ନନ୍ଦିଘୋଷ ବ୍ୟୁରୋ : ଭିଜିଲାନ୍ସ ଜାଲରେ ରେଂଜର। ଆୟ ବହିର୍ଭୁତ ସଂପତ୍ତି ଠୁଳ ଅଭିଯୋଗରେ ରାୟଗଡ଼ା କାଶୀପୁର ବନାଞ୍ଚଳ ଅଧିକାରୀ ଅନ୍ତର୍ଯ୍ୟାମୀ ସାହୁଙ୍କ ଘରେ ରେଡ୍ ହୋଇଛି। ୪ ଜିଲ୍ଲାର ୯ ସ୍ଥାନରେ ଏକକାଳୀନ ରେଡ କରୁଛି ଭିଜିଲାନ୍ସ। କାଶୀପୁର ସ୍ଥିତ ସରକାରୀ ବାସଭବନ ଓ ଅଫିସ ସମେତ ବିିଭିନ୍ନ ସ୍ଥାନରେ ରେଡ ଚାଲିଛି। ଭିଜିଲାନ୍ସ ଟିମ୍ କାଶୀପୁର, ବ୍ରହ୍ମପୁର, ବାଲିଗୁଡା, ଭଜଂନଗର, ନୟାଗଡ ସମେତ ରାଜ୍ୟର ୯ଟି ସ୍ଥାନରେ ଥିବା ଅନ୍ତର୍ଯ୍ୟାମୀ ସାହୁଙ୍କ ସମ୍ପତ୍ତି ଉପରେ ଚଢ଼ାଉ କରିଛି।ଜୟପୁର ସ୍ବତନ୍ତ୍ର ଭିଜିଲାନ୍ସ ଏସପିଙ୍କ ତତ୍ବାବଧାନରେ ରେଡ୍ ଚାଲିଛି। ଅତିରିକ୍ତ ଏସପି ଅନନ୍ତ ମଲ୍ଲିକଙ୍କ ନେତୃତ୍ଵରେ ୭ ଜଣ ଡିଏସପି, ୭ ଜଣ ଇନିସପେକ୍ଟର ଓ ଅନ୍ୟ ସହାୟକ କର୍ମଚାରୀ ସାମିଲ ହୋଇଛନ୍ତି। କନ୍ଧମାଳ ବାଲିଗୁଡାରେ ଅନ୍ତର୍ଯ୍ୟାମୀ ସାହୁଙ୍କ ପତ୍ନୀଙ୍କ ନାଁରେ ରହିଛି କୋଠାଘର, ବାଲିଗୁଡ଼ାରେ ଆଉ ଏକ କୋଠା ଘର, ନୟାଗଡ଼ରେ ଥିବା ସମ୍ପର୍କୀୟଙ୍କ ଘର, ଦାରିଙ୍ଗବାଡ଼ି ସରନିକେତରେ କୋଠା, ଦାରିଙ୍ଗବାଡ଼ିରେ ଆଉ ଏକ କୋଠା, ଗଂଜାମ କୁକୁଡାଖଣ୍ଡିରେ କୋଠା, ଭଂଜନଗର ଦୋମୁହାଣୀରେ ଥିବା କୋଠାରେ ରେଡ କରୁଛି ଭିଜିଲାନ୍ସ।
ଆମେରିକା ପୋଲିସ ଗୁଳିରେ ଭାରତୀୟ ଆଇଟି କର୍ମଚାରୀଙ୍କ ମୃତ୍ୟୁ, ହତ୍ୟା ଅଭିଯୋଗ ଆଣିଲେ ପରିବାର
ନନ୍ଦିଘୋଷ ବ୍ୟୁରୋ : ଆମେରିକାରେ ଭାରତୀୟଙ୍କୁ ଗୁଳି ମାଡ଼ । ଆମେରିକାର କାଲିଫର୍ଣ୍ଣିଆରେ ୩୦ ବର୍ଷୀୟ ଭାରତୀୟ ଟେକି ମହମ୍ମଦ ନିଜାମୁଦ୍ଦିନଙ୍କୁ ପୋଲିସ ଗୁଳିକରି ହତ୍ୟା କରିଛି ବୋଲି ଅଭିଯୋଗ ହୋଇଛି। ତେଲେଙ୍ଗାନାର ମହବୁବନଗରର ନିଜାମୁଦ୍ଦିନ ନିଜ ରୁମମେଟଙ୍କୁ ଚାକୁରେ ଆକ୍ରମଣ କରିଥିବା ଅଭିଯୋଗ ପରେ ପୋଲିସ ତାଙ୍କୁ ଗୁଳି କରିଥିଲା। ତେବେ ତାଙ୍କ ପରିବାର ଜାତିଗତ ହିଂସା ଓ ବୈଷମ୍ୟର ଅଭିଯୋଗ ଆଣି ଘଟଣାର ସମ୍ପୂର୍ଣ୍ଣ ତଦନ୍ତ ଦାବି କରିଛନ୍ତି।
ପୋଲିସ ସୂଚନା ଅନୁଯାୟୀ, ସାନ୍ତା କ୍ଲାରାରେ ନିଜାମୁଦ୍ଦିନଙ୍କ ଘରେ ଚାକୁ ଧରି ରୁମମେଟଙ୍କୁ ଆହତ କରୁଥିବା ଅବସ୍ଥାରେ ତାଙ୍କୁ ଦେଖାଯାଇଥିଲା। ୯୧୧ କଲ ପାଇ ପୁଲିସ ଘଟଣାସ୍ଥଳରେ ପହଞ୍ଚି ନିଜାମୁଦ୍ଦିନଙ୍କୁ ଆଦେଶ ମାନିବାକୁ କହିଥିଲା, କିନ୍ତୁ ସେ ନମାନିବାରୁ ଗୁଳି ଚଳାଇଥିଲେ। ଗୁଳିବିଦ୍ଧ ନିଜାମୁଦ୍ଦିନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା, କିନ୍ତୁ ସେଠାରେ ତାଙ୍କର ମୃତ୍ୟୁ ହୋଇଥିଲା।
ତେବେ ନିଜାମୁଦ୍ଦିନଙ୍କ ପରିବାର ଦାବି କରିଛନ୍ତି ଯେ ସେ ନିଜେ ସାହାଯ୍ୟ ପାଇଁ ପୋଲିସକୁ ଡାକିଥିଲେ। ଫ୍ଲୋରିଡାରୁ କମ୍ପ୍ୟୁଟର ସାଇନ୍ସରେ ମାଷ୍ଟର୍ସ ଡିଗ୍ରୀ ହାସଲ କରିଥିବା ନିଜାମୁଦ୍ଦିନ ସାନ୍ତା କ୍ଲାରାରେ ଏକ ଟେକ୍ କମ୍ପାନୀରେ କାର୍ଯ୍ୟ କରୁଥିଲେ। ତାଙ୍କ ପରିବାର କହିଛି, ସେ ଶାନ୍ତ ଓ ଧାର୍ମିକ ବ୍ୟକ୍ତି ଥିଲେ ଏବଂ ଜାତିଗତ ହିଂସା, ମଜୁରି ଠକେଇ ଓ ଅନୁଚିତ ବରଖାସ୍ତର ଅଭିଯୋଗ ସାର୍ବଜନୀନ ଭାବେ ଉଠାଇଥିଲେ।
ନିଜାମୁଦ୍ଦିନଙ୍କ ଏକ ଲିଙ୍କଡଇନ ପୋଷ୍ଟରେ ସେ ଲେଖିଥିଲେ, “ମୁଁ ଜାତିଗତ ଘୃଣା, ବୈଷମ୍ୟ, ହିଂସା, ମଜୁରି ଠକେଇ, ଅନୁଚିତ ବରଖାସ୍ତ ଓ ନ୍ୟାୟରେ ବାଧାର ଶିକାର ହୋଇଛି।” ସେ ଆହୁରି ଜାତିଗତ ବୈଷମ୍ୟ, ଖାଦ୍ୟରେ ବିଷ ମିଶାଇବା, ଉଚ୍ଛେଦ ଓ ଜଣେ ଡିଟେକ୍ଟିଭଙ୍କ ଦ୍ୱାରା ନିରନ୍ତର ନିରୀକ୍ଷଣ ଓ ଭୟଭୀତ କରାଯିବାର ଅଭିଯୋଗ କରିଥିଲେ।
ଭେଣ୍ଟିଲେଟରରୁ ଆଇସିୟୁକୁ ସ୍ଥାନାନ୍ତର ହେଲେ ସଂଗୀତ ନିର୍ଦ୍ଦେଶକ ଅଭିଜିତ ମଜୁମଦାର
ନନ୍ଦିଘୋଷ ବ୍ୟୁରୋ : ଭୁବନେଶ୍ଵର ଏମସ ହସ୍ପିଟାଲର ଭେଣ୍ଟିଲେଟରରୁ ଆଇସିୟୁକୁ ସ୍ଥାନାନ୍ତର ହେଲେ ସଂଗୀତ ନିର୍ଦ୍ଦେଶକ ଅଭିଜିତ ମଜୁମଦାର। ଅଭିଜିତଙ୍କ ଫୁସଫୁସ୍ ସଂକ୍ରମଣରେ ସୁଧାର ଆସିଛି। ଶରୀରର ଗୁରୁତ୍ଵପୂର୍ଣ୍ଣ ଅଙ୍ଗର ଟେଷ୍ଟ ରିପୋର୍ଟ ସ୍ଵାଭାବିକ ଥିଲେ ବି ମସ୍ତିଷ୍କ ଓ ସ୍ନାୟବିକ ସ୍ଥିତି କିନ୍ତୁ ଅପରିବର୍ତ୍ତିତ ରହିଛି ବୋଲି ଏମସ ପକ୍ଷରୁ କୁହାଯାଇଛି। ଏମସରେ ସଂଗୀତକାର ଅଭିଜିତ ମଜୁମଦାରଙ୍କ ଚିକିତ୍ସା ଜାରି ରହିଛି। ଏକ ସ୍ୱତନ୍ତ୍ର ଡାକ୍ତରୀ ଦଳ ତାଙ୍କର ଚିକିତ୍ସା କରୁଛନ୍ତି। ପ୍ରଥମେ ତାଙ୍କୁ କଟକରେ ଭର୍ତ୍ତି କରାଯାଇଥିଲା। ପରେ ଅବସ୍ଥା ଗୁରୁତର ହେବାରୁ ତାଙ୍କୁ ଏମସକୁ ସ୍ଥାନାନ୍ତର କରାଯାଇଥିଲା। ଓଡ଼ିଆ ମନୋରଞ୍ଜନ ଦୁନିଆର ଲୋକପ୍ରିୟ ସଂଗୀତ ନିର୍ଦ୍ଦେଶକ ଅଭିଜିତ ମଜୁମଦାର। ଅଭିଜିତ ଓଡ଼ିଆ ଚଳଚ୍ଚିତ୍ର ସଙ୍ଗୀତ ନିର୍ଦ୍ଦେଶକ ଓ ଗାୟକ। ଓଡ଼ିଆ ଆଧୁନିକ ଆଲବମ୍, ଭଜନ, ସମ୍ବଲପୁରୀ ଆଲବମ ଓ ଓଡ଼ିଆ ଧାରାବାହିକ ନିର୍ମାଣ କରିଛନ୍ତି ଅଭିଜିତ ମଜୁମଦାର।
ଆଜିଠାରୁ ଉଷ୍ମ ହେବ ବିଧାନସଭା, ଚାଷୀ ପ୍ରସଙ୍ଗରେ ହୁଲସ୍ତୁଲ ହୋଇପାରେ ଗୃହ
ନନ୍ଦିଘୋଷ ବ୍ୟୁରୋ : ଆଜି ବି ବିଧାନସଭା ବେଶ ଉଷ୍ମ ହେବ । ଚାଷୀ ପ୍ରସଂଗରେ ଗୃହ ହୁଲସ୍ତୁଲ ହୋଇପାରେ। ରାଜ୍ୟରେ ଘୋର ସାର ସଂକଟ ଲାଗି ରହିଥିବା ବେଳେ ସରକାର ଏହା ଉପରେ ଗୁରୁତ୍ଵ ନଦେବା ନେଇ ବିଜେଡି ପ୍ରତିବାଦର ସ୍ୱର ଜୋରଦାର କରିବ। ଯୋଗାଣ ମନ୍ତ୍ରୀ ସାର କଳାବଜାରୀ ହେଉଥିବା କଥା ମାନିବା ପରେ ରାଜ୍ୟ ସରକାରଂକ ଚାଷୀ ପ୍ରତି କେତେ ଆନ୍ତରିକତା ରହିଛି ତାହା ପଦାକୁ ଆସିଛି। ଚାଷ ସମୟରେ ସାର ନପାଇ ରାଜରାସ୍ତାରେ ହନ୍ତସନ୍ତ ହେଉଥିବା ବେଳେ ସାର ରାଜ୍ୟରେ ସାର ଆବଶ୍ୟକ ଅନୁସାରେ ମହଜୁତ୍ ଅଛି ବୋଲି ବାହାସ୍ପୋଟ ମାରୁଛନ୍ତି। ଯାହାକୁ ନେଇ ବିଜେଡି ସରକାରଙ୍କୁ ଘେରିଛି। ତୁରନ୍ତ ଚାଷୀମାନେ କିପରି ସାର ପାଇବେ ସେ ଦାବିକୁ ବିଧାନସଭାରେ ଜୋରଦାର କରିବ ବିଜେଡି। ଚାଷୀ ପ୍ରସଙ୍ଗରେ ମୁଖ୍ୟ ବିରୋଧୀ ବିଜେଡି ଗୃହରେ ସରକାରଙ୍କୁ ଘେରିବା ପାଇଁ ରଣନୀତି ପ୍ରସ୍ତୁତ କରିଛି । ଯାହାକୁ ନେ଼ଇ ଗୃହ ବେଶ ସରଗରମ ହେବାର ସମ୍ଭାବନା ରହିଛି ।
ସେହିପରି ବିଦ୍ୟାଳୟ ଓ ଗଣଶିକ୍ଷା, ଉଚ୍ଚଶିକ୍ଷା, ଶିଳ୍ପ, ଅନୁସୂଚିତ ଜାତି ଓ ଜନଜାତି, ସଂଖ୍ୟାଲଘୁ ସମ୍ପ୍ରଦାୟ ଓ ପଛୁଆ ବର୍ଗ, କ୍ରୀଡା ଓ ଯୁବ କଲ୍ୟାଣ, ଦକ୍ଷତା ବିକାଶ-ବୈଷୟିକ ଶିକ୍ଷା, ଓଡ଼ିଆ ଭାଷା, ସଂସ୍କୃତି ଓ ସାହିତ୍ୟର ସୁରକ୍ଷା ଏବଂ ଭିନ୍ନକ୍ଷମ ସଶକ୍ତି କରଣ ବିଭାଗର ରହିଛି ପ୍ରଶ୍ନକାଳ ରହିଛି। ଶୂନ୍ୟକାଳରେ ଆଇନଶୃଙ୍ଖଳା, ନାରୀ ନିର୍ଯ୍ୟାତନା, ପରି ବହୁ ଗୁରୁତ୍ବପୂର୍ଣ୍ଣ ପ୍ରସଙ୍ଗ ଗୃହରେ ଉଠିପାରେ। ବିଜେଡି ପକ୍ଷରୁ ମୂଲତବୀ ପ୍ରସ୍ତାବ ଦିଆଯିବ। କଂଗ୍ରେସ ପକ୍ଷରୁ ସରକାରଙ୍କ ବିରୋଧରେ ଦିଆଯାଇଥିବା ଅନାସ୍ଥା ପ୍ରସ୍ତାବକୁ ଗୃହରେ ଆଲୋଚନା କରିବାକୁ ଦାବି ଜୋର ହେବ।ଶାସକ ଦଳ ମଧ୍ୟ ଦୁଇ ବିରୋଧୀ ଙ୍କୁ ଜବାବ ଦେବାକୁ ପାଲଟା ରଣନୀତି ପ୍ରସ୍ତୁତି କରାଯାଇଛି ।
ପ୍ରକୃତିର ତାଣ୍ଡବରେ ଛାରଖାର ଉତ୍ତରାଖଣ୍ଡର ଚାମୋଲି
ନନ୍ଦିଘୋଷ ବ୍ୟୁରୋ : ବାଦଲଫଟା ବର୍ଷାରେ ଛାରଖାର ହୋଇଯାଇଛି ଉତ୍ତରାଖଣ୍ଡର ଚାମୋଲି ଜିଲ୍ଲା। ଏବେ ବି ମୁଷଳଧାରାରେ ବର୍ଷା ଜାରି ରହିଛି। ଗତ ୨୪ ଘଣ୍ଟା ମଧ୍ୟରେ ମୃତ୍ୟୁ ସଂଖ୍ୟା ୩୬ ରେ ପହଞ୍ଚିଛି। ଚାମୋଲି ଜିଲ୍ଲାର ନନ୍ଦନଗର ବ୍ଲକରେ ଘଟିଛି ଏହି ଭୂସ୍ଖଳନ। ୧୪ ଜଣ ଲୋକ ଭଗ୍ନାବଶେଷ ତଳେ ପୋତି ହୋଇଯାଇଥିବା ଆଶଙ୍କା କରାଯାଉଛି। ଉଦ୍ଧାରକାରୀ ଦଳ ଏବେ ଗୋଟିଏ ମୃତଦେହ ଉଦ୍ଧାର କରିଛନ୍ତି। ବୁଧବାର ଦିନ ୧୮ ଜଣଙ୍କ ମୃତଦେହ ଉଦ୍ଧାର କରାଯାଇଥିଲା । ନନ୍ଦକାନି ଏବଂ ଚୁଫଲାଗଡ଼ ନଦୀ କୂଳରେ ଅବସ୍ଥିତ ନନ୍ଦନଗର ଅଧିକ କ୍ଷୟକ୍ଷତି ହୋଇଛି। ବଞ୍ଜାରବାଗଡ, ମୋକ୍ଷ ଧୂର୍ମା ଏବଂ ଆଖପାଖ ଅଞ୍ଚଳର ବାସିନ୍ଦାମାନେ ଏକ ଧ୍ୱଂସାବଶେଷର ଦୃଶ୍ୟ ବର୍ଣ୍ଣନା କରିଛନ୍ତି। ହତାଶ ଗ୍ରାମବାସୀମାନେ, ଜିଲ୍ଲା ମାଜିଷ୍ଟ୍ରେଟ୍ ସନ୍ଦୀପ ତିୱାରୀଙ୍କ ସହ ଯୋଗାଯୋଗ କରି ତୁରନ୍ତ ସହାୟତା ପାଇଁ ନିବେଦନ କରିଛନ୍ତି ।
ପ୍ରାୟ ୨ଶହ ଲୋକଙ୍କୁ ଉଦ୍ଧାର କରାଯାଇଛି। ଘଟଣାସ୍ଥଳରେ ମେଡିକାଲ ଟିମ ଓ ଉଦ୍ଧାରକାରୀ ଟିମ ପହଞ୍ଚି ସହାୟତା କରୁଛନ୍ତି। ଘଟଣାସ୍ଥଳରେ ମୁତୟନ ହୋଇଛି ଆମ୍ବୁଲାନ୍ସ। ବର୍ତ୍ତମାନ ରେସ୍କ୍ୟୁ ଅପରେସନ ଜାରି ରହିଛି। ଡେରାଡୁନ ଚମ୍ପାବତ ଓ ଉଦ୍ଧମସିଂ ନଗରରେ ରେଡ ଆଲର୍ଟ ଜାରି କରାଯାଇଛି। ଆସନ୍ତା ୨୦ ଯାଏ ସ୍ଥାନୀୟ ଅଞ୍ଚଳରେ ବିପତ୍ତି ଲାଗି ସତର୍କତା ଜାରି କରାଯାଇଛି।ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମି ପରିସ୍ଥିତି ସମୀକ୍ଷା କରିଛନ୍ତି। ପ୍ରବଳ ବର୍ଷା ଯୋଗୁଁ ଚାରିଟି ଗାଁରେ ଅଧିକ କ୍ଷତି ଘଟିଛି। କୁନ୍ତାରି ଲଗାଫାଲି, କୁନ୍ତାରି ଲଗାସରପାଣି, ସେରା ଏବଂ ଧୂର୍ମାରେ ୩୩ ଘର ଅନେକ ଦୋକାନ ଏବଂ ଗୋଶାଳା ଭାଙ୍ଗି ଯାଇଛି। NDRF ଓ SDRF ଦଳ ପ୍ରଭାବିତ ଅଞ୍ଚଳରେ ପହଞ୍ଚି ସନ୍ଧାନ ଏବଂ ଉଦ୍ଧାରକାର୍ଯ୍ୟ ଜାରି ରଖିଛନ୍ତି। ଆହତଙ୍କୁ ଋଷିକେଶର ଏମ୍ସକୁ ହେଲିକପ୍ଟର ଯୋଗେ ସ୍ଥାନାନ୍ତର କରାଯାଇଥିଲା।
ଭୁବନେଶ୍ୱର ପିଏମଜିରେ ବେସରକାରୀ ଅଧ୍ୟାପକ କର୍ମଚାରୀଙ୍କ ବିକ୍ଷୋଭ ପ୍ରଦର୍ଶନ
ଭୁବନେଶ୍ୱର : ସରକାରଙ୍କ ପ୍ରତିଶୃତି ପାଣିର ଗାର । ସ୍ବପ୍ନ ଦେଖାଇ ଶାସନକୁ ଆସିଲେ । ଗାଦିରେ ବସିବା ପରେ ସବୁ ଭୁଲିଗଲେ । ଏଭଳି ପ୍ରତାରଣାକୁ ନେଇ ଜୋରଦାର ପ୍ରତିବାଦ କରିଛନ୍ତି ବେସରକାରୀ ଅଧ୍ୟାପକ କର୍ମଚାରୀ । ଗୋଟିଏ ହାତରେ ମହାତ୍ମା ଗାନ୍ଧୀ, ସୁଭାଷ ବୋଷ ଓ ବିଜୁ ପଟ୍ଟନାୟକଙ୍କ ଫଟୋ ଚିତ୍ର। ଅନ୍ୟ ହାତରେ ଜାତୀୟ ପତାକା। ପ୍ରବଳ ଖରାରେ ସରକାରଙ୍କ ବିରୋଧରେ ଗର୍ଜିଛନ୍ତି ଶିକ୍ଷକ । ଭୁବନେଶ୍ୱର ପିଏମଜି ଠାରେ ରାଜ୍ୟର ବେସରକାରୀ କଲେଜ ଅଧ୍ୟାପକ କର୍ମଚାରୀଙ୍କ ଏଭଳି ରୂପ ଦେଖିବାକୁ ମିଳିଛି । ୨୦୦୮ ରୁ ୨୦୧୮ ପର୍ଯ୍ୟନ୍ତ ରାଜ୍ୟର ବିଭିନ୍ନ କଲେଜରେ ନିଯୁକ୍ତ ଅଧ୍ୟାପକ କର୍ମଚାରୀ ମାନେ ଅନୁଦାନ ଦାବିରେ ପିଏମଜି ଠାରେ କର ବା ମର ସମାବେଶ କରିଛନ୍ତି । ଓଡିଶା ରାଜ୍ୟ ବେସରକାରୀ ଅଧ୍ୟାପକ କର୍ମଚାରୀ ସଂଘ ପକ୍ଷରୁ ଆୟୋଜିତ ବିକ୍ଷୋଭ ସମାବେଶରେ ରାଜ୍ୟ ସରକାରଙ୍କ ବାରମ୍ବାର ପ୍ରତିଶ୍ରୁତି ଓ ପ୍ରତାରଣାକୁ ଜୋରଦାର ବିରୋଧ କରାଯାଇଛି । ଶତାଧିକ ଅଧ୍ୟାପକ କର୍ମଚାରୀ ଏକ ବିଶାଳ ବିକ୍ଷୋଭ ଶୋଭାଯାତ୍ରାରେ ଆସିବା ସହ ଧାରଣାରେ ବସିଛନ୍ତି । ତୁରନ୍ତ ମୁଖ୍ୟମନ୍ତ୍ରୀ ଏ ସମ୍ପର୍କରେ ଆଲୋଚନା କରିବାକୁ ଅଡ଼ି ବସିଛନ୍ତି ଆନ୍ଦୋଳନରତ ଅଧ୍ୟାପକ କର୍ମଚାରୀ।
ରାଜ୍ୟରେ ପାଠ ପଢା ଓ କଲେଜର ଅନ୍ୟାନ୍ୟ ଗୁରୁ ଦାୟିତ୍ୱର ସିଂହ ଭାଗ ସମ୍ଭାଳୁଛନ୍ତି ଏହି ଅଧ୍ୟାପକ ଅଧ୍ୟାପିକା । ଏପରିକି ବହୁ ବିଷୟର ବିଭାଗୀୟ ମୁଖ୍ୟ ଭାବେ ମଧ୍ୟ କାର୍ଯ୍ୟ କରୁଛନ୍ତି । ଏ ସମ୍ପର୍କରେ ଏବର ସରକାର ପୂର୍ବରୁ ଅବଗତ ଥିବାବେଳେ ସେମାନଙ୍କ ଦାବିକୁ ଯଥାର୍ଥ ବୋଲି ମଧ୍ୟ କହିଥିଲେ । କିନ୍ତୁ ଦାବି ପୂରଣ କରିବା ବଦଳରେ ସମୟ ଗଡାଇ ଚାଲିଛନ୍ତି । ଯାହାକୁ ଆଉ ବରଦାସ୍ତ କରାଯିବ ନାହିଁ ବୋଲି ଚେତାଇ ଦେଇଛନ୍ତି ଆନ୍ଦୋଳନରତ ଅଧ୍ୟାପକ କର୍ମଚାରୀ । ଏଥର ଦାବି ପୂରଣ ନ ହୁଏ ତାହେଲେ ଆସନ୍ତାକାଲି ଠାରୁ ଆମରଣ ଅନଶନରେ ବସିବାକୁ ସଂଘ ନିଷ୍ପତ୍ତି ନେଇଛି। ରାଜ୍ୟରେ ଜାତୀୟ ଶିକ୍ଷା ନୀତି ଲାଗୁ ସହ ଗୁଣାତ୍ମକ ପାଠ ପଢ଼ାର କଥା କୁହାଯାଉଛି । କିନ୍ତୁ ଯେଉଁମାନେ ଏହାକୁ ସଫଳ କରାଇବେ ସେମାନେ ରାଜରାସ୍ତାକୁ ଓହ୍ଲାଇଲେ ଏହାର ପ୍ରକୃତ ରୂପାୟନ କିଭଳି ସମ୍ଭବ ବୋଲି ପ୍ରଶ୍ନ ଉଠିଛି ।
ଶିକ୍ଷକ ଯୋଗ୍ୟତା ପରୀକ୍ଷାକୁ ନେଇ ଚିନ୍ତାରେ ଶିକ୍ଷକ
ଭୁବନେଶ୍ବର : କେତେବେଳେ ପ୍ରଶ୍ନପତ୍ର ଲିକ୍ ତ ପୁଣି କେବେ ବୋର୍ଡରେ ଅଧିକାରୀ ଅଭାବ । ଏପରି କାରଣ ଯୋଗୁଁ ବାରମ୍ବାର ସ୍ଥଗିତ ରହିବା ସହ ପରିବର୍ତ୍ତନ ହୋଇ ଚାଲିଛି ଓଟିଇଟି । ଶେଷରେ ଶିକ୍ଷକ ଯୋଗ୍ୟତା ପରୀକ୍ଷା ପାଇଁ ସେପ୍ଟେମ୍ବର ୨୭ ତାରିଖ ଧାର୍ଯ୍ୟ ହୋଇଛି। ଯାହାକୁ ନେଇ ପୁଣି ଥରେ ବିବାଦ ଦେଖାଦେଇଛି। କାରଣ ସେପ୍ଟେମ୍ବର ୨୭ ହେଉଛି କାର୍ଯ୍ୟ ଦିବସ । ସ୍କୁଲ ଛାଡ଼ି ପରୀକ୍ଷା ଦେବାକୁ କେମିତି ଯିବେ ବୋଲି ସରକାରଙ୍କୁ ପ୍ରଶ୍ନ କରିଛନ୍ତି ଶିକ୍ଷକ। ହେଲେ ଆଜି ସରକାର ଶୁଣାଇଛନ୍ତି ଚରମବାଣୀ। ସିଧାସିଧା କହିଛନ୍ତି, ସେପ୍ଟେମ୍ବର ୨୭ ତାରିଖରେ ହିଁ ହେବ ଓଟିଇଟି। ପରୀକ୍ଷା ତାରିଖରେ କୌଣସି ପରିବର୍ତ୍ତନ ନକରିବାକୁ ସ୍ପଷ୍ଟ କରିଚନ୍ତି ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ।
ଗଣଶିକ୍ଷା ମନ୍ତ୍ରୀଙ୍କ ଉତ୍ତର ପରେ ଶିକ୍ଷକଙ୍କ ଦ୍ବନ୍ଦ୍ବ ବଢ଼ିବା ସହ ଛାତ୍ରଛାତ୍ରୀଙ୍କ ଚିନ୍ତା ବଢ଼ିଛି। କାରଣ ପ୍ରଥମରୁ ଅଷ୍ଟମ ଶ୍ରେଣୀ ପିଲାଙ୍କ ଅର୍ଦ୍ଧ ବାର୍ଷିକ ପରୀକ୍ଷା ସେପ୍ଟେମ୍ବର ୨୨ରେ ଆରମ୍ଭ ହୋଇ ସେପ୍ଟେମ୍ବର ୨୭ ଯାଏଁ ଚାଲିବ। ଯଦି ଶିକ୍ଷକମାନେ ୨୭ ତାରିଖରେ ପରୀକ୍ଷା ଦେବାକୁ ଯିବେ, ତେବେ କିଏ କରିବ ସ୍କୁଲ ପିଲାଙ୍କ ପରୀକ୍ଷା ପରିଚାଳନା ? ସେପଟେ କିଛି ଦିନ ତଳେ ସୁପ୍ରିମକୋର୍ଟ ବି ଶିକ୍ଷକ ଯୋଗ୍ୟତା ପରୀକ୍ଷାକୁ ବାଧ୍ୟତାମୂଳକ କରିଛନ୍ତି । ଯେଉଁମାନେ ଶିକ୍ଷକ ହେବା ପାଇଁ ଆଶାୟୀ, ସେମାନେ ଟିଇଟି ଯୋଗ୍ୟତା ହାସଲ କରିବା ଅନିବାର୍ଯ୍ୟ। ଏଥିସହ ଯେଉଁମାନେ ଶିକ୍ଷକତା କରୁଛନ୍ତି, ସେମାନେ ମଧ୍ୟ ପଦୋନ୍ନତି ପାଇଁ ଟିଇଟି ଯୋଗ୍ୟତା ହାସଲ କରିବା ବାଧ୍ୟତାମୂଳକ। ଯଦି ଏହି ଶିକ୍ଷକମାନେ ୨ ବର୍ଷ ମଧ୍ୟରେ ଟିଇଟିରେ ଉତ୍ତୀର୍ଣ୍ଣ ହେବେ ନାହିଁ, ସେମାନେ ବାଧ୍ୟତାମୂଳକ ଅବସର ନେବେ। ଗୋଟିଏ ପଟେ ସର୍ବୋଚ୍ଚ ଅଦାଲତଙ୍କ ଛାଟ, ଅନ୍ୟପଟେ କାର୍ଯ୍ୟ ଦିବସରେ ପରୀକ୍ଷା ଯୋଗୁଁ ୭୫ ହଜାର ଶିକ୍ଷକ ଚିନ୍ତାରେ ଦିନ ଗଣୁଛନ୍ତି । ନିଜେ ପରୀକ୍ଷା ଦେବେ ନା ସ୍କୁଲରେ ପିଲାଙ୍କ ପରୀକ୍ଷା ପରିଚାଳନା କରିବେ। ଯାହାର ଉତ୍ତର ପାଇପାରୁନାହାନ୍ତି ଶିକ୍ଷକ। ଓଲଟି ଗଣଶିକ୍ଷା ମନ୍ତ୍ରୀଙ୍କ କଡ଼ା ଆଭିମୁଖ୍ୟ, ଶିକ୍ଷକଙ୍କୁ ଅଧିକ ଚାପଗ୍ରସ୍ତ କରୁଛି।
ରାଜ୍ୟରେ ଚାଷୀଙ୍କୁ ମିଳୁନି ସାର, କଳାବଜାରୀ ଚାଲିଥିବା ସ୍ଵୀକାର କଲେ ଯୋଗାଣ ମନ୍ତ୍ରୀ
ଭୁବନେଶ୍ବର : ସାର ସତ ମାନିଲେ ସରକାର। ରାଜ୍ୟରେ ଚାଲିଛି ସାରର କଳାବଜାରୀ। ଡିଲର ଓ ବ୍ଯବସାୟୀ ମଧୁଚନ୍ଦ୍ରିକାରେ ହନ୍ତସନ୍ତ ଚାଷୀ। ଗତ ମାସେ ହେଲା ଚାଷୀ ପାଉନାହାଁନ୍ତି ସାର। ସାର ପାଇଁ ଯୋଗାଣ ଅଧିକାରୀଙ୍କ କାର୍ଯ୍ୟାଳୟରେ ଲାଗୁଛି ଲମ୍ବା ଲାଇନ। କେଉଁଠି ରାତି ଅଧରୁ ଅଧାର କାର୍ଡ ରଖି ଚାଷୀ ଲାଇନ ଲଗାଉଛନ୍ତି ତ କେଉଁଠି ରାସ୍ତାକୁ ଓହ୍ଲାଇଛନ୍ତି ଚାଷୀ। ବାରମ୍ବାର କୃଷିମନ୍ତ୍ରୀ ରାଜ୍ଯରେ ସାରର ଅଭାବ ନାହିଁ ବୋଲି କହୁଥିବାବେଳେ ଯୋଗାଣ ମନ୍ତ୍ରୀ ଖୋଲିଦେଇଛନ୍ତି ପୋଲ। ସାର କଳାବଜାରୀ ସମସ୍ଯାର ସମାଧାନ ପାଇଁ ଏବେ ବିଭାଗ ବିଭିନ୍ନ ସ୍ଥାନରେ ଚଢାଉ ଆରମ୍ଭ କରିଛି।ଜାଣି ଶୁଣି କିଛି ଲୋକ କଳବଜାରୀ କରୁଥିବା ଅଭିଯୋଗ କରିଛନ୍ତି। ରାଜ୍ୟରେ ଆବଶ୍ୟକ ପରିମାଣର ସାର ଅଛି।ଖୁବ ଶୀଘ୍ର ସାର ସମସ୍ୟାର ସମାଧାନ ହେବ। କିନ୍ତୁ କଳାବଜାରୀ କାରଣରୁ ଅନେକ ସମସ୍ୟା ଉପୁଜିଛି। ବିଭିନ୍ନ ସ୍ଥାନରେ ଚଢ଼ାଉ ଜାରି ରହିଛି। ଅନେକ ଡିଲରଙ୍କ ଉପରେ କାର୍ଯ୍ୟାନୁଷ୍ଠାନ ହୋଇଛି ବୋଲି ସରକାର କହିଛନ୍ତି ।
ଚାଷରେ ଆତ୍ମନିର୍ଭରଶୀଳ ରାଜ୍ଯର ଚାଷୀଙ୍କୁ ସାର ନମିଳିବା ଉଭୟ କୃଷି, ସମବାୟ ଓ ଯୋଗାଣ ବିଭାଗର ଅପାରଗତାକୁ ପଦାକୁ ଆଣିଛି। ବିଭାଗ ବିଭାଗ ମଧ୍ୟରେ ସମନ୍ବୟ ରହୁନଥିବାରୁ ରାଜ୍ୟରେ ସାରର ଘୋର ଅଭାବ ଦେଖାଦେଇଛି। ଯାହାର ପ୍ରତିବାଦ କରି ଗତ ୧୫ ତାରିଖରେ ରାଜରାସ୍ତାକୁ ଓହ୍ଲାଇବା ସହ ରାଜ୍ୟପାଳଙ୍କ ଦ୍ବାରସ୍ତ ହୋଇଥିଲା ବିଜେଡି।ଚାଷୀ ସାର ନପାଇବା ପର୍ଯ୍ୟନ୍ତ ବିଜେଡି ଲଢେଇ ଜାରି ରଖିବ ବୋଲି ବିରୋଧୀ ଦଳ ନେତା ନବୀନ ପଟ୍ଟନାୟକ ସରକାରଙ୍କୁ ଚେତାବନୀ ଦେଇଥିଲେ। ସାର କଳାବଜାରୀ ଯୋଗାଣ ମନ୍ତ୍ରୀ ମାନିବା ପରେ ସରକାରଙ୍କୁ କଡା ସମାଲୋଚନା କରିଛି ବିଜେଡି। କଳାବଜାରୀଙ୍କ ଉପରେ କାର୍ଯାନୁଷ୍ଠାନ ଦାବି କରଛି ବିଜେଡି।ଆବଶ୍ଯକ ପରିମାଣର ସାର ଥିଲେ ବି ଯୋଗାଣ ବିଭାଗର କିଛି ଅସାଧୁ ଅଧିକାରୀ ଛତ୍ରଛାୟାରେ କିଛି ଡିଲର ଓ ବ୍ଯବସାୟୀ କଳାବଜାରୀ କରୁଛନ୍ତି।ଯୋଗାଣ ବିଭାଗର ଅଧିକାରୀ ସବୁ ଜାଣି ମଧ୍ଯ ଚୁପ ରହୁଛନ୍ତି । ବିଧାନସଭାରେ ସାର ଅଭାବକୁ ନେଇ ସରକାରଙ୍କୁ ଜବାବ ମାଗିବାକୁ ବିଜେଡି ବିଧାୟକ ଦଳ ବୈଠକରେ ରଣନୀତି ପ୍ରସ୍ତୁତ କରିଛି। ଆଗକୁ ଚାଷୀଙ୍କ ପାଇଁ ବିଜେଡିର ସ୍ବର ଅଧିକ ଶାଣିତ ହେବ ବୋଲି ଦଳୀୟ ବିଧାୟକ ଚେତାବନୀ ଦେଇଛନ୍ତି। ସାର କଳାବାଜରୀ ସତ ମାନିଲା ପରେ କେବେ ସୁଧରିବ ସ୍ଥିତି, ଆଉ ଚାଷୀଙ୍କ ନିକଟରେ ପହଞ୍ଚିବ ସାର ।
ଦେଢବର୍ଷର ବିଜେପି ସରକାର ବିରୋଧରେ କଂଗ୍ରେସ ଆଣିଛି ଅନାସ୍ଥା ପ୍ରସ୍ତାବ, ସିପିଆଇଏମର ସମର୍ଥନ
ଭୁବନେଶ୍ବର : ରାଜ୍ୟ ସରକାରଙ୍କ ବିରୋଧରେ କଂଗ୍ରେସର ଅନାସ୍ଥା ପ୍ରସ୍ତାବ । ଅନାସ୍ଥା ନୋଟିସକୁ ସମର୍ଥନ କଲା ସିପିଆଇ(ଏମ) । ବିଜେଡିର ସମର୍ଥନ ଲୋଡିଲା କଂଗ୍ରେସ । ବିଜେପିର ପ୍ରଶ୍ନ, କଂଗ୍ରେସର ସଂଖ୍ୟା କେତେ ?.. ..ରାଜ୍ୟ ବିଜେପି ସରକାରକୁ ବିପଦ କି ? ଦେଢବର୍ଷ ହେବ ରାଜ୍ୟବାସୀଙ୍କୁ ସୁଶାସନ ଦେବାରେ ବିଫଳ ରାଜ୍ୟ ସରକାରଙ୍କ ବିରୋଧରେ କଂଗ୍ରେସ ଆଣିଛି ଅନାସ୍ଥା ପ୍ରସ୍ତାବ । ମୌସୁମୀ ଅଧିବେଶନର ପ୍ରଥମ ଦିନରେ କଂଗ୍ରେସ ୧୪ ଜଣ ବିଧାୟକ ଓ ସିପିଆଇ(ଏମ)ର ଜଣେ ବିଧାୟକଙ୍କ ସମର୍ଥନରେ ସରକାରଙ୍କ ବିରୋଧରେ ଅନାସ୍ଥା ନୋଟିସ ଦେଇଛି । ନୋଟିସ ଦେବା ପରେ କଂଗ୍ରେସ ବିଜେଡିର ସମର୍ଥନ ଲୋଡିଛି । ବିଜେପି ସରକାର ରାଜ୍ୟରେ ଗଠନ ହେବା ପରଠାରୁ ଚାଷୀ, ମହିଳା, ଯୁବକ ଓ ରାଜ୍ୟବାସୀଙ୍କ ସମସ୍ୟା ବଢିବଢି ଚାଲିଛି । ରାଜ୍ୟରେ ଆଇନ ଶୃଙ୍ଖଳା ସଂପୂର୍ଣ୍ଣ ଭୁଶୁଡ଼ି ପଡିଛି । ବିଜେପି ସରକାରକୁ ଆସିବା ପରେ ସବୁ ପ୍ରତିଶୃତିକୁ ଭୁଲି ଯାଇଛି । ରାଜ୍ୟରେ ମହିଳାମାନେ ଅସୁରକ୍ଷିତ ହୋଇପଡିଛନ୍ତି । ବିଜେପି ସରକାର ବିରୋଧରେ ଏପରି ମାଳମାଳ ଅଭିଯୋଗ ଆଣି କଂଗ୍ରେସ ସରକାରଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆଣିଥିବା ବିଧାୟକମାନେ କହିଛନ୍ତି ।
କଂଗ୍ରେସ ଅନାସ୍ଥା ପ୍ରସ୍ତାବ ଆଣିବା ପରେ ବିଧାନସଭା ବାହାରେ ମୁହାଁମୁହିଁ ହୋଇଛନ୍ତି ବିଜେପି ଓ କଂଗ୍ରେସ । ବିଜେପି ବିଧାୟକ ମନୋରଂଜନ ଦ୍ୟାନ ସାମନ୍ତରାୟ କହିଛନ୍ତି, କଂଗ୍ରେସ ପାଖରେ ସଂଖ୍ୟା ନାହିଁ । ତେଣୁ ଅନାସ୍ଥା ପ୍ରସ୍ତାବର କୌଣସି ପ୍ରଭାବ ବିଜେପି ସରକାର ଉପରେ ପଡିବ ନାହିଁ । ଯାହାର କଡା ଜବାବ ଦେଇଛି କଂଗ୍ରେସ । ଅନ୍ୟପଟେ ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ କହିଛନ୍ତି ବିଜେଡି ତାର ନିଜ ରଣନୀତିରେ ବିଧାନସଭାରେ ଲୋକଙ୍କ ସ୍ବର ସାଜି ସରକାରଙ୍କୁ ଘେରିବ । ରାଜନୈତିକ ସମୀକ୍ଷକଙ୍କ ଯୁକ୍ତି ହେଉଛି ସଂଖ୍ୟା ଦୃଷ୍ଟିରୁ କଂଗ୍ରେସର ଅନାସ୍ଥା ପ୍ରସ୍ତାବ ବେଶ ଦୁର୍ବଳ । ସରକାର ଭାଙ୍ଗିବା ଲାଗି ପ୍ରଭାବଶାଳୀ ହେବ ନାହିଁ । ଅନାସ୍ଥା ପ୍ରସ୍ତାବ ଆଣିବା ପରେ କଂଗ୍ରେସ ଦଳୀୟ ହ୍ବିପ ଜାରି କରିଛି । ଅନ୍ଯପଟେ ବିଧାନସଭାରେ ଏବେ ବିଜେପିର ୭୮, ବିଜେଡିର ୫୦, କଂଗ୍ରେସ ୧୪, ସ୍ବାଧୀନ ୩, ସିପିଆଇ(ଏମ)ର ଜଣେ ବିଧାୟକ ଅଛନ୍ତି । ନୂଆପଡ଼ା ବିଧାୟକଙ୍କ ପରଲୋକ ପରେ ଏବେ ଏହି ଆସନ ଖାଲି ପଡିଛି ।
୧୦ଟି ସ୍କୁଲରେ ଗୁଣାତ୍ମକ ଶିକ୍ଷା ପ୍ରଦାନ, ୧୦୦୦ରୁ ଅଧିକ ଛାତ୍ରଛାତ୍ରୀଙ୍କୁ ଲାଭ
ଭୁବନେଶ୍ୱର: ଭାରତର ସର୍ବବୃହତ ଆଲୁମିନିୟମ ଉତ୍ପାଦକ ବେଦାନ୍ତ ଆଲୁମିନିୟମ, ଝାରସୁଗୁଡା ଜିଲ୍ଲାର କୁରାଲୋଇ ଅଞ୍ଚଳର ୧୦ଟି ସରକାରୀ ସ୍କୁଲର ୧୦ଜଣ ଅତିରିକ୍ତ ଶିକ୍ଷକଙ୍କୁ ନିଯୁକ୍ତ କରି ପ୍ରୋଜେକ୍ଟ ବିଦ୍ୟା ମାଧ୍ୟମରେ ଗୁଣାତ୍ମକ ଶିକ୍ଷାକୁ ଆଗକୁ ବଢାଇବା ପାଇଁ ଏହାର ପ୍ରତିବଦ୍ଧତାକୁ ସୁଦୃଢ଼ କରିଛି। ଏହି ପଦକ୍ଷେପ ଛାତ୍ର-ଶିକ୍ଷକ ଅନୁପାତକୁ ଉନ୍ନତ କରିବା ସହ ଗଣିତ, ବିଜ୍ଞାନ ଏବଂ ଇଂରାଜୀ ଭଳି ପ୍ରମୁଖ ବିଷୟ ଗୁଡ଼ିକରେ ଶିକ୍ଷଣ ଫଳାଫଳକୁ ସୁଦୃଢ଼ କରିବ, ଯାହା ୧୦୦୦ରୁ ଅଧିକ ଛାତ୍ରଛାତ୍ରୀଙ୍କୁ ଲାଭ ପହଞ୍ଚାଇବ। ଖୈରକୁନି ହାଇସ୍କୁଲରେ ଅନୁଷ୍ଠିତ ଏକ ଆନୁଷ୍ଠାନିକ କାର୍ଯ୍ୟକ୍ରମରେ, ନୂତନ ଭାବରେ ନିଯୁକ୍ତ ଶିକ୍ଷକମାନଙ୍କୁ ନିଯୁକ୍ତି ପତ୍ର ପ୍ରଦାନ କରାଯାଇଥିଲା। ଏହି କାର୍ଯ୍ୟକ୍ରମରେ କୁରାଲୋଇର ସରପଞ୍ଚ ସନାତନ ନାଏକ, AJKA ପ୍ରତିନିଧି, ସମ୍ପ୍ରଦାୟ ନେତା, ହିତାଧିକାରୀ ସ୍କୁଲର ପ୍ରଧାନଶିକ୍ଷକ ଏବଂ ସ୍କୁଲ ପରିଚାଳନା କମିଟିର ସଦସ୍ୟମାନେ ଯୋଗ ଦେଇଥିଲେ।
ଏପ୍ରିଲ୍ ୨୦୨୫ରେ ଘୋଘରପାଲି ଏବଂ ଯାମକାନିର ୨୦ଟି ସ୍କୁଲରେ ୨୨ଜଣ ଅତିରିକ୍ତ ଶିକ୍ଷକଙ୍କୁ ନିଯୁକ୍ତି ଦେବା ପରେ ଏହି କାର୍ଯ୍ୟକ୍ରମ ଏବେ କୁରାଲୋଇ ଅଞ୍ଚଳର ଛାତ୍ରଛାତ୍ରୀଙ୍କ ପାଇଁ ଶିକ୍ଷା ସୁଯୋଗକୁ ଆହୁରି ବୃଦ୍ଧି କରିବା ପାଇଁ ବିସ୍ତାରିତ ହେଉଛି। ଏହି ପଦକ୍ଷେପ ପ୍ରାଥମିକ, ଉଚ୍ଚ ପ୍ରାଥମିକ, ଆଶ୍ରମ ଏବଂ ଉଚ୍ଚ ବିଦ୍ୟାଳୟ ସମେତ ପିପିମାଲ, କୁରାଲୋଇ ଏବଂ ବଞ୍ଜାରୀ ପଞ୍ଚାୟତର ସ୍କୁଲ ଗୁଡ଼ିକରେ ପହଂଚିବ। ଏହି ସମ୍ପ୍ରସାରଣ ସହିତ ବେଦାନ୍ତ, ଶିକ୍ଷାର ଭିତ୍ତିଭୂମିକୁ ସୁଦୃଢ଼ କରିବା ସହ ଝାରସୁଗୁଡାର ଅଧିକ ପିଲାଙ୍କୁ ଏକ ଉନ୍ନତ ଶିକ୍ଷାଗତ ସୁଯୋଗ ଦେବା ପାଇଁ ଲକ୍ଷ୍ୟ ରଖିଛି।
ବେଦାନ୍ତ ଆଲୁମିନିୟମର ସିଇଓ ରାଜୀବ କୁମାର କହିଛନ୍ତି, “ଶିକ୍ଷା ହେଉଛି ସାମାଜିକ ପ୍ରଗତି ପାଇଁ ମୂଳଦୁଆ, ଏବଂ ବେଦାନ୍ତରେ, ଆମେ ଏହାକୁ ଯଥା ସମ୍ଭବ ସମର୍ଥନ କରିବାକୁ ପ୍ରତିବଦ୍ଧ। ପ୍ରୋଜେକ୍ଟ ବିଦ୍ୟାମାଧ୍ୟମରେ, ଆମେ ଓଡ଼ିଶାର ଗ୍ରାମୀଣ ସ୍କୁଲଗୁଡ଼ିକରେ ଶିକ୍ଷାଦାନ କ୍ଷମତା ବୃଦ୍ଧି କରୁଛୁ ଯାହା ଦ୍ୱାରା ଛାତ୍ରଛାତ୍ରୀମାନେ ଗୁଣାତ୍ମକ ଶିକ୍ଷା ସୁଯୋଗ ପାଇପାରିବେ। ଆମେ ଆମର କାର୍ଯ୍ୟର ଚାରିପାଖରେ ଥିବା ସମ୍ପ୍ରଦାୟ ପାଇଁ ଏକ ଉଜ୍ଜ୍ୱଳ ଭବିଷ୍ୟତ ଗଠନ ପାଇଁ ଚେଷ୍ଟାରତ।”
କୁରାଲୋଇର ସରପଞ୍ଚ ସନାତନ ନାଏକ କହିଛନ୍ତି, “ପ୍ରୋଜେକ୍ଟ ବିଦ୍ୟା ଆମ ସ୍କୁଲଗୁଡ଼ିକ ପାଇଁ ଏକ ସ୍ୱାଗତଯୋଗ୍ୟ ପଦକ୍ଷେପ। ଅତିରିକ୍ତ ଶିକ୍ଷକ ନିଯୁକ୍ତି ହେବା ସହିତ, ଛାତ୍ରଛାତ୍ରୀମାନେ ଅଧିକ କେନ୍ଦ୍ରିତ ମାର୍ଗଦର୍ଶନ ପାଇବେ, ଯାହା ସେମାନଙ୍କୁ ମୁଖ୍ୟ ବିଷୟ ଗୁଡ଼ିକରେ ଏକ ଦୃଢ଼ ଭିତ୍ତିଭୂମି ଗଠନ କରିବାରେ ଏବଂ ଶିକ୍ଷାରେ ଅଧିକ ଆତ୍ମବିଶ୍ୱାସ ହାସଲ କରିବାରେ ସାହାଯ୍ୟ କରିବ। ବେଦାନ୍ତର ଏହି ପଦକ୍ଷେପ ଗୁରୁତ୍ୱପୂର୍ଣ୍ଣ ସମ୍ପ୍ରଦାୟ ଆବଶ୍ୟକତାକୁ ପୂରଣ କରିବ ଏବଂ ଆମ ଅଞ୍ଚଳରେ ଶିକ୍ଷାକୁ ଉନ୍ନତ କରିବାରେ ବହୁତ ସାହାଯ୍ୟ କରିବ।
ବେଦାନ୍ତ ଆଲୁମିନିୟମ ଶିକ୍ଷା, ସ୍ୱାସ୍ଥ୍ୟସେବା, ସ୍ଥାୟୀଜୀବିକା, ଗ୍ରାମୀଣ ଭିତ୍ତିଭୂମି ଏବଂ ତୃଣମୂଳକ୍ରୀଡା ଏବଂ ସଂସ୍କୃତିକୁ ନେଇ ସାମାଜିକ ପ୍ରଭାବ ପଦକ୍ଷେପ ମାଧ୍ୟମରେ ଓଡ଼ିଶାରେ ପରିବର୍ତ୍ତନ ଆଣିବା ପାଇଁ ପ୍ରତିବଦ୍ଧ । ସ୍ଥାନୀୟ କର୍ତ୍ତୃପକ୍ଷ ଏବଂ ସମ୍ପ୍ରଦାୟ ଅଂଶୀଦାର ମାନଙ୍କ ସହିତ ଘନିଷ୍ଠ ଭାବରେ ସହଯୋଗ କରି, କମ୍ପାନୀ ନିଶ୍ଚିତ କରେଯେ ଏହାର ହସ୍ତକ୍ଷେପ ଏହାର କାର୍ଯ୍ୟକ୍ଷେତ୍ରରେ ଦୃଢ ସାମାଜିକ-ଆର୍ଥିକ ପ୍ରଗତି ଆଡ଼କୁ ନେଇଯିବ।
ବେଦାନ୍ତ ଲିମିଟେଡର ଏକ ବ୍ୟବସାୟ, ବେଦାନ୍ତ ଆଲୁମିନିୟମ ହେଉଛି ଭାରତର ସର୍ବବୃହତ ଆଲୁମିନିୟମ ଉତ୍ପାଦକ, ଯାହା ଭାରତର ଅଧାରୁ ଅଧିକ ଆଲୁମିନିୟମ ଅର୍ଥାତ୍ ଆର୍ଥିକ ବର୍ଷ ୨୫ରେ ୨.୪୨ ନିୟୁତ ଟନ୍ ଉତ୍ପାଦନ କରେ। ଏହା ମୂଲ୍ୟଯୁକ୍ତ ଆଲୁମିନିୟମ ଉତ୍ପାଦରେ ଏକନେତା ଯାହା ମୂଳଶିଳ୍ପଗୁଡ଼ିକରେ ଗୁରୁତ୍ୱପୂର୍ଣ୍ଣ ପ୍ରୟୋଗ ପାଏ। ଆଲୁମିନିୟମ ଶିଳ୍ପ ପାଇଁ S&P ଗ୍ଲୋବାଲ କର୍ପୋରେଟ୍ସ ଷ୍ଟେନେବିଲିଟିଆସେସମେଣ୍ଟ 2024 ବିଶ୍ୱ ରାଙ୍କିଂରେ ବେଦାନ୍ତ ଆଲୁମିନିୟମ ଦ୍ୱିତୀୟ ସ୍ଥାନରେ ଅଛି, ଯାହା ଏହାର ଅଗ୍ରଣୀ ସ୍ଥାୟୀ ବିକାଶ ଅଭ୍ୟାସର ପ୍ରତିଫଳନ। ଭାରତରେ ଏହାର ବିଶ୍ୱସ୍ତରୀୟ ଆଲୁମିନିୟମ ସ୍ମେଲଟର, ଆଲୁମିନା ରିଫାଇନାରୀ ଏବଂ ପାୱାରପ୍ଲାଣ୍ଟ ସହିତ, କମ୍ପାନୀ ଏକ ସବୁଜ ଆସନ୍ତା କାଲି ପାଇଁ ‘ଭବିଷ୍ୟତର ଧାତୁ’ ଭାବରେ ଆଲୁମିନିୟମର ଉଦୀୟମାନ ପ୍ରୟୋଗଗୁଡ଼ିକୁ ପ୍ରୋତ୍ସାହିତ କରିବାର ଲକ୍ଷ୍ୟ ପୂରଣ କରୁଛି।