଶ ପ୍ରତି କମ୍ପାନୀର ପ୍ରତିବଦ୍ଧତାର ଉଦାହରଣ।
ଏହି ଉତ୍ସବରେ କ୍ଲଷ୍ଟର ରିସୋର୍ସ ସେଣ୍ଟର (ସିଆରସିସି) ର ସଂଯୋଜକ ଆଶିଷ ପଟେଲ, ଅନ୍ୟ ବିଶିଷ୍ଟ ଅତିଥି, ଶିକ୍ଷକ ଏବଂ ଗୋଷ୍ଠି ସଦସ୍ୟମାନେ ଯୋଗ ଦେଇଥିଲେ। ଗ୍ରାମାଞ୍ଚଳର ଛାତ୍ରଛାତ୍ରୀମାନଙ୍କୁ ସେମାନଙ୍କର ଦକ୍ଷତା ପ୍ରଦର୍ଶନ କରିବା ଏବଂ ଶିକ୍ଷା ବାହାରେ ଆତ୍ମବିଶ୍ୱାସ ହାସଲ କରିବା ପାଇଁ ଏକ ମୂଲ୍ୟବାନ ମଞ୍ଚ ପ୍ରଦାନ କରିଥିବାରୁ ଅତିଥିମାନେ ଏହି ପଦକ୍ଷେପକୁ ପ୍ରଶଂସା କରିଥିଲେ।
ଏହି ଅବସରରେ ଲଖନପୁର ବ୍ଲକର ସିଆରସିସି ଆଶିଷ ପଟେଲ କହିଥିଲେ, ‘ସୁରଭି’ କେବଳ ଏକ ପ୍ରତିଯୋଗିତା ନୁହେଁ, ବରଂ ପିଲାମାନଙ୍କ ସୃଜନଶୀଳତା ଏବଂ ସାମର୍ଥ୍ୟର ଏକ ଉତ୍ସବ। ଛାତ୍ରଛାତ୍ରୀଙ୍କ ସାମଗ୍ରିକ ବିକାଶକୁ ପ୍ରୋତ୍ସାହିତ କରିବା ଏବଂ ସେମାନଙ୍କୁ ବଡ଼ ସ୍ୱପ୍ନ ଦେଖିବାରେ ସାହାଯ୍ୟ କରିବାରେ ବେଦାନ୍ତର ସମର୍ଥନକୁ ଆମେ ପ୍ରଶଂସା କରୁଛୁ ।
ଶିକ୍ଷା ଏବଂ ଗୋଷ୍ଠୀ ବିକାଶ ପ୍ରତି ବେଦାନ୍ତର ପ୍ରତିବଦ୍ଧତା ଉପରେ ଆଲୋକପାତ କରି ବେଦାନ୍ତ ଆଲୁମିନିୟମର ସିଇଓ ରାଜୀବ କୁମାର କହିଛନ୍ତି, “ବେଦାନ୍ତରେ, ଆମେ ବିଶ୍ୱାସ କରୁ ଯେ ପରବର୍ତ୍ତୀ ପିଢ଼ିକୁ ସଶକ୍ତ କରିବା ସହିତ ପ୍ରକୃତ ପ୍ରଗତି ଆରମ୍ଭ ହୁଏ। ‘ସୁରଭି’ ଶିଶୁ ମହୋତ୍ସବ ଭଳି ପଦକ୍ଷେପ ପିଲାମାନଙ୍କୁ ସେମାନଙ୍କ ପ୍ରତିଭାର ଅନ୍ୱେଷଣ କରିବା, ଆତ୍ମବିଶ୍ୱାସ ସୃଷ୍ଟି କରିବା ଏବଂ ପରିପୂର୍ଣ୍ଣ ବ୍ୟକ୍ତିତ୍ୱରେ ବିକଶିତ ହେବାର ସୁଯୋଗ ପ୍ରଦାନ କରିଥାଏ ।
ବେଦାନ୍ତ ଆଲୁମିନିୟମ ଶିକ୍ଷା, ସ୍ୱାସ୍ଥ୍ୟସେବା, ସ୍ଥାୟୀ ଜୀବିକା, ଗ୍ରାମୀଣ ଭିତ୍ତିଭୂମି ଏବଂ ତୃଣମୂଳ ସ୍ତରର କ୍ରୀଡା ଏବଂ ସଂସ୍କୃତି ମାଧ୍ୟମରେ ସାମାଜିକ ପ୍ରଭାବ ପଦକ୍ଷେପ ମାଧ୍ୟମରେ ଓଡ଼ିଶାରେ ପରିବର୍ତ୍ତନ ଆଣିବା ପାଇଁ ପ୍ରତିଶ୍ରୁତିବଦ୍ଧ। ସ୍ଥାନୀୟ କର୍ତ୍ତୃପକ୍ଷ ଏବଂ ଗୋଷ୍ଠୀ ଅଂଶୀଦାରମାନଙ୍କ ସହିତ ଘନିଷ୍ଠ ସହଯୋଗ କରି, କମ୍ପାନୀ ନିଶ୍ଚିତ କରେ ଯେ ଏହାର ହସ୍ତକ୍ଷେପ ଏହାର କାର୍ଯ୍ୟ କ୍ଷେତ୍ରରେ ବାସ୍ତବ ସାମାଜିକ-ଅର୍ଥନୈତିକ ପ୍ରଗତି ଦିଗରେ ଆଗେଇ ନେବ।
ବେଙ୍ଗଲୁରୁରେ ସବୁଠାରୁ ବଡ଼ ସାଇବର ଚୋରି! ମନିଭ୍ୟୁ ଆପରୁ ୩ ଘଣ୍ଟାରେ ୪୯ କୋଟି ଟଙ୍କା ଲୁଟ୍
ବେଙ୍ଗାଲୁରୁ : କର୍ଣ୍ଣାଟକର ରାଜଧାନୀ ବେଙ୍ଗଲୁରୁରୁ ଦେଶର ସବୁଠାରୁ ବଡ଼ ସାଇବର ଚୋରିର ମାମଲା ସାମ୍ନାକୁ ଆସିଛି । ବେଙ୍ଗଲୁରୁରେ ଏକ ବଡ଼ ସାଇବର ଆକ୍ରମଣରେ ହ୍ୟାକରମାନେ କେବଳ ୩ ଘଣ୍ଟାରେ ମନିଭ୍ୟୁ ଆପ୍ (ମନିଭ୍ୟୁ) ଆପ୍ରୁ ୪୯ କୋଟି ଟଙ୍କା ଲୁଟି ନେଇଛନ୍ତି । ଏହି ଲୁଟ ଆପର API ସିଷ୍ଟମରେ ସେନ୍ଧମାରି କରାଯାଇଛି।
ଏପିଆଇ ଏକ ଡିଜିଟାଲ୍ ଇଣ୍ଟରଫେସ୍ ଅଟେ ଯାହା ଆପଗୁଡ଼ିକୁ ବ୍ୟାଙ୍କ ଏବଂ ସର୍ଭରଗୁଡ଼ିକ ସହିତ ସମ୍ପର୍କ ରଖିବାକୁ ଅନୁମତି ଦିଏ। ସେଣ୍ଟ୍ରାଲ୍ କ୍ରାଇମ୍ ବ୍ରାଞ୍ଚ୍ (CCB) ଅନୁଯାୟୀ, ଏହି ସାଇବର ଆକ୍ରମଣ ଦୁବାଇ, ଚୀନ, ହଙ୍କଙ୍ଗ ଏବଂ ଫିଲିପାଇନ୍ସରୁ ଗୋଟିଏ ଆନ୍ତର୍ଜାତୀୟ ଗ୍ୟାଙ୍ଗ୍ ଦ୍ୱାରା କରାଯାଇଛି। ହ୍ୟାକରମାନେ ଆପ୍ର APIର ବ୍ୟବହାର କରି ୬୫୩ ନକଲି ଖାତାକୁ ଟଙ୍କା ସ୍ଥାନାନ୍ତର କରିଛନ୍ତି।
କିଏ ମାଷ୍ଟରମାଇଣ୍ଡ୍?
ଏହି ପୂରା ଅପରେସନକୁ ଦୁବାଇରେ ବସିଥିବା ଜଣେ ଭାରତୀୟ ମୂଳର ଲୋକ ଚଳାଉଥିଲେ। ସେ ଏହି ହ୍ୟାକିଂକୁ ଭର୍ଚୁଅଲ୍ ପ୍ରାଇଭେଟ୍ ସର୍ଭର (VPS)ର ବ୍ୟବହାର କରି କରିଥିଲେ। ଏହି ସର୍ଭରଗୁଡ଼ିକୁ ସେ ବେଲଗାଭିର ଇସ୍ମାଇଲ୍ ଆତ୍ତାରଙ୍କଠାରୁ କିଣିଥିଲେ। ପରେ ଏହି ସର୍ଭରଗୁଡ଼ିକୁ ଫ୍ରାନ୍ସର IP ଠିକଣାରୁ ହ୍ୟାକିଂକୁ ସମ୍ପନ୍ନ କରିବା ପାଇଁ ଯୋଡ଼ାଯାଇଥିଲା ।
ଦୁଇଜଣଙ୍କୁ ଧରାପଡ଼ିଲେ
ବେଙ୍ଗଲୁରୁର CCB ସାଇବର କ୍ରାଇମ୍ ପୋଲିସ୍ ଏହି ମାମଲାରେ ଦୁଇଜଣଙ୍କୁ ଧରିଛି। ସେମାନଙ୍କରେ ବେଲଗାଭିର ଇସ୍ମାଇଲ୍ ଆତ୍ତାର ଏବଂ ମହାରାଷ୍ଟ୍ରର ପଟେଲ୍ ଅଟନ୍ତି। ପଟେଲ୍ ନକଲି ଖାତାର ମାଲିକ, ଯାହାର ବ୍ୟବହାର ଧୋକାବାଜିରେ ହୋଇଥିଲା। ପୋଲିସ୍ ଏହି ଦୁଇଜଣଙ୍କଠାରୁ ପ୍ରାୟ ୧୦ କୋଟି ଟଙ୍କା ଫ୍ରିଜ୍ କରିଛି ଏବଂ ସେମାନଙ୍କର ଲ୍ୟାପଟପ୍ ଏବଂ ପେନ୍ ଡ୍ରାଇଭ୍ ଜବତ କରିଛି।
ପୋଲିସ୍ କଣ କହିଛି?
ପୋଲିସ୍ ଅଧିକାରୀମାନଙ୍କ କହିବା ଅନୁଯାୟୀ, ହ୍ୟାକରମାନେ ନକଲି ଖାତାଗୁଡ଼ିକୁ ଅସଲୀ ଖାତାଗୁଡ଼ିକ ସହିତ ମିଶାଇଦେଇଥିଲେ। ସେମାନେ କିଛି ଲୋକମାନଙ୍କୁ ଛୋଟ କମିସନ୍ ଦେଇ ଟଙ୍କା ଉଠାଇବାକୁ କହିଥିଲେ। ସେମାନଙ୍କର ଡିଜିଟାଲ୍ ପଦଚିହ୍ନ ଲୁଚାଇବା ପାଇଁ ସେମାନେ ଏପରି କରିଥିବା ପୋଲିସ କହୁଛି।
ଦୁବାଇରେ ତିନିଜଣ ଏବଂ ହଙ୍କଙ୍ଗରେ ଦୁଇଜଣ ସନ୍ଦିଗ୍ଧ
ପୋଲିସ୍ ଦୁବାଇରେ ତିନିଜଣ ଏବଂ ହଙ୍କଙ୍ଗରେ ଦୁଇଜଣ ସନ୍ଦେହ୍ୟଙ୍କୁ ଚିହ୍ନଟ କରିଛି। ସେମାନେ ଏହି ଲୋକମାନଙ୍କୁ ଧରିବା ପାଇଁ ଆନ୍ତର୍ଜାତୀୟ ଏଜେନ୍ସିଗୁଡ଼ିକ ସହିତ ମିଶି କାମ କରୁଛନ୍ତି। ଧରାପଡ଼ିଥିବା ଦୁଇଜଣ ବର୍ତ୍ତମାନ ନ୍ୟାୟିକ ହିରାସତରେ ଅଛନ୍ତି ଏବଂ ପୋଲିସ୍ ଏହି ବଡ଼ ନେଟୱର୍କର ଯାଞ୍ଚ୍ କରୁଛି।
ନିର୍ବାଚନ ଆୟୋଗ ଦ୍ୱାରା ୧୨ ରାଜ୍ୟରେ SIRର ଘୋଷଣା, ଆଜି ରାତିରୁ ଭୋଟର ଲିଷ୍ଟ ଫ୍ରିଜ୍
ନୂଆଦିଲ୍ଲୀ : ଦେଶର ନିର୍ବାଚନୀ ପ୍ରକ୍ରିୟା ସହିତ ଜଡ଼ିତ ଏକ ଗୁରୁତ୍ୱପୂର୍ଣ୍ଣ ଘୋଷଣା ଆଜି ନିର୍ବାଚନ ଆୟୋଗ କରିଛି। ଭାରତ ନିର୍ବାଚନ ଆୟୋଗ (ECI) ପ୍ରେସ କନଫରେନ୍ସରେ ୧୨ ରାଜ୍ୟରେ ସ୍ପେଶାଲ ଇଣ୍ଟେନ୍ସିଭ୍ ରିଭିଜନ୍ (SIR) ଅର୍ଥାତ୍ ମତଦାତା ସୂଚୀର ବିଶେଷ ପୁନର୍ବିଚାରର ଆରମ୍ଭର ଘୋଷଣା କରିଛି। ଏହି ପ୍ରକ୍ରିୟା ନିକଟରେ ବିହାରରେ ସମ୍ପୂର୍ଣ୍ଣ ହୋଇଛି, ଯେଉଁଠାରେ ଆସନ୍ତା ମାସରେ ବିଧାନସଭା ନିର୍ବାଚନ ହେବାକୁ ଯାଉଛି।
ମୁଖ୍ୟ ନିର୍ବାଚନ କମିଶନର ଛଠର ଶୁଭକାମନା ଦେଇ ବିହାରର ମତଦାତାମାନଙ୍କୁ ଧନ୍ୟବାଦ କହିଛନ୍ତି। ସେ ଘୋଷଣା କରିଛନ୍ତି ଯେ ବିହାରର ସଫଳତା ପରେ ଏବେ ୧୨ ରାଜ୍ୟରେ ‘SIR’ (ସ୍ପେଶାଲ ଇଣ୍ଟିଗ୍ରେଟେଡ୍ ରିଭିଜନ୍) ଆରମ୍ଭ ହେବ। CEC କହିଛନ୍ତି ଯେ SIRରୁ ତିଆରି ମତଦାତା ସୂଚୀ ଉପରେ ବିହାରରେ ‘ଜିରୋ ଆପିଲ୍’ ରେକର୍ଡ ହୋଇଛି।
ପାତ୍ରତା କ’ଣ ହେବ?
ମୁଖ୍ୟ ନିର୍ବାଚନ ଆୟୁକ୍ତ ମତଦାତାଙ୍କ ପାଇଁ ପାତ୍ରତାକୁ ମଧ୍ୟ ସ୍ପଷ୍ଟ କରିଛନ୍ତି, ଯାହା ଅନୁଯାୟୀ ଭୋଟ ଦେବା ପାଇଁ ବ୍ୟକ୍ତି ଭାରତର ନାଗରିକ ହେବା, ଅତି କମ୍ ୧୮ ବର୍ଷ ବୟସ ପୂର୍ଣ୍ଣ କରିବା, ନିର୍ବାଚନ କ୍ଷେତ୍ରର ସାଧାରଣ ନିବାସୀ ହେବା ଏବଂ କୌଣସି ଆଇନ୍ ଅନୁଯାୟୀ ଅଯୋଗ୍ୟ ନ ହେବା ଆବଶ୍ୟକ, ଯାହା ଭାରତର ସମ୍ବିଧାନର ଅନୁଚ୍ଛେଦ ୩୨୬ରେ ନିହିତ ଅଛି।
୧୨ ରାଜ୍ୟ/କେନ୍ଦ୍ରଶାସିତ ଅଂଚଳର ଭୋଟର ଲିଷ୍ଟ ଆଜି ରାତିରେ ଫ୍ରିଜ୍ ହେବ
ମୁଖ୍ୟ ନିର୍ବାଚନ ଆୟୁକ୍ତ (CEC) ଜ୍ଞାନେଶ କୁମାର ଘୋଷଣା କରିଛନ୍ତି ଯେ ୧୨ ରାଜ୍ୟ ଏବଂ କେନ୍ଦ୍ର ଶାସିତ ପ୍ରଦେଶଗୁଡ଼ିକ (UTs)ର ମତଦାତା ସୂଚୀ ଆଜି ରାତିରୁ ଫ୍ରିଜ୍ କରାଯିବ। ଯେଉଁଠାରେ ‘ସ୍ପେଶାଲ ଇଣ୍ଟିଗ୍ରେଟେଡ୍ ରିଭିଜନ୍’ (SIR) ପ୍ରକ୍ରିୟା ଆରମ୍ଭ କରାଯିବ। ଏହି ପଦକ୍ଷେପ ଏହି ଅଞ୍ଚଳଗୁଡ଼ିକରେ ବିସ୍ତୃତ SIR ଅଭ୍ୟାସ ଆରମ୍ଭ କରିବା ପୂର୍ବରୁ ମତଦାତା ସୂଚୀକୁ ଅନ୍ତିମ ରୂପ ଦେବା ପାଇଁ ଗୁରୁତ୍ୱପୂର୍ଣ୍ଣ।
SIRର ପ୍ରମୁଖ ଅଧିକାରୀ ଏବଂ କାର୍ଯ୍ୟ
ନିର୍ବାଚନ ଆୟୋଗ ଅନୁଯାୟୀ, SIR ପ୍ରକ୍ରିୟାରେ ନିମ୍ନଲିଖିତ ପ୍ରମୁଖ କାର୍ଯ୍ୟାଧିକାରୀ ସାମିଲ ହୁଅନ୍ତି:
ମତଦାନ କେନ୍ଦ୍ର (ସ୍ତର):
ପ୍ରତ୍ୟେକ ମତଦାନ କେନ୍ଦ୍ରରେ ପ୍ରାୟ ୧,୦୦୦ ମତଦାତା ଥାଆନ୍ତି।
ପ୍ରତ୍ୟେକ ମତଦାନ କେନ୍ଦ୍ର ପାଇଁ ଏକ ବୁଥ ଲେଭଲ ଅଫିସର (BLO) ନିଯୁକ୍ତ ହୁଏ।
ବିଧାନସଭା କ୍ଷେତ୍ର ସ୍ତର:
ପ୍ରତ୍ୟେକ ବିଧାନସଭା କ୍ଷେତ୍ର ପାଇଁ ଏକ ନିର୍ବାଚନ ପଞ୍ଜୀକରଣ ଅଧିକାରୀ (ERO) ଥାଏ (ଯିଏ SDM ସ୍ତରର ଅଧିକାରୀ ହୁଏ)।
ଇଆରଓଙ୍କ ମୁଖ୍ୟ କାର୍ଯ୍ୟ ହେଉଛି:
ଚିଠା ମତଦାତା ସୂଚୀ ପ୍ରସ୍ତୁତ କରିବା।
ଦାବି ଏବଂ ଆପତ୍ତିଗୁଡ଼ିକୁ ଗ୍ରହଣ କରି ତାହା ଉପରେ ନିଷ୍ପତ୍ତି ନେବା।
ଅନ୍ତିମ ମତଦାତା ସୂଚୀ ପ୍ରସ୍ତୁତ ଏବଂ ପ୍ରକାଶ କରିବା।
ପ୍ରତ୍ୟେକ ତହସିଲ ପାଇଁ ସହାୟକ ନିର୍ବାଚକ ପଞ୍ଜୀକରଣ ଅଧିକାରୀ (AERO) ଥାଆନ୍ତି।
ଆପିଲ୍ (Appeal) ସ୍ତର:
ପ୍ରଥମ ଆପିଲ୍: EROର ନିଷ୍ପତ୍ତି ବିରୁଦ୍ଧରେ ଆପିଲ୍ ଜିଲ୍ଲା ମ୍ୟାଜିଷ୍ଟ୍ରେଟ (DM) ଶୁଣନ୍ତି।
ଦ୍ୱିତୀୟ ଆପିଲ୍: DMଙ୍କ ନିଷ୍ପତ୍ତି ବିରୁଦ୍ଧରେ ଦ୍ୱିତୀୟ ଆପିଲ୍ ରାଜ୍ୟ/କେନ୍ଦ୍ର ଶାସିତ ପ୍ରଦେଶର ମୁଖ୍ୟ ନିର୍ବାଚନ ଅଧିକାରୀ (CEO) ଦ୍ୱାରା ଶୁଣାଯାଏ।
’ମୋନ୍ଥା’ ପାଇଁ ୮ ଜିଲାରେ ୩୦ ଯାଏଁ ସ୍କୁଲ ବନ୍ଦ: ଘୋଷଣା କରିଛନ୍ତି ରାଜ୍ୟ ସରକାର
ମୋନ୍ଥା ପାଇଁ ୮ ଜିଲାରେ ୩୦ ଯାଏଁ ସ୍କୁଲ ବନ୍ଦ ଘୋଷଣା କରିଛନ୍ତି ରାଜ୍ୟ ସରକାର । ସେଗୁଡିକ ହେଲା ଗଂଜାମ, ଗଜପତି, ରାୟଗଡ଼ା, କୋରାପୁଟ, ମାଲକାନଗିରି, କନ୍ଧମାଳ, କଳାହାଣ୍ଡି ଓ ନବରଙ୍ଗପୁର । ଏହି ସବୁ ରେଡ ଜୋନ ଜିଲ୍ଲାରେ ଶିକ୍ଷା ବିଭାଗର ସମସ୍ତ କର୍ମଚାରୀଙ୍କ ଛୁଟି ବାତିଲ ମଧ୍ୟ କରାଯାଇଛି । ନିର୍ଦ୍ଦେଶକଙ୍କ କାର୍ଯ୍ୟାଳୟରେ ଖୋଲିବ ୨୪ ଘଣ୍ଟିଆ କଣ୍ଟ୍ରୋଲ ରୁମ । ଜିଲା ଶିକ୍ଷା ଅଧିକାରୀଙ୍କ ଯୋଗାଯୋଗରେ ରହିବେ । ଅନୁଶାସନ ସଚିବ ଗୁଣ୍ଡାଇ ହାଁସଦାଙ୍କ ସହ ଯୋଗାଯୋଗ ପାଇଁ ନିର୍ଦ୍ଦେଶ ଦିଆଯାଇଛି । ମୋବାଇଲ ନମ୍ବର ୮୦୧୮୭୬୫୨୫୬ ନମ୍ବରରେ ଯୋଗାଯୋଗ କରିପାରିବେ । ପିଲାଙ୍କ ପାଇଁ ଥିବା ମଧ୍ୟାହ୍ନ ଭୋଜନ ଚାଉଳ ରିଲିଫରେ ବ୍ୟବହାର ହୋଇପାରିବ । ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ନିର୍ଦ୍ଦେଶନାମା ଜାରି କରାଯାଇ ଏହା କୁହାଯାଇଛି ।
ବାତ୍ୟା ପାଇଁ ଗାଇଡଲାଇନ୍: ‘ମୋନ୍ଥା’ ବେଳେ କ’ଣ କରିବେ ଓ କ’ଣ କରିବେନି ଜାଣନ୍ତୁ
୧- ବାତ୍ୟା ସମ୍ପର୍କରେ ସଠିକ ସୂଚନା ସମ୍ପର୍କରେ ଅବଗତ ହୁଅନ୍ତୁ
୨- ବାତ୍ୟାକୁ ନେଇ ଗୁଜବରେ ବିଶ୍ବାସ କରନ୍ତୁ ନାହିଁ
୩- ସଠିକ ସୂଚନା ଓ ଗୁଜବ ମଧ୍ୟରେ ଫରକ ଜାଣନ୍ତୁ
୪-ବାତ୍ୟା ଯଥେଷ୍ଟ ପୂର୍ବରୁ ବାତ୍ୟା ମୁକାବିଲା ପାଇଁ ନିଜକୁ ପ୍ରସ୍ତୁତ କରନ୍ତୁ
୫-ଘରେ ରୋଗୀ କିମ୍ବା ଅସୁସ୍ଥ ବ୍ୟକ୍ତି ଥିଲେ ସେମାନଙ୍କ ଉପଚାର ପାଇଁ ବନ୍ଦୋବସ୍ତ କରନ୍ତୁ କିମ୍ବା ତାଙ୍କୁ ନିକଟସ୍ଥ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରନ୍ତୁ
୬- ବାତ୍ୟା ପୂର୍ବରୁ ଗୃହପାଳିତ ପଶୁପକ୍ଷୀଙ୍କ ପାଇଁ ନିରାପଦ ଆଶ୍ରୟ ପ୍ରସ୍ତୁତ କରି ରଖନ୍ତୁ
୭-ବାତ୍ୟା ପାଇଁ ପାଖରେ ଆବଶ୍ୟକ ପରିମାଣର ଶୁଖିଲା ଖାଦ୍ୟ ମହଜୁଦ ରଖନ୍ତୁ
୮- ବିଜୁଳି ବିଭ୍ରାଟ ଆଶଙ୍କା ଥିବାରୁ ମହମବତୀ, ଦିଆସିଲି,ଲଣ୍ଠନ, ଇନଭର୍ଟର ଆଦି ସଜ କରି ରଖନ୍ତୁ
୯- ବିଶୁଦ୍ଧ ପାନୀୟ ଜଳ ଘରେ ମହଜୁଦ ରଖନ୍ତୁ
୧୦-ବାତ୍ୟା ପୂର୍ବରୁ,ବାତ୍ୟା ସମୟରେ ଓ ବାତ୍ୟାର କିଛି ଘଣ୍ଟା ପର୍ଯ୍ୟନ୍ତ ଘରୁ ବାହାରକୁ ନବାହାରିବା ପାଇଁ ପ୍ରସ୍ତୁତ ରୁହନ୍ତୁ
୧୧- ବାତ୍ୟା ସମୟରେ ଓ ତା ପୂର୍ବରୁ ଘରର ମେନ ସୁଇଚ ଅଫ ରଖନ୍ତୁ
୧୨-ଅସୁରକ୍ଷିତ ଘରେ ରହୁଥିଲେ ବା କଚ୍ଚାଘରେ ରହୁଥିଲେ ସୁରକ୍ଷିତ ଓ ପକ୍କାଘରକୁ ସ୍ଥାନାନ୍ତର ହୁଅନ୍ତୁ
୧୩-ଘର ସମ୍ନାରେ ଗଛଥିଲେ ତାକୁ ସୁରକ୍ଷିତ ରଖିବାକୁ ବନ୍ଦୋବସ୍ତ କରନ୍ତୁ ବା କାଟି ଦିଅନ୍ତୁ
୧୪-ବାତ୍ୟାର ବିଶେଷ ପ୍ରଭାବ ପଡିବ ନାହିଁ ବୋଲି ମନେ ମନେ ଭାବି ନିଶ୍ଚିତ ରୁହନ୍ତୁ ନାହିଁ
୧୫- ବାତ୍ୟା ସମୟରେ ଘରେ ଥିବା ସମସ୍ତ ସଦସ୍ୟ ଏକାଠି ରୁହନ୍ତୁ
୧୬-ବାତ୍ୟା ଦେଖିବା ପାଇଁ ଜମା ଉତ୍ସୁକ ହୁଅନ୍ତୁ ନାହିଁ
୧୭- ଥରେ ପବନ ଆସି ବନ୍ଦ ହୋଇଗଲେ ବାତ୍ୟା ସରିଗଲା ବୋଲି ଜମା ଭାବନ୍ତୁ ନାହିଁ
୧୮-ଥରେ ପବନ ଆସିବାପରେ କିଛି ସମୟ ବରିବେଶ ସମ୍ପୁର୍ଣ୍ଣ ଶାନ୍ତ ହୋଇଯିବ ଏବଂ ପୁଣି ଜୋରରେ ପବନ ବହିବ
୧୯- ପବନ ଆରମ୍ଙ ହେବା ମାତ୍ରେ ଘରେ ୱୁ ଝରକା କବାଟ ବନ୍ଦ କରିବା ସହ ଫାଙ୍କରେ ଲୁଗା କିମ୍ବା ଅନ୍ୟ କୌଣସି ଜିନିଷ ଦେଇ ଫାଙ୍କ ବନ୍ଦ କରିବାକୁ ଭୂଲନ୍ତୁ ନାହିଁ
୨୦- ବାତ୍ୟା ସମୟରେ ଭୁଲରେ କାର,ମୋଟର ସାଇକେଲ ବା ସାଇକେଲ ଆଦି ଯାନରେ ଯାତାୟତ କରନ୍ତୁ ନାହିଁ
୨୧- ଘରେ ଫାଷ୍ଟଏଡ୍ ରଖନ୍ତୁ
୨୨- ବାତ୍ୟା ସମୟରେ ଘରେ ସରୀସୃପ ପଶିଯିବାର ସମ୍ଭାବନା ରହିଛି। ସେଥିପ୍ରତି ସତର୍କ ରୁହନ୍ତୁ
୨୩- ବିଲରେ ଥିବା ଫସଲ ଯଦି ଘରକୁ ଆଣିହେବ କିମ୍ବା ସୁରକ୍ଷିତ ସ୍ଥାନରେ ରଖିହେବ ତା ହେଲେ ସେୟା କରନ୍ତୁ
୨୪- ବାତ୍ୟା ପରେ ପରେ ଫ୍ଲାସପ୍ଲଡ ଆଶଙ୍କା ରହିଥିବାରୁ ସେଥିପ୍ରତି ସଜାଗ ରୁହନ୍ତୁ
୨୫- ବାତ୍ୟା ଯୋଗୁଁ ଭୀଷଣ ବର୍ଷା ହେବ। ତେଣୁ ତଳି ଅଞ୍ଚଳରେ ପାଣି ଭର୍ତ୍ତି ହୋଇଯିବ
୨୬- ବିଶେଷକରି ଓଭରବ୍ରିଜ ତଳର ଅଣ୍ଡରପାସ ଗୁଡିକରେ ପାଣି ଜମି ରହି ବିପଦ ସଙ୍କୁଳ ହୋଇପଡିବ
୨୭-ବାତ୍ୟା ଓ ବର୍ଷା ପରେ ଅଣ୍ଡରପାସ ଦେଇ ଯାତାୟତ କରୁଥିଲେ ସାବଧାନତା ଅବଲମ୍ବନ କରନ୍ତୁ
୨୮- ବାତ୍ୟା ପରେ ଗଛ ଉପୁଡି ପଡିବା ସହ କଚ୍ଚାଘର ଭାଙ୍ଗିବା ଆଶଙ୍କା ରହିଛି
୨୯- ବାତ୍ୟା ପରେ ଉତ୍ସୁକତା ପାଇଁ ଭଙ୍ଗାଗଛ ଓ ଭଙ୍ଗା କଚ୍ଚାଘର ନିକଟକୁ ଯିବା ବିପଦପୂର୍ଣ୍ଣ ହୋଇପାରେ
୩୦- ଦୂର୍ଗାପୂଜା ଓ ଲକ୍ଷ୍ମୀପୂଜା ପାଇଁ ନିର୍ମିତ ତୋରଣକୁ ଖୋଲିଦେବା ଉଚିତ
୩୧- ବିଭିନ୍ନ ସ୍ଥାନରେ ବିପଦ ଶଙ୍କୁଳ ଅବସ୍ଥାରେ ରହିଥିବା ହୋର୍ଡିଂ ଗୁଡିକୁ ମଧ୍ୟ ଖୋଲିଦେବା ଉଚିତ
୩୨- ବାତ୍ୟା ବେଳେ ଏହ ହୋର୍ଡିଂଗୁଡିକ ଖସି ପଡିବାର ଆଶଙ୍କା ରହିଛି
୩୩- ବାତ୍ୟା ପୂର୍ବରୁ ସତ୍ସ୍ୟଜୀବୀମାନେ ସମୁଦ୍ରରୁ ଫେରିଆସିବା ଜରୁରୀ
୩୪- ବାତ୍ୟା ଅବ୍ୟାହତି ପୁର୍ବରୁ ଏବଂ ବାତ୍ୟା ସମୟରେ ସମୁଦ୍ର,ହ୍ରଦ,ନଦୀ, ନାଳରେ ନୌଯାତ୍ରା କରିବେ ନାହିଁ
୩୫- ଆସନ୍ନ ପ୍ରସବା ଓ ଗର୍ଭବତୀଙ୍କ ପାଇଁ ଆଗୁଆ ବ୍ୟବସ୍ଥା କରନ୍ତୁ
୩୬- ସୂଚନା ପାଇଁ କମ୍ୟୁନିଟି ରେଡିଓ ସହ ଯୋଡି ହୋଇ ରୁହନ୍ତୁ
୩୭- ଦୀର୍ଘ ସମୟ ପର୍ଯ୍ୟନ୍ତ ବିଜୁଳି ବ୍ୟାହାତ ହୋଇପାରେ। ମୋବାଇଲକୁ ଚାର୍ଜ ରଖିବାକୁ ବ୍ୟବସ୍ଥା କରନ୍ତୁ। ପାଓ୍ବାରବ୍ୟାଙ୍କ ଗୁଡିକୁ ଫୁଲ ଚାର୍ଜ କରି ରଖନ୍ତୁ
୩୮- ସମୁଦ୍ର କୁଳିଆ ବାସିନ୍ଦା ହୋଇଥିଲେ ସମୁଦ୍ରର ଜୁଆର ସମ୍ପର୍କରେ ଖବର ରଖନ୍ତୁ
୩୯- ଯେଉଁ ଅଞ୍ଚଳରେ ରହୁଛନ୍ତି ସେହି ଅଞ୍ଚଳର ଦାୟିତ୍ବ ସମ୍ପନ୍ନ ଲୋକଙ୍କ ସହ ଯୋଗାଯୋଗରେ ରୁହନ୍ତୁ
୪୦- ପରସ୍ପର ସହ ସୂଚନା ଅଦାନ ପ୍ରଦାନ କରନ୍ତୁ
୪୧- ବାତ୍ୟା ସମୟରେ ବିଶେଷ ଭୟଭୀତ ନ ହୋଇ ପରିସ୍ଥିତିର ମୁକାବିଲା କଲେ କ୍ଷୟକ୍ଷତି ହେବ ନାହିଁ
ବାତ୍ୟା ’ମୋନ୍ଥା’ ମୁକାବିଲା ନେଇ ଉଚ୍ଚସ୍ତରୀୟ ବୈଠକ: ସ୍ଥିତି ସମୀକ୍ଷା କଲେ ରାଜସ୍ବ ମନ୍ତ୍ରୀ
ମୋନ୍ଥା ମୁକାବିଲା ନେଇ ଉଚ୍ଚସ୍ତରୀୟ ବୈଠକ। ରାଜସ୍ବ ମନ୍ତ୍ରୀଙ୍କ ଅଧ୍ୟକ୍ଷତାରେ ବସିଥିଲା ଏ ବୈଠକ। ବାତ୍ୟା ମୁକାବିଲା ନେଇ ସ୍ଥିତି ସମୀକ୍ଷା କରିଛନ୍ତି ରାଜସ୍ଵ ମନ୍ତ୍ରୀ। ଆସନ୍ତା ୨୯ ତାରିଖ ପାଇଁ ୮ ରେଡ୍ ଆଲର୍ଟ ଜିଲ୍ଲା ମାଲକାନଗିରି, କୋରାପୁଟ, ଗଞ୍ଜାମ, କନ୍ଧମାଳ, ଗଜପତି, କଳାହାଣ୍ଡି, ନବରଙ୍ଗପୁର, ରାୟଗଡା ପ୍ରସାସନ ସହ ସରକାର ଆଲୋଚନା କରିଛନ୍ତି। ବିଭିନ୍ନ ବିଭାଗ ସହ ମଧ୍ୟ ପ୍ରସ୍ତୁତି ନେଇ ଆଲୋଚନା ହୋଇଛି। ଆଜି ଚୂଡାନ୍ତ ବୈଠକ ବସିଥିଲା। ଏଥିରେ ଜିଲ୍ଲାସ୍ତରର ସମୀକ୍ଷା ନେଇ ଆଲୋଚନା ହୋଇଥିଲା। ସରକାରରୁ ଜିଲ୍ଲା, ବ୍ଲକ, ପଂଚାୟତ ପ୍ରଶାସନ ଯାଏଁ ପ୍ରସ୍ତୁତି ସରିଛି। ସରକାରୀ ଅଧିକାରୀ, ଅଙ୍ଗନବାଡି, ଆଶା ଦିଦି ଲୋକଙ୍କ ପାଖରେ ପହଞ୍ଚିଛନ୍ତି। ବାତ୍ୟାର ଗତି ବଢ଼ି ବଢ଼ି ଚାଲୁଛି।
ବିଶେଷଜ୍ଞଙ୍କ ଅନୁସାରେ, ଗତି ଯେତେ ବଢିବ ପ୍ରଭାବ କମିବ। ଏହା ମାଲକାନଗିରିରୁ କ୍ରସ କରି ଛତିଶଗଡ ଯିବ। ଗଞ୍ଜାମ, ଗଜପତି, କୋରାପୁଟ, କଳାହାଣ୍ଡି, ନବରଙ୍ଗପୁର ପ୍ରଭାବିତ ହେବ। ଛତିଶଗଡ ପଟେ ବର୍ଷା ହୋଇ ପାରେ। ପାଣି ମହାନଦୀକୁ ଆସିବାର ସମ୍ଭାବନା ଅଛି। 88% ପାଣି ଜଳଭଣ୍ଡାରରେ ଥିଲା। ଏବେ ପାଣି ଛାଡିବା ଆରମ୍ଭ ହେଲାଣି। ସମୁଦ୍ର ଭିତରୁ ଫେରି ଆସିବାକୁ କୁହାଗଲାଣି। SRC ଆଜି କୋଷ୍ଟ ଗାର୍ଡ ସହ କଥା ହେବେ। ଆନ୍ଧ୍ରପ୍ରଦେଶ ଲୋକ ଓଡ଼ିଶା ସମୁଦ୍ରରେ ଥିବା ଜଣା ଯାଇଛି। କେତେ ପରିମାଣରେ ସେଠୁ ଜାହାଜ ଆସିଛି ସେ ନେଇ କୋଷ୍ଟ ଗାର୍ଡ ସହ ଆଲୋଚନା ହେବ। ସଫଳତା ସହ ଜିରୋ କାଜୁଆଲଟି ସହ ବାତ୍ୟାକୁ ବିଦା କରିବା ବୋଲି କହିଛନ୍ତି ଏସଆରସି।
ବାତ୍ୟା ସମୟରେ ଘରୁ ବାହାରନ୍ତୁ ନାହିଁ। 200 ଗର୍ଭବତୀ ସ୍ଥାନାନ୍ତର ହେଲେଣି। ବାକି ବି ହେବେ। ପାହାଡ଼ରେ ଥିବା ଲୋକଙ୍କୁ ତଳକୁ ଆସିବାକୁ କୁହାଗଲାଣି। କଚା ଘର ଥିବା ଲୋକ ନିକଟ ଆଶ୍ରୟସ୍ଥଳୀ ବା ସ୍କୁଲକୁ ଆସିବାକୁ କୁହାଯାଉଛି। ୨୪ ଘଣ୍ଟିଆ ହେଲ୍ପଲାଇନ ଜାରି ହୋଇଛି। କଣ୍ଟ୍ରୋଲ ରୁମ ଖୋଲା ଅଛି. ସ୍ଥାନାନ୍ତର ପ୍ରକ୍ରିୟା ଆରମ୍ଭ ହେଲାଣି. ନିଜ ଜିନିଷ ସୁରକ୍ଷିତ ରଖିବାକୁ ଲୋକ କାମ କରୁଛନ୍ତି। ସମ୍ବେଦନଶୀଳ ଓ ପାଣି ଘେରରେ ରହିବା ଆଶଙ୍କା ଥିବା ଲୋକ ରିଲିଫ ସେଣ୍ଟରକୁ ଆସିବାକୁ କୁହାଯାଇଛି। ବାତ୍ୟା ସମୟରେ 60-90 କିଲୋମିଟର ବେଗରେ ବହିବ। 8 ଜିଲ୍ଲାରେ 200 ରିଲିଫ ସେଣ୍ଟର କରାଯାଇଛି। ସ୍କୁଲକୁ ବି ଆଶ୍ରୟ ସ୍ଥଳୀ ପାଇଁ ବ୍ୟବହାର କରାଯିବ। ଏହି 8 ଜିଲ୍ଲାରେ 28, 29, 30 ଯାଏଁ ସ୍କୁଲ ଓ ଅଙ୍ଗନବାଡି ବନ୍ଦ ରଖାଯାଇଛି. ଅଙ୍ଗନବାଡି ହିତାଧିକାରୀଙ୍କ ଘରକୁ ଶୁଖିଲା ଖାଦ୍ୟ ପହଞ୍ଚାଇ ଦିଆଯିବ। ସହରରେ ଯେଉଁଠି ପାଣି ପଶିବା ଆଶଙ୍କା ରହିଛି, ସେଠି ପମ୍ପ ଜରିଆରେ ନିଷ୍କାସନ ଲାଗି କୁହାଯାଇଛି। ରାସନ, ଗୋଖାଦ୍ୟ ଓ ପଶୁ ଖାଦ୍ୟ ପର୍ଯ୍ୟାପ୍ତ ମହଜୁଦ ଅଛି। ପାୱାର ବ୍ୟାକଅପ୍ ବ୍ୟବସ୍ଥା ହୋଇଛି।
ICUରେ ଶ୍ରେୟସ ଆୟର, ହସ୍ପିଟାଲରେ ରହିପାରନ୍ତି ୫ରୁ ୬ ଦିନ
ଭାରତୀୟ ଦିନିକିଆ କ୍ରିକେଟ୍ ଟିମର ଉପ-ଅଧିନାୟକ ଶ୍ରେୟସ ଆୟରଙ୍କୁ ସିଡନୀର ଏକ ହସ୍ପିଟାଲରେ ଭର୍ତ୍ତି କରାଯାଇଛି। ତାଙ୍କୁ ICUରେ ରଖାଯାଇଛି। ମିଳିଥିବା ସୂଚନା ଅନୁଯାୟୀ ଆୟରଙ୍କୁ ଆନ୍ତରିକ ରକ୍ତସ୍ରାବର ସମସ୍ୟା ରହିଛି। ଏହି କାରଣରୁ ସତର୍କତା ସ୍ୱରୂପ ହସ୍ପିଟାଲର ICUରେ ରଖାଯାଇଛି। ତାଙ୍କୁ ୫ରୁ ୭ ଦିନ ପର୍ଯ୍ୟନ୍ତ ହସ୍ପିଟାଲରେ ରହିବାକୁ ପଡ଼ିପାରେ।
ଶ୍ରେୟସ ଆୟରଙ୍କୁ ସିଡନୀରେ ଖେଳାଯାଇଥିବା ଓ୍ୱାନଡେ ସିରିଜର ତୃତୀୟ ତଥା ଅନ୍ତିମ ମ୍ୟାଚ୍ ସମୟରେ ପଞ୍ଜରା ହାଡ଼ରେ ଆଘାତ ଲାଗିଥିଲା। ଏହି ଆଘାତ ଅଷ୍ଟ୍ରେଲିଆ ଇନିଂସର ୩୪ତମ ଓଭରରେ ହର୍ଷିତ ରାଣାଙ୍କ ବଲରେ ଆଲେକ୍ସ କେରୀଙ୍କ କ୍ୟାଚ୍ ନେବା ପ୍ରୟାସରେ ଲାଗିଥିଲା। ବ୍ୟାକୱାର୍ଡ ପଏଣ୍ଟରେ ଥିବା ଶ୍ରେୟସ ଆୟର ପଛକୁ ଦୌଡ଼ି ସେହି କ୍ୟାଚ୍ ଧରିଥିଲେ। କିନ୍ତୁ ନିଜକୁ ଆଘାତରୁ ବଞ୍ଚାଇ ପାରି ନ ଥିଲେ।
ଆଘାତ ଯୋଗୁଁ ତାଙ୍କ ଅବସ୍ଥା ଖରାପ ଥିଲା। ମାଟି ଉପରେ ସେ ନିଜର ପେଟ ଓ ଛାତିକୁ ଚାପି ଯନ୍ତ୍ରଣାରେ ଚିତ୍କାର କରୁଥିବାର ଦେଖାଯାଇଥିଲା, ଯାହାପରେ ମେଡିକାଲ ଟିମ୍ ପଡିଆ ବାହାରକୁ ନେଇଥିଲେ। ଆଘାତର ଗମ୍ଭୀରତାକୁ ଦେଖି ସେମାନଙ୍କୁ ସିଡନୀର ହସ୍ପିଟାଲରେ ଭର୍ତ୍ତି କରାଯାଇଛି।
ହସ୍ପିଟାଲରେ ଏକ ସପ୍ତାହ ରହିବାକୁ ପଡ଼ିପାରେ ।
ଶ୍ରେୟସ ଆୟର, ଅଷ୍ଟ୍ରେଲିଆ ବିପକ୍ଷ T20 ସିରିଜ୍ରେ ଭାରତୀୟ ଦଳର ଅଂଶ ନୁହନ୍ତି। ତଥାପି ଅଷ୍ଟ୍ରେଲିଆରେ ତାଙ୍କ ଚିକିତ୍ସା ପାଇଁ ସେଠାରେ ରଖାଯାଇଛି। ରିପୋର୍ଟ ଅନୁଯାୟୀ ଆୟରଙ୍କୁ ICUରେ ରଖିବାର ନିଷ୍ପତ୍ତି ଆନ୍ତରିକ ରକ୍ତସ୍ରାବ ଯୋଗୁଁ ସଂକ୍ରମଣର ଭୟ ଯୋଗୁଁ ନିଆଯାଇଛି। ଏବେ ସେ ହସ୍ପିଟାଲରେ କେତେ ଦିନ ଭର୍ତ୍ତି ରହିବେ, ଏହା ସେମାନଙ୍କ ଆରୋଗ୍ୟ ଉପରେ ନିର୍ଭର କରିବ। ତଥାପି, ଏପରି ଆଶା କରାଯାଉଛି ଯେ ପ୍ରାୟ ଏକ ସପ୍ତାହ ହସ୍ପିଟାଲରେ ରହିବାକୁ ପଡ଼ିବ।
ଶ୍ରେୟସ ଆୟରଙ୍କ ଆଘାତ ଉପରେ BCCIର ଅପଡେଟ୍
BCCI ସଚିବ ଦେବଜୀତ ସାଇକିଆ ଶ୍ରେୟସ ଆୟରଙ୍କ ଆଘାତ ଉପରେ ଅପଡେଟ୍ ଦେଇ କହିଛନ୍ତି ଯେ ତାଙ୍କର ଚିକିତ୍ସା ଚାଲିଛି ଏବଂ ଅବସ୍ଥା ସ୍ଥିର ଅଛି। ଦେବଜୀତ ସାଇକିଆ କହିଛନ୍ତି ଯେ ଆୟର ଭଲ ଭାବରେ ଆରୋଗ୍ୟ ଲାଭ କରୁଛନ୍ତି। BCCIର ମେଡିକାଲ ଟିମ୍ ସିଡନୀର ବିଶେଷଜ୍ଞ ଡାକ୍ତରମାନଙ୍କ ସହ ନିରନ୍ତର ଯୋଗାଯୋଗରେ ଅଛି ଏବଂ ତାଙ୍କ ଉପରେ ନଜର ରଖିଛନ୍ତି।
ବିହାର ନିର୍ବାଚନ ୨୦୨୫: ତେଜ ପ୍ରତାପ ସାନ ଭାଇ ତେଜସ୍ୱୀଙ୍କୁ କଲେ ଟାର୍ଗେଟ୍, କହିଲେ ମୁଖ୍ୟମନ୍ତ୍ରୀ କିଏ ହେବ ରାଜ୍ୟବାସୀ ନିର୍ଣ୍ଣୟ କରିବେ
ଲାଲୁ ପ୍ରସାଦଙ୍କ ପୁଅ ଏବଂ ମହୁଆ ବିଧାନସଭା ଆସନରୁ ପ୍ରାର୍ଥୀ ତେଜ ପ୍ରତାପ ଯାଦବ ନିଜ ସାନ ଭାଇ ଏବଂ ମହାମେଣ୍ଟର ମୁଖ୍ୟମନ୍ତ୍ରୀ ପଦ ପ୍ରାର୍ଥୀ ତେଜସ୍ୱୀ ଯାଦବ ଉପରେ ତୀବ୍ର ଆକ୍ରମଣ କରିଛନ୍ତି। ସେ ଜୋର ଦେଇ କହିଛନ୍ତି ଯେ ବିହାରରେ ମୁଖ୍ୟମନ୍ତ୍ରୀ ଏବଂ ଉପ-ମୁଖ୍ୟମନ୍ତ୍ରୀ କିଏ ହେବେ, ଏହା ଜନତା ଉପରେ ନିର୍ଭର କରେ। ଯାହାଙ୍କ ହାତରେ ଶକ୍ତି ରହିବ, ଜନସମର୍ଥନ ଯାହାକୁ ମିଳିବ, ସେ ମୁଖ୍ୟମନ୍ତ୍ରୀ ହେବେ।
ତେଜ ପ୍ରତାପ ଯାଦବଙ୍କ ବାଇକରେ ନିର୍ବାଚନ ପ୍ରଚାର
ତେଜ ପ୍ରତାପ ଯାଦବ ନିଜ ରାଜନୈତିକ କର୍ମଭୂମି ମହୁଆରେ ବାଇକରେ ନିର୍ବାଚନ ପ୍ରଚାର କରୁଛନ୍ତି। ସେ କହିଛନ୍ତି ଯେ ମହୁଆରେ ରାସ୍ତା ନିର୍ମାଣ ହୋଇନାହିଁ। ସ୍ଥାନୀୟ ଲୋକମାନେ ଅତ୍ୟନ୍ତ ଅସୁବିଧାରେ ଅଛନ୍ତି। ତେଜ ପ୍ରତାପ କହିଛନ୍ତି, “ଯେଉଁଭଳି ଆମେ ମହୁଆରେ ମେଡିକାଲ କଲେଜ ନିର୍ମାଣ କରାଇଛୁ। ସେହିଭଳି ସେ ଏଠାରେ ରାସ୍ତା ନିର୍ମାଣ କରାଇବୁ। ଜନତାଙ୍କୁ ଦିଆଯାଇଥିବା ପ୍ରତିଶ୍ରୁତି ପୂରଣ କରିବେ।”
ଯାହାଙ୍କ ହାତରେ ଶକ୍ତି, ସେ ମୁଖ୍ୟମନ୍ତ୍ରୀ ହେବେ
ମହାମେଣ୍ଟର ମୁଖ୍ୟମନ୍ତ୍ରୀ ପ୍ରାର୍ଥୀ ତେଜସ୍ୱୀ ଯାଦବ ଏବଂ ଉପମୁଖ୍ୟମନ୍ତ୍ରୀ ପ୍ରାର୍ଥୀ ମୁକେଶ ସାହନୀଙ୍କ ଉପରେ ତେଜ ପ୍ରତାପ ଯାଦବ ଆକ୍ରମଣ କରି କହିଛନ୍ତି ଯେ ଜନତା ଅସୁବିଧାରେ ଅଛନ୍ତି। ଯୁବକମାନଙ୍କୁ ରୋଜଗାର ଦରକାର। ଏଠାରେ ମୁଖ୍ୟମନ୍ତ୍ରୀ ଏବଂ ଉପ-ମୁଖ୍ୟମନ୍ତ୍ରୀ କିଏ ହେବେ, ଏହା ଜନତା ଉପରେ ନିର୍ଭର କରେ। ଯାହାଙ୍କ ହାତରେ ଶକ୍ତି ରହିବ, ଜନସମର୍ଥନ ଯାହାକୁ ମିଳିବ, ସେ ମୁଖ୍ୟମନ୍ତ୍ରୀ ହେବେ।”
ଆରଜେଡି ପ୍ରାର୍ଥୀଙ୍କ ଉପରେ ତେଜ ପ୍ରତାପଙ୍କ ଆକ୍ରମଣ
ସେ ଆରଜେଡିର ବର୍ତ୍ତମାନର ବିଧାୟକ ଏବଂ ପ୍ରାର୍ଥୀ ଉପରେ ମଧ୍ୟ ଆକ୍ରମଣ କରିଛନ୍ତି। ତେଜ ପ୍ରତାପ କହିଛନ୍ତି ଯେ ସେ ମହୁଆରେ କୌଣସି କାମ କରିନାହାନ୍ତି। ବିଧାୟକ କେବଳ ଜନତାଙ୍କୁ ଠକିବାର କାମ କରିଛନ୍ତି। ତେଜ ପ୍ରତାପ ଯାଦବ ଏହା ମଧ୍ୟ କହିଛନ୍ତି ଯେ ତେଜସ୍ୱୀ ଯାଦବ ନକଲି ଲୋକମାନଙ୍କୁ ହିଁ ଟିକଟ ଦେଉଛନ୍ତି।
ମା-ବାପାଙ୍କ ଆଶୀର୍ବାଦ ଅଛି
ମହୁଆରୁ ଯଦି ଜିତନ୍ତି ତେବେ ମାତା-ପିତାଙ୍କଠାରୁ ଆଶୀର୍ବାଦ ନେବାକୁ ଯିବେ କି? ଏହା ଉପରେ ତେଜ ପ୍ରତାପ ଯାଦବ କହିଛନ୍ତି, “ମା’-ବାପାଙ୍କ ଆଶୀର୍ବାଦ ସବୁବେଳେ ଆମ ସହିତ ଅଛି ଏବଂ ମହୁଆର ଜନତାଙ୍କ ଆଶୀର୍ବାଦ ମଧ୍ୟ ଆମ ସହିତ ଅଛି।”
ଘଣ୍ଟା ପ୍ରତି ୧୫ କିମି ବେଗରେ ମାଡ଼ିଆସୁଛି ବାତ୍ୟା ମୋନ୍ଥା : କାକିନାଡ଼ା ଠାରୁ ୬୨୦କିମି, ଗୋପାଳପୁର ଠାରୁ ୭୯୦ କିମି ଦୂରରେ ମୋନ୍ଥା
ନନ୍ଦିଘୋଷ ବ୍ୟୁରୋ : ବାତ୍ୟାରେ ପରିଣତ ହୋଇଛି ବଙ୍ଗୋପ ସାଗର ଲଘୁଚାପ। ଗଭୀର ଅବପାତରୁ ତାହା ବାତ୍ୟାରେ ପରିଣତ ହୋଇଥିବା ପାଣିପାଗ ବିଭାଗର ସଦ୍ୟ ବୁଲେଟିନରୁ ଜଣାପଡ଼ିଛି। ଦକ୍ଷିଣ ପୂର୍ବ ବଙ୍ଗୋପ ସାଗର ଉପରେ ଏବେ କେନ୍ଦ୍ରୀଭୂତ ହୋଇ ରହିଛି। ବିଗତ ୩ ଘଣ୍ଟାରେ ଘଣ୍ଟାପ୍ରତି ୧୫ କିମି ବେଗରେ ଗତିକରିବା ସହ ବର୍ତ୍ତମାନ କାକିନାଡ଼ା ଠାରୁ ୬୨୦କିମି, ବିଶାଖାପାଟନମ ଠାରୁ ୬୫୦ କିମି ଓ ଗୋପାଳପୁର ଠାରୁ ୭୯୦ କିମି ଦୂରରେ ମୋନ୍ଥା । ଆଗାମୀ ୧୨ ଘଣ୍ଟା ମଧ୍ୟରେ ଏହା ପଶ୍ଚିମ ଉତ୍ତର ପଶ୍ଚିମ ଦିଗରେ ଗତି କରିବା ସମ୍ଭାବନା ରହିଛି। ଏହାପରେ ପରବର୍ତ୍ତୀ ୧୨ ଘଣ୍ଟାରେ ପଶ୍ଚିମ ଉତ୍ତର ଦିଗରେ ଗତି କରିବା ନେଇ ପୂର୍ବାନୁମାନ କରିଛି ପାଣିପାଗ ବିଭାଗ। ଆସନ୍ତାକାଲି ସକାଳ ସୁଦ୍ଧା ଏକ ଭୀଷଣ ଘୂର୍ଣ୍ଣିଝଡ଼ରେ ପରିଣତ ହୋଇପାରେ। ୨୮ ଅକ୍ଟୋବର ରାତି ଏବଂ ୨୯ ଅକ୍ଟୋବର ମଧ୍ୟରେ ଆନ୍ଧ୍ର ଉପକୂଳ ଦେଇ ଅତିକ୍ରମ କରିବ। ଆନ୍ଧ୍ରର ମଛଲିପଟ୍ଟନମ୍ ଏବଂ କଳିଙ୍ଗପଟ୍ଟନମ୍ ମଧ୍ୟରେ ଆନ୍ଧ୍ର ଉପକୂଳ ଅତିକ୍ରମ କରିବା ସମ୍ଭାବନା ରହିଛି। ଏହି ସମୟରେ ପବନର ବେଗ ଘଣ୍ଟାପ୍ରତି ୯୦ରୁ ୧୦୦ କିଲୋମିଟର ରହିପାରେ। ଝଟକା ପବନର ବେଗ ଘଣ୍ଟା ପ୍ରତି ରହିବ ୧୧୦ କିଲୋମିଟର। ବାତ୍ୟା ପ୍ରଭାବରେ ଓଡ଼ିଶାରେ ପ୍ରବଳ ବର୍ଷା ହେବା ସମ୍ଭାବନା ରହିଛି। ଆନ୍ଧ୍ର ଉପରେ ବାତ୍ୟାର ପ୍ରଭାବ ଅଧିକ ରହିବ। ଏହାର ପ୍ରଭାବରେ ଆଭ୍ୟନ୍ତରୀଣ ଓଡ଼ିଶାର ବିଭିନ୍ନ ଜିଲ୍ଲାରେ ହାଲୁକାରୁ ମଧ୍ୟମ ସହ କିଛି ସ୍ଥାନରେ ପ୍ରବଳ ବର୍ଷା ସମ୍ଭାବନା ରହିଛି। ଆସନ୍ତା ୩୧ ତାରିଖ ପର୍ଯ୍ୟନ୍ତ ବର୍ଷା ସମ୍ଭାବନା ରହିଛି। ରାଜ୍ୟର ୮ ଜିଲ୍ଲାକୁ ଅରେଂଜ ଆଲର୍ଟ ଜାରି କରାଯାଇଛି। ଏହି ସବୁ ଜିଲ୍ଲା ଗୁଡିକ ହେଲା ମାଲାକାନଗିରି, କୋରାପୁଟ, ନବରଙ୍ଗପୁର, କଳାହାଣ୍ଡି, ରାୟଗଡା, ଗଜପତି, ଗଞ୍ଜାମ, କନ୍ଧମାଳ। ଆଜଚି ପାଇଁ ୯ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି। ସେହିପରି ୨୮ ତାରିଖ ଦିନ ପ୍ରବଳରୁ ଅତିପ୍ରବଳ ବର୍ଷା ନେଇ ଆଲର୍ଟ ଜାରି ହୋଇଛି। ମାଲକାନଗିରି, କୋରାପୁଟ, ରାୟଗଡ଼ା, ଗଜପତି ଓ ଗଂଜାମ ଜିଲ୍ଲାକୁ ରେଡ୍ ୱାର୍ଣ୍ଣିଂ ଜାରି କରାଯାଇଛି। ୬ ଜିଲ୍ଲା ନବରଙ୍ଗପୁର, କଳାହାଣ୍ଡି, କନ୍ଧମାଳ, ନୟାଗଡ଼, ଖଓର୍ଦ୍ଧା, ପୁରୀକୁ ଅରେଂଜ ଆଲର୍ଟ ଜାରି କରାଯାଇଛି। ୧୭ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି। ସେହିପରି ୨୯ରେ ବି ରେଡ ଆଲର୍ଟରେ ରହିଛି ୫ ଜିଲ୍ଲା। ସମସ୍ତ ବନ୍ଦରଗୁଡିକୁ ଡିସି-୧ ସଂକେତ ଜାରି କରାଯାଇଛି। ଆଜିଠାରୁ ୨୯ ଯାଏ ସମୁଦ୍ର ଯିବାକୁ ମତ୍ସ୍ୟଜୀବୀଙ୍କୁ ବାରଣ କରାଯାଇଛି।