ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ସୁରକ୍ଷାରେ ତ୍ରୁଟି । ହେଲିପ୍ୟାଡରେ ଫସିଲା ରାଷ୍ଟ୍ରପତିଙ୍କ ଚପର୍ । ପ୍ରମାଦମ ଷ୍ଟାଡିୟମର ହେଲିପ୍ୟାଡରେ ଫସିଲା ଚପର୍ । ଧସିଗଲା ହେଲିପ୍ୟାଡର ଏକ ଅଂଶ । ହେଲିକପ୍ଟରକୁ ଠେଲି ବାହାର କଲେ ପୋଲିସ ଓ ଅଗ୍ନିଶମବାହିନୀ । ୪ ଦିନିଆ କେରଳ ଗସ୍ତରେ ଅଛନ୍ତି ରାଷ୍ଟ୍ରପତି । ଆଜି ରାଷ୍ଟ୍ରପତିଙ୍କ ସାବରିମାଲା ଦର୍ଶନ କାର୍ଯ୍ୟକ୍ରମ ।
ପ୍ରଧାନମନ୍ତ୍ରୀ ମୋଦୀଙ୍କ ସହ କଥାହେଲେ ଟ୍ରମ୍ପ
ନନ୍ଦିଘୋଷ ବ୍ୟୁରୋ: ରୁଷଠାରୁ ଭାରତ ତୈଳ କିଣିବା ପ୍ରସଙ୍ଗ। ଭାରତ ରୁଷ ଠାରୁ ତେଲ କିଣିବା କମ କରିବ ବୋଲି ପୁଣି କହିଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ଦୀପାବଳି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ କଥା ହୋଇଥିଲେ ରାଷ୍ଟ୍ରପତି ଟ୍ରମ୍ପ। ପ୍ରଧାନମନ୍ତ୍ରୀ ମୋଦି ରୁଷ ଠାରୁ ତୈଳ କିଣିବା କମ କରିବାକୁ ପ୍ରତିଶ୍ରୁତି ଦେଇଥିବା କହିଛନ୍ତି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ରାଷ୍ଟ୍ରପତି ଟ୍ରମ୍ପ ପ୍ରଧାନମନ୍ତ୍ରୀ ମୋଦିଙ୍କ ସହ ଫୋନରେ କଥା ହୋଇଥିଲେ। ଦୁଇ ଦେଶ ମଧ୍ୟରେ ବାଣିଜ୍ୟ ବିଷୟରେ ଆଲୋଚନା କରିଥିବା କହିଛନ୍ତି। ତେବେ ରୁଷଠାରୁ ଭାରତ ତୈଳ କ୍ରୟ ପ୍ରସଙ୍ଗ ନେଇ ପୁଣି ଏହି କଥା ଦୋହରାଇଛନ୍ତି ରାଷ୍ଟ୍ରପତି ଟ୍ରମ୍ପ। ପ୍ରଧାନମନ୍ତ୍ରୀ ମୋଦିଙ୍କ ଜଣେ ଭଲ ବନ୍ଧୁ ବୋଲି କହିଥିଲେ ଟ୍ରମ୍ପ। ହ୍ୱାଇଟ୍ ହାଉସର ଓଭାଲ୍ ଅଫିସରେ ଗଣମାଧ୍ୟମକୁ ବିବୃତି ରକି ଏହା କହିଛନ୍ତି ଟ୍ରମ୍ପ। ରାଷ୍ଟ୍ରପତି ଟ୍ରମ୍ପ ଏହା ମଧ୍ୟ ଚେତାବନୀ ଦେଇଛନ୍ତି ଯେ ଯଦି ଭାରତ ଏପରି ନ କରେ ତେବେ ଅଧିକରୁ ଅଧିକ ଟାରଫର ସମ୍ମୁଖୀନ ହେବ। ହ୍ଵାଇଟହାଉସରେ ଦୀପାବଳି ପାଳନ କରିଥିଲେ ମୋଦି। ଏହି ଅବସରରେ ଦୀପ ଜାଳି ଭାରତୀୟ ସମୁଦାୟଙ୍କୁ ଦୀପାବଳିର ଶୁଭକାମନା ଜଣାଇଥିଲେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ଆମେରିକା ଭାରତୀୟ ଆମଦାନୀ ଉପରେ 50% ପର୍ଯ୍ୟନ୍ତ ଶୁଳ୍କ ଲଗାଇଛି। ଯେଉଁଥିରେ ଗତ ଅଗଷ୍ଟରେ ରୁଷଠାରୁ ତୈଳ କ୍ରୟ ଉପରେ ଅତିରିକ୍ତ 25% ଶୁଳ୍କ ଲଗାଯାଇଛି।
ତାମିଲନାଡୁରେ ଲଘୁଚାପ ଜନିତ ବର୍ଷାର ତାଣ୍ଡବ
ନନ୍ଦିଘୋଷ ବ୍ୟୁରୋ: ତାମିଲନାଡୁରେ ଲଘୁଚାପ ଜନିତ ବର୍ଷାର ତାଣ୍ଡବ। ପ୍ରବଳ ବର୍ଷା ଓ ପବନରୁ ରାଜଧାନୀ ଚେନ୍ନାଇରେ ଉପୁଡିଲା ଗଛ। ଅନେକ ସ୍ଥାନରେ ଗଛ ଉପୁଡି ବିଦ୍ୟୁତ ତାର ଛିଡି ଯାଇଛି। ରାସ୍ତାରେ ଗଛ ପଡି ଯାତାୟାତ ବାଧାପ୍ରାପ୍ତ ହୋଇଛି। ବର୍ଷା ସ୍ଥିତି ଲାଗି ରହିଥିବାରୁ ଆଜି ୯ ଜିଲ୍ଲାରେ ସ୍କୁଲ ଛୁଟି ଘୋଷଣା କରିଛନ୍ତି ତାମିଲନାଡୁ ସରକାର। ଥୁଥୁକୁଡ଼ିରେ ଜଳମଗ୍ନ ହୋଇପଡିଛି ଅନେକ ଅଂଚଳ। ତଳିଆ ଅଂଚଳରେ ପାଣି ଜମି ଜଳବନ୍ଦୀ ସ୍ଥିତି ସୃଷ୍ଟି ହୋଇଛି। ଆଜି ପାଇଁ ସ୍କୁଲ ଛୁଟି ଘୋଷଣା । ଚେନ୍ନାଇ, ତିରୁଭଲ୍ଲୁର, ଭିଲିପୁରମ, କାଲାକୁରିଚି, କୁଡାଲୋର, ତଂଜଭୁର, ତିରୁଭରୁର, ମାଇଲାଦୁଥୁରାଇରେ ସ୍କୁଟ ଛୁଟି ଘୋଷଣା କରିଛନ୍ତି ସରକାର।
ଯୁବତୀଙ୍କ ଉପସ୍ଥିତ ବୁଦ୍ଧି ଯୋଗୁଁ ଅପହରଣ ଉଦ୍ୟମ ପଣ୍ଡ
ନନ୍ଦିଘୋଷ ବ୍ୟୁରୋ: ଯୁବତୀଙ୍କ ଉପସ୍ଥିତ ବୁଦ୍ଧି ଯୋଗୁ ଅପହରଣ ଉଦ୍ୟମ ପଣ୍ଡ। ଘଟଣା ଯାଜପୁର ଜିଲ୍ଲା ଧର୍ମଶାଳା ଥାନା ଅଞ୍ଚଳର। ଯୋଗଡା ଓ ମୁରାରିପୁର ଗାଁର ଦୁଇ ଯୁବତୀ ଜାରକା ଅଞ୍ଚଳରେ ଏକ ସୁନା ଦୋକାନରେ କାମ କରନ୍ତି। ଗତକାଲି ରାତିରେ ଦୋକାନରୁ କାମ ସାରି ଘରକୁ ଫେରୁଥିବା ସମୟରେ କଣ୍ଟାମାଳିଆ ଓ ଥାନୁଆଳ ମଝି ରାସ୍ତାରେ ଜଣେ ଯୁବକ ସ୍କୁଟିରେ ଆସୁଥିବା ଦୁଇ ଯୁବତୀଙ୍କୁ ଅଟକାଇ ଥିଲେ। ପୂର୍ବ ଯୋଜନା ଅନୁସାରେ ଆଉ ଏକ କାରରେ ୩ ଯୁବକ ଆସି ଜଣେ ଯୁବତୀଙ୍କୁ ଜୋରଜବରଦସ୍ତ କାର ଭିତରକୁ ଉଠାଇ ନେଇଥିଲେ। ଏହା ଦେଖି ସାଥିରେ ଥିବା ଅନ୍ୟ ଜଣେ ଯୁବତୀ ପାଟି କରିବା ସହ ରାସ୍ତାରେ ଯାଉଥିବା ଜଣେ ବାଇକ ଆରୋହୀଙ୍କୁ ସହାୟତା ପାଇଁ ଡାକିଥିଲେ। ବାଇକ ଆରୋହୀ ଆସିବା ପରେ କାରରୁ ଯୁବତୀଙ୍କୁ ବାହାର କରି ଦୁବୃର୍ତ୍ତ ସେଠାରୁ ଫେରାର ହୋଇ ଯାଇଥିଲେ। ଯୁବତୀ ଜଣକ ଗାଡି ଅଟକାଇଥିବା ବାଇକ ଆରୋହୀଙ୍କ ଗାଡିର ଚାବି ରଖି ଦେଇଥିଲେ। ଘଟଣାସ୍ଥଳରେ ଲୋକେ ପହଞ୍ଚିବା ପରେ ଜଣଙ୍କୁ ଅଟକ ରଖିଥିଲେ। ଘଟଣାସ୍ଥଳ ରେ ଧର୍ମଶାଳା ପୋଲିସ୍ ପହଞ୍ଚି ଅଟକ ଯୁବକଙ୍କୁ ଥାନାକୁ ନେଇଥିବା ବେଳେ ବାଇକ ଜବତ୍ କରିଛି। ଥାନାରେ ଅଭିଯୋଗ ପରେ ପୋଲିସ ଘଟଣାର ତଦନ୍ତ ଚଳାଇଛି। କେଉଁ କାରଣରୁ ଯୁବତୀଙ୍କୁ ଅପହରଣ କରୁଥିଲେ ସେ ନେଇ କାରଣ ଅସ୍ପଷ୍ଟ ରହିଛି।ଦିନକୁ ଦିନ ଧର୍ମଶାଳା ଅଞ୍ଚଳ ରେ ଚୋରି, ରାହାଜାନୀ ଡ଼କାୟତି ବଢ଼ି ଚାଲିଥିବା ବେଳେ ପୋଲିସ ପେଟ୍ରୋଲିଂ ବ୍ୟବସ୍ଥା କଡାକଡି କରିବା ପାଇଁ ଦାବୀ ହୋଇଛି…
ସାର ପରେ ଏବେ ଚାଷୀଙ୍କ ଚିନ୍ତା ବଢ଼ାଇଛନ୍ତି ବାରହା
ନନ୍ଦିଘୋଷ ବ୍ୟୁରୋ: ସାର ପରେ ଏବେ ପୁଣି ଚାଷୀଙ୍କୁ ଘାରିଛି ଫସଲ ସୁରକ୍ଷା ଚିନ୍ତା। ଗଞ୍ଜାମ ଜିଲ୍ଲା ଧରାକୋଟ ବ୍ଳକ ଜେନାପୁର ଗାଁରେ ଆତଙ୍କ ଖେଳାଇଛନ୍ତି ବାରହା। ଧାର କରଜ କରି ଚାଷ କରିଥିବା ଚାଷୀର ହେକ୍ଟର ହେକ୍ଟର ଫସଲ ନଷ୍ଟ କରୁଛନ୍ତି ବାରହା। ଅନ୍ୟ ଉପାୟ ନ ପାଇ ନିଜ ଜମିର ଫସଲକୁ ବାରାହା କବଳରୁ ରକ୍ଷା କରିବା ପାଇଁ ମଞ୍ଚା କରି ଜଗି ରହିଛନ୍ତି ଚାଷୀ। ପାଳି କରି ବିଲରେ ପହରା ଦେଉଛନ୍ତି ଚାଷୀ। ବାରହାକୁ ଘଉଡ଼ାଇବା ପାଇଁ ବାଣ ଫୁଟାଇବା ସହ ମାଇକ ଲଗାଇ ରାତି ଉଜାଗର ରହୁଥିବାର ଦୃଶ୍ୟ ଦେଖିବାକୁ ମିଳିଛି ।
ସ୍ତ୍ରୀ ମାନ୍ୟତା ଦାବିରେ କୋଡିଏ ଦିନ ହେଲା ପ୍ରେମିକ ଘରେ ଭିନ୍ନକ୍ଷମ ଯୁବତୀଙ୍କ ଧାରଣା
ନନ୍ଦିଘୋଷ ବ୍ୟୁରୋ: ଢେଙ୍କାନାଳ ପରଜଙ୍ଗ ଥାନା ବସନ୍ତପଡା ଗାଁରେ ଅଗ୍ନିକାଣ୍ଡ। ନିଆଁ ଲାଗି ଜଳିଯାଇଛି ଘର । ଅଗ୍ନିକାଣ୍ଡରେ ସ୍ତ୍ରୀ ମାନ୍ୟତା ଦାବିରେ କୋଡିଏ ଦିନ ହେବ ଧାରଣାରେ ବସିଥିବା ଦିବ୍ୟାଙ୍ଗ ପ୍ରେମିକା ଆହତ ହୋଇଛନ୍ତି । ଘରେ କେହି ନଥିବାବେଳେ ନିଆଁ ଲାଗିଥିବାବେଳେ ଲକ୍ଷାଧିକ ଟଙ୍କାର ସମ୍ପତ୍ତି ନଷ୍ଟ ହୋଇଛି। ଅଗ୍ନିକାଣ୍ଡର କାରଣ ଅସ୍ପଷ୍ଟ ରହିଥିବା ବେଳେ ଏ ନେଇ ଥାନାରେ ପୃଥକ ପୃଥକ ମାମଲା ଦାଏର ହୋଇଛି। ଘରଟି ସୁବ୍ରତ ସାହୁଙ୍କର ହୋଇଥିବା ବେଳେ ତାଙ୍କୁ ଜାଳିଦେବା ଉଦେଶ୍ୟରେ ଘରେ ନିଆଁ ଲଗାଯାଇଥିବା ପ୍ରେମିକା ଅଭିଯୋଗ କରିଛନ୍ତି। ସେପଟେ କେହି ଦୁର୍ବୁତ୍ତ ଘରେ ନିଆଁ ଲଗାଇ ଦେଇଥିବା ସୁବ୍ରତଙ୍କ ମା ଅଭିଯୋଗ କରିଛନ୍ତି । ଯୁବତୀଙ୍କ କହିବାନୁଯାୟୀ ବସନ୍ତପଡା ଗାଁର ସୁବ୍ରତ ସାହୁଙ୍କ ସହ ଦେଢବର୍ଷ ହେବ ତାଙ୍କର ପ୍ରେମ ସମ୍ପର୍କ ଥିଲା । କିନ୍ତୁ ଭିନ୍ନ ଜାତିର ହୋଇଥିବାରୁ ସୁବ୍ରତଙ୍କ ପରିବାର ଲୋକେ ଯୁବତୀଙ୍କୁ ଗ୍ରହଣ କରୁନଥିଲେ । ତେବେ ଅଗ୍ନିକାଣ୍ଡ ପରେ ମଧ୍ୟ ଯୁବତୀ ଜଣକ ସ୍ତ୍ରୀ ମାନ୍ୟତା ଦାବିରେ ଘର ସାମ୍ନାରେ ଧାରଣାରେ ବସିଛନ୍ତି। ପୋଲିସ ଘଟଣାର ତଦନ୍ତ ଜାରି ରଖିଛି ।
ବାଲେଶ୍ଵର ସୋର ଜେଲରୁ ଝାଡ଼ଖଣ୍ଡ ଅଂଚଳର ଜଣେ କଏଦୀ ଫେରାର
ନନ୍ଦିଘୋଷ ବ୍ୟୁରୋ: ବାଲେଶ୍ୱର ଜିଲ୍ଲା ସୋର ଜେଲରୁ ଜଣେ କଏଦୀ ଫେରାର । ଏକ ଚୋରି କେସରେ ସିମୁଳିଆ ପୋଲିସ ଦ୍ୱାରା ଗିରଫ ହୋଇ ସୋର ଜେଲରେ ଥିଲା। ଫେରାର କଏଦୀ ଝାଡ଼ଖଣ୍ଡ ଅଞ୍ଚଳର ଦୀପକ ରାଏ। ଜେଲରେ ଥିବା ପାଚେରୀ ଡେଇଁ ଫେରାର ହୋଇଯାଇଛି । ସଂନ୍ଧ୍ୟାରେ କଏଦୀ ମାନଙ୍କୁ ଗଣତି ସମୟରେ ଜଣେ କମ ଥିବା ଜାଣିବାକୁ ପାଇଥିଲେ ଜେଲ କର୍ତ୍ତୃପକ୍ଷ । ପରେ ବିଭିନ୍ନ ସ୍ଥାନରେ ଖୋଜାଖୋଜି ପରେ ନମିଳିବାରୁ ସୋର ପୋଲିସ ନିକଟରେ ଅଭିଯୋଗ କରିଛନ୍ତି ଜେଲର ବୈଲୋଚନ ଦାସ। ଅଭିଯୋଗ ପରେ ପୋଲିସ ବିଭିନ୍ନ ଷ୍ଟେସନ, ବସଷ୍ଟାଣ୍ଡରେ ଫେରାର କଏଦୀକୁ ଖୋଜୁଥିବା ସୂଚନା ଦେଇଛନ୍ତି ଜେଲର । ଏ ପର୍ଯ୍ୟନ୍ତ ଫେରାର କଏଦୀର କୌଣସି ସନ୍ଧାନ ମିଳିପାରିନି।
ଗୁଣୁପୁର ପୁରୁଣା ବସଷ୍ଟାଣ୍ଡ ନିକଟରେ ଥିବା ଡ୍ରେସ୍ ଦୋକାନରେ ଭୟାବହ ଅଗ୍ନିକାଣ୍ଡ
ନନ୍ଦିଘୋଷ ବ୍ୟୁରୋ: ଗୁଣୁପୁର ପୁରୁଣା ବସଷ୍ଟାଣ୍ଡ ନିକଟ ଏକ କପଡ଼ା ଦୋକାନରେ ଭୟବହ ଅଗ୍ନିକାଣ୍ଡ ।ଲକ୍ଷାଧିକ ଟଙ୍କାର ପୋଷାକ ପୋଡି ନଷ୍ଟ ହୋଇଥିବା ସୂଚନା ରହିଛି। ଗୁଣୁପୁର ଓ ଗୁମୁଡା ଅଗ୍ନିଶମ ବାହିନୀ ଦୀର୍ଘ ୪ ଘଣ୍ଟାରୁ ଅଧିକ ସମୟ ପରିଶ୍ରମ ପରେ ନିଆଁକୁ ଆୟତ୍ତ କରିଥିଲେ। ସର୍ଟ ସର୍କିଟରୁ ଅଗ୍ନିକାଣ୍ଡ ଘଟିଥିବା ଅନୁମାନ କରୁଛି ଅଗ୍ନିଶମବାହିନୀ। ବିଳମ୍ବିତ ରାତିରେ ନିଆଁ ଲାଗିଥିବାବେଳେ ତିନି ମହଲା କୋଠା ଉପରେ ଫସିଥିବା ୪ ଜଣଙ୍କୁ ଉଦ୍ଧାର କରିଛି ଅଗ୍ନିଶମବାହିନୀ। କେମିତି ଲାଗିଲା ନିଆଁ ଅନୁସନ୍ଧାନ କରୁଛି ଅଗ୍ନିଶମବାହିନୀ।
ଆନନ୍ଦ ପଲ୍ଲୀ କ୍ଲିନିକ୍ ନାଁରେ ଆସିଲା ସାଙ୍ଘାତିକ ଅଭିଯୋଗ: ଭୁଲ୍ ଅସ୍ତ୍ରୋପଚାର ଯୋଗୁଁ ଚାଲିଗଲା ମହିଳାଙ୍କ ଜୀବନ
ନନ୍ଦିଘୋଷ ବ୍ୟୁରୋ: ପୁରୀ ଜିଲ୍ଲା ନିମାପଡ଼ା ବିଜ୍ଞାପିତ ଅଞ୍ଚଳ ପରିଷଦ ଅଧିନ କେନାଲ ରୋଡରେ ଥିବା ଆନନ୍ଦ ପଲ୍ଲୀ କ୍ଲିନିକ୍ ନାରେ ଆସିଲା ସାଙ୍ଘାତିକ ଅଭିଯୋଗ। ତ୍ରୁଟିପୂର୍ଣ୍ଣ ଅସ୍ତ୍ରୋପଚାର ଯୋଗୁଁ ଚାଲିଗଲା ମହିଳାଙ୍କ ଜୀବନ। ସୂଚନା ଅନୁସାରେ, ଛତାହାର ଗାଁର ଜିତେନ୍ଦ୍ର କୁମାର ନାୟକ ନିଜ ପତ୍ନୀଙ୍କ ପ୍ରସବ ଚିକିତ୍ସା ପାଇଁ ଆନନ୍ଦ ନର୍ସିଂ ହୋମ ଆଣିଥିଲେ। ହେଲେ ସେଠାରେ ତାଙ୍କ ଚିକିତ୍ସା କରୁଥିବା ଡାକ୍ତର ସରୋଜାଲକ୍ଷ୍ମୀ ଦାଶ ଭୁଲ ଅସ୍ତ୍ରୋପଚାର କରିବା ସହ ନର୍ସିଂହୋମ କର୍ମଚାରୀଙ୍କ ଅବହେଳା ଯୋଗୁ ମହିଳାଙ୍କ ଜୀବନ ଚାଲିଯାଇଥିବା ଅଭିଯୋଗ ଆଣିଛନ୍ତି ପରିବାର ଲୋକେ। ଏନେଇ ନର୍ସିଂହୋମ କର୍ତ୍ତୃପକ୍ଷ କିମ୍ବା ଚିକିତ୍ସା କରୁଥିବା ଡାକ୍ତରଙ୍କ ପ୍ରତିକ୍ରିୟା ମିଳିପାରିନଥିବା ବେଳେ, ଅଭିଯୋଗ ଆଧାରରେ ପୋଲିସ ଘଟଣାର ତଦନ୍ତ କରୁଛି।
ଅଦିନିଆ ରଥଯାତ୍ରା ବନ୍ଦ କରିବାକୁ ଇସ୍କନର ଅକ୍ଷମତା ପ୍ରକାଶ ପରେ କ୍ଷୁବ୍ଧ ଗଜପତି ମହାରାଜ
ନନ୍ଦିଘୋଷ ବ୍ୟୁରୋ: ଇସ୍କନର ଅଦିନିଆ ରଥଯାତ୍ରାକୁ ନେଇ ପୁଣି କ୍ଷୁବ୍ଧ ଶ୍ରୀମନ୍ଦିର ପରିଚାଳନା କମିଟି ଅଧ୍ୟକ୍ଷ ଗଜପତି ଦିବ୍ୟସିଂହ ଦେବ । ଦେଶ ଓ ବିଦେଶରେ ଇସ୍କନ ପକ୍ଷରୁ ସ୍ନାନଯାତ୍ରା ଓ ରଥଯାତ୍ରା ନିର୍ଦ୍ଧାରିତ ତିଥିରେ କରିଥିବା ଅପିଲର ଉତ୍ତର ଦେଇଛନ୍ତି ମାୟାପୁର ସ୍ଥିତ ଇସ୍କନ ପରିଚାଳନା କମିଟିର ଅଧ୍ୟକ୍ଷ ଗୋବର୍ଦ୍ଧନ ଦାସ । ଗତ ଅକ୍ଟୋବର ୧୯ ତାରିଖରେ ପୁରୀ ଗଜପତିଙ୍କୁ ଏକ ଚିଠିରେ ଇସ୍କନ ପରିଚାଳନା କମିଟି ଅଧ୍ୟକ୍ଷ ସ୍ନାନଯାତ୍ରାକୁ ନିର୍ଦ୍ଧାରିତ ତିଥି ଅର୍ଥାତ ଜ୍ୟେଷ୍ଠ ପୂର୍ଣ୍ଣିମାରେ କରିବାକୁ ସହମତି ହୋଇଛି । କିନ୍ତୁ ବିଦେଶରେ ରଥଯାତ୍ରାକୁ ନିର୍ଦ୍ଧାରିତ ତିଥି ଅର୍ଥାତ ଆଷାଢ ଶୁକ୍ଳପକ୍ଷ ଦ୍ବିତୀୟ ତିଥି କିମ୍ବା ଶ୍ରୀଜଗନ୍ନାଥଙ୍କ ନବଦିନାତ୍ମକ ଯାତ୍ରାର ନିର୍ଦ୍ଧାରିତ ନଅ ଦିନ ମଧ୍ୟରେ କରିବାକୁ ଗଜପତି କରିଥିବା ଅପିଲକୁ ଇସ୍କନ କର୍ତ୍ତୃପକ୍ଷ ପାଳନ କରିବାକୁ ନିଜର ଅକ୍ଷମତା ପ୍ରକାଶ କରିଛନ୍ତି । ଇସ୍କନ କର୍ତ୍ତୃପକ୍ଷଙ୍କ ଏହି ଚିଠିର ପ୍ରତି ଉତ୍ତର ଦେଇଛନ୍ତି ଗଜପତି ।
ବିଦେଶରେ କେବଳ ସପ୍ତାହର ଶେଷ ଦିନରେ ରଥଯାତ୍ରା କରାଯାଇପାରିବ ବୋଲି ଇସ୍କନ ପକ୍ଷରୁ କୁହାଯାଇଛି । କିନ୍ତୁ ଆଷାଢ ଶୁକ୍ଲ ପକ୍ଷ ଦ୍ବିତୀୟା ତିଥିରୁ ଆରମ୍ଭ ହେଉଥିବା ନଅ ଦିନ ମଧ୍ୟରେ ପଡୁଥିବା ସପ୍ତାହନ୍ତରେ ବିଦେଶରେ ରଥଯାତ୍ରା କରିବାକୁ ଗଜପତି ମହାରାଜ ପ୍ରସ୍ତାବ ଦେଇଛନ୍ତି । କିନ୍ତୁ ନିର୍ଦ୍ଧାରିତ ନଅ ଦିନ ବାହାରେ ରଥଯାତ୍ରା କରାଯିବା ଶ୍ରୀଜଗନ୍ନାଥ ସଂସ୍କୃତି ବିରୋଧୀ ବୋଲି ଗଜପତି କହିଛନ୍ତି । ବିଦେଶରେ ଲୋକଙ୍କ ଉପସ୍ଥିତି, ପ୍ରଶାସନିକ ଅନୁମତି, ସେଠାକାର ପରମ୍ପରାକୁ ଦୃଷ୍ଟିରେ ରଖି ସପ୍ତାହନ୍ତରେ ରଥଯାତ୍ରା କରାଯାଉ । କିନ୍ତୁ କୌଣସି ପରିସ୍ଥିତିରେ ନିର୍ଦ୍ଧାରିତ ନଅ ଦିନର ତିଥିକୁ ପରିବର୍ତ୍ତନ କରାଯିବା ଉଚିତ ନୁହେଁ । କୃଷ୍ଣ ଚେତନା କିମ୍ବା ଶ୍ରୀଜଗନ୍ନାଥ ସଂସ୍କୃତିର ପ୍ରଚାର ଇସ୍କନର ଏକମାତ୍ର କାର୍ଯ୍ୟକ୍ରମ ନୁହେଁ । ହରିନାମ ସଂକିର୍ତ୍ତନ, ପ୍ରବଚନ, ବିଭିନ୍ନ ଧାର୍ମିକ ପୁସ୍ତକ ବଣ୍ଟନ ଭଳି କାର୍ଯ୍ୟକ୍ରମ ବର୍ଷତମାମ ଜାରି ରହିଛି । କିନ୍ତୁ ଏହି କାର୍ଯ୍ୟକ୍ରମ ମଧ୍ୟରେ ରଥଯାତ୍ରାର ପରମ୍ପରା ଓ ପବିତ୍ରତାକୁ ନଷ୍ଟ କରାଯାଇପାରିବ ନାହିଁ ବୋଲି ଗଜପତି କହିଛନ୍ତି ।
ସେହିଭଳି ବିଭିନ୍ନ ଇସ୍କନ ମନ୍ଦିରରେ ପ୍ରତିଷ୍ଠା ପାଇଥିବା ଉତ୍ସବ ବିଗ୍ରହକୁ ନେଇ ଯାତ୍ରା କରି ତାହାକୁ ରଥଯାତ୍ରାର ନାମ ଦେଇ ଭକ୍ତ ମଧ୍ୟରେ ଦ୍ବନ୍ଦ୍ବ ସୃଷ୍ଟି ନକରିବାକୁ ଗଜପତି ଅପିଲ କରିଛନ୍ତି । ପରିଚାଳନା କମିଟିର ନିଷ୍ପତ୍ତି ଅନୁଯାୟୀ ଗତ ସେପ୍ଟେମ୍ବର ୬ ତାରିଖରେ ଇସ୍କନକୁ ଲେଖାଯାଇଥିବା ଚିଠିରେ ସବୁ କିଛି ସ୍ପଷ୍ଟ କରାଯାଇଥିଲା । ଏପରିକି ଶ୍ରୀମନ୍ଦିରରେ ପୂଜା ପାଉଥିବା ଚତୁର୍ଦ୍ଧା ଦାରୁ ବିଗ୍ରହ ହେଉଛନ୍ତି ମୂଳ ବିଗ୍ରହ । ମୂଳ ବିଗ୍ରହକୁ ଶ୍ରୀମନ୍ଦିର ଗର୍ଭଗୃହରୁ କେବେ ସ୍ଥାନାନ୍ତର କରାଯାଏ ନାହିଁ । କେବଳ ମହାପ୍ରଭୁଙ୍କ ନିର୍ଦ୍ଧେଶରେ ବର୍ଷକୁ ଦୁଇଟି ପବିତ୍ର ତିଥିରେ ହିଁ ମୂଳ ବିଗ୍ରହଙ୍କୁ ଗର୍ଭଗୃହରୁ ବାହାରକୁ ଅଣାଯାଇଥାଏ । ତେଣୁ ନିର୍ଦ୍ଧାରିତ ତିଥିକୁ ବାଦ ଦେଇ ଅନ୍ୟ ଦିନରେ ମୂଳ ବିଗ୍ରହକୁ ସେମାନଙ୍କ ଆଶନରୁ ସ୍ଥାନାନ୍ତର କରାଯିବା ଉଚିତ ନୁହେଁ ।
ସେହିଭଳି ମହାଶିବରାତ୍ରୀ, ଜନ୍ମାଷ୍ଟମୀ, ରାମନବମୀ, ଗଣେଶ ଚତୁର୍ଥୀ, ହୋଲି, ଦୀପାବଳି, ଦୁର୍ଗାପୂଜା, ଦଶହରା, ବସନ୍ତ ପଞ୍ଚମୀ ଭଳି ପବିତ୍ର ପବିତ୍ର ଦିନଗୁଡିକ ସାରା ବିଶ୍ବରେ କ୍ୟାଲେଣ୍ଡର ନିର୍ଦ୍ଧାରିତ ଦିନ ବା ତିଥିରେ ଅନୁଷ୍ଠିତ ହୋଇଥାଏ । ଖ୍ରୀଷ୍ଟମାସ ହେଉ କି ବୈଶାଖୀ ନିର୍ଦ୍ଧାରିତ ଦିନରେ ହିଁ ପାଳନ ହୁଏ। କୌଣସି ସ୍ଥିତିରେ ବିଦେଶରେ ଏହିସବୁ ଦିବସ ପାଳନରେ କୌଣସି ପରିବର୍ତ୍ତନ ହେଉନାହିଁ । ତେଣୁ ଶ୍ରୀଜଗନ୍ନାଥଙ୍କ ରଥଯାତ୍ରା ପାଳନରେ ମଧ୍ୟ କୌଣସି ପ୍ରକାର ଯୁକ୍ତି କିମ୍ବା ଆଳର ଆବଶ୍ୟକତା ନାହିଁ ବୋଲି ଗଜପତି ସ୍ପଷ୍ଟ କରିଦେଇଛନ୍ତି ।
ସ୍କନ୍ଦ ପୂରାଣ ଅନୁଯାୟୀ ରଥଯାତ୍ରା ପାଇଁ ଦିନ ଓ ତିଥି ନିଜେ ମହାପ୍ରଭୁ ହିଁ ନିର୍ଦ୍ଧାରିତ କରିଛନ୍ତି । ଯେଭଳି ଶ୍ରୀକୃଷ୍ଣଙ୍କ ଆଦେଶକୁ ଆବମାନନା କରାଯାଇପାରିବ ନାହିଁ, ସେହିଭଳି ଶ୍ରୀଜଗନ୍ନାଥଙ୍କ ନିର୍ଦ୍ଦେଶକୁ ମଧ୍ୟ ଅବଜ୍ଞା କରାଯିବା ଉଚିତ ନୁହେଁ । ସନାତନ ବୈଦିକ ଧର୍ମର ପ୍ରଚାର ପାଇଁ ଗଠିତ ଇସ୍କନ ସନାତନ ଧର୍ମର ନୀତି ନିୟମକୁ ଅନୁପାଳନ କରିବାକୁ ବାଧ୍ୟ । ଦେଶ ଭିତରେ ଓ ବିଦେଶରେ ଇସ୍କନର ଅନ୍ୟ ସବୁ ପରମ୍ପରା ଭଳି ରଥଯାତ୍ରା ମଧ୍ୟ ନିର୍ଦ୍ଧାରିତ ତିଥିରେ ପାଳନ କରାଯିବା ଉଚିତ । କିନ୍ତୁ ବିଦେଶରେ ଅଦିନିଆ ରଥଯାତ୍ରା ଦେଶ ବିଦେଶରେ ରହୁଥିବା ଅଗଣିତ ଶ୍ରୀଜଗନ୍ନାଥ ଭକ୍ତଙ୍କ ଧର୍ମୀୟ ଭାବନାକୁ ଆଘାତ ଦେଉଛି । ଇସ୍କନର ଏଭଳି ନୀତି ବିରୋଧୀ କାର୍ଯ୍ୟକୁ ଜଗଦଗୁରୁ ଶଙ୍କରାଚାର୍ଯ୍ୟ ମଧ୍ୟ ନାପସନ୍ଦ କରିଛନ୍ତି । ତେଣୁ ଦେଶ ବିଦେଶରେ ରଥଯାତ୍ରା ନିର୍ଦ୍ଧାରିତ ତିଥି କିମ୍ବା ସେହି ନଅ ଦିନ ମଧ୍ୟରେ ପାଳନ କରିବାକୁ ପୁଣି ଥରେ ଇସ୍କନ କର୍ତ୍ତୃପକ୍ଷଙ୍କୁ ଗଜପତି ଅପିଲ କରିଛନ୍ତି ।