ନନ୍ଦିଘୋଷ ବ୍ୟୁରୋ: ମହିଳା ଏସିଆ କପ୍ କ୍ରିକେଟରେ ଭାରତର ବାଜିମାତ୍ । ୮ ଓ୍ବିକେଟରେ ଶ୍ରୀଲଙ୍କାକୁ ହରାଇ ଭାରତର ଫାଇନାଲ ବିଜୟ । ପ୍ରଥମେ ବ୍ୟାଟିଂ କରି ଶ୍ରୀଲଙ୍କା ୯ ଓ୍ବିକେଟ ହରାଇ ୬୫ ରନ୍ କରିଥିବା ବେଳେ ଭାରତ ମାତ୍ର ଦୁଇଟି ଓ୍ବିକେଟ ହରାଇ ୭୧ ରନ୍ କରିଛି । ଶ୍ରୀଲଙ୍କାର ଆରମ୍ଭରୁ ବ୍ୟାଟିଂ ବିପର୍ଯ୍ୟୟ ହୋଇଥିବା ବେଳେ ୮ଜଣ ଖେଳାଳି ଦୁଇ ଅଙ୍କ ରନ୍ ବି ଛୁଇଁ ପାରିନଥିଲେ ।
ଭାରତୀୟ ବୋଲର ରେନୁକା ସିଂ ତିନୋଟି ଓ୍ବିକେଟ, ରାଜେଶ୍ବରୀ ଗାଏକଓ୍ବାଡ ଏବଂ ସ୍ନେହ ରାଣା ଦୁଇଟି ଲେଖାଏଁ ଓ୍ବିକେଟ ନେଇଥିଲେ । ଭାରତୀୟ ବ୍ୟାଟ୍ସମ୍ୟାନ୍ ସ୍ମ୍ରିତି ମନ୍ଧାନା ୨୫ ବଲରେ ସର୍ବାଧିକ ୫୧ ରନ୍ କରି ନଟଆଉଟ ରହିଥିଲେ ।
ବେଙ୍ଗାଲୁର: ଭାରତ ଯୋଡ଼ୋ ଯାତ୍ରାରେ କଂଗ୍ରେସର ଗର୍ଜନ । କର୍ଣ୍ଣାଟକ ବେଲାରୀରେ କଂଗ୍ରେସ ପକ୍ଷରୁ କରାଯାଇଛି ବିଶାଳ ସମାବେଶ । ଦରବୃଦ୍ଧି, ବେକାରୀ, ଅର୍ଥନୈତିକ ସଂକଟ ଆଦିକୁ ନେଇ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି ନେତା । ସମାବେଶରେ ଯୋଗ ଦେଇ କଂଗ୍ରେସ ନେତା ରାହୁଲ ଗାନ୍ଧୀ ବିଭିନ୍ନ ପ୍ରସଙ୍ଗ ଉତଥାପନ କରିଥିବାବେଳେ ଦେଶରେ ବିଜେପି ବିରୋଧରେ ମେଳି ଲାଗି ଆହ୍ବାନ ଦେଇଛନ୍ତି ।
ସଭାରେ କଂଗ୍ରେସ ନେତା ରାହୁଲ ଗାନ୍ଧୀ କହିଛନ୍ତି, ଦେଶରେ ବିଜେପି ଓ ଆରଏସଏସ ଯୋଗୁ ବିଦ୍ବେଷ ଓ ହିଂସା ବଢୁଛି । କର୍ଣ୍ଣାଟକରେ ହେଉଥିବା ରୈଜନୈତିକ ସମାବେଶରେ ସାମିଲ ହୋଇଛନ୍ତି ଏଆଇସିସି ସଭାପତି ପ୍ରାର୍ଥୀ ମଲ୍ଲିକାର୍ଜ୍ଜୁନ ଖାଡଗେ । କେରଳ ପରେ କର୍ଣ୍ଣାଟକରେ ଏବେ ଯାତ୍ରା ଜାରି ରହିଥିବାବେଳେ ବିପୁଳ ଜନସମର୍ଥନ ପରିଲକ୍ଷିତ ହୋଇଛି ।
ଜମ୍ମୁ-କାଶ୍ମୀର: କାଶ୍ମୀରରେ ପୁଣି ଟାର୍ଗେଟ କିଲିଂ । ଦକ୍ଷିଣ କାଶ୍ମୀରର ସୋପିଆନ ଅନ୍ତର୍ଗତ ଚୌଧୁରୀ ଗୁଣ୍ଡ୍ ଇଲାକାରେ ଜଣେ କାଶ୍ମୀରୀ ପଣ୍ଡିତଙ୍କୁ ଗୁଳି କରି ହତ୍ୟା କରିଛନ୍ତି ଆତଙ୍କବାଦୀ । ପୂରଣ କିଷନ ଭଟ୍ଟ ନାମକ ଜଣେ ପଣ୍ଡିତ ତାଙ୍କ ଘର ନିକଟରେ ଥିବାବେଳେ କେତେକ ଆତଙ୍କବାଦୀ ତାଙ୍କ ଉପରକୁ ଗୁଳିମାଡ଼ କରିଥିଲେ । ତାଙ୍କୁ ଗୁରୁତର ଅବସ୍ଥାରେ ହସ୍ପିଟାଲକୁ ନିଆଯାଇଥିଲା ।
ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏହି ଘଟଣା ପରେ ଅଞ୍ଚଳ ସିଲ୍ କରି ପୋଲିସ ଛାନବିନ କରୁଛି । ହତ୍ୟାକୁ ବିଭିନ୍ନ ମହଲରୁ ନିନ୍ଦା କରାଯାଇଛି । କାଶ୍ମୀରୀ ପଣ୍ଡିତଙ୍କ ସୁରକ୍ଷା ଦାବି କରାଯାଇଛି । କିଛି ଦିନର ବ୍ୟବଧାନ ପରେ ପୁଣି ପଣ୍ଡିତଙ୍କୁ ଟାର୍ଗେଟ କରାଯିବା ପରେ ଆତଙ୍କ ପ୍ରକାଶ ପାଇଛି ।
କୋଲକତା: ତନ୍ତ୍ର ସାଧନା ପାଇଁ ନିଜ ଜନ୍ମକଲା ଝିଅକୁ ବଳିଦେଲା ମାଆ । ୯ ବର୍ଷ ଝିଅକୁ ତାନ୍ତ୍ରିକ ପାଖକୁ ନେଇ ବଳି ଦେଇଦେଲା ପିଶାଚି ମାଆ । ପଶ୍ଚିମବଙ୍ଗ ମାଲଦା ଚାଞ୍ଚଲ୍ ଥାନା ଗୌରହଣ୍ଡ୍ ଗାଁରେ ଘଟିଛି ଏଭଳି ଅମାନବୀୟ କାଣ୍ଡ । ୫ ଦିନ ହେବ ନିଖୋଜ ଥିବା ଝିଅର ମୃତଦେହ ଉଦ୍ଧାର ପରେ ଖବର ପ୍ରଘଟ ହୋଇଛି । ମୃତ ଝିଅର ମାକୁ ମାଡ ମାରିବା ସହ ତାନ୍ତ୍ରିକକୁ ମଧ୍ୟ ମାଡ ମାରିଛନ୍ତି ଗ୍ରାମବାସୀ । ପୋଲିସ ଖବର ପାଇ ମାକୁ ଗିରଫ କରିଛି ।
ଜଘନ୍ୟ କାଣ୍ଡ ଘଟାଇଥିବା ମାର ପରିଚୟ ମିଳିଛି । ମୋହନପୁର ଅଞ୍ଚଳର ମନୋୱାରା ବିବି ଏଭଳି କାଣ୍ଡ ଘଟାଇବା ପରେ ପଡୋଶୀଙ୍କ ଘରେ ମଧ୍ୟାହ୍ନ ଭୋଜନ କରିଥିଲା । ମହିଳାଙ୍କ ସ୍ବାମୀ ସାହେବ ଅଲ୍ଲୀ କାମକୁ ବାହାରି ଯିବା ପରେ ମନୋୱାରା ଝିଅ ତଣ୍ଟିକୁ ଏକ ଧାରୁଆ ଅସ୍ତ୍ରରେ କାଟି ଦେଇଥିଲା । ପୋଲିସ ଘଟଣାସ୍ଥଳରେ ପହଞ୍ଚି ମହିଳାଙ୍କ ମାନସିକ ସ୍ଥିତି ଜାଣିବା ପାଇଁ ମେଡିକାଲକୁ ପଠାଇଛି । ମହିଳା ଜଣଙ୍କ କୌଣସି ମାନସିକ ରୋଗରେ ପୀଡିତ ଥାଇପାରେ ବୋଲି ଅନୁମାନ କରୁଛି ପୋଲିସ ।
ଖୋର୍ଦ୍ଧା: ଟାଙ୍ଗୀ ନିରାକାରପୁରରେ ନାବାଳିକା ଛାତ୍ରୀର ଆତ୍ମହତ୍ୟା । ନିର୍ଯାତନା ସହିନପାରି ନାବାଳିକା ଜଣକ ଆତ୍ମହତ୍ୟା କରିଥିବା ପରିବାର ଲୋକ ଅଭିଯୋଗ କରିଛନ୍ତି । ସୂଚନା ଅନୁସାରେ, ଏକତରଫା ପ୍ରେମରେ ବିଫଳ ହେବା ପରେ ପ୍ରେମିକ ଓ ତାର ପରିବାର ଲୋକ ନାବାଳିକାକୁ ନିର୍ଯାତନା ଦେଉଥିଲେ । ଏନେଇ ନିରାକାରପୁର ଥାନାରେ ନାବାଳିକା ଓ ତାଙ୍କ ପରିବାର ଲୋକ ଅଭିଯୋଗ କରିଥିଲେ ।
ଉଭୟଙ୍କ ମଧ୍ୟରେ ହୋଇଥିଲା ଆପୋଷ ସମାଧାନ। ସମାଧାନ ପରେ ନିର୍ଯ୍ୟାତନା ବଢିଚାଲିଥିଲା । ଇପସିତା କଲେଜ ଯାଉଥିବା ବେଳେ ସଜତ ଶାହା ଓ ତାର ଭାଇମାନେ ବାଟରେ ଘାଟରେ କରୁଥିଲେ ହଇରାଣ। ଗତକାଲି ସଜତ ଶାହା ଇପସିତା ଘର ଦୁଆର ମୁହଁରେ ପହଞ୍ଚି ଗାଳିଗୁଲଜ କରି ହତ୍ୟା ଧମକ ଦେଇଥିଲା ।
ଏସିଡ ପକାଇ ପୋଡି ଦେବାକୁ ଧମକ ଦେଇଥିଲା ବୋଲି ମୃତକର ମା’ରଂଜିତା ପ୍ରଧାନ ନିରାକାରପୁର ଥାନାରେ ଲିଖିତ ଅଭିଯୋଗ କରିଛନ୍ତି। ଅଭିଯୋଗ ପରେ ନିରାକାରପୁର ଥାନାରେ ବାଲୁଗାଁ ଏସଡିପିଓ ପହଞ୍ଚି ତଦନ୍ତ ଜାରି ରଖିଛନ୍ତି । ପୋଲିସ ସଜତ ସାହା ପରିବାରର ମହିଳା ମାନଙ୍କୁ ଥାନାରେ ଅଟକ ରଖିଥିବା ବେଳେ ଅନ୍ୟମାନେ ଫେରାର ଥିବା ଜଣାପଡିଛି।
ଭୁବନେଶ୍ବର: ଆସନ୍ତା ୧୭ରେ ହାଇଦ୍ରାବାଦରେ ଅନୁଷ୍ଠିତ ହେବ ମେକ୍ ଇନ ଓଡ଼ିଶା ଇନଭେଷ୍ଟର୍ସ ମିଟ୍ । ବନଜାରା ହିଲ୍ସ ସ୍ଥିତ ହୋଟେଲ ତାଜ୍ରେ କାର୍ଯ୍ୟକ୍ରମ ଅନୁଷ୍ଠିତ ହେବ । ସେଠାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶିଳ୍ପପତିଙ୍କୁ ଓଡ଼ିଶାକୁ ଆସି ନିବେଶ ପାଇଁ ନିମନ୍ତ୍ରଣ କରିବେ । ଏଥିସହ ରାଜ୍ୟ ସରକାରଙ୍କ ପକ୍ଷରୁ ଦିଆଯାଉଥିବା ସମସ୍ତ ସୁବିଧାକୁ ବୁଝାଇ କହିବେ ମୁଖ୍ୟମନ୍ତ୍ରୀ ।
ଆଇଟି, ସ୍ବାସ୍ଥ୍ୟ, ମେଡିସିନ୍, ଡାଟା ସେଣ୍ଟର, ଟେକ୍ସଟାଇଲ, ଫୁଡ୍ ପ୍ରୋସେସିଂ, ଶକ୍ତି କ୍ଷେତ୍ରରେ ନିବେଶ ପାଇଁ ମୁଖ୍ୟମନ୍ତ୍ରୀ ବଡ଼ ବଡ଼ ଶିଳ୍ପପତିଙ୍କୁ ଭେଟିବେ । ଏବର୍ଷ ପାଇଁ ହାଇଦ୍ରାବାଦରେ ଶେଷ ଇନଭେଷ୍ଟର୍ସ ମିଟ୍ ହେବାକୁ ଯାଉଛି ।
ଏହାପୂର୍ବରୁ ଦିଲ୍ଲୀ, ମୁମ୍ବାଇ ଓ ବାଙ୍ଗାଲୋରରେ ଓଡିଶା ଇନଭେଷ୍ଟର୍ସ ମିଟ୍ ଅନୁଷ୍ଠିତ ହୋଇଛି ।
ଇସଲାମାବାଦ: ବିଶ୍ବର ଭୟଙ୍କର ରାଷ୍ଟ୍ର ପାକିସ୍ତାନ । ପ୍ରଥମ ଥର ପାକିସ୍ତାନକୁ ଜୋରଦାର ସମାଲୋଚନା କରି ଏଭଳି କହିଛନ୍ତି ଆମେରିକା ରାଷ୍ଟ୍ରପତି ଜୋ ବାଇଡେନ। ବିଭିନ୍ନ ରାଷ୍ଟ୍ର ସହ ତିକ୍ତତା ବଜାୟ ରଖି ପରମାଣୁ ଅସ୍ତ୍ର ନିଜ ପାଖରେ ରଖିଛି ପାକିସ୍ତାନ । କାଲିଫର୍ଣ୍ଣିଆରେ ଏକ କାର୍ଯ୍ୟକ୍ରମରେ ଯୋଗଦେଇ ବର୍ଷିଛନ୍ତି ବାଇଡେନ । କେବଳ ପାକିସ୍ତାନ ନୁହେଁ ଚୀନ ଏବଂ ଋଷକୁ ବି ଟାର୍ଗେଟ କରିବାକୁ ସେ ପଛାଇ ନାହାନ୍ତି ।
ଆମେରିକାର ବୈଦେଶିକ ନୀତି ସମ୍ପର୍କରେ ଉଲ୍ଲେଖ କରି ଭ୍ଲାଦିମିର ପୁଟିନଙ୍କ ଋଷ ଓ ଚୀନ ସମ୍ପର୍କରେ ଉଲ୍ଲେଖ କରିଛନ୍ତି ବାଇଡେନ । ହେଲେ ବିଶ୍ବର ଭୟଙ୍କର ରାଷ୍ଟ୍ର ଭାବେ ପାକିସ୍ତାନକୁ ବିବେଚନା କରିଛନ୍ତି ଆମେରିକା ରାଷ୍ଟ୍ରପତି । ବାଇଡେନଙ୍କ ଏଭଳି ମନ୍ତବ୍ୟ ହୁଏତ ପାକିସ୍ତାନ ଶେହବାଜ ଶରିଫ ସରକାର ଓ ଆମେରିକାର ତିକ୍ତ ସମ୍ପର୍କକୁ ସଜାଡିପାରେ ବୋଲି ଅନୁମାନ କରାଯାଉଛି । ଜାତୀୟ ସୁରକ୍ଷା ନୀତିକୁ ନେଇ ଆମେରିକା ଏକ ତଥ୍ୟ ରିଲିଜ କରିଛି । ୪୮ ପୃଷ୍ଠା ସମ୍ବଳିତ ଏହି ଡକ୍ୟୁମେଣ୍ଟରେ ପାକିସ୍ତାନକୁ ସ୍ଥାନ ଦେଇନାହିଁ ଆମେରିକା ।
ସେହିପରି ଋଷ-ୟୁକ୍ରେନ ଯୁଦ୍ଧ ପ୍ରସଙ୍ଗରେ ଉଦ୍ବୋଧନ ଦେଇ ବାଇଡେନ କହିଛନ୍ତି- ବିଶ୍ବ ଦ୍ରୁତ ଗତିରେ ପରିବର୍ତ୍ତନ ହେଉଛି । ତେବେ ଏଥିଲାଗି କୌଣସି ବ୍ୟକ୍ତିବିଶେଷ ବା ଗୋଟିଏ ରାଷ୍ଟ୍ର ଦାୟୀ ନୁହନ୍ତି । ପାକିସ୍ତାନ ପରି ଏକ ରାଷ୍ଟ୍ର ବିଶ୍ବର ସବୁଠାରୁ ଅଧିକ ଭୟଙ୍କର ରାଷ୍ଟ୍ର ମଧ୍ୟରୁ ଅନ୍ୟତମ । ଏହି ରାଷ୍ଟ୍ର ନିକଟରେ କୌଣସି ଅଙ୍ଗୀକାର ବିନା ଆଣବିକ ଅସ୍ତ୍ର ରହିଛି । ସାରା ବିଶ୍ବର ଦୃଷ୍ଟି ଆମ ଉପରେ ରହିଥିବ ଏକ ଛୋଟିଆ କଥା ନୁହଁ । ଏପରିକି ଆମର ଶତ୍ରୁମାନେ ମଧ୍ୟ ଆମର ଭୂମିକା ଉପରେ ନଜର ରଖିଛନ୍ତି । ସେ ପରୋକ୍ଷ ଭାବେ ଋଷକୁ ମଧ୍ୟ ସମାଲୋଚନା କରିଛନ୍ତି ।
କେନ୍ଦୁଝର: ସ୍ବାମୀ ପାଇଁ କବର ଖୋଳିଲେ ସ୍ତ୍ରୀ । ଶୁଣିଲେନି ପଡ଼ୋଶୀ । ବାଧ୍ୟ ହୋଇ ନିଜର ବୃଦ୍ଧ ସ୍ବାମୀଙ୍କ ପାଇଁ ରାତିରେ କବର ଖୋଳିଲେ ଜଣେ ନିଃସନ୍ତାନ ଅସହାୟ ବୃଦ୍ଧା । ଏଭଳି ଅଭାବନୀୟ ଘଟଣା ଘଟିଛି କେନ୍ଦୁଝର ଜିଲ୍ଲା ଚମ୍ପୁଆ ବ୍ଲକ ବଡ଼ନଈ ଗାଁରେ । ସୋସିଆଲ୍ ମିଡିଆରେ ଯାହାର ଭିଡିଓ ଭାଇରାଲ୍ ହେବାରେ ଲାଗିଛି ।
ଗାଁର ବୃଦ୍ଧ ଦମ୍ପତ୍ତି ଭଞ୍ଜ ମୁଣ୍ଡା ଓ କତି ମୁଣ୍ଡା ନିଃସନ୍ତାନ ଥିବା ବେଳେ, ଭଞ୍ଜ ମୁଣ୍ଡା ଜ୍ବରରେ ପୀଡ଼ିତ ହେବାରୁ ସ୍ତ୍ରୀ କତି ମୁଣ୍ଡା ତାଙ୍କୁ ପ୍ରଥମେ ଚମ୍ପୁଆ ଡାକ୍ତରଖାନା ଓ ପରେ ଜିଲ୍ଲା ମୁଖ୍ୟ ଚିକିତ୍ସାଳୟ ସ୍ଥାନାନ୍ତର କରିଥିଲେ । ସେଠାରେ ଭଞ୍ଜ ମୁଣ୍ଡାଙ୍କ ମୃତ୍ୟୁ ଘଟିଥିଲା । ତେବେ ଅନ୍ତିମ ସଂସ୍କାର ପାଇଁ କେହି ସହଯୋଗ ନକରିବାରୁ ବାଧ୍ୟ ହୋଇ ନିଜ ଘର ନିକଟରେ ସ୍ତ୍ରୀ କତି ମୁଣ୍ଡା ଗାତ ଖୋଳି ଶବକୁ ସମାଧି ଦେଇଥିଲେ ।
ଭୁବନେଶ୍ବର: ଅପରାହ୍ନରେ ବସିବ ରାଜ୍ୟ କ୍ୟାବିନେଟ୍ ବୈଠକ । ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ବସିବ ବୈଠକ । ୧୦ରୁ ଅଧିକ ପ୍ରସ୍ତାବ ଉପରେ ବାଜିବ ମୋହର । ଅନେକ ବିଭାଗର ଗୁରୁତ୍ୱପୂର୍ଣ୍ଣ ଏଜେଣ୍ଡା ଉପରେ ମୋହର ବାଜିବା ନେଇ ସୂଚନା ମିଳିଛି । ଗ୍ରାମ୍ୟ ଉନ୍ନୟନ ବିଭାଗ, ବୈଷୟିକ ଶିକ୍ଷା ସହ ଅନେକ ବିଭାଗ ରହିଛି ।
ଦଶହରା ପୂର୍ବରୁ ରାଜ୍ୟ ସରକାରଙ୍କ ଅର୍ଥ, ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ଓ ଆଇନ ବିଭାଗ ସମ୍ବନ୍ଧୀୟ କିଛି ପ୍ରସ୍ତାବ କ୍ୟାବିନେଟରେ ଆଲୋଚନା ହୋଇଥିଲା ।
ଠିକ ଏହାର ମାସକ ପୂର୍ବରୁ ରାଜ୍ୟ କ୍ୟାବିନେଟ ବୈଠକରେ ୧୭ପ୍ରସ୍ତାବରେ ବାଜିଥିଲା ମୋହର। ମିଲେଟ ମିଶନ ପାଇଁ ସ୍ୱତନ୍ତ୍ର କାର୍ଯ୍ୟକ୍ରମକୁ ବୈଠକରେ ମଂଜୁରୀ ମିଳିଥିଲା । ୪ ଜିଲ୍ଲାରେ ବାତ୍ୟା ନିରୋଧୀ ଲୁଣାବନ୍ଧ, ସୁନ୍ଦରଗଡ଼ କୋଏଲ ନଦୀରେ ଇନଷ୍ଟ୍ରିମ୍ ବ୍ୟାରେଜକୁ ମଂଜୁରୀ ମିଳିଥିଲା ।
