ଲକ୍ଷ୍ନୌ: ଆସନ୍ତା ୧୪ ତାରିଖରେ ଉତ୍ତରପ୍ରଦେଶରେ ହେବ ଦ୍ବିତୀୟ ପର୍ଯ୍ୟାୟ ମତଦାନ । ରାଜ୍ୟର ୯ ଜିଲ୍ଲାରେ ୫୫ ସିଟ ପାଇଁ ଭୋଟ ଗ୍ରହଣ କରାଯିବ । ସାହାରନପୁର, ବିଜନୌର, ଅମରୋହା, ମୁରାଦାବାଦ୍, ରାମପୁର, ସମ୍ଭଲ, ବରେଲି, ବଦାୟୁଁ ଓ ସାହାଜହାନପୁରରେ ହେବ ଦ୍ବିତୀୟ ପର୍ଯ୍ୟାୟ ଭୋଟ । ୫୫ ଆସନ ପାଇଁ ମଇଦାନରେ ଅଛନ୍ତି ୫୮୬ ପ୍ରାର୍ଥୀ । ମୋଟ ୫୮୬ ପ୍ରାର୍ଥୀଙ୍କ ମଧ୍ୟରେ ୬୯ ଜଣ ମହିଳା ପ୍ରାର୍ଥୀ ଅଛନ୍ତି । ଏଡିଆର୍ ରିପୋର୍ଟ ମୁତାବକ, ୫୮୬ ପ୍ରାର୍ଥୀଙ୍କ ମଧ୍ୟରୁ ୧୪୭ ଜଣଙ୍କ ବିରୋଧରେ ଅପରାଧିକ ମାମଲା ରହିଛି । ସେମାନଙ୍କ ମଧ୍ୟରୁ ୧୧୩ ଜଣଙ୍କ ନାଁ ଗମ୍ଭୀର ଅପରାଧିକ ମାମଲା ରହିଛି । ସମାଜବାଦୀ ପାର୍ଟିର ୫୨ ପ୍ରାର୍ଥୀଙ୍କ ମଧ୍ୟରୁ ୩୫ ଜଣଙ୍କ ନାଁରେ ମାମଲା ରହିଛି । କଂଗ୍ରେସର ୫୪ ପ୍ରାର୍ଥୀଙ୍କ ମଧ୍ୟରୁ ୨୩ ଜଣ ଓ ବିଜେପିର ୫୩ ପ୍ରାର୍ଥୀଙ୍କ ମଧ୍ୟରୁ ୧୮ ଜଣଙ୍କ ନାଁରେ ମାମଲା ରହିଥିବା ସେମାନେ ସତ୍ୟପାଠରେ ଦର୍ଶାଇଛନ୍ତି । ଅନ୍ୟପଟେ ୫୮୬ ପ୍ରାର୍ଥୀଙ୍କ ମଧ୍ୟରୁ ୨୬୦ ଜଣ କୋଟିପତି ପ୍ରାର୍ଥୀ । ଗତକାଲି ୟୁପିର ପ୍ରଥମ ପର୍ଯ୍ୟାୟ ମତଦାନ ସରିଛି । ପ୍ରଥମ ପର୍ଯ୍ୟାୟରେ ୬୧ ପ୍ରତିଶତ ଭୋଟିଂ ହୋଇଛି । ଆସନ୍ତା ମାର୍ଚ୍ଚ ୧୦ ତାରିଖରେ ହେବ ଭୋଟ ଗଣତି ।
ପ୍ରଥମ ଥର ପାଇଁ ପୌର ଭୋଟରେ ରହିବ NOTA
ଭୁବନେଶ୍ୱର: ରାଜ୍ୟରେ ଫେବ୍ରୁଆରୀ ୧୬ରୁ ଆରମ୍ଭ ହେବାକୁ ଯାଉଛି ପଞ୍ଚାୟତ ଭୋଟ । ପାଞ୍ଚଟି ପର୍ଯ୍ୟାୟରେ ହେବାକୁ ଯାଉଛି ମତଦାନ । ପଞ୍ଚାୟତ ନିର୍ବାଚନ ପରେ ରାଜ୍ୟରେ ହେବ ପୌର ନିର୍ବାଚନ । ପ୍ରଥମ ଥର ପାଇଁ ଚଳିତ ପୌର ଭୋଟରେ ରହିବ NOTA । ଏନେଇ ରାଜ୍ୟ ନିର୍ବାଚନ କମିଶନଙ୍କ ପକ୍ଷରୁ ନୋଟିସ ଜାରି ହୋଇଛି । ପ୍ରାର୍ଥୀ ନା ପସନ୍ଦ ହେଲେ NOTAରେ ଭୋଟ ଦେଇପାରିବେ ଭୋଟର । ପୂର୍ବରୁ ବିଧାନସଭା ଓ ଲୋକସଭା ନିର୍ବାଚନ ପାଇଁ ରହୁଥିଲା NOTA । ତେବେ ପ୍ରଥମ ଥର ପାଇଁ ପୌର ଭୋଟରେ ରହିବ NOTA । ସମ୍ବିଧାନର ଧାରା 243-ZA ଅନୁଯାୟୀ ଏହି ବ୍ୟବସ୍ଥା ଲାଗୁ ହେବ ।
ତେବେ ଆଗକୁ ହେବାକୁ ଥିବା ପୌର ନିର୍ବାଚନ ପାଇଁ ଗତକାଲି ରାଜ୍ୟ ନିର୍ବାଚନ କମିଶନ ସର୍ବଦଳୀୟ ବୈଠକ ଡାକିଥିଲେ। ଏହି ବୈଠକରେ ଏଥର ପୌର ନିର୍ବାଚନରେ ଇଭିଏମ୍ର ବ୍ୟବହାର କରାଯିବ ବୋଲି କୁହାଯାଇଥିଲା । ଏଥିସହି ଚଳିତ ପୌର ନିର୍ବାଚନ ଲଢ଼ିବାକୁ ଥିବା ଆଶାୟୀଙ୍କୁ ପ୍ରାର୍ଥିପତ୍ର ଦାଖଲ ବେଳେ ସତ୍ୟପାଠ ମଧ୍ୟ ଦାଖଲ କରିବାକୁ ପଡ଼ିବ। ଏହା ସହିତ ପୌର ନିର୍ବାଚନରେ ପ୍ରାର୍ଥୀମାନେ କେତେ ଅର୍ଥ ଖର୍ଚ୍ଚ କରିପାରିବେ, ସେ ସଂପର୍କରେ ସମସ୍ତ ରାଜନୀତିକ ଦଳର ପ୍ରତିନିଧିମାନଙ୍କୁ ଅବଗତ କରାଇଥିଲେ ରାଜ୍ୟ ନିର୍ବାଚନ କମିଶନର।
ହିଜାବକୁ ବିରୋଧ: ଆଲିଗଡରୁ ମାଲେଗାଓଁ, ବୁର୍ଖା ପିନ୍ଧା ମହିଳାଙ୍କ ପ୍ରଦର୍ଶନ
ବେଙ୍ଗାଲୁରୁ: କର୍ଣ୍ଣାଟକର ଉଡ୍ଡପୀରୁ ଆରମ୍ଭ ହୋଇଥିବା ହିଜାବ ବିବାଦ ଥିରେ ଧିରେ ଧିରେ ପୂରା ଦେଶରେ ବ୍ୟାପିବାରେ ଲାଗିଛି । ଉତ୍ତର ପ୍ରଦେଶର ଆଲିଗଡରୁ ମହାରାଷ୍ଟ୍ରର ମାଲେଗାଓଁ ପର୍ଯ୍ୟନ୍ତ ମହିଳା ହିଜାବ ସମର୍ଥନରେ ରାସ୍ତାକୁ ଓହ୍ଲାଇ ବିରୋଧ ପ୍ରଦର୍ଶନ କରୁଛନ୍ତି । ବୁର୍ଖା ପିନ୍ଧି ପ୍ରଦର୍ଶନରେ ସାମିଲ ହେବା ସହ ବ୍ୟାନର ପୋଷ୍ଟରରେ ହିଜାବକୁ ସମର୍ଥନ ଜଣାଇଛନ୍ତି । ଶୁକ୍ରବାର ୟୁପିର ଆଲିଗଡ଼ ମୁସଲିମ ମହିଳା ହିଜାବ ସମର୍ଥନରେ ପ୍ରଦର୍ଶନ କରିବା ସହ ‘ହିଜାବ ଆମର ଅଧିକାର, ଏହାକୁ ଓହ୍ଲାଇବୁନି’ ବୋଲି ନାରା ଦେଇଛନ୍ତି ।
ଏହା ପୂର୍ବରୁ ଗୁରୁବାର ମହାରାଷ୍ଟ୍ରର ମାଲେଗାଓଁରେ ହଜାର ହଜାର ସଂଖ୍ୟାରେ ମୁସଲିମ ମହିଳା ବିରୋଧ ପ୍ରଦର୍ଶନ କରିଥିଲେ । ଏହି ସମୟରେ ସେମାନେ ‘ହିଜାବ ଆମର ଅଧିକାର, ହିଜାବ ଉପରୁ ପ୍ରତିବନ୍ଧ ହଟାଅ’ ନାରା ଦେଇଥିଲେ । ଏହାସହ ଶୁକ୍ରବାର ମାଲିଗାଓଁରେ ହିଜାବ ଡେ’ ପାଳନ କରିବେ ବୋଲି ଚେତାବନୀ ଦେଇଥିଲେ । ମାଲେଗାଓଁରେ ବିରୋଧ ପ୍ରଦର୍ଶନ ଜମିୟତ-ଉଲେମା-ଏ-ହିନ୍ଦ ନାମକ ସଙ୍ଗଠନ କରିଥିଲା । ପ୍ରଦର୍ଶନ ପରେ ପୋଲିସ ସଙ୍ଗଠନର ୪ ଜଣ ସଦସ୍ୟଙ୍କ ବିରୋଧରେ ଧାରା ୧୪୪ ଉଲ୍ଲଂଘନ ଅଭିଯୋଗରେ ମାମଲା ରୁଜୁ କରିଛି । ଏହି ମାମଲାରେ ଏଆଇଏମଆଇଏମର ସ୍ଥାନୀୟ ବିଧାୟକଙ୍କୁ ବି ନୋଟିସ୍ କରାଯାଇଛି । ପ୍ରଦର୍ଶନରେ ବିଧାୟକ ସାମିଲ ହେବା ଭାଷଣ ଦେବା ଅଭିଯୋଗ ହୋଇଛି ।
ଜମ୍ମୁ-କାଶ୍ମୀରରେ ହିଜାବକୁ ବିରୋଧ
ଜମ୍ମୁ ଓ କାଶ୍ମୀରରେ ମଧ୍ୟ ହିଜାବ ବିରୋଧରେ ପ୍ରଦର୍ଶନ ଦେଖିବାକୁ ମିଳିଛି । ଜମ୍ମୁର ଆରଏଫଏ-ଡୋଗରା ଫ୍ରଣ୍ଟ କାର୍ଯ୍ୟାଳୟ କର୍ମଚାରୀ ହିଜାବ ବିରୋଧରେ ପ୍ରଦର୍ଶନ କରିଛନ୍ତି । ଶିକ୍ଷାନୁଷ୍ଠାନ ରାଜେନୖତିକ ଯୁଦ୍ଧକ୍ଷେତ୍ର ହେବା ଉଚିତ ନୁହେଁ ବୋଲି ଏମାନେ କହିଛନ୍ତି । ସ୍କୁଲରେ ହିଜାବ କି ଗେରୁଆ ପୋଷାକକୁ ଅନୁମତି ନଦେବାକୁ ଏମାନେ ଦାବି କରିଛନ୍ତି ।
ତ୍ବରିତ ବିଚାର ପାଇଁ ମନା କଲେ ସୁପ୍ରିମକୋର୍ଟ
୨୦୨୨ ଜାନୁଆରୀ ୧ ତାରିଖରେ କର୍ଣ୍ଣାଟକର ଉଡ୍ଡପୀ ଜିଲ୍ଲାର ମହିଳା ପ୍ରି-ୟୁନିଭର୍ସିଟି କଲେଜରୁ ଏହି ବିବାଦ ଆରମ୍ଭ ହୋଇଛି । ଏଠାରେ ମୁସଲିମ ଛାତ୍ରୀଙ୍କୁ ହିଜାବ ପିନ୍ଧି ଆସିବାକୁ ମନା କରାଯାଇଥିଲା । ଯାହାର ବିରୋଧ ମୁସଲିମ ଛାତ୍ରୀ କରିଥିଲେ । ଯାହା ଧିରେ ଧିରେ ରାଜ୍ୟର ଅନ୍ୟ ସ୍ଥାନକୁ ବ୍ୟାପିଥିଲା ଓ ଅନ୍ୟ କଲେଜରେ ବି ମୁସଲିମ ଛାତ୍ରୀ ହିଜାବ ପିନ୍ଧି ଆସିବା ଆରମ୍ଭ କରିଥିଲେ ।
ଏବେ କର୍ଣ୍ଣାଟକ ହାଇକୋର୍ଟରେ ମାମଲାର ବିଚାର ଚାଲିଛି । ରାୟ ନଆସିବା ପର୍ଯ୍ୟନ୍ତ ଧାର୍ମିକ ପୋଷାକ ପିନ୍ଧି ଶିକ୍ଷାନୁଷ୍ଠାନ ନଆସିବାକୁ ନିର୍ଦ୍ଦେଶ ଦେଇଛନ୍ତି । ସୁପ୍ରିମକୋର୍ଟରେ ମଧ୍ୟ ଏହାକୁ ନେଇ କିଛି ସଂଗଠନ ମାମଲା ଆବେଦନ କରି ତ୍ବରିତ ବିଚାର କରିବାକୁ ନିବେଦନ କରିଥିଲେ । ହେଲେ ସୁପ୍ରିମକୋର୍ଟ ମାମଲାର ତ୍ବରିତ ବିଚାର କରିବାକୁ ମନା କରିଦେଇଛନ୍ତି ।
ଆମେରିକୀୟ ନାଗରିକଙ୍କୁ ଚେତାବନୀ ଦେଲେ ବାଇଡେନ, କହିଲେ ’ଶୀଘ୍ର ୟୁକ୍ରେନ ଛାଡ’
ନୂଆଦିଲ୍ଲୀ: ୟୁରୋପରେ ଯୁଦ୍ଧର କଳାବାଦଲ । ଶାନ୍ତି ପ୍ରତିଷ୍ଠା ଲାଗି ସମସ୍ତ ଆଲୋଚନା ବିଫଳ ହେବା ପରେ ଆସନ୍ନ ଯୁଦ୍ଧସ୍ଥିତିରେ ୟୁକ୍ରେନ ସଙ୍କଟ । ୟୁକ୍ରେନରୁ ତୁରନ୍ତ ଆମେରିକୀୟମାନେ ବ୍ୟାବସାୟିକ ବା ଘରୋଇ ବିମାନରେ ସ୍ବଦେଶ ଫେରି ଆସିବାକୁ ଆମେରିକା ନିର୍ଦ୍ଦେଶ ଦେଇଛି । ୟୁକ୍ରେନରେ ଥିବା ଆମେରିକୀୟ ନାଗରିକଙ୍କୁ ତୁରନ୍ତ ୟୁକ୍ରେନ ଛାଡିବାକୁ ଚେତାବନୀ ଦେଇଛନ୍ତି ଆମେରିକା ରାଷ୍ଟ୍ରପତି ଜୋ ବାଇଡେନ । ତେଣେ ୟୁକ୍ରେନର ସମସ୍ତ ସାମୁଦ୍ରିକ ପଥକୁ ଅବରୋଧ କରିଛି ଋଷ । ଏହାସହ ଆସନ୍ତା ସପ୍ତାହରେ ନୌସେନାର ସମରାଭ୍ୟାସ ଲାଗି ଋଷର ଯୋଜନା ଯୁଦ୍ଧର ଆଶଙ୍କାକୁ ଅଧିକ ଘନୀଭୂତ କରିଛି ।
ୟୁକ୍ରେନର ଆଜୋଭ ସମୁଦ୍ରକୁ ଋଷ ସମ୍ପୂର୍ଣ୍ଣ କବଜା କରିଥିବାବେଳେ କୃଷ୍ଣସାଗରର ମୁଖ୍ୟ ସାମୁଦ୍ରିକ ପଥକୁ ଅବରୋଧ କରିଛି । ୟୁକ୍ରେନର ଅଧିକାଂଶ ବନ୍ଦର ଏବେ ଅଚଳ ହେବା ଆଶଙ୍କା ଦେଖାଦେଇଛି । ପିଭଦେନି, କୋର୍ନୋମସ୍କ, ଖେର୍ସନ, ମରିପଲ ଓ ବେର୍ଦିନସ୍କ ବନ୍ଦରରୁ ୟୁକ୍ରେନ ପର୍ଯ୍ୟାପ୍ତ ସୂର୍ଯ୍ୟମୁଖୀ ତେଲ, ଇସ୍ପାତ, ଶସ୍ୟ ଆଦି ରପ୍ତାନି କରୁଥିବା ବେଳେ ଯୁଦ୍ଧ ସଙ୍କଟରେ ଏହା ଗୁରୁତର ପ୍ରଭାବିତ ହେବା ଆଶଙ୍କା ଦେଖାଦେଇଛି । ଅନ୍ୟପକ୍ଷରେ ବିବାଦୀୟ କ୍ରିମିଆ ଅଞ୍ଚଳରେ ଋଷ ମୁତୟନ କରିଛି ୬ଟି ଯୁଦ୍ଧଜାହାଜ । ୨୦୧୪ରେ ୟୁକ୍ରେନଠାରୁ କ୍ରିମିଆକୁ ଛଡାଇ ନେଇ ଋଷ ଏଠାରେ ନିଜର ଅଧିକାର ସାବ୍ୟସ୍ତ କରିଆସୁଛି । ଏହା କୌଶଳଗତ ଭାବେ ମଧ୍ୟ ଗୁରୁତ୍ବପୂର୍ଣ୍ଣ ଅଞ୍ଚଳ । କ୍ଷେପଣାସ୍ତ୍ର ପ୍ରୟୋଗ ସମରାଭ୍ୟାସ ଓ ଫାୟାରିଂ ଡ୍ରିଲ ହେବାକୁ ଯାଉଥିବାରୁ ସମସ୍ତ ଉପକୂଳ ଅଞ୍ଚଳରେ ଆଲର୍ଟ ଜାରି କରିଛି ଋଷ ।
ୟୁକ୍ରେନ ବୈଦେଶିକ ମନ୍ତ୍ରୀ ଦିମିତ୍ରୋ କୁଲେବା ଅଭିଯୋଗ କରିଛନ୍ତି ଯେ, ଋଷର ସମୁଦ୍ର ଅବରୋଧ ଯୋଗୁ ତାଙ୍କ ଦେଶ ଗଭୀର ସମସ୍ୟାରେ ଉପନୀତ ହୋଇଛି । ଆମେରିକା ରାଷ୍ଟ୍ରପତି ଜୋ ବାଇଡେନ, ଋଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ଜର୍ମାନୀ ଚାନସେଲର ଓ ଫ୍ରାନ୍ସ ରାଷ୍ଟ୍ରପତି ଯୁଦ୍ଧ ଟାଳିବା ଲାଗି ଶେଷ ପ୍ରୟାସ କରିଥିଲେ ବି ସମାଧାନର ବାଟ ବାହାରି ପାରିନାହିଁ । ସେପଟେ ବେଲାଋଷ ସହ ଋଷ ନିଜର ସମରାଭ୍ୟାସ ଅଧିକ ସକ୍ରିୟ କରିଛି । ବ୍ରିଟେନ ପ୍ରଧାନମନ୍ତ୍ରୀ ବୋରିସ ଜନସନ କହିଛନ୍ତି, ୟୁରୋପରେ ବର୍ତ୍ତମାନ ସବୁଠାରୁ ନିରାପତ୍ତା ସଙ୍କଟ ଦେଖାଦେଇଛି । ଜଳପଥର ଅନ୍ତର୍ଜାତୀୟ ସୀମାରେଖାକୁ ଋଷ କବଜା କରିଥିବା ବେଳେ ଅନ୍ୟାନ୍ୟ ୟୁରୋପୀୟ ରାଷ୍ଟ୍ର ଚିନ୍ତା ବ୍ୟକ୍ତ କରିଛନ୍ତି ।
‘ବାପା ନଜିତିବା ଯାଏଁ ବାହା ହେବିନି’
ଅମୃତସର: ପଞ୍ଜାବ ବିଧାନସଭା ନିର୍ବାଚନରେ ଏବେ ହାଇ ଭୋଲଟେଜ ପ୍ରଚାର । ଏହି ପ୍ରଚାର ମୈଦାନରେ ଏବେ ଏଣ୍ଟ୍ରି ହୋଇଛି ଜଣେ ଯୁବତୀଙ୍କର । ଯିଏ ନିଜ ବାପାଙ୍କ ପରି ଶବ୍ଦ ବାଣରେ ବିରୋଧୀଙ୍କୁ ଘାଇଲା କରିବା ସହ ବାପାଙ୍କ ପାଇଁ ଭୋଟ ଭିକ୍ଷା କରୁଛନ୍ତି । ଏବେ ବୁଝି ପାରୁଥିବେ ଏମିତି କିଏ ଅଛି ଯିଏ ଶବ୍ଦ ବାଣରେ ବିରୋଧୀ ହୁଅନ୍ତୁ ଅବା ନିଜ ଦଳର ନେତା, ସମସ୍ତଙ୍କୁ ଘାଇଲା କରୁଥିବେ । ଠିକ ଭାବୁଛନ୍ତି, ଆମେ ପୂର୍ବ ଅମୃତସର ବିଧାନସଭା ଆସନରୁ କଂଗ୍ରେସ ପ୍ରାର୍ଥୀ ହୋଇଥିବା ନବଜ୍ୟୋତି ସିଂ ସିଦ୍ଧୁଙ୍କ କଥା କହୁଛୁ । ଏବେ ତାଙ୍କ ପାଇଁ ପ୍ରଚାର ମୈଦାନକୁ ଓହ୍ଲାଇଛନ୍ତି ଝିଅ ରାବିଆ ସିଦ୍ଧୁ ।
ବାପାଙ୍କ ଭଳି ଫୁଲ୍ ଷ୍ଟାଇଲରେ ପ୍ରଚାର ମୈଦାନକୁ ଏଣ୍ଟ୍ରି କରିଛନ୍ତି ରାବିଆ । ଆଉ ଆରମ୍ଭରୁ ସିଦ୍ଧୁଙ୍କ ବିରୋଧରେ ପ୍ରାର୍ଥୀ ହୋଇଥିବା ବିକ୍ରମ ମଜିଠିଆଙ୍କୁ ଉପରେ ଶବ୍ଦବାଣ ମାରିଛନ୍ତି ।
ରାବିଆ କହିଛନ୍ତି, ‘ମଜିଠାରେ ଗ୍ରସରୀ ଦୋକାନରେ ବି ନିଶାଦ୍ରବ୍ୟ ବିକ୍ରି ହେଉଛି । ଲୋକ ସବୁ ଜାଣିଛନ୍ତି ଭୋଟ କାହାକୁ ଦେବା ଦରକାର ।’
ଆଗକୁ ସେ କହିଛନ୍ତି, ‘ବାପା ନିର୍ବାଚନରେ ବିଜୟ ମୁକୁଟ ନପିନ୍ଧିବା ପର୍ଯ୍ୟନ୍ତ ମୁଁ ବାହା ହେବିନି । ବାପା ସତ୍ୟ ପଥରେ ଅଛନ୍ତି, ତେଣୁ ତାଙ୍କ ଆଗକୁ ସମସ୍ୟା ଆସୁଛି ।’
ଏହାସହ ସେ ଲୋକଙ୍କୁ ପ୍ରଶ୍ନ କରିଛନ୍ତି କାହାର କାହା ସଙ୍ଗରେ ମୁକାବିଲା ହେଉଛି । ଡ୍ରଗ୍ସ କବଳରୁ ନିଜ ପିଲାଙ୍କୁ ବଞ୍ଚାଇବ ନା ସେମାନଙ୍କୁ ନିଶାଡି ହେବାକୁ ଛାଡିଦେବ ବୋଲି ପଚାରିଛନ୍ତି ରାବିଆ ।
ପ୍ରଚାର ବେଳେ ସେ ଆହୁରି କହିଛନ୍ତି, ‘ଟଙ୍କା ନେଇ ଲୋକ ବିକ୍ରି ହୋଇଯାଉଥିଲେ । ହେଲେ ଆଗକୁ ଆଉ ସେମିତି ହେବନି । ବିକ୍ରମ ମଜିଠିଆ ବାପାଙ୍କ ପାଖରୁ ରାଜନୀତି ଶିଖିଛନ୍ତି । ଆଜି ତାଙ୍କ ସହ ବାପା ସତ୍ୟ ଓ ନ୍ୟାୟର ଲଢେଇ ଲଢୁଛନ୍ତି । ଅନ୍ୟ କୌଣସି ସ୍ଥାନରୁ କାହିଁକି ସେ ନିର୍ବାଚନ ଲଢୁନାହାନ୍ତି । କଂଗ୍ରେସ କର୍ମୀଙ୍କୁ ଧମକ ଦିଆଯାଉଛି । ସେମାନଙ୍କୁ ଭୟଭିତ କରାଯାଉଛି ।’
ପୋଲିସ ଆଗରେ ମାଜିଷ୍ଟ୍ରେଟଙ୍କ କଲର ଘୋଷାଡ଼ି ମାଡ଼, ଭିଡିଓ ଭାଇରାଲ
ପାଟଣା: ବିହାରର ପାଟଣାରେ ପୋଲିସ ଉପସ୍ଥିତିରେ ମାଜିଷ୍ଟ୍ରେଟଙ୍କୁ ମାଡ । ଉତ୍ତ୍ୟକ୍ତ ଲୋକ ସାର୍ଟ କଲର ଧରି ଘୋଷାଡିଲେ, ମାଡ ମାରିବା ସହ ଅସଭ୍ୟ ଭାଷାରେ କଲେ ଗାଳିଗୁଲଜ । ସବୁ ଘଟଣା ପୋଲିସ ଉପସ୍ଥିତିରେ ଘଟୁଥିଲେ ବି ନାଚାର ପୋଲିସ୍ କର୍ମଚାରୀ ଦେଖଣାହାରୀ ସାଜିଥିଲେ ।
ଘଟଣା ପାଟଣା ମ୍ୟୁନିସିପାଲ କର୍ପୋରେସନର ୬୦ ନମ୍ବର ଓ୍ବାର୍ଡ ଖାଜେକଲା ଥାନା ଅଞ୍ଚଳରେ ଘଟିଛି । ଏକ ସରକାରୀ ଜମିରୁ ଜବରଦଖଲ ହଟାଇବାକୁ ଜିଲ୍ଲାପାଳଙ୍କ ନିର୍ଦ୍ଦେଶରେ ମାଜିଷ୍ଟ୍ରେଟ ନଗରନିଗମ ଟିମ୍ ସହ ଯାଇଥିବା ବେଳେ ଘଟଣା ଘଟିଛି । ସାଙ୍ଗରେ ଜେସିବି ମେସିନ ଓ ପୂରା ପୋଲିସ ଟିମ ଥିଲେ । ହେଲେ ଲୋକେ ତାଙ୍କୁ ମୁଥା ମାରିବା ସହ ଗାଳିଗୁଲଜ କରିଥିଲେ । ନଗରନିଗମର ଅନ୍ୟ କର୍ମଚାରୀ ତାଙ୍କୁ ଉଦ୍ଧାର କରିବା ବଦଳରେ ଘଟଣା ସ୍ଥଳରୁ ଦୌଡ଼ି ପଳାଇଥିଲେ ।
ଏହି ସମୟରେ ମାଜିଷ୍ଟ୍ରେଟ୍ ଉଦ୍ଧାର ପାଇଁ ବଞ୍ଚାଅ ବଞ୍ଚାଅ ଚିଲ୍ଲାଉ ଥିଲେ । ହେଲେ ନା ନଗର ନିଗମ କର୍ମଚାରୀ, ନା ଉପସ୍ଥିତ ପୋଲିସ କେହି ତାଙ୍କୁ ଉଦ୍ଧାର କରିବାକୁ ଆସି ନଥିଲେ । ଏପରିକି ଉତ୍ତ୍ୟକ୍ତ ଲୋକେ ମାଡ ମାରୁଥିବା ବେଳର ଭିଡିଓ ରେକର୍ଡିଂ କରି ସୋସିଆଲ ମିଡିଆରେ ଭାଇରାଲ କରି ଦେଇଥିଲେ ।
ଏବେ ପୋଲିସ ଏକ ମାମଲା ରୁଜୁ କରି ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ପ୍ରସ୍ତୁତି ଚଲାଇଛି ।
ସୂଚନାଯୋଗ୍ୟ ମ୍ୟୁନିସିପାଲିଟିର ୬୦ ନମ୍ବର ଓ୍ବାର୍ଡରେ ଏକ ପାନୀୟଜଳ ଯୋଗାଣ ପ୍ରକଳ୍ପ ନିର୍ମାଣ କରାଯାଉଛି । ହେଲେ ଜବରଦଖଲ କାରଣରୁ ଏହି ପ୍ରକଳ୍ପ ପ୍ରାୟ ବର୍ଷେ ହେବ ବନ୍ଦ ରହିଛି । ଯାହାକୁ ନେଇ ଉପରିସ୍ଥ ଅଧିକାରୀଙ୍କ ବିରୋଧରେ ଏହାକୁ ନେଇ ଅଭିଯୋଗ ହୋଇଥିଲା । ପରେ ଜିଲ୍ଲାପାଳଙ୍କ ନିର୍ଦ୍ଦେଶରେ ଜବରଦଖଲ ହଟାଇବାକୁ ମାଜିଷ୍ଟ୍ରେଟ୍ ସେଠାରେ ପହଞ୍ଚିଥିଲେ ।
ଟସ୍ ଜିତି ବ୍ୟାଟିଂ କରିବ ଭାରତ, ଦଳରେ ୪ ପରିବର୍ତ୍ତନ
ଅହମ୍ମଦାବାଦ: ଆଜି ଅହମ୍ମଦାବାଦରେ ଖେଳାଯାଉଛି ଭାରତ- ଓ୍ୱେଷ୍ଟଇଣ୍ଡିଜ୍ ତୃତୀୟ ତଥା ଅନ୍ତିମ ଦିନିକିଆ । ଏହି ମ୍ୟାଚରେ ଟସ୍ ଜିତି ବ୍ୟାଟିଂ କରିବାକୁ ନିଷ୍ପତ୍ତି ନେଇଛି ଟିମ୍ ଇଣ୍ଡିଆ । ତୃତୀୟ ମ୍ୟାଚରେ ଭାରତ ପକ୍ଷରୁ ଚାରୋଟି ପରିବର୍ତ୍ତନ କରାଯାଇଛି । କରୋନା ପରେ ଭାରତୀୟ ଦଳର ଚୁଡାନ୍ତ ଏକାଦଶକୁ ଫେରିଛନ୍ତି ଓପନର ଶିଖର ଧାଓ୍ୱନ । ସେହିପରି ୟୁଜିବେନ୍ଦ୍ର ଚହଲଙ୍କ ସ୍ଥାନରେ କୁଲଦୀପ ଯାଦବ, କେଏଲ ରାହୁଲଙ୍କ ସ୍ଥାନରେ ଶ୍ରେୟସ ଆୟର ଓ ଶାର୍ଦ୍ଦୁଳ ଠାକୁରଙ୍କ ସ୍ଥାନରେ ଦିପକ ଚହର ଚୁଡାନ୍ତ ଏକାଦଶରେ ସାମିଲ ହୋଇଛନ୍ତି ।
🚨 Team News 🚨
4⃣ changes for #TeamIndia as Shikhar Dhawan, Shreyas Iyer, Deepak Chahar & Kuldeep Yadav replace KL Rahul, Deepak Hooda, Shardul Thakur & Yuzvendra Chahal in the team. #INDvWI @Paytm
Follow the match ▶️ https://t.co/9pGAfWtQZV
Here's our Playing XI 🔽 pic.twitter.com/BrCxdkHRRg
— BCCI (@BCCI) February 11, 2022
ଏହି ମ୍ୟାଚ ପୂର୍ବରୁ ଖେଳାଯାଇଥିବା ଦୁଇଟି ଦିନିକିଆରେ ଦମଦାର ବିଜୟ ହାସଲ କରି ସିରିଜ୍ ହାତେଇ ସାରିଛି ଟିମ୍ ଇଣ୍ଡିଆ । ଏହି ସିରିଜକୁ ୨-୦ରେ ବିଜୟ ଲାଭ କରିବା ପରେ ଏହି ମ୍ୟାଚକୁ ଜିତି ସିରିଜକୁ କ୍ଲିନ ସୁଇପ୍ କରିବା ଲକ୍ଷ୍ୟରେ ରୋହିତ ବ୍ରିଗେଡ । ଅନ୍ୟପକ୍ଷରେ ଅଧିନାୟକ ଭାବରେ ପ୍ରଥମ ଦିନିକିଆ ସିରିଜକୁ ୩-୦ରେ ନିଜ ନାମରେ କରିବାକୁ ଚେଷ୍ଟା କରିବେ ରୋହିତ ଶର୍ମା । ଅନ୍ୟପକ୍ଷରେ ଓ୍ୱେଷ୍ଟଇଣ୍ଡିଜ୍ କଥା ଯଦି କହିବା ତାହାଲେ ଏହି ସିରିଜର ପ୍ରଥମ ଦୁଇଟି ମ୍ୟାଚରେ ପରାଜୟ ବରଣ କରି ସିରିଜ୍ ହାତଛଡା କରି ସାରିଛି । ତେଣୁ ଆଜିର ଅନ୍ତିମ ଦିନିକିଆରେ ସମ୍ମାନ ରକ୍ଷା କରିବାକୁ ପଡ଼ିଆକୁ ଓହ୍ଲାଇବ ଓ୍ୱେଷ୍ଟଇଣ୍ଡିଜ୍ ।
୧୮ ଘଣ୍ଟା ପରେ ଜୀଅନ୍ତା ଉଦ୍ଧାର
ଗୁରୁଗାଓଁ: ଗତକାଲି ସନ୍ଧ୍ୟାରେ ଦିଲ୍ଲୀର ସେଟ ଗୁରୁଗାଓଁରେ ବିଲ୍ଡିଂ ଭୁଶୁଡ଼ି ଫସିଥିବା ଭାରତୀୟ ରେଳବାଇର ଇଞ୍ଜିନିୟରିଂ ସର୍ଭିସର ଅଫସିର ଅରୁଣ ଶ୍ରୀବାସ୍ତଙ୍କଙ୍କୁ ଜୀବତ ଉଦ୍ଧାର କରାଯାଇଛି । ୧୮ ଘଣ୍ଟାର ଅପରେସନ ପରେ ତାଙ୍କୁ ଭୁଶୁଡ଼ି ପଡିଥିବା ବିଲ୍ଡିଂ ତଳୁ ଉଦ୍ଧାର କରାଯାଇଛି । ବିଲ୍ଡିଂ ଧସିବା ପରେ ତାଙ୍କ ଗୋଡ ଭଙ୍ଗା କଂକ୍ରିଟ ଭିତରେ ଫସି ରହିଥିଲା । ଉଦ୍ଧାର ପରେ ତାଙ୍କୁ ମେଡିକାଲ ଚେକଅପ କରାଯିବା ପରେ ହସ୍ପିଟାଲକୁ ପଠାଇ ଦିଆଯାଇଛି । ଏବେ ଉଦ୍ଧାରକାରୀ ଦଳ ବିଲ୍ଡିଂର ପ୍ରଥମ ମହଲାରେ ଫସିଥିବା ଜଣେ ମହିଳାଙ୍କ ଉଦ୍ଧାରରେ ଲାଗିଛନ୍ତି । ଏପଟେ ଦୁର୍ଘଟଣା ତଦନ୍ତ ଆରମ୍ଭ ହୋଇଛି । ଅତିରିକ୍ତ ଜିଲ୍ଲାପାଳଙ୍କୁ ତଦନ୍ତ ଦାୟିତ୍ବ ଦିଆଯାଇଛି ।
ସୂଚନାଯୋଗ୍ୟ, ଗତକାଲି ସନ୍ଧ୍ୟା ପ୍ରାୟ ୬ଟାରେ ଗୁରୁଗାଓଁ ସେକ୍ଟ ୧୦୯ ଚିନ୍ତଲ ପେରାଡାଇସ୍ ହାଇ ରାଇଜ ସୋସାଇଟର ଡି-ବ୍ଲକରେ ଘଟିଛି । ଷଷ୍ଠ ମହଲାରେ ମରାମତି କାମ ଚାଲିଥିବା ବେଳେ ଏକ ଫ୍ଲାଟର ଡ୍ରଇଙ୍ଗ ରୁମ୍ ଭାଙ୍ଗି ଯାଇଥିଲା । ଏହାପରେ ଉପରୁ ତଳ ପର୍ଯ୍ୟନ୍ତ ସବୁ ମହଲାର ଛାତ ଓ ଫ୍ଲୋର କ୍ଷତିଗ୍ରସ୍ତ ହୋଇଛି । ଗ୍ରାଉଣ୍ଡ ଫ୍ଲୋରରୁ ୬ଷ୍ଠ ମହଲା ପର୍ଯ୍ୟନ୍ତ କିଛି ଫ୍ଲାଟ ବନ୍ଦ ଥିବାରୁ ବଡ ଧରଣର ଜୀବନହାନୀ ହୋଇନାହିଁ । ତଥାପି ଯେଉଁ ଫ୍ଲାଟରେ ଲୋକ ରହୁଥିଲେ ସେମାନେ କ୍ଷତିଗ୍ରସ୍ତ ହୋଇଛନ୍ତି । ଛାତ ଭୁଶୁଡ଼ିବା ପରେ ପ୍ରାୟ ୧୦ ଜଣ ଆହତ ହୋଇଛନ୍ତି । ଲନଡିଆରଏଫର ୩ଟି ଟିମ୍ ଉଦ୍ଧାର କାର୍ଯ୍ୟରେ ଲାଗିଛନ୍ତି ।
ମୁଖ୍ୟମନ୍ତ୍ରୀ ମନୋହର ଲାଲ ଖଟ୍ଟର ଦୁର୍ଘଟଣାକୁ ନେଇ ପ୍ରଶାସନିକ ଅଧିକାରୀଙ୍କୁ ନିର୍ଦ୍ଦେଶ ଜାରି କରିବା ସହ ନିଜେ ଉଦ୍ଧାର କାର୍ଯ୍ୟର ତଦାରଖ କରୁଛନ୍ତି ।
ଡେଲଟାକୁ ପଛରେ ପକାଇଲା ଓମିକ୍ରନ, ରାଜ୍ୟରେ ୯୮ ପ୍ରତିଶତ ନମୁନାରେ ଓମିକ୍ରନ
ଭୁବନେଶ୍ୱର: ରାଜ୍ୟରେ ୯୮ ପ୍ରତିଶତ ନମୁନାରେ ଓମିକ୍ରନ ଭୂତାଣୁ । ଡେଲଟା ଭୂତାଣୁଠୁ ବହୁ ଆଗରେ ରହିଛି ଓମିକ୍ରନ । ଇନଷ୍ଟିଚ୍ୟୁଟ ଅଫ୍ ଲାଇଫ୍ ସାଇନ୍ସର ଜିନୋମ ସିକ୍ୱେନସିଂରୁ ଏହି ତଥ୍ୟ ସାମ୍ନାକୁ ଆସିଛି । ପାଖାପାଖି ୯୮ ପ୍ରତିଶତ ନମୁନାରେ ଓମିକ୍ରନ ଭୂତାଣୁ ଥିବା ଜଣାପଡିଛି । ଜାନୁଆରୀ ୨୮ ତାରିଖରୁ ଫେବ୍ରୁଆରୀ ୪ ତାରିଖ ମଧ୍ୟରେ ୨୪୧ଟି ନମୁନାର ଜିନୋମ ସିକ୍ୱେନ୍ସିଂ କରାଯାଇଥିଲା । ସେଥିରେ ୨୩୫ ନମୁନାରେ ଓମିକ୍ରନ ଭୂତାଣୁ ରହିଥିବା ସ୍ପଷ୍ଟ ହୋଇଛି । ମାତ୍ର ୬ଟିରେ ଡେଲଟା ଭୂତାଣୁ ଚିହ୍ନଟ ହୋଇଛି । ଯେଉଁ ୨୩୫ ନମୁନାରେ ଓମିକ୍ରନ ଚିହ୍ନଟ ହୋଇଛି, ସେଥିରେ ୨୧୭ଟିରେ ବିଏ. ଟୁ ସବ୍ ଭ୍ୟାରିଆଂଟ ରହିଥିବା ବେଳେ ବିଏ. ଓ୍ବାନ. ଓ୍ବାନ ୧୨ଟି ଚିହ୍ନଟ ହୋଇଛି । ମାତ୍ର ୬ଟି ନମୁନାରେ ବିଏ. ଓ୍ବାନ ରହିଛି । ଖୋର୍ଦ୍ଧାରେ ୪ ଟି ନମୁନାରେ ଡେଲଟା ଭୂତାଣୁ ଥିବା ବେଳେ ୪୫ ନମୁନାରେ ଓମିକ୍ରନ ରହିଥିବା ଜଣାପଡିଛି । ଗଂଜାମରୁ ସଂଗ୍ରହ କରାଯାଇଥିବା ୪୭ଟି ନମୁନାରେ ରହିଛି ଓମିକ୍ରନ । ସେହିପରି କଟକରୁ ଆସିଥିବା ସମସ୍ତ ୩୦ଟି ନମୁନାରେ ଓମିକ୍ରନ ଚିହ୍ନଟ ହୋଇଛି ।
ବିଧାନ ପରିଷଦ ସଂକଳ୍ପ ପାରିତ ହୋଇଛି, କେନ୍ଦ୍ରକୁ ଯାଇଛି ପ୍ରସ୍ତାବ
ଭୁବନେଶ୍ୱର: ଓଡ଼ିଶାରେ ବିଧାନ ପରିଷଦ ନେଇ ଧରାପଡ଼ିଲା କେନ୍ଦ୍ରମନ୍ତ୍ରୀଙ୍କ ମିଛ । ବିଧାନସଭାରେ ସଙ୍କଳ୍ପ ପାରିତ ହେବା ପରେ ୨୦୧୮ ସେପ୍ଟେମ୍ବର ୧୮ ତାରିଖରେ ଏହା କେନ୍ଦ୍ର ସରକାରଙ୍କ ନିକଟକୁ ପଠାଯାଇଥିବା ବାଚସ୍ପତି ସୂର୍ଯ୍ୟ ନାରାୟଣ ପାତ୍ର କହିଛନ୍ତି । ରାଜ୍ୟସଭା ଓ ଲୋକସଭା ସଚିବଙ୍କୁ ଏହା ପଠାଯାଇଥିଲା । ଓଡ଼ିଶା ବିଧାନ ପରିଷଦ ଗଠନ ପାଇଁ ୨୦୧୫ରୁ ଉଦ୍ୟମ ହୋଇଆସୁଛି । ଏଥିପାଇଁ ବିଧାୟକ ନୃସିଂହ ସାହୁଙ୍କ ଅଧ୍ୟକ୍ଷତାରେ ଏକ କମିଟି ଗଠନ କରାଯାଇଥିଲା । ୨୦୧୫ ଜାନୁଆରୀ ୧୯ରେ ଏହି କମିଟିର ପ୍ରଥମ ବୈଠକ ବସିଥିଲା ।
୨୦୧୫ ଫେବ୍ରୁଆରୀ ୨ରେ କର୍ଣ୍ଣାଟକ, ମେ’ ୨୦ରେ ମହାରାଷ୍ଟ୍ର, ୨୦୧୮ ଜୁଲାଇ ୪ରେ ବିହାର, ଜୁଲାଇ ୧୬ରେ ତେଲେଙ୍ଗାନା ଗସ୍ତ କରିଥିଲା ଏହି କମିଟି । ବିଭିନ୍ନ ରାଜ୍ୟ ଗସ୍ତ କରିବା ପରେ ରାଜ୍ୟ ସରକାରଙ୍କୁ ରିପୋର୍ଟ ଦେଇଥିଲା କମିଟି । ୨୦୧୮ ଅଗଷ୍ଟ ୨୯ତାରିଖରେ ସଂସଦୀୟ ବ୍ୟାପାର ମନ୍ତ୍ରୀ ବିଧାନ ପରିଷଦ ଗଠନ ନେଇ ନୋଟିସ୍ କରିଥିଲେ । ସେପ୍ଟେମ୍ବର ୫ରେ ସବୁ ବିଧାୟକଙ୍କୁ ନୋଟିସ୍ ଦିଆଯାଇ ୬ରେ ବିଧାନସଭାରେ ସରକାରୀ ଦଳ ଏନେଇ ପ୍ରସ୍ତାବ ଆଣିଥିଲେ । ସର୍ବସମ୍ମତିକ୍ରମେ ଏହି ପ୍ରସ୍ତାବ ବିଧାନସଭାରେ ଅନୁମୋଦନ ଲାଭ କରିଥିଲା । ୨୦୧୮ ସେପ୍ଟେମ୍ବର ୧୮ରେ ଲୋକସଭା ଓ ରାଜ୍ୟସଭା ସଚିବ, ଆଇନ ମନ୍ତ୍ରାଳୟ ସଚିବ, କେନ୍ଦ୍ର ସଂସଦୀୟ ବ୍ୟାପାର ସଚିବଙ୍କୁ ସଂକଳ୍ପ ପଠାଯାଇଥିଲା । ତେବେ ଏବେ କେନ୍ଦ୍ରର ଏଭଳି କହିବା ଦୁଃଖ ଲାଗୁଛି ବୋଲି ବାଚସ୍ପତି ସୂର୍ଯ୍ୟ ନାରାୟଣ ପାତ୍ର କହିଛନ୍ତି ।
ଅନ୍ୟପକ୍ଷରେ ରାଜ୍ୟ ବିଧାନ ପରିଷଦ ସଂକଳ୍ପ ତଥ୍ୟ କେନ୍ଦ୍ର ପାଇନଥିବା ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି ବିଜେଡି ସାଂସଦ ମୁନ୍ନା ଖାନ୍ । ୨୦୧୮ରୁ ବିଧାନ ପରିଷଦ ସଂକଳ୍ପ କେନ୍ଦ୍ରକୁ ରାଜ୍ୟ ପଠାଇଛି । କେନ୍ଦ୍ର ସେତେବେଳେ ଏହି ପ୍ରସଙ୍ଗରେ ଚୁପ ରହିଥିଲା । ଏବେ ଏହି ପ୍ରସଙ୍ଗକୁ କାହିଁକି ମନା କରୁଛନ୍ତି ତାହା ବୁଝି ହେଉନି ବୋଲି କହିଛନ୍ତି ବିଜେଡି ସାଂସଦ ମୁନ୍ନା ଖାନ୍ ।