ନାହିଁ ନାହିଁରେ ଚାଲିଛି ଭୀମସାର । ମେଡିକାଲରେ ବ୍ୟାପକ ଅବ୍ୟବସ୍ଥା ଅଭିଯୋଗ । ବିଶ୍ବାସ ହରାଉଛନ୍ତି ରୋଗୀ ଓ ତାଙ୍କ ସମ୍ପର୍କୀୟ । ପଶ୍ଚିମ ଓଡ଼ିଶା ତଥା ଛତିଶଗଡ ଓ ଝାଡ଼ଖଣ୍ଡ ଜନସାଧାରଣଙ୍କ ବିଶ୍ୱାସ ଯୋଗ୍ୟ ମେଡ଼ିକାଲ ବୁର୍ଲା ଭୀମସାର । ହେଲେ ଏବେ ଏହା ସ୍ଥାଣୁ ପାଲଟିଥିବା ଅଭିଯୋଗ ହୋଇଛି । ୨୦୨୩ ରେ ନିର୍ଦ୍ଦେଶକ ଲଳିତ ମେହେର ଅବସର ନେବା ପରେ ଏ ପର୍ଯ୍ୟନ୍ତ ସ୍ଥାୟୀ ନିର୍ଦ୍ଦେଶକ ନିଯୁକ୍ତି ପାଇ ନାହାନ୍ତି । କେତେବେଳେ ଡାକ୍ତର ପଦ ଖାଲି ରହୁଛି ତ ଆଉ କେତେବେଳେ ମେଡ଼ିକାଲ ସରଞ୍ଜାମ ରୋଗୀ ପାଖରେ ପହଞ୍ଚି ପାରୁନାହିଁ । ମେଡ଼ିକାଲର ଲିଫ୍ଟ ଠାରୁ ବିଭିନ୍ନ ମୌଳିକ ସମସ୍ୟା ଲାଗି ରହୁଥିବାରୁ ରୋଗୀଙ୍କ ଭିତରେ ତୀବ୍ର ଅସନ୍ତୋଷ ପ୍ରକାଶ ପାଇଛି ।
କେବଳ ନିର୍ଦ୍ଦେଶକ ପଦ ଖାଲି ପଡ଼ିଛି ତାହା ନୁହେଁ ତା ସହ ମେଡ଼ିକାଲ କଲେଜର ଡିନ ଓ ଡାକ୍ତର ଖାନାର ଅଧିକ୍ଷକ ପଦ ମଧ୍ୟ କାମଚଳାରେ ଚାଲିଛି । ଦୀର୍ଘଦୀନ ଧରି ନୂଆ ନିଯୁକ୍ତି ନେଇ ସରକାର କୌଣସି ପଦକ୍ଷେପ ନେଉ ନଥିବା ଅଭିଯୋଗ ହେଉଛି । କର୍ମଚାରୀ ଅଭାବରୁ ରୋଗୀଙ୍କୁ ଘଣ୍ଟା ଘଣ୍ଟା ଧରି ଲାଇନରେ ଛିଡ଼ା ହେବାକୁ ପଡୁଛି । ତେଣୁ ସମସ୍ୟା ଦିଗରେ ରାଜ୍ୟ ସରକାର ହସ୍ତକ୍ଷେପ କରନ୍ତୁ ବୋଲି ଜିଲ୍ଲାବାସୀ ଦାବି କରିଛନ୍ତି ।
ନାହିଁ ନାହିଁରେ ଚାଲିଛି ଭୀମସାର: ମେଡିକାଲରେ ବ୍ୟାପକ ଅବ୍ୟବସ୍ଥା ଅଭିଯୋଗ
ହନ୍ତସନ୍ତ କରୁଛନ୍ତି ବୁଲା କୁକୁର: ବଢୁଛି କୁକୁର କାମୁଡ଼ା ରୋଗୀଙ୍କ ସଂଖ୍ୟା
ହନ୍ତସନ୍ତ କରୁଛନ୍ତି ବୁଲା କୁକୁର । ବଢୁଛି କୁକୁର କାମୁଡ଼ା ରୋଗୀଙ୍କ ସଂଖ୍ୟା । ଜଳାନ୍ତକ ଆତଙ୍କରେ ଆତଙ୍କିତ ସହରବାସୀ । ବାଲେଶ୍ୱର ସହରରେ ବଡ଼ ସମସ୍ୟା ପାଲଟିଛି ବୁଲା କୁକୁର । ଅନେକ ଲୋକ କୁକୁରଙ୍କୁ ଆଦର କରିଥାନ୍ତି, ଏପରିକି ବିଭିନ୍ନ ଦୋକାନ ଖାଦ୍ୟ ଦୋକାନ ରେ କୁକୁର ମାନଙ୍କୁ ଖାଇବାକୁ ଦେଉଛନ୍ତି । ତେବେ ଅନେକ ସମୟରେ ପିଲା ଓ ଯାତ୍ରୀଙ୍କୁ ଭୟଭୀତ କରିବା ସହ କାମୁଡ଼ି କ୍ଷତାକ୍ତ କରୁଛନ୍ତି । ବାରବାଟୀ ଅଞ୍ଚଳରେ ଗତ ୧୫ ଦିନ ମଧ୍ୟରେ ୧୮ ଜଣ ଲୋକଙ୍କୁ ଆକ୍ରମଣ କଲେଣି ବୁଲା କୁକୁର । ଏପରିକି ଅନେକ ସମୟରେ ଏହି ବୁଲା କୁକୁରଙ୍କ ଯୋଗୁଁ ଦୁର୍ଘଟଣା ଘଟୁଛି । କୁକୁର ଆକ୍ରମଣରେ ଗୁରୁତର ହୋଇ ଜଣେ ପରେ ଜଣେ ମେଡିକାଲରେ ଭର୍ତ୍ତିହେବା ପରେ ଲୋକେ ପ୍ରଶାସନକୁ ସମସ୍ୟାର ସମାଧାନ କରିବାକୁ ଦାବି କରିଛନ୍ତି ।
ପୂର୍ବରୁ ପୌରପାଳିକା ଦ୍ୱାରା କୁକୁର ଧରା ଅଭିଯାନ ହେଉଥିଲା । ସ୍ୱତନ୍ତ୍ର ଗାଡ଼ି ରେ କୁକୁର ଧରିବା ସହିତ ସେମାନଙ୍କ ବନ୍ଧ୍ୟାକରଣ କରାଯାଉଥିଲା । କିନ୍ତୁ ଏହା ଏବେ ବନ୍ଦ ହୋଇଯାଇଛି । ଏପରିକି କୁକୁର ମାମଲାକୁ ନେଇ ସୁପ୍ରିମକୋର୍ଟ ମଧ୍ଯ କ୍ଷୋଭ ପ୍ରକାଶ କରିଛନ୍ତି । ବୁଲା କୁକୁରଙ୍କୁ ବନ୍ଧ୍ୟାକରଣ କରିବା ପରେ ବାହାରେ ଛଡ଼ାଯିବ। ସର୍ବସାଧାରଣ ସ୍ଥାନରେ କୁକୁରଙ୍କୁ ଖାଦ୍ୟ ଦେବାକୁ ବାରଣ କରିଛନ୍ତି ସର୍ବୋଚ୍ଚ ନ୍ୟାୟାଳୟ । ତେବେ ମୁନିସିପାଲଟି ଚେୟାରମ୍ୟାନ କହିଛନ୍ତି, କୁକୁର କାମୁଡ଼ା ଅଭିଯୋଗ ବିଭିନ୍ନ ସ୍ଥାନରୁ ବହୁଳ ମାତ୍ରାରେ ଆସୁଛି । ତେବେ ସରକାର ଯଦି କିଛି ନିୟମ ଆଣନ୍ତି ତେବେ ଏହି ସମସ୍ୟାର ସମାଧାନ ହୋଇପାରନ୍ତା ।
ଅସୁରକ୍ଷିତ ବଡ଼ଦେଉଳ: ସୁରକ୍ଷା ବଳୟ ଭେଦି ଶ୍ରୀମନ୍ଦିର ଉପରେ ଚଢିବାକୁ ଉଦ୍ୟମ
ଅସୁରକ୍ଷିତ ବଡ଼ଦେଉଳ । ସୁରକ୍ଷା ବଳୟ ଭେଦି ଶ୍ରୀମନ୍ଦିର ଉପରେ ଚଢିବାକୁ ଉଦ୍ୟମ । ୫ ଫୁଟ ଉପରକୁ ଚଢିବା ପରେ ଉଦ୍ଧାର କଲେ ସୁରକ୍ଷା କର୍ମୀ । କେତେବେଳେ ଶ୍ରୀମନ୍ଦିର ଭିତର ଫୋଟୋ ଭାଇରାଲ ହେଉଛି ତ କେତେବେଳେ ଉପରେ ଉଡୁଛି ଡ୍ରୋନ । ସ୍ପାଏ କ୍ୟାମେରା ନେଇ ଭିତରେ ପ୍ରବେଶ କରୁଛନ୍ତି ଲୋକେ । ଗତ କିଛିଦିନ ମଧ୍ୟରେ ଅନେକ ଭକ୍ତ ଶ୍ରୀମନ୍ଦିର ଉପରେ ଚଡିବା ପାଇଁ ଉଦ୍ୟମ କରୁଥିବା ମଧ୍ଯ ନଜର ଆସିଛି । ଯାହାକୁ ନେଇ ଶ୍ରୀମନ୍ଦିର ସୁରକ୍ଷା ପ୍ରତି ସୃଷ୍ଟି ହୋଇଛି ଆଶଂକା । ଜିଲ୍ଲା ପୋଲିସ ଓ ସ୍ୱତନ୍ତ୍ର ସୁରକ୍ଷା ବାହିନୀ ଥିବା ସତ୍ତ୍ବେ ସୁରକ୍ଷା ବଳୟକୁ ଭେଦ କରି ଏପରି ଘଟଣା କିପରି ଘଟୁଛି ତାକୁ ନେଇ ସୃଷ୍ଟି ହୋଇଛି ପ୍ରଶ୍ନ ।
ଆଜି ପୁଣି ବେହରଣ ଦ୍ବାର ଦେଇ ଦେଉଳର ପ୍ରାୟ ୫ ଫୁଟ ଉପରକୁ ଚଢିଥିଲେ ଉତ୍ତରପ୍ରଦେଶର ମନୋଜ ସିଂ । ତାଙ୍କୁ କାବୁ କରିବା ପରେ ସିଂହଦ୍ୱାର ଥାନାରେ ଅଟକ ରଖାଯାଇଛି । ବାରମ୍ବାର ଏପରି ଘଟଣା ସାମ୍ନାକୁ ଆସିବା ପରେ ଶ୍ରୀମନ୍ଦିର ପ୍ରଶାସନ ଓ ପୋଲିସ ପ୍ରଶାସନ ପକ୍ଷରୁ ନିଆଯାଇଛି ପଦକ୍ଷେପ । ଆନନ୍ଦ ବଜ଼ାରରେ ସ୍ୱତନ୍ତ୍ର କଣ୍ଟ୍ରୋଲ ରୁମ କରାଯିବା ସହ କିଛି ସ୍ଥାନରେ ସୁରକ୍ଷା ବଢାଇବାକୁ ନିଷ୍ପତ୍ତି ନିଆଯାଇଛି । ସଚେତନତା ସୃଷ୍ଟି କରିବାକୁ ବିଭିନ୍ନ ସ୍ଥାନରେ ଲଗାଯିବ ହୋର୍ଡିଂ । ସୁରକ୍ଷାକୁ ନେଇ ଶ୍ରୀମନ୍ଦିର ଆଇନରେ ପରିବର୍ତ୍ତନ ଦିଗରେ ସରକାରଙ୍କ ନିକଟକୁ ପ୍ରସ୍ତାବ ଦିଆଯାଇଥିବା କହିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ । ଅନ୍ୟପକ୍ଷରେ ପରିଚାଳନା କମିଟି ଗଠନ ପରେ ନାଟ ମଣ୍ଡପରେ ଧାଡି ଦର୍ଶନ ବ୍ୟବସ୍ଥାକୁ ନେଇ ଆବଶକୀୟ ପଦକ୍ଷେପ ନିଆଯିବ ବୋଲି ସେ ସୂଚନା ଦେଇଛନ୍ତି ।
ଏକତରଫା ପ୍ରେମ କରି ବିଫଳ ହେବାରୁ ନାବାଳିକାଙ୍କୁ ମରଣାନ୍ତକ ଆକ୍ରମଣ ଅଭିଯୋଗ
ଏକତରଫା ପ୍ରେମ କରି ବିଫଳ ହେବାରୁ ନାବାଳିକାଙ୍କୁ ମରଣାନ୍ତକ ଆକ୍ରମଣ ଅଭିଯୋଗ । ଏଭଳି ଘଟଣା ଦେଖିବାକୁ ମିଳିଛି କଟକ ଜିଲ୍ଲା ଜଗତପୁର ଥାନା ଅଂଚଳରେ । ନାବାଳିକା ଜଣଙ୍କ କଲେଜ ଯାଉଥିବା ବେଳେ ମଳୟ ସାମଲ ନାମକ ଜଣେ ଯୁବକ ତାଙ୍କୁ ମରଣାନ୍ତକ ଆକ୍ରମଣ କରିଥିଲେ । ପୂର୍ବରୁ ଯୁବକ ଜଣଙ୍କ ନାବାଳିକାଙ୍କ ଫୋନ ନମ୍ବର୍ ସଂଗ୍ରହ କରି ବାରମ୍ବାର ଫୋନ୍ କରି ପ୍ରେମ ନିବେଦନ କରିଥିଲେ । ହେଲେ ନାବାଳିକା ଜଣଙ୍କ ବାରମ୍ବାର ପ୍ରତ୍ୟାଖ୍ୟାନ କରି ଆସୁଥିଲେ । ଶେଷରେ ପ୍ରେମ ନିବେଦନ କରି ଯୁବକ ଜଣଙ୍କ ବିଫଳ ହେବାରୁ ଏଭଳି ଆକ୍ରମଣ କରିଥିବା ଅଭିଯୋଗ ହୋଇଛି । ଏନେଇ ନାବାଳିକାଙ୍କ ବାପା ଜଗତପୁର ଥାନାରେ ଅଭିଯୋଗ କରିଛନ୍ତି ।.
୧୦୮ ଆମ୍ବୁଲାନ୍ସର ବିକଳ ଚିତ୍ର: ମଝି ରାସ୍ତାରେ ହନ୍ତସନ୍ତ ହେଉଛନ୍ତି ରୋଗୀ
୧୦୮ ଆମ୍ବୁଲାନ୍ସର ବିକଳ ଚିତ୍ର। କେତେବେଳେ ବିଳମ୍ବରେ ପହଁଚୁଛି ତ ଆଉ କେଉଁଠି ବିଚ ରାସ୍ତାରେ ଖରାପ ହୋଇଯାଉଛି। ଫଳରେ ମଝି ରାସ୍ତାରେ ହନ୍ତସନ୍ତ ହେଉଛନ୍ତି ରୋଗୀ। ଯାହାର ବାସ୍ତବ ଚିତ୍ର ଆଜି ଦେଖିବାକୁ ମିଳିଛି ଭଦ୍ରକ ଆନନ୍ଦପୁର ରାସ୍ତାର ରାନ୍ଦିଆ ଫିସରୀ ଛକ ନିକଟରେ। କେନ୍ଦୁଝର ଜିଲ୍ଲା ହାଟଡିହି ବ୍ଲକ ନନ୍ଦିପଦା ଥାନା ଡିମ୍ବିରିଆ ଗ୍ରାମର ଦାସରଥୀ ବାରିକ ନିଜ ଗୁରୁତ୍ତର ଝିଅକୁ ଚିକିତ୍ସା ପାଇଁ ୧୦୮ ଆମ୍ବୁଲାନ୍ସରେ ଭଦ୍ରକ ମେଡିକାଲ ନେଇ ଆସୁଥିବା ବେଳେ ଗାଡି ଖରାପ ହୋଇଯାଇଥିଲା।। ଫଳରେ ତାଙ୍କୁ ଦୀର୍ଘ ସମୟ ଧରି ଅପେକ୍ଷା କରିବା ସହିତ ଅନ୍ୟ ଏକ ଗାଡିରେ ଭଦ୍ରକ ମେଡିକାଲକୁ ଆସିବାକୁ ପଡିଥିଲା। ଏପରିକି ପରିବାର ପକ୍ଷରୁ ୧୦୮ ଆମ୍ବୁଲାନ୍ସ ପାଇଁ ରାତି ୩ ଟାରୁ ଫୋନ କରାଯାଇଥିବା ବେଳେ ଆମ୍ବୁଲଆନ୍ସ ସକାଳ ୭ ଟାରେ ପହଂଚିଥିବା ଅଭିଯୋଗ ହୋଇଛି। ଗୋଟେ ପଟେ ୧୦୮ ବିଳମ୍ବରେ ପହଂଚିବା ଓ ବିଚ ରାସ୍ତାରେ ଖରାପ ହେବାକୁ ନେଇ ପରିବାର ଲୋକେ ଅସନ୍ତୋଷ ପ୍ରକାଶ କରିଛନ୍ତି। ଅନ୍ୟପଟେ ରାସ୍ତାରେ ହଠାତ ଗାଡି ଖରାପ ହେବା ପରେ ରୋଗୀଙ୍କୁ ଅନ୍ୟ ଏକ ଗାଡିରେ ସ୍ଥାନାନ୍ତର କରାଯିବା କଥା କହିଛନ୍ତି ୧୦୮ ଡ୍ରାଇଭର।
ପାଖେଇ ଆସିଲାଣି ଗଣେଶ ପୂଜା: ଚଳଚଞ୍ଚଳ ମୂର୍ତ୍ତି କାରିଗର
ପାଖେଇ ଆସିଲାଣି ଗଣେଶ ପୂଜା । ଚଳଚଞ୍ଚଳ ମୂର୍ତ୍ତି କାରିଗର । ଚିକମିକ ରଙ୍ଗ ଦେଇ ମୂର୍ତ୍ତିକୁ ଦେଉଛନ୍ତି ଶେଷ ସ୍ପର୍ଶ । ପୁରୀ ଜିଲ୍ଲା କାକଟପୁର ଜଗନ୍ନାଥପୁର ଓ ଅସ୍ତରଙ୍ଗ ଅଂଚଳର ହରିଣହୁଳା, ଓସ୍ତପୁର କୁମ୍ଭକାର ଗାଁରେ ଭଳିକି ଭଳି ଗଣେଶ ମୂର୍ତ୍ତି ତିଆରି କରୁଛନ୍ତି କାରିଗର । ଗ୍ରାହକଙ୍କ ଅର୍ଡର ଅନୁସାରେ ନିର୍ମାଣ କରୁଛନ୍ତି ୨୦ ରୁ ୩୦ ଫୁଟ ପର୍ଯ୍ୟନ୍ତ ମୁଣ୍ମୟୀ ମୂର୍ତ୍ତି । କାକଟପୁର ଜଗନ୍ନାଥପୁର ଅଂଚଳ ମୂର୍ତ୍ତିର ସ୍ୱତନ୍ତ୍ର ଚାହିଦା ଥିବାରୁ ଜିଲ୍ଲା ତଥା ଜିଲ୍ଲାର କୋଣ ଅନୁକୋଣରୁ ଗ୍ରାହକ ମାନେ ମୂର୍ତ୍ତି କିଣିବାକୁ ଏଠାକୁ ଧାଇଁ ଆସନ୍ତି । କାରିଗର ମାନେ ଭଲ ଦି ପଇସା ବେପାର ଆଶା ରଖି ଅଧିକ ମୂର୍ତ୍ତି ମଧ୍ୟ ତିଆରି କରିଛନ୍ତି ।
ସେପଟେ ଖୋର୍ଦ୍ଧା ଜିଲ୍ଲା ଜଟଣୀ କୁଦିଆରୀ ଗାଁରେ ଚଳଚଞ୍ଚଳ ମୂର୍ତ୍ତି କାରିଗର । ଦିନ ରାତି ଏକ କରି ମୂର୍ତ୍ତି ନିର୍ମାଣରେ ଲାଗିଛନ୍ତି । ଛୋଟରୁ ବଡ ପର୍ଯ୍ୟନ୍ତ ଭଳିକି ଭଳି ମୂର୍ତ୍ତି ତିଆରି କରୁଛନ୍ତି । କୁଦିଆରୀ ଗାଁରେ ତିଆରି ହେଉଥିବା ମୂର୍ତ୍ତିର ଜଟଣୀ ତଥା ଜଟଣୀ ବାହାରେ ମଧ୍ୟ ବେଶ ଚାହିଦା ରହିଛି । ମୂର୍ତ୍ତି ନେବା ପାଇଁ ଏବେଠାରୁ ବଇନା ଦେଇଗଲେଣି ଗ୍ରାହକ । ହେଲେ ବି ପରିଶ୍ରମ ମୁତାବକ ପାଉଣା ମିଳୁନଥିବା କହିଛନ୍ତି କାରିଗର । ଗଣେଶ ପୂଜା ଠାରୁ ଆରମ୍ଭ ହେବ ପାର୍ବଣ ଋତୁ । ଏଥିପାଇଁ ଚଳଚଞ୍ଚଳ ହୋଇପଡିଲାଣି ପୁରପଲ୍ଲୀ ।
ପୋଖରୀ ଉନ୍ନତିକରଣ ନାଁରେ ଲୁଟ୍ ଅଭିଯୋଗ
ପୋଖରୀ ଉନ୍ନତିକରଣ ନାଁରେ ଲୁଟ୍ ଅଭିଯୋଗ । ଦୁର୍ନୀତିଖୋର ଅଧିକାରୀ ଓ କର୍ମଚାରୀଙ୍କ ମିଲିଭଗତରେ ଅର୍ଥ ହେରଫେର । କେନ୍ଦୁଝର ଜିଲ୍ଲା ଘଟଗାଁ ବ୍ଲକ ମୁକୁନ୍ଦପୁରପାଟଣା ପଞ୍ଚାୟତର ତାରିଣୀ ଗଡିଆ ନାଁରେ କରାଯାଇଛି ଟଙ୍କା ଆତ୍ମସାତ । ୨୦୨୩- ୨୪ ଆର୍ଥିକ ବର୍ଷରେ ତାରିଣୀ ଗଡିଆର ଉନ୍ନତି ପାଇଁ ମନରେଗା ଯୋଜନାରେ ୧୦ ଲକ୍ଷ ଟଙ୍କା ଅନୁଦାନ ମିଳିଥିଲା । ହେଲେ ତାହା କେବଳ କାଗଜ କଲମରେ ଖର୍ଚ୍ଚ ହୋଇଥିବା ଦେଖିବାକୁ ମିଳିଛି । ଶ୍ରମିକଙ୍କ କାମକୁ ପୂରା କରିଥିଲା ମେସିନ । କିନ୍ତୁ ଟଙ୍କା ଯାଇଥିଲା କାମ କରିନଥିବା ଅନ୍ୟ ଲୋକଙ୍କ ଆକାଉଣ୍ଟକୁ । ପରିତାପର ବିଷୟ ଟଙ୍କା ଯାଇଥିବା ଲୋକଙ୍କ ମଧ୍ୟରୁ କିଛି ଦୃଷ୍ଟିବାଧିତ ଥିବା ବେଳେ କେତେକଙ୍କ ମୃତ୍ୟୁ ଘଟିସାରିଛି ।
ଦୁର୍ନୀତିକୁ ବିରୋଧ କରି RTIରୁ ତଥ୍ୟ ସଂଗ୍ରହ କରି ଜିଲ୍ଲା ଲୋକପାଳଙ୍କ ନିକଟରେ ଅଭିଯୋଗ କରିଥିଲେ ଘଟଗାଁର ଯୁବ ଆଇନଜୀବୀ ଅନୀଲ କୁମାର ଦେହୁରୀ । ଯାହାକୁ ନେଇ ଲୋକପାଳ ତାରିଣୀ ଗଡିଆ ଯାଇ ଘଟଣାର ତଦନ୍ତ କରିଥିଲେ । ତଦନ୍ତ ପରେ ଜାଣିବାକୁ ପାଇଥିଲେ କିଛି ଅଧିକାରୀଙ୍କ ଦାୟିତ୍ଵହୀନତା ଯୋଗୁଁ ଏଭଳି ଘଟଣା ଘଟିଛି । ତା ପରେ ଆକ୍ସନ ନେଇଛନ୍ତି ଲୋକପାଳ । ମନରେଗା ଯୋଜନାରେ ଖର୍ଚ୍ଚ ହୋଇଥିବା ୧୦ ଲକ୍ଷ ଟଙ୍କାରୁ ୮ ଲକ୍ଷ ୫୧ ହଜାର ୮୪୯ ଟଙ୍କା ଦୁଇଟି ପର୍ଯ୍ୟାୟରେ ୬ ଜଣ ଅଧିକାରୀ ତତ୍କାଳୀନ ଦୁଇଜଣ ଜେଇ, ଜଣେ ବିଡିଓ, ଜଣେ ଏଇଇ ଏବଂ ଜଣେ ବି. ଏଫ.ଓଙ୍କ ଠାରୁ ଆଦାୟ କରିବାକୁ ସେ ସୁପାରିସ କରିଛନ୍ତି । ଏହା ସହ ଦୁର୍ନୀତିଗ୍ରସ୍ତ ଅଧିକାରୀଙ୍କ ବିରୋଧରେ କାର୍ଯ୍ଯାନୁଷ୍ଠାନ ଗ୍ରହଣ କରିବାକୁ ସୁପାରିସ କରିଛନ୍ତି ଲୋକପାଳ ।
ଶିକ୍ଷା ବ୍ୟବସ୍ଥାର ବିକଳ ଚିତ୍ର ! ଦାଦନ ପ୍ରବଣ ଅଞ୍ଚଳରେ ବଢୁଛି ଡ୍ରପଆଉଟ୍ ସଂଖ୍ୟା
ଶିକ୍ଷା ବ୍ୟବସ୍ଥାର ବିକଳ ଚିତ୍ର । ଦାଦନ ପ୍ରବଣ ଅଞ୍ଚଳରେ ବଢୁଛି ଡ୍ରପଆଉଟ ସଂଖ୍ୟା । କଳାହାଣ୍ଡି ଜିଲ୍ଲାରେ ଛାତ୍ରଛାତ୍ରୀଙ୍କ ଡ୍ରପଆଉଟ ସଂଖ୍ୟା ୧୪ ହଜାର ପାର । ଜିଲ୍ଲାର ୧୩ ଗୋଟି ବ୍ଲକ ରହିଥିବା ବେଳେ ସେଥିରେ ୩ ଶହରୁ ଉର୍ଦ୍ଧ୍ଵ ସ୍କୁଲ ରହିଛି । ହେଲେ ସବୁଠାରୁ ଚିନ୍ତାର ବିଷୟ ଜିଲ୍ଲାରେ ଡ୍ରପଆଉଟ ସଂଖ୍ଯା ବଢିବାରେ ଲାଗିଛି । କଣ ପାଇଁ ସ୍କୁଲକୁ ପିଲାମାନେ ଆସୁନାହାନ୍ତି ? ଅଧାରୁ କଣ ପାଇଁ ଛାଡୁଛନ୍ତି ପାଠପଢା ? ସରକାର ସବୁ କିଛି ମାଗଣାରେ ଯୋଗାଉଥିବା ବେଳେ ସ୍କୁଲ କାହିଁକି ଯିବାକୁ ଅମଙ୍ଗ ହେଉଛନ୍ତି ପିଲା ? ଏଭଳି ଅନେକ ପ୍ରଶ୍ନ ଏବେ ଜିଲ୍ଲା ପ୍ରଶାସନର ମୁଣ୍ଡ ବିନ୍ଧାର କାରଣ ପାଲଟିଛି । ଏପଟେ ତୃଣମୂଳ ସ୍ତରରେ ସଚେତନତାର ଅଭାବ ଓ ନିଜ ଅଞ୍ଚଳରେ କାମ ଅଭାବ ଯୋଗୁଁ ଅନେକ ପରିବାର ରାଜ୍ଯ ବାହାରକୁ ଦାଦନ ଖଟିବାକୁ ପଳାଉଛନ୍ତି । ଆଉ ଅନେକ ଅଞ୍ଚଳକୁ ଗମନାଗମନର ସୁବ୍ୟବସ୍ଥା ନଥିବାରୁ ଦୂର ବାଟ ସ୍କୁଲ ଯିବାକୁ ଛାତ୍ରଛାତ୍ରୀ ମଙ୍ଗୁ ନଥିବା କହିଛନ୍ତି ପ୍ରଧାନ ଶିକ୍ଷକ ।
ଭବାନୀପାଟଣା ବ୍ଲକର ଯୁଗସାଇପାଟଣା ସ୍କୁଲରେ ସବୁଠାରୁ ଅଧିକ ଡ୍ରପ ଆଉଟ ସଂଖ୍ୟା ରହିଛି । ଚଳିତ ବର୍ଷ ସରକାର ଡ୍ରପ ଆଉଟ ସଂଖ୍ୟା ରୋକିବା ସହ ପିଲାଙ୍କୁ ସ୍କୁଲ ମୁହାଁ କରାଇବାକୁ ସହିଦ ମାଧୋ ସିଂ ହାତ ଖର୍ଚ୍ଚ ଯୋଜନାର ଆରମ୍ଭ କରିଛନ୍ତି । ଏହି ଯୋଜନାରେ ନବମ ଓ ଏକାଦଶ ଶ୍ରେଣୀରେ ନାମ ଲେଖାଇଥିବା ଅନୁସୂଚିତ ଜାତି ଓ ଜନଜାତି ଛାତ୍ରଛାତ୍ରୀମାନଙ୍କୁ ୫ ହଜାର ଟଙ୍କା ଲେଖାଏଁ ପ୍ରୋତ୍ସାହନ ରାଶି ପ୍ରଦାନ କରାଯାଉଛି । ହେଲେ ସଚେତନତାର ଅଭାବ ଯୋଗୁଁ ଜିଲ୍ଲାରେ ଡ୍ରପ ଆଉଟ ସଂଖ୍ୟା ବୃଦ୍ଧି ପାଇବାରେ ଲାଗିଛି । ଏନେଇ ଜିଲ୍ଲା ସ୍ତରୀୟ ଦିଶା ମିଟିଂରେ ଡ୍ରପ ଆଉଟ ସଂଖ୍ୟା ବୃଦ୍ଧି ମୁଖ୍ୟ ପ୍ରସଙ୍ଗ ପାଲଟିଥିଲା । ଏହି ସମସ୍ୟାର ସମାଧାନ ବାହାର କରିବା ସହ ପିଲାଙ୍କୁ ପୁନଃ ସ୍କୁଲକୁ ଫେରାଇ ଆଣିବା ପାଇଁ ଉଦ୍ୟମ ଆରମ୍ଭ କରିଛି ଜିଲ୍ଲା ପ୍ରଶାସନ। ସରକାର ସ୍କୁଲ ଖୋଲିଦେଇ ପ୍ରୋତ୍ସାହନ ରାଶି ଘୋଷଣା କରି ଚୁପ ବସିଗଲେ ହେବନି । ଗ୍ରାଉଣ୍ଡରେ ଯୋଜନା କେତେ କାର୍ଯ୍ୟକାରୀ ହେଉଛି ତାହା ମଧ୍ୟ ତଦାରଖ କରିବାକୁ ପଡିବ । ନହେଲେ ବାପାପୁଅ ରାତି ଅନିଦ୍ରା, ମୁଗୁରା ପଛ ମେଲା ଭଳି ସ୍କୁଲ ଡ୍ରପ ଆଉଟ ବଢିଚାଲିଥିବ ।
ଜାତୀୟ ରାଜପଥରେ ଷ୍ଟଣ୍ଟ ପଡିଲା ମହଙ୍ଗା: କଟିଲା ମୋଟା ଅଙ୍କର ଚାଲାଣ
ଜାତୀୟ ରାଜପଥରେ ଷ୍ଟଣ୍ଟ ପଡିଲା ମହଙ୍ଗା। କଟିଲା ମୋଟା ଅଙ୍କର ଚାଲାଣ। ନନ୍ଦିଘୋଷ ଟିଭି ହାତରେ ଲାଗିଲା ସେହି Exclusive ଭିଜୁଆଲ । ୧୦ ହଜାର ଟଙ୍କାର ଚାଲାଣ କାଟିଲେ RTO । ଚଳନ୍ତା କାର ଡୋର୍ ଭିତରୁ ବାହାରି ଫିଲ୍ମ ଷ୍ଟାଇଲରେ ଷ୍ଟଣ୍ଟ ଦେଖାଉଥିଲେ । ୩ ଜଣ ଯୁବକ ବାହାରକୁ ବାହାରି ହୋ ହଲ୍ଲା କରୁଥିଲେ । ରାସ୍ତାରେ ଯାଉଥିବା ଲୋକଙ୍କୁ ହଇରାଣ ହରକତ କରୁଥିଲେ । କଟକରୁ ଭୁବନେଶ୍ଵର ଆଡ଼େ ଆସୁଥିବା ଏକ କାର ପଳାଶୁଣୀ ଓଭରବ୍ରିଜ୍ ଉପରେ ଷ୍ଟଣ୍ଟ କରୁଥିବା ଦେଖାଯାଇଥିଲା। ଯାହାର ଭିଡିଓ ଭାଇରାଲ ହେବା ପରେ କାର୍ଯ୍ୟାନୁଷ୍ଠାନ ନେଇଛି ପରିବହନ ବିଭାଗ ।
ମୋବାଇଲ ଲାଇଟରେ ରୋଗୀ ଚିକିତ୍ସା
ମୋବାଇଲ ଲାଇଟରେ ରୋଗୀ ଚିକିତ୍ସା। ପ୍ରାଥମିକ ସ୍ଵାସ୍ଥ୍ୟକେନ୍ଦ୍ର କି ଗୋଷ୍ଠୀ ସ୍ଵାସ୍ଥ୍ୟକେନ୍ଦ୍ରରେ ନୁହେଁ। ଜିଲ୍ଲା ମୁଖ୍ୟ ଚିକିତ୍ସାଳୟରେ ଏପରି ଘଟଣା ଘଟିଛି। ଏହା ହେଉଛି ରାୟଗଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟର ଦୃଶ୍ୟ। ଲାଇନ ପଳାଇଥିଲା। ଜେନେରେଟର ଅଚଳ। ୩ ଘଣ୍ଟା ଧରି ଏପରି ଅବସ୍ଥା। ରୋଗୀ ସେବା ପୂରା ବିପର୍ଯ୍ୟସ୍ତ ହୋଇ ପଡ଼ିଥିଲା।
ଡାକ୍ତର ବାଧ୍ୟ ହୋଇ ମୋବାଇଲ ଲାଇଟରେ ରୋଗୀ ଦେଖିଥିଲେ। ଲିଫ୍ଟ ବି ଅଚଳ ହୋଇ ପଡ଼ିଥିଲା। ଓପିଡି, ସ୍ତ୍ରୀ ଓ ପ୍ରସୂତି ବିଭାଗ, ଭେଷଜ ବିଭାଗ, ରକ୍ତ ନମୁନା ସଂଗ୍ରହ କେନ୍ଦ୍ରରେ ନାହିଁ ନ ଥିବା ପରିସ୍ଥିତି ସୃଷ୍ଟି ହୋଇଥିଲା। ଏହାକୁ ନେଇ ରୋଗୀ ଓ ସେମାନଙ୍କ ସଂପର୍କୀୟ ଘୋର ଅସନ୍ତୋଷ ବ୍ୟକ୍ତ କରିଛନ୍ତି। ସକାଳ ୯ଟାରୁ ୧.୩୦ଟା ଯାଏ ବିଦ୍ୟୁତ କାଟ ପାଇଁ ଗତକାଲିଠୁ TPSODL ପକ୍ଷରୁ ଘୋଷଣା କରାାଯାଇଥିଲା। କିନ୍ତୁ ବିକଳ୍ପ ବ୍ୟବସ୍ଥା କରିନଥିଲେ ହସପିଟାଲ କର୍ତ୍ତୃପକ୍ଷ। ୩ ଘଣ୍ଟା ପରେ ଯାଇ ଠିକ ହୋଇଥିଲା ଜେନେରେଟର।