ନନ୍ଦିଘୋଷ ବ୍ୟୁରୋ : ପୁରୀ ବେଳାଭୂମିରେ ବାଲୁକାକଳାରେ ନବ ନିର୍ବାଚିତ ଉପରାଷ୍ଟ୍ରପତିଙ୍କୁ ଶୁଭେଚ୍ଛା। ଉପରାଷ୍ଟ୍ରପତି ନିର୍ବାଚନ ଅବସରରେ ପ୍ରସିଦ୍ଧ ବାଲୁକାଶିଳ୍ପୀ ସୁଦର୍ଶନ ପଟ୍ଟନାୟକ ପୁରୀ ବେଳାଭୂମିରେ ଏକ ବାଲୁକାକଳା ତିଆରି କରିଛନ୍ତି। ଏହି କଳାକୃତିରେ ନବନିର୍ବାଚିତ ଉପରାଷ୍ଟ୍ରପତିଙ୍କ ପ୍ରତିକୃତି ନିର୍ମାଣ କରିଛନ୍ତି ସୁଦର୍ଶନ। ଯାହା ଦେଖିବାକୁ ବେଶ୍ ଆକର୍ଷଣୀୟ ହୋଇଛି। ଏହା ସହ ସୁଦର୍ଶନ ବେଳାଭୂମିରେ ଅଭିନନ୍ଦନ ସିପି ରାଧାକୃଷ୍ଣନ ବୋଲି ଲେଖି ଶୁଭେଚ୍ଛା ଜଣାଇଛନ୍ତି। ସୁଦର୍ଶନଙ୍କ ବାଲୁକାକଳା ପ୍ରାୟ ୨୦ ଫୁଟ ଲମ୍ବା ଏବଂ ୮ ଫୁଟ ଉଚ୍ଚତା ବିଶିଷ୍ଟ ହୋଇଛି। ସୁଦର୍ଶନ ତାଙ୍କ ବାଲୁକାକଳା ଜରିଆରେ ନବ ନିର୍ବାଚିତ ଉପରାଷ୍ଟ୍ରପତିଙ୍କୁ ଶୁଭେଚ୍ଛା ଏବଂ ଶୁଭକାମନା ଜଣାଇଛନ୍ତି। ବାଲୁକାଶିଳ୍ପୀ ସୁଦର୍ଶନ ଏହି ବାଲୁକାକଳାକୁ ପ୍ରସ୍ତୁତ କରିବାକୁ ପ୍ରାୟ ୧୦ ଟନ୍ ବାଲି ବ୍ୟବହାର କରିଛନ୍ତି।
ଚୋରଙ୍କ ଠାରୁ ବ୍ୟବସାୟର ସୁରକ୍ଷା ପାଇଁ ସିସିଟିଭି ଲାଗୁଥିବା ବେଳେ ସିସିଟିଭି ଲୁଟୁଛନ୍ତି ଲୁଟେରା
ନନ୍ଦିଘୋଷ ବ୍ୟୁରୋ : ଚୋରଙ୍କ ଠାରୁ ବ୍ୟବସାୟର ସୁରକ୍ଷା ପାଇଁ ସିସିଟିଭି ଲାଗୁଥିବା ବେଳେ ସିସିଟିଭି ଲୁଟୁଛନ୍ତି ଲୁଟେରା। ଗୋଟିଏ ରାତିରେ ଭଦ୍ରକ ସହର ଓ ଏହାର ଆଖପାଖ ଅଞ୍ଚଳର ଦୋକାନରୁ ୫୦ରୁ ଅଧିକ ସିସିଟିଭି ଲୁଟିନେଲେ ଲୁଟେରା। ଯାହାକୁ ନେଇ ଭଦ୍ରକ ଟାଉନ ଥାନା ଓ ଗ୍ରାମାଞ୍ଚଳ ଥାନାରେ ଅଭିଯୋଗ ବଢିପାରେ ଲାଗିଛି। ଏକ କଳା ରଙ୍ଗର ଇଲେକ୍ଟ୍ରିକ୍ ଗାଡିରେ ବିଳମ୍ବିତ ରାତିରେ ଦୁଇ କଳା ଧଳା ସାର୍ଟ ପିନ୍ଧା ଲୁଟେରା ସହର ସାରା ବୁଲି ବୁଲି ବିଭିନ୍ନ ଦୋକାନ ବାହାରେ ଲାଗିଥିବା ସିସିଟିଭି ଲୁଟ କରୁଥିବାର ଭିଡିଓ କଏଦ ହୋଇଛି।ଏସପି ଅଫିସ ସାମ୍ନା, ନରିପୁର, ବନ୍ତ ଛକ, ଆରଡ଼ି ଛକ ପରି ବିଭିନ୍ନ ସ୍ଥାନରୁ ଦୋକାନ ମାନଙ୍କରେ ଲାଗିଥିବା 50ରୁ ଉର୍ଦ୍ଧ ସିସିଟିଭି ଲୁଟ ହୋଇଛି। ଘଟଣା ସଂପର୍କରେ ଖବର ପାଇବା ପରେ ଦୋକାନରେ ପହଞ୍ଚି ପୋଲିସ ତଦନ୍ତ ଆରମ୍ଭ କରିଛି। ତେବେ ଏଭଳି ସିସିଟିଭି ଚୋରୀ କରିବା ପଛରେ ଆଗକୁ ବଡ଼ ଲୁଟ କରିବାର ଯୋଜନା ନାହିଁ ତ ବୋଲି ବ୍ୟବସାୟୀ ମାନେ ଆଶଙ୍କା କରିଛନ୍ତି। ଅନ୍ୟପଟେ ରାତ୍ରିରେ ଆବଶ୍ୟକ ପୋଲିସ ପାଟ୍ରୋଲିଂ କରାଯାଉନଥିବା ସହରବାସୀ ଅଭିଯୋଗ କରିଛନ୍ତି ।
ଶ୍ରମିକ ହୋଇ ଗଲେ ଶବ ହୋଇ ଫେରିଲେ: ବାହାର ରାଜ୍ୟକୁ କାମ କରିବାକୁ ଯାଇ ତିନି ଦିନରେ ୪ ଦାଦନଙ୍କ ମୃତ୍ୟୁ
ନନ୍ଦିଘୋଷ ବ୍ୟୁରୋ: ପରିବାର ପ୍ରତିପୋଷଣ ପାଇଁ ପର ରାଇଜକୁ ଯାଇଥିଲେ ଦାଦନ ଖଟି । ଭଲ ଦୁଇ ପଇସା ମିଳିବ ଓ ଭଲରେ ପେଟପାଟଣା ଚଳିବ । ଏଭଳି ଅସୁମାରୀ ଆଶା ନେଇ ବାହାରକୁ ଗୋଡ କାଢିଥିଲେ ଗଞ୍ଜାମ ଜିଲ୍ଲା ପାତ୍ରପୁର ବ୍ଲକର ଚାରି ଜଣ ଓଡ଼ିଆ । ହେଲେ କିଏ ଜାଣିଥିଲା ମୃତ୍ୟୁ ତାଙ୍କୁ କଢାଇ ନେଉଛି ବାଟ । କାମ କରିବାକୁ ବାହାର ରାଜ୍ୟକୁ ଯାଇ ଏବେ ଘରକୁ ଶବ ହୋଇ ଫେରିଛନ୍ତି । ତିନି ଦିନ ମଧ୍ୟରେ ୪ ଜଣ ମୃତ୍ୟୁ ଘଟିଛି । ମୃତକଙ୍କ ପରିବାର ଓ ଗାଁରେ ଶୋକାକୂଳ ପରିବେଶ ସୃଷ୍ଟି ହୋଇଥିବା ବେଳେ କ୍ଷତିପୂରଣ ଦାବି କରିଛନ୍ତି ସ୍ଥାନୀୟ ବାସିନ୍ଦା ।
ଗଞ୍ଜାମ ଜିଲ୍ଲା ପାତ୍ରପୁର ଓ ଖାରିଆଗୁଡା ବ୍ଲକର ଏହି ଦୁଃଖଦ ଖବର । ଜନ୍ମମାଟିକୁ ଫେରିଛି ଶ୍ରମିକ ହୋଇ ବାହାର ରାଜ୍ୟକୁ ଗୋଡ କାଢିଥିବା ୪ ଜଣଙ୍କ ଶବ । ତିନି ଦିନରେ ଚାରି ଓଡ଼ିଆ ଦାଦନ ଶ୍ରମିକଙ୍କ ମୃତ୍ୟୁ ଘଟିଛି । ଭୈରପୁର ଗାଁର ଉଜ୍ବଳ ପ୍ରଧାନ ଚେନ୍ନାଇର ଏକ ଘରୋଇ କମ୍ପାନୀରେ କାମ ଅରୁଥିଲେ । ଗତ ଦୁଇ ଦିନ ପୂର୍ବରୁ କାମ ସାରି ନିଜ ରୁମକୁ ଫେରିଥିଲେ । କିନ୍ତୁ ପରଦିନ ସକାଳେ ନିଜ ରୁମରୁ ନ ବାହାରିବା ଲୋକେ ସନ୍ଦେହ କରି କବାଟ ଭାଙ୍ଗିଥିଲେ । ହେଲେ ଝୁଲନ୍ତା ଅବସ୍ଥାରେ ତାଙ୍କ ମୃତଦେହ ପାଇଥିଲେ ଲୋକ । ସେହିପରି ବାଦପୁର ଗାଁର ତୁମ୍ବନାଥ ବେହେରା ମୁମ୍ବାଇରେ କିଛି ବର୍ଷ ହେଲା ଏକ ଘରୋଇ କମ୍ପାନୀରେ କାମ କରୁଥିଲେ । ଗତଦୁଇ ଦିନ ପୂର୍ବରୁ ହଠାତ ତାଙ୍କ ଅସୁସ୍ଥତା କାରଣରୁ ମୃତ୍ୟୁ ହୋଇଛି । ସେହିଭଳି ରାଜପୁର ଗାଁର ବିଜୟ ଦଳେଇ କିଛି ବର୍ଷ ହେଲା ହାଇଦ୍ରାବାଦର ଏକ କମ୍ପାନୀରେ କାମ କରୁଥିଲେ । ରବିବାର ଛୁଟି ଦିନ ଥିବାରୁ ନିଜ ରୁମରେ ବିଶ୍ରାମ କରୁଥିବା ସମୟରେ ହଠାତ ତାଙ୍କର ମୃତ୍ୟୁ ହୋଇଥିଲା । ସେହିପରି ଖାରିଆଗୁଡା ବ୍ଲକର ତିନିଘରିଆ ଗାଁର ଗଦାଧର ଗୌଡ଼ଙ୍କ ତାମିଲନାଡୁରେ ଦୁର୍ଘଟଣାରେ ମୃତ୍ୟୁ ଘଟିଛି । ସମସ୍ତ ପରିବାର ଗରିବ ଶ୍ରେଣୀର ହୋଇଥିବା ଯୋଗୁଁ ସରକାରୀ ସହାୟତା ପ୍ରଦାନ କରିବା ପାଇଁ ଦାବି କରିଛନ୍ତି ମୃତକଙ୍କ ପରିବାର ଲୋକେ ।
ତିନି ଦିନ ମଧ୍ୟରେ ଚାରି ଜଣ ଓଡ଼ିଆ ଦାଦନ ଶ୍ରମିକଙ୍କ ମୃତ୍ୟୁ ହେବା ଖବର ସାରା ଗଞ୍ଜାମ ଜିଲ୍ଲାରେ ଆଲୋଡ଼ନ ସୃଷ୍ଟି କରିଛି । ସରକାର ଲୋକଙ୍କୁ ସ୍ଥାନୀୟ ଅଞ୍ଚଳରେ ହିଁ କିଛି ନିଯୁକ୍ତି ସୁବିଧା ଯୋଗାଇ ଦେବାକୁ ଦାବି କରିଛନ୍ତି ବୁଦ୍ଧିଜୀବୀ । ସେପଟେ ଘଟଣାକୁ ନେଇ ଦୁଃଖ ପ୍ରକାଶ କରିଛନ୍ତି ଚିକିଟି ବିଧାୟକ ମନୋରଞ୍ଜନ ଦ୍ୟାନ ସାମନ୍ତରାୟ । ସରକାରଙ୍କ ଦୃଷ୍ଟି ଆକର୍ଷଣ କରି କିଭଳି ମୃତକଙ୍କ ପରିବାରକୁ ଅଧିକ ସହାୟତା ମିଳିପାରିବ ସେ ନେଇ ପଦକ୍ଷେପ ନିଆଯିବ ବୋଲି ବିଧାୟକ ପ୍ରତିଶ୍ରୁତି ଦେଇଛନ୍ତି ।
ଗଞ୍ଜାମ ଜିଲ୍ଲାରେ ଦାଦନ ଦୁଃଖ କିଛି ନୂଆ ନୁହେଁ । କିଭଳି ଏହି ସମସ୍ୟାର ସ୍ଥାୟୀ ସମାଧାନ ହୋଇପାରିବ ସେ ନେଇ ରାଜ୍ୟ ସରକାର ପଦକ୍ଷେପ ନେବା ଜରୁରୀ ହୋଇପଡିଛି ।
ବାଣୀବିହାର ଅଣଛାତ୍ର ଉଚ୍ଛେଦ: ଗତକାଲି ଆକ୍ସନ ପରେ ଆଜି ରିଆକ୍ସନ
ନନ୍ଦିଘୋଷ ବ୍ୟୁରୋ: ଗତକାଲି ଅଣଛାତ୍ରଙ୍କ ଦଖଲରେ ଥିବା ହଷ୍ଟେଲ ଖାଲି ପାଇଁ ପ୍ରଶାସନର ଆକ୍ସନ ପରେ ଆଜି ବାଣୀବିହାର ପରିସରରେ ଦେଖିବାକୁ ମିଳିଛି ରିଆକ୍ସନ । କୁଳପତିଙ୍କୁ ଘେରିଛନ୍ତି ପୁରାତନ ଛାତ୍ର । ହଷ୍ଟେଲ ଜବରଦଖଲ ମୁକ୍ତ ହେଲା, ଷ୍ଟାଫ କ୍ବାର୍ଟର୍ସ କେବେ ଜବରଦଖଲ ମୁକ୍ତ ହେବ ବୋଲି ପ୍ରଶ୍ନ କରିଛନ୍ତି ପୁରାତନ ଛାତ୍ର । ଏହାସହ ବାଣୀବିହାର ପରିସରରେ ଥିବା ବେଆଇନ ବସ୍ତି କେବେ ହଟିବ ବୋଲି ପ୍ରଶ୍ନ କରି କୁଳପତି ଓ ବିଶ୍ବବଦ୍ୟାଳୟ ପ୍ରଶାସନକୁ ଘେରିଛନ୍ତି ପୁରାତନ ଛାତ୍ର । କିଛି ସମୟ ପାଇଁ କୁଳପତିଙ୍କ କାର୍ଯ୍ୟାଳୟରେ ଉତ୍ତେଜନା ପ୍ରକାଶ ପାଇଥିବା ବେଳେ ଉଭୟ ପକ୍ଷର ଆଲୋଚନା ପରେ କ୍ୟାମ୍ପସ ଶାନ୍ତ ପଡ଼ିଛି ।
କାଲି ଆକ୍ସନ ଆଜି ରିଆକ୍ସନ । ବାଣୀବିହାର ପରିସରରେ ହଷ୍ଟେଲ ଜବରଦଖଲ ମୁକ୍ତ ପରେ ଏବେ ଷ୍ଟାଫ କ୍ବାର୍ଟର୍ସ ଉପରେ ନଜର । ପୁରାତନ ଛାତ୍ରମାନେ କୁଳପତିଙ୍କୁ ଘେରିବା ସହ ପ୍ରଶ୍ନବାଣରେ କଲେ ଘାଇଲା । ପୁରାତନ ଛାତ୍ର ଓ ବିଶ୍ବବିଦ୍ୟାଳୟ ପ୍ରଶାସନ ହୋଇଛନ୍ତି ମୁହାଁମୁହିଁ । ହଷ୍ଟେଲ ଅଣଛାତ୍ର ମୁକ୍ତ ହେବା ପରେ ପୁରାତନ ଛାତ୍ରମାନେ ଅସାମାଜିକଙ୍କ କବଜାରେ ଥିବା ଷ୍ଟାଫ କ୍ବାର୍ଟର୍ସ ତୁରନ୍ତ ଖାଲି କରିବାକୁ ଦାବି କରିଛନ୍ତି । ଏହାସହ ଦୀର୍ଘ ଦିନ ଧରି ବିଶ୍ବବିଦ୍ୟାଳୟ ପରିସରରେ ଗଢି ଉଠିଥିବା ବସ୍ତିଗୁଡ଼ିକ କେବେ ହଟିବ ବୋଲି ପୁରାତନ ଛାତ୍ରମାନେ ପ୍ରଶ୍ନ କରିଛନ୍ତି । ଏହି ପ୍ରସଙ୍ଗରେ ପୁରାତନ ଛାତ୍ରମାନେ କୁଳପତିଙ୍କୁ ଘେରିବା ସହ ବିଶ୍ବିବିଦ୍ୟାଳୟ ପରିସରରେ ଶୈକ୍ଷିକ ପରିବେଶ ଫେରାଇ ଆଣିବାକୁ ଦାବି କରିଛନ୍ତି ।
ଦୀର୍ଘଦିନ ଧରି ବାଣୀବିହାର ଛାତ୍ରାବାସ ଥିଲା ଅଣଛାତ୍ରଙ୍କ କବଜାରେ । ହଷ୍ଟେଲ ପାଇବାକୁ ଯୋଗ୍ୟ ଛାତ୍ରମାନେ ରୁମ୍ ନପାଇ ଭଡ଼ାରେ ରହୁଥିଲେ । ପ୍ରାୟ ୨ଶହରୁ ଅଧିକ ରୁମକୁ କାଲି ପୋଲିସ ଉପସ୍ଥିତିରେ ବିଶ୍ବବିଦ୍ୟାଳୟ ପ୍ରଶାସନ ଖାଲି କରିଥିଲା । ଏବେ ୪୭୫ ଛାତ୍ର ହଷ୍ଟେଲ ପାଇବାକୁ ଅପେକ୍ଷା କରିଥିବା ବେଳେ ୧୫ ଦିନ ମଧ୍ୟରେ ସମସ୍ତଙ୍କୁ ହଷ୍ଟେଲ ମିଳିବ ବୋଲି କୁଳପତି କହିଛନ୍ତି । ଜବରଦଖଲ ହୋଇଥିବା ଷ୍ଟାଫ କ୍ବାର୍ଟର୍ସଗୁଡ଼ିକୁ ଖାଲି କରିବାକୁ ନୋଟିସ ଜାରି ହୋଇଥିବା ବେଳେ ୨ରୁ ୩ ଦିନ ମଧ୍ୟରେ ସେଗୁଡିକୁ ଖାଲି କରାଯିବ । ବସ୍ତି ହଟାଇବା ପାଇଁ ବିଏମସି ସହ କଥାବାର୍ତ୍ତା ଚାଲିଛି । ପରିସରରେ ଶିକ୍ଷାର ବାତାବରଣ ସୃଷ୍ଟି କରିବାକୁ ପ୍ରଶାସନ ଉଦ୍ୟମ ଜାରି ରଖିଛି ବୋଲି କୁଳପତି ଯଞ୍ଜେଶ୍ବର ଦଣ୍ଡାପାଟ ଆଶ୍ବସନା ଦେଇଛନ୍ତି ।
ଛାତ୍ରଙ୍କ ପାଇଁ ଉଦ୍ଦିଷ୍ଟ ଛାତ୍ରାବାସ ଛାତ୍ରଙ୍କ ପାଇଁ ଉଦ୍ଦିଷ୍ଟ ଥିବା ବେଳେ ଏଥିରେ ଅଣଛାତ୍ର ଜବରଦସ୍ତ ରହୁଥିଲେ । ଏବେ ଏହାକୁ ମୁକ୍ତ କରାଯାଇଛି ଓ ଶୀଘ୍ର ଯୋଗ୍ୟ ଛାତ୍ରଙ୍କୁ ରୁମ୍ ମିଳିବ । ଜବରଦଖଲ ହୋଇଥିବା ଷ୍ଟାଫ କ୍ବାର୍ଟର୍ସକୁ ଖାଲି କରିବା ସହ ବସ୍ତି ହଟାଇବା ଦିଗରେ ବି ସକରାତ୍ମକ ଆଲୋଚନା ହୋଇଛି । ଲାଗୁଛି ଖୁବ ଶୀଘ୍ର ବାଣୀବିହାର ସମସ୍ୟାର ସମାଧାନ ହୋଇଯିବ ।
ଖରିଫ ଧାନ କିଣା ପଞ୍ଜିକରଣରୁ ୩୦ ପ୍ରତିଶତ ଚାଷୀ ବଞ୍ଚିତ ଅଭିଯୋଗ, ପ୍ରତିବାଦରେ କୃଷକ ମଜଦୂର ମହାସଙ୍ଘର ରାଜ୍ୟବ୍ୟାପୀ ଆନ୍ଦୋଳନ ଚେତାବନୀ
ନନ୍ଦିଘୋଷ ବ୍ୟୁରୋ: ଚାଷୀ ପଞ୍ଜୀକରଣରେ ଆରମ୍ଭରୁ ଗୋଳିଆ ସ୍ଥିତି ସୃଷ୍ଟି କରାଗଲା । ଫଳରେ ଖରିଫ ଧାନ କିଣା ପଞ୍ଜୀକରଣରୁ ବଞ୍ଚିତ ହେଲେ ୩୦ ପ୍ରତିଶତ ଚାଷୀ । ଏ ନେଇ ରାଜ୍ୟର ବିଭିନ୍ନ ଅଞ୍ଚଳର ଚାଷୀ ଓ କୃଷକ ସଙ୍ଗଠନ ଅଭିଯୋଗ ଆଣିଛନ୍ତି । ପୂର୍ବରୁ ଆଳୁ ଓ ବାଦାମ ବିହନ ଯୋଗାଣ ତଥା ବିଭିନ୍ନ ବାଟରେ ଚାଷୀଙ୍କୁ ଶୋଷଣ କରାଯାଉଥିବା ବେଳେ ଏବେ ପଞ୍ଜୀକରଣରେ ବି ଚକ୍ରାନ୍ତ କରାଯାଇଥିବା ଅଭିଯୋଗ ହୋଇଛି । ଏହାର ପ୍ରତିବାଦରେ ଏବେ ବଡ଼ ଆନ୍ଦୋଳନ ପାଇଁ ସଜବାଜ ହେଉଛନ୍ତି ରାଜ୍ୟର ଚାଷୀ ମଜଦୁର ସଂଘ ।
ବଢି ଚାଲିଛି ଚାଷୀଙ୍କୁ ଶୋଷଣ । ଗୋଟିଏ ପଟେ ସାର ଅଭାବ । ଏବେ ଖରିଫ ଧାନକିଣା ପାଇଁ ପଞ୍ଜୀକରଣରେ ଅସ୍ତବ୍ୟସ୍ତ ଚାଷୀ । ଏନେଇ ଚାଷୀଙ୍କ ଭିତରେ ଅସନ୍ତୋଷ ତୀବ୍ର ହେବାରେ ଲାଗିଛି । ପୂର୍ବବର୍ଷଠାରୁ ଅଧିକ ଚାଷୀ ପଞ୍ଜୀକରଣ କରିବା କଥାକୁ ନେଇ ଉଠିଛି ପ୍ରଶ୍ନ । ରାଜ୍ୟର ଅର୍ଦ୍ଧାଧିକ ଭାଗଚାଷୀ ହୋଇଥିବା ବେଳେ ସେମାନଙ୍କୁ ପଞ୍ଜୀକରଣରେ ସାମିଲ କରାଯାଉ ନଥିବା ଅଭିଯୋଗ ହୋଇଛି । ଜାଣିଶୁଣି ପଞ୍ଜୀକରଣ ପ୍ରକ୍ରିୟାକୁ ଜଟିଳ କରାଯାଇଛି । ଯାହା ଫଳରେ ଗୋଟିଏ ପରିବାରରେ ଏକାଧିକ ସଦସ୍ୟ ପଞ୍ଜୀକୃତ କରିବାକୁ ବାଧ୍ୟ ହୋଇଛନ୍ତି । ଯାହାଯୋଗୁଁ ଚାଷୀ ସଂଖ୍ୟା ବଢିଛି । ଯିଏ ଚାଷ କରୁଛି ସେ ହିଁ ପଞ୍ଜୀକରଣ କରିପାରିବ ବୋଲି ନିୟମ ହୋଇଛି । ଏବେ ସ୍ଥିତି ଏମିତି ହୋଇଛି, ଗୋଟିଏ ଚାଷୀ ପରିବାରର ଭାଇମାନେ ଅଲଗା ଅଲଗା ଆଫିଡେଭିଟ କରି ପଞ୍ଜୀକରଣ କରିଛନ୍ତି । ପଞ୍ଜୀକରଣ ପ୍ରକ୍ରିୟାକୁ ଜଟିଳ କରାଯାଇଥିବାରୁ ୩୦ ପ୍ରତିଶତ ଚାଷୀ ପଞ୍ଜିକରଣରୁ ବଞ୍ଚିତ ହୋଇଛନ୍ତି । ଯେତିକି ଧାନ ଉତ୍ପାଦନ ହେଉଛି ତାହା ମଧ୍ୟ ସରକାର ନେଉ ନାହାନ୍ତି । ଗୋଟିଏ ଚାଷୀ ୧୩ କୁଇଣ୍ଟାଲରୁ ଅଧିକ ଧାନ ବିକିପାରୁ ନାହିଁ । ଯାହା ଫଳରେ ଅଭାବି ବିକ୍ରିର ଶିକାର ହେଉଛନ୍ତି ଚାଷୀ । ଏଭଳି ଢାଞ୍ଚାରେ ଶୋଷଣ କରିବା ବନ୍ଦ କରାଯାଉ ବୋଲି ଦାବି କରିଛନ୍ତି ଚାଷୀ ।
ଧାନ କିଣାରେ ଇନପୁଟ ସବସିଡି ପ୍ରଦାନ ନେଇ ପ୍ରଚାର ହେଉଛି । ହେଲେ ପ୍ରକୃତରେ ଚାଷୀ ଇନପୁଟ ସହାୟତା ପାଉ ନଥିବା ଅଭିଯୋଗ ହୋଇଛି । ଦାବି ହୋଇଛି ଯାହା ଧାନ ଅମଳ ହେଉଛି ସବୁ କିଣାଯାଉ ଓ ପଞ୍ଜୀକରଣ ପ୍ରକ୍ରିୟାକୁ ସରଳୀକରଣ କରାଯାଉ । ଏହାସହ ପଞ୍ଜୀକରଣ ସମୟ ସୀମା ବଢାଇବାକୁ ଦାବି ହୋଇଛି । ଖରାପ ବିହନ ଚାଷୀଙ୍କୁ ହତାଶ କରିଥିବାବେଳେ ପଞ୍ଜୀକରଣ ସମସ୍ୟା ଚାଷୀଙ୍କ ଅଣ୍ଟା ଦୋହଲାଇ ଦେଇଛି । ପ୍ରତିବାଦରେ ଆଗକୁ ରାଜ୍ୟବ୍ୟାପୀ ଆନ୍ଦୋଳନ ଚେତାବନୀ ଦେଇଛି କୃଷକ ମଜଦୂର ମହାସଙ୍ଘ । ରାଜ୍ୟରେ ଚାଷୀଙ୍କ ସମସ୍ୟା ସମାଧାନ ନେଇ ବାରମ୍ବାର ଦାବି ହେଉଥିଲେ ମଧ୍ୟ କିଛି କରାଯାଉ ନଥିବା ଅଭିଯୋଗ ହୋଇଛି ।
ପାଖେଇ ଆସୁଛି ପାର୍ବଣ, ଗାଁରୁ ସହର ଯାଏଁ ରାସ୍ତା ଶୋଚନୀୟ: ବିଧାନସଭା କମିଟି ବୈଠକରେ ଚିଡ଼ିଲେ ବିଧାୟକ
ନନ୍ଦିଘୋଷ ବ୍ୟୁରୋ: ପାଖେଇ ଆସିଲାଣି ପାର୍ବଣ । ହେଲେ ଏଯାଏଁ ଆରମ୍ଭ ହୋଇନି କାମ । ଗାଁରୁ ସହର ଯାଏଁ ରାସ୍ତାଘାଟ ଅବସ୍ଥା ଶୋଚନୀୟ । ପୂଜା ପୂର୍ବରୁ କାମ ସରିବ କି ନାହିଁ ତାହା ବି ସନ୍ଦେହ । ରାସ୍ତା ନିର୍ମାଣ ଓ ମରାମତି ବିଳମ୍ବ ହେଉଥିବାରୁ ଅସନ୍ତୋଷ ପ୍ରକାଶ କରିଛନ୍ତି ବିଧାୟକ । ବିଧାନସଭା କମିଟି ବୈଠକରେ ବିଧାୟକମାନେ ଉଦବେଗ ପ୍ରକାଶ କରିବା ସହ ପୂର୍ତ୍ତ ଓ ନଗର ଉନ୍ନୟନ ବିଭାଗ ଅଧିକାରୀଙ୍କୁ ତାଗିଦ କରିଛନ୍ତି ।
ଦିନ କେଇଟା ପରେ ଶାରଦୀୟ ପୂଜା । ହେଲେ ରାସ୍ତାଘାଟ ଅବସ୍ଥା ନ କହିଲେ ଭଲ । ଶୋଚନୀୟ ହୋଇପଡ଼ିଛି ମୁଖ୍ୟ ରାସ୍ତାରୁ ଆରମ୍ଭ କରି ଗଳିକନ୍ଦି ରାସ୍ତା । ବାରମ୍ବାର ଦାବି ସତ୍ତ୍ବେ ହେଉନି କାମ । ଲୋକେ ହଇରାଣ ହେଉଛନ୍ତି, ଜନ ପ୍ରତିନିଧିଙ୍କୁ ପ୍ରଶ୍ନ କରୁଛନ୍ତି । ଅଡୁଆରେ ପଡୁଛନ୍ତି ବିଧାୟକ । ତେଣୁ ତୁରନ୍ତ କର କାମ । ବିଧାନସଭା କମିଟି ବୈଠକରେ ଏପରି ଦାବି କରିଛନ୍ତି ବିଧାୟକ । ପୂର୍ତ୍ତ ଓ ନଗର ଉନ୍ନୟନ ବିଭାଗର ଅଧିକାରୀଙ୍କୁ ନେଇ ବସିଥିଲା ବିଧାନସଭା କମିଟି ବୈଠକ । ବିଜେଡି ବିଧାୟକ ବ୍ୟୋମକେଶ ରାୟ କହିଛନ୍ତି, ଦେଢ଼ ବର୍ଷର ବିଜେପି ଶାସନରେ ବିକାଶ ସମ୍ପୂର୍ଣ୍ଣ ଠପ । ରାସ୍ତାଘାଟ ଅବସ୍ଥା ନ କହିଲେ ଭଲ । ସରକାରଙ୍କ ଅପାରଗତା ଯୋଗଁ ବଜେଟ ଅର୍ଥ ବି ଠିକ ସେ ଖର୍ଚ୍ଚ ହୋଇପାରୁନି । ବର୍ଷା ଯୋଗୁଁ ରାସ୍ତାଘାଟ ଧୋଇ ଗଲାଣି । ଯଦି ପୂଜା ପୂର୍ବରୁ ରାସ୍ତାଘାଟ କାମ କରା ନଯିବ ତେବେ ଅବସ୍ଥା ଅସମ୍ଭାଳ ହେବ । ତେଣୁ ତୁରନ୍ତ ରାସ୍ତା ମରାମତି କାମ କରିବାକୁ ଦାବି କରିଛନ୍ତି ବିଧାୟକ ।
ବିଧାୟକମାନେ ଉଦବେଗ ପ୍ରକାଶ କରିବା ପରେ ଜବାବ ରଖିଛନ୍ତି କମିଟି ଅଧ୍ୟକ୍ଷ ବାବୁ ସିଂ । ପୂଜା ପୂର୍ବରୁ ରାସ୍ତାଘାଟ କାମ ସାରିବାକୁ ବିଭାଗୀୟ ମନ୍ତ୍ରୀ ସମୀକ୍ଷା କରିଛନ୍ତି । ଯେଉଁଠି ରାସ୍ତାର ମରାମତି ଆବଶ୍ୟକ, ତାହା ଯୁଦ୍ଧକାଳୀନ ଭିତ୍ତିରେ କରାଯିବ । ଅକ୍ଟୋବର ୨ ପୂର୍ବରୁ ମରାମତି କାମ ସାରିବାକୁ ସଂପୃକ୍ତ ବିଭାଗ ଗୁଡିକୁ ନିର୍ଦ୍ଦେଶ ଦିଆଯାଇଛି । ବିଧାନସଭା କମିଟି ବୈଠକରେ ଏନେଇ ସଂପୃକ୍ତ ବିଭାଗର ବରିଷ୍ଠ ଅଧିକାରୀଙ୍କ ସହ ଆଲୋଚନା କରାଯିବା ସହ ତୁରନ୍ତ କାମ ସାରିବାକୁ କୁହାଯାଇଛି ।
ଜାତୀୟ ରାଜପଥରୁ ଆରମ୍ଭ କରି ଗାଁ ଯାଏଁ ସବୁଠି ଶୋଚନୀୟ ହୋଇ ପଡ଼ିଲାଣି ରାସ୍ତାଘାଟ ଅବସ୍ଥା । ପୂଜା ପାଇଁ ଏବେ ଠାରୁ ଜାମ ହେଲାଣି ରାସ୍ତାଘାଟ । ତେଣୁ ତୁରନ୍ତ ଏହାକୁ ମରାମତି କରିବାକୁ ସରକାରଙ୍କୁ ପ୍ରସ୍ତାବ ଦେଇଛି କମିଟି ।
ଉପରାଷ୍ଟ୍ରପତି ନିର୍ବାଚନ: ନବୀନ ପୁଣି ଥରେ ଦୋହରାଇଲେ ସମଦୂରତା ନୀତି
ନନ୍ଦିଘୋଷ ବ୍ୟୁରୋ: ବିଜୁ ଜନତା ଦଳ ପାଇଁ ରାଜ୍ୟ ତଥା ରାଜ୍ୟବାସୀଙ୍କ ସ୍ବାର୍ଥ ପ୍ରଥମ । ଏହାକୁ ପୁଣି ଥରେ ସ୍ପଷ୍ଟ କରିଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ । କଂଗ୍ରେସ ଶାସନରେ ଦେଶର ଯେଉଁ ଦୁର୍ଗତି ହୋଇଥିଲା ସେଥିପାଇଁ ତାକୁ ଉପରାଷ୍ଟ୍ରପତି ନିର୍ବାଚନରେ ବିଜେଡି ଦେଲାନି ସମର୍ଥନ । ସେହିପରି ରାଜ୍ୟକୁ ଗତ ଏକ ବର୍ଷରୁ ବିକାଶଠାରୁ ଦୂରକୁ ନେଇଥିବା ବିଜେପି ସରକାରକୁ ବି ନବୀନ ଦେଲେନି ସମର୍ଥନ । ନବୀନଙ୍କ ଏହି ସମଦୂରତା ନୀତି ଯୋଗୁଁ ଉଭୟ ବିଜେପି ଓ କଂଗ୍ରେସ ସହ ଲଢିବାକୁ ବିଜେଡି ପାଇଛି ନୂତନ ଉର୍ଜା । ଏଣିକି ବିଜେଡିଠାରୁ ଆହୁରି ଶାଣିତ ବିରୋଧର ସାମ୍ନା କରିବାକୁ ପଡିବ ବୋଲି ବିଜେପି ବୁଝି ସାରିଲାଣି । କଂଗ୍ରେସ ବି ଆରମ୍ଭ କରିଛି କସରତ ।
ବିଜେଡି ସୁପ୍ରିମୋ ନବୀନ ପଟ୍ଟନାୟକ ପୁଣି ଥରେ ଦୋହରାଇଛନ୍ତି ସମଦୂରତା ନୀତି । ନବୀନ ପୁଣି ଥରେ ପ୍ରମାଣିତ କରି ଦେଇଛନ୍ତି ଯେ ଓଡ଼ିଶା ପ୍ରଥମ, ବାକି ସବୁ ପରେ । ଉପରାଷ୍ଟ୍ରପତି ନିର୍ବାଚନରେ ନବୀନଙ୍କ ସମଦୂରତା ନିଷ୍ପତ୍ତିକୁ ସାରା ରାଜ୍ୟ ଏବେ ପ୍ରଶଂସା କରୁଛି । ନବୀନଙ୍କ ରାଷ୍ଟ୍ରବାଦ ଏଥିରୁ ସ୍ପଷ୍ଟ ବାରି ହୋଇ ପଡ଼ିଛି । କଂଗ୍ରେସ ଶାସନରେ ଥିବାବେଳେ ଓଡ଼ିଶାକୁ ବିପର୍ଯ୍ୟସ୍ତ ଓ ଦୁର୍ଦ୍ଦିନକୁ ଠେଲି ଦେଇଥିଲା । ସେହିପରି ଗତ ୧୪ ମାସର ବିଜେପି ସରକାର ବି ଓଡ଼ିଶାକୁ ବିପର୍ଯ୍ୟସ୍ତ ଆଡ଼କୁ ଠେଲି ରାଜ୍ୟର ଆର୍ଥିକ ସ୍ଥିତି ଦୋହଲାଇ ଦେଲାଣି । ଏପରି ସ୍ଥିତି ଯେଉଁଠି ଉଭୟ ଦଳକୁ ଲୋକେ ପସନ୍ଦ କରୁ ନାହାନ୍ତି, ସେଠି ବିଜେଡି କିପରି ଜଣଙ୍କୁ ସମର୍ଥନ କରିବ ? ସେଥିପାଇଁ ଉପରାଷ୍ଟ୍ରପତି ନିର୍ବାଚନରୁ ବିରତ ରହି ସମଦୂରତା ନୀତି କାଏମ ରଖିଲେ ନବୀନ ପଟ୍ଟନାୟକ । ଏହି ସମଦୂରତା ନୀତିରେ ଛାତ୍ର ଓ ଯୁବ ବିଜେଡି ଉତ୍ସାହିତ ହୋଇ ଆଗକୁ ଲଢେଇ ଜୋରଦାର କରିବାକୁ ପ୍ରେରଣା ପାଇଛି । ଆଗକୁ ଉଭୟ କଂଗ୍ରେସ ଓ ବିଜେପି ସହ ଲଢେଇ ଜାରି ରହିବ । ଯେଉଁ ଦଳ ବି ଓଡ଼ିଶା ସ୍ବାର୍ଥ ବିରୋଧୀ ହେବେ, ତା’ ବିରୋଧରେ ଲଢେଇ କରିବାକୁ ନବୀନଙ୍କ ସମଦୂରତା ନୀତି ବିଜେଡିକୁ ମାର୍ଗଦର୍ଶନ ଦେଇଛି । ନବୀନ ଯେ ଠିକଣା ସମୟରେ ଠିକ୍ ନିଷ୍ପତ୍ତି ନିଆନ୍ତି, ତାହା ପୁଣି ପ୍ରମାଣିତ ହୋଇଛି ।
ବାରମ୍ବାର ବିଜେଡି ଓ ବିଜେପି ଭିତରେ ଭିତିରିଆ ସଂପର୍କର ଅଭିଯୋଗ ଆଣୁଥିବା କଂଗ୍ରେସକୁ ବି ନବୀନଙ୍କ ନିଷ୍ପତ୍ତି ଚିନ୍ତାରେ ପକାଇ ଦେଇଛି । ୨୦୨୯ ନିର୍ବାଚନ ପାଇଁ ସଜବାଜ ହେଉଥିବା କଂଗ୍ରେସ ଏବେ ଭୋଟ ଚୋରିକୁ ପ୍ରମୁଖ ମୁଦ୍ଦା କରି ଲଢିବାକୁ କସରତ ଜାରି ରଖିବ । ସେପଟେ ନବୀନଙ୍କ ନିଷ୍ପତ୍ତି ଯୋଗୁଁ ବିଜେପିକୁ ଝଟକା ଲାଗିଛି । ବିଜେପି ନେତା ଏବେ ବୁଝି ସାରିଛନ୍ତି ଯେ ବିଜେଡି ଦାୟିତ୍ବବାନ ବିରୋଧୀ ଦଳ ଭାବେ କାମ କରିବ । ହେଲେ କାହାକୁ ସମର୍ଥନ ଦେବ ନାହିଁ । ସରକାରଙ୍କ ଦୋଷ ଦୁର୍ବଳତାକୁ ପଦାରେ ପକାଇବ ।
ଆଗକୁ ବିଧାନସଭାର ମୌସୁମୀ ଅଧିବେଶନ । ଏହା ପୂର୍ବରୁ ବିଜେଡି ତା ଆଭିମୁଖ୍ୟ ସ୍ପଷ୍ଟ କରିଛି । ରାଜ୍ୟ ସ୍ବାର୍ଥ ପାଇଁ ଆଗେଇ ଆସିବ, ରାଜ୍ୟର ସ୍ବାର୍ଥ ବିରୋଧୀ ହେଲେ ଗୃହ ଭିତରେ ଓ ବାହାରେ ପ୍ରତିବାଦ କରିବ ।
୧୫ତମ ଉପରାଷ୍ଟ୍ରପତି ଭାବେ ଏନଡିଏ ପ୍ରାର୍ଥୀ ସିପି ରାଧାକ୍ରିଷ୍ଣନ ବିଜୟୀ
ନନ୍ଦିଘୋଷ ବ୍ୟୁରୋ: ଆସିଲା ଉପ ରାଷ୍ଟ୍ରପତି ନିର୍ବାଚନ ଫଳାଫଳ । ୧୫ତମ ଉପରାଷ୍ଟ୍ରପତି ଭାବେ ବିଜୟୀ ହେଲେ ଏନଡିଏ ପ୍ରାର୍ଥୀ ସିପି ରାଧାକ୍ରିଷ୍ଣନ । ୧୨୫ ଖଣ୍ଡ ଭୋଟରେ ଇଣ୍ଡି ମେଣ୍ଟ ପ୍ରାର୍ଥୀ ବି. ସୁଦର୍ଶନ ରେଡ୍ଡୀଙ୍କୁ କଲେ ପରାସ୍ତ । ସିପି ରାଧାକ୍ରିଷ୍ଣନଙ୍କୁ ୪୫୨ ଖଣ୍ଡ ପ୍ରଥମ ପସନ୍ଦ ଭୋଟ ମିଳିଥିବା ବେଳେ ବି. ସୁଦର୍ଶନ ରେଡ୍ଡୀଙ୍କୁ ୩୦୦ ଖଣ୍ଡ ପ୍ରଥମ ପସନ୍ଦ ଭୋଟ ମିଳିଛି ।
ସୂଚନାଯୋଗ୍ୟ, ଉପରାଷ୍ଟ୍ରପତି ନିର୍ବାଚନରେ ମୋଟ ଭୋଟର ସଂଖ୍ୟା ୭୮୧ ଥିଲା । ଏଥିରେ ଲୋକସଭାର ୫୪୩ରୁ ବର୍ତ୍ତମାନ ସଦସ୍ୟ ସଂଖ୍ୟା ୫୪୨ ରହିଥିବା ବେଳେ ରାଜ୍ୟସଭାର ୨୪୫ରୁ ବର୍ତ୍ତମାନ ସଦସ୍ୟ ରହିଛନ୍ତି ୨୩୯ । ୭୬୭ ସାଂସଦ ଭୋଟ ଦେଇଥିଲେ । ଅର୍ଥାତ ୯୮.୨ ପ୍ରତିଶତ ମତଦାନ ହୋଇଥିଲା । ୧୫ଟି ଭୋଟ ନାକଚ ହୋଇଥିବା ବେଳେ ୭୫୨ ଖଣ୍ଡ ଭୋଟ ବୈଧ ରହିଥିଲା । ଉପରାଷ୍ଟ୍ରପତି ନିର୍ବାଚନ ଜିତିବାକୁ ମ୍ୟାଜିକ ନମ୍ବର ୩୭୭ ରହିଥିଲା । ରାଥାକ୍ରିଷ୍ଣନଙ୍କୁ ୪୨୫ ଭୋଟ ମିଳିଥିବା ବେଳେ ସୁଦର୍ଶନଙ୍କୁ ୩୦୦ ଖଣ୍ଡ ଭୋଟ ମିଳିଛି ।
ସିଆଚିନରେ ହିମ ସ୍ଖଳନ, ତିନି ଯବାନ ସହିଦ
ନନ୍ଦିଘୋଷ ବ୍ୟୁରୋ: ବିଶ୍ବର ସବୁଠାରୁ ଉଚ୍ଚତମ ଯୁଦ୍ଧକ୍ଷେତ୍ର ସିୟାଚିନ ଗ୍ଲେସିୟରରେ ବଡ଼ ଧରଣର ହିମ ସ୍ଖଳନ ଘଟି ତିନି ଜଣ ଭାରତୀୟ ଜବାନ ସହିଦ ହୋଇଯାଇଛନ୍ତି । ହିମ ସ୍ଖଳନ ସୂତନା ପାଇବା ପରେ ସେନା ପକ୍ଷରୁ ଉଦ୍ଧାର କାର୍ଯ୍ୟ ଆରମ୍ଭ ହୋଇଯାଇଛି । ରେସ୍ୟୁ ମିଟ୍ ଘଟଣା ସ୍ଥଳରେ ପହଞ୍ଚିବା ସହ ଯବାନମାନଙ୍କୁ ଉଦ୍ଧାର କାର୍ଯ୍ୟରେ ଲାଗିଛନ୍ତି । ସୂଚନାଯୋଗ୍ୟ, ମାଇନସ ୬୦ ଡିଗ୍ରୀ ସେଲସିୟସ ତାପମାତ୍ରା, ପବନ ଓ ବରଫ ଚଟାଣ ମଧ୍ୟରେ ଭାରତୀୟ ସେନା ପ୍ରହରା ଦେଇ ଦେଶର ସୀମାକୁ ସୁରକ୍ଷା ଦେଇଥାନ୍ତି ।
ସିଆଚୀନ ଗ୍ଲେସିୟର ବିଶ୍ବର ସବୁଠାରୁ ଉଚ୍ଚା ଯୁଦ୍ଧକ୍ଷେତ୍ର । ମାଇନସ ୬୦ ଡିଗ୍ରୀ ଥଣ୍ଡା ସହ ବରଫ ଝଡ଼ ଯବାନଙ୍କ ପାଇଁ ବଡ଼ ଚ୍ୟାଲେଞ୍ଜ ହୋଇଥାଏ । ଏହା ଲଦାଖ କ୍ଷେତ୍ର କାରାକୋରମ ରେଞ୍ଜର ପୂର୍ବଭାଗରେ ଆସିଥାଏ । ଏହା ସମୁଦ୍ର ପତନରୁ ୫୪ ହଜାର ମିଟର ଅର୍ଥାତ ୧୮ ହଜାର ଫୁଟ ଉଚ୍ଚରେ ରହିଛି । କିଛି ସ୍ଥାନର ଉଚ୍ଚତା ୭୫୦୦ ମିଟର ଅର୍ଥାତ ୨୪ ହଜାର ଫୁଟ ପର୍ଯ୍ୟନ୍ତ ରହିଥାଏ । ଗ୍ଲେସିୟରର ଲମ୍ବା ୭୬ କିଲୋମିଟର । ଏହା ଭାରତ-ପାକିସ୍ତାନ-ଚୀନ ସୀମାକୁ ସଂଯୋଗ କରୁଥିବାରୁ ଏହାର ଗୁରୁତ୍ବ ବହୁତ ଅଧିକ ରହିଛି । ଯାହା ସାମରୀକ ଦୃଷ୍ଟିକୋଣରୁ ଭାରତ ପାଇଁ ବହୁତ ଗୁରୁତ୍ବପୂର୍ଣ୍ଣ ।
ନେପାଳ ପ୍ରଧାନମନ୍ତ୍ରୀଙ୍କ ପରେ ରାଷ୍ଟ୍ରପତିଙ୍କ ଇସ୍ତଫା
ନନ୍ଦିଘୋଷ ବ୍ୟୁରୋ: ନେପାଳରେ ଜେନ୍-ଜେଡଙ୍କ ଆନ୍ଦୋଳନ ଉଗ୍ର ରୂପ ନେବା ପରେ ଜଣଙ୍କ ପରେ ଜଣେ ନେତା ନିଜ ପଦରୁ ଇସ୍ତଫା ଦେଉଛନ୍ତି । ପ୍ରଧାନମନ୍ତ୍ରୀ କେପି ଶର୍ମା ଓଲିଙ୍କ ପରେ ରାଷ୍ଟ୍ରପତି ରାମଚନ୍ଦ୍ର ପୌଡେଲ ମଧ୍ୟ ଇସ୍ତଫା ଦେଇଛନ୍ତି । ଆନ୍ଦୋଳନକାରୀ ତାଙ୍କ ଘରେ ନିଆଁ ଲଗାଇ ଦେଇଛନ୍ତି । ଓଲି ଇସ୍ତଫା ଦେଇଥିବା ବେଳେ ଆଜି ସନ୍ଧ୍ୟା ସୁଦ୍ଧା ଅନ୍ତରିମ ପ୍ରଧାନମନ୍ତ୍ରୀଙ୍କ ନାଁ ଘୋଷଣା କରାଯିବାର ସମ୍ଭାବନା ରହିଛି ।
ବାଲେନ୍ଦ୍ର ଶାହଙ୍କୁ ରାଷ୍ଟ୍ରପତି କରିବାକୁ ଦାବି
ସେପଟେ ରାଷ୍ଟ୍ରପତିଙ୍କ ଇସ୍ତଫା ପରେ କାଠମାଣ୍ଡୁ ମେୟର ବାଲେନ୍ଦ୍ର ଶାହଙ୍କୁ ଅନ୍ତରିମ ରାଷ୍ଟ୍ରପତି କରାଯିବାକୁ ଜେନ୍-ଜେଡ ପକ୍ଷରୁ ଦାବି କରାଯାଇଛି । ସୂଚନାଯୋଗ୍ୟ, ଜେନ୍-ଜେଡଙ୍କ ଏହି ଆନ୍ଦୋଳନର ନେତୃତ୍ବ ବାଲେନ୍ଦ୍ର ନେଇଛନ୍ତି । ଓଲିଙ୍କ ଇସ୍ତଫା ଜେନେରେଶନ ଜେଡଙ୍କ ଆନ୍ଦୋଳନର ପ୍ରଭାବ ବୋଲି ବାଲେନ୍ଦ୍ର ଫେସବୁକରେ ଏକ ପୋଷ୍ଟ କରି କହିଛନ୍ତି । ନିଜ ପୋଷ୍ଟରେ ସେ ଲେଖିଛନ୍ତି, ମୁଁ ସ୍ପଷ୍ଟ ଭାବେ କହିଛି, ଏହି ଆନ୍ଦୋଳନ କେବଳ ଜେନ-ଜେଡଙ୍କର । ପ୍ରୀୟ ଜେନେରେଶନ ଜେଡ ଆପଣଙ୍କୁ ନିର୍ଯାତନା ଦେଉଥିବା ବ୍ୟକ୍ତି ଇସ୍ତଫା ଦେଇ ସାରିଛନ୍ତି । ଏବେ ସଞ୍ଜମତା ରକ୍ଷା କର ।
ନେପାଳ ସେନାର ଅପିଲ୍
ସେପଟେ ନେପାଳ ସେନାମୁଖ୍ୟ ମଧ୍ୟ ଜେନ-ଜେଡଙ୍କୁ ସଞ୍ଜମତା ରକ୍ଷା କରିବାକୁ ଅପିଲ କରିଛନ୍ତି । ସେ କହିଛନ୍ତି, ପ୍ରଧାନମନ୍ତ୍ରୀଙ୍କ ଇସ୍ତଫା ଗ୍ରହଣ କରାଯାଇ ସାରିଛି । ଏବେ ସମସ୍ତଙ୍କୁ ଅନୁରୋଧ କରାଯାଉଛି, ବିରୋଧ ପ୍ରଦର୍ଶନ ବେଳେ ସଞ୍ଜମତା ରକ୍ଷା କରନ୍ତୁ ଓ ରାଷ୍ଟ୍ରୀୟ ସମ୍ପତ୍ତିକୁ କ୍ଷତି ନପହଞ୍ଚାନ୍ତୁ ।
ନେତାଙ୍କୁ ଉଦ୍ଧାର କରୁଛି ସେନା
କାଠମାଣ୍ଡୁ ପୋଷ୍ଟ ଅନୁସାରେ, ଆନ୍ଦୋଳନକାରୀମାନେ ମନ୍ତ୍ରୀମାନଙ୍କ ବାସଭବନକୁ ଭଙ୍ଗାରୁଜା କରିବା ପରେ ମନ୍ତ୍ରୀମାନଙ୍କୁ ଉଦ୍ଧାର କରିବା କାର୍ଯ୍ୟ ନେପାଳ ସେନା ଆରମ୍ଭ କରି ଦେଇଛି । ହେଲିକପ୍ଟର ଜରିଆରେ ସେନା ମନ୍ତ୍ରୀମାନଙ୍କୁ ସୁରକ୍ଷିତ ସ୍ଥାନକୁ ନେଉଚନ୍ତି । ସଂସଦ ଭବନ ସୁରକ୍ଷା ପାଇଁ ସେନା ମୁତୟନ କରାଯାଇଥିବା ବରିଷ୍ଠ ଅଧିକାରୀ କହିଛନ୍ତି ।
କିଏ ହେବେ ନୂଆ ପ୍ରଧାନମନ୍ତ୍ରୀ ?
ପ୍ରଧାନମନ୍ତ୍ରୀ ଓଲିଙ୍କ ଇସ୍ତଫା ପରେ ଏବେ ନୂଆ ପ୍ରଧାନମନ୍ତ୍ରୀଙ୍କୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି । ଏମିତି ସ୍ଥିତିରେ ଦୁଇ ଜଣଙ୍କ ନାଁ ସବୁଠୁ ଆଗରେ ରହିଛି । କାଠମାଣ୍ଡୁ ମେୟର ବାଲେନ୍ଦ୍ର ଶାହଙ୍କ ନାଁ ଚର୍ଚ୍ଚାରେ ରହିଛି । ସେହିପରି କିଛି ତାଙ୍କୁ ଅନ୍ତରିମ ରାଷ୍ଟ୍ରପତି କରିବାକୁ ବି ଦାବି କରୁଛନ୍ତି । କାରଣ ବାଲେନ୍ଦ୍ର ଆରମ୍ଭରୁ ହିଁ ଏହି ଆନ୍ଦୋଳନକୁ ସମର୍ଥନ ଦେଇ ଆସିଛନ୍ତି । ତାଙ୍କ ପରେ ଦ୍ବିତୀୟ ବଡ଼ ଚେହେରା ଭାବେ ଶେଖର କୋଇରାଲଙ୍କ ନାଁ ବି ପ୍ରଧାନମନ୍ତ୍ରୀ ଦୌଡରେ ରହିଛି ।
ଭାରତୀୟ ଦୂତାବାସ ପକ୍ଷରୁ ହେଲପ୍ ଲାଇନ୍ ନମ୍ବର ଜାରି
ନେପାଳ ସ୍ଥିତି ଖରାପ ହେବା ପରେ ଭାରତୀୟଙ୍କ ସୁରକ୍ଷାକୁ ନେଇ ଚିନ୍ତା ପ୍ରକାଶ ପାଇଛି । ନେପାଳ ସ୍ଥିତ ଭାରତୀୟ ଦୂତାବାସ ପକ୍ଷରୁ ଭାରତୀୟଙ୍କ ପାଇଁ ହେଲପ୍ ଲାଇନ୍ ନମ୍ବର ଜାରି କରାଯାଇଛି । ନେପାଳରେ ରହୁଥିବା ଭାରତୀୟ କୌଣସି ପ୍ରକାରର ସହାୟତା ପାଇଁ 977-9808602881 ନମ୍ବରରେ ଯୋଗାଯୋଗ କରିବାକୁ କୁହାଯାଇଛି ।
ସେପଟେ ସ୍ଥିତିକୁ ଦେଖି ଦିଲ୍ଲୀରୁ କାଠମାଣ୍ଡୁକୁ ବିମାନ ସେବା ବନ୍ଦ କରି ଦିଆଯାଇଛି । ଅନ୍ତରିମ ସରକାର ଗଠନ ନହେବା ପର୍ଯ୍ୟନ୍ତ ବିମାନ ସେବା ବନ୍ଦ ରହିବାର ସମ୍ଭାବନା ରହିଛି ।