ଯାଜପୁର: ଯାଜପୁର ଜିଲ୍ଲା ବୈରି ଥାନା ଅନ୍ତର୍ଗତ କାଇମାଟିଆ ଗ୍ରାମରେ ଅଗ୍ନିକାଣ୍ଡ । ଅଗ୍ନିକାଣ୍ଡରେ ଜଳି ଗଲା ୪ ବଖରା ଚାଳ ଘର । ଫଳରେ ଘରେ ଥିବା ଆସବାବପତ୍ର, ଚାଉଳ ଓ ଲକ୍ଷାଧିକ ଟଙ୍କାର ଜିନିଷପତ୍ର ସମ୍ପୂର୍ଣ ଜଳି ଯାଇଛି । ଖବର ପାଇ ଚଣ୍ଡିଖୋଲ ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛି । ବିଦୁତ ସର୍ଟ ସର୍କିଟରୁ ନିଆଁ ଲାଗିଥିବା ଜଣାପଡିଛି ।
ଆସନ୍ତାକାଲି ହେବ ଏଏସଓ ଲିଖିତ ପରୀକ୍ଷା, ସକାଳ ୯ଟାରୁ ୩ଟି ପର୍ଯ୍ୟାୟରେ ହେବ ପରୀକ୍ଷା
ଭୁବନେଶ୍ୱର: ଆସନ୍ତାକାଲି ହେବ ଏଏସଓ ଲିଖିତ ପରୀକ୍ଷା । ରାଜ୍ୟର ୩୩ଟି ଜୋନର ୪୮୨ ସେଣ୍ଟରରେ ପରୀକ୍ଷା ଦେବେ ୨ ଲକ୍ଷ ୬ ହଜାରରୁ ଅଧିକ ପରୀକ୍ଷାର୍ଥୀ । ଆସନ୍ତାକାଲି ସକାଳ ୯ଟାରୁ ୩ଟି ପର୍ଯ୍ୟାୟରେ ପରୀକ୍ଷା କରାଯିବ । ପ୍ରଥମ ପର୍ଯ୍ୟାୟରେ ସାଧାରଣ ଜ୍ଞାନ, ଦ୍ୱିତୀୟ ପର୍ଯ୍ୟାୟରେ ମେଣ୍ଟାଲ ଆବିଲିଟି ଓ ରିଜନିଂ ଏବଂ ତୃତୀୟ ପର୍ଯ୍ୟାୟରେ ଭାଷା ଓଡ଼ିଆ ଆଉ ଇଂରାଜୀ ବିଷୟ ରହିଛି ।
ସମସ୍ତ ପରୀକ୍ଷାରେ ଦିବ୍ୟାଙ୍ଗ ଛାତ୍ରଛାତ୍ରୀଙ୍କୁ ଅତିରିକ୍ତ ୩୦ ମିନିଟ୍ ସମୟ ଦିଆଯିବ । ୭୯୬ ଏଏସଓ ପଦବୀ ପୂରଣ ପାଇଁ ନିଯୁକ୍ତି ପ୍ରକ୍ରିୟା କରାଯାଉଛି । ଏଥିପାଇଁ ଲିଖିତ ପରୀକ୍ଷା ଗତ ୨୧ ତାରିଖରେ ହେବାର ଥିଲା । ହେଲେ ରାଜ୍ୟରେ ବନ୍ୟା ସ୍ଥିତି ପାଇଁ ଏହାକୁ ଆସନ୍ତାକାଲିକୁ ଘୁଞ୍ଚାଯାଇଥିଲା । ଛାତ୍ରଛାତ୍ରୀମାନେ ପୂର୍ବ ନିର୍ଦ୍ଧାରିତ ତାରିଖ ପାଇଁ ପାଇଥିବା ଆଡମିଟ୍ କାର୍ଡରେ ଆସନ୍ତାକାଲି ପରୀକ୍ଷା ଦେଇପାରିବେ ।
ବିପର୍ଯ୍ୟୟର ପୂର୍ବ ପ୍ରସ୍ତୁତି, ଗଞ୍ଜାମ ଜିଲ୍ଲାରେ ବିଶ୍ୱ ବ୍ୟାଙ୍କ ପ୍ରତିନିଧି ଦଳ
ଗଞ୍ଜାମ: ବିପର୍ଯ୍ୟୟର ପୂର୍ବ ପ୍ରସ୍ତୁତି, ପରିଚାଳନାକୁ ନେଇ ପୁରା ବିଶ୍ୱରେ ପ୍ରଶଂସିତ ହୋଇଛି ଓଡ଼ିଶା । ବିପର୍ଯ୍ୟୟ ପରିଚାଳନା ପାଇଁ ଗଞ୍ଜାମ ଜିଲ୍ଲାରେ ହୋଇଥିବା ବିଭିନ୍ନ କାର୍ଯ୍ୟକୁ ବୁଲି ଦେଖିଛନ୍ତି ବିଶ୍ୱ ବ୍ୟାଙ୍କ ପ୍ରତିନିଧି ଦଳ। ଗତକାଲି ୱାଲର୍ଡ ବ୍ୟାଙ୍କର ସାମାଜିକ ସୁରକ୍ଷା ଓ ପରିବେଶର ଏକ ୬ ଜଣିଆ ଟିମ୍ ଗଞ୍ଜାମରେ ପହଞ୍ଚିଥିଲା । ଏହି ଟିମ ପ୍ରଥମେ ଛତ୍ରପୁର ବ୍ଲକର କଣମଣାସ୍ଥିତ ବାତ୍ୟା ଆଶ୍ରୟସ୍ଥଳ ବୁଲି ଦେଖିଥିଲେ । ସେଠାରେ ଥିବା ପଞ୍ଚାୟତ ପ୍ରତିନିଧି, ମହିଳା ସଂଘ, ବାତ୍ୟା ଆଶ୍ରୟସ୍ଥଳୀ କମିଟିର ସଭ୍ୟମାନଙ୍କ ସହ ଗ୍ରାମ୍ୟ ବିପର୍ଯ୍ୟୟ ପରିଚାଳନା ଯୋଜନା ସମ୍ପର୍କରେ ପଚାରି ବୁଝିଥିଲେ । ପରେ ଆର୍ଯ୍ୟପଲ୍ଲୀ ସ୍ଥିତ ମୋ ସେବା କେନ୍ଦ୍ର ପରିଦର୍ଶନ କରିଥିଲେ। ଟିମ୍ ମୁଖ୍ୟ ଅନେନ୍ଦୁ ଭଟ୍ଟାଚାର୍ଯ୍ୟଙ୍କ ନେତୃତ୍ୱରେ ବିଶ୍ୱ ବ୍ୟାଙ୍କ ଟିମ୍ ବିଭିନ୍ନ କେନ୍ଦ୍ର ପରିଦର୍ଶନ କରିଥିଲେ।
ଶ୍ୱେତା ସୁଇସାଇଡ୍ ସସପେନ୍ସର ଖୋଲୁଛି ଗୁମର, ସାମ୍ନାକୁ ଆସିଲା ହ୍ୱାଟସାପ୍ ଚାଟ୍
ଭୁବନେଶ୍ୱର: ଶ୍ୱେତା ସୁଇସାଇଡ୍ ସସପେନ୍ସର ଖୋଲୁଛି ଗୋଟିଏ ପରେ ଗୋଟିଏ ଗୁମର । ଏବେ ସାମ୍ନାକୁ ଆସିଛି ଶ୍ୱେତା ଏବଂ ସୌମ୍ୟଜିତଙ୍କ ମାଆଙ୍କ ସହ ହୋଇଥିବା ହ୍ୱାଟସାପ୍ ଚାଟ । ହ୍ୱାଟସାପ୍ ଚାଟ ମେସେଜରେ ଲଭ କ୍ଳାଇମାକ୍ସ ପରର କଥା । ଚାଟର କିଛି ସ୍କ୍ରିନ ସଟ ଏବେ ଭାଇରାଲ ହୋଇଛି । ବ୍ରେକଅପ୍ ପରେ ସୌମ୍ୟ ନେଇଥିବା ଟଙ୍କା ଫେରାଇବାକୁ ତାଙ୍କ ମାଆଙ୍କୁ ମେସେଜ କରିଥିଲେ ଶ୍ୱେତା । ଶ୍ୱେତା ଟଙ୍କାରେ ଅଏସ କରୁଥିଲେ ସୌମ୍ୟଜିତ । ଚାକିରୀ ଛାଡିବା ପରେ ଶ୍ଵେତାଙ୍କ ଠାରୁ ବାରମ୍ବାର ଟଙ୍କା ନେଇଥିଲେ ସୌମ୍ୟଜିତ । ଶ୍ୱେତାଙ୍କ ଟଙ୍କାରେ ସୌମ୍ୟଜିତ ମୋବାଇଲ ମଧ୍ୟ କିଣିଥିବା କଥା ମେସେଜରେ ଲେଖା ଅଛି । ବ୍ରେକଅପ୍ ପରେ ଏହି ଟଙ୍କା ଫେରାଇବାକୁ ସୌମ୍ୟଜିତଙ୍କ ମାଆଙ୍କୁ ହ୍ୱାଟସାପ୍ ମେସେଜ କରିଛନ୍ତି ଶ୍ୱେତା । ଏପରିକି ପୁଅକୁ ଟଙ୍କା ମାଗିଲେ ସେ ଫଟୋ ଭାଇରାଲ କରିବାକୁ ଧମକ ଦେଇଥିବା ମଧ୍ୟ ସୌମ୍ୟଙ୍କ ମାଆଙ୍କୁ ଜଣାଇଛନ୍ତି ଶ୍ୱେତା । ଅନ୍ୟପଟେ ଝିଅର ଆତ୍ମହତ୍ୟା ପାଇଁ ସୌମ୍ୟ ହିଁ ଦାୟୀ ଓ ଝିଅକୁ ନ୍ୟାୟ ପ୍ରଦାନ ପାଇଁ ଗତକାଲି ଡିସିପିଙ୍କ ଦ୍ୱାରସ୍ଥ ହୋଇଥିଲେ ଶ୍ୱେତାଙ୍କ ପରିବାର ଲୋକ। ଏହାସହ ଶ୍ୱେତାଙ୍କ ୪ ସାଙ୍ଗକୁ ତଦନ୍ତ ଭୁକ୍ତ କରିବା ପାଇଁ ଡିସିପିଙ୍କୁ ନିବେଦନ କରିଥିଲେ ପରିବାର ଲୋକ। ସେପଟେ ଗିରଫଦାରୀ ଏଡ଼ାଇବା ପାଇଁ ହାଇକୋର୍ଟରେ ଆଗୁଆ ଜାମିନ ଆବେଦନ କଲେ ପୁରୁଷ ବନ୍ଧୁ ସୌମ୍ୟଜିତ୍ ମହାପାତ୍ର ।
ଭାରତ ବିରୋଧରେ ପାକିସ୍ତାନର ମେଗାପ୍ଲାନ, ଏଲଓସି ନିକଟରେ ପ୍ରତିଷ୍ଠା କଲାଣି ଟେରର କ୍ୟାମ୍ପ
ଜମ୍ମୁ: ଭାରତ ପାକ୍ ସୀମା ବା ଏଲଓସି ନିକଟରେ ଭାରତ ବିରୋଧରେ ପାକିସ୍ତାନର ମେଗାପ୍ଲାନ । ନିଜ ଦେଶରେ ଥିବା ଅନେକ ଆତଙ୍କବାଦ ଶିବିର ଓ ଲଞ୍ଚ ପ୍ୟାଡଗୁଡିକୁ ଏଲଓସି ନିକଟକୁ ପଠାଇବାରେ ଲାଗିଛି ପାକିସ୍ତାନ । ସୀମାରୁ ଅଳ୍ପ କିଛି ଦୂରରେ ଏହି କ୍ୟାମ୍ପ ଓ ଲଞ୍ଚ ପ୍ୟାଡ ପ୍ରତିଷ୍ଠା କରାଯାଇଛି ବୋଲି ଗୁଇନ୍ଦା ସୂତ୍ରରୁ ପ୍ରକାଶ । ଭାରତ ଭିତରକୁ ଅନୁପ୍ରବେଶ ବଢ଼ାଇବା ଲକ୍ଷ୍ୟରେ ପାକିସ୍ତାନ ଏହି ଯୋଜନା କରିଛି ।
ଆତଙ୍କବାଦୀ ସଂଗଠନ ଲସ୍କର-ଏ-ତଏବା, ଜୈସ-ଏ-ମହମ୍ମଦ ଓ ହିଜବୁଲ ମୁଜାହିଦ୍ଦିନ ସଂଗଠନର ବିଭିନ୍ନ ଶିବିର ଏଲଓସିରେ ପ୍ରତିଷ୍ଠା ହୋଇଥିବା ସୂଚନା ମିଳିଛି । ଗୁଇନ୍ଦା ସୂତ୍ରରୁ କୁହାଯାଇଛି ଭାରତରେ ପ୍ରବେଶ କରିବା ଲାଗି ବହୁ ଏଣ୍ଟ୍ରି ପଏଣ୍ଟ ତିଆରି କରାଯାଇଛି । ଅନୁପ୍ରବେଶ କରିବାକୁ ଥିବା ଆତଙ୍କବାଦୀଙ୍କ ମଧ୍ୟରେ ରହିଛନ୍ତି ଆଇଏସଆଇ ତାଲିମପ୍ରାପ୍ତ ଆତଙ୍କବାଦୀ । ଏପରିକି ଭାରତ ଭିତରେ ପାକିସ୍ତାନ ୩୦୦ରୁ ଅଧିକ କ୍ଷୁଦ୍ର ଅସ୍ତ୍ରଶସ୍ତ୍ର ଡ୍ରୋନ ଜରିଆରେ ଶ୍ରୀନଗର ଆଖପାଖରେ ପକାଇଥିବା ସୂଚନା ମିଳିଛି। ବର୍ତ୍ତମାନ ଶ୍ରୀନଗରରେ ଲସକର ଓ ଜୈସର ୫୦ ବିଦେଶୀ ଆତଙ୍କବାଦୀ ପ୍ରବେଶ କରିସାରିଥିବା କୁହାଯାଇଛି ।
ଆଜି ଅବସର ନେବେ ଜଷ୍ଟିସ ଏନଭି ରମଣା, ନୂଆ ସିଜେଆଇ ଭାବେ ଦାୟିତ୍ୱ ନେବେ ଜଷ୍ଟିସ ଉଦୟ ଉମେଶ ଲଳିତ
ନୂଆଦିଲ୍ଲୀ: ଆଜି ଅବସର ନେବେ ସୁପ୍ରିମକୋର୍ଟ ପ୍ରଧାନବିଚାରପତି ଜଷ୍ଟିସ ଏନଭି ରମଣା । ଦେଶରେ ପ୍ରଗତିଶୀଳ ଆଇନ ବ୍ୟବସ୍ଥା କ୍ଷେତ୍ରରେ ବହୁ ଗୁରୁତ୍ୱପୂର୍ଣ୍ଣ ମତାମତ ଦେବା ସହ ସଂସ୍କାରମୂଳକ ପଦକ୍ଷେପ ନେଇ ଚର୍ଚ୍ଚାରେ ଅଛନ୍ତି ରମଣା। ଗତକାଲି ଗୁଜରାଟ ଗଣଦୁଷ୍କର୍ମ ପୀଡ଼ିତା ବିଲକିସ ବାନୋଙ୍କ ଦୋଷୀଙ୍କୁ ମୁକ୍ତି ଓ ପେଗାସସ୍ ମାମଲାର ଶୁଣାଣି କରିଥିଲେ ରମଣା । ବିଲକିସଙ୍କ ଦୋଷୀଙ୍କ ମୁକ୍ତିକୁ ବିରୋଧ କରି ଦାଏର ପିଟିସନର ଶୁଣାଣି କରି କୋର୍ଟ ଉଭୟ କେନ୍ଦ୍ର ଓ ଗୁଜରାଟ ସରକାରଙ୍କୁ ନୋଟିସ ଜାରି କରିଥିଲେ ।
ଜଷ୍ଟିସ ରମଣାଙ୍କ ଅବସର ପରେ ଆସନ୍ତା କାଲି ଦେଶର ୪୯ତମ ସିଜେଆଇ ଭାବେ ଦାୟିତ୍ୱ ନେବେ ଜଷ୍ଟିସ ଉଦୟ ଉମେଶ ଲଳିତ । ସମ୍ବିଧାନର ଧାରା ୧୨୪ର ଉପଧାରା ୨ ଅନୁସାରେ ଜଷ୍ଟିସ ଲଳିତଙ୍କୁ ରାଷ୍ଟ୍ରପତି ନିଯୁକ୍ତି ଦେଇଥିଲେ । ପୂର୍ବରୁ ଜଷ୍ଟିସ ଲଳିତଙ୍କ ନାମକୁ ସୁପାରିସ କରିଥିଲେ ପ୍ରଧାନ ବିଚାରପତି ଜଷ୍ଟିସ ଏନ ଭି ରମଣା । ଗତ ୨୦୧୪ରେ ଜଷ୍ଟିସ ଲଳିତ ସୁପ୍ରିମକୋର୍ଟ ବିଚାରପତି ଭାବେ ନିଯୁକ୍ତ ହୋଇଥିଲେ । ଜଷ୍ଟିସ ଲଳିତ ହେଉଛନ୍ତି ଦଶର ଦ୍ୱିତୀୟ ସିଜେଆଇ ଯିଏ କି ସିଧାସଳଖ ବାର୍ରୁ ସୁପ୍ରିମକୋର୍ଟର ବିଚାରପତି ଭାବେ ନିଯୁକ୍ତି ପାଇଥିଲେ। ୧୯୫୭ରେ ଜନ୍ମିତ ଜଷ୍ଟିସ ଲଳିତ ବରିଷ୍ଠ ଆଇନଜୀବୀ ସୋଲି ଜେ. ସୋରାବଜୀଙ୍କ ଚାମ୍ବରରେ କାର୍ଯ୍ୟ କରି ଅଭିଜ୍ଞତା ହାସଲ କରିଥିଲେ ।
ନବନିଯୁକ୍ତ ଅଣଶିକ୍ଷକ କର୍ମଚାରୀଙ୍କୁ ନବୀନଙ୍କ ଗୁରୁମନ୍ତ୍ର
ଭୁବନେଶ୍ୱର: ସବୁସ୍ତରରେ ବିକାଶକୁ ଫୋକସ କର । ନବନିଯୁକ୍ତ ଅଣଶିକ୍ଷକ କର୍ମଚାରୀଙ୍କୁ ଏହି ଗୁରୁମନ୍ତ୍ର ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ମାର୍ଗଦର୍ଶକ କାର୍ଯ୍ୟକ୍ରମରେ ନବନିଯୁକ୍ତ କଲେଜ କର୍ମଚାରୀଙ୍କୁ ସ୍ବାଗତ କରିବା ସହିତ ସଂକଳ୍ପର ସହିତ କାମ କରିବାକୁ କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆଜି ଲୋକସେବା ଭବନର କନଭେସନ୍ ହଲରେ ପ୍ରଶିକ୍ଷଣ କାର୍ଯ୍ୟକ୍ରମ ହୋଇଥିଲା । ଏଥିରେ ନୂତନ ଭାବେ ନିଯୁକ୍ତି ପାଇଥିବା ୩୩୪ ଅଣଶିକ୍ଷକ କର୍ମଚାରୀ ତଥା ୨୯୧ଜଣ ବିଜ୍ଞାନଗାର ସହାୟକ, ୨୫ଜଣ କନିଷ୍ଠ ପାଠାଗାର ଆଧିକାରୀ, ୧୮ଜଣ ଶାରୀରିକ ଶିକ୍ଷା ପ୍ରଶିକ୍ଷକ ସାମିଲ ହୋଇଥିଲେ ।
ଉଚ୍ଚ ଶିକ୍ଷା ବିଭାଗରେ ଛାତ୍ରଛାତ୍ରୀଙ୍କୁ ପାଠପଢା ସହିତ ବୌଦ୍ଧିକ ଜ୍ଞାନ, ଶାରୀରିକ ଶିକ୍ଷାକୁ ସମାନ୍ତରାଳ କରିବା ପାଇଁ ପଦକ୍ଷେପ ନିଆଯାଇଛି । ମହାବିଦ୍ୟାଳୟରେ ଶାରୀରିକ ଶିକ୍ଷା ପ୍ରଶିକ୍ଷକ ପଲାଙ୍କୁ ଶିକ୍ଷା ପ୍ରଦାନ କରି ରାଜ୍ୟ ତଥା ଜାତୀୟସ୍ତରରେ କୀଡାବିତ୍ ସୃଷ୍ଟି କରିବାରେ ସହାୟକ ହେବେ । ତେବେ ନୂତନ ଭାବେ ନିଯୁକ୍ତି ପାଇଥିବା ଏହି ଅଣଶିକ୍ଷକ କର୍ମଚାରୀଙ୍କୁ ରାଜ୍ୟର ବିଭିନ୍ନ ମହାବିଦ୍ୟାଳୟରେ ନିଯୁକ୍ତି ଦିଆଯିବ ।
ପୂର୍ବରୁ ସରକାରୀ ଓ ଅନୁପ୍ରାପ୍ତ ମହାବିଦ୍ୟାଳୟରେ ଶିକ୍ଷକ ଓ ଛାତ୍ର ଅନୁପାତକୁ ସମାନ କରିବା ପାଇଁ ପ୍ରଫେସର, ଆସୋସିଏଟ୍ ପ୍ରଫେସର, ଆସିଷ୍ଟାଣ୍ଟ ପ୍ରଫେସର, ଜୁନିୟର ଲେକଚରଙ୍କୁ ନିଯୁକ୍ତି ଦିଆଯାଇଛି । ସରକାରୀ ଓ ଅନୁଦାନପ୍ରାପ୍ତ ମହାବିଦ୍ୟାଳୟରେ ଭିତ୍ତିଭୂମିଙ୍କୁ ସୁଦୃଢ କରିବା ପାଇଁ ରାଜ୍ୟ ସରକାର ଏହି ପଦକ୍ଷେପ ନେଇଛନ୍ତି । ଏହି ମାର୍ଗଦର୍ଶକ କାର୍ଯ୍ୟକ୍ରମରେ ଉଚ୍ଚଶିକ୍ଷା ମନ୍ତ୍ରୀ ରୋହିତ୍ ପୂଜାରୀ ସାମିଲ ହୋଇ ରାଜ୍ୟ ସରକାରଙ୍କୁ ପଦକ୍ଷେପକୁ ସ୍ବାଗତ କରିଛନ୍ତି ।
ନରେନ୍ଦ୍ର ପ୍ରସାଦ ଦାସଙ୍କୁ ବାଲ୍ ସାହିତ୍ୟ ପୁରସ୍କାର, ଗାଳ୍ପିକ ଦିଲ୍ଲୀପ ବେହେରାଙ୍କୁ ମିଳିବ ‘ଯୁବ ପୁରସ୍କାର’
ନନ୍ଦିଗୋଷ ବ୍ୟୁରୋ ଘୋଷଣା ହୋଇଛି ଚଳିତବର୍ଷ କେନ୍ଦ୍ର ଏକାଡେମୀ ପୁରସ୍କାର । ବାଲ୍ ସାହିତ୍ୟ ପୁରସ୍କାର ଏବଂ ଯୁବ ସାହିତ୍ୟ ପୁରସ୍କାର ପାଇଁ ଘୋଷଣା ହୋଇଛି ନାଁ । ବିଶିଷ୍ଟ ଶିଶୁ ସାହିତ୍ୟିକ ଡକ୍ଟର ନରେନ୍ଦ୍ର ପ୍ରସାଦ ଦାସଙ୍କୁ ବାଲ୍ ସାହିତ୍ୟ ପୁରସ୍କାର ମିଳୁଥିବା ବେଳେ ଗାଳ୍ପିକ ଦିଲ୍ଲୀପ ବେହେରାଙ୍କୁ ମିଳିବ ‘ଯୁବ ପୁରସ୍କାର’ ।
କେନ୍ଦ୍ର ସାହିତ୍ୟ ଏକାଡେମୀର କାର୍ଯ୍ୟକାରିଣୀ ପରିଷଦ ବୈଠକରେ ଦୁଇ ଜଣଙ୍କ ନାଁ ଘୋଷଣା କରାଯାଇଛି । ନରେନ୍ଦ୍ର ପ୍ରସାଦ ଦାସ ‘କୋଳାହଳ ନା ହଳାହଳ’ ପୁସ୍ତକ ପାଇଁ ବାଲ୍ ସାହିତ୍ୟ ପୁରସ୍କାର ପାଇବେ । ସେହିପରି ଓଡ଼ିଆ ଗଳ୍ପ ସଂକଳନ ‘ଲଣ୍ଠନ’ ପାଇଁ ଯୁବ ପୁରସ୍କାର ପାଇବେ ଗାଳ୍ପିକ ଦିଲ୍ଲୀପ ବେହେରା ।
ହାତୀମୃତ୍ୟୁ ରୋକିବାକୁ ଗଠନ ହେବ ଯୁଗ୍ମ ଟାସ୍କଫୋର୍ସ
ଭୁବନେଶ୍ୱର: ରାଜ୍ୟରେ ହାତୀମୃତ୍ୟୁ ରୋକିବାକୁ ଗଠନ ହେବ ଯୁଗ୍ମ ଟାସ୍କଫୋର୍ସ । ପୋଲିସ ଓ ବନ ବିଭାଗକୁ ନେଇ ଗଠନ ହେବ ଟାସ୍କଫୋର୍ସ । ଏହା ମାଧ୍ୟମରେ ବନ୍ୟାପ୍ରାଣୀ ସମ୍ପର୍କିତ ସମସ୍ତ ମାମଲାର ତଦନ୍ତ କରାଯିବ । ଏନେଇ ହାଇକୋର୍ଟରେ ସତ୍ୟପାଠ ଦାଖଲ କରିଛନ୍ତି ପୋଲିସ ଡିଜି । ଅନ୍ତଃରାଜ୍ୟ ବନ୍ୟଜନ୍ତୁ ବେଆଇନ ଚାଲାଣ ଉପରେ ମଧ୍ୟ ଟାସ୍କଫୋର୍ସ ନଜର ରଖିବ ।
ସୂଚନା ମୁତାବକ ଟାସ୍କଫୋର୍ସ ମୁଖ୍ୟ ବନ୍ୟ ସଂରକ୍ଷକ ଓ ପିସିସିଏଫଙ୍କ ତତ୍ତ୍ବାବଧାନରେ କାମ କରିବ । ଅନ୍ୟପଟେ କେନ୍ଦୁଝର ଯୋଡ଼ା ରେଞ୍ଜ ଅଞ୍ଚଳରେ ବିଦ୍ୟୁତ ଆଘାତରେ ହାତୀ ମୃତ୍ୟୁ ଘଟଣାରେ ଆସନ୍ତା ୨୬ତାରିଖରେ ସବିଶେଷ ତଥ୍ୟ ରଖିବେ ଆଡଭୋକେଟ ଜେନେରାଲ୍ ।
ବେଆଇନ ଗର୍ଭପାତ କରୁଥିଲେ, କୋର୍ଟ ଡାକ୍ତରାଣୀଙ୍କୁ ଜେଲ୍ ପଠାଇଲେ
ଭୁବନେଶ୍ୱର: ମହଙ୍ଗା ପଡ଼ିଲା ବେଆଇନ ଗର୍ଭପାତ ଓ ଲିଙ୍ଗ ନିରୁପଣ । ଡାକ୍ତରାଣୀଙ୍କୁ ଦଣ୍ଡାଦେଶ ଦେଲେ ଭୁବନେଶ୍ବର ଜେଏମଏଫସି କୋର୍ଟ । ଦୋଷୀ ସାବ୍ୟସ୍ତ ପରେ ଡାକ୍ତରାଣୀ ନବନୀତା ପାଢୀଙ୍କୁ ଅଢେଇ ବର୍ଷ ଦଣ୍ଡାଦେଶ ପ୍ରଦାନ କରିଛନ୍ତି କୋର୍ଟ । ଏହା ସହିତ ୯ହଜାର ଟଙ୍କା ଜୋରିମାନା ଦେବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି ।
ଏହି ମାମଲାରେ 7ଜଣ ସାକ୍ଷୀ ଓ 14 ଦସ୍ତାବିଜ ପ୍ରମାଣ ଆଧାରରେ ରାୟ ଶୁଣାଇଛନ୍ତି କୋର୍ଟ । 2019 ମସିହାରେ ଜୟଦେବ ବିହାରରେ ଥିବା ଏକ କ୍ଲିନିକରେ ବେଆଇନ ଗର୍ଭପାତ ଓ ଲିଙ୍ଗ ନିରୁପଣ ହେଉଥିବା ଜଣାପଡ଼ିଥିଲା । ଚଢାଉ କରି କ୍ଲିନିକକୁ ସିଲ୍ କରିଥିଲା ପ୍ରଶାସନ । ଗୁରୁବାର ଏହି ମାମଲାକୁ ନେଇ କୋର୍ଟ ରାୟ ଶୁଣାଇଛନ୍ତି ।