ଭୁବନେଶ୍ବର: ସିଙ୍ଗଲ ଓ୍ୱିଣ୍ଡୋ ଜରିଆରେ ୧୧ଟି ପ୍ରକଳ୍ପକୁ ମିଳିଲା ମଞ୍ଜୁରୀ । ରାଜ୍ୟକୁ ଆସିଲା ୨ ହଜାର ୨୫୩ କୋଟି ଟଙ୍କାର ପୁଞ୍ଜିନିବେଶ । ଏସବୁ ପ୍ରକଳ୍ପରେ ୩ ହଜାର ୮୧୭ ଜଣଙ୍କୁ ମିଳିବ ସିଧାସଳଖ ନିଯୁକ୍ତି ସୁଯୋଗ ।
ଏଥିରେ ସୁନ୍ଦରଗଡ଼ରେ ହେବ ଇସ୍ପାତ ଓ ଫେରୋ ଆଲୟଜ ପ୍ଲାଣ୍ଟ । ୫୫୩.୨୫ କୋଟି ଟଙ୍କା ନିବେଶରେ ହେବ ୨ଟି ପ୍ଲାଣ୍ଟ । ଖୋର୍ଦ୍ଧାରେ ଆଦାନୀ ଏଣ୍ଟରପ୍ରାଇଜ ଲିମିଟେଡ୍ କରିବ ଡାଟା ସେଣ୍ଟର । ଏହି ଡାଟା ସେଣ୍ଟରରେ ୫୦୦ କୋଟି ଟଙ୍କା ନିବେଶରେ ୨୦୦ ଜଣଙ୍କୁ ମିଳିବ ନିଯୁକ୍ତି । ସେହିପରି କେନ୍ଦୁଝରରେ ହେବ ଲୁହାଛଡ଼ ତିଆରି କାରଖାନା । ଆର୍ଯ୍ୟ ଆଇରନ୍ ଆଣ୍ଡ ଷ୍ଟିଲ୍ କମ୍ପାନୀ ୧୭୫.୭୫କୋଟି ନିବେଶ କରିବ । କାରଖାନାରେ ୬୦୦ ଜଣଙ୍କୁ ସିଧାସଳଖ ନିଯୁକ୍ତି ମିଳିବ । ଗଞ୍ଜାମରେ ହେବ ଟିଟାନିୟମ ସ୍ଲାଗ ଓ ପିଗ୍ ଆଇରନ୍ କାରଖାନା । ଆରଆରଏଲଟି ପ୍ରାଇଭେଟ୍ ଲିମିଟେଟ୍ କାରଖାନା ପାଇଁ ୧୫୦ କୋଟି ନିବେଶ କରିବ । କାରଖାନାରେ ୪୦୦ ଜଣଙ୍କୁ ନିଯୁକ୍ତି ସୁଯୋଗ ମିଳିବ । ସମ୍ବଲପୁରରେ ୧୦୧ କୋଟି ଟଙ୍କାରେ ହେବ ତରଳ ଆଲୁମିନିୟମ ଆଲୟଜ ପ୍ଲାଣ୍ଟ । ସେହିପରି କଟକ, ଢେଙ୍କାନାଳ, ଯାଜପୁରରେ ମଧ୍ୟ ପୁଞ୍ଜି ନିବେଶ ପାଇଁ ମଞ୍ଜୁରୀ ମିଳିଛି ।
