ପାରାଦୀପ : ଜଗତସିଂହପୁର ଜିଲ୍ଲା ଏରସମା ବ୍ଲକ୍ କୁଞ୍ଜକୋଠୀ ପଞ୍ଚାୟତ ନୀଳକଣ୍ଠେଶ୍ୱର ଉଚ୍ଚବିଦ୍ୟାଳୟରେ ଅଭାବନୀୟ ଦୃଶ୍ୟ । ଗତ ୫ ଦିନ ହେଲା ସ୍କୁଲରେ ଛାତ୍ରୀ ମାନଙ୍କୁ ଲାଗୁଛି ଭୂତ । ହଠାତ୍ ପିଲାମାନେ ବେହୋସ୍ ହୋଇପଡ଼ିବା ସହିତ ବାଉଳା ଚାଉଳା ହେଉଛନ୍ତି । ଗୁଣିଆ ଡାକି ଝାଡ଼ିବା ପରେ ସ୍ବାଭାବିକ ହେଉଛନ୍ତି ପିଲା । ଗୁଣିଆ ଝାଡ଼ିବା ବେଳେ ପିଲାମାନେ ଝାଡୁକୁ ଧରି ଦୌଡୁଥିବାର ଦୃଶ୍ୟ ମଧ୍ୟ ଦେଖିବାକୁ ମିଳିଛି । ତେବେ ଆଜିର ବିଜ୍ଞାନ ଯୁଗରେ ଏଭଳି ଘଟଣା ବିଶ୍ବାସ ଯୋଗ୍ୟ ନହେଲେ ମଧ୍ୟ ଏହା ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି କରିଛି । ଅବିଭାବକମାନେ ଭୟରେ ପିଲାମାନଙ୍କୁ ସ୍କୁଲ ଛାଡିବାକୁ ଭୟ କରୁଛନ୍ତି । ଗତ ୫ ଦିନ ଭିତରେ ୧୦ ରୁ ୧୧ ଜଣ ପିଲାଙ୍କୁ ଏହିପରି ଭୁତ ଲାଗିଥିବା କୁହାଯାଉଛି । ଏହି ଘଟଣା ସ୍ଥାନୀୟ ଅଞ୍ଚଳରେର ଜଣେ ଯୁବକ ଗୁଣି ଶିଖୁଛନ୍ତି ଏବଂ ସିଏ ହିଁ କରାଉଥିବା ସନ୍ଦେହ କରୁଛନ୍ତି ଗ୍ରାମବାସୀ । ତେବେ ଘଟଣାକୁ ନେଇ ସ୍କୁଲ ଶିକ୍ଷକ ସ୍ଥାନୀୟ ମେଡିକାଲକୁ ଯୋଗାଯୋଗ କରିଥିଲେ । ମେଡିକାଲରୁ ଏକ ଡ଼ାକ୍ତରୀ ଟିମ୍ ଘଟଣାସ୍ଥଳ ପରିଦର୍ଶନ କରିବା ସହ ଛାତ୍ରୀ ମାନଙ୍କୁ ପରୀକ୍ଷା କରିଛନ୍ତି । ସମସ୍ତେ ସୁସ୍ଥ ଥିବା ଡ଼ାକ୍ତରୀ ଟିମ୍ ପକ୍ଷରୁ କୁହାଯାଇଛି । ତେବେ କାହିଁକି ଏବଂ କେଉଁ ପରିସ୍ଥିତିରେ ପିଲାମାନେ ଏଭଳି ଅସ୍ବାଭାବିକ ଆଚରଣ ପ୍ରଦର୍ଶନ କରୁଛନ୍ତି ତାହା ସ୍ପଷ୍ଟ ହୋଇନାହିଁ ।…
ଟ୍ରମ୍ପ ବଢାଇଲେ ଟିକଟକ୍ ବ୍ୟାନର ସମୟସୀମା, ଘୋଷଣା କଲେ ନୂଆ ତାରିଖ
ନନ୍ଦିଘୋଷ ବ୍ୟୁରୋ : ଟିକଟକକୁ ନେଇ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବଡ ଘୋଷଣା କରିଛଡ଼୍ତି । ସେ ଟିକଟକ୍ ବନ୍ଦର ସମୟସୀମାକୁ ବଢାଇଛନ୍ତି । ଏହା ସହ ଏକ ନୂଆ ତାରିଖ ଘୋଷଣା କରିଛନ୍ତି । ଆମେରିକାରେ ସୋସିଆଲ ମିଡିଆ ଆପ୍ ଟିକଟକ ବନ୍ଦର ଅବଧିକୁ ବଢାଇ ଡିସେମ୍ବର ୧୬ ପର୍ଯ୍ୟନ୍ତ ଘୋଷଣା କରିଛନ୍ତି ।
ଟ୍ରମ୍ପ ମଙ୍ଗଳବାର ଦିନ ଚତୁର୍ଥ କାର୍ଯ୍ୟକାରୀ ଆଦେଶ ଜାରି କରିଛନ୍ତି । ଆମେରିକୀୟ କମ୍ପାନୀ ବିକ୍ରୟ କିମ୍ବା ପ୍ରତିବନ୍ଧକ ସମ୍ନା କରିବାକୁ ସମୟସୀମା ବୃଦ୍ଧି କରାଯାଇଛି । ଏହାର ମୂଳ ସମୟସୀମା ଚଳିତ ବର୍ଷ ଜାନୁଆରୀ ୧୯ ତାରିଖ ଥିଲା । ଟ୍ରମ୍ପଙ୍କ ଦ୍ବିତୀୟ କାର୍ଯ୍ୟକାଳ ଶପଥ ଗ୍ରହଣର ଗୋଟିଏ ଦିନ ପୂର୍ବରୁ ।
ଏହି ପ୍ରସଙ୍ଗରେ ଟ୍ରମ୍ପ କହିଛନ୍ତି, ସେ ଶୁକ୍ରବାର ଦିନ ଚୀନ ରାଷ୍ଟ୍ରପତିଙ୍କ ସହ ଟକଟକ ସମ୍ପର୍କରେ ଆଲୋଚନା କରିବେ । କିଛି କମ୍ପାନୀ ଏହି ଆପକୁ କିଣିବାକୁ ଚାହୁଁଛନ୍ତି , ସମ୍ଭାବ୍ୟ ଆବେଦନକାରୀଙ୍କ ନାମ ଖୁବଶିଘ୍ର ଘୋଷଣା କରାଯିବ ।
ରାଷ୍ଟପତି ଡୋନାଲ୍ଡ ଟ୍ରମ୍ପ ଟିକଟକର ଏହି ସମୟସୀମାକୁ ତିନି ଥର ବୃଦ୍ଧି କରିଛନ୍ତି । ପ୍ରଥମଥର ପାଇଁ ଟ୍ରମ୍ପ ଜାନୁଆରୀ ୨୦ରେ ଏକ କାର୍ଯ୍ୟକାରୀ ଆଦେଶ ଜାରି କରିଥିଲେ । ଏହାପରେ ଆମେରିକାରେ ଟିକଟକ ଉପରେ ପ୍ରତିବନ୍ଧକ ଲଗାଯାଇଥିଲା । ଦ୍ବିତୀୟ ଥର ପାଇଁ ଅଗଷ୍ଟ ମାସରେ ଏହାର ସମୟସୀମା ବୃଦ୍ଧି କରାଯାଇଥିଲା । ଯେତେବେଳେ ଆମେରିକୀୟ କମ୍ପାନୀରେ ପରିବର୍ତ୍ତନ କରିବାକୁ ଚେଷ୍ଟା ଚାଲିଥିଲା । କିନ୍ତୁ ଟ୍ରମ୍ପଙ୍କ ଟାରିଫ ଘୋଷଣା ପରେ ଚୀନ ପଛଘୁଞ୍ଚା ଦେଇଥିଲା । ଏହାପରେ ତୃତୀୟ ଥର ପାଇଁ ଟ୍ରମ୍ପ ଜୁନରେ ସମୟସୀମା ୯୦ ଦିନ ପାଇଁ ବଢାଇଥିଲେ ।
ଟିକଟକ ହେଉଛି ଚୀନ କମ୍ପନୀ ବାଟଡ୍ୟାନ୍ସର । ଆମେରିକାକୁ ଲାଗୁଛି କି, ଏହି ଆପ ବ୍ୟବହାରକାରୀଙ୍କ ଡାଟା ଚୀନ ସରକାରଙ୍କୁ କାଳେ ଦେଇଦେବ । ଏହି ଆପକୁ ଆମେରିକା ଅସୁରକ୍ଷିତ ମନେକରେ । ତେଣୁ ବାଟଡ୍ୟାନ୍ସ ଆମେରିକାର ଏକ କମ୍ପାନୀକୁ ତାର ଅଧିକାର ଦେବାକୁ କହୁଛି । ସେଥିପାଇଁ ଟିକଟକକୁ ବ୍ୟାନ କରାଯାଇଛି ।
ଡିଜେ ଗାଡି ପାଇଁ ଲାଗିଲା କଟକଣା….
ଭୁବନେଶ୍ବର : ଡିଜେ ଗାଡ଼ିକୁ ନେଇ ପରିବହନ ବିଭାଗର କଡ଼ା ଆଭିମୁଖ୍ୟ । ମୋଟର ଯାନର ମୂଳ ଢାଞ୍ଚାକୁ ମନଇଚ୍ଛା ବଦଳାଇପାରିବେ ନାହିଁ ମାଲିକ । ବେଆଇନ ପରିବର୍ତ୍ତନ ବିରୋଧରେ ସର୍କୁଲାର ଜାରି କରାଯାଇଛି । STA କହିଛି, ସଡ଼କ ସୁରକ୍ଷା ନିୟମ ଉଲ୍ଲଙ୍ଘନ କଲେ କଠୋର କାର୍ଯ୍ୟାନୁଷ୍ଠାନ ନିଆଯିବ। ଜରିମାନା ସହ ପଞ୍ଜୀକରଣ ଓ ଫିଟନେସ୍ ରଦ୍ଦ କରାଯିବ। ବାଣିଜ୍ୟ ଓ ପରିବହନ ମନ୍ତ୍ରୀଙ୍କ ନିର୍ଦ୍ଦେଶରେ ଏହି ପଦକ୍ଷେପ ନେଇଛି ରାଜ୍ୟ ପରିବହନ ପ୍ରାଧିକରଣ । ବେଆଇନ ଡିଜେ ଗାଡ଼ି ଯୋଗୁଁ ହୋଇଥିବା ଅନେକ ଅଘଟଣକୁ ନେଇ ଚିନ୍ତା ପ୍ରକାଶ ପାଇଥିଲା । ଡିଜେ ଗାଡ଼ିର ବେଆଇନ ଭାବେ ଢାଞ୍ଚାରେ ପରିବର୍ତ୍ତନ, ଗାଡ଼ିର ଉଚ୍ଚତା, ଲମ୍ବ ଏବଂ ପ୍ରସ୍ଥରେ ପରିବର୍ତ୍ତନ, ଅତି ଉଚ୍ଚ ସ୍ୱରର ଲାଉଡ ସ୍ପିକର ଏବଂ ଚିକମିକ କରୁଥିବା ବେଆଇନ ଆଲୋକ ରୋକିବା ନିମନ୍ତେ କଠୋର ଆଭିମୁଖ୍ୟ ଗ୍ରହଣ କରିଛି ପରିବହନ ବିଭାଗ। ଏ ନେଇ ସର୍କୁକାଲ ଜାରି କରାଯାଇଛି। ଆଗକୁ ଗାଡ଼ି ମାଲିକ ତଥା ଅପରେଟରମାନଙ୍କୁ ଆଇନ ଓ ସୁରକ୍ଷା ମାନଦଣ୍ଡ ବିଷୟରେ ସଚେତନ କରିବା ପାଇଁ ଅଭିଯାନ ଆରମ୍ଭ କରାଯିବ। ପାର୍ବଣ ଋତୁରେ ଏଭଳି ବେଆଇନ ଯାନକୁ ବ୍ୟବହାର ନକରିବା ନିମନ୍ତେ ଜନସାଧାରଣଙ୍କୁ ପରିବହନ ବିଭାଗ ଅନୁରୋଧ କରିଛି ।
ଟ୍ରାଫିକ୍ କନେଷ୍ଟବଳ ଶୁଭମିତ୍ରା ସାହୁ ହତ୍ୟା ଘଟଣା : ମାଟି ତଳୁ ବାହାରିଲା ମୃତଦେହ…
ଭୁବନେଶ୍ଵର : ଭୁବନେଶ୍ଵର ଟ୍ରାଫିକ୍ କନେଷ୍ଟବଳ ଶୁଭମିତ୍ରା ସାହୁ ହତ୍ୟା ଘଟଣା ଉପରୁ ହଟିଲା ପରଦା। ଭୁବନେଶ୍ଵରରେ କରିଥିଲା ହତ୍ୟା। ପତ୍ନୀକୁ ମାରି ଗାଡ଼ି ଡିକିରେ ପୁରାଇ କେନ୍ଦୁଝର ଘଟଗାଁ ନିକଟ ଏକ ଜଙ୍ଗଲରେ ନେଇ ପୋତିଥିଲା। ପୋତାଯାଇଥିବା ସ୍ଥାନରେ ଜେସିବି ସହାୟତାରେ ଖୋଳି ବାହାର କରିଛି ପୋଲିସ। ହତ୍ୟା ଘଟଣାରେ ଅଭିଯୁକ୍ତ ସ୍ଵାମୀ କନେଷ୍ଟବଳ ଦୀପକ ରାଉତକୁ ଘଟଗାଁ ଥାନାକୁ ନେଇ ଜେକା କରିଥିଲା କମିଶନରେଟ ପୋଲିସ। ଘଟଗାଁ ଥାନାରେ ଜେରା ପରେ ଶୁଭମିତ୍ରା ସାହୁଙ୍କ ମୃତଦେହ ପୋତା ଯାଇଥିବା ସ୍ଥାନକୁ ନେଇଥିଲା କମିଶନରେଟ ପୋଲିସ। ମୃତଦେହ ପୋତିବାରେ ସହାୟତା କରିଥିବା ଦୀପକଙ୍କ ମାଉସୀ ପୁଅ ଭାଇକୁ ମଧ୍ୟ ପୋଲିସ ଗିରଫ କରିଛି। ତେବେ ପତ୍ନୀ ଶୁଭମିତ୍ରା ସାହୁଙ୍କୁ କାହିଁକି ମାରିଥିଲା ସ୍ଵାମୀ ଦୀପକ ରାଉତ। ବିଭିନ୍ନ ଦିଗକୁ ନେଇ ପୋଲିସ ତନାଘନା କରୁଛି। ଉଭୟଙ୍କ ମଧ୍ୟରେ ୧୦ ଲକ୍ଷ ଟଙ୍କାକୁ ନେଇ ଝଗଡ଼ା ହୋଇଥିଲା। ଝଗଡ଼ାରୁ ନେଇ ମଧ୍ୟ ହତ୍ୟା କରାଯାଇଥିବା ସନ୍ଦେହ କରୁଛି ପୋଲିସ। ହତ୍ୟା ପଛରେ ଶୁଭମିତ୍ରାଙ୍କ ନାଁରେ ହୋଇଥିବା ୧ କୋଟି ଟଙ୍କାର ଇନସୁରାନ୍ସ ମଧ୍ୟ ଏକ କାରଣ ହୋଇପାରେ। ଗତ ଜୁଲାଇ ୨୦୨୪ରେ ଶୁଭମିତ୍ରାକୁ ବିବାହ କରିଥିଲା କନଷ୍ଟେବଲ ଦୀପକ ରାଉତ। ପୂର୍ବରୁ ଦୀପକର ପ୍ରଥମ ସ୍ତ୍ରୀ ଦୁର୍ଘଟଣାରେ ପ୍ରାଣ ହରାଇଥିବାବେଳେ ତାଙ୍କ ନାମରେ ଥିବା କୋଟିଏ ଟଙ୍କାର ବୀମା ଟଙ୍କା ପାଇଥିଲା। ପ୍ରଥମ ସ୍ତ୍ରୀର ମୃତ୍ୟୁ ମାମଲା ଏବେ ବି ସନ୍ଦେହ ଘେରରେ ରହିଛି। ଏହାକୁ ନେଇ ତଦନ୍ତ କରୁଛି ପୋଲିସ। ଘଟଗାଁ ଥାନା ପୋଲିସ ଓ ଭୁବନେଶ୍ଵର ପୋଲିସ ମିଳିତ ଭାବେ ତଦନ୍ତ କରୁଛନ୍ତି। ଭୁବନେଶ୍ଵରରେ ହତ୍ୟା କରାଯାଇଥିବା ସ୍ପଟକୁ ନେଇ ସରଜମିନ ତଦନ୍ତ କରିଥିଲା ପୋଲିସ। ୬ ତାରିଖରେ ଶୁଭମିତ୍ରା ଶେଷଥର ଲାଗି ଅଫିସରେ ଡ୍ୟୁଟି କରିଥିଲେ। ଏହାପରେ ଶୁଭମିତ୍ରା ନିଖୋଜ ହୋଇଯାଇଥିଲେ। ପରିବାର ଲୋକେ ଏ ନେଇ କ୍ୟାପିଟାଲ ଥାନାରେ ଏତଲା ଦେଇଥିଲେ।
ଆଜି ହେଉଛି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଜନ୍ମଦିନ: ବିଭିନ୍ନ ମହଲରୁ ଛୁଟିଛି ଶୁଭେଚ୍ଛାର ସୁଅ
ଆଜି ହେଉଛି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଜନ୍ମଦିନ। ଆଜି ତାଙ୍କୁ ୭୫ ବର୍ଷ ପୂରିଛି। ଜନ୍ମଦିନ ଅବସରରେ ମୋଦିଙ୍କୁ ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟିଛି। ଦେଶ ବିଦେଶର ବିଶିଷ୍ଟ ନେତା ତାଙ୍କୁ ଜନ୍ମଦିନର ଶୁଭେଚ୍ଛା ଜଣାଇଛନ୍ତି । ରାଷ୍ଟ୍ରପତି ଦ୍ରୌପଦୀ ମୁର୍ମୁ ମୋଦୀଙ୍କୁ ତାଙ୍କ ଜନ୍ମଦିବସର ଅଭିନନ୍ଦନ ଜଣାଇବା ସହିତ ଦୀର୍ଘଜୀବନ କାମନା କରିଛନ୍ତି। ସେହିପରି ଅମିତ ଶାହ, ନିର୍ମଳା ସୀତାରମଣ, ଜେପି ନଡ୍ଡା ପ୍ରମୁଖ ରାଜନୈତିକ ବ୍ୟକ୍ତିତ୍ଵ ମଧ୍ୟ ଅଭିନନ୍ଦନ ଜଣାଇଛନ୍ତି। ସେହି ଆମେରିକାର ରାଷ୍ଟ୍ରପତି ଡୋନାଲଡ ଟ୍ରମ୍ପ ମଧ୍ୟ ମୋଦୀଙ୍କୁ ଶୁଭେଚ୍ଛା ଜଣାଇ କହିଛନ୍ତି, ଆମେରିକା ଓ ଭାରତର ସଂପର୍କରେ ଅବଦାନ, ୟୁକ୍ରେନ ଯୁଦ୍ଧ ବନ୍ଦ ପାଇଁ ପ୍ରୟାସକୁ ପ୍ରଶଂସା କରିଛନ୍ତି। ମୋଦିଙ୍କ ଜନ୍ମ ଦିନ ଅବସରରେ ବିଜେପି ତରଫରୁ ଅନେକ କାର୍ଯ୍ୟକ୍ରମ କରଯାଉଛି। ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ ମଧ୍ୟ ବାଲୁକା କଳାରେ ମୋଦିଙ୍କୁ ଶୁଭେଚ୍ଛା ଜଣାଇଛନ୍ତି।
ଭୁବନେଶ୍ଵର ଟ୍ରାଫିକ୍ କନଷ୍ଟେବଳ ଶୁଭମିତ୍ରା ସାହୁଙ୍କୁ ତଣ୍ଟି ଚିପି ହତ୍ୟା: ସତ ମାନିଲା ପ୍ରେମିକ
ଭୁବନେଶ୍ଵର ଟ୍ରାଫିକ୍ କନଷ୍ଟେବଳ ଶୁଭମିତ୍ରା ସାହୁଙ୍କୁ ତଣ୍ଟି ଚିପି ହତ୍ୟା କରିଛି ଦୀପକ ରାଉତ। ପୋଲିସ କମିଶନରଙ୍କ ଅଫିସରେ କାମ କରୁଛି କିରାଣୀ ଦୀପକ ରାଉତ। ଗତ ୬ ତାରିଖ ସନ୍ଧ୍ୟାରେ ହତ୍ୟା କରିବା ପରେ ନିଜ କାରରେ ନେଇ କେନ୍ଦୁଝରକୁ ନେଇଥିଲା। ସେଠାରେ ଜଙ୍ଗଲରେ ପୋତି ଦେଇଛି। ୨୦ ଲକ୍ଷ ଟଙ୍କା ପାଇଁ ଶୁଭମିତ୍ରାଙ୍କୁ ଦୀପକ ହତ୍ୟା କରିଥିବା ଜଣାପଡ଼ିଛି। ପୂର୍ବରୁ ଦୀପକର ପ୍ରଥମ ସ୍ତ୍ରୀ ଦୁର୍ଘଟଣାରେ ପ୍ରାଣ ହରାଇଥିବା ବେଳେ ସେ କୋଟିଏ ଟଙ୍କାର ବୀମା ଟଙ୍କା ପାଇଥିଲା। ପ୍ରଥମ ସ୍ତ୍ରୀର ମୃତ୍ୟୁ ମାମଲା ଏବେ ସନ୍ଦେହରେ। ଏହାକୁ ନେଇ ତଦନ୍ତ କରୁଛି ପୋଲିସ। କେନ୍ଦୁଝର ଜଙ୍ଗଲରେ ମୃତଦେହ ପୋତା ଯାଇଥିଲା। ସେହି ମୃତଦେହ ମିଳିଥିବା ଜଣାପଡ଼ିଛି। ଘଟଗାଁ ଥାନା ପୋଲିସ ଓ ଭୁବନେଶ୍ଵର ପୋଲିସ ମିଳିତ ଭାବେ ତଦନ୍ତ କରୁଛନ୍ତି। ୬ ତାରିଖରୁ ଶୁଭମିତା ନିଖୋଜ ହୋଇଥିଲେ। ପରିବାର ଲୋକେ ଏ ନେଇ କ୍ୟାପିଟାଲ ଥାନାରେ ଏତଲା ଦେଇଥିଲେ।
ଏହା ପୂର୍ବରୁ ଶୁଭମିତ୍ରାଙ୍କ ନିଖୋଜ ମାମଲାରେ ପୋଲିସ ଦୀପକଙ୍କୁ ଅଟକ ରଖି ପଚରା ଉଚରା କରିଥିଲା । ସେ ଶୁଭମିତ୍ରାଙ୍କୁ ହତ୍ୟା କରିଥିବା ନେଇ ସନ୍ଦେହ କରାଯାଇଥିଲା। କେନ୍ଦୁଝର ଜଙ୍ଗଲରେ ହତ୍ୟା ନେଇ କମିଶନରେଟ ପୋଲିସକୁ ସୁରାକ ମିଳିଥିଲା । ଅଟକ ପ୍ରେମିକକୁ ନେଇ ଘଟଗାଁ ଥାନାରେ ପହଞ୍ଚିଥିଲା ସ୍ପେଶାଲ ସ୍କ୍ବାଡ । ମହିଳା ଟ୍ରାଫିକ କନଷ୍ଟେବଳଙ୍କ ବାପା ମଧ୍ୟ ଦୀପକଙ୍କୁ ସନ୍ଦେହ କରି କ୍ୟାପିଟାଲ ଥାନାରେ ଏତଲା ଦେଇଥିଲେ । ମହିଳା ଟ୍ରାଫିକ କନଷ୍ଟେବଳ ନିଖୋଜ ହେବାର ୧୨ ଦିନ ବିତି ଯାଇଥିବା ବେଳେ ତାଙ୍ଗକର ପତ୍ତା ମିଳି ନଥିବାରୁ ଏହାକୁ ନେଇ ବେଶ୍ ଚର୍ଚ୍ଚା ବଢ଼ିବାରେ ଲାଗିଥିଲା । ଏପରିକି ଦୀପକ ରାଉତ ଓ ଶୁଭମିତ୍ରା ସାହୁ ଏକ କାରରେ କେନ୍ଦୁଝର ତାରିଣୀ ମନ୍ଦିର ଯିବାର ଫଟୋ ସାମନାକୁ ଆସିଥିଲା ।
ପୂର୍ବ ଶତ୍ରୁତାକୁ ନେଇ ରାଜଧାନୀର ଦୁଇ ବସ୍ତି ମଧ୍ୟରେ ବୋମା ମାଡ଼
ପୂର୍ବ ଶତ୍ରୁତାକୁ ନେଇ ରାଜଧାନୀର ଦୁଇ ବସ୍ତି ମଧ୍ୟରେ ବୋମା ମାଡ଼। ଗୌତମ ନଗର ବସ୍ତି ଏବଂ ଅଶୋକ ନଗର ଫାଳିକିଆ ବସ୍ତି ଭିତରେ ବୋମା ମାଡ ହୋଇଛି। ଏହା ପରେ ଦୁର୍ବୃତ୍ତମାନେ ଘରର କବାଟ ବି ଭାଙ୍ଗିବାକୁ ଚେଷ୍ଟା କରିଛନ୍ତି। ରାଜଧାନୀରେ ବୋମା ମାଡ଼ ନୂଆ ନୁହେଁ । ଏଇ ଦୁଇ ମାସରେ ଭିତରେ ଭରତପୁର ପଣ୍ଡା କୁଦିଆ ବସ୍ତି ଏବଂ ପୁଲେଶ୍ୱରି ବସ୍ତି ରେ ଫୁଟିଥିଲା ବୋମା। ଆଉ ଗତ କାଲି ବିଳମ୍ବିତ ରାତିରେ ପୁଣି ଦେଖିବାକୁ ମିଳିଛି ବସ୍ତି ବସ୍ତି ଭିତରେ ବୋମା ମାଡ। ଲାଗୁଛି କମିଶନରେଟ ପୋଲିସକୁ ବାରମ୍ବାର ଚ୍ୟାଲେଞ୍ଜ ଦେଉଛନ୍ତି ଅପରାଧୀ।
ଦୀର୍ଘ ୮ ଦିନ ପରେ ଧାରଣା ପ୍ରତ୍ୟାହାର କଲେ ଶତାଧିକ ଶ୍ରମିକ
ଦୀର୍ଘ ୮ ଦିନ ପରେ ଧାରଣାରୁ ପ୍ରତ୍ୟାହାର କଲେ ପାରାଦୀପ ବନ୍ଦର ଇଣ୍ଟରନ୍ୟାସନାଲ କାର୍ଗୋ ଟର୍ମିନାଲର ୨୦୫ ଜଣ ଶ୍ରମିକ । ପାରାଦୀପ ବନ୍ଦର ଓ ପିଆଇସିଟି କର୍ତ୍ତୃପକ୍ଷଙ୍କ ସହିତ ଦୀର୍ଘ ସମୟର ଆଲୋଚନା ପରେ ନିଷ୍କର୍ଷ ବାହାରିଛି । ଆସନ୍ତା ୧ ମାସ ମଧ୍ୟରେ ଟର୍ମିନାଲ କର୍ତ୍ତୃପକ୍ଷ ବେଆଇନ୍ ଭାବେ ଛଟେଇ କରିଥିବା ୧୫ ଜଣ ଶ୍ରମିକଙ୍କୁ ପୁନଃ ନିଯୁକ୍ତି ଦେବେ ଏବଂ ପରବର୍ତ୍ତୀ ପର୍ଯ୍ୟାୟରେ ଅନ୍ୟ ୧୭ ଜଣଙ୍କୁ ମଧ୍ୟ ଆପୋସ ସମାଧାନ ମାଧ୍ୟମରେ ନିଯୁକ୍ତି ପ୍ରଦାନ କରିବେ ବୋଲି ଲିଖିତ ପ୍ରତିଶ୍ରୁତି ଦେଇଛନ୍ତି । ଉକ୍ତ ୧୭ ଜଣଙ୍କ ମଧ୍ୟରୁ ୧୨ ଜଣ ଶ୍ରମିକ ଏକ କେସରେ ଯୋଡ଼ି ହୋଇ ଥିବାରୁ ସେମାନଙ୍କୁ ପରେ ନିଯୁକ୍ତି ଦିଆଯିବ ବୋଲି ପ୍ରତିଶ୍ରୁତି ମିଳିଛି । ଫଳରେ ଧାରଣା ପ୍ରତ୍ୟାହାର କରାଯାଇଥିବା ମଙ୍ଗଳବାର ରାତିରେ ଘୋଷଣା କରିଛନ୍ତି ପାରାଦ୍ଵୀପ ଶ୍ରମିକ କର୍ମଚାରୀ ୟୁନିୟନ । ବୁଧବାର ଠାରୁ ୨୦୫ ଜଣ ଶ୍ରମିକ ନିୟମିତ ଭାବେ କାର୍ଯ୍ୟରେ ଯୋଗଦେବେ ବୋଲି ଘୋଷଣା କରିଛନ୍ତି । ଗତ ୯ ତାରିଖ ଠାରୁ ୫ ଦଫା ଦାବିକୁ ନେଇ ୨୦୫ ଜଣ ଶ୍ରମିକ ପିଆଇସିଟି କମ୍ପାନୀ ସମ୍ମୁଖରେ ଧାରଣା ଦେଇଥିଲେ । ଫଳରେ ଜାହାଜ ପଣ୍ୟ କାରବାରରେ କମ୍ପାନୀ କତ୍ତୃପକ୍ଷ ଲକ୍ଷାଧିକ ଟଙ୍କା କ୍ଷତି ସହିଛନ୍ତି।
ସାର ପାଇଁ ରାତି ୪ଟାରୁ ଲାଇନ୍ ଲଗାଇଛନ୍ତି ଚାଷୀ
ଛେଣ୍ଡିପଦା ବ୍ଳକରେ ସାର ସଙ୍କଟ । ଆଜି ସକାଳେ ଅନୁଗୁଳ ଜିଲ୍ଲା ପ୍ୟାକ୍ସ ପକ୍ଷରୁ ବାଗଡିଆ ସେବା ସମବାୟ ସମିତିରେ ଚାଷୀଙ୍କୁ ସାର ଯୋଗାଇ ଦିଆଯିବାକୁ ଯୋଜନା ରହିଛି । ରାତି ୪ଟାରୁ ସାର ପାଇଁ ଚାଷୀଙ୍କ ଭିଡ଼ ଦେଖିବାକୁ ମିଳିଛି । ଧାଡିରେ ଲୋକମାନେ ଆଧାରକାର୍ଡ ରଖି ସମବାୟ ସମିତି ସାମ୍ନାରେ ଲାଇନ ଲଗାଇଛନ୍ତି ।
ଚାଷୀଙ୍କୁ ପର୍ଯ୍ୟାପ୍ତ ପରିମାଣର ସାର ନ ମିଳିଲେ ଆନ୍ଦୋଳନକୁ ଓହ୍ଲାଇବାକୁ ବିଜେଡିର ଚେତାବନୀ
ରାଜ୍ୟରେ ସାର ସଙ୍କଟକୁ ନେଇ ସରକାରଙ୍କୁ ଟାର୍ଗେଟ କଲେ ନିଆଳୀର ପୂର୍ବତନ ବିଧାୟକ ପ୍ରମୋଦ ମଲ୍ଲିକ । ସେ କହିଛନ୍ତିି, ରାଜ୍ୟରେ ମିଛୁଆ ସରକାର ଚାଲିଛି l କଥା ଦେଇ କଥା ରଖିବାରେ ଏ ସରକାର ବିଫଳ ହୋଇଛି । ରାଜ୍ୟରେ ସାରର ଅଭାବ ଯୋଗୁଁ ଚାଷ ପ୍ରଭାବିତ ହୋଇଛି । ଏଣୁ ସରକାର ଫିତାକଟା କି ରଙ୍ଗ ବଦଳା କାମରେ ନମାତି ତୁରନ୍ତ ଚାଷୀଙ୍କୁ ସାର ଯୋଗାଇ ଦେବାକୁ ଚେଷ୍ଟିତ ହୁଅନ୍ତୁ ବୋଲି ପ୍ରମୋଦ କହିଛନ୍ତି । ଯଦି ଚାଷୀଙ୍କୁ ପର୍ଯ୍ୟାପ୍ତ ପରିମାଣର ସାର ନମିଳେ ତେବେ ନିଆଳୀ ବିଜେଡି ଆନ୍ଦୋଳନକୁ ଓଲ୍ହାଇବ ବୋଲି ସେ ଚେତାବନୀ ଦେଇଛନ୍ତି ।