ଭୁବନେଶ୍ବର: ଆସନ୍ତାକାଲିଠାରୁ ବଢିବ ଅମୂଲ କ୍ଷୀର ଦର । ଲିଟର ପିଛା ୨ ଟଙ୍କା ବଢ଼ାଇବା ଲାଗି ଘୋଷଣା କରିଛି କମ୍ପାନୀ । ଅମୂଲର ସମସ୍ତ ଭାରିଆଣ୍ଟ ଯଥା ଗୋଲ୍ଡ, ତାଜା, ଶକ୍ତି, ଟି-ସ୍ପେଶାଲ କ୍ଷୀର କ୍ଷେତ୍ରରେ ଏହି ବର୍ଦ୍ଧିତ ଦର ଲାଗୁ ହେବ । ଏନେଇ ସୂଚନା ଦେଇଛି ଗୁଜରାଟ କୋପରେଟିଭ ମିଲ୍କ ମାର୍କେଟିଂ ଫେଡେରେସନ । ବର୍ଦ୍ଧିତ ଦର ଯୋଗୁଁ ଅମୂଲ ଗୋଲ୍ଡର ଦାମ ଅଧା ଲିଟର ଲାଗି ହେବ ୩୦ ଟଙ୍କା । ଅମୂଲ ତାଜାର ଦାମ୍ ହେବ ୨୪ଟଙ୍କା । ଅମୂଲ ଶକ୍ତିର ଦର ହେବ ୨୭ଟଙ୍କା ହୋଇଯିବ । ଗତବର୍ଷ ଜୁଲାଇରେ ଶେଷ ଥର ଲାଗି କ୍ଷୀର ଦର ଲିଟର ପିଛା ୨ ଟଙ୍କା ବଢ଼ାଯାଇଥିଲା ।
ଟ୍ରକ୍ ମାଲିକଙ୍କୁ ଫିଲ୍ମ ଷ୍ଟାଇଲରେ ହତ୍ୟା
ବ୍ରହ୍ମପୁର: ଗଞ୍ଜାମ ଜିଲ୍ଲା ଖଲ୍ଲିକୋଟରେ ଚାଞ୍ଚଲ୍ୟ । ସୋସିଆଲ୍ ମିଡିଆରେ ଆକୁଳ ନିବେଦନ ସତ୍ତ୍ବେ ମିଳିଲାନି ସାହାଯ୍ୟ । ଟ୍ରକ୍ ମାଲିକଙ୍କୁ ଫିଲ୍ମ ଷ୍ଟାଇଲରେ ମର୍ଡର । ଗୋଡ଼ାଇ ଗୋଡ଼ାଇ ମାରି ଦେଲେ ଦୁର୍ବୃତ୍ତ । ମୃତକ ହେଲେ ତୋଟା ଗାଁର ଜିତେନ୍ଦ୍ର ଦଳେଇ ।
ବ୍ରହ୍ମପୁରରୁ ଘରକୁ ଫେରୁଥିବାବେଳେ ବଡ଼ଘାଟି ନିକଟରେ ଜିତେନ୍ଦ୍ରଙ୍କୁ ଆକ୍ରମଣ କରିଥିଲେ ୫ ଦୁର୍ବୃତ୍ତ । ଟଙ୍କା ଲୁଟିବା ସହିତ ତାଙ୍କୁ ମାଡ଼ ମାରିଥିଲେ ଲୁଟେରା । ଦୁର୍ବୃତ୍ତଙ୍କ କବଳରୁ ଖସି ଜଙ୍ଗଲକୁ ଦୌଡ଼ି ପଳାଇଥିଲେ ଜିତେନ୍ଦ୍ର । ଏହି ସମୟରେ ପରିବାର ଲୋକଙ୍କୁ ମେସେଜରେ ଘଟଣା ସମ୍ପର୍କରେ ଜିତେନ୍ଦ୍ର ଅବଗତ କରାଇଥିଲେ । ପୋଲିସକୁ ମଧ୍ୟ ଘଟଣା ସମ୍ପର୍କରେ ମେସେଜ କରିଥିଲେ । ଫୋନ୍ ନକରି ମେସେଜ ଜରିଆରେ ତାଙ୍କ ସହିତ ଯୋଗାଯୋଗ କରିବାକୁ ସେ ଜଣାଇଥିଲେ । ତେବେ ପରେ ପରିବାର ଲୋକ ଘଟଣାସ୍ଥଳରେ ପହଞ୍ଚି ଜିତେନ୍ଦ୍ରଙ୍କୁ ମୃତ ଅବସ୍ଥାରେ ପାଇଥିଲେ । ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ମାର୍ଚ୍ଚ ଗାଇଡଲାଇନ: ବାହାରେ ନୁହେଁ, ଘରେ ଖେଳାଯିବ ହୋଲି
ଭୁବନେଶ୍ବର: ବାହାରେ ନୁହେଁ ଘର ଭିତରେ ଖେଳାଯିବ ହୋଲି । କେବଳ ନିଜ ପରିବାର ଲୋକଙ୍କ ସହ ହୋଲି ପାଳନ ପାଇଁ ଅନୁମତି ଦିଆଯାଇଛି । ମାର୍ଚ୍ଚ ପାଇଁ ଜାରି ଗାଇଡଲାଇନରେ ଏହି ନିର୍ଦ୍ଦେଶ ଦେଇଛନ୍ତି ରାଜ୍ୟ ସରକାର ।
କରୋନା ହ୍ରାସ ପାଇଥିବାରୁ ଅନଲକ୍ ହୋଇଛି ଓଡ଼ିଶା । ହେଲେ କରୋନା କଟକଣାରେ ପାଳନ ହେବ ହୋଲି, ଦୋଳ ପୂର୍ଣ୍ଣିମା, ମହାଶିବରାତ୍ରି । କେବଳ ନିଜ ପରିବାର ଲୋକଙ୍କ ସହ ହୋଲି ପାଳନ ପାଇଁ ଅନୁମତି ଦିଆଯାଇଛି ।
ଏଣିକି ବାହାଘର, ବ୍ରତଘରରେ ୫୦୦ ଲୋକ ଏକାଠି ହୋଇପାରିବେ । ଅନ୍ତିମ ସଂସ୍କାରରେ ୨୫୦ ଲୋକ ଯୋଗ ଦେଇପାରିବେ । ସାମାଜିକ, ଧାର୍ମିକ କାର୍ଯ୍ୟକ୍ରମରେ ସାମାଜିକ ଦୂରତା ସହ କୋଭିଡ କଟକଣାକୁ ଗୁରୁତ୍ବ ଦିଆଯିବ । ଘରୁ ବାହାରିଲେ ମାସ୍କ ବାଧ୍ୟତାମୂଳକ କରାଯାଇଛି । ବୃଦ୍ଧ, ଗର୍ଭବତୀ, ଶିଶୁଙ୍କ ବିନା କାରଣରେ ଘରୁ ବାହାରିବାକୁ ମନା କରାଯାଇଛି । କୌଣସି ଧାର୍ମିକ ଅନୁଷ୍ଠାନରେ ସ୍ବତନ୍ତ୍ର କାର୍ଯ୍ୟକ୍ରମ ପାଇଁ ସ୍ଥାନୀୟ ପ୍ରଶାସନଠୁ ଅନୁମତି ମାଗିବାକୁ ପଡିବ । ପୂର୍ବରୁ ରାଜ୍ୟରେ ରାତ୍ରିକାଳିନ କର୍ଫ୍ୟୁକୁ ସମ୍ପୂର୍ଣ୍ଣ ଉଠାଯାଇଛି ।
ଋଷ-ୟୁକ୍ରେନ୍ ଆଲୋଚନା ଶେଷ, ସେନା ଫେରାଇ ନେବା ପାଇଁ ୟୁକ୍ରେନ୍ ରଖିଲା ଦାବି
ବେଲାଋଷ: ଋଷ ଓ ୟୁକ୍ରେନ୍ ମଧ୍ୟରେ ଚାଲିଥିବା ବାର୍ତ୍ତା ଶେଷ ହୋଇଛି । ତିନି ଘଣ୍ଟା ଧରି ଚାଲିଥିବା ଆଲୋଚନାରେ କିନ୍ତୁ ଯୁଦ୍ଧ ଜାରି ରହିବ କି ବନ୍ଦ ହେବ ତାକୁ ନେଇ କୌଣସି ସହମତି ସୃଷ୍ଟି ହୋଇ ପାରିନାହିଁ । ତେବେ ଆଲୋଚନା କାଳରେ ୟୁକ୍ରେନ୍ ଋଷ ସମ୍ମୁଖରେ କ୍ରିମିୟା ଓ ଡୋନବାସରୁ ସେନା ପ୍ରତ୍ୟାହାର ପାଇଁ ଦାବି ରଖିଥିଲା । ଏହା ପୂର୍ବରୁ ୟୁକ୍ରେନ୍ ରାଷ୍ଟ୍ରପତିଙ୍କ କାର୍ଯ୍ୟାଳୟ ତରଫରୁ କୁହାଯାଇଥିଲା ଯେ, ଯୁଦ୍ଧ ବିରାମ ଓ ୟୁକ୍ରେନରୁ ଋଷୀୟ ସେନା ପ୍ରତ୍ୟାହାର ସେମାନଙ୍କ ମୁଖ୍ୟ ପ୍ରସଙ୍ଗ ରହିବ ।
ଋଷ ସୈନିକ ନିଜ ଦେଶକୁ ଫେରନ୍ତୁ
ବେଲାଋଷରେ ଆଲୋଚନା ପୂର୍ବରୁ ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଟ୍ୱିଟ୍ କରି ଋଷ ସୈନିକଙ୍କୁ ନିଜ ଦେଶକୁ ଫେରିଯିବା ପାଇଁ କହିଥିଲେ । ସେ ଲେଖିଥିଲେ ଯେ, ଋଷ ସୈନିକ ନିଜ ଜୀବନ ବଂଚାଇ ଫେରି ଯାନ୍ତୁ । ମୁଁ ଯେତେବେଳେ ରାଷ୍ଟ୍ରପତି ପଦ ପାଇଁ ନିର୍ବାଚନ ଲଢିଥିଲି ସେତେବେଳେ କହିଥିଲି ଯେ, ଆମେ ସମସ୍ତେ ରାଷ୍ଟ୍ରପତି ହେବା । କାରଣ ସମସ୍ତଙ୍କର ଦେଶ ପ୍ରତି କର୍ତ୍ତବ୍ୟ ରହିଛି । ଏବେ ସେମିତି କିଛି ଘଟୁଛି । ସମସ୍ତେ ଯୋଦ୍ଧା ଭଳି ଲଢୁଛନ୍ତି ।
ଦୁଇ ନମ୍ବର ପାଇଁ ବିଜେପି-କଂଗ୍ରେସ ଟକ୍କର
ଭୁବନେଶ୍ବର: ବିଜେପିକୁ ଜନତାଙ୍କ ଦେଲେ ଭୋଟରେ ଉତ୍ତର । ହଜି ଯାଉଥିବା କଂଗ୍ରେସକୁ ଦେଲେ ଠିକଣା । ଗାଁ ଜନାଦେଶ ବଦଳାଇ ଦେଲା ରାଜ୍ୟ ରାଜନୀତର ସମୀକରଣ । ପୂରା ରାଜ୍ୟରେ ବିଜେଡିକୁ ବିପୁଳ ଜନ ସମର୍ଥନ ମିଳିଥିବା ବେଳେ ରାଜ୍ୟବାସୀ ବିଜେପିକୁ କରିଛନ୍ତି ପ୍ରତ୍ୟାକ୍ଷାନ । ଏବେ କଂଗ୍ରେସ ଓ ବିଜେଡି ମଧ୍ୟରେ ଚାଲିଛି ଟକ୍କର କିଏ ନେବ ଦ୍ବିତୀୟ ସ୍ଥାନ ।
୨୦୨୨ ପଞ୍ଚାୟତ ଫଳାଫଳ । ରାଜ୍ୟର ଦୁଇ ଜାତୀୟ ଦଳ ପାଇଁ ଛିଡ଼ା କରିଛି ନୂଆ ଚ୍ୟାଲେଞ୍ଜ । ବିକାଶର ମହାନାୟକଙ୍କ ଲୋକପ୍ରିୟତା ଆଗରେ ହାର ମାନିଛି ଉଭୟ ଦଳର ଗେମ୍ ପ୍ଳାନ୍ । ୨୦୧୯ ସାଧାରଣ ନିର୍ବାଚନରେ ରାଜ୍ୟବାସୀ କଂଗ୍ରେସକୁ ହଟାଇ ବିଜେପିକୁ ମୁଖ୍ୟ ବିରୋଧୀ ଆସନରେ ବସାଇଥିଲେ । ମାତ୍ର ୩ବର୍ଷ ଭିତରେ ବିପଦ ମୁହଁରେ ରାଜ୍ୟ ବିଜେପି । ୨୦୨୨ ପଞ୍ଚାୟତ ନିର୍ବାଚନର ଫଳାଫଳ ଦଳୀୟ ନେତାଙ୍କୁ ଆତ୍ମସମୀକ୍ଷା କରିବାକୁ ବାଧ୍ୟ କରିଛି । ଦଳ ତିନି ଅଙ୍କ ତ ଛୁଇପାରିନି, ଏମିତିକି ଅନେକ ଜିଲ୍ଲାରେ ଦଳ ଖାତା ବି ଖୋଲି ପାରିନାହିଁ । ସେପଟେ କଂଗ୍ରେସକୁ ମଧ୍ୟ ଆଖିଦୃଶିଆ ସଫଳତା ମିଳିନି ସତ, ହେଲେ ବିଜେପିଠୁ ଆଗରେ ରହିବା ଦଳୀୟ ନେତାଙ୍କ ମଧ୍ୟରେ ଉତ୍ସାହ ଭରି ଦେଇଛି ।
ସେପଟେ ଏ ଫଳାଫଳ ଦୁଇ ଜାତୀୟ ଦଳର ରାଜନୈତିକ ଭବିଷ୍ୟତ ପାଇଁ ବଡ଼ ଆହ୍ବାନ ସୃଷ୍ଟଇ କରିଛି । ଲୋକଙ୍କ ଆସ୍ଥା ଜିତିବାକୁ ବିଜେପିକୁ ରୀତିମତ କସରତ କରିବାକୁ ପଡିବ ବୋଲି କହିଛନ୍ତି ରାଜେନୖତିକ ସମୀକ୍ଷକ । ଅନ୍ୟପକ୍ଷରେ ଘର ସଜାଡି ପାରିଲେ ଓ ସ୍ପଷ୍ଟ ନେତୃତ୍ବ ରହିଲେ କଂଗ୍ରେସ ଆହୁରି ଭଲ କରିବ ବୋଲି ପରାମର୍ଶ ଦେଇଛନ୍ତି ।
୨୨ ବର୍ଷ ଧରି ଅପରାଜେୟ ନବୀନ । ଲୋକପ୍ରିୟତାର ଶୀର୍ଷରେ ବିଜେଡି । ଏଭଳି ସ୍ଥିତିରେ ପ୍ରତି ନିର୍ବାଚନ ପରେ ଦ୍ବିତୀୟ ସ୍ଥାନ ପାଇଁ ରାଜ୍ୟରେ ଚାଲିଛି କଂଗ୍ରେସ ଓ ବିଜେପି ମଧ୍ୟରେ ପ୍ରତିଯୋଗୀତା । ହେଲେ ଏଥରର ଫଳାଫଳ ବିରୋଧୀଙ୍କୁ ଟିକେ ଅଧିକ ଚିନ୍ତାରେ ପକାଇ ଦେଇଛି ।
ୟୁକ୍ରେନରୁ ଫେରି ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଲେ ଓଡ଼ିଆ ଛାତ୍ରଛାତ୍ରୀ
ଭୁବନେଶ୍ବର: ୱେଲକମ ବ୍ୟାକ ଟୁ ଇଣ୍ଡିଆ । ଏପରି କହି ୟୁକ୍ରେନରୁ ଫେରିଥିବା ଓଡ଼ିଆ ଛାତ୍ରଛାତ୍ରୀଙ୍କୁ ସ୍ବାଗତ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ରୋମାନିଆ ସୀମାରୁ ଉଦ୍ଧାର କରି ଭାରତୀୟ ଦୂତାବାସ ଦିଲ୍ଲୀରେ ପହଞ୍ଚାଇବା ପରେ ସେମାନଙ୍କ ସହ ସିଧା ଆଲୋଚନା କରିଛନ୍ତି ନବୀନ । ପିଲାଙ୍କ ତିକ୍ତ ଅନୁଭୂତି ଶୁଣିବା ସହ ଫସିଥିବା ଅନ୍ୟ ଓଡ଼ିଆଙ୍କୁ ଉଦ୍ଧାର କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି । ସମସ୍ତ ସହାୟତା ଯୋଗାଇ ଦେଇ ସେମାନଙ୍କୁ ମରଣ ମୁହଁରୁ ଉଦ୍ଧାର କରିଥିବାରୁ ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇଛନ୍ତି ଓଡିଆ ଛାତ୍ରଛାତ୍ରୀ । କହିଛନ୍ତି, ଥ୍ୟାଙ୍କ ୟୁ ସିଏମ୍ ।
ୟୁକ୍ରେନରେ ଆତଙ୍କିତ ଓଡ଼ିଆଙ୍କ ମୁହଁରେ ହସ ଫୁଟାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ବିପଦ ସମୟରେ ସହାୟତାର ହାତ ବଢାଇବାରୁ ୱୋରଜୋନରୁ ଫେରି ଆସିଛନ୍ତି ଓଡ଼ିଆ ଛାତ୍ରଛାତ୍ରୀ । ନବୀନ ଦେଇଛନ୍ତି ଅଭୟ ଆଶ୍ବସ୍ତି । ଦିଲ୍ଲୀରେ ପହଞ୍ଚିବା ପରେ ୟୁକ୍ରେନ ଫେରନ୍ତା ଛାତ୍ରଛାତ୍ରୀଙ୍କ ସହ ସିଧା ଆଲୋଚନା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସେମାନଙ୍କ ସହ କଥା ହୋଇ ଭଲମନ୍ଦ ପଚାରି ବୁଝିଛନ୍ତି । ସେଠାରେ ସ୍ଥିତି କେମିତି ଅଛି, ଓଡ଼ିଆ ପିଲାମାନେ କେମିତି ଅଛନ୍ତି, ଫେରିଥିବା ଛାତ୍ରଛାତ୍ରୀ ମୁଖ୍ୟମନ୍ତ୍ରୀଙ୍କୁ ଜଣାଇଛନ୍ତି ।
ଆସନ୍ନ ମୃତ୍ୟୁରୁ ରକ୍ଷା ପାଇବା ପାଇଁ ଓଡ଼ିଆ ଛାତ୍ରଛାତ୍ରୀ ରାଜ୍ୟ ସରକାରଙ୍କୁ ଫେରାଇ ଆଣିବାକୁ ପଦକ୍ଷେପ ନେବାକୁ ଆକୁଳ ନିବେଦନ କରିଥିଲେ । ଅନେକ ଯନ୍ତ୍ରଣା ସହି ପୋଲାଣ୍ଡ ରୋମାନିଆ ବର୍ଡରରେ ପହଞ୍ଚିଲା ପରେ ସମସ୍ତଙ୍କୁ ଉଦ୍ଧାର କରିଥିଲା ଭାରତୀୟ ଦୂତାବାସ । ଏବେ ବି ସେଠାରେ ବହୁ ଓଡ଼ିଆ ରହିଯାଇଛନ୍ତି । ସମସ୍ତ ଛାତ୍ରଙ୍କୁ ଉଦ୍ଧାର କରାଯିବ ବୋଲି ମୁଖ୍ୟମନ୍ତ୍ରୀ ଭରସା ଦେଇଛନ୍ତି ।
ମୁଖ୍ୟମନ୍ତ୍ରୀଙ୍କ ସହ ଆଲୋଚନା ବେଳେ ଛାତ୍ରଛାତ୍ରୀ ସେମାନଙ୍କ ତିକ୍ତ ଅଭିଜ୍ଞତା ବଖାଣିଥିଲେ । ସମସ୍ତେ ରୋମାନିଆ ସୀମା ଅତିକ୍ରମ କରି ଭାରତୀୟ ଅଧିକାରୀଙ୍କ ସହିତ ବୁକାରେଷ୍ଟ ଯାଇଥିଲେ ଏବଂ ସେଠାରୁ ବିମାନ ଯୋଗେ ନୂଆଦିଲ୍ଲୀ ଆସିଥିଲେ । ନୂଆଦିଲ୍ଲୀରେ ଅବସ୍ଥାପିତ ରେସିଡେଣ୍ଟ କମିଶନର ସେମାନଙ୍କ ସହିତ ଯୋଗାଯୋଗରେ ଥିଲେ ବୋଲି ୟୁକ୍ରେନ ଫେରନ୍ତା ଓଡ଼ିଆ ଛାତ୍ର କହିଛନ୍ତି ।
ୟୁକ୍ରେନରୁ ଫେରୁଥିବା ପିଲାଙ୍କ ସୁବିଧା ପାଇଁ ମୁମ୍ବାଇ ବିମାନ ବନ୍ଦରରେ ହେଲପ ଡେସ୍କ ଖୋଲିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ଏହା ସହିତ ଭୁବନେଶ୍ୱରରେ ପହଞ୍ଚିବା ପରେ ପିଲାମାନଙ୍କୁ ଓଟିଡିସି ବସ୍ ଯୋଗେ ସେମାନଙ୍କ ଘରେ ପହଞ୍ଚାଇବା ପାଇଁ ମୁଖ୍ୟମନ୍ତ୍ରୀ ମଧ୍ୟ ନିର୍ଦ୍ଦେଶ ଦେଇଛନ୍ତି ।
ଋଷ ଆରମ୍ଭ କଲା ପରମାଣୁ ଯୁଦ୍ଧାଭ୍ୟାସ: ଧ୍ବଂସ ଦ୍ବାର ଦେଶରେ ବିଶ୍ବ
ନୂଆଦିଲ୍ଲୀ: ଧ୍ବଂସର ଦ୍ବାରଦେଶରେ ବିଶ୍ବ । ପରମାଣୁ ଯୁଦ୍ଧ ଆଡ଼କୁ ମୁହାଁଉଛି ଋଷ-ୟୁକ୍ରେନ ଯୁଦ୍ଧ । ନାଟୋ ଦେଶଙ୍କ ପରମାଣୁ ଧମକର ଇଫେକ୍ଟ ଏବେ ସାରା ବିଶ୍ବ ଦେଖିବାକୁ ଲାଗିଛି । ବର୍ତ୍ତମାନର ସବୁଠାରୁ ବଡ଼ ଆଉ ହୋସ ଉଡାଇ ଦେବା ଭଳି ଖବର ଆସି ପହଞ୍ଚିଛି ଋଷରୁ । ଗୋଟିଏ ପଟେ ବେଲାଋଷରେ ଋଷ ଓ ୟୁକ୍ରେନ ମଧ୍ୟରେ ଆଲୋଚନା ଚାଲିଥିବା ବେଳେ ଏପଟେ ଋଷ ପରମାଣୁ ଯୁଦ୍ଧାଭ୍ୟାସ ଆରମ୍ଭ କରିଦେଇଛି । ଯାହାକୁ ନେଇ ସାରା ବିଶ୍ବବାସୀଙ୍କ ନିଦ ହଜାଇ ଦେଇଛି । ଯଦି ଋଷ ଓ ୟୁକ୍ରେନ ଆଲୋଚନା ବିଫଳ ହୋଇଯାଏ ତେବେ ଆରମ୍ଭ ହୋଇପାରେ ପରମାଣୁ ଯୁଦ୍ଧ । ଯଥା ସମ୍ଭବ ବିନାଶର ଏହି ଖେଳ ୟୁକ୍ରେନ ମାଟିରୁ ଆରମ୍ଭ ହୋଇ ନିମିଷକରେ ସାରା ବିଶ୍ବକୁ ବ୍ୟାପି ଯାଇପାରେ ।
ସୂଚନାଯୋଗ୍ୟ, ରବିବାର ରାଷ୍ଟ୍ରପତି ଭ୍ଲାଦିମିର ପୁଟିନ୍ ପରମାଣୁ ବୋମା ଟିମକୁ ଆର୍ଲଟ ରହିବାକୁ ନିର୍ଦ୍ଦେଶ ଦେଇଥିଲେ । ଆଜି ଋଷ ପୂରା ଦମରେ ଆରମ୍ଭ କରିଛି ପରମାଣୁ ଯୁଦ୍ଧାଭ୍ୟାସ । ଋଷ ପ୍ରତିରକ୍ଷା ମନ୍ତ୍ରୀ ଜେନେରାଲ ସରଗେଇ ସୋଇଗୁ ରାଷ୍ଟ୍ରପତି ପୁଟିନଙ୍କୁ ସୂଚନା ଦେଇଛନ୍ତି ।
ଋଷର ଉତ୍ତର ଓ ପ୍ରଶାନ୍ତ ମହାସାଗର ଅଞ୍ଚଳର ମିଜାଇଲ କମାଣ୍ଡକୁ ହାଇ ଆର୍ଲଟରେ ରଖାଯାଇଥିବା ରକ୍ଷା ମନ୍ତ୍ରାଳୟ ପକ୍ଷରୁ ଦାବି କରାଯାଇଛି ।
ଅନ୍ୟପକ୍ଷରେ ପଡୋଶୀ ତଥା ସହଯୋଗୀ ବେଲାଋଷରେ ଋଷ ପରମାଣୁ ବୋମା ମୁତୟନ କରିପାରେ । ଏହି ଖବର ମିଳିବା ପରେ ବେଲାଋଷକୁ ନେଇ ୟୁରୋପିୟନ ୟୁନିୟନ ପକ୍ଷରୁ ଆର୍ଲଟ୍ ଜାରି କରାଯାଇଛି ।
ସୂଚନାଯୋଗ୍ୟ, ଯୁଦ୍ଧ ଆରମ୍ଭ ହେବା ଦିନରୁ ରାଷ୍ଟ୍ରପତି ପୁଟିନ୍ ନାଟୋ ଦେଶଙ୍କୁ ପରମାଣୁ ଯୁଦ୍ଧର ଧମକ ଦେଇ ଆସିଛନ୍ତି । ଗତ ଗୁରୁବାର ପୁଟିନ ୟୁକ୍ରେନକୁ ସମର୍ଥନ କରୁଥିବା ଦେଶଙ୍କୁ ଧମକ ଦେଇ କହିଥିଲେ- ୟୁକ୍ରେନ ବିବାଦରେ ଯଦି କୌଣସି ବାହାର ଦେଶ ମୁଣ୍ଡ ପୂରାଇବ ତେବେ ସେ ଏମିତି ପରିଣାମ ଭୋବିଗ ଯେ ଇତିହାସ ମନେ ରଖିବ । ଯାହା କେବେ କେହି ଦେଖିଛନ୍ତି ନା ଆଗକୁ ଦେଖିବେ । ଏହାର ଜବାବରେ ଫ୍ରାନ୍ସ ପକ୍ଷରୁ କୁହାଯାଇଥିଲା, ‘ଋଷ ଏହା ଭୁଲିବା ଉଚିତ ନୁହେଁ ଯେ, ନାଟୋ ଦେଶଙ୍କ ପାଖରେ ବି ପରମାଣୁ ବୋମା ରହିଛି ।’
ପଞ୍ଚାୟତ ଫଳାଫଳ: ବିଜେଡିକୁ ରେକର୍ଡ ବ୍ରେକିଂ ଜନମତ
ଭୁବନେଶ୍ବର: ୨୦୨୨ ପଞ୍ଚାୟତ ନିର୍ବାଚନର ଭୋଟ ଗଣତି ଯେତେ ସରି ସରି ଆସୁଛି ବିଜେଡି ସେତେ ଆଗେଇ ଚାଲିଛି । ୨୦୧୨ ପଞ୍ଚାୟତ ନିର୍ବାଚନରେ ବିଜେଡି ପାଇଥିବା ସଫଳତାର ରେକର୍ଡକୁ ନିଜେ ଭାଙ୍ଗି ସାରିଛି । ସାରା ରାଜ୍ୟର କୋଣ ଅନୁକୋଣରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସ୍ବଚ୍ଛ ଓ ନିର୍ମଳ ଶାସନ ଓ ବିକାଶମୂଳକ ଯୋଜନାକୁ ମିଳିଛି ଜନ ସମର୍ଥନ ।
ବର୍ତ୍ତମାନ ସୁଦ୍ଧା ୮୫୨ ଜିଲ୍ଲା ପରିଷଦ ଜୋନରୁ ୮୫୧ ଜୋନର ଫଳାଫଳ ଆସୁଛି । ୭୬୨ ଜୋନରେ ବିଜେଡି ଆଗରେ ଚାଲିଛି । ଏଥିମଧ୍ୟରୁ ୫୪୩ ଆସନରେ ବିଜେଡି ବିଜୟ ବାନା ଉଡାଇ ସାରିଛି । ବାକି ଆସନରେ ବିଜେଡି ପ୍ରତିପକ୍ଷଙ୍କଠାରୁ ବହୁ ଆଗରେ ଚାଲିଛି ।
ଅନ୍ୟପକ୍ଷରେ ଦୁଇ ଜାତୀୟ ଦଳ ବିଜେପି ଓ କଂଗ୍ରେସ ହାପ ସେଞ୍ଚୁରୀ ମାରିବାକୁ ମଧ୍ୟ ସକ୍ଷମ ହୋଇନାହାନ୍ତି । ୨୦୧୭ ନିର୍ବାଚନରେ ଅପ୍ରତ୍ୟାଶିତ ସଫଳତା ପାଇ ୨୫୦ରୁ ଜିଲ୍ଲା ପରିଷଦ ଜୋନ ଜିତିଥିବା ବିଜେପି ମାଟି କାମୁଡ଼ି ପଡିଛି । ବର୍ତ୍ତମାନ ସୁଦ୍ଧା ବିଜେପି ୩୧ଟି ଆସନରେ ବିଜୟୀ ହୋଇଥିବା ବେଳେ ୧୫ଟି ଆସନରେ ଆଗରେ ଚାଲିଛି । ବିଜେପିର ମିଛ, ଛଳନା, ଅହଂକାରର ଉତ୍ତର ଓଡ଼ିଶାବାସୀ ବାଲାଟ ପେପରରେ ଦେଇଛନ୍ତି ।
କଂଗ୍ରେସ କଥା ନକହିବା ଭଲ । ସର୍ବ ପୁରାତନ ଜାତୀୟ ଦଳ କଂଗ୍ରେସ ପରାଜୟ ପରେ ପରାଜୟର ସମ୍ମୁଖୀନ ହେଉଥିଲେ ବି ଏଥିରୁ କିଛି ଶିଖିବା ଭଳି ମନେ ହେଉନାହିଁ । ଓଡ଼ିଶାରେ ଅସ୍ତିତ୍ବ ହରାଇବାକୁ ବସିଥିବା ଏହି ଜାତୀୟ ଦଳ ୪୬ଟି ଜୋନରେ ଆଗରେ ରହିଛି । ଏଥିରୁ ୩୧ଟିରେ ବିଜୟୀ ହୋଇଛି । ଅନ୍ୟପକ୍ଷରେ ଅନ୍ୟମାନଙ୍କ ଖାତାକୁ ୭ଟି ଆସନ ଯାଇଛି ।
୨୦୧୨ ମସିହା ପଞ୍ଚାୟତ ନିର୍ବାଚନରେ ବିଜେଡି ସର୍ବାଧିକ ୬୫୧ ଜିଲ୍ଲା ପରିଷଦ ଆସନରେ ବିଜୟ ହୋଇଥିଲା । ଜନତା ପୁଣି ଥରେ ନବୀନ ପଟ୍ଟନାୟକଙ୍କୁ ଅଦ୍ଭୁତପୂର୍ବ ସମର୍ଥନ ଦେଇ ଏହି ରେକର୍ଡକୁ ଭାଙ୍ଗି ଦେଇଛନ୍ତି । ଓଡ଼ିଶାବାସୀଙ୍କ ଏହି ଜନମତ ପ୍ରମାଣିତ କରିଦେଇଛି ‘ବିକାଶ ଯେଉଁଠି, ଭୋଟ୍ ସେଇଠି ।’ ୨୨ ବର୍ଷ ଶାସନରେ ଗୋଟିଏ ପରେ ଗୋଟିଏ ରେକର୍ଡ ଭାଙ୍ଗିଛି ବିଜେଡି । ଚଳିତ ଜନମତରେ ସବୁଠୁ ବଡ଼ ପଞ୍ଚାୟତ ସ୍କୋର କରିବାକୁ ଯାଉଛି ବିଜେଡି । ବିରୋଧୀ ଆଖପାଖରେ ନାହାନ୍ତି । ଏପରିକି ୫୦ ଅଙ୍କ ଛୁଇଁବାକୁ ଘୋଡାଡି ହେଉଛନ୍ତି ବିଜେପି ଓ କଂଗ୍ରେସ ।
ଶିକ୍ଷୟିତ୍ରୀଙ୍କୁ ଜାତୀୟ ପୁରସ୍କାର
ଭୁବନେଶ୍ବର: ଶିକ୍ଷକତା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଜଗତସିଂହପୁର ଜିଲ୍ଲା ରାହାମା ଜବାହର ନବୋଦୟ ବିଦ୍ୟାଳୟର ଶିକ୍ଷୟିତ୍ରୀ ପ୍ରମିଳା ସାହୁଙ୍କୁ ମିଳିଛି ଜାତୀୟ ଆଇସିଟି ପୁରସ୍କାର । ନୂଆଦିଲ୍ଲୀସ୍ଥିତ ଆମ୍ବେଦକର ଇଣ୍ଟରନ୍ୟାସନାଲ ସେଣ୍ଟରର ନାଳନ୍ଦା ଅଡିଟୋରିୟମରେ ଆୟୋଜିତ ସ୍ବତନ୍ତ୍ର ଉତ୍ସବରେ କେନ୍ଦ୍ର ଶିକ୍ଷା ମନ୍ତ୍ରୀ ଅନ୍ନପୂର୍ଣ୍ଣା ଦେବୀ ଏହି ପୁରସ୍କାର ପ୍ରଦାନ କରିଥିଲେ । ୨୦୧୮ ମସିହା ପାଇଁ ସେ ସର୍ବଭାରତୀୟସ୍ତରରେ ଜବାହର ନବୋଦୟ ସମିତି ପକ୍ଷରୁ ଏକମାତ୍ର ଶିକ୍ଷକ ଭାବେ ଏ ପୁରସ୍କାର ପାଇଁ ମନୋନୀତ ହୋଇଥିଲେ । ତାଙ୍କର ଏ ସଫଳତା ପାଇଁ ବିଭିନ୍ନ ମହଲରୁ ତାଙ୍କ ଛୁଟିଛି ଅଭିନନ୍ଦନର ସୁଅ ।
ବିଜ୍ଞାନ ଶିକ୍ଷୟିତ୍ରୀ ଭାବେ ଶ୍ରେଣୀକକ୍ଷରେ ସୂଚନା ଓ ପ୍ରଯୁକ୍ତି ବିଦ୍ୟାର ପ୍ରୟୋଗ କରି କିଭଳି ଛାତ୍ରଛାତ୍ରୀଙ୍କୁ ଆହୁରି ବୋଧଗମ୍ୟ ଭାବେ ଶିକ୍ଷାଦାନ କରିହେବ ସେ ଦିଗରେ ଶ୍ରୀମତୀ ସାହୁଙ୍କ ନିଷ୍ଠା ଓ ପରିଶ୍ରମକୁ ବିଚାରକୁ ନେଇ କେନ୍ଦ୍ର ଶିକ୍ଷା ମନ୍ତ୍ରଣାଳୟ ଓ ଏନସିଇଆରଟି ପକ୍ଷରୁ ତାଙ୍କୁ ଏ ପୁରସ୍କାର ପ୍ରଦାନ କରାଯାଇଛି । ମହାମାରୀ କରୋନା କାଳରେ ସୂଚନା ଓ ପ୍ରଯୁକ୍ତି ବିଦ୍ୟାର ସହାୟତାରେ ସରଳ ପ୍ରଣାଳୀରେ ପାଠପଢ଼ାକୁ ସେ ସମ୍ଭବ କରାଇପାରିଥିଲେ । ନୂଆ ଜ୍ଞାନ କୌଶଳରେ କିଭଳି ପିଲାମାନଙ୍କୁ ଭିନ୍ନ ଢଙ୍ଗରେ ଶିକ୍ଷାଦାନ କରି ହେବ ସେଥିପ୍ରତି ସେ ଯତ୍ନବାନ । ଏ ପୁରସ୍କାର ତାଙ୍କୁ ଉତ୍ସାହ ଓ ପ୍ରେରଣା ଦେଇଛି । ଏହାସହ ତାଙ୍କ ଦାୟିତ୍ବ ମଧ୍ୟ ଅଧିକ ବଢ଼ିଛି । ସମର୍ପଣ ଭାବନା ନେଇ ସେ ଶିକ୍ଷାଦାନରେ ଅଧିକ ବ୍ରତୀ ହେବେ ବୋଲି ପ୍ରମିଳା କହିଛନ୍ତି । ଜାତୀୟସ୍ତରରେ ତାଙ୍କର ଏ ସଫଳତା ମହାପ୍ରଭୁ ଶ୍ରୀ ଜଗନ୍ନାଥଙ୍କ ଆଶୀର୍ବାଦ । ଏଥିପାଇଁ ସେ ନବୋଦୟ ସମିତି, ସ୍କୁଲର ଅଧ୍ୟକ୍ଷ, ଉପାଧ୍ୟକ୍ଷ ଓ ସମସ୍ତ ସହଯୋଗୀ, ସ୍ବାମୀ ଆଇନଷ୍ଟାଇନ ଏକାଡେମୀ ଅଫ ଟେକନୋଲୋଜି ଆଣ୍ଡ ମ୍ୟାନେଜମେଣ୍ଟ ଅଧ୍ୟକ୍ଷ ଡ. ଶୁଭେନ୍ଦୁ ସାହୁ, ଶ୍ବଶୁର ତଥା ରାଷ୍ଟ୍ରପତି ପୁରସ୍କାରପ୍ରାପ୍ତ ଶିକ୍ଷକ ଉଦୟନାଥ ସାହୁ, ପିତା ଗୌରଚରଣ ସାହୁ ଓ ପରିବାର ସଦସ୍ୟଙ୍କ ପ୍ରେରଣାକୁ ଶ୍ରେୟ ଦେଇଛନ୍ତି ।
ବାବା ଆଖଣ୍ଡଳମଣିଙ୍କ ଜାଗରଯାତ୍ରା ନୀତିକାନ୍ତି
ଆରଡି: ଆସନ୍ତାକାଲି ବାବା ଆଖଣ୍ଡଳମଣୀଙ୍କ ଜାଗର ଯାତ୍ରା । ବାବାଙ୍କ ନୀତିକାନ୍ତି କେତେ ବେଳେ ହେବ ଓ ମହାଦୀପ କେତେ ବେଳେ ଉଠିବ ତାହାର ଚୂଡ଼ାନ୍ତ ଚିଠା ମନ୍ଦିର ପ୍ରଶାସନ ପକ୍ଷରୁ ପ୍ରକାଶ କରାଯାଇଛି ।
ମଙ୍ଗଳବାର ଭୋର ୪ଟାରେ ହେବ ବାବାଙ୍କ ମଙ୍ଗଳବାର ଆଳତି । ୪ଟା ୩୦ ମିନିଟରେ କନିକା ରାଜାଙ୍କର ପହିଲି ଘର୍ଷଣଲାଗି ହେବ । ସକାଳ ୫ଟାରେ ପାଳିଆ ସେବାୟତଙ୍କ ପକ୍ଷରୁ ଖେଚୁଡ଼ି ଅନ୍ନନୀତି ଭୋଗ ଲାଗି ହେବ । ସକାଳ ୫ଟାରୁ ୧୧ଟା ପର୍ଯ୍ୟନ୍ତ ସର୍ବସାଧାରଣ ବାବାଙ୍କ ଦର୍ଶନ କରିପାରିବେ ।
ସନ୍ଧ୍ୟା ୬ଟାରେ ପ୍ରଥମ ପ୍ରହର ଘର୍ଷଣଲାଗି, ଜଳାଭିଷେକ, ପଞ୍ଚ ଉପଚାର ପୂଜା କରାଯିବ । ସନ୍ଧ୍ୟା ୮ଟାରେ ଦ୍ବିତୀୟ ପ୍ରହର ଘର୍ଷଣଲାଗି, ଜଳାଭିଷାକ, ମଧୁସ୍ନାନ, ପଞ୍ଚ ଉପଚାର ପୂଜା ନୀତି ସମ୍ପନ୍ନ ହେବ । ରାତି ୧୦ଟାରେ ତୃତୀୟ ପ୍ରହର ଘର୍ଷଣଲାଗି, ଜଳାଭିଷେକ, ଦୁଗ୍ଧସ୍ନାନ, ପଞ୍ଚ ଉପଚାର ରୀତି ହେବ । ସେହିପରି ରାତି ୧୧ଟାରେ ବାବାଙ୍କ ଚତୁର୍ଥ ପ୍ରହର ପୂଜା, ଘୃତସ୍ନାନ, ଘର୍ଷଣଲାଗି, ୧୦୮ କଳସ ଜଳଲାଗି, ପଞ୍ଚ ଉପଚାର ପୂଜା ସମ୍ପନ୍ନ ହେବ ।
ରାତି ୧୨ଟାରେ ମଣିବାବାଙ୍କ ସୁନାବେଶ ଆରମ୍ଭ ହେବ । ରାତି ଗୋଟାଏ ୩୦ରେ ବାବାଙ୍କ ସୁନାବେଶ ସମ୍ପନ୍ନ ଓ ସର୍ବସାଧାରଣ ଦର୍ଶନ ଆରମ୍ଭ ହେବ । ରାତି ୨ଟାରେ ମହାଦୀପ ପ୍ରସ୍ତୁତି ହେବ । ରାତି ୩ଟା ୧୫ ମିନିଟରେ ମହାଦୀପ ଷୋଡଶ ଉପଚାରରେ ପୂଜା ପ୍ରତିଷ୍ଠା, ଅଗ୍ନି ସଂଯୋଗ, ଯଜ୍ଞ ଆରମ୍ଭ । ଭୋର ୪ଟାରେ ମହାଦୀପ ବେଢା ପରିକ୍ରମା କରିବ । ଭୋର ୪ଟା ୩୦ରୁ ୫ଟା ମଧ୍ୟରେ ମହାଦୀପ ମନ୍ଦିର ଚୂଡ଼ାରେ ସ୍ଥାପନ ହେବ ।