ଭଦ୍ରକ: ଧାମନଗର ଉପନିର୍ବାଚନ ପାଇଁ ନାମାଙ୍କନ ଦାଖଲ କରିଛନ୍ତି ବିଜେପି ପ୍ରାର୍ଥୀ ସୂର୍ଯ୍ୟବଂଶୀ ସୂରଜ। ସ୍ବର୍ଗତ ବିଷ୍ଣୁ ସେଠୀଙ୍କୁ ଶ୍ରଦ୍ଧାଞ୍ଜଳି ଜଣାଇ ନିରାଡ଼ମ୍ବର ଭାବେ ନାମାଙ୍କନ ପତ୍ର ଦାଖଲ କରିଛନ୍ତି। ନାମାଙ୍କନ ପତ୍ର ଦାଖଲ ସମୟରେ ସୂର୍ଯ୍ୟବଂଶୀଙ୍କ ଭଉଣୀ ଉପସ୍ଥିତ ରହିଥିଲେ।
ପ୍ରଥମେ ପୈତୃକ ଗାଁ ତିହିଡି ମଙ୍ଗରାଜପୁର ଓ ଭଦ୍ରକ ସ୍ଥିତ କୁଆଁସ ବାସଭବନରେ ବାପାଙ୍କୁ ଶ୍ରଦ୍ଧାଞ୍ଜଳୀ ଜଣାଇ ନାମାଙ୍କନ ପତ୍ର ଦାଖଲ କରିଛନ୍ତି । ଧାମନଗର ଗଡ଼ ବଜାୟ ରଖିବା ପାଇଁ ବିଜେପି ଜୋରଦାର ପ୍ରୟାସ କରୁଛି । ଅନ୍ୟପଟେ ଧାମନଗର ଉପନିର୍ବାଚନ ପାଇଁ ଆଜି ପ୍ରାର୍ଥୀଙ୍କ ନାଁ ଘୋଷଣା କରିବ କଂଗ୍ରେସ।
ଭୁବନେଶ୍ୱର: ଲେଡି ବ୍ଲାକମେଲର ଅର୍ଚ୍ଚନା ନାଗ ଗିରଫ ଘଟଣା। ଅର୍ଚ୍ଚନାର ଜାମିନ ପ୍ରସଙ୍ଗରେ ଆଜି ଚାଲିଛି ଶୁଣାଣି। ସୁରକ୍ଷା କାରଣରୁ ଭୁବନେଶ୍ବର ଏସଡିଜେଏମ କୋର୍ଟରେ ଅର୍ଚ୍ଚନା ନାଗକୁ ହାଜର କରାଯାଇନି। ଝାରପଡ଼ା ଜେଲରେ ଥିବା ଅର୍ଚ୍ଚନା ଭିସି ଜରିଆରେ ସାମିଲ ହୋଇଛି। ଝାରପଡା ଜେଲ ଭିତରୁ ନିଜର ପକ୍ଷ ରଖିଛି ଅର୍ଚ୍ଚନା ।
ରାୟପୁର: ଛତିଶଗଡ଼ରେ ଇଡିର ଆକ୍ସନ। ମାଇନିଂ କେସରେ ମୁଖ୍ୟମନ୍ତ୍ରୀ ଭୁପେଶ ବାଘେଲଙ୍କ ଘନିଷ୍ଠ ଅଫିସରଙ୍କ ଘରେ ରେଡ୍। ପ୍ରାୟ ୧୨ଟି ସ୍ଥାନରେ ଚଢ଼ାଉ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ। ରାୟଗଡ଼ ଜିଲ୍ଲାପାଳ ରାନୁ ସାହୁଙ୍କ ଘରେ ଆଜି ସକାଳୁ ରେଡ କରିଛି ଇଡି ଟିମ୍। ରେଡରେ ୧୨ରୁ ଅଧିକ ଇଡି ଅଧିକାରୀ ସାମିଲ ହୋଇଛନ୍ତି ।
ସେହିପରି ଦେବେନ୍ଦ୍ର ନଗରରେ ସିଏ ବିଜୟ ମାଲୁ, ମହାସମୁନ୍ଦରେ ନେତା ଅଗ୍ନି ଚନ୍ଦ୍ରାକର, ଅନୁପମ ନଗରରେ ସୂର୍ଯ୍ୟକାନ୍ତ ତିଓ୍ବାରୀ, ମାଇନିଂ ହେଡ ଆଇଏଏସ୍ ଜେପି ମୌର୍ଯ୍ୟାଙ୍କ ବାସଭବନରେ ରେଡ କରୁଛି ଟିମ୍। ଗତ ଜୁନରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରେ କାର୍ଯ୍ୟରତ ଉପସଚିବ ସୌମ୍ୟା ଚୌରସିଆଙ୍କ ଦୁଇଟି ବାସଭବନ ସମେତ ମୋଟ ୭ଟି ସ୍ଥାନରେ ରେଡ୍ କରିଥିଲା।
ଅପରପକ୍ଷେ ନିକଟରେ ଇଡି, ସିବିଆଇକୁ ନେଇ ଦେଇଥିବା ବୟାନ ଓ କେନ୍ଦ୍ରକୁ କଂଗ୍ରେସର ଲଗାତାର ଟାର୍ଗେଟ ଯୋଗୁ ଏହି ରେଡ୍ କରାଯାଇଛି ବୋଲି କଂଗ୍ରେସ ପକ୍ଷରୁ କୁହାଯାଇଛି।
ନୂଆଦିଲ୍ଲୀ: ଜଷ୍ଟିସ ଡି ଓ୍ବାଇ ଚନ୍ଦ୍ରଚୂଡ଼ ହେବେ ପରବର୍ତ୍ତୀ ସିଜେଆଇ। ସୁପ୍ରିମକୋର୍ଟର ପରବର୍ତ୍ତୀ ପ୍ରଧାନ ବିଚାରପତି ହେବେ ଜଷ୍ଟିସ ଡିଓ୍ବାଇ ଚନ୍ଦ୍ରଚୂଡ। ସେ ସୁପ୍ରିମକୋର୍ଟର ୫୦ତମ ପ୍ରଧାନ ବିଚାରପତି ଭାବେ ଦାୟିତ୍ବ ନେବେ। ଆସନ୍ତା ନଭେମ୍ବର ୮ ତାରିଖରେ ଅବସର ନେବେ ପ୍ରଧାନ ବିଚାରପତି ଜଷ୍ଟିସ ଲଳିତ ।
ଏହା ପୂର୍ବରୁ ଆରମ୍ଭ ହୋଇଛି ନୂତନ ବିଚାରପତି ନିଯୁକ୍ତି ପ୍ରକ୍ରିୟା । ଏଥିଯୋଗୁ ସୁପ୍ରିମକୋର୍ଟର ନୂଆ ଉତ୍ତରାଧିକାରୀ ଚୟନ ପାଇଁ କେନ୍ଦ୍ର ଆଇନ ମନ୍ତ୍ରୀ ପ୍ରଧାନ ବିଚାରପତିଙ୍କୁ ଚିଠି ଲେଖିଥିଲେ । ବର୍ତ୍ତମାନର ପ୍ରଧାନ ବିଚାରପତି ୟୁ ୟୁ ଲଳିତ ଆଇନ୍ ମନ୍ତ୍ରଣାଳୟକୁ ଜଷ୍ଟିସ ଚନ୍ଦ୍ରଚୂଡ଼ଙ୍କ ନାମ ସୁପାରିସ କରିଛନ୍ତି । ଜଷ୍ଟିସ ଚନ୍ଦ୍ରଚୂଡ଼ ହେଉଛନ୍ତି ସୁପ୍ରିମକୋର୍ଟର ସବୁଠୁ ବରିଷ୍ଠ ବିଚାରପତି । ସେ ଆଗାମୀ ଦୁଇ ବର୍ଷ ପାଇଁ ପ୍ରଧାନ ବିଚାରପତି ଦାୟିତ୍ବରେ ରହିବେ । ନଭେମ୍ବର ୯ ତାରିଖରେ ପ୍ରଧାନବିଚାରପତି ଭାବେ ଶପଥ ନେବେ ଜଷ୍ଟିସ ଚନ୍ଦ୍ରଚୂଡ଼ ।
ନୟାଗଡ଼: କଲ୍ୟାଣ ମଣ୍ଡପରେ ରିଲିଜ ହେଲା ଓଡ଼ିଆ ସିନେମା। ନୟାଗଡ଼ରୁ ଆସିଛି ଏଭଳି ଏକ ନିଆରା ଚିତ୍ର। ଓଡ଼ଗାଁ ସରକାରୀ କଲ୍ୟାଣ ମଣ୍ଡପ ପରିସରରେ ପ୍ରଥମଥର ପାଇଁ ରିଲିଜ୍ ହୋଇଛି ‘ପ୍ରେମରେ ରିସ୍କ ହେଲା ମୋତେ ଇସ୍କ’। କଲ୍ୟାଣ ମଣ୍ଡପ ବାହାରେ ଟିକେଟ୍ ବିକ୍ରି କରାଯାଇଥିଲା ।
ସିନେମା ଦେଖିବାକୁ ଜମିଥିଲା ଦର୍ଶକଙ୍କ ଭିଡ଼। କଲ୍ୟାଣ ମଣ୍ଡପରେ ସିନେମା ରିଲିଜ୍ କରିବାକୁ ନେଇ ପ୍ରଯୋଜକଙ୍କ ଏଭଳି ଉଦ୍ୟମକୁ ନେଇ ଚର୍ଚ୍ଚା ହୋଇଛି । ପ୍ରିମିୟରରେ ଚଳଚ୍ଚିତ୍ରର ସମସ୍ତ ଷ୍ଟାର କାଷ୍ଟ ସାମିଲ ହୋଇଥିଲେ। ତେବେ ଓଡ଼ିଆ ସିନେମା ରିଲିଜ୍ ପାଇଁ ହଲ୍ ନମିଳିବାକୁ ନେଇ ଉଦବେଗ ପ୍ରକାଶ ପାଇଛି।
ମୁମ୍ବାଇ: ଆଜି ବଲିଉଡ ସୁପରଷ୍ଟାର ତଥା ଭେଟେରାନ ଆକ୍ଟର ଅମିତାଭ ବଚ୍ଚନଙ୍କ ଜନ୍ମଦିନ । ୮୦ ବର୍ଷରେ ପାଦ ଦେଇଛନ୍ତି ବିଗ ବି ଅମିତାଭ। ଆଜି ବି ଦର୍ଶକ ଦେଖୁଛନ୍ତି ଅମିତାଭଙ୍କ ଜଲଓ୍ବା। ନିଜ ଅଭିନୟର ଯାଦୁରେ ଏବେ ବି ଦର୍ଶକଙ୍କୁ ମତୁଆଲା କରିଆସୁଛନ୍ତି ଏହି ମେଗାଷ୍ଟାର ।
୧୯୪୨ରେ ଜନ୍ମ ହୋଇଥିବା ଅମିତାଭ ବଚ୍ଚନ ଫିଲ୍ମ ଇଣ୍ଡଷ୍ଟ୍ରିରେ ୫୦ ବର୍ଷରୁ ଅଧିକ ସମୟ କାମ କଲେଣି ।ପଦ୍ମଶ୍ରୀଠୁ ଆରମ୍ଭ କରି ପଦ୍ମବିଭୁଷଣ ସମ୍ମାନରେ ସେ ସମ୍ନାନିତ ହୋଇଛନ୍ତି । ବକ୍ସ ଅଫିସରେ ହିଟ୍ ଫିଲ୍ମ ପାଇଁ ତାଙ୍କୁ ମିଳିଛି ସୁପରହିଟ୍ ମାନ୍ୟତା । ଜନ୍ମଦିନ ପାଇଁ ଜଲସା ବାହାରେ ଲାଗିଛି ପ୍ରଶଂସକଙ୍କ ଭିଡ଼ । ବ୍ୟାନର ଓ ପୋଷ୍ଟର ମାଧ୍ୟମରେ ଶୁଭେଚ୍ଛା ଜଣାଇଛନ୍ତି ଫ୍ୟାନ୍ସ।
ପାରଳାଖେମୁଣ୍ଡି: ଚିକିତ୍ସା ଅବହେଳାରୁ ଶିଶୁ ମୃତ୍ୟୁ ଅଭିଯୋଗ । ଘଟଣା ଘଟିଛି ପାରଳାଖେମୁଣ୍ଡି ଚିକିତ୍ସାଳୟରେ । ଡାକ୍ତର ନଥାଇ ନର୍ସଙ୍କ ଦ୍ବାରା ଚିକିତ୍ସା କାରଣରୁ ଶିଶୁର ମୃତ୍ୟୁ ହୋଇଥିବା ଅଭିଯୋଗ ପରେ ଉତ୍ତେଜନା ପ୍ରକାଶ ପାଇଛି। ଶବ ରଖି ଗ୍ରାମବାସୀ ଓ ପରିବାର ଲୋକଙ୍କ ପ୍ରତିବାଦ କରିଛନ୍ତି। ଗୁରାଣ୍ଡି ଗାଁର ଅନୀଲ ବିଶୋଇଙ୍କ ୬ ବର୍ଷୀୟ ବାଳକର ମୃତ୍ୟୁ ହୋଇଛି।
ସୂଚନା ଅନୁସାରେ ବିଳମ୍ବିତ ରାତିରେ ପେଟରେ ବ୍ୟଥା ହେଉଥିବା ନେଇ ପ୍ରଥମେ ଗୁରାଣ୍ଡି ପ୍ରାଥମିକ ଚିକିତ୍ସାଳୟକୁ ନେଇଥିଲେ ପରିବାର ଲୋକେ। ସେଠାରେ ଡ଼ାକ୍ତର ନଥିବାରୁ ପାରଳାଖେମୁଣ୍ଡି ମୂଖ୍ୟ ଚିକିତ୍ସାଳୟକୁ ଆଣିଥିଲେ। ଏଠାରେ ମଧ୍ୟ ସମାନ ପରିସ୍ଥିତି, କୈାଣସି ଡାକ୍ତର ନଥିବା ବେଳେ ଡ୍ୟୁଟିରେ ଥିବା ନର୍ସ ବାଳକକୁ କିଛି ଇଞ୍ଜେକସନ ଦେଇଥିଲେ।
ଇଞ୍ଜେକସନ ଦେବା ପରେ ହଠାତ୍ ବାଳକର ମୃତ୍ୟୁ ହୋଇଥିବା ଅଭିଯୋଗ କରିଛନ୍ତି ପରିବାର ଲୋକେ ଓ ଗ୍ରାମବାସୀ ।
ପୁରୀ: ଚାଲିଛି ଧର୍ମ ମାସ କାର୍ତ୍ତିକ । ପୁରୀରେ ହବିଷ୍ୟାଳୀଙ୍କ ଭିଡ଼ । ଆଜି ହବିଷ ବ୍ରତର ଦ୍ଵିତୀୟ ଦିବସ | ସକାଳୁ ହବିଷ୍ୟାଳି ମାନେ ବୃନ୍ଦାବତୀ ପୂଜନ, ରାଇଦାମୋଦର ପୂଜା କରିବା ସହ ଭଜନ କୀର୍ତନ କରୁଛନ୍ତି |
ଅନ୍ୟପଟେ ପ୍ରଶାସନ ପକ୍ଷରୁ ଶ୍ରୀମନ୍ଦିର ଦର୍ଶନ ନେଇ ସମସ୍ଥ ବ୍ୟବସ୍ଥା କରାଯାଇଥିବା ବେଳେ ବ୍ରତ ଧାରିଣୀ ମାନେ ଶ୍ରୀମନ୍ଦିର ଯାଇ ମହାପ୍ରଭୁଙ୍କୁ ରାଧାଦାମୋଦର ବେଶରେ ଦର୍ଶନ କରୁଛନ୍ତି |
ଭୁବନେଶ୍ୱର: ଆଜିଠାରୁ କମିବ ବର୍ଷାର ବିସ୍ତୃତି। ହେଲେ ୧୩ତାରିଖ ପର୍ଯ୍ୟନ୍ତ ରାଜ୍ୟର ବିଭିନ୍ନ ସ୍ଥାନରେ ଘଡଘଡି ସହ ବର୍ଷା ହେବ । ୧୪ରୁ ୨୦ତାରିଖ ପର୍ଯ୍ୟନ୍ତ ବର୍ଷାର ପରିମାଣ ସମ୍ପୂର୍ଣ୍ଣ କମିବା ସହ ପାଗରେ ପରିବର୍ତ୍ତନ ଆସିବ। ଫଳରେ ମୌସୁମୀ ଫେରିବା ପାଇଁ ବାଟ ଫିଟିବ।
ଏହି ସମୟରେ ଯେଉଁ ଘୂର୍ଣ୍ଣିବଳୟ ସୃଷ୍ଟି ହୁଏ ତାହା ଘନୀଭୂତ ହୋଇଥାଏ । ତେଣୁ ତୃତୀୟ ସପ୍ତାହରେ ଯେଉଁ ଘୂର୍ଣ୍ଣିବଳୟ ସୃଷ୍ଟି ହେବ ତାଉପରେ ନଜର ରଖିଛି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର । ତୃତୀୟ ସପ୍ତାହରେ ସମ୍ଭାବ୍ୟ ବାତ୍ୟା ନେଇ ଦୁଇଟି ମଡେଲର ଆକଳନ ପରେ ଅନ୍ୟ ମଡେଲ ଉପରେ ନଜର ରହିଛି ।
ତେବେ ବାତ୍ୟା ନେଇ କୌଣସି ସୂଚନା ଦେଇନାହିଁ ଆଇଏମଡି। ଅପରପକ୍ଷେ ଅକ୍ଟୋବର ମାସରେ ସୃଷ୍ଟି ହେବାକୁ ଥିବା ଘୂର୍ଣ୍ଣିବଳୟ ଉପରେ ସ୍ବତନ୍ତ୍ର ନଜର ରଖାଯାଇଛି ।
ଲକ୍ଷ୍ନୗେ: ଆଜି ପଞ୍ଚଭୂତରେ ଲୀନ ହେବେ ଗରିବଙ୍କ ଗଡ ଫାଦର ତଥା ଉତ୍ତରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ମୁଲାୟମ ସିଂ ଯାଦବ। ସମାଜବାଦୀ ପାର୍ଟି ପ୍ରତିଷ୍ଠାତା ମୁଲାୟମଙ୍କ ଆଜି ହେବେ ଶେଷକୃତ୍ୟ । ଉତ୍ତର ପ୍ରେଦଶ ସେଫାଇରେ ହେବ ଅନ୍ତିମ ସଂସ୍କାର । ୮୨ ବର୍ଷ ବୟସରେ ଗତକାଲି ଆଖି ବୁଜିଥିଲେ ମୁଲାୟମ ।
ରାମ ମନୋହର ଲୋହିୟା ଓ ରାଜ ନାରାୟଣଙ୍କ ସମାଜବାଦୀ ଆଦର୍ଶରେ ଅନୁପ୍ରାଣୀତ ମୁଲାୟମ ପ୍ରତିଷ୍ଠା କରିଥିଲେ ସମାଜବାଦୀ ପାର୍ଟି। ଦଳରେ ସବୁବର୍ଗ, ସବୁ ଧର୍ମର ପ୍ରତିନିଧିତ୍ବକୁ ଦେଇଥିଲେ ଗୁରୁତ୍ବ । ୧୦ ଥର ବିଧାୟକ, ୭ ଥର ସାଂସଦ ଓ ୩ ଥର ମୁଖ୍ୟମନ୍ତ୍ରୀ ଓ ଥରେ କେନ୍ଦ୍ରମନ୍ତ୍ରୀ ହୋଇ ପ୍ରତିପାଦିତ କରିଥିଲେ ନିଜର ରାଜନୈତିକ ଦକ୍ଷତା । ମୁଲାୟମଙ୍କ ବିୟୋଗରେ ସମସ୍ତ ଜାତୀୟ ଓ ଆଞ୍ଚଳିକ ଦଳରେ ଶୋକ ପ୍ରକାଶ ପାଇଥିଲା। ଉତ୍ତରପ୍ରଦେଶରେ ୩ଦିନିଆ ଶୋକ ଘୋଷଣା କରାଯାଇଛି।
